Discover
ព្រឹត្តិការណ៍កម្ពុជាប្រចាំថ្ងៃ
![ព្រឹត្តិការណ៍កម្ពុជាប្រចាំថ្ងៃ ព្រឹត្តិការណ៍កម្ពុជាប្រចាំថ្ងៃ](https://is1-ssl.mzstatic.com/image/thumb/Podcasts122/v4/da/06/74/da0674fa-b7f9-da17-2876-e3fc05f01bfa/mza_9141042911181880173.jpg/400x400bb.jpg)
ព្រឹត្តិការណ៍កម្ពុជាប្រចាំថ្ងៃ
Author: RFI ខេមរភាសា / Khmer
Subscribed: 63Played: 222Subscribe
Share
© France Médias Monde
Description
រៀងរាល់ថ្ងៃ ពីថ្ងៃចន្ទ ដល់ថ្ងៃអាទិត្យ យើងនឹងលើកយកព្រឹត្តិការណ៍ក្តៅគគុកជាងគេបង្អស់មួយ នៅកម្ពុជា មកពន្យល់ ដោយមានអន្តរាគមន៍ពីឥស្សរជននយោបាយ អ្នកជំនាញ ឬមន្រ្តីសង្គមស៊ីវិល។
1438 Episodes
Reverse
នៅថ្ងៃទី២៤ ខែមិថុនា ឆ្នាំ២០២៤ ព្រះមហាក្សត្រកម្ពុជាបានចេញព្រះរាជក្រឹត្យតែងតាំង និងផ្ទេរមុខតំណែងមន្ដ្រីថ្នាក់ក្រោមជាតិចំនួន១២រូប។ ក្នុងចំណោមនោះ ៤រូបត្រូវបានប្តូរពីតំណែងអភិបាលខេត្តទៅធ្វើជារដ្ឋលេខាធិការនៅក្រសួងមហាផ្ទៃ និង៨នាក់ទៀត ជាអភិបាលនិងអភិបាលរងខេត្តដែលត្រូវប្តូរផ្លាស់ទៅដឹកនាំនៅក្នុងខេត្តផ្សេង។ ខេត្តដែលនឹងផ្លាស់ប្ដូរក្បាលម៉ាស៊ីនដឹកនាំលើកនេះរួមមានខេត្តកណ្ដាល ព្រះសីហនុកំពង់ស្ពឺ កំពង់ធំ តាកែវ ត្បូងឃ្មុំ ស្ទឹងត្រែង និងឧត្តរមានជ័យ។ អ្នកតាមដានសង្គមមិនជំទាស់នឹងការតែងតាំង និងដោះដូរនេះទេ តែពួកគេចង់ឃើញមន្ត្រីរដ្ឋទាំងនោះមានឆន្ទៈបម្រើរាស្ត្រនៅតាមមូលដ្ឋាន។
ឃ្លីបវីដេអូខ្លីដែលបង្ហាញពីអតីតឧកញ៉ា ស្រី ស៊ីណា បាញ់ទៅលើគូរស្នេហ៍មួយគូនៅរាជធានីភ្នំពេញកាលពីសប្តាហ៍មុនកំពុងត្រូវបានបន្តផ្សព្វផ្សាយ និងចែករំលែកតៗគ្នានៅឡើយ។ ក្រសួងព័ត៌មានកាលពីពេលថ្មីៗនេះបានស្នើឲ្យសារព័ត៌មាន និងមហាជនបញ្ឈប់ផ្សព្វផ្សាយ និងចែកចាយវីដេអូដ៏ឃោរឃៅមួយនេះតាមបណ្តាញសង្គម។ ទង្វើរបស់អតីតឧកញ៉ា ស្រី ស៊ីណា អាចត្រូវផ្តន្ទាទោសដាក់គុកអតិបរមាពី១០ ទៅ១៥ឆ្នាំ។ គឺជាទំហំទោសដែលមហាជនមិនពេញចិត្ត និងយល់ឃើញថា មិនសក្តិសមនឹងទង្វើដ៏ព្រៃផ្សៃរបស់ជនល្មើស។ ចំណែកអ្នកតាមដានសង្គមនានាយល់ឃើញថាបញ្ហានេះ គេត្រូវមានការថ្លឹងថ្លែងរវាងក្រមសីលធម៌ និងយុត្តិធម៌សង្គមផងដែរ។
នៅទីបំផុត អតីតឧកញ៉ា ស្រី ស៊ីណា ត្រូវអយ្យការអមសាលាដំបូងក្រុងភ្នំពេញសម្រេចចោទប្រកាន់ពីបទឃាតកម្ម និងប៉ុនប៉ងឃាតកម្ម។ ការសម្រេចនេះធ្វើឡើង ក្រោយអតីតឧកញ៉ារូបនេះបានប្រព្រឹត្តិបទល្មើសបាញ់ប្រហារមួយនៅខណ្ឌច្បារអំពៅដោយបណ្តាលឲ្យមនុស្ស២នាក់បាត់បង់ជីវិត និង២នាក់ទៀតរងរបួស។ ជាមួយនឹងបទចោទប្រកាន់នេះ អតីតឧកញ៉ា ស្រី ស៊ីណា អាចនឹងដេកក្នុងគុកយ៉ាងតិច ៣០ឆ្នាំ។ តែចំពោះអ្នកឃ្លាំមើលសង្គម ទោះត្រូវដេកក្នុងគុក ៣០ឆ្នាំ ក៏មិនសមនឹងទង្វើបាញ់ប្រហារដ៏អមនុស្សធម៌របស់លោក ស្រី ស៊ីណា ដែរ។ សូមស្តាប់សេចក្តីរាយការណ៍របស់ ជួប នរក្សា៖
ធនាគារពិភពលោក នៅថ្ងៃព្រហស្បតិ៍ទី២០មិថុនា បានអនុម័តនូវកញ្ចប់ហិរញ្ញប្បទានចំនួន២៧៥លានដុល្លារអាមេរិក សម្រាប់ការទ្រទ្រង់កំណើនសេដ្ឋកិច្ចកម្ពុជាទៅពេលអនាគត។ បើតាមសេចក្តីប្រកាសព័ត៌មានរបស់ធនាគារពិភពលោក ហិរញ្ញប្បទានទឹកប្រាក់ជិត៣០០លានដុល្លារអាមេរិកនេះ ត្រូវយកទៅប្រើសម្រាប់ដោះស្រាយបញ្ហាសេដ្ឋកិច្ចដែលកម្ពុជាកំពុងប្រឈម តួយ៉ាងផ្នែកផលិតកម្ម ការអភិវឌ្ឍធនធានមនុស្ស និងការប្រកួតប្រជែងរបស់វិស័យឯកជន។ អ្នកជំនាញផ្នែកសេដ្ឋកិច្ច យល់ឃើញថា ហិរញ្ញប្បទានរបស់ធនាគារពិភពលោកពេលនេះ ជាឱកាសល្អសម្រាប់ឲ្យកម្ពុជារុញកំណើននិងភាពធន់សេដ្ឋកិច្ចរបស់ខ្លួន។ ដូច្នេះ តើហិរញ្ញប្បទានស្ថាប័នអន្តរជាតិ អាចជួយអ្វីខ្លះដល់កំណើននិងភាពធន់នៃសេដ្ឋកិច្ចកម្ពុជា?
