阿愷之聲Podcast

歡迎收聽阿愷之聲Podcast特別單元「臺灣當代出版計畫」，第九集讀冊會，作伙講冊的是咱溪州阿倫，阮準備來讀張郅忻佇九歌出版的「客途三部曲」，這三部曲分別是2017年《織》、2020年《海市》閣有2023年的《山鏡》。張郅忻對家族史開展出各種小人物的故事，這三本小說寫出複雜豐富的大時代，實在非常精彩！ 咱會使對張郅忻2013年發表的散文《我家就是聯合國》看著，伊是佇一个有客家長輩、越南和印尼阿妗（舅媽）閣有阿美族血統小妹的環境中成長，「多族群」是伊後來寫作小說的特色。這套「客途三部曲」會使講是張郅忻對家己家族史出發的故事，第一齣《織》寫著阿公來到越南投資紡織事業，第二齣《海市》是阿母孤身來到台北西門町打拼，第三齣《鏡》寫了來到山頂做原住民保留地中人（仲介）的阿爸。張郅忻寫的攏是毋甘願的小人物，遮的小人物攏想欲做頭家，想欲活出家己。 小人物到最後按怎失敗，按怎予這个社會咬到糊糊？張郅忻的小說作品有足大的關懷，咱會使看著女性按怎佇父權環境中毋認輸，彼款生命力的韌性。最後，其實阿愷之聲講冊的節目足罕咧講女性的作品，毋管是女性作家抑是寫女性的主題，這集節目咱來讀張郅忻，感觸足深，有影適當。 總講一句這三本小說非常好看，趕緊來收聽節目！ ► 咱來讀冊｜客途三部曲 https://www.books.com.tw/products/0010962096 ► 特別感謝｜九歌出版、包說女士、陳俊宇 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第八集的特別來賓是作家黃崇凱，作家阿凱足愛用文學來挑戰歷史，毋管是濺戰後臺灣藝文史的《文藝春秋》（2017）、抑是古巴和臺灣運命大交換的《新寶島》（2021）等，咱總算佇今年（2024）八月等著伊上新的小說《反重力》 ，本集節目就欲來講這本燒燙燙的新冊！ 這本小說媠噹噹的封面寫著一个日期「1969年7月21號」，這是啥？ 這是人類第一遍來到月娘的日子，當時美國和蘇聯當咧太空比賽，隔當年佇日本大阪世界博覽展示文明的進步。同一个時間佇臺灣，彭明敏教授順利逃出國民黨的控制，流亡瑞典，後來發生泰源監獄事件、臺南美國新聞處爆炸，閣有臺灣人佇美國計畫暗殺蔣經國......。若講「反重力」的物理意義是創造一種跳脫重力的力量，按呢彼時代的人，毋管是來到外太空的美國人，也是佇戒嚴時代的臺灣人，逐家的夢想就是反重力。 崇凱是國家人權博物館的駐館藝術家（2020-2021年），這本小說會使講是延續《新寶島》的話尾，隨著國家機密檔案一步一步開放，咱總算會當讀著這本寫冷戰時代臺灣的小說，這時陣文學按怎補足歷史，來寫出時代中各種複雜的情緒？ 這集節目非常精彩，歡迎收聽阿凱和阿愷空中相會！ ►節目好看頭 • 啥原因決定寫冷戰背景的小說？ • 按怎對歷史來發展小說？寫冷戰的挑戰是啥？ • 阿凱的作品定定有強烈的現實基礎，寫作時敢捌設想讀者是誰？ • 寫作歷史人物時按怎設想彼時代的人咧想啥？ • 啥機緣聽著阿愷之聲XD？ ► 來讀冊｜黃崇凱《反重力》 https://www.books.com.tw/products/0010998193 ► 特別感謝｜春山出版、臺南醉仙閣和鄭韶昀 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

【EP143 空中泡茶間：老屋曆？木都嘉義的規劃藍圖 ft.學邑工程顧問蔡佳明董事長】 ► 工商服務｜老屋曆x木都2025臺灣建築圖鑑 https://r.zecz.ec/pPLT ► 阿愷之聲聽眾落單前只要寫〖KAI60〗就會使折60塊！ 歡迎收聽阿愷之聲Podcast「空中泡茶間」單元，這集的特別來賓是阿愷佇臺大城鄉所的學長aka學邑工程顧問公司董事長蔡佳明。現子時，阿明和阿愷空中相會，阮欲來講嘉義木都的故事！ 小等咧，為啥一間都市規劃公司欲來舞一本桌面蠟曆（桌曆）？ 佮嘉義市的機緣，除了來賓本身是嘉義囝婿（女婿），阿明董事長講閣有兩个關鍵角色：第一是台長阿愷本人，第二是南華大學建築系陳正哲教授。