Ernineq podcast

Marianne meerartaarniarnermini naartunerminilu meeqqap nappaammik kingornunneqarsinnaasumik peqarsinnaaneranut oqaluttuaa tusarnaarsinnaavat. Ajoraluartumik nappaat kingornuttagaq ilaqutariit nalaataanik nunatsinni atugaarpiannginnera peqqutaalluni pisortaqarfinniit ilisimaneqarnera killeqarpoq. Taamaalillunilu nunatsinni misissortinnissamut periarfissat killeqarlutik. Ilaqutariit periarfissakinnera pisortaqarfiullu systemia oqimaatsoq aqqusaarsimavaat tunniutiinnangalluinnarlutillu. Pillutik pillutik Danmarkimut Mariannep naarmiuminut misissortikkiartornissaanut iluatsitsipput nammineq akilikkaminnik. Ilaqutariit iluminni nappaateqartoqarnera qanoq tacklertarpaat? Misigissutsit suut atorneqartarpat? Oqaluttuaq pikkunartoq tusarnaaruk.

Naartunermi misigisat allattorneqarsinnaappat? Naartunerma nalaani allattuiffigisartagassannik allattaaveeqqamik pisivunga. Maannakkut ukiut qulinngulersuni allattaaveeraq ammaqqaarmalli allattuiffigineqarlunilu quppeqarpara allattorsimasakkalu atuarlugit. Timimut allannguutit, misigisat, eqqarsaatit, sinnattut, naarmiuararlu pillugit siullermeertumik anaananngulersumiit allatat tusarnaakkit.

Inorlutik inuusimasunut piffissaq siulleq inuunerat nalunartarpoq, naap iluani inerilluanngitsoorsimaneq peqqutaalluni. Aviamut misigisat pikkunanngitsoorsimanngillat, paneeqqanimi inorluni inunngoreersoq atortoqaqaluni kuvøsep iluaniittoq assaarai tigoriarlugit saallugu oqarfigisimavaa: “Nukissamik nassarlunga iserfigaakkit, illit pillutit assoroorsimaqaagut ilinnulli asanninnitta aniguisippaatigut, ullumikkut aamma taanna aqqut atorlugu ulloq ullumikkut naatigut, illittaaq aamma asanninneq atorlugu nukittugit” Kalaallit Nunaanni meeqqani inunngortuni 8-ssaat inorluni inuusarpoq. Nunarsuarmi kisitsisinut sanilliullugit akulikinnerulluni. Immiussami uani inortunik meeraqarnermi misigisat, aqqusaakkat, angusat neriuutillu killeqanngitsut tusarnaakkit <3

Immikkut ittumik immiussineq kingumut qivialaarnermik imaqarpoq: aallartisarneq, aporfiit, unittoorfiit, killissanik qaangiinerit, qaqeqqittarnerit misigisat puigunaatsut allallu eqqartorpakka. Suut uanga pissarsiaraakka? Suullu tusarnaartartut pissarsiarisarsimavai? Junip 16-iat 2021 tassaavoq Ernineq podcast saqqummersitseqqaarneraniit ukiup ataatsip qaangiunnera.

Nukap pingajussaa panissaalernermini sap. ak. 32-t naartoreerluni paasivaa aavata naqitsinera qaffasippallaartoq. Sanami misissortereernerup kingorna paasivaa tassanngaannaq pilatsittariaqalerluni. Pissanganeq, ernumanerlu uippallernaveersaarneq Nukap misigisimavai, tassami qaammatit marluk sioqqullugit ernisariaqalersimagami. Pilatsinnermi timimut sunniutit suusarpat? Misigissutsikkummi suut aqqusaarsimavai? Misigisat alianartut illarnartullumi eqqartorpagut.

Immiussami uani tusarnaarsinnaavat perngaamik Ernineq podcast maajip 5-ni Killut-mi livermat immiussaq. Immiussinermi eqqartorpagut badekarimi erneriasaarneq, ernereernerup kingunerani timip allannguutai, nammineq perorsagaanerup ullumikkullu perorsaanerup assigiinngissutai, tassanilu oqaluttuartuuvoq Pilu Noahsen. Unillatsiareernerup kingorna Inaluk meerartaareernerup kingorna aappariinnerup 'anersaava' attatiinnarnissaanut qanoq pingaaruteqartiginera eqqartorpaa. Malugiuk immiussap nipaa allanngorarsinnaammat. Tusarnaarluarisi! 