នៅថ្ងៃទី២០ ខែមិថុនា ឆ្នាំ២០២៤ ក្រសួងមហាផ្ទៃបានប្រកាសដាក់ឱ្យសាកល្បងនូវសេវាធ្វើលិខិតឆ្លងដែនតាមអនឡាញ។ សេវាបន្ថែមមួយនេះត្រូវបានក្រសួងមហាផ្ទៃអះអាងថា ជាការបង្កើនប្រសិទ្ធភាពនៃការផ្ដល់សេវាឱ្យកាន់តែល្អ ជូនប្រជាពលរដ្ឋស្របតាមយុទ្ធសាស្ដ្របញ្ចកោណរបស់រដ្ឋាភិបាល។ គួរបញ្ជាក់ថា នៅក្នុងរឿងធ្វើលិខិតឆ្លងដែននេះ គេតែងឮប្រជាពលរដ្ឋខ្លះលើកឡើងពីការចំណាយពេលរង់ចាំយូរ និងការចំណាយថវិកាបន្ថែមដើម្បីពឹងឱ្យមន្ដ្រីជួយបំពេញឯកសារ និងរត់ការបានលឿន។ រូបភាពនេះត្រូវបានអ្នកតាមដានសង្គមចាត់ទុកជាអំពើពុករលួយមួយ។
ប្រមុខរដ្ឋាភិបាលកម្ពុជាលោក ហ៊ុន ម៉ាណែត ទើបបញ្ចប់ទស្សនកិច្ចនៅសិង្ហបុរីកាលពីថ្ងៃពុធ ទី១៩ ខែមិថុនាម្សិលមិញ។ ជាទស្សនកិច្ចផ្លូវការដែលរដ្ឋាភិបាលកម្ពុជាប្រកាសថា ទទួលបានជោគជ័យដ៏ត្រចះត្រចង់។ ត្រចះត្រចង់ ដោយសារតែកម្ពុជាបានស្វែងយល់ពីគំរូដឹកនាំប្រទេសប្រកបដោយភាពរុងរឿងរបស់សិង្ហបុរី ហើយរំពឹងថាកម្ពុជានឹងឈានទៅដល់កំរិតជឿនលឿនដូចសិង្ហបុរី នាថ្ងៃអនាគត។ ក៏ប៉ុន្តែបរិបទ និងប្រព័ន្ធដឹកនាំប្រទេសរបស់កម្ពុជាត្រូវគេមើលឃើញថា នៅមានទម្លាប់ចាស់ ស្មុគ្រស្មាញ និងពិបាកដោះស្រាយ។ តើអាចទេថា កម្ពុជានឹងមានភ័ព្វសំណាងដូចសិង្ហបុរីនៅថ្ងៃអនាគត?
ថ្មីៗនេះរដ្ឋាភិបាលនៃប្រទេសជិតខាងទាំង៣ កម្ពុជា វៀតណាម ថៃបានប្រកាសបង្កើតកិច្ចសហប្រតិបត្តិការនៅក្នុងគម្រោងផ្លូវសមុទ្រតភ្ជាប់ខេត្តព្រះសីហនុជាមួយខេត្តត្រាតរបស់ថៃ និងខេត្តគៀនយ៉ាងរបស់វៀតណាម ដើម្បីជំរុញវិស័យទេសចរណ៍ ពាណិជ្ជកម្ម និងការវិនិយោគ។ អ្នកជំនាញលើវិស័យទេសចរណ៍រំពឹងថា ការរួមគ្នារបស់ប្រទេសទាំង៣ នឹងធ្វើឱ្យកម្ពុជាទទួលបានផលប្រយោជន៍ច្រើន ពិសេសលើវិស័យទេសចរណ៍ និងការដឹកជញ្ចូន។ បើតាមអ្នកជំនាញ វិស័យទេសចរណ៍កម្ពុជានឹងកាន់តែរីកចម្រើនទៅមុខ ហើយអាចប្រកួតប្រជែងជាមួយប្រទេសក្នុងតំបន់បាន ព្រោះថា ខេត្តព្រះសីហនុសក្តិសម ទាំងកត្តាភូមិសាស្ត្រ និងហេដ្ឋារចនាសម្ព័ន្ធនានា។