今仔日嘉義的街仔路有真濟（多）木造建築，這和這个城市的歷史有關係，三年前學邑團隊和嘉義市政府合作，透過都市更新來規劃城市中一叢一叢的木造建築群，但是阿明董事長毋甘願代誌只有按呢，所以有了學邑團隊用心製作的這本「老屋曆X木都 2025 臺灣建築圖鑑」，一筆一劃記錄嘉義的面模（地景），講出這个城市珍貴的故事。 若講城市是一个人，街路建築就是城市的面，老屋曆會使講是一本嘉義市的故事，咱對嘉義瞭解臺灣的故事，2025年就用這本老屋曆陪伴咱每一工（天），緊來聽節目。 ►節目好看頭 • 啥款機緣予這間臺北的規劃公司落南來嘉義？ • 嘉義是一个啥款的城市？木都是啥？ • 都市更新和木造建築維護按怎同時可能？ • 規劃公司來做蠟曆是毋是想袂開？ • 為啥恁需要一本「老屋曆」？ ► 節目音樂｜鹿港新聲閣 ► 節目支持｜學邑工程顧問/學聯不動產 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第七集讀冊會作伙講冊的有秀水奕瑄和鹿港學姊，阮準備來讀李金蓮 2023年九歌出版的短篇小說集《暗路》，這本小說內底寫了七段寂寞的人生故事，雖然苦澀，但是讀完會回甘。 「我敢有可能繼續寫作？」 這是工作幾落年了後的李金蓮問家己的問題，這位昔日的文學少年，後來有了家庭工作以後，文字漸漸仔變成一款討生活的工具。伊進前是中國時報「開卷周報」的主編，負責評論冊、選出年度好冊，影響幾落世代的臺灣讀者，但後來報社環境愈來愈歹，李金蓮決定離職，同時向國藝會提出寫作補助計劃，伊用五年時間完成頭一本長篇小說《浮水錄》（2016年），這本冊後來提著金鼎獎，對作者來講是足大的鼓勵，也叫醒伊的文學夢。 抱著可能是最後一本冊的屈勢（姿態），李金蓮決定繼續挑戰短篇小說，伊佇2023年完成這本《暗路》，對阿愷來講，李金蓮正港是寫短篇小說的高手，伊將對人性的觀察寫入去小說當中，雖然寫著生活中足細、足幼的故事，但李金蓮就是有法度寫出予人搥心肝的故事，咱會使佇這本小說看著家己的人生。 風颱天，阿愷之聲猶原佇空中陪伴各位，逐家就要注意安全，乖乖踮厝內聽阿愷之聲、讀小說，希望風颱莫造成嚴重災情，各位保重！ ► 咱來讀冊｜《暗路》 https://www.books.com.tw/products/0010962070 ► 特別感謝｜九歌出版 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

「我們先不要一直問什麼是原生種或外來種，什麼是自然或人為，或什麼是原始或現代——可能根本就沒有什麼不是自然，一切自然而然。」－〈銀合歡〉 歡迎收聽阿愷之聲Podcast特別單元「臺灣當代出版計畫」，第六集讀冊會作伙講冊的有溪州阿倫和秀水奕瑄，阮準備來讀黃瀚嶢 2022年的冊《沒口之河》，這本冊是春山出版最近臺灣非常厲害的自然書寫，佇2023年提著臺灣文學金典獎，討論度足懸（高）。 講著台東知本，恁會想著啥？ 黃瀚嶢因為大學參加自然保育社團，伊來到台東調查生態，煞意外參與反對知本濕地設置光電場運動，「知本濕地」會使講是因為環境抗爭出現的地景概念。這本《沒口之河》對知本溪寒天的沒口現象，講到岸邊各種植物，黃瀚嶢幼路的文筆，用植物寫出台東族群文化和歷史經濟的故事，面對人類世界的各種慾望，咱按怎向大自然和傳統文化體系學習？ 毋管你敢捌自然生態，這本冊會使對知本瞭解臺灣的故事，非常推薦，緊來聽節目！ ► 咱來讀冊｜《沒口之河》 https://www.books.com.tw/products/0010942100 ► 特別感謝｜春山出版 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第五集是讀冊會，作伙講冊的是溪州阿倫，阮準備來讀 #陳柔縉 2020年的長篇小說《#大港的女兒》，這是伊頭一本小說，也是最後一本......。 陳柔縉是誰？