Immiussami uani meeqqamik tunniussineq eqqartorneqarpoq, oqaluttuartuullunilu Rebekka. Meerarisaminik tunniussineq qanoruna pisimasoq Rebakkamut ilaqutaasunullu sunniuteqarsimava? Ukiut arlalinngoreerput aaliangiummassuk meeraq tunniutissallugu, tamanna ullumikkut qanoq inuunerannut sunniuteqarsimava? Oqaluttuaq pikkunartoq tusarnaaruk.

Holistisk coach, Yoga, meditation mindfulnessilu suuppat sumullu iluaqutaasinnaappat? Immiussami uani Lea Holm nuumminngaanneersuuvoq, Seqineq-mi ingerlatsisuuvoq massakkut New Zealandimi najugalik. Lea Himalayami Indiap avannaani ilitsersuisutut ilinniarnikuuvoq, massakkullu neqeroorutigalugu itnuttut ineriartornissamut pikkorissaanerit assigiinngitsut. Leap inuunermini aqqutissatut aaliangiussineranut tunngavileeqataasut ilarivaat ukiut qulit qaangiummata anaanani tassanngaannartumik annaasimanera. Ukiullu sisamat qaangiummata aapparisimasani toqukkut qimaguteriasaarnera. Leap paasivaa inuunermini anniaatit annertuut toqqortertarsimasani qaffakaattoorneri tamannalu kingunerivaa inuunermini naqqarmissimaneq.   Leap oqaatigaa: ”Ajornanngitsorujussuuvoq naqqa qinissallugu. Kisianni akilersinnaaqaaq imminut piumaffigaluni, imminut ajunnginnerpaamik inuuneqarusulluni qinissallugu akilersinnaaqaaq, sakkortusinnaavoq kisianni akilernera ingasannerpaavoq”.  Tusarnaarluarisi 

2019-imi politikeriniit aaliangiunneqarpoq naartunissaminnik ajornartorsiuteqartut naartulernissaanut ikiorsiisarneq unitsinneqassasoq. Tamanna isumaqarpoq Kalaallit Nunatsinni naartulernissamut ikiorserneqarsinnaanngitsut Danmarkimut ikiorserneqarnissaanut Nunatta Peqqinnissaqarfianiit akilerneqartarunnaarnera. Ivalo uinilu naartulernissaminnut Danmarkimut ikiorserneqartut kingulliit ilarivaat. Aqqutaali oqitsuinnaasimanngilaq.  Ullumikkut nunatsinni naartulernissamut ajornartorsiutillit ikiorserneqarnissaannut killeqarpoq. Nammineerluni naartusinnaannginnermi aliasunneq pisuutitsineq ernumaneq neriuuteqarneq, misigissutsit allat aqqusaagassallu Ivalop eqqartugai tusarnaakkit. 

Paasinnittaaseq Tunngaviit 3-nik (pingasunik) taaguutilik sunaava? Immiussami uani Ivalo pulaartoraara, nassuiarpaalu qanoq eqqarsartartuunerput massakkumiit massakkumut atorneqartarnersut. Ivalo tunngaviit pingasut pillugit ilitsersuisarpoq pikkorissaasarlunilu, suliarisartagaasa ilai immiussami uani eqqartorpagut.

Immiussami uani pulaartoraara Hulda. Hulda oqaluttuarnermini eqqartorpaa naartuniarnerup ajornanngitsuinnaannginnera. Ukiut arlallit naartulernissamut misiliisaraluarluni neriuuteqarnaveersaartarneq, naartulersimanermi ilaquttanut tusarliineq nuannersoq, taavalu naartunerup malittaanik inuunermi allannguuteerarpassuit. Kingornalu ernisartittariaqalerneq, piaartumillu pilatsittariaqalerneq, nikingasunillu meeraqarneq. Immiussami tapersersuisuuvoq Babysam

Ukiut 15-nit matuma siorna Pia qilanaareqisaminik tusarlerneqarpoq, tassa kissaatigeqisaminik naartulersimalluni. Dronning Ingridip napparsimaviani erniartorluni ernisunnermini tusaasinnaavaa meeqqap suli Piap naavata iluaniittup uummateeraa nipaaruttartoq. Tassanngaanniit suna tamarmi sukkasoorujussuarmik ingerlasimavoq. Ernera anillammat anersaartunngilaq, pisullu sukkangaarmata Piamut uppernaassimavoq. Inuusuttuaraateqarluni qanormita Piamut ippa? Inuusuttuaraateqarluni anaanatullu misigisassat assiginngitsut perorsaaniarnerlu pikkunarsinnaasoq qanoq periuseqarfigisarnerai tusarnaaruk.

Immiussani marluusuni immikkoortortat aappaat. Imigassartorunnnaarnerup kingorna inuuneq oqiliva? Paninnguup oqaluttuarnermini immikkoortortap aappaani ilaatigut kinguaariinni trauma ingerlaartut perorsaanermilu meeqqamut peqqinnanngitsut kipiniarneri eqqartorpai, taamatuttaarlu aamma marlunnik meeraqarfeqarneq qimareernerullu kingorna meeraq qitiutillugu ilaqutariittut attaveqaqatigiinneq oqitsuinnaanngitsoq iluatsissinnaasorlu eqqartorlugu. Ernisimanermini misigisimasaminik eqqartuivoq, meeqqaminillu misigisimasani assigiinngilluinnartut eqqartorlugit.

Immiussaq una marlunnik avinneqapoq. Paninnguaq Heilmann 19-iinnarnik ukioqarluni imigassamut katsorsartissimavoq, immiussami uani ilaatigut oqaatigaa "Inuit imerajuttut sisamat ilagigukkit tallimarissavaatsit, inuillu anguniagallit ingerlalluartut sisamat ilagigukkit tallimarissavaatsit". Ullumikkut inuunera allaaneroqaaq, taamaattuaannarsimanngilarli. Paninnguup katsorsartinnissaminut aliangiinermini peqqutaasut eqqartorpagut, inoorusukkunnaartarsimaneri kingornalu inuunermini mumisitsisimanerminut nukissat sumiingaanneerneri sakkussallu suut atortarnerai tusarnaakkit.

Immiussami immikkoortortani marluusuni ernisussiortunik pulaartoqarpugut. Immiussineq sioqqullugu facebookikkut nittarsaassinermi tusarnaartartut pulaartutsinnut apeqquteqarsinnaanerat periarfissinneqarmat apeqqutit tulleriiaarpagut. Imm. siullermi ernisussiortutta ernisuttut nipaqanngitsut/maalaanngitsut imal. anniartarneri qanoq igisarneraat tusarnaarsinnaavarsi, ernisussiortutut misigisat puigunaannerpaat quianarnerpaallu eqqartorneqarlutittaaq. Nanginnera Ernisussiortut oqaluttuarput imm. aappaanni tusarnaarsinnaavarsi. Tusarnaarluarisi! 

Immiussami uani oqaluttuartuuvoq Selma. Malugiuk immiussap imarisaa tusarnaartunut sakkortusinnaammat. Selmap naarmiuminik annaasaqarsimanini oqaluttuaraa. Tassami qaammatini arfinilinni marlulissanik naartoreersimalluni paasivaa naarmiumi aappaa annaasimallugu. Qamuuna ilungersorneq nukittuniarneq akerlianillu nukarliup peqqilluni uumaneranut qujamasunneq atorlugu. Misigisaq Selmamut ilaqutaanullu imaannaasimanngeqaaq. Oqaloqatiginnittarnermigulli qaangiiartorpoq, ullummi tamaasa meeqqani qiimmassaasut nukittoqqutigigamigit.

"Angutimmi misigissusaat eqqartorneqarunik qanoq issava?" Taamatut oqarpoq Ernineq podcastimi pulaartoq Hans Jukku Noahsen. Immiussaq una immikkuullarissuuvoq. Tassami siullerpaamik Ernineq Podcastimi angummik oqaluttuartoqarpugut. Angajoqqaanngorneq angutit isaanniit misigisat qanormita ippat? Ilaatigut ataatatut "manngertumik" periuseqarneq eqqartorneqarpoq, kisiannilu aamma asanninneq annertooq nalissaqanngitsoq eqqartorneqarluni. HJ-p eqqartorpaa aamma angutitut misigissusilerinikkut tunuarsinaakkajunneq: "Amerlagatta suli qangatoortutut pissusillit. Matoqqavallaarpugut". Eqqaanngitsuunngilarput aamma nipilersortartuuneq suullu sunnitaasarnersuti. HJ-p oqariartuutigaa qanoq nipilersornerup silarsuaata inuiaqatigiinnut tunniussinnaasaa annertutiginersoq; anersaakkut, periutsitigut eqqarsartaatsikkullu. Ilumoorsaarniarlutalu illarnertalilaarparpummiaasiit aamma. Tusarnaarluarisi! 

Episodemi uani ilaatigut tusarnaarsinnaavarsi nunatta oqaluttuarisaanerani siullerpaajullutik aappariit suiaaqatigiillutik meeravissiartaarnerata oqaluttuassaartaa. Meerartaarniarneq sorpassuartigut ajornaatsuinnaasimanngilaq, Najap aappanilu meeravissiartaarniarnerminni aqqusaarsimasatik oqaluttuarai. Ilaatigut ernerat pilersaarutaanngitsumik sioqqutsilluni inunngulernera eqqartopaa, qaammatinilu siullerni misigissutsit assigiinngitsorpassuit eqqusaarsimasani eqqartorpai, soorlu pilluaammerujussuarneq, angajoqqaanngornermi illersuerusussuseq sakkortuup takkunneran, kisiannilu aamma ernertaartik aaneqariasaarsinnaanerannut ernumaneq. Inuit suiaaqatigiit marluk aappariinnerat pissutigalugu meerartaarniarnermi atugassarititat ulloq manna tikillugu imaannaanngitsut aamma eqqartorpavut. Tamakkuli meerartaarniarnermut aporfittut Najap isiginngilai. 

Episodemi uani tusarnaarsinnaavarsi Pipaluup anaananngorsimanermini oqaluttuaa. Pipaluk 15-inik ukioqarluni nakorsamiit paasivaa naartulluni . Pipaluk aappanilu tupaallaatigeqisaminik paasivaat naartunermini qaammatit tallimat sinnerlugit angoreersimagai. Nakorsaqarfimminngaanniit ilaatigut periarfissinneqarput meeraq inunngorpat allamut tunniunneqarsinnaanissaa. Qaammatit arfineq marluk angoqqammeraalu naartunermini ernisulersimavoq, sanamilu unitsitaalluni. Ullut pingasut ernisoreerluni nukappiaraq inunngorpoq. Immiussinermi Pipaluup nukaa peqataallatsiarpoq, nammineq ajanngorsimanermini qataanngutigiinnermullu sunniutinik eqqartueqatigiilaarlutik. Pipalummut ataatanngortumullu angajoqqaanngorneq allatulli oqitsuinnaasimanngilaq. Ernerat inorluni inuusimanera ilaatigut isumaqarpoq sanap intensivafdelingiani qaammat uninnganerat, qaammatillu marluk k3-mi. Episode 12-imi Pipaluup naartnermini, erninermini erninermilu kingorna misigisaanik tusarnaarit.

I august 2021 slog Line dørene op for den første private jordemoderklinik i Nuuk. I episoden kan du lytte til hvorfor den seje anaana og jordemoder Line har valgt at åbne sin klinik privatjordemoder.gl og høre hvad det er hun tilbyder; alt fra akupunktur til billeder!  Lille disclaimer: klinikken privatjordemoder.gl tilbyder noget som går udover de offentliges tilbud. Episoden er på dansk og bær ovee med mig hvis jeg (Vivi) snakker lidt gebrokken. ENJOY!