--

Абмеркавалі важную тэму — як хутка беларусы ў іншых краінах стануць... небеларусамі. І ці здолеем мы нашым дзецям неяк давесці, што яны таксама беларусы, проста чамусьці без Беларусі? Ну і канечне, пад канец падкаста гутарка скацілася ў моўнае пытанне: як вучыць замежныя мовы і што даюць нам размовы па-беларуску.

Даша прыехала ў Польшчу з мужам, сынам, двума сабакамі і... пазыкай у 3 тысячы еўра. Але кажа, што ніводнага дня не шкадавала, што прамяняла родны Гомель на Гданьск. І нават пашпарт, які заканчваецца праз паўгады, ніяк не псуе яе энтузіязм ад пераезду. У гэтым выпуску падкаста мы спрабавалі вывесці Дашу на чыстую ваду і ўсё-такі высветліць, ці сапраўды ў яе ўсё так добра ў эміграцыі. І таксама зразумець, чаму яе вабіць больш Партугалія, а не Сож, сельмаш і палац Румянцавых i Паскевічаў.

Гэты выпуск тэрапеўтычнага падкаста будзе карысны беларусам, якія толькі яшчэ задумваюцца пра эміграцыю і хвалююцца, што на чужой старонцы да іх будуць ставіцца вельмі негатыўна. Вядучыя падкаста падзяліліся сваімі страхамі і чаканнямі перад пераездам у Польшу: Паша ўзгадаў, што баяўся, каб не папрабівалі колы ў машыне, а Поля — што яе будуць біць украінцы. Таксама Поля і Паша расказваюць гісторыі пра рэальнасць: што думаюць палякі пра беларусаў і як сябраваць з украінцамі. А яшчэ ў выпуску Паша зачытвае цытаты пра эмігрантаў са свежай прапагандысцкай прэсы з Беларусі. Але нядоўга — гэта можна і праматаць 😂

У нас на тэрапеўтычным падкасце зноў вельмі крутая госця: Марына была ў Беларусі фатографам, а потым пераехала ў Гданьск з 500 далярамі ў кішэні. І пайшла працаваць спачатку посудамыйкай, а потым у таксі. Марына расказала нам сваю гісторыю эмігранта: пра тыдзень ролтана дзеля аплаты кватэры, пра падоранае Уберам каханне, а таксама пра спробы вярнуцца ў прафесію фатографа і арганізацыю трансфармацыйных гульняў. Зафрэндзіць Марыну можна тут — https://instagram.com/sikorka_pl_gd

У Польшчы ёсць бясплатныя паліцэальныя школы, у якіх за год-два можна атрымаць якую-небудзь прафесію — фларыста, масажыста, ахоўніка, апекуна і г.д. І атрымаць сертыфікат еўрапейскага ўзору, які ў тым ліку дае замежнікам свабодны доступ на польскі рынак працы. Да нас у падкаст прыйшла Воля, якая ўжо адвучылася на фларыстку, і расказала, якую карысць яна атрымала ад наведвання паліцэальнай школы цягам года па выходным.