阿愷之聲Podcast

歡迎收聽阿愷之聲Podcast「西拉雅放送」特別單元，第二集咱來去台南大內的頭社部落，節目來賓是頭社西拉雅文化發展協會總幹事毛淑慧，錄音空間感謝頭社教會支持，故事先對剃頭店的查某囝講起。 是啥款的機緣，退休了後的淑慧姊會想欲轉來瞭解頭社部落？對嫁出去的媳婦來講，重新走揣西拉雅身份的意義是啥？傳統的十字繡又閣按怎佇淑慧姐的手中，變成一幅精彩的人生圖畫？緊來收聽這集！ ► 活動宣傳｜2025年9月26-28日臺灣部落觀光嘉年華佇台北車頭，現場有吉貝耍國小、公舘社區X歸途拔馬、頭社部落，歡迎來參加！ ► 特別感謝｜西拉雅國家風景區管理處、原典創思規劃顧問有限公司 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

本集阿愷之聲Podcast「空中泡茶間」欲來追一條溪，追一條屬於彰化運命的濁水溪。節目來賓是影像創作者、也是彰化大城人許震唐，作伙開講的閣有逐家人懷念的溪州阿倫，阮欲討論最近春山出版的新冊《追一條溪：濁水溪河畔記事》，這是阿唐兄的影像書寫作品，相當精彩。 按怎追一條溪？阿唐兄對出海口掠鰻栽的人追起，經過拜溪王、種香菇和收菸葉的人，伊來到中游熟似砂石仔車司機，懷疑人類和自然交換條件的集集攔河堰，最後來到水源頭揣著傳說。十幾年來阿唐兄用鏡頭走揣觀察，以彰化式的溫柔理解沈重的生態議題，伊的影像會講話。 緊來收聽三个彰化人話講濁水溪！ ► 節目重點 • 彰化人性命的終點攏會來到濁水溪？ • 為啥欲一直追濁水溪？ • 2025年當代討論濁水溪的意義？ • 對《南風》到《追一條溪》的內心轉變？ • 創作時會看啥款的冊揣靈感？ ► 好冊推薦｜許震唐《追一條溪：濁水溪河畔記事》 https://www.books.com.tw/products/0011026903 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

歡迎收聽阿愷之聲Podcast「西拉雅放送」特別單元，頭一集咱來去台南東山的吉貝耍部落，節目來賓是台南市西拉雅部落發展促進會理事長段洪坤老師，聽講段老師認捌家己族群歷史的機緣，竟然是因為文學創作？ 為啥段洪坤老師會講家己的母語是台語？這集節目就對語言講起，為啥物欲講阿爸的話？做阿母的衫？緊來聽這段自我尋根的故事。 ► 活動宣傳｜2025年9月26-28日臺灣部落觀光嘉年華佇台北車頭，現場有吉貝耍國小、公舘社區X歸途拔馬、頭社部落，歡迎來參加！ ► 特別感謝｜交通部觀光署西拉雅國家風景區管理處、原典創思規劃顧問有限公司 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

本集阿愷之聲Podcast「文學烏亂濺」來講日本作家萬城目學的上新小說《八月的御所球場》，特別邀請阿愷「中部野球觀賞協會」的兩位好朋友做伙來講冊，分別是棒球小說《斷棒》作家aka捕手陳尚季，閣有秀水鄉民代表aka游擊手陳昀志，阮欲來分享讀這本小說的各種角度。 這是一本和「火」有關係的小說，八月是日本的盂蘭盆節，類似臺灣的鬼月，京都因為地勢，熱天出名燒熱。小說的故事發生佇歇熱（暑假）時的京都大學，兩位大學生一个因為失戀、一个因為想欲畢業，後來意外參加一場棒球比賽。這集節目阮會討論日本的野球文化，閣有萬城目學寫作這本小說的秘密，緊來收聽！ ► 好冊推薦｜萬城目學的關西三部曲、陳尚季《斷棒》 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

