Claim Ownershipបទយកការណ៍
Subscribed: 62Played: 112
Subscribe
© France Médias Monde
Description
គឺជាការចាប់អារម្មណ៍ និងការក្រឡេកមើល ទៅលើបញ្ហានយោបាយ សង្គម ឬសេដ្ឋកិច្ច នៃប្រទេសកម្ពុជាបច្ចុប្បន្ន។ កម្មវិធីនេះ រៀបចំដោយអ្នកឆ្លើយឆ្លងព័ត៌មានរបស់យើង នៅភ្នំពេញ ហើយនឹងត្រូវចាក់ផ្សាយ ជារៀងរាល់ថ្ងៃ ពីថ្ងៃចន្ទដល់ថ្ងៃអាទិត្យ។
1794 Episodes
Reverse
កម្ពុជាគឺជាប្រទេសសំខាន់មួយដែលជាប់ចំណាត់ថ្នាក់លេខ១នៅអាស៊ី និងលេខ២នៅលើពិភពលោកដែលមានអ្នកស្ម័គ្រចិត្តបារាំងច្រើនជាងគេរហូតដល់ជាង ២០០នាក់ជារៀងរាល់ឆ្នាំ។ ក្រៅពីការងារស្ម័គ្រចិត្តបារាំងមកកម្ពុជា ក៏មានយុវជនកម្ពុជាបានចាកចេញទៅបំពេញបេសកកម្ម និងអនុវត្តការងារស្ម័គ្រចិត្តនៅប្រទេសបារាំងវិញដែលធ្វើអោយការងារស័្មគ្រចិត្តក្លាយទៅជាបេះដូងនៃទំនាក់ទំនងរវាងបារាំង និងកម្ពុជា។ នាពេលថ្មីៗនេះ លោក Yan Delaunay អគ្គនាយកនៃអង្គការ France Volontaire បានមកបំពេញទស្សនកិច្ចនៅប្រទេសកម្ពុជាដើម្បីពង្រឹង និងអភិវឌ្ឍកិច្ចសហប្រតិបត្តិការសាមគ្គីភាពបន្ថែមទៀត និងដើម្បីធ្វើអោយកម្ពុជាក្លាយជាប្រទេសម្ចាស់ផ្ទះឈានមុខគេ សម្រាប់ការផ្លាស់ប្តូរអន្តរជាតិ និងសាមគ្គីភាពរបស់អ្នកស្ម័គ្រចិត្តនៅអាស៊ី។
ស្ថិតនៅព័ទ្ធជុំវិញដោយដីសម្បទានសេដ្ឋកិច្ចដំណាំចំការអំពៅ សហគមន៍ព្រៃឈើប្រាំបីមុំ ខេត្តកំពង់ស្ពឺ គឺជាកន្លែងការពារព្រៃឈើ និងអភិរក្សសត្វព្រៃច្រើនប្រភេទដូចជា ជ្រូកព្រៃ ឆ្កែចចក ឈ្លូស ល្មូនកម្រៗ សត្វស្លាប និងហ្វូងសត្វទន្សោងជាដើម។ ប្រជាសហគមន៍ព្រៃឈើប្រាំបីមុំប្រាប់ឱ្យដឹងថា ហ្វូងសត្វទន្សោងដែលជាសត្វកម្រជិតផុតពូជកំពុងរងការគំរាមកំហែងពីការបរបាញ់ក្រៅដែនសហគមន៍៕
