بيني وبينك

الذكرى الحلوة ما هي مجرد صورة قديمة أو موقف عدّى، هي حاجات تعيش داخلنا.. عشان كدا اصنع الذكرى اللي تبغاها اليوم يمكن بكرة تكون هي السبب اللي يجمل يومك، لأنه مو دايمًا في بكرة ..

العلاقات مو بس أشخاص نعرفهم أو نشاركهم تفاصيل حياتنا، هي أعمق وأولها وأثمنها علاقتك بربك زي طريق طويل تمشي فيه كل شي يكون فيه مسهل، ما تواجهك عقبة إلا ويفتح لك باب. بعدها يجي تقديرك للناس اللي حولك محبتك لهم وحتى إحسانك للي ما تعرفهم ولا تربطك فيهم أي صلة. كل إنسان تقابله يترك أثر بكلمة، بدعوة، بنظرة. والأجمل إنك تقدر وجودهم وتوزع الطيب من كل قلب صادق، ولاكن الأهم وسط كل هذه العلاقات لاتنسى نفسك، لأن اللي يعرف قيمة نفسه ويصونها يقدر يوزع حب حقيقي، ويزرع خير لكل من حوله وحتى مع اللي مايعرفهم..

في زحمة الايام ننسى احياناً نلتفت للنعم اللي تحيطنا ،، وان الله سمع لمن حمده ، التقدير للنعم الصغيره يغير نظرتنا للحياة بشكل كـامل لما نمارس الامتنان، ومع الوقت يسير اسلوب حياتنا..الامتنان مايغير الواقع لكنه يغيرك ويخلي كل شي يبان احلى اتذكر انُ في ناس تدور السعادة وناس تخلقها من الحاجات الصغيره اللي حولها ..

في لحظات تقدر توقف فيها كل شي إلا صوتك الداخلي ،،وكيف ترجع تلاقي نفسك بعد ماضيعتها وعن الحب بس مو الحب اللي متعودين عليه، الحب اللي يبدأ منك لنفسك. وقفت مع نفسي هو مو بس مجرد عنوان، هي لحظة نحتاجها فعلاً. وأتذكر دائماً، كل شي يبدأ منك أنت ..

مافي احد ثابت كلنا نتغير، نتشكل ونتعلم. مو دايماً يكون التغيير سهل، بس غالباً يكون هو الطريق للنور، وسط كل هذا نكون صادقين مع نفسنا، ونخلي قلبنا مرن يتقبل التغييرات بدون ما يضيع وكل تغيير اعتبره خطوة جديدة لمشوارك.

بيني وبينك وسط كل التعب والضجيج في لحظة سكون ونور يستناك في نهاية الطريق