歡迎收聽阿愷之聲Podcast「西拉雅放送」，這个特別單元受交通部觀光署西拉雅國家風景區管理處和原典創思規劃顧問有限公司支持播出。 西拉雅放送第0集，先來講啥款的機緣有這个訪問計畫？為啥原住民會講台語？一位鹿港人來到西拉雅部落，面對啥款的文化衝擊？未來阿愷之聲會透過六集訪問、六段生命故事，咱來聽臺灣的歷史。 ► 活動宣傳｜2025年9月26-28日臺灣部落觀光嘉年華佇台北車頭，現場有吉貝耍國小、公舘社區X歸途拔馬、頭社部落，歡迎來參加！ ► 特別感謝｜交通部觀光署西拉雅國家風景區管理處、原典創思規劃顧問有限公司 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集阿愷之聲Podcast「空中泡茶間」共同主持的是逐家懷念的溪州阿倫，特別來賓是阿倫台中一中的學弟aka戲劇工作者黃郁盛，阮欲來討論員林按怎養成彼條戲劇路？ 員林市對阿倫和郁盛來講，是離開彰化的出口，無論是高中來到台中、抑是大學來到繁華的台北。這个無聊的所在，對咱人生每一个階段有伊特殊的意義，來到台北讀戲劇系的郁盛，透過編劇揣著臺語的發揮，後來成作一位戲劇臺語指導。這集節目就來聽阿倫按怎看伊這位充滿才情的學弟，閣有員林是按怎變成郁盛創作的養分？ ► 來賓點歌｜黃三元《草地人》、農村武裝青年《揣啊揣》 ► 特別感謝｜員林昭陽咖啡場所支持、黃導演幫忙翕相 ► 相片所在｜員林的阿姆斯特丹萬年路 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

台長時間臨時插播，實在非常意外、感動、激動，阿愷之聲Podcast竟然入圍今年第60屆廣播金鐘獎Podcast獎的藝術文化獎，哎，想欲感謝的人足濟，這集就來講感想。 今年廣播金鐘獎佇10月11號拜六下晡，歡迎收看轉播支持阿愷提大獎！ ► 來報名聽友會鹿港散步｜ https://voiceofakai.oen.tw/events/32Ac0buJVTQXoZgKgx4n3JAbWfD • 10/12（日）港之神鬼、10/18（六）港之技藝、10/26（日）港之面容 • 14:00準時出發，大約16:00左右活動結束 • 報名費每一場每人新台幣500元（含一份茶點） ► 特別感謝｜臻時舘精品家飾家具 ► 節目音樂｜鹿港新聲閣 ► 北管影片｜https://youtu.be/kfT-_MxT0Vg?si=7haBNquNKVxnLghR ► 尾段音樂｜城鄉放送局樂隊《凝望1935》 ► 節目回顧｜ EP109 小說家的創作生活 ft.吳明益 https://open.firstory.me/story/clqdrmfjk02bh01wqah6y95sf/platforms SP 臺灣當代出版計畫全集 https://youtube.com/playlist?list=PLuD2ZZPHq7q1q-vvzl0ubjXUicq1TMDve&si=VBo8134ZTVjT640l Powered by Firstory Hosting

【EP186 台長時間：聽友會鹿港散步！活動預告】 ► 聽友會鹿港散步報名｜ https://voiceofakai.oen.tw/events/32Ac0buJVTQXoZgKgx4n3JAbWfD 各位聽眾朋友，感謝恁一路以來支持阿愷之聲Podcast，今年（2025年）佇臺北舉辦第一場聽友會了後，我一直感動在心內，做節目有法度對空中來到現場相會，實在意料之外，台長非常感恩。 這遍，我欲邀請各位聽眾朋友來到阿愷的家鄉鹿港，十月份欲來舉辦三場鹿港散步，三場的主題和路線攏無相同，全程鹿港腔台語介紹（若有需要我會馬上華文翻譯），希望予逐家深度熟識鹿港，應該講，這个影響台長大漢成人的鹿港。 莫躊躇，聽完趕緊報名參加，人數有限！ ► 聽友會鹿港散步消息｜ • 10/12（日）港之神鬼、10/18（六）港之技藝、10/26（日）港之面容 • 14:00準時出發，大約16:00左右活動結束 • 報名費每一場每一個人新台幣500元（含一份茶點） ► 相片提供｜萊兒費可唱片 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