ថ្ងៃទី២០មីនា គឺជាទិវាអន្តរជាតិហ្វ្រង់កូហ្វូនី ដែលក្រុមប្រទេសនិយាយភាសាបារាំង មានប្រជាជនជិត៤០០លាននាក់តែងនាំគ្នាប្រារព្ធពិធីនេះជារៀងរាល់ឆ្នាំ។ កម្ពុជាដែលជាសមាជិក និងជាស្ថាបនិកនៃអង្គការហ្វ្រង់កូហ្វូនី ក៏តែងតែប្រារព្ធទិវាអន្តរជាតិនេះជារៀងរាល់ឆ្នាំដែរ។ ប៉ុន្តែទិវាអន្តរជាតិហ្វ្រង់កូហ្វូនីនៅក្នុងឆ្នាំ២០២៦នេះ ត្រូវបានរៀបចំឡើងប្រកបដោយអត្ថន័យ និងសារៈសំខាន់បន្ថែមទៀត ដោយសារកម្ពុជាកំពុងជំរុញ និងលើកកម្ពស់ភាសាបារាំងទៅដល់សិស្ស-និស្សិត ជាពិសេសយុវជនកម្ពុជា។ ជាការជំរុញ ក្នុងទិសដៅអបអរការរៀបចំកិច្ចប្រជុំកំពូលហ្វ្រង់កូហ្វូនី លើកទី២០ ចាប់ពីថ្ងៃទី១៤ ដល់១៦ ខែវិច្ឆិកា ឆ្នាំ២០២៦ ដោយមានការចូលរួមពីរដ្ឋាភិបាល និងសមាជិកនៃប្រទេសនិយាយភាសាបារាំងចំនួនជាង៩០៕
យុវតី១៦នាក់ ដែលមួយចំនួនធំជាកូនកាត់ខ្មែរបានជាប់ក្នុងបញ្ជីឈ្មោះបេក្ខនារីដែលត្រូវប្រកួតប្រជែងដណ្តើមម្កុដបវរកញ្ញាខ្មែរនៅប្រទេសបារាំង។ ចំពោះអ្នករៀបចំកម្មវិធី បវរកញ្ញាខ្មែរនៅប្រទេសបារាំងមានអត្ថន័យលើសពីសម្រស់ រូបរាងល្អផូផង់ពីខាងក្រៅ។ ក្រៅតែពីចង់អភិរក្ស ជំរុញវប្បធម៌ខ្មែរនៅទឹកដីបរទេស ការរៀបចំកម្មវិធីបវរកញ្ញាខ្មែរនៅបារាំង ជាឱកាសមួយដើម្បីជំរុញលើកទឹកចិត្តឲ្យយុវជនកូនចៅខ្មែរកើតទៅនៅទឹកដីបរទេសអាចចងភ្ជាប់ខ្លួនជាមួយអត្តសញ្ញាណ ប្រទេសកំណើតរបស់ឪពុកម្តាយ និងជីដូនជីតា។ ឈាង បុប្ផាបានទៅធ្វើបទយកការណ៍នៅផ្ទះលំហែក្នុងទីក្រុង ឡា លូប ជាទីដែលបេក្ខនារីបវរកញ្ញាខ្មែរនៅប្រទេសបារាំងហាត់សម ត្រៀមឡើងឆាកផ្លូវការដែលត្រូវប្រព្រឹត្តទៅនៅថ្ងៃទី២៨ មីនា។
Comic Book ឬ Manga ដែលជាប្រភេទសៀវភៅនិទានរឿងបែបរូបភាព ពុំសូវមានអ្នកផលិតច្រើនឡើយនៅក្នុងប្រទេសកម្ពុជា។ លោក សុន សុភាបញ្ញា ដែលមានចំណង់ចំណូលចិត្តគូរគំនូរតាំងពីកុមារភាព បានចាប់ផ្តើមដំណើរជីវិតក្នុងវិស័យសៀវភៅនិទានរឿងបែបរូបភាព Comic Book តាំងពីឆ្នាំ ២០១៦មក។ ទោះបី Comic Book មិនទាន់ទូលំទូលាយនៅកម្ពុជា និងជួបបញ្ហាប្រឈមជាច្រើនក្តី យុវជនរូបនេះនៅតែបន្តការងារច្នៃប្រឌិត និងបង្កើតស្នាដៃថ្មីៗដើម្បីលើកកម្ពស់ការអាន និងបំផុសគំនិតសិល្បៈ តាមរយៈការនិពន្ធសៀវភៅនិទានរឿងបែបរូបភាព Comic Book។