មួយរយៈពេលចុងក្រោយនេះ ហេតុការណ៍បាញ់សម្លាប់គ្នាហាក់កក្រើកឡើងខ្លាំង ដែលបង្កឱ្យមានវិបត្តិអសន្តិសុខក្នុងសង្គម។ ករណីបាញ់សម្លាប់គ្នាភាគច្រើន កើតចេញពីទំនាស់បុគ្គល អំពើហិង្សាក្នុងគ្រួសារ និងករណីជម្លោះពាក់ព័ន្ធនឹងទ្រព្យសម្បត្តិ។ បញ្ហាទាំងអស់នេះបានធ្វើឲ្យអ្នកវិភាគសង្គមភាគច្រើនព្រួយបារម្ភពីអសន្តិសុខ ភាពគ្មានសណ្តាប់ធ្នាប់ក្នុងសង្គម ពិសេសការប្រើប្រាស់អាវុធគ្រឿងផ្ទុះដោយខុសច្បាប់ដើម្បីប្រព្រឹត្តអំពើឃាតកម្ម។ បើតាមក្រុមអ្នកវិភាគសង្គម រដ្ឋាភិបាលត្រូវតែអនុវត្តច្បាប់ឱ្យបានតឹងរឹង ដើម្បីបញ្ចប់វិបត្តិសង្គមមួយនេះឱ្យបានឆាប់។
វិបត្តិអចលទ្រព្យនៅក្នុងប្រទេសកម្ពុជាត្រូវគេមើលឃើញថានៅបន្តអូសបន្លាយមកដល់ឆ្នាំ២០២៤ នេះ បើទោះបីជាកម្ពុជាមានស្ថានភាពសេដ្ឋកិច្ចងើបឡើងវិញចាប់តាំងពីឆ្នាំ២០២២ បន្ទាប់ពីជំងឺរាតត្បាតកូវីដ-១៩ ក៏ដោយ។ សកម្មភាពទិញដូរអចលនទ្រព្យពីសំណាក់ពលរដ្ឋខ្មែរមិនមានភាពសកម្ម បន្ទាប់ពីការសាងសង់ផ្ទះ និងបុរីកន្លងមកមានសន្ទុះខ្លាំង។ វិបត្តិអចលនទ្រព្យកំពុងបន្តមាននៅកម្ពុជាដូចនេះ ត្រូវបានអ្នកជំនាញផ្នែកសេដ្ឋកិច្ច និងអចលនទ្រព្យមើលឃើញផ្សេងៗគ្នាថា វាជាការជាប់គាំង និងជាការផ្គត់ផ្គង់លើសពីតម្រូវការផងដែរ៕
ក្រុមសហជីពមួយដែលអះអាងថា មានសមាជិក៤ម៉ឺននាក់ បានធ្វើបាតុកម្មនៅមុខមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(សង់ត្រាល់) កាលពីថ្ងៃទី១៤ខែមិថុនា និងបានដាក់ញ្ញត្តិទៅក្រសួងមហាផ្ទៃឲ្យត្រួតពិនិត្យសកម្មភាពរបស់អង្គការមួយនេះ។ ក្រុមសហជីពដែលគេស្គាល់ថា មានទំនោរទៅរករដ្ឋាភិបាលនេះ បានចោទប្រកាន់អង្គការសង់ត្រាល់ថា ធ្វើឲ្យប៉ះពាល់ដល់សេដ្ឋកិច្ចរបស់កម្មករ និងអ្នកវិនិយោគ បន្ទាប់ពីអង្គការសង់ត្រាល់ចេញ«របាយការណ៍ស្រមោល»មួយទាក់ទងនឹងសេរីភាពសហជីពនៅកម្ពុជា។
ក្រុមអ្នកឃ្លាំមើលទាញសញ្ញាអាសន្ននៃបញ្ហាគ្រឿងញៀននៅកម្ពុជា គ្រាដែលចំនួនអ្នកជាប់ឃុំកើនឡើងដល់ជិត៥ម៉ឺនដែលជាតួលេខខ្ពស់បំផុតមិនធ្លាប់មាន ក្នុងនោះមានជិតពាក់កណ្តាលគឺពាក់ព័ន្ធនឹងគ្រឿងញៀន។ មន្ត្រីអគ្គនាយកដ្ឋានពន្ធនាគារបានចាត់ទុកកំណើនអ្នកជាប់ឃុំនេះគឺជាបញ្ហា ដែលទាមទារឲ្យមានដំណោះស្រាយរួមគ្នា តាមរយៈការធ្វើទំនើបកម្មប្រព័ន្ធយុត្តិធម៌ព្រហ្មទណ្ឌ។