伊是記者、歷史研究者也是小說家，早期走政治線新聞走出這本《總統的親戚》（1999年），這本冊非常出名，內底詳細寫出臺灣政商階級的家族關係，甚至後來變作各家記者的參考冊。2000年了後本土政權執政，各種臺灣研究鬧熱出聲，陳柔縉走出一條新的路，伊開始寫逐家人的歷史故事，作品大概分作兩類，第一類是物件的歷史，包括2005年的《臺灣西方文明初體驗》、2007年的《囍事台灣》、2009年的《人人身上都是一個時代》等，第二類是寫人物的故事，包括2006年寫外交官張超英的《宮前町九十番地》、2015年寫臺獨運動者羅福全的《榮町少年走天下》等。 對寫政商關係到寫大眾歷史，陳柔縉的作品非常豐富而且好讀，但我感覺這一切親像為著寫小說咧準備，這本《大港的女兒》綜合了所有作品的特色，會使講是陳柔縉全部寫作的收線。《大港的女兒》參考女性實業家孫雪娥的人生故事，對日本時代到戰後，對高雄到東京，對大家族到小家庭，陳柔縉透過寫出女性的時代處境來暗示臺灣的運命，這本小說的企圖真有份量，但手路足溫暖。 看完這本冊，阮也咧想，若是陳柔縉無佇2021年發生車禍往生，續落來伊閣會寫出啥款的作品？咧看，這个問題永遠攏無答案囉。 ► 節目開場｜カラス（karasu）是日語烏鴉的意思 ► 咱來讀冊｜《大港的女兒》 https://www.books.com.tw/products/0010876263 ► 特別感謝｜包說 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast「文學烏亂濺」單元，這集欲來講一本新經典文化今年六月出版的棒球小說《斷棒》，作者是來自台中的捕手陳尚季（阿季），但因為阿愷是出一支喙的運動白痴，所以邀請溪州右投阿倫作伙講冊，到底阿季是按怎用小說起造棒球場？ 意識著家己無可能變作職業選手，雖然鬱卒，陳尚季決定用小說來接近球場，這本短篇小說集是伊繼續愛棒球的方式。《斷棒》有八篇短篇小說，場景根本是臺灣近代棒球史，小說主角有原住民選手、外國仔球員、外省仔教練、閣有做手套的人，雖然是一本棒球小說，但故事講的是球場背後親情、友情和個人的向望，看完非常感動，原來棒球迷人是因為咱佇當中看著人生。 聽眾朋友恁若是興棒球，這本小說和這集節目一定要聽！ ►節目好看頭 • 棒球的熱情對佗開始？ • 知影無可能變成職業選手的心情？ • 為啥欲用寫小說來接近球場？ • 影響阿季的棒球文學是啥？ • 寫作上對照現實場景、人物和事件的意義是？ ► 來讀冊｜《斷棒：陳尚季短篇小說集》 https://www.books.com.tw/products/0010990876 ► 相片提供｜福興游擊手陳君宥 ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

“人類世的裂縫”－陳冠彰對這張相片的解釋 歡迎收聽阿愷之聲Podcast，這集節目準備大膽來濺一本人類學研究《在世界盡頭遇到松茸》，作者是美國加州大學Santa Cruz分校人類學系教授安清（Anna Tsing），作伙來和阿愷講冊的特別來賓是臺南藝術大學藝術創作理論研究所博士陳冠彰，聽講伊捌佇曾文溪拄著Anna Tsing（聽說他曾在曾文溪遇見Anna Tsing）？？ 安清對松茸講出一段按美國奧勒岡荒廢樹林到日本高級禮物的精彩故事，故事中，人類學家提醒咱看待世界的角度莫只有人類本身，要對主流之外的物件保持關心才對。今年初完成博士學位的陳冠彰，伊的論文田野竟然是一條溪，曾文溪是一條充滿自然和人類互相干擾的溪流，對中游到頂游，甚至西拉雅和鄒族族群對這條河有各自的理解，到底冠彰是按怎對安清的研究得著靈感，曾文溪的故事會使按怎講？ 總講一句緊來聽節目，聽阮作伙濺這本人類學經典！ ►節目好看頭 • 安清的冊對咱做研究的影響？ • 一開始按怎理解如此複雜的曾文溪？ • 對西拉雅到鄒族，這條溪會使講啥物故事？ • 多物種民族誌對當代社會的意義？ • 推薦啥款的朋友來讀這本書？ ► 來讀冊｜《在世界盡頭遇到松茸：論資本主義廢墟中生命的可能性》 https://www.books.com.tw/products/0010983168 ► 冠彰博士論文口試｜Yih-Ren Lin老師的現場紀錄 https://www.facebook.com/share/p/5nohx33nU1gsudAn/ ► 阿愷的碩士論文研究｜鹿港木工岫：家族企業頭家與木工師傅的關係生產 https://blog.geogsoc.org.tw/siu-of-furniture-industry-in-lukang-ck-wang/ ► 特別感謝｜陳世岸建築師的牽成 ► 背景相片｜曾文溪的攔沙壩（陳冠彰,2022） ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第四集咱邀請了作家王昭華，伊的頭一本臺語文散文《我隨意你盡量》佇2023年出版，出版後隨得著臺灣文學金典獎。這是一本用聲音填畫面的散文集，對淡水真理街開始，咱來綴（跟）昭華老師散步！ 可能有一寡人是對電影《大佛普拉斯》片尾曲「有無」這條歌熟識昭華老師，這條歌得著2017年金馬獎最佳原創電影歌曲，歌詞簡單，意義足深。一直以來昭華老師創作不斷，按寫歌寫詞到出專輯，對寫文章寫繪本到提文學獎，臺語是伊觀察世界的方式，對屏東潮州到台北淡水，各種日常生活的細節攏有文學上的意義，有心適（趣味）、有感性、有向望（希望），這本《我隨意你盡量》充滿昭華老師的生活哲理，媠氣（漂亮）的臺語文予每一篇散文充滿聲音的美感，呢讀呢念呢感動。 到底「昭華式散步」是啥？緊來收聽這集節目！ ►節目好看頭 • 家鄉對一位寫作者的意義是啥？ • 啥原因決定來寫淡水的生活？ • 按怎培養出「昭華式散步」？ • 為啥欲用臺語來寫作？初初的挑戰有啥？ • 敢有彼本一段時間就會提出來讀的文學作品？ ► 來讀冊｜《我隨意你盡量》 https://www.books.com.tw/products/0010951856 ► 特別感謝｜九歌出版社 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast，這集節目阿愷準備和鹿港學姊出外景來去屏東看豬，阮來到屏東縣竹田鄉的 #旺緒畜牧場，這是一間現代化飼豬場，到底這个所在和傳統豬寮有啥物差別？ 食品安全是臺灣人愈來愈重視的代誌，健康的豬肉就要有快樂的成長環境，所以現代化飼豬場就是一種產業升級。以前咱感覺傳統豬寮就是臭閣垃圾（骯髒），但是這馬的飼豬場有電腦控制的好環境，降溫通風，而且豬寮的高床式設計予環境衛生，豬仔袂臭，低密度飼養加上對飼料的堅持，這款環境大漢的豬，就是毛病少閣大了緊。 這集節目就對阿愷和學姊來去看豬，一開始，先來講豬肉料理！ ►節目好看頭 • 好食的豬肉口感是......？ • 行過二十冬，揮別口蹄疫暗影的臺灣養豬業？ • 來去現代化飼豬場竟然要穿太空衫？ • 豬快樂的祕訣？ • 學姊推薦的豬肉料理是......？ ► 填表抽獎｜台經院國人養豬場形象活動成效認知調查 https://tier.surveycake.biz/s/Mve1a ► 相片來源｜下港女子 ► 節目音樂｜鹿港新聲閣 ► 節目支持｜財團法人台灣經濟研究院、開屏趣 #現代化養豬場、 #旺緒畜牧場、#屏方根文化有限公司 ► 現代化養豬場推廣活動歡迎參加｜ 🐖8/31-9/13： HAPPY PIG HAPPY TEAM 那些你不豬道的事－空間展覽（屏東市瑞光里活動中心－屏東縣屏東市瑞中路13號） 🐖9/7：HAPPY PIG HAPPY TEAM 那些你不豬道的事－繪本講座：小豬不會飛（黎記眷村食堂－屏東縣屏東市青島街99號） 🐖9/8：HAPPY PIG HAPPY TEAM 那些你不豬道的事－C&C Butcher 健康肉食體驗（屏東西市場 6 號攤位－屏東縣屏東市和平路320號） ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第三集咱邀請了記者 #胡慕情，伊的新冊《#一位女性殺人犯的素描》非常好看，本集的主題是逼近事件的寫作，敢講新聞永遠只有單一結果？ 