បុគ្គលិកដេរកាបូបទាំងអស់នៅក្នុងសិប្បកម្មមេត្រី គឺជាជនមានពិការភាព។ សម្រាប់ម្ចាស់សិប្បកម្មមេត្រី ទោះបីជាពួកគេជាជនមានពិការភាពក៏ពួកគេមានសមត្ថភាពបំពេញការងារបានយ៉ាងល្អ។ សម្រាប់ជនមានពិការភាពវិញ ការងារនៅសិប្បកម្មមេត្រីបានផ្តល់ក្តីសង្ឃឹម និងជីវិតថ្មី ពិសេសគេចពីការរើសអើង និងការមើលងាយពីអ្នកដទៃ៕
ពលរដ្ឋភៀសសឹកជាង ១០០គ្រួសារដែលភាគច្រើនជាស្រ្តី កុមារ និងមនុស្សចាស់មកពីក្បែរតំបន់អូរស្មាច់ ខេត្តឧត្តរមានជ័យកំពុងបន្តជាប់គាំងនៅក្នុងជំរំសុវត្ថិភាពនៃវត្តស្រណាលស្ថិតក្នុងឃុំស្រណាល ស្រុកក្រឡាញ់ ខេត្តសៀមរាប។ ពលរដ្ឋភៀសសឹកទាំងនេះបានរៀបរាប់ពីជីវភាពខ្វះខាត និងបញ្ហាផ្លូវចិត្ត។ តែទោះជាយ៉ាងណា ពួកគេក៏មិនទាន់ហ៊ានត្រឡប់ទៅផ្ទះវិញដោយសារតែកងទ័ពថៃបានដាក់រាយបន្លាលួស ទូរកុងតឺន័រ និងការប្រែតំបន់ភូមិសាស្ត្រមួយចំនួន។
ហោ សីហា ក្នុងវ័យ ៣៦ឆ្នាំ គឺជាវិចិត្រករគំនូរសហសម័យម្នាក់ ដែលមានប្រវត្តិដិតដាមដោយការលំបាកនិងឆ្លងកាត់នូវជីវិតផ្ទាល់ខ្លួនក្នុងសង្គ្រាមតាមព្រំដែនតាំងពីកុមារភាព។ ធ្លាប់ហែលឆ្លងនូវការភ័យខ្លាច ការបាក់ស្បាត ជីវិតឯកោ ការជួញដូរ និងភាពក្រីក្រ ហោ សីហា បានតស៊ូប្រយុទ្ធនឹងជីវិតរហូតបានក្លាយជាវិចិត្រករគំនូរដ៏ល្បីល្បាញម្នាក់នាពេលសព្វថ្ងៃនេះ។ វិចិត្រកររូបនេះ គឺជាអ្នកមានទំនោរបែបធម្មជាតិ និងវិទ្យាសាស្ត្រនិយម ប៉ុន្តែស្នាដៃគំនូរពណ៌ចុងក្រោយរបស់លោក បានផ្តោត និងឧទ្ទិសសំខាន់ ជាលើកដំបូងទៅលើបទពិសោធជីវិតផ្ទាល់ខ្លួន ជម្លោះ និងការលំបាកដែលបង្កឡើងដោយសារសង្គ្រាមនៅតាមព្រំដែន។