ការផ្សព្វផ្សាយផលិតផលគ្រឿងស្រវឹងតាមទីសាធារណៈ និងតាមបណ្តាញសង្គមហាក់នៅតែមានភាពគគ្រឹកគគ្រេង និងមានកំណើនខ្លាំងនាពេលសព្វថ្ងៃ។ កំណើនបែបនេះធ្វើឱ្យអ្នកជំនាញជាច្រើនព្រួយបារម្ភពីគ្រោះថ្នាក់ចំពោះសង្គម ពិសេសផលប៉ះពាល់ដល់សុខមាលភាពរបស់ពលរដ្ឋ។ អ្នកសិក្សាស្រាវជ្រាវផ្នែកសង្គមហាក់លែងមានជំនឿលើរដ្ឋាភិបាលក្នុងការទប់ស្កាត់បញ្ហានេះ។ ចំណែកអ្នកវិភាគសង្គមហ៊ានទាំងនិយាយថា កំណើននៃការផ្សព្វផ្សាយគ្រឿងស្រវឹងនេះ គឺដោយសារតែអំពើពុករលួយ និងលាភសក្ការៈ។
នៅថ្ងៃទី១២ ខែមិថុនា ប្រមុខរដ្ឋាភិបាលកម្ពុជាលោកហ៊ុន ម៉ាណែតបានចេញសារាចរណែនាំកំណត់ការរៀបចំកែសម្រួលរចនាសម្ព័ន្ធទាំងអស់នៅតាមក្រសួង និងស្ថាប័នថ្នាក់ជាតិ និងថ្នាក់ក្រោមជាតិ។ តាមរយៈកំណែទម្រង់ថ្មីមួយនេះ រដ្ឋាភិបាលមិនឱ្យមានការដំឡើងឋានៈតួនាទី និងបង្កើតអង្គភាពថ្មីចំណុះនៅតាមក្រសួង-ស្ថាប័ននានា ពោលត្រូវប្រើប្រាស់ធនធានមនុស្សដែលមានស្រាប់ដើម្បីកាត់បន្ថយការប្រើប្រាស់ថវិកាជាតិ។ អ្នកតាមដានសង្គម និងអ្នកនយោបាយបានគាំទ្រលើកំណែទម្រង់នេះ។ តែទន្ទឹមនឹងគាំទ្រ ពួកគេក៏ព្រួយបារម្ភពីភាពអាចជាប់គាំងដោយសារការប្រកាន់បក្សពួកនិយម និងអំពើពុករលួយ។
ថ្ងៃទី១២ ខែមិថុនា ឆ្នាំ២០២៤នេះជាខួបលើកទី២៣ នៃទិវាពិភពលោកប្រឆាំងពលកម្មកុមារ។ កម្ពុជាចូលរួមអបអរទិវាមួយនេះក្រោមប្រធានបទ « រួមគ្នាអនុវត្តការប្ដេជ្ញាចិត្ត ដើម្បីបញ្ចាប់ទម្រង់ធ្ងន់ធ្ងរនៃពលកម្មកុមារ »។ នៅកម្ពុជា ពិសេសក្នុងទីក្រុងភ្នំពេញ គេបានឃើញកុមារដើរលក់របស់របរនៅតាមភ្លើងស្តុប ដើរសុំទានតាមផ្លូវ និងតាមតំបន់កម្សាន្ដ ឬធ្វើការនៅតាមសិប្បកម្មឡឥដ្ឋជាដើម។ ក្នុងនាមជាប្រទេសឲ្យសច្ចាប័នលើអនុសញ្ញារបស់អង្គការពលកម្មអន្ដរជាតិកាលពីខែតុលា ឆ្នាំ២០០៥ តើកម្ពុជាបានធ្វើអ្វីខ្លះដើម្បីប្រឆាំងនឹងពលកម្មកុមារក្នុងរយៈពេល ២៣ឆ្នាំកន្លងទៅ?
ប៉ុន្មានថ្ងៃកន្លងមកនេះ មានការរិះគន់សាជាថ្មីចំពោះការជីកកាយផ្លូវដែលចាក់បេតុងរួចដើម្បីដាក់លូតាមក្រោយ។ ករណីបែបនេះបានកើតមានជាយូរឆ្នាំដោយពលរដ្ឋមួយចំនួនបានស្តីបន្ទោសអាជ្ញាធរក្នុងរឿងខ្ជះខ្ជាយថវិកាជាតិ និងបង្កផលប៉ះពាល់ដល់ពលរដ្ឋដែលរស់នៅសងខាងផ្លូវ និងអ្នកធ្វើដំណើរ។ តែមន្ត្រីរដ្ឋាភិបាលចេញមុខបកស្រាយថា ពលរដ្ឋបានរិះគន់លើអ្វីដែលពួកគេបានមើលឃើញតែនឹងភ្នែក ពោលមិនបានដឹងពីប្រវត្តិរបស់ផ្លូវនីមួយៗដែលចាំបាច់ត្រូវការដាក់លូថ្មីដែលធំជាងមុន៕
នៅក្នុងពិធីបិទ និងបើកវគ្គបណ្តុះបណ្តាលសិស្សសាលាភូមិន្ទរដ្ឋបាលឆ្នាំ២០២៣-២០២៤ នាព្រឹកថ្ងៃទី១០ ខែមិថុនា ឆ្នាំ២០២៤នេះ លោកនាយករដ្ឋមន្ត្រី ហ៊ុន ម៉ាណែត បានលើកឡើងថា បេក្ខជនដែលប្រលងធ្លាក់ចូលបំរើការងាររដ្ឋរាប់ម៉ឺននាក់នឹងមិននៅស្ងៀមទេ ប្រសិនបើការប្រលងមានភាពមិនប្រក្រតី។ គួរជម្រាបថា តាំងពីកម្ពុជាមានរដ្ឋាភិបាលថ្មីមក ការប្រលងជ្រើសរើសមន្ត្រីបានធ្វើឡើងចំនួន៦លើកក្រោមយន្តការ «អ្នកចេះគឺជាប់»។ អ្នកឃ្លាំមើលបញ្ហាសង្គម និងរដ្ឋបាលបានសាទរចំពោះការរៀបចំប្រលងប្រកបដោយតម្លាភាព និងយុត្តិធម៌។ តែសំណួរ និងមន្ទិលសង្ស័យទាក់ទងទៅនឹងភាពស្អាតស្អំ និងយុត្តិធម៌កំពុងបន្តមាន ខណៈការប្រលងនេះធ្លាប់មានឈ្មោះមិនល្អនៅក្នុងអតីតកាល។
នៅថ្ងៃទី៨ ខែមិថុនា ឆ្នាំ២០២៤ មានករណីលិចទូកចម្លងមួយគ្រឿងបណ្តាលឲ្យស្លាប់សិស្សស្រីម្នាក់អាយុ១៣ឆ្នាំ នៅក្នុងចំណោមសិស្ស១៥នាក់ ដែលរៀននៅអនុវិទ្យាល័យមួយកន្លែងក្នុងឃុំឈូក ស្រុកប្រាសាទសំបូរ ខេត្តកំពង់ធំ។ បើតាមសមត្ថកិច្ច ការលិចទូកនេះដោយសារតែផ្ទុកមនុស្សលើសចំណុះ។ កាលពីឆ្នាំ២០២២ ធ្លាប់មានករណីលិចទូកចម្លងសិស្សនេះម្ដងហើយ នៅស្រុកលើកដែក ខេត្តកណ្ដាល បណ្ដាលឱ្យសិស្សជាច្រើននាក់បានស្លាប់។ នៅពេលដែលក្រសួងអប់រំទទួលបានថវិកាជាតិច្រើនជាងគេប្រចាំឆ្នាំ តែករណីលិចទូកស្លាប់សិស្សនៅបន្តកើតមានបែបនេះ តើក្រសួងអប់រំត្រូវមានការទទួលខុសត្រូវយ៉ាងណា?
លោក ហ៊ុន សែន ប្រធានព្រឹទ្ធសភាកម្ពុជា បានប្រកាសនៅថ្ងៃទី៧ខែមិថុនាថា ការសម្រេចចិត្តរបស់កម្ពុជាមិនចូលរួមសន្និសីទសន្តិភាពរបស់អ៊ុយក្រែន ដែលគ្រោងធ្វើនៅប្រទេសស្វីសនាពេលខាងមុខ គឺជាសិទ្ធិរបស់កម្ពុជា ដោយកម្ពុជាមើលឃើញថា «វាមិនមានជោគជ័យ»។ តែពីក្រសែភ្នែករបស់ប្រទេសលោកខាងលិច ការសម្រេចចិត្តរបស់កម្ពុជា គឺដូចគ្នានឹងជំហររបស់ចិន។ ចិនដែលជាសម្ព័ន្ធមិត្តជាមួយរុស្ស៊ី ដែលត្រូវបានអញ្ជើញឲ្យចូលរួមដែរ តែចិនខ្លួនឯងបានបដិសេធ ដោយសំអាងថា មិនមានតំណាងរុស្ស៊ីនៅក្នុងសន្និសីទនោះ។ តើកម្ពុជាមានហេតុផលគ្រប់គ្រាន់ទេ ដែលសម្រេចចិត្តមិនចូលរួមសន្និសីទសន្តិភាពរបស់អ៊ុយក្រែនដែរនោះ?
ប្រមុខរដ្ឋាភិបាលកម្ពុជាលោក ហ៊ុន ម៉ាណែតបានប្រកាសនៅថ្ងៃពុធ ទី០៦ មិថុនាពីការបន្ថែមម៉ោងសិក្សាចំនួន២ម៉ោងដល់សិស្សានុសិស្សថ្នាក់បឋមសិក្សា។ ការបន្ថែមម៉ោងសិក្សានេះត្រូវបានលោក ហ៊ុន ម៉ាណែតបញ្ជាក់ថា ជាម៉ោងបំប៉នបន្ថែមសម្រាប់សិស្សានុសិស្សដែលរៀនសូត្រនៅខ្សោយ។ អ្នកជំនាញក្នុងវិស័យអប់រំបង្ហាញចេតនាគាំទ្រចំពោះការសម្រេចដូចនេះរបស់ប្រមុខរដ្ឋាភិបាល។ តែមានអ្នកខ្លះបានមើលឃើញពីបន្ទុកបន្ថែមសម្រាប់លោកគ្រូ អ្នកគ្រូដែលមិនអាចឆ្លៀតធ្វើការងារផ្សេងបាន។
លោក វ៉ាង វេនប៊ីន អ្នកនាំពាក្យក្រសួងការបរទេសចិន ដែលគេស្គាល់ថាមានសមត្ថភាព និងវោហាសាស្ត្រនយោបាយលេចធ្លោប្រឈមមុខនឹងប្រទេសលោកខាងលិច ត្រូវបានតែងតាំងជាឯកអគ្គរដ្ឋទូតថ្មីចិនប្រចាំនៅកម្ពុជា។ ការតែងតាំងលោក វ៉ាង វេនប៊ីន ដែលមានរហ័សនាម «អ្នកចម្បាំងចចក» របស់ក្រុងប៉េកាំងជាឯកអគ្គរដ្ឋទូតនៅកម្ពុជាធ្វើឡើង ស្របពេលដែលកម្ពុជាត្រូវគេមើលឃើញថាអាចក្លាយជាសមរភូមិនៃការប្រទាញប្រទង់គ្នារឿងភូមិសាស្ត្រនយោបាយរវាងប្រទេសមហាអំណាច។ តើវត្តមានអ្នកការទូតចិនថ្មីរូបនេះនៅកម្ពុជាជាការត្រៀមលក្ខណៈទុកមុនរបស់ចិននៅក្នុងជម្លោះភូមិសាស្ត្រនយោបាយឬយ៉ាងណា?
Comments