第一遍讀胡慕情的冊，彼時阿愷咧讀研究所，三不五時就去台北市社子島做田野調查，面對市政府譀古（誇張）的開發計畫，我的冊包隨時帶著《黏土》，這本冊紀錄了苗栗灣寶農民按怎抗爭無理土地徵收的故事，讀了誠感動，是當時我重要的參考冊。 2015年出版的《黏土》，隔當年得著金鼎獎，彼時陣得獎致詞的毋是作者，是冊中主角洪箱阿姨，因為慕情講這本冊是灣寶的冊。後來慕情的報導關懷對環境議題來到社會新聞，伊開始追蹤隨機殺人事件，我感覺慕情是一位毋甘願的記者，毋甘願這款新聞定定潦草講煞，到底是啥款的環境造成事件的發生？今年（2024）胡慕情完成新冊《一位女性殺人犯的素描》，這本冊追蹤一件發生佇十年前的殺人事件，主角林于如是目前猶未處刑的死刑犯，到底新聞標題「驚世媳婦」背後，是啥原因予這位女性決定行動？ 無管你相信報導有可能改變社會抑無，這集節目攏值得你來收聽！ ►節目好看頭 • 為啥欲繼續追蹤一件十幾年前的新聞？ • 為啥欲寫林于如？寫作者面對事件的位置？ • 對《黏土》到新冊，寫作關懷的轉變？ • 想欲透過寫冊來對這个社會講啥？ • 倒轉來問，為啥想欲做一位記者？ ► 來讀冊｜《一位女性殺人犯的素描》 https://www.books.com.tw/products/0010979752 ► 特別感謝｜鏡文學、洪育增 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第二集咱邀請著歷史小說名家朱和之先生，到底臺灣歷史佇文學中有啥款新的可能？咱就對《當太陽墜毀在哈因沙山》這本新冊講起 。 朱和之是一位歷史迷，伊將各種臺灣的歷史事件、人物當作基礎發展成小說，包括寫少年鄭成功故事的《鄭森》、寫太魯閣戰爭的《樂土》、寫十七世紀荷蘭人對鄭氏政權的臺江內海之戰《逐鹿之海》、寫音樂家江文也的《風神的玩笑》、寫攝影師鄧南光的《南光》等等，會使講產量豐富，這幾年甚至得著幾落个華文創作重要的百萬小說大獎，有夠厲害。朱先生上新的作品《當太陽墜毀在哈因沙山》以一九四五年的三叉山事件作背景，伊企圖寫出臺灣各族群的世界觀，踏佇同一片土地，咱親像會使佇故事看著家己的面容，這本小說實在足好看。 台長是朱和之的冊迷，趁機會問清楚小說背後的創作鋩角（細節），實在是一件使人興奮的代誌。同時，咱的來賓也為著這遍錄音做足功課，聽講朱和之先生的臺語是這兩個月來努力練習的成果，有感動無？所以緊來收聽本集節目！ ►節目好看頭 • 為啥當初寫小說是對歷史開始？ • 按怎評估有可能發展成小說的歷史素材？ • 面對如此遙遠的人物和事件，按怎理解當時的處境？ • 史實角色和個人投射之間按怎撙節（拿捏）？ • 創作時敢有設想作品對話的族群/對象？ ► 來讀冊｜《當太陽墜毀在哈因沙山》 https://www.books.com.tw/products/0010979786 ► 特別感謝｜印刻文學、林家鵬 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案 #支持台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

聽眾朋友逐家好，這集阿愷之聲Podcast「空中泡茶間」特別來賓是芋圓字典 Taro Dictionary的開發者芋圓本人，雖然阿愷本身無佮意食芋仔，但是這个臺語app實在太有意思，本台決定破例訪問（？ 芋圓雖然出世佇阿公阿嬤講臺語的家庭，但伊一直要到去日本留學，有一工發覺家己的日語竟然講了比臺語較好，才意識著應該要將母語學轉來。對羅馬字起步，芋圓學習語言的經驗，後來應用佇芋圓字典app的使用者設計上，無到一年的app開發，如今已經受著真濟臺語學習者的討論和使用，到底芋圓字典的故事是按怎開始矣？ 緊來收聽這集節目，來聽按怎用芋圓做字典？！ ►節目好看頭 • 臺語家庭的後一代竟然變成華語人？ • 啥物原因予芋圓想欲佮臺語揣轉來？ • 有語言天份的芋圓，學臺語的方式竟然是？ • 設計app的挑戰和困難是啥？ • 初學者會使對芋圓字典app學著啥？ ► 來用芋圓臺語字典：portaly.cc/taro.dict ► 節目音樂：鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，這个全新單元準備介紹最近國內優質的文學和社會科學出版。新節目頭一集欲對家鄉彰化開始，阮來到溪州鄉，也是本集特別來賓詩人吳晟的故鄉，佮咱作伙開講的閣有副主持人阿倫，對無仝世代的農村人，亻因按怎透過文學看待跤踏（腳踏）的這片土地？ 吳晟老師一生攏佇彰化寫作，看盡農村半世紀以來的地景變遷，也照實寫入文學。伊是一位行入去社會的作家，對農村的環境議題真致意（在意），佇溪州徹底活出文學意義的生活。吳晟老師的文學成就已經誠懸（很高），但猶原引阮好奇，到底「鄉土」對伊的意義是啥？農村文學是想欲寫予誰來讀？佇這个假新聞滿四界、無要無緊的娛樂文化佔滿大部分人的時代中，繼續寫作的意義是啥？ 這集對談對本台Podcast來講意義重大，總講一句，緊來聽節目！ ►節目好看頭 • 鄉土文學的「鄉土」意義是啥？ • 雖然詩寫鄉土，但讀詩的人大部分是都市的智識份子！？ • 現代性對農村造成地景改變按怎反映創作？ • 這个時代繼續寫作的意義是啥？ • 按怎選擇無仝款的文類來表現對生活的想望？ ► 來讀詩｜ 《泥土：吳晟二十世紀詩集》（節目中阿倫念的詩「泥土」、「店仔頭」收錄佇這本） https://www.books.com.tw/products/0010940637 《他還年輕：吳晟二十一世紀詩集》 https://www.books.com.tw/products/0010940638 ► 來讀散文｜ 《我的愛戀 我的憂傷》 https://www.books.com.tw/products/0010812251 《筆記濁水溪》 https://www.books.com.tw/products/0010840153 ► 特別感謝｜吳勝雄、莊芳華、洪範書店 ► 影像支持｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

聽眾朋友逐家好，這集阿愷之聲Podcast「文學烏亂濺」單元的特別來賓是作家洪明道aka臺灣小說界的美空ひばり（美空雲雀），明道平常時是一位醫生，下班了後是一位作家，伊2018年佇九歌文學出版短篇小說集《等路》，隔當年隨得著臺灣文學金典獎，足有才情。阿愷也是因為這本小說熟識明道，我真敬佩這款「臺語語境的華文書寫」，原來文學會使寫出咱中南部的聲韻！ 節目錄音前幾工，明道才對捷克轉來臺灣，伊拄去參加中歐的文學盛會「作家唸冊月（Authors' Reading Month/作家閱讀月）」，今年的主題國竟然是臺灣。這集節目阮欲對臺灣文學佇中歐講起，到底當地人對臺灣作家有啥好奇？對捷克到斯洛伐克，明道有啥趣味的城市觀察？最後，討論捷克語對二十世紀捷克文學的意義，講轉來明道的文學作品，到底母語按怎影響作家的創作世界？ 本集節目非常精彩，來聽洪明道的中歐見聞，閣有伊的文學世界！ ►節目好看頭 • 作家唸冊月（Author's Reading Month）是啥？ • 中歐讀者對臺灣文學/作家有啥好奇的所在？ • 捷克語對二十世紀捷克社會和文學的意義是啥？ • 對明道來講，母語和寫作的關係是啥？ • 這遍對中歐轉來，會推薦啥冊予聽眾朋友？ ► 來讀小說｜洪明道《等路》 https://www.books.com.tw/products/0010801801 洪明道《祝福的意思：等路台文版》 https://www.books.com.tw/products/0010899813 ► 明道推薦的冊｜林蔚昀《世界之鑰：帝國夾縫下的台灣與波蘭》 https://www.books.com.tw/products/0010987546 ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting