دلوقت مع تأخر سن الجواز وتغير رغبات الستات وأهدافهم الحياتية ووجود مصطلحات جديدة زي الشخص اللا إنجابي و ثقافة الطفل الواحد، زيادة معدلات الطلاق وضيق المعيشة بقينا بنشوف أزواج كتير بيلجأوا لتأجيل الحمل في أول الجواز مع اختلاف أسبابهم بقه مهم نناقش الفكرة دي وليه بقت موجودة وإزاي نواجه الأهل بها.
اسمي ياسمين أبوالعزم، بشتغل في النسا والتوليد من 2015 وحاصلة على ماجستير النسا والتوليد جامعة المنصورة، بحب دايماً الستات يكونوا فاهمين جسمهم والاضطرابات اللي بتحصل فيه ايه سببها وازاي يتعاملوا معاها وامتى تروح للدكتور وعشان كده بدأت منصة Neswa Diaries على الانستجرام والتيك توك، لكن بعد شوية أخدت بالي إن مش بس صوت الطب اللي الستات بيسمعوه لكن صوت الأهل والمجتمع أعلى وأقوى كمان بالنسبالهم عشان كده قررت اعمل البودكاست ده، بودكاست هيتناول الأمور الطبية من وجهة نظر مجتمعية أكتر وإيه رد العلم على صوت المجتمع، متحمسة اوصلكم صوتي واسمع صوتكم.