*特別收錄 永遠的臺灣島：寫予竹內昭太郎先生 獅頭山頂，天清雲薄；七星嶺上，菅草雺霧 臺北州四界遨，大稻埕好𨑨迌 你是灣生，思念晟養你的母親 永遠的臺灣島 昭和20年5月31，戰雲對天邊鳴金擊鼓而來 幾若百隻美軍B24轟炸機， 共臺北州城掔甲頭眩目暗，炮火連天 袂輸草蜢仔大軍的戰魔，青面齴牙，兵臨城頂 予人強欲袂喘氣的戰火，𧿬踏本成萬里無雲的城市 高校拄才入學的學徒兵隨參加一場 無偌熟似的祖國愛你拍的戰爭 險險玉碎當欲奢颺的18歲的青春 欶一喙武士牌的紙薰，敢會成做正港的武士？ 切腹，嘛無法度證明咱流的是仝款的血 臺灣神社火燒厝，無才調守護這个皇軍霸占的島嶼 新高山恬恬懸懸徛佇遐 總督府予炸彈磅甲去一半 生離死別，朝代轉踅，伊攏看佇目睭底 若像表參道的明治橋，迒過淡淡清幽的基隆河 臺灣神宮佇圓山仔頂懸哀聲嘆惜 花開花謝，節氣變換；無得定的戰火繼續湠 草山挖防空壕的日子，懵懂少年時淡薄仔的稀微 逐工愛唱的溫柔校歌，變調做無奈出征的戰曲 七星寮看過去的山邊紅霞，染做美軍擲落來的無情戰火 南門口恬靜堅持的城牆，陪伴你行過偌濟灣生的青春 植物園荷花池邊的蟲豸，敢猶會記得你的心聲 大世界館的電影一幕一幕咧重搬 草山眾樂園的硫磺味，小可仔𣻸𣻸又閣溫暖的記持 西門市場八角堂，早就妝娗做紅樓入夢中 崛川道路月色炤光的南國之夜 Drigo小夜曲響起的河堤草埔 敕使街道行七擺，嘛袂當坐清你的情懷 紅色的日頭已經落山 四箍輾轉陷入烏暗的眠夢 天皇無條件投降的詔文透濫冷冷的山風 吹過心酸的門口埕 投降矣！大日本帝國不敗的神話破滅矣！ 玉音放送，魩仔魚食鮕鮘的大東亞戰爭煞鼓 八紘一宇的神國幻影嘛全然破碎 在地抾額的兵仔營除隊，你的靈魂嘛得著疏開引揚佮安慰 共參戰的五摠頭剃清氣，頭鬃埋入厝前的木瓜樹跤 安葬走縒的青春，嘛鉸掉不義的戰爭 這片土地本底就毋是恁的 勇敢共臺灣還予臺灣人，才是大和民族的尊嚴 古亭菜市仔邊一六軒的弓蕉牛奶糖，滋味難忘的喙食物 太平町丸公園路邊擔仔的米粉湯， 規世人攏會記得的古早味 榮町光食堂的枝仔冰，gàn喙齒閣透心涼 東門町二條通的配給米，並啥物攏較芳甜 士林的「防空壕小姐」聽講徙去水道町某番地 通學路裡相拄毋捌請問芳名的「臺北小姐」是走去佗位？ 投降、除隊、疏開、引揚，你是欲轉去佗一个高天原？ 臺灣敢毋是你出世徛起的所在？ 新店溪，海鳥千風；紫色山茶花，文文的笑容 四分之一世紀25年的久別重逢 「南國ラジオ」的音樂又閣響起， 敢若美玲姊仔的叮嚀佮吩咐 囡仔伴姿碧小姐的日語早就生鉎， 你的臺灣話舊底就袂輾轉 歡喜寫佇鬢邊，感動刻佇眼神； 噗噗惝的心跳千言萬語斷半字 再會啦圓山仔、大稻埕；再會啦竹仔湖、舊草山 觀音山䖙踮關渡淡水河出海口遠遠的所在 就予戰爭的亡魂崁魂佇連綿的大屯山裡 無論雷公爍爁，風雨交加，烏雲密布 伊是咱的母親，上媠的島嶼 永遠的臺灣島 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
送行─寫予蘇嫚 共你穿彼軀你上佮意的粉紅仔色的 素花仔裙 陪你起程 爸爸媽媽欲𤆬你來去換新衫 佛菩薩講這領皮衣穿傷久矣，袂合軀 愛你放下，另外揀一領 逐工，你用獨一無二的司奶喊阮起床 16个形影相隨的春夏秋冬 有咱才知影的齣頭 耍甲厝蓋強欲夯起來 媽媽欲掠戰犯，你跤手猛捷走去覕 爸爸䀐著你天真浪漫的好笑神 嘛發現你愛作孽的個性 Touch down 是你上愛耍的運動之一 你是高手天生出世，走袂贏你 一入門，你就是上𠢕迎客的禮賓司長 規工的費心操勞隨㧒佇腦後擴 頭一改褪齒，袂輸你的青春發穎 爸爸媽媽攏替你歡喜 木工壁堵有你的齒痕 若像樹仔的年輪 一痕一跡攏刻佇爸爸媽媽的心肝窟仔 欲離開阮的時 你挽掉15齒早都已經害去的蛀齒 無親像你囡仔時，這改阮干焦有傷悲 雄雄袂記得你並爸爸媽媽較老矣 嫚寶，爸爸足想你 𢯾佇胸前的溫柔佮囥佇腦海的記持 竟然，天差咧地 閣較濟的影跡，嘛毋值得你彼粒活跳跳的心 彼粒予爸爸媽媽歡喜展笑容的心 品好袂吼，目屎煞袂輸思念崩岸的海湧 轉到厝，看袂著你天真等待的好笑神 這个家無你溫暖的等候 敢若暗so-so的厝，失去光彩 姊姊講你變做天頂的「小星星」 爸爸卻是成做迷航佇宇宙的太空船 揣無降落的星球 爸爸甘願是流浪的隕石 思念失速、跋馬敗輦 化做焚身的火石 陪伴你佇恬靜寂寞的星河 嫚寶，你上𠢕變鬼變怪 敢會得親像爸爸愛聽的彼首歌 化做千風，千絲萬縷的微微仔風 按呢，爸爸媽媽就會當不管時佇窗仔門邊 鼻著你敢若杏仁的芳味 嫚寶， 你上愛看「崖上的波妞」 敢講你正經投胎轉世做古錐肥白的紅嬰仔 按呢， 等你會行會走 爸爸媽媽可能攏愛攑枴仔囉 無的確佇街仔路無張持閣看著彼个熟似燦爛 的好笑神 嫚寶， 你上愛聽Bocel l i 的歌 爸爸媽媽若是放伊的曲盤 你敢會閣𤲍 倚來做伙聽 抑是你已經幻化做美妙的音符 佮過往仝款 暝日踮爸爸媽媽的耳空邊嗤舞嗤呲 嫚寶寶， 爸爸媽媽知影你是有志氣閣 善良的囡仔 咱厝邊頭尾仝沿的𨑨 迌伴只賰你一个 知影你嘛是小可仔孤單 毋免掛心爸爸媽媽 十方三世無限曠闊 由在你隨心四界行徙 爸爸媽媽深深知影 就算累世萬劫， 只要因緣的花若閣開 咱會閣做爸仔囝、母仔囝 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
大寒 Tāi-hân 大寒 曆日最後的一个節氣 總參過去一年所有的寒暑 流年親像流水 春天猶未起飛 大寒先來降落 天氣愈冷，田園愈青 氣候愈寒，霜雪嘛愈白 大寒袂寒，春分就袂溫暖 無霜凍的耐心聽候 欲哪有美麗的 春暖花開 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
豆仔點 誠濟話毋通直喉一句講到底 歇喘啉一喙仔茶 會使轉聲變好話 人生路途遙遠 有風毋通駛盡帆 停跤歇一下，看一時仔風勢 閣較大的風湧嘛會使安然過渡 予你看著千江月 有一寡工課若破柴，毋通連砧煞破落去(lueh) 你省力別人嘛快活 「逗點」毋是結束，干焦暫時歇睏 毋干焦歇睏，伊是圓滿 伊是有一撇的 烏豆仔點 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
小寒 Siáu-hân 小寒 太陽的羅經 吹上冷的風 飄上柔的雪 勻勻仔行向春天倚靠 若像落葉聲的 「悉唎悉唎，蘇嚧蘇嚧」 殊勝吉祥，大悲的甘露法水 寒星陪伴冷月 搢風冷雪的小寒 是春天進前 上堅凍的跤步 並大寒閣較寒的節氣 謙虛的名號 暗崁冷冽的氣口 雁鳥飛轉北國的故鄉 順紲紮走 拄才溫燒的日頭 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
鬥片仔 共美麗的完整拆散 才閣一位一位走揣 一片一片接枝好勢 等甲上落尾彼个欠缺出現 號做咧欲 相倚的是天生一對 無法度鬥陣的 毋是永遠無緣 換一爿 無的確就四配 有緣做伙無緣免怨慼 佮人袂合你無毋著 嘛毋是別人的過錯 先倚來的無一定是適合的彼个 加試幾改才知影 敢通做伙 這搭袂合，換一个所在 凡勢就峇峇峇 每一片鬥片仔攏無仝款 因為按呢 毋才有法度鬥陣 家己有伴 嘛成做逐家的 圓滿 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
冬節 Tang-tseh 冬節圓 冬節圓挲圓圓 阿母挲的圓仔一粒一 鹹芳佇喙裡 甜蜜貼心穎 冬節圓烰甜甜 阿母挲的圓仔甜閣綿 甜甲像蜂蜜 𩚨甲若麻糍 冬節圓挲媠媠 阿母挲的圓仔有色水 金的像花蕊 銀的有智慧 冬節圓咱團圓 阿母挲的圓仔上入味 思鄉數念放袂記 挲出溫暖飽滇 的團圓 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