本集阿愷之聲Podcast「文學烏亂濺」單元非常歡喜再次邀請阿愷之友aka成功大學吳易叡教授來到節目空中。精神醫學背景的易叡老師，人生中第一本出版的冊竟然是一本詩集？！ 自台中一中、中山大學醫學系讀到英國牛津大學醫學史博士的易叡老師，照理講是一位「學霸」，學霸敢是一開始就清楚家己未來欲行的路？除了學術發表，易叡老師精通文學創作，甚至寫歌彈琴錄專輯，身為興趣好額人（興趣富翁），這件代誌對人生發展是好處抑是麻煩？這集節目阮準備對人生旅途講起，敢講醫學的對手學科是文學？ ► 節目重點 • 2000年左右的政治氛圍按怎影響易叡大學時的思想？ • 為啥選擇精神科？後來又是按怎行往醫療史研究？ • 是啥物款的機緣開始寫詩？文學對易叡的意義？ • 新加坡和香港教冊彼幾年的社會觀察？ • 先莫顧慮現實條件，未來上想欲寫的冊是啥？ ► 好冊推薦｜2003年《島嶼寄生》、2016年《赤道上的極地: 新加坡微民族誌》、2024年《度量瘋狂：精神疾病和世界衛生組織的科學主義》 ► 相片說明｜坐佇東京三井集團招牌面頂的易叡老師 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集阿愷之聲Podcast「空中泡茶間」單元總算二鹿三艋舺空中相會，咱歡迎雲門舞集鄭宗龍總監。出世佇臺北艋舺的宗龍兄，細漢時對菜市仔叫賣聲和龍山寺進香鬧熱的聲音記持（記憶），後來變成舞作《十三聲》和《定光》的創作養分，所以常民生活的各種聲音是鄭宗龍編舞重要的基礎。真好奇，上新的作品《關不掉的耳朵》欲來探討聲音佗一款面向？啊！其實臺語本身的韻律就是舞，原來聲音會跳舞？ 工商服務時間！今年雲門舞集秋季演出，鄭宗龍全新創作《關不掉的耳朵》準備北中南巡迴演出，阿愷之友買票有折扣碼，請參考說明文字。 ► 阿愷之友92折扣碼｜2025ALLEARS（台中/高雄場） ► 雲門舞集《關不掉的耳朵》演出時間｜ 臺北｜10.23-26 國家戲劇院 >>https://lihi.cc/y4V6R 臺中｜11.7 & 9 臺中國家歌劇院 大劇院 >>https://springwave.pse.is/7yscuh 高雄｜11.15 - 16 衛武營國家藝術文化中心 歌劇院 >>https://lihi.cc/nqdV5 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集阿愷之聲Podcast「空中泡茶間」單元邀請著金枝演社劇團資深男主角施冬麟，到底劇場演員按怎面對演出前的緊張？面對各種劇本，小冬通常會按怎進入角色？以胡撇仔戲（opera）起家的金枝演社是一个啥款的劇團？講到最後，其實搬戲就是搬出咱的人生，阮準備對臺灣民間故事邱罔舍講起，為啥人生親像一齣喜劇？ 工商服務時間！金枝演社《整人王－新編邱罔舍》準備佇9月19號至21號連搬四場，地點是台北臺灣戲曲中心，買票請參考說明文字。 ► 買票來去看整人王 ｜https://gbttw.tw/en07Reeym ► 阿愷聽友85折扣碼｜CG17253 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

本集阿愷之聲Podcast「文學烏亂濺」單元非常歡喜再次邀請了阿愷之友aka作家黃崇凱來到節目空中，到底寫小說的人攏看啥款的小說？ 最近才因為小說《反重力》入圍文化部金鼎獎文學圖書獎的黃崇凱，這遍再次接受阿愷之聲的挑戰，用全台語分享小說創作的「後台」。本來大學讀歷史系的崇凱，是啥款的機緣接觸了文學？又閣因為啥款的原因開始寫小說？寫作之外，通常作家會按怎揀冊來讀？而且讀別人的小說對家己的寫作有啥款的意義？ 這集節目非常推薦文學迷來聽，若對文學無熟，不如先對黃崇凱2024年以臺灣冷戰時期作為創作背景的小說《反重力》讀起吧！ ► 節目重點 • 文藝青年和智識青年的差別？2000年左右流行讀啥？ • 敢有佗一本小說是三不五時攏會想欲提出來重看？ • 好奇崇凱按怎看文學獎？ • 寫作的人按怎對生活吸收創作養分？ • 按怎調整寫作的節奏？ ► 崇凱節目中講的冊｜芥川龍之介〈竹林中〉、白先勇〈永遠的尹雪艷〉、駱以軍《降生十二星座》《我們自夜闇的酒館離開》《第三個舞者》《月球姓氏》、唐諾的球評、黃春明和袁哲生的小說、胡利奧·科塔薩爾《追求者》、馬奎斯《百年孤寂》、羅貝托·博拉紐《2666》等。 ► 特別感謝｜南渡策室 x 無有為獨立書店、黃奕智 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