បន្ទាប់ពីជោគជ័យជាច្រើនឆ្នាំជាប់ៗគ្នា ទិវាជាតិអំណានលើកទី១១ បាននាំយកសៀវភៅច្រើនប្រភេទមកបង្ហាញដល់សាធារណជននៅក្នុងឱកាសតាំងពិព័រណ៍សៀវភៅថ្នាក់ជាតិ ដែលមានរយៈពេល ៥ថ្ងៃ ចាប់ផ្តើមពីថ្ងៃទី១១ ដល់ថ្ងៃទី១៥ ខែមិនា ឆ្នាំ២០២៦។ ទិវាជាតិអំណានលើកទី១១នេះ ជាវេទិកា ដែលផ្តល់ឱកាសកាន់តែទូលំទូលាយដល់អ្នកនិពន្ធ អ្នកអាន និងគ្រឹះស្ថានបោះពុម្ពផ្សាយ បានជួបគ្នា និងយល់អំពីគ្នាច្រើនជាងមុន។ អ្នកនិពន្ធសៀវភៅ និងអ្នកបោះពុម្ពផ្សាយបង្ហាញចំណាប់អារម្មណ៍រីករាយជាពន់ពេក ដោយសារពួកគេបានស្ដាប់មតិយោបល់ និងយល់ចិត្តអ្នកអានបានច្រើនជាងមុន។ក្នុងន័យនេះ ពួកគេចង់ឲ្យមានការរៀបចំកម្មវិធីបែបនេះជាប្រចាំ ដើម្បីលើកកម្ពស់ទាំងការអាន ទាំងការសរសេរ៕
មានវត្តមានជាង២០ឆ្នាំនៅទីក្រុងប៉ារីស សាលារៀនខ្មែរដែលកើតចេញពីគំនិតផ្តួចផ្តើមរបស់សមាគមវប្បធម៌បារាំងខ្មែរ បានបង្រៀនភាសាខ្មែរដល់កូនខ្មែរដែលកើតធំដឹងក្តីនៅបារាំង និងជនជាតិបារាំងជាច្រើនពាន់នាក់។ នៅពេលកូនសិស្សមួយចំនួនចាប់អារម្មណ៍រៀនភាសារបស់ឪពុកម្តាយដើម្បីស្វែងយល់ពីឫសគល់វប្បធម៌ខ្មែរ មួយចំនួនផ្សេងទៀតស្វែងរកជំនួយថ្នាក់រៀនខ្មែរនៅចុងសប្តាហ៍ដើម្បីទុកគ្រាន់ជាសំពាយនៅពេលបំពេញបេសកកម្ម ការងារនៅប្រទេសកម្ពុជា។
សហគមន៍ទេសចរណ៍ធម្មជាតិកំពង់ឃ្លាំងជារមណីយដ្ឋាននៅបឹងទន្លេសាបដ៏ស្រស់ស្អាត។ តែបែរជាមិនសូវមានភ្ញៀវទេសចរទៅទស្សនាកម្សាន្តប៉ុន្មានទេ។ មគ្គុទេសក៍ទេសចរណ៍ និងសហគមន៍បានមើលឃើញដូចគ្នាថា សហគមន៍ទេសចរណ៍ធម្មជាតិមួយនេះមានភូមិសាស្ដ្រនៅឆ្ងាយដាច់តែឯងពីក្រុងសៀមរាប និងខ្វះការផ្សព្វផ្សាយ៕
នៅក្រោយបទឈប់បាញ់ ផ្ទះពលរដ្ឋកម្ពុជាយ៉ាងហោចណាស់ ២ពាន់ខ្នង ក្នុងខេត្តបន្ទាយមានជ័យ ត្រូវបានកងកម្លាំងយោធាថៃបំផ្លិចបំផ្លាញ និងកាន់កាប់ដោយការរាយបន្លាលួស និងហ៊ុព័ទ្ធដោយទូកុងតឺន័រ។ ទង្វើរំលោភបំពានរបស់យោធាថៃទាំងនេះបានបង្ខំឱ្យពលរដ្ឋខ្មែរជាង ៣ពាន់គ្រួសារ ស្មើនឹងជាង ១ម៉ឺននាក់ត្រូវបាត់បង់ផ្ទះសម្បែង មុខរបរ និងទ្រព្យសម្បត្តិគ្រប់បែបយ៉ាង។ ពួកគេបានបង្ហាញនូវការឈឺចាប់ និងស្នើសុំអោយអន្តរជាតិបន្តជួយស្វែងរកយុត្តិធម៌។
ភូមិអូរបីជាន់ ស្ថិតនៅក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ជាប់ព្រំដែនប្រទេសថៃ ហាក់មិនត្រូវចាត់ទុកជាតំបន់ជម្លោះដែលរងផលប៉ះពាល់ធ្ងន់ធ្ងរបំផុតដោយសារសង្គ្រាមកម្ពុជា-ថៃ ដូចនៅក្នុងតំបន់សមរភូមិប្រយុទ្ធនៃភូមិជោគជ័យ និងភូមិព្រៃចាន់ឡើយ។ នៅក្រោយបទឈប់បាញ់រយៈពេលជាង ២ខែមកនេះ ពលរដ្ឋក្នុងភូមិអូរបីជាន់ប្រមាណជាង ៩០% បានវិលត្រឡប់ចូលមករស់នៅក្នុងផ្ទះសម្បែងរបស់ខ្លួន ដើម្បីប្រកបរបររកស៊ី និងចិញ្ចឹមជីវិតធម្មតាវិញ។ ការវិលត្រឡប់មករស់នៅរបស់ពលរដ្ឋក្បែរតំបន់ជម្លោះកៀកព្រំដែនប្រទេសថៃនេះ ធ្វើឡើងជាមួយនឹងការភ័យខ្លាចខ្លះដែរ ដ្បិតតំបន់ខ្លះនៅកៀកតំបន់ដែលយោធាថៃរាយបន្លាលួស និងដាក់កុងតឺន័រ។
នៅព្រឹកថ្ងៃទី៨ ខែមីនា ឆ្នាំ២០២៦នេះ ក្រុមអង្គការសង្គមស៊ីវិលចំនួន ២៤ស្ថាប័ន បានប្រារព្ធខួបទី១១៥ នៃទិវានារីអន្តរជាតិ ក្រោមប្រធានបទ៖«អនុវត្តសិទ្ធិសេរីភាព ដើម្បីយុត្តិធម៌ និងសេចក្តីថ្លៃថ្នូរ សម្រាប់ស្ត្រី និងក្មេងស្រី» នៅសួនច្បារមុខក្រុមប្រឹក្សាអភិវឌ្ឍន៍កម្ពុជា(CDC)។ ក្នុងឱកាសនោះ អង្គការស៊ីវិលបានលើកឡើងពីបញ្ហាប្រឈមនានា ដែលស្ត្រីនៅបន្តជួបប្រទះក្នុងសង្គមកម្ពុជា។ ក្នុងន័យនេះ ក្រុមអង្គការស៊ីវិលបានលើកឡើងអនុសាសន៍ចំនួន ១៦ចំណុច ដាក់ជូនរដ្ឋាភិបាល ដើម្បីផ្តល់ឱកាសដល់ស្រ្តីក្នុងការចូលរួមក្នុងការអភិវឌ្ឍសេដ្ឋកិច្ច សង្គម និងធានាសិទ្ធិសេរីភាពសម្រាប់ស្ត្រីស្របទៅតាមគោលនយោបាយរបស់រដ្ឋាភិបាល។
វត្ថុបុរាណខ្មែរចំនួន ៧៤រូប ដែលមានអាយុកាលចាប់ពីសម័យមុនអង្គរ និងសម័យអង្គរត្រូវបានបញ្ជូនត្រឡប់មកកម្ពុជាវិញកាលពីថ្ងៃទី២៧ ខែកុម្ភៈ ឆ្នាំ២០២៦។ វត្ថុបុរាណទាំងនេះត្រូវបានក្រសួងវប្បធម៌កម្ពុជាទាមទារពីគ្រួសារអ្នកជួញដូរសិល្បៈបុរាណ លោក ឌូគ្លាស ឡាចហ្វដ Douglas Latchford។ លោក ឆាយ វិសុទ្ធ ប្រធាននាយកដ្ឋានសារមន្ទីរបញ្ជាក់ថា បច្ចុប្បន្ន វត្ថុបុរាណទាំងនេះកំពុងស្ថិតក្រោមការត្រួតពិនិត្យរបស់អ្នកជំនាញនៅសារមន្ទីរជាតិកម្ពុជា មុននឹងដាក់តាំងបង្ហាញជាសាធារណៈដើម្បីឲ្យប្រជាពលរដ្ឋ និងអ្នកស្រាវជ្រាវបានសិក្សាអំពីតម្លៃប្រវត្តិសាស្ត្រ និងវប្បធម៌របស់ខ្មែរ។
នៅថ្ងៃទី0៥ មីនានេះ មជ្ឈមណ្ឌលសិទ្ធិមនុស្សកម្ពុជាបានរៀបចំប្រារព្ធទិវានារីអន្តរជាតិឆ្នាំ២០២៦។ កម្មវិធីនេះបានផ្តល់ឱកាសឱ្យសកម្មជនសិទ្ធិមនុស្ស ២រូបគឺលោក យី សុខសាន្ត និងអ្នកស្រី ឃ្លាំង សុបិន្ត រម្លឹកពីការរស់នៅដ៏លំបាកក្នុងបន្ទប់តូចចង្អៀត និងបរិយាកាសអាប់អួរនៅក្នុងមន្ទីរឃុំឃាំង។ ចំពោះអ្នកទោសមនសិការទាំង ២រូប ចង់ឃើញអាជ្ញាធរកែលម្អលក្ខខណ្ឌមន្ទីរឃុំឃាំង និងការបណ្ដុះបណ្ដាលជំនាញវិជ្ជាជីវៈ ដើម្បីឱ្យអ្នកទោសអាចកែប្រែខ្លួន និងវិលត្រឡប់ទៅរស់នៅក្នុងសង្គមវិញ។
ស្ថិតនៅក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ ជាទីកន្លែងដែលជម្រកបណ្តោះអាសន្នថ្មីសម្រាប់ជនភៀសសឹកកំពុងត្រូវបានសាងសង់យ៉ាងមមាញឹក។ យ៉ាងហោចណាស់ជម្រកផ្ទះថ្មីចំនួន ៣ពាន់ខ្នងដែលសង់លើផ្ទៃដីប្រមាណ ៤០០ហិកតាកំពុងត្រូវបានពន្លឿនការសាងសង់យ៉ាងឆាប់រហ័ស ដើម្បីទទួលជនភៀសសឹកដែលរងគ្រោះដោយការបំផ្លិចបំផ្លាញផ្ទះសម្បែង និងការឡោមព័ទ្ធរបស់យោធាថៃក្នុងខេត្តបន្ទាយមានជ័យ។ ជម្រកថ្មីនេះរំពឹងថានឹងអាចបញ្ចប់ការសាងសង់នៅមុនពិធីបុណ្យចូលឆ្នាំខ្មែរ ឬមុនការមកដល់នៃរដូវវស្សាខាងមុខ។
បច្ចុប្បន្ន សិប្បកម្មប្រពៃណីខ្មែរមួយចំនួនដូចជាគំនូរ ចម្លាក់ ស្មូន ឬតម្បាញដែលជាមរតកសម័យដូនតាកំពុងជួបបញ្ហា ឬក៏ថានៅមិនទាន់មានការផ្ទេរចំណេះដឹង ជំនាញ និងបច្ចេកទេសទៅឲ្យមនុស្សជំនាន់ក្រោយឲ្យបានទូលំទូលាយនៅឡើយទេ។ ទោះជាយ៉ាងណា អ្នកផលិត និងអ្នកប្រើប្រាស់យល់ថា ការបន្តអភិរក្សសិប្បកម្មដូនតាទាំងនេះប្រកបដោយការច្នៃប្រឌិតជាដំណោះស្រាយមួយក្នុងការពង្រឹងទីផ្សារសព្វថ្ងៃ និងក៏ជាការជួយជ្រោមជ្រែងវប្បធម៌ខ្មែរដែរ។
«គំនូរសិល្បៈដើម្បីសន្តិភាព» ឬ Art for Peace ជាផ្ទាំងគំនូរដែលឆ្លុះបញ្ចាំងអំពីទុក្ខវេទនារបស់ជនស៊ីវិល និងការបំផ្លិចបំផ្លាញហេដ្ឋារចនាសម្ព័ន្ធ និងបេតិកភណ្ឌរបស់កម្ពុជាក្នុងជម្លោះព្រំដែនជាមួយថៃ។ លេចរូបរាងជាលើកទី ២ ផ្ទាំងគំនូរសិល្បៈដើម្បីសន្តិភាពបានញ៉ាំងចិត្តសិល្បករ និងអ្នកទស្សនាឱ្យមានភាពសោកសង្រេងពីការបាត់បង់ និងខូចខាតសម្បត្តិបេតិកភណ្ឌជាតិ និងនឹកអាណិតពលរដ្ឋភៀសសឹកដែលរងទុក្ខវេទនាពីការវាយប្រហារមិនរើសមុខរបស់យោធាថៃក្នុងសង្គ្រាមដ៏តានតឹងចំនួន២លើកកាលពីឆ្នាំ២០២៥។ អ្វីដែលពលរដ្ឋខ្មែរចង់បានគឺសន្តិភាព និងការវិលទៅរកសភាពដើមវិញដោយគ្មានការគំរាមកំហែងពីសំណាក់កងកម្លាំងយោធាថៃ។
ចាប់តាំងពីសង្គ្រាមផ្ទុះឡើងរវាងកម្ពុជា-ថៃនៅតាមព្រំដែនប្រទេសទាំងពីរ នៅអំឡុងខែកក្កដានិងខែធ្នូ ឆ្នាំ២០២៥ រហូតដល់មានបទឈប់បាញ់រយៈពេលជាងពីរខែនេះ ជនភៀសសឹកកម្ពុជារាប់ម៉ឺននាក់នៅតែបន្តបន្លាស់ទីដ៏លំបាក រស់នៅក្នុងជំរំភៀសសឹកជាបណ្តោះអាសន្ន។ ស្ទើរតែជារៀងរាល់ខែ ក្រុមគ្រូពេទ្យស្ម័គ្រចិត្តខ្មែរ-បារាំងមួយក្រុម តែងតែចុះបំពេញបេសកកម្មមនុស្សធម៌វេជ្ជសាស្ត្រស្ម័គ្រចិត្តបន្ទាន់មួយ ដើម្បីជួយដល់ជនភៀសសឹកដែលបន្តស្នាក់នៅក្នុងជំរំបណ្តោះអាសន្ន ដូចជានៅក្នុងខេត្តបន្ទាយមានជ័យ សៀមរាប ឧត្តរមានជ័យ និងព្រះវិហារជាដើម។ គោលបំណងសំខាន់នៃប្រតិបត្តិការមនុស្សធម៌នេះមិនត្រឹមតែផ្តល់នូវការថែទាំសុខភាព ការព្យាបាលបន្ទាន់ និងការផ្តល់ថ្នាំសង្កូវផ្សេងៗប៉ុណ្ណោះទេ តែក៏ថែមបានផ្តល់នូវភាពកក់ក្តៅនិងការគាំទ្រផ្នែកផ្លូវចិត្តផងដែរ។
Comments
Download from Google Play
Download from App Store
United States