心事 露水的心事，藏佇花蕊 淺淺厚厚 採花蜂無閒𩑾𩑾 螺殼的心事，藏佇真珠 圓圓滑滑 女人胸前的心思 月娘的心事，藏佇天星 閃閃爍爍 追星族茫茫渺渺 沙漠的心事，藏佇風裡 泉水綠洲 駱駝客愛恨情仇 阮的心事 囥佇天地曠闊 真空妙有 美麗幻化的 宇宙 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
大雪 Tāi-suat 大雪 大雪（tuā-seh）起飛的季節 阮猶佇他鄉外里 敲電話較好 抑是寫批予伊 寒風喊咻 雪花飄落 若像銀白色的蠓罩 伴奏音樂響起的寒夜 車聲人聲遠行 恬靜洗盪鬧熱滾滾 繁華卸妝，輕聲吟唱 熊佮虎的跤跡 抑是人的心機較深 蛇皮和蜂岫 攏是冬眠進前的線索 大雪紛飛的方向 敢是阮思念的故鄉 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
睡人 刻佇椅條頂面痕跡滄桑的名字 囡仔時代無煩無惱的記持 睏一眠醒 失落幾十年 干焦會記得遙遠的彼暗 跤手重鈍毋聽話，烏白亂使動 喙齒根家己下性命咬 想欲硬挽牢雄雄拄欲相辭的魂體 頭殼煞無才調指揮身軀 袂輸身首拚房，五體吵家抐宅 tsua̋n失落拍毋見 捨離當欲起飛的青春少年時 堅凍的歲月敢若千斤重石 硩甲袂振袂動，強欲袂喘氣 奢颺又如何 眼前烏雲罩霧，茫茫渺渺 心肝底的非洲曠闊大草埔 象馬鹿獅豹虎 奔傱走跳風沙上天 燒烘烘的心情 袂輸六月的火燒埔 可惜跤手據在人舞，冷熱不和 扞佇花格鐵窗較有倚靠 毋過插翼難逃 青春的尾蝶仔那飛那遠 毋是窗仔門傷狹 是貪戀的心想傷濟 溫柔的背影 壓袂牢怨恨世情的青面齴牙 咖啡餐廳最後的惜別 溫柔體貼的舞步 安搭早就放棄的tempo 進一步是無底深坑 退一步是毋甘心慒 這塊曲盤的旋律是上蓋圓滿的晚安曲 椅條頂面的痕跡會閣繼續滄桑 記持加一个美麗的名字 這改入眠了後 向望會使夢中 相見 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
小雪 Siáu-suat 小雪 七星的斗柄向北斜西 玉衡，開陽，瑤光 陪伴阿母佮阮相辭 迎接立冬了後的頭一个節氣 小雪 心肝頭淡薄仔落雪 一點仔淒涼 萬般的毋甘 佇冬暝孤獨遠行 已經袂記得秋天的落葉 抹寡仔月光的面模 雪白的內心 冰冷的溫度 堅凍一世人的情份 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
時針 無常和時鐘仝款 時分嘛有長有短 愛情親像時鐘的指針 敆做伙的時陣無濟 我的呼吸干焦囥會落你的芳味 阮的喘氣共你的心跳綴牢牢 目睭擘金，袂認得眼前的空間 日常的磨練，活跳跳的人生 親像無鉸無剪的電影 目睭瞌咧，想袂曉戲齣的結局 相逢的一工，恬喌喌的無言 袂輸啞口片的劇情 噗一喙煙，食一喙茶 揣一个所在，好好仔對話 簡單幾句嘛好 莫講音訊齊無 若準小可仔歇跤 時針聽候分針 只賰時間的滴滴答答 你的離開是阮的空白 佇指針相敆進前 傾聽恬靜的心內話 時針掰回，歲月嘛袂倒踅 佇宇宙崩裂進前 溫習功課餾你的氣味 無法度躊躇 時間是寂寞的マッチ 無法度定去 青春嘛無才調回頭 你的離開 就是世界上長的暗暝 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
立冬 Lı̍p-tang 立冬 等待春泥的軟塗 是季節的麵粉糊 共思念和向望撋做伙 收成入庫 冬眠歇睏 動靜之間 節氣轉踅 歲月的痕跡 無講無呾 卻是生動分明 毋驚霜凍寒冷 燒烙的日頭光 就佇面頭前 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
血脈 霜雪紛飛 烏雲罩霧 自由的回音喊喝 冷漠的世界無聲 若有若無，揜貼的空間 阮是紅塵俗世的一粒沙 寒星冷月 荒野曠闊 齷齪的星球吵抐 揣無徛起的所在 浮浮沉沉，寂寞的航程 阮是銀河孤帆的小船仔 浩瀚社稷幻化，盤千山過萬嶺 虛空周沙恬靜 ，佮天地孤對削 奔流大江海，捲起風雲 滾絞烏水溝，鑽破雺霧 斷離百代愁，守護母親的島嶼 天光炤征途，雷公爍爁擊戰鼓 吵家抐宅，坎坎坷坷的民主路 陰風暗毿，老神在在的自由國 淒冷天星，追趕火箭 奢颺雲尪，響亮戰鑼 鐵甲旗幡，沖天反乾坤 壯士英姿，魂魄拔山河 祖先的筋絡，傳承堅持 母親的土地，美麗生湠 擔輸贏，毋認命 咱是母親晟養的寶貝心肝 毋驚疼，繼續拚 咱是天公疼惜的番薯仔囝 軁迵古今的血脈⋯⋯燒烙 母親國度的心槽⋯⋯疼惜 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
霜降 Sng-kàng 霜降 天氣轉涼 已經深秋 毋是紅色血脈頂面 薄薄的一沿油花 冷冽的節氣變化 紅色的楓仔葉 綿綿的霜降 霜若雪仝款 降落 心情拄才 起飛 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
磨墨 我扶著你堅定的意志 佇烏色的石板路行徙 你用盡百年幻化的身軀 化做烏色的血汗 佮規个天地盤撋 力頭傷飽，墨汁洘焦 力頭痠軟，色水淡汫 勻勻仔共磨 就會當了解墨盤 磨甲墨汁，袂洘袂漖 磨甲墨色，金滑生花 畫山畫水，花鳥雲蕊 展開著 渾然天成的 潑墨山水 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
寒露 Hân-lōo 寒露 秋風勻勻仔掰開黃錦錦的菊花 一蕊一蕊的景緻tòo開光彩奪目的色水 山頂今仔轉紅的楓仔葉 鮮沢恬靜的光芒，嬌滴滴的妝娗 媠甲滿山坪的紅霞 雁鳥白鑠鑠的身軀冷光四射 追趕露水風寒的節氣 輕聲吟唱的金秋歲月 舞弄曠闊的天頂彩雲 葉脈頂面強欲相辭的露水滴 擉算分秒精差的日子 連鞭就佇純然的輕煙雺霧裡 無來無去 行咧欲規年迵天的五花十色 水變焦、青轉紅的秋天 褪掉性命的面紗 毋免遐爾仔惜皮 露水滴清氣短促 日暮西山嘛迷茫暗淡 秫米khiū嗲嗲 紅麴發酵 一沿一沿的寒霜勻勻仔結露 激出來故鄉上蓋迷人的風土 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
時間的藥殼仔 阮用青春寫批 橐入去少年的批囊內底 寄予半老老的家己 批收著 煞毋知影 欲回批予少年時的我 抑是閣較老的自己？ 阮用月光寫批 天星貼郵票 橐入去宇宙的批囊內底 光的速度做郵差 寄予無限以外的星球 到時陣 接批的人是我 抑是幻化的千萬億年？ 阮用心寫批 紙頭無名，紙尾無字 地水火風，有情無情 千言萬語 攏總橐入去乾坤批囊裡 無寫住址，無貼限時 毋知你 敢有看見 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
秋分 Tshiu-hun 寄命 寄命佇暗摸摸的炭空 七煞八敗的烏色舞台 兩片肺飼一口灶 炭坑40 度，空氣薄薄薄 跟綴台車無情墜落 心情負 3 度 烏暗的騎士，澹溼的國度 頂天立地的查埔囝 佇炭空底伸跤出手 黏黐黐的身軀 烏色的炭 敢是阮暗淡無光的性命 入坑 挖起來的是性命的謎題 出坑 揹起來的是生活的現實 礦壁坎坎坷坷 內心咇噗喘跳 用上謙卑的姿勢趁食 用上真情的態度生活 酸素矸代替酒矸 矸仔內的勇氣 敢是阮青春少年時的氣口 用賰無偌濟的氣魄 出力閣欶一喙薰 歕出往過的飄撇 磅空口的光線 就算稀微暗淡 嘛是阮上大的向望 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting
愛 茫茫世間，阮愛三項，日頭月娘查某人 愛日頭佇日時 愛月娘佇暗暝 阮愛你是無日佮無暝 留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments Powered by Firstory Hosting