阿愷之聲Podcast頭一遍出外景來到臺南七股錄音，沿途看著風颱對鹽分地帶的凌遲，實在毋甘。好加在咱的來賓整叢好好，這集節目邀請了臺南高商英文科的黃啓軒同學，伊是阿愷的Podcast同業，啓軒的台語節目「臺語𨑨迌物」已經咧放送，歡迎收聽十七歲的七股之聲！ 恁十七歲的時陣咧想啥？對啓軒來講，伊捌想過接觸文學、專精英文、創作嘻哈甚至是研究臺語，網路世代的煩惱就是不斷的去比較、懷疑家己，後來啓軒發現家鄉的故事才是伊的興趣，伊勻勻仔對厝內的語言「臺語」揣出七股的歷史，和同學做伙經營的Podcast「臺語𨑨迌物」成作實踐的方式，到底滿腹熱情的七股少年想欲對世界放送啥咧？ 阿愷和啓軒算是threads的網友，這遍總算空中來相會，緊來收聽！ ► 啓軒推薦的嘻哈創作者｜Gambler、Playboi Carti、悟飛《降》 ► 來聽啓軒最新嘻哈創作｜11 Carter - Go Renowned https://youtu.be/uEnysy2Bj9E?si=M_4Yts3oZCfKvYcb ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

「透南風，有故鄉的氣味，飛對南旁去，心頭綿綿的相思。」－陳政亮《透南風》 阿愷之聲Podcast「文學烏亂濺」單元頭一遍佇工場（工廠）內底錄音，本集的特別來賓是陳政亮老師，阿亮老師以前是世新社發所的教授，衝社會運動是教學生活的一部分。後來伊轉來發落厝內的事業，雖然身份轉變，阿亮老師一直透過寫作關心社會，寫啥？寫台語歌！ 為啥一个歷史系學生會接觸社會學？社會學家按怎看待文學？故事就對1990年代講起，這位台南囡仔讀高中時拄著蔣經國過身（過世），後來大學時面對臺灣解嚴的民主化海湧，到底時代按怎影響一个人的人生旅途？又閣是啥款的機緣予阿亮老師開始寫台語歌？緊來收聽節目！ ► 節目重點 • 1990年前後的社會氛圍是啥物感覺？ • 為啥歷史系學生後來會接觸社會學？ • 竟然是先寫台語歌詞來等待機緣？ • 寫台語歌詞會使予臺語更加進步？ • 教授到頭家的身份轉變按怎繼續參與社會？ ► 來唸詩｜透南風（詞／陳政亮） 西南風，吹落葉去佗位？ 飛對北旁去，歇佇光光ê城市。 光sih-sih（爍爍），照人心迷醉， gia̍h （攑）頭有看見，滿天紅紅ê花蕊。 我ê心紅kì-kì（記記），毋管頭前有啥物， 總是青春好時期，隨風雲飄流萬里。 風颱風，送落花去佗位？ 找無花香味，放阮tiām-tiām（恬恬）來離開。 tiām-tsi̍k-tsi̍k（恬寂寂），雨水tsha̍p-tsha̍p（㴙㴙）滴， 情冷心也死，孤夜暗暗對愁眠。 想前程暗微微，毋知志氣佇佗位， 陣陣夜雨漲秋池，隨風雲飄流萬里。 透南風，有故鄉ê氣味， 飛對南旁去，心頭綿綿ê相思。 情綿綿，生份舊城市， 一如離別時，月娘圓圓掛天邊。 看今宵月圓圓，puànn-ló-lāu（半老老）一个男兒， 懵懵懂懂人生兩字，隨風雲飄流萬里。 ► 來聽歌｜透南風（陳政亮 詞／陳曉行 曲／劉毅 編曲） https://youtu.be/3aqcsMhsKhA?si=LthENfnCv9KjKhi2 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

「二零一五年的熱天，一个十七歲的高中生按怎面對一个時代？」 這集阿愷之聲Podcast「空中泡茶間」欲來回顧一場歷史事件，節目來賓是咱懷念的廖崇倫（溪州阿倫），這場發生佇十年前的高中生反課綱運動，阿倫參與真深，到底社會運動按怎影響一个人？ 台長知影阿倫就是對彼年的新聞開始，當時使我意外的是，電視中彼位高中生面對記者訪問竟然如此穩重。回顧彼幾年，自2014年的三一八學生運動到2015年的高中生反課綱，臺灣社會親像經歷過一場風颱，後來2016年相對進步的政黨取得執政，本來叫是總算無風無雨，彼年我和阿倫攏來到台北讀冊，又閣是因為社會運動，我和阿倫意外佇街頭相拄（相遇），無想著後來阮會變成主持阿愷之聲的一對手（笑）。 這集節目我邀請阿倫來回顧這場影響伊青春的一場社會運動，為啥當時伊會投入參與？面對各種未知的挑戰，伊敢袂驚？若有機會轉去以早，阿倫敢有後悔的代誌？ 節目放送這日是七月三十號，十年前的今仔日，一位參與抗爭的高中生失去生命，後來一群高中生佔領教育部頭前廣場，彼當時誰攏毋知，後來逐家大漢了後會變啥款？ ► 歌曲推薦｜再會啦心愛的無緣的人、菅芒花 ► 節目相片｜陳君宥 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

彰化芳苑就親像美國的肯塔基州（Kentucky）？ 這集阿愷之聲Podcast「空中泡茶間」的來賓是我一位佇彰化芳苑的美國朋友邵杰Jordan，伊當初提著Fulbright獎學金來到彰化教英文，後來竟然佇芳苑一住就住四年，敢講Jordan袂無聊？ 為啥Jordan會來芳苑？甚至為啥Jordan會曉講台語？我會熟似Jordan是因為我的紐約朋友Miguel（參考EP135），其實每一年攏有一批美國大學畢業生來到彰化教英文，但正經會對這个所在有感情的，Jordan會使是非常特別的人。後來我和Jordan變成語言交換的朋友，伊教我英語，我教伊台語，Jordan講伊的厝邊隔壁攏是序大人，所以臺語比起華語佇芳苑閣較有路用。 節目錄音彼下晡是Jordan佇芳苑的最後一日，阮約佇旋味咖啡這間對Jordan學台語來講真重要的咖啡廳。錄音完，我和Jordan來到普天宮三樓，伊介紹我看芳苑的東邊，這風景有田有厝，對我來講真普通，但Jordan卻是目箍紅，伊實在毋甘離開彰化，突然間，連我攏予伊感動囉。 歡迎收聽這集節目，來聽美國人按怎看彰化！ ► Jordan學台語攏看啥冊？ 初期讀鄭順聰的《臺語好日子》和《台語心花開》、大郎頭的《台語原來是這樣》、劉承賢的《語言學家解破台語》；有相當程度了後，讀王秀容的《咱來讀讀》、洪淑昭台文翻譯的《傲慢佮偏見》，推薦逐家！ ► 特別感謝｜彰化芳苑旋味手感咖啡的場所和咖啡 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集阿愷之聲Podcast「空中泡茶間」非常歡喜邀請兩位阮劇團 Our Theatre的優秀演員PJ余品潔和鍾汶叡（小蝦）作伙來開講，到底劇場演員按怎變出一个角色？生活、創作和劇場之間的關係又閣是啥？ 工商服務時間！今年7月18號到8月24號阮劇團準備來到台北空總劇場連演六禮拜，主題《噪音風暴》總共推出四齣戲，包括《鬼地方》、《小雪》、《熱天酣眠》和《可愛的人們》，歡迎逐家去看戲！ ► 來去買票｜阮劇團╳噪音風暴╳空總劇場：https://bit.ly/44W67h5 ► 有折扣碼｜阿愷之聲聽友專屬88折優待：voiceofakai ► 特別感謝｜王書柏提供的心之卡比 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

💺 聽講這集節目有博愛座？！ 本集阿愷之聲Podcast「文學烏亂濺」單元，非常榮幸邀請記者作家李桐豪作伙主持，因為這集特別來賓是咱文壇媽祖婆aka鹿港杉行街鄉親李昂老師，阮準備來講今年四月出版的新冊《彼岸的川婆》。 作家李昂總算完成「神鬼三部曲」小說計畫，包括2004年《看得見的鬼》、2011年《附身》到今年這本《彼岸的川婆》。其中，小說創造出來的「鹿城」靈感來自李昂老師的家鄉鹿港，內底的重要角色定定是女人、平埔族、甚至是鬼，透過這款非主流的角色來挑戰現主時的大歷史和父權社會，會使講是李昂老師回應時代的一種方式。 這集節目對鹿港的神神鬼鬼講到小說創作，甚至連博愛座攏讓出來囉，面對愈來愈極端、破碎化的網路時代，到底李昂老師會按怎看待文學創作？ 這集節目實在精彩，緊來聽兩个無仝時代的鹿港人用臺語開講，一府二鹿，鬧熱滾滾！鬧熱滾滾！ ► 節目重點 • 鹿港是一个神神鬼鬼的所在？ • 個人的靈異經驗按怎影響文學寫作？ • 寫作超過六十年的李昂老師按怎看當代社會？ • 小等咧，博愛座事件是按怎？ • 按怎保持寫作的熱情？ ► 來讀新冊｜李昂《彼岸的川婆》、李桐豪《子彈與玫瑰》 https://www.books.com.tw/products/0011016228 https://www.books.com.tw/products/0011003421 ► 特別感謝｜李桐豪、吳紫莖 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

歡迎收聽阿愷之聲Podcast臺語相談單元「學姊你敢有閒」，這集咱鹿港學姊欲來分享第一擺出國的心情，敢講外國月娘真咧較圓？ 大學讀英文系的學姊，細漢時的夢想就是去美國旅行，後來伊做幾落份小工（打好幾份工），儉錢買機票，第一擺吸著美國的空氣，學姊講彼款感覺伊永遠會記著。後來學姊的工課（工作）是國際線業務，定定飛歐洲，雖然出國已經變成日常的一部分，但學姊猶緣感覺，比起佇彰化，人佇國外較有法度盡量做家己。 這个時代出國已經無稀罕，但人生總是有彼「第一擺」，到底第一擺離開彰化遮遠是啥款的感覺？歡迎收聽這集節目。 ► 背景相片｜學姊頭一擺去美國做小工（打工） ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

⚠️注意！本集非常中二⚠️ 歡迎收聽阿愷之聲Podcast「空中泡茶間」，這集來泡茶的來賓是阿愷之聲的好朋友秀水鄉民代表陳昀志，阮欲來講彰化高中水球大戰！ 到底「讀男校」是啥感覺？這間佇八卦山的猴仔高中，以早畢業前一日攏有一个奇怪的傳統，就是水球大戰。彼下晡，高三的學長會提水球（咦？為啥有水球）自弘道樓擲到明德樓予一二年的學弟，這款向學校、向青春告別的方式，實在非常中二。 六月是畢業的季節，本集節目阿愷準備和我彰化高中的學弟昀志做伙來講這个奇怪的畢業傳統，講到最後，其實水球大戰就是擲出咱十七八歲的躊躇嘛！ ► 節目重點 • 頭一遍來到規班攏是查埔囡仔的感想？ • 彰中新生訓練竟然要穿泳褲走山？ • 水球大戰前一暝的留校晚自習？ • 擲水球的人生道理？ • 對17歲的家己講一句話？ ► 新聞報導｜20140611公視新聞／彰中畢典禁丟水球違者扣證勞服 https://youtu.be/6LPSyyFsK4Y?si=QYG-X0OQRv_B56bV ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting