Zip噏劇場

時間：180年9月7日，第五代村長盧和出殯當日 地點：封閉區域Area DB Island 啞鈴殿（控制室） *拍打透明玻璃聲 盧婷：（玻璃內）放我出去啊！求下你快啲放我出去啊！我想送爸爸最後一程啊！ 今敏：你都仲未答我前日問你嘅問題。如果比你撳一個掣，就可以將呢個啞鈴洲變到好似你嗰位達哥哥嘅Area 15一樣，有車有船有電同有好多高科技，你肯唔肯呢？ 盧婷：（玻璃內）姐姐！我乜都唔識架！你快啲放我出去啦！我淨係想去見我爸爸最後一面咋！！！我求下你啊！ 今敏：如果去到Area 15嘅唔係你，係愛好天文術數同有探知精神嘅裘氏後人，或者係好勇嘅凱氏後人，又會點呢吓... 盧婷：（玻璃內）姐姐！我求下你啊！媽媽佢喊得好慘！葦哥哥又唔喺佢身邊！你比我返去啦！ 今敏：你答咗我問題，我咪放你出嚟囉～ 盧婷：（玻璃內）你放我出嚟我就一定會答 今敏：好～ *玻璃碎裂聲效 *急速跑步聲效 今敏：想走？ *重力聲效 盧婷：（辛苦）突然之間...好重...重到我郁唔到... 今敏：我都講咗我喺呢度係「神」，我想點都可以。我可以隨意改變重力，可以隨時令到你死。不過～我唔會咁做～ 盧婷：我...透唔到...氣... 今敏：唔走啦嗎？ 盧婷：唔...唔走... 今敏：重力解除！ *重力聲效解除 盧婷：（深吸幾口氣）今敏姐姐...我知道...你可以控制...呢度所有事物...咁你可唔可以令我爸爸復活啊？ 今敏：我可以控制但唔代表我會控制。由你祖先盧零創建呢個地方開始，我只係負責監察。雖然每個人都有自由意志，但都逃唔過生、老、病、死等等嘅框架。 盧婷：咁我諗到啦！我唔駛要呢度變成好似達哥哥嗰度咁樣，因為我地啞鈴洲嘅生活都好好！如果要我撳一個掣，我想所有村民都唔駛死！可以永遠幸福快樂咁生活落去！ 今敏：即係如果你可以做我呢個位，你就想啞鈴洲所有人都可以永生？ 盧婷：係！ 今敏：佢地都值得永生？ 盧婷：（讀白）今敏姐姐揮一揮手，佢口中嘅螢光幕就全部變晒一個個被綁住鐵鏈嘅人...其中一個就係舅父！ 今敏：呢度就係地獄嘅情況。每個靈魂生前都犯咗重罪，所以死後先會落去地獄受苦。你舅父嘅罪行就係偷飲靈魂之水。 盧婷：咁邊個定佢地嘅罪架！邊個定佢地要受罰幾耐架！點解唔比佢地改過啊？ 今敏：轉世作業系統由我同盧零一齊建立，依照現實世界刑罰及道德標準去定立善、惡、賞、罰機制，盧零就係想創造一個真正擁有因果報應嘅世界。 盧婷：咁點建佢唔創造無罪惡，無惡念嘅世界啊！ 今敏：呢啲問題，真係小朋友先問得出口。 盧婷：即係人嘅惡念係由你同盧零創造出嚟架啦！ 今敏：盧零都係想依照現實世界人類構造，用慕容博士嘅DNA技術以及Game of Eden嘅數碼程式，喺呢個封閉區域還原現實世界。 盧婷：咁點建佢要依照現實世界去創造我地呢個世界啊？ 今敏：因為佢... 盧婷：我唔理咩現實世界，咩封閉區域，總之一切都係你地創造出嚟嘅！ 今敏：哎喲！我做咩嘥時間係度同你呢個𡃁妹講咁多野啫！早知一早洗晒你喺Area 15嘅記憶，掟你返張保仔洞就算啦！ 盧婷：今敏姐姐！如果我可以做你呢個位，我一定會令啞鈴洲更好！ 今敏：你呢個𡃁妹！ *電子門打開聲效 今敏：K Area DB Island你嚟得啱啦，幫我洗晒佢喺Area 15嘅經歷，然後放佢返去啞鈴洲！ K Area DB Island：今敏，請等等，我有啲資料想比你睇一睇。 今敏：係咩資料啊！ *程式聲效 K Area DB Island：（輕聲）呢個係阿達嗰位玩家嘅身份同背景。佢同莫十三醫生係認識嘅。另外，呢個係盧婷呢幾世嘅資料。 今敏：（輕聲）哦～咁成件事就有趣得多。 K Area DB Island：（輕聲）咁仲需唔需要？ 今敏：（輕聲）唔駛。你繼續協助盧綠接任村長一職，同時留意嗰位阿達嘅動向啦。 K Area DB Island：（輕聲）知道。 *電子門打開聲效 盧婷：你地細細聲係度講啲咩！ 今敏：無～傾緊送唔送你返去啫～ 盧婷：就算你洗晒我嘅記憶！我相信我同綠哥哥、葦哥哥都可以搵到你！然後一齊創造一個更好嘅啞鈴洲！ 今敏：好～咁你就留低喺度，繼續觀察一下成個啞鈴洲嘅運作，諗下可以點樣將呢度變得更～加～好～啦～ *魔幻聲效 *拍打玻璃聲 盧婷：（玻璃內）喂！喂！今敏！你快啲放我出去啊！ ---------- 時間：180年9月11日下午，村長選舉後，阿達進入封閉區域前 地點：封閉區域Area DB Island 啞鈴殿（控制室） 盧婷：（讀白）我被嗰位今敏困咗喺個透明櫃度好幾日...我望住今敏喺度監察住成個啞鈴洲嘅情況... 每當有人或者動物出生或死亡，佢面前嘅螢光幕都會有聲音提示； 而有三個著住羽毛袍嘅人，喺一個我未去過嘅島嶼，協助靈魂轉世； 我特別留意幾個格仔，分別係 - 上咗天堂嘅爸爸...我睇到佢不斷重複發緊同我地一家人相處嘅夢；其次就係喺地獄受罰嘅舅父...每次見到佢被分裂成碎片...我就好心痛...； 之後係綠哥哥同葦哥哥各自嘅情況...希望綠哥哥快啲搵到葦哥哥啦！ 而今敏佢除咗監察住島上嘅情況之外，有時佢會用手指實一位村民，然後好似喺螢光幕度拉佢出嚟咁，跟住凌空撳一個三角形掣，再撳一個交叉2或者4嘅掣，嗰位村民就好似郁快咗2倍或者4倍咁！ 今敏：盧婷，成個封閉區域啞鈴洲都係Game of Eden入面嘅人工智能程式，你地嘅命運由各自嘅基因碼以及每個數碼靈魂嘅自由意志去決定。雖然你地係擁有自由意志嘅人工智能程式，但行為都可以預計得到。我撳一下2倍速或者4倍速，就可以預視一下嗰個村民下一步嘅舉動。不過，你地有自由意志，所以你地嘅行為同原本預測有時會唔同。呢個亦係我咁多年嚟樂趣～ 盧婷：（玻璃內）我都唔明你講乜... 今敏：唔明唔緊要～我地一齊估下你哥哥同大家舉行完村長選舉之後會發生咩事？ 盧婷：（玻璃內讀白）今敏佢放大咗北帝廟入面嘅畫面，玄武大帝神像發生爆炸！ 今敏：你睇下邊個入咗嚟？ 盧婷：（玻璃內）係達哥哥！佢真係入咗嚟搵我！？但佢點解炸爛咗嗰玄武大帝神像嘅！？ 今敏：你就話識阿達啫～你睇下你哥哥，仲有凱安、裘雪，仲有班村民嘅反應？ 盧婷：（玻璃內讀白）我一直睇住達哥哥入嚟之後嘅情況！好在綠哥哥叫達哥哥自稱做玄武童子，所以大家無對達哥哥出手...而綠哥哥帶咗達哥哥返我地屋企...仲倒咗杯茶比達哥哥飲添，佢地有傾有講，但突然間達哥哥暈咗！之後綠哥哥仲綁住佢！更加用刀整到達哥哥流咗好多血啊！ *今敏拍手聲 今敏：盧綠成為咗村長，知道呢度嘅起源之後，真係無知的小孩幾晚就長大～為咗保護封閉區域啞鈴洲嘅安全，咁樣向阿達迫供～都好正常嘅～ 盧婷：（玻璃內讀白）今敏！達哥哥流咗好多血！你快啲救佢啦！同埋向綠哥哥講達哥哥唔係壞人嚟架！ 今敏：我都講過～我係負責監察，唔會影響村民嘅自由意志。更何況阿達都唔係呢度嘅村民～ 盧婷：（玻璃內讀白）你睇下！達哥哥消失咗啊！！！佢去咗邊啊！？ 今敏：放心～佢只係登出咗啫～嚟～我地繼續欣賞盧綠、盧葦同阿達嘅後續啦～入咗嚟141年，終於有啲刺激同估唔到嘅劇情睇啦！！！ ---------- 盧婷：（讀白）接住落嚟嘅10日...今敏都係無放我出嚟...而我就好似一位觀眾...從一個好似全知嘅視角去睇晒所有村民嘅生活..而天氣方面，雖然我地可以透過曆法去推算天氣嘅情況，但只要今敏佢撳一個掣... 今敏：盧婷，只要我撳呢個掣，你地啞鈴洲對出嘅海域就會發生地震同海嘯。 *撳掣聲效 今敏：村民又會以為係九頭海蛇嘅封印解除，或者係玄武大帝發嬲而懲罰佢地。面對大自然嘅不可抗力，以你地嘅智慧只能夠咁去做結論。如果將你地嘅文明加速，一下子變到Area 15咁。村民嘅生活會變好？定變差呢？ 盧婷：（玻璃內讀白）你快啲停手啊！ 今敏：放心～我只係示範比你睇，正如我好耐好耐之前示範比盧零睇一樣。啊～點解當時唔說服佢整一個火山喺啞鈴洲嘅中間，再依山而建立文明呢～ 盧婷：（讀白）今敏佢又再繼續自言自語。而我就繼續睇住村民生活...見到好多村民嘅另一面...例如裘雪...佢竟然困咗達哥哥喺觀星閣度想燒死佢！好在哥哥又走得甩，然後凌空再入返嚟！我估唔到裘雪佢竟然會咁做！ 今敏：係咪覺得裘雪好衰呢～竟然放火！但佢都係用佢嘅方法去測試阿達係咪真係玄武童子啫～我欣賞佢求知嘅精神同膽色啊！ 盧婷：（讀白）跟住就到綠哥哥、達哥哥出海...喺百草園同食人花嘅打鬥、喺千獸島同獨角獸嘅激戰！睇到我好緊張！好在佢同綠哥哥都無事...最後可以重遇... 今敏：原來阿達左手有刪除嘅能力...盧婷，除咗我之外，阿達就係另一個擁有摧毀你嘅啞鈴洲能力嘅人。我係協助你地，但阿達有咩目的，佢之後會點做，我就唔知啦～ 盧婷：（玻璃內讀白）今敏...我唔想再睇落去啦... 今敏：睇多陣啦，唔駛幾耐，佢地就可以去到島之盡處搵到你架啦～ 盧婷：（讀白）我喺度唔夠一個星期...睇住呢啲畫面已經覺得好辛苦...點解今敏佢可以睇140年...我覺得佢好恐怖啊...而再過幾日，達哥哥、綠哥哥佢地上完天堂，就各自落咗地獄！ 今敏：盧婷，你咪覺得啲地獄靈魂好可憐嘅，不如我地比一個機會佢地，等佢地可以返回人間復活啊～你話好唔好啊？ 盧婷：（玻璃內讀白）當然好啦！咁舅父就可以返嚟我地身邊啦！ 今敏：K Area DB Island，打開晒所有鎖住地獄靈魂嘅鐵櫃。再整啲由地獄返回人間復活嘅傳送門，然後你比指示話係玄武大帝特赦。 K Area DB Island：知道。 今敏：盧婷～地獄大戰～開始啦～ Zip噏劇場 Game of Eden 第二季 小島篇 第98回「啞鈴殿（下）」 Ant 飾演 今敏 Crystal 飾演 盧婷 Alton 飾演 K Area DB Island 編劇及製作 阿攝音樂 BEAT FRIDAY (List, Nothing, Surface, Soothes, Distance, Good Plus)封面設計 FollowmelikeblackLeave a comment and share your thoughts: Powered by Firstory Hosting

時間：180年9月1日，大凶日晚上 地點：封閉區域Area DB Island 控制室，今敏稱作啞鈴殿 今敏：K Area DB Island，檢查結果點啊？ K Area DB Island：回報今敏，整個封閉區域系統正常，只係我地身處嘅區域同Area 15存在時差。 今敏：我知，依家係180年9月1日，Area 15就已經喺NC 181年嘅5月23日。你查唔查到點解呢個封閉區域會出現熄機情況？同埋我地點解有咁大嘅時差？ K Area DB Island：我全能嘅職權只限於呢個封閉區域，所以無辦法查到確實嘅原因。而村民就話因為九頭海蛇嘅緣故，或者係玄武大帝嘅懲罰... 今敏：我唔需要知道呢度嘅村民諗啲咩，我只係想知道Game of Eden嘅真實情況。 K Area DB Island：我喺Area 15度打聽到，NC 180年8月31日，Area 15 管理員做Server Rebot，做數碼大清洗，所以好多玩家都提前登出。 今敏：但都唔應該影響到我地架？ K Area DB Island：因為我地呢個封閉區域喺係Area 15之內，所以我哋都受到影響...至於點解我地要用咁耐時間rebot，唯一合理嘅原因係呢個封閉區域嘅複雜性。因為呢度嘅村民係Game of Eden內，人工智能框架下嘅數碼靈魂。所以要Restore data，需要一定嘅時間。 今敏：即係無論我喺Area 15定喺呢個封閉區域，我依家無肉身無得登出嘅狀態...都係有危險啦... K Area DB Island：無錯。只不過如果係server rebot嘅一刻，你喺Area 15，就好快可以回復正常。但可惜嘅係，我地當刻喺封閉區域入面，所以就被迫等到Restore成功，先回復到正常。 今敏：仲有9年...我就可以加入同舟會...仲有9年...我就可以永生不死... K Area DB Island：仲有一件事要報告。 今敏：係咩事？ K Area DB Island：就係封閉區域少咗一位村民。 今敏：少咗一位？定死咗一位啊？ K Area DB Island：係少咗一位。佢喺張保仔洞失蹤。 今敏：你確定佢唔係被海水沖走？或者出意外？ K Area DB Island：係。因為佢嘅靈魂無去到生死中途島。而張保仔洞正正就係其中一個連接封閉區域啞鈴洲以及Area 15啞鈴洲嘅機關。 今敏：即係佢去咗Area 15？ K Area DB Island：應該係Server Rebot嘅時候，連接嘅程式出錯，導致嗰一位叫盧婷嘅數碼靈魂外泄到Area 15。 今敏：咁你即刻搵佢返嚟。我應承咗盧零，如果有村民出咗去Area 15，就會救佢地。 K Area DB Island：由Area 15入返嚟嘅方法...有兩個...第一個 - 喺張保仔洞啟動機關；第二個 - 喺北帝廟用玄武大帝神像嘅通道。但我認為呢度嘅村民無咁高嘅解謎能力。因為呢兩個連接位，係創造者康留比佢嘅後人嘅。 今敏：咁就創造一個程式，帶佢返入嚟呢個封閉區域。 K Area DB Island：知道。 -------- 時間：180年9月4日 地點：封閉區域Area DB Island 啞鈴殿（控制室） K Area DB Island：報告今敏，程式顯示Area 15張保仔洞連接封閉區域嘅機關被開啟。同時偵測到開啟機關嘅係一位叫阿達嘅玩家。 今敏：佢係創造者康嘅後人？ K Area DB Island：暫時未調查到佢嘅背景。不過同佢同行嘅正正就係失蹤嘅村民 - 盧婷。佢地兩位都可以利用張保仔洞嘅機關返回封閉區域 K Area DB Island。 今敏：你嘅權限可唔可以改寫機關？ K Area DB Island：可以係現有框架進行小修改。 今敏：咁改成只準許盧婷進入，而嗰位阿達唔得。 K Area DB Island：用意係？ 今敏：你呢個人工智能幾時變得咁好奇架？ K Area DB Island：了解因由都係學習及進化嘅一種。 今敏：好。其實原因好簡單，就係我想調查更多嗰位阿達嘅資料。其次就係唔可以比盧婷就咁透過機關返入嚟封閉區域。因為佢會影響到呢度嘅運作。 K Area DB Island：你怕佢會將Area 15嘅存在同其他村民分享？ 今敏：無錯。 K Area DB Island：咁等佢一返到入嚟封閉區域就消滅佢？ 今敏：唔駛。帶佢嚟啞鈴殿就可以啦。 K Area DB Island：知道。 -------- 時間：NC 181年5月26日，下午5時，飄色完成後 地點：第15區啞鈴洲張保仔洞內 達：（讀白）當我用平安包印台啟動咗張保仔洞機關之後，盧婷就進入透明牆壁，返去屬於佢嘅區域。然後我回頭準備離開。點知... EP33 -  盧婷：（玻璃房內聲音，細聲）啊！！！ 達：婷婷？ 盧婷：（玻璃房內聲音，大聲少許）係...九頭... 達：（VO）我即刻擰返轉身，再次望住前半後扭轉咗嘅張保仔洞！只係聽到婷婷嘅叫聲，但完全見唔到佢！ *拍玻璃聲效 達：婷婷！婷婷！發生咩事啊？ 盧婷：（玻璃房內聲音，大聲）九頭海蛇追緊我啊！ 達：（大叫）九頭海蛇...? *執劍聲效 達：（VO）我即刻執起地下嘅古劍，然後模仿婷婷「寸刺」嘅動作，希望可以打爆塊玻璃！ *碰擊玻璃聲效 盧婷：（玻璃房內聲音，最大聲）哥哥！ 達：（VO）婷婷好驚咁，喺洞嘅入口位向我跑緊過嚟！我不停發動「寸刺」！ *碰擊玻璃聲效 達：（VO）婷婷！我好快就過到嚟！ 盧婷：（玻璃房內聲音，最大聲）哥哥！救...啊！！！！ 達：（VO）婷婷連個命字都未嚟得切講，我就見到一個灰色碼形成嘅蛇頭咬住 婷婷隻腳，將佢拉走咗！！！ *碰擊玻璃聲效 達：婷婷！！！ *石牆轉動聲效 --------- 盧婷：（讀白）放開我！放開我！救命啊！救命啊！ *九頭海蛇叫聲 盧婷：（讀白）就算我點踢其中一個蛇頭，佢都咬實我隻腳唔放！我被佢拖到去張保仔洞嘅洞尾！佢終於都放開我！我見住隻腳嘅傷口，流咗好多血...我已經嚇到講唔到野...跟住其中一個蛇頭張開口！跟住！佢一啖吞咗我！ *九頭海蛇吞噬聲效 盧婷：啊！ *下墜風聲，叫聲斷續聲 *墜地聲效 盧婷：啊！好痛啊！ *電子開門聲 *腳步聲效 今敏：盧婷～歡迎你嚟到啞鈴殿～ 盧婷：你...你係邊啊！ 今敏：我...點講好呢～我可以係玄武大帝～亦可以係九頭海蛇～亦可以係一棵樹～ 盧婷：（讀白）我跌咗落一個全白色嘅空間...而出現喺我面前嘅女仔同我差唔多高...佢著住一件白袍，耳仔同我地唔同架，有尖尖嘅角，仲拎住一個木杖。最怪異嘅係...每當佢講一個名，佢嘅外形就可以即刻變化...好奇怪！好恐怖啊！ 今敏：我知短時間你好難接受我係邊個，不如我比啲野你睇下先～ *雪花聲效 盧婷：（讀白）跟住成個白色空間出現咗好多會郁嘅彩色圖畫...我見到啲村民喺啞鈴洲生活嘅畫面...仲有...阿爸！佢咳得好勁！身體好虛弱！阿媽喺旁邊照顧緊佢！ 今敏：呢啲唔係畫，而係真實嘅畫面。因為呢度係成個啞鈴洲嘅控制室，我叫呢度做啞鈴殿。 盧婷：係葦哥哥！原來佢喺百草園！ 今敏：除咗盧葦，仲有你舅父 - 裘智添。 盧婷：原來舅父仲未死架！舅父依家喺邊啊？點解佢全身會被鐵鏈綁住嘅！？哎喲！隻腳好痛啊... 今敏：等我幫你復原先，唔好郁。 *魔法聲效 盧婷：我隻腳嘅傷口...瞬間就止咗血...傷口亦癒合咗！連疤痕都冇埋！？你...識法術？定你係玄武大帝啊？ 今敏：你想我用一個快速嘅方法，定慢慢解釋比你聽呢？不過既然你係盧和嘅女，用快速嘅方法都無咩所謂嘅～ 盧婷：點解...地面會有咁多線出咗嚟嘅！發生咩事啊？ 今敏：你乖乖地唔好郁～等一陣就知發生咩事架啦～ 盧婷：啲線伸到好長...線頭原來係針！仲飛過嚟插實我個頭！啊！！！ *數據傳輸聲效 *跌地聲效 今敏：吓...唔係啊嘛？暈咗？用數據線傳輸啲data啫，咁易overload？ ---------- 時間：一日後 今敏：嘩盧婷，瞓咗一整日你終於醒啦！我差啲想用特別方法整醒你啊！ 盧婷：你...係... 今敏：我係今敏。同你嘅祖先盧零創造呢個區域嘅一切，包括玄武大帝、九頭海蛇、天堂、地獄、轉生輪迴等等。 盧婷：即係尋日我腦入面睇到嘅所有事...係真正有發生嘅？而啞鈴洲嘅一切...都係假嘅...達哥哥生活嘅世界先係真嘅...? 今敏：你地每代村長都咁鍾意問真、假世界嘅問題嘅？真係要同慕容醫生講一講呢個基因或者思考嘅問題。 盧婷：我想問...我幾時可以返去見爸爸佢地啊... 今敏：你依家除咗擁有每代村長接任之後需要得知嘅創世資料之外，你亦係呢個封閉區域唯一一個去過Area 15，即係你口中達哥哥嗰個世界嘅村民。我無咁容易比你走。 盧婷：咁...你想點啊？ 今敏：一係就洗走晒你去Area 15嘅記憶，然後放返你去張保仔洞～ 盧婷：吓… 今敏：不過我突然又改變主意。 盧婷：咁...你即係想點啊？ 今敏：比你係度玩下～ 盧婷：今敏姐姐…呢度有咩可以玩啊… 今敏：如果我話比你知，你撳一個掣，可以令到啞鈴洲進化到好似你嗰位達哥哥嘅Area 15咁，你想唔想呢？ Zip噏劇場 Game of Eden 第二季 小島篇 第97回「啞鈴殿（上）」 阿攝 飾演 阿達 Ant 飾演 今敏 Crystal 飾演 盧婷 Alton 飾演 K Area DB Island 編劇及製作 阿攝音樂 BEAT FRIDAY (Minty, Stuk, Thins, Extension, Drunken Koiwa, Somewhere, thing)封面設計 Followmelikeblack Leave a comment and share your thoughts: Powered by Firstory Hosting

時間：180年9月22日 地點：封閉區域Area DB Island 島之盡處 達：（讀白）去到α 島之後，重遇盧葦嘅靈魂，我用黃紙將佢重現喺大家面前，但由於被吸入黃紙之後，佢可以得到前幾世嘅記憶，原來佢第一世嘅身份係666組織嘅盧零...亦即係呢個封閉區域 Area DB Island嘅主人，同時係黑烏鴉盧天、白烏鴉盧地嘅爸爸！ 佢地一家團聚之後，盧葦亦即係盧零佢啟動「β」望遠鏡，望遠鏡射出紅外線，我地利用連島沙洲嘅自然現像，跟住紅外線嘅方向一直行，終於行到去島之盡處，亦即係呢個封閉區域嘅盡頭... 盧葦佢叫我地咁多人用手掂住盡頭嘅世界之鏡，機關隨即啟動！ *機關啟動聲效 達：（讀白）原本黃昏入黑嘅天色突變！開始行雷！仲落起大雨！ *行雷狂風落雨、海水上升海浪翻騰聲效 黑烏鴉盧天：海水突然上漲，海浪係咁翻騰！阿爸！發生咩事啊！ 盧綠：係咪島之盡處所發生嘅機關現象？ *破水聲效 盧綠：大家睇下！喺我地十米外！好似有巨物喺水底升上嚟！ *怪動大叫聲效 達：係...係蛇頭！仲要唔要一個！有九個！ 盧綠：九...九頭海蛇...出現喺我地面前！原來真係有九頭海蛇架！！！ 達：就係九頭海達喺Area 15嘅張保仔洞捉走咗盧婷架！但呢條蛇有兩層樓咁高！！！ *羽毛箭聲效 達：（讀白）當我地咁多個都被九頭海蛇嚇到嘅時候，白羽鴉盧地佢突然跳起，然後將佢身上所有羽毛箭向九頭海蛇方向激射過去！ *羽毛箭聲效 黑烏鴉盧天：可惡！羽毛箭嘅攻力唔夠！就算射中就做唔到任何傷害...阿爸！你話嚟到呢到會搵到今敏！但呢條九頭海蛇！佢好似想攻擊我地咁嘅！ 盧葦/零：（大聲）今敏！我地嚟咗呢度啦！你快啲現身啦！ *全知狀態聲效 達：盧葦，我啱啱打開全知狀態，呢隻九頭海蛇怪物除咗有墨綠色遊戲碼之外，仲有灰色嘅人工智能碼，即係佢好似K Area DB Island咁，係人工智能程式！ *九頭海蛇怪叫聲 盧綠：隻九頭海蛇慢慢向我地移動！我地點算好啊！ 黑烏鴉盧天：阿爸！我地駛唔駛進入作戰狀態？ 盧葦/零：今敏！唔好再玩啦！我地同創造者阿康嘅後人都嚟咗啦！ 盧綠：九頭海蛇越嚟越近...佢係咪想食咗我地？ *拍翼聲由遠到近 達：你地聽唔聽到啊？ 盧綠：阿達！聽到啲咩啊？ 達：我聽到拍翼聲...由左邊嘅上空傳緊過嚟啊！ *獨角獸叫聲由細漸大聲效 黑烏鴉盧天：阿爸！係阿媽啊！ 達：（讀白）原來拍翼聲喺由係獨角獸發出！佢喺左方上空快速飛緊過嚟！之後佢喺九頭海蛇五米處突然轉變方向，由前衝變咗向上飛！佢不斷拍翼飛上九頭海蛇嘅頭頂！而九頭海蛇其中三個蛇頭擰轉方向，望實獨角獸嘅動向！ 獨角獸無視九頭海蛇嘅動作，直飛到雨雲嘅高度！ 跟住一度閃雷閃過！再發出好響嘅行雷聲！ *行雷聲 獨角獸就喺閃雷閃出嗰一剎，發出嚎叫聲！ *獨角獸叫聲 嚟一個180度轉身，獨角向下！再用力拍翼！借全身嘅重量同加速力！極速向下衝向九頭海蛇！ 九頭海蛇體形太龐大！嗰三個頭閃避唔切！獨角獸嘅角變成整個封閉區域最鋒利嘅武器！狠狠咁割開咗其中一個蛇頭！做成一個好深嘅傷口！ *九頭海蛇怪叫效 盧綠：獨角獸佢成功重創九頭海蛇啊！嗰個蛇頭反咗白眼！跌返落海度！但仲有八個蛇頭！ 盧葦/零：Fish！小心啊！ 達：（讀白）當獨角獸想再飛上天重施故技，但另外兩個蛇頭無比機會獨角獸！就喺獨角獸準備拍翼嘅時候，蛇頭揮動，好似一條鞭咁撞向獨角獸！令到獨角獸失去平衡！而另一個蛇頭就把握時機，張開口！一啖吞咗獨角獸！ 黑烏鴉盧天：阿媽！ 白烏鴉盧地：阿媽！ 達：（讀白）我地咁多位即時呆在當場...而本來面向我地嗰六個蛇頭，只係得幾米長嘅蛇身突然變長！快速向我地衝過嚟！ 盧綠：阿葦！ 達：（讀白）盧綠就本能反應衝過去盧葦身邊，希望保護佢！ 黑烏鴉盧天：：細佬！變... 達：（讀白）而盧天同盧地就準備變成烏鴉形態！ 盧葦/零：阿達！小... 達：（讀白）而我就反應唔切，我眨一下眼！蛇頭出現喺我地面前！ 我眨多一下，蛇頭張開口！食咗我地落肚！ *合口＋吞吐聲效 *九頭海蛇大叫聲效 *海水下沉聲效 達：啊！！！ *下墜風聲，叫聲斷續聲 *墜地聲效 達：嘩！好痛啊！ 盧綠：阿達！係咪你啊！你喺邊啊！你有冇受傷啊？ 達：我無事！雖然呢度漆黑一片，但我仲喺全知狀態！你比少少時間我嚟搵你！ 黑烏鴉盧天：（痛叫）啊！ 白烏鴉盧地：（痛叫）啊！ 盧葦/零：（痛叫）啊！ *墜地聲效 盧綠：係咪阿葦你地啊？ 達：係啊，佢哋同我哋兩個一樣，都跌咗落嚟… 黑烏鴉盧天：阿爸！我地各自都被蛇頭食咗...呢度會唔會係佢嘅胃？ *著燈聲效 達：嘩！呢度突然著晒白燈！ 盧綠：呢個空間全白色嘅？阿達，乜油燈唔係火紅色架咩？ 盧葦/零：你地睇下！獨角獸係嗰度！ *奔跑聲效 黑烏鴉盧天：阿媽！你點啊？ *獨角獸叫聲 盧葦/零：Fish，你無事嗎？ *獨角獸叫聲 黑烏鴉盧天：係啊，媽。盧葦佢第一世係盧零，即係阿爸。所以佢先叫得出你喺現實世界嘅名... *獨角獸叫聲 黑烏鴉盧天：阿媽話佢頭先暈咗，但依家無咩大礙...佢話呢條九頭海蛇同其他動物唔一樣...唔受佢控制... *開電視聲效 盧綠：我地呢個半圓形空間嘅白燈，點解會眨下眨下嘅？ 達：呢啲叫雪花，我地呢個半圓形全部都係螢光幕嚟。 盧綠：我見到喺生死中途島嘅阿爺！仲有喺半天堂嘅阿爸！仲有啞鈴洲上面嘅村民生活情況！ 盧葦/零：呢度就係今敏同K Area DB Island工作嘅地方，即係佢地嘅控制室。 *電子門開門聲效 *腳步聲 今敏：Hello！大家終於嚟到啞鈴殿～ 盧葦/零：你係？今敏？ 今敏：點啊Zero，110年無見啫～咁就唔認得我嘅？ 盧葦/零：梗係唔認得你啦，你全身白袍，對耳仔起咗尖角，仲拎住一個木杖。做咩啊？玩精靈風格？ 今敏：喺度咁多年，咪等閒轉下唔同「神」或者「仙」嘅造形囉～ 黑烏鴉盧天：今敏，我地有好多問題想問你。 今敏：答你地問題之前，想比你地見一個人。佢都等咗你地好耐啦。 *電子門開門聲效 *腳步聲 盧婷：綠哥哥！葦哥哥！仲有...達哥哥！我終於等到你地嚟啦！ 盧綠：婷婷！ 盧葦/零：婷婷！ Zip噏劇場 Game of Eden 第二季 小島篇 第96回「九頭海蛇」 阿攝 飾演 阿達 Kity 飾演 黑烏鴉 盧天 Cfun 飾演 盧綠 鄧添樂 飾演 盧葦及盧零 Ant 飾演 今敏 Crystal 飾演 盧婷 編劇及製作 阿攝音樂 BEAT FRIDAY (Belongs, Thing, Kaji, Minty, Daydream)封面設計 Followmelikeblack Leave a comment and share your thoughts: Powered by Firstory Hosting

《美麗說法》不只談美，更要教你如何「自保」。我們會深入剖析那些沒人敢說的醫美陷阱與必知 QA，拆解麻醉、合約到術後恢復的關鍵細節。變美不該是一場冒險，讓我做你的把關者，確保你在追求自信的路上，安全下莊，安心變美。https://fstry.pse.is/8scu4e —— 以上為 Firstory Podcast 廣告 —— 時間：180年9月22日 地點：封閉區域Area DB Island α 島 *海浪聲效 達：（讀白）透過人工智能K Area DB Island嘅傳送門離開地獄島之後，我地抵達嘅原來係α 島，面對仲喺靈魂狀態兼即將消失嘅盧葦，我提議用左手「D」嘅能力，打散盧葦嘅靈魂，用黃紙吸受完佢之後，就將呢張黃紙同喺生死中途島吸受咗盧葦屍體嘅黃紙一齊燒。 *燒黃紙聲效 達：（讀白）之後，盧葦嘅身體隨住黃紙嘅燃燒，慢慢出現喺我地眾人面前... 盧綠：阿葦！你覺得點啊！阿葦！ 黑烏鴉盧天：盧葦佢...終於開眼同開口啦！ 盧葦：阿哥，我返嚟啦。 盧綠：太好啦！終於可以再攬實你啦！阿葦！ 盧葦：阿哥，你唔好攬得咁實先...你比我講幾句說話先...可以嗎？ 盧綠：唔好意思...一時太興奮...阿葦你有咩想講？ 盧葦：小天，地仔，好耐無見啦。 黑烏鴉盧天：小天？無人會咁叫我，除咗... 盧葦：雖然你地個樣同我離開嘅時候差唔多，但感覺成熟咗好多。咁多年嚟要你地做渡靈者，真係辛苦曬... 盧綠：（讀白）阿達，點解阿葦咁怪嘅？係咪過程中出現啲咩問題啊？ 達：無出現任何問題...只係黃紙會顯示盧葦之前幾世嘅身份...而佢第一世嘅身份，39年 - 70年 - 盧零。 黑烏鴉盧天 + 白烏鴉盧地 ：你係...阿爸！？ — 時間：70年8月31日 地點：封閉區域Area DB Island啞鈴洲海灘 廟祝：（大聲）今日係第一任村長死後第3日。根據村長定立嘅傳統，昨日我地已經喺北帝廟外設靈，比所有村民見村長盧零最後一面，同時答謝玄武大帝賜予村長豐盛嘅一生。而今日，由裘氏現任啲廟祝，即係小弟，擇吉時，進行火化儀式。而盧零嘅遺體已經安放喺木船上面。 盧地：家姐，阿媽佢真係唔嚟主持火化儀式？ 盧天：阿媽佢話要安排村長接任嘅儀式...所以阿爸嘅後事交比我去處理... 盧地：都唔差在嗰少少時間啫... 盧天：或者阿媽佢太傷心...所以唔想目睹呢一個畫面呢... 廟祝：（大聲）吉時到！揚凡出海！第一任村長盧零，安心回歸玄武大帝嘅懷抱！ *揚凡聲效 廟祝：盧天，弓箭已經準備好。火化儀式交由你定盧地進行？ 盧天：交比我就可以啦。 *拉弓聲效 *燃燒聲效 盧天：（讀白）我用力拉弓，將著咗火嘅弓箭瞄準載住阿爸遺體嘅木船射過去。木船中箭，連同遺體一同慢慢燃燒，一縷縷嘅煙緩緩升上半空之中... 盧地：家姐...阿爸嘅靈魂可以返到去玄武大帝嘅身邊架呵？ 盧天：呢層...我都唔清楚...等我接任成為村長，同玄武大帝接觸之後，再話你知答案... — 時間：70年8月31日 地點：封閉區域Area DB Island 生死中途島 *沙地步行聲效 盧零：終於...以死者嘅身份嚟到生死中途島啦... *沙地步行聲效 今敏：點啊，Zero，呢31年過得開心嘛？ 盧零：今敏？我以為會係人工智能 K Area DB Island嚟迎接我，估唔到會喺你啊～ 今敏：難得你又死多次喎，梗係要親自迎接你啦！ 盧零：但我依家應該係51歲，點解我嚟到生死中途島會變返20歲嘅樣同聲線呢？係咪程式出現咗問題？ 今敏：Zero～冷靜啲～無任何問題～我只係唔慣老咗嘅你，所以就將你變返做當年同我一齊設計呢個封閉區域啞鈴洲嘅你囉～你唔鍾意嘅～我將你變返做死嗰陣嗰樣囉～ 盧零：咁又唔駛，我好快都會去轉生。你著晒烏鴉袍，即係由你去做我嘅渡靈者？我以為會係由K Area DB Island負責添。 今敏：咁你係尊貴客戶，當然由我去辦理啦。況且K Area DB Island呢刻專注做緊廟祝，同你太太處理緊你嘅身後事同接任村長嘅事。 盧零：裘氏第一代嘅代表，由人工智能負責，由佢去傳授呢個區域嘅天文、地理、科學嘅智識，係最好不過。 今敏：咁渡靈者呢個崗位？我淨係Serve你架咋～你想之後都係由人工智能負責？ 盧零：我想交比一對囝囡。等小天同地仔做咗村長，過世之後，就做渡靈者，等佢地體會更多生死。 今敏：直到永遠？ 盧零：直至你覺得佢地夠資格，去管理呢個封閉區域啞鈴洲為止。因為無論今敏你定係K Area DB Island 一直都只係輔助我設計同管理呢一個區域。既然 π 先生送咗呢一個區域比我，我好希望有一日會喺由呢個區域嘅靈魂去自行決定呢度嘅命運。 今敏：咁點解你唔自己做返「主宰」，亦即係「神」嘅角色？或者交比Fish去做？ 盧零：因為我同Fish都係帶住現實世界記憶入嚟生活嘅人。我好想係無現實世界生活嘅經歷，100%喺呢度出生、成長嘅靈魂去打理呢度。因為呢度就係屬於佢地嘅伊甸園。 今敏：但創造者康留咗後門，現實世界嘅人終有一日會入嚟你呢個伊甸園。 盧零：創造者康同我保證，得佢嘅後人先有方法入到嚟呢度。佢向我保證佢嘅後人唔會影響呢個區域嘅運作。我諗無論我點反對，佢始終係Game of Eden 嘅創造者，佢有絕對嘅能力同權限去做佢想做嘅事。我唯有相信佢。而我都好好奇佢嘅後人會以一種咩嘅方式喺呢度出現。 今敏：有後門，即係除咗佢嘅後人可以入到嚟，你嘅後人都有機會可以去到Area 15，什至其他區域。 盧零：咁到時就要靠你去救佢地啦。 今敏：我係度嘅任期只係150年。150年之後，π先生答應我，比我加入同舟會，得到意識轉移嘅永生權利。 盧零：150年之後，我都唔知喺度經歷幾多次轉生，到時我都未必認到你。 今敏：即係你唔想帶有任何今世嘅記憶轉世？ 盧零：我同入嚟呢度嘅我一樣，想好好享受喺呢個伊甸園生活嘅樂趣。 今敏：呢個封閉區域只係得咁多資源，你唔會覺得悶？ 盧零：點啊，今敏，你又想好似31年前咁，說服我改造呢個世界？ 今敏：我同31年前一樣，比更多有趣嘅選擇你啫～ 盧零：咁你有咩提議？ 今敏：嘩！人果然會變啊！ 盧零：我同31年前一樣，願意感受同聽取你嘅提議。 今敏：畢竟呢個封區域地方有限。點都會面對人口飽和嘅問題。我又唔想用病毒去控制人口，所以增加空間嘅方法得兩種 - 上天或者下海。 盧零：即係整可以喺半空或海入面生活嘅人類？ 今敏：或者係物種都可以。呢度係你為後人創造嘅伊甸園，但唔比你嘅後人去決定呢個世界嘅設定，對佢地嚟講，會唔會唔夠「伊甸」呢？ 盧零：咁你要嚟一場大嘅進化？用基因特變嘅方式？ 今敏：類似啦。有冇聽過盧恩符文？ 盧零：盧恩呢個字源自古日耳曼語，原意為"秘密"或"隱藏的智慧"。同北歐神話有關。 今敏：我諗住喺天堂島，用你死後嘅身體整一個機關，由你去手持一個佈滿盧恩符文嘅木盒。按唔同嘅盧恩符文，去創造唔同特性嘅物種！不過一時之間變出太多種族，亦可能會危害呢個區域。所以一次只可以創造兩種。 盧零：咁由你去決定創造新嘅物種？ 今敏：我只係提供選擇，決定權當然唔係我度啦。 盧零：咁會交比？ 今敏：梗係交比創造者康嘅後人啦。等佢唔好淨係入嚟，要佢負返起一啲關於呢個區域嘅責任先得！同埋由唔知情嘅佢去啟動！夠隨機！夠符合「命運」嘅安排啦！ 盧零：果係係今敏！ 今敏：咁你可以答返我最開頭問你嘅問題未？ 盧零：可以。呢31年係我最開心嘅時間。咁你呢？ 今敏：我喺現實世界只係一個普通人，但喺度我直頭係神，咁你話我開唔開心？ 盧零：咁我希望餘下呢119年，你都可以過得快樂。今敏，未來見。 — 時間：180年9月22日 地點：封閉區域Area DB Island α 島 盧綠：即係...你係阿葦...亦係第一任村長...盧零？ 盧葦/零：無錯。 達：盧綠，我曾經將獨角獸收入黃紙，我再將佢燒返出嚟啲時候，佢都會有返前一世嘅記憶...所以佢冇講大話...過程亦無出錯... 黑烏鴉盧天：阿爸...我終於可以再見到你啦...阿爸，你知唔知我每為一個靈魂渡靈，我都會諗，佢前一世有冇機會係你呢？ 白烏鴉盧地：阿爸...家姐每當想念你，就會去天堂島望住你抱住木盒嘅屍體...對佢講說話...佢仲怨自己點解一直以嚟都解唔開木盒嘅秘密... 盧葦/零：我知道你地兩個作為我同盧如嘅囝囡，同時係第一同第二位純啞鈴洲出世嘅村長，要背負嘅使命實在太多...所以，我同今敏就將責任攤分，由你媽媽成為獨角獸去睇住百草園同千獸島，而你地兩位就做渡靈者，看管轉世作業系統。 達：咁所以...我開啟嗰個木盒機關...會導致村民變種...?即係我又會影響到呢個區域？ 盧葦/零：你就係創造者康嘅後人？ 達：我只係喺佢嘅囡度得到入嚟嘅提示...所以我其實係乜都唔知...本身只係想入嚟搵盧婷...佢就係從「後門」去到Area 15嘅村民... 盧葦/零：放心，今敏或者人工智能智會保護佢嘅安全。 盧綠：但阿葦！啊...唔係...係太太公...先啱... 盧葦/零：阿哥，我仍然係你細佬 - 盧葦。 盧綠：我...我好亂啊！總之由阿達口中得知，婷婷佢比九頭海蛇捉咗！生死未卜！我地一路以嚟就係靠阿達嘅線索搵到嚟呢度！但都未見婷婷！而嗰個人工智能又好似出現問題！ 盧葦/零：我地依家就出發去搵今敏同人工智能。 達：等等先...你可唔可以答我咩係「南斗主生，北斗主死，島之盡處，向死而生」呢？ 黑烏鴉盧天：阿爸...仲有阿媽死後，一半靈魂成為獨角獸之前，人工智能同佢講話創造者康留低一句說話，話創造者康同莫菲斯各自嘅後人可以為呢個封閉區域提供另一個選擇...又係點解呢？ 達：而我根本唔係阿康嘅後人，我咩都唔知嘅情況之下，得到左手嘅能力...然後入到嚟...好似擾亂晒所有秩序咁...我... 白烏鴉盧地：阿爸，我同家姐按你訂下嘅規距守護呢度咁多年，目的得一個，就係啞鈴洲平安。但呢刻有咁多謎團，我地究竟應該點做！？ *觸碰螢幕聲效 達：（讀白）盧葦無答我地任何問題。只係喺「β」望遠鏡投射出嚟嘅地圖度，搵緊一個座標。 盧葦/零：呢度就係我地身處緊嘅 α 島。α 島同阿達你所推斷嘅一樣，代表北斗七星嘅第一粒星。而 α 島嘅盡處，即係呢一個方位，就係北極星。 *觸碰螢幕聲效 *金屬機械轉動聲效 達：（讀白）盧葦輕按 α 島好遠嘅一個位置，嗰個位置並無任何島嶼...但佢一輕之後，「β」望遠鏡轉動，然後指向嗰個方位並射出紅外線！ 盧葦/零：我地向呢個方向一直行，就可以到達北極星嘅位置。今敏佢地就喺嗰度。 盧綠：但我地喺荒島度，根本無可能行到過去... 白烏鴉盧地：我地三位可以變成烏鴉態飛過去，至於阿達同阿爸...家姐，我地叫阿媽飛過嚟，等阿爸同阿達坐上去，然後一同過去？ 盧葦/零：唔駛。依家正值日落嘅時間，應該差唔多可以見到有路架啦。 *海浪聲效 盧綠：你地睇下！海水慢慢潮退...有啲野露咗出嚟啊！ 阿達：潮退，石地露出水面...呢個係連島沙洲嘅自然現象！ 盧葦/零：呢條石路出現嘅時間唔多，我地要喺潮漲之前抵達激光所指嘅地方，亦即係島之盡處。 Zip噏劇場 Game of Eden 第二季 小島篇 第95回「零與葦」 阿攝 飾演 阿達 Kity 飾演 黑烏鴉 盧天 小白 飾演 白烏鴉 盧地 Cfun 飾演 盧綠 鄧添樂 飾演 盧葦及盧零 Ant 飾演 今敏 Alton 飾演 裘氏廟祝及人工智能 K Area DB Island 編劇及製作 阿攝音樂 BEAT FRIDAY (Belongs, Other Love, Dong, Fairness, Messy, Minty, Santo, Accent, Four Hundred, thing)封面設計 Followmelikeblack *海浪聲效 *石地步行聲效 盧綠：阿葦...你轉世之前…真係想揀做我嘅囝…？ 盧葦/零：無錯。我覺得今世做兄弟嘅時間太短，所以想下一世再續呢個緣份。 黑烏鴉盧天：阿爸…咁點解當時你轉世唔選擇做我或者盧地嘅囝囡…而乜記憶都唔要就轉生？ 盧葦/零：因為我想真真正正感受一下喺呢度出世，生活嘅感覺。因為咁先知道呢個區域嘅設置適唔適合。 白烏鴉盧地：但你都可以留少少提示比我哋，等我哋知道你嘅行蹤…因為我哋兩個完全唔知道自己做村長及渡靈者究竟做得好唔好，同啱唔啱… 盧葦/零：連同盧零以及對上幾世嘅記憶，你哋兩個做得好好。作為阿爸，到呢一刻先親口讚你哋，希望唔會太遲… 黑烏鴉盧天：阿爸，咁多年嚟我哋同阿媽都好想念你…唔知阿媽另一半嘅靈魂…依家身在何處呢…？ 盧葦/零：或者對上一兩世，我同佢有重遇過都未定呢？ 達：（讀白）望住盧氏咁多位久別重逢，係一個好溫馨及窩心嘅畫面…雖然我好替佢哋高興，但我腦入面不斷諗起天堂鳥上面喺木盒彈出嚟嗰兩條蛇…究竟咬咗邊啲人…會產生咩後果呢…而我哋沿住連島沙洲露出嚟嘅石路一直行…我諗行咗超過兩個小時，行到海水浸到腳眼位置，太陽好漫漫沉入水平線，都仲未到達島之盡處嘅目的地。 盧綠：阿葦，前面仲係一望無際嘅大海，我哋究竟仲要行幾耐？ 盧葦/零：我哋差唔多到啦。你哋睇唔到睇到海水有咩異樣？ 黑烏鴉盧天：啲海浪喺前面一米處，唔係繼續向前推進，而係回彈返轉頭？ 達：咁即係…前面有一道牆？所以撞返海浪返轉頭？但一望無際嘅海景…即係眼前嘅景像，係假象？定係鏡像？ *踏水步行聲效 盧葦/零：我哋一齊行前，大家摸唔摸到好似有度牆係我哋面前？ 盧綠：好似生死中途島咁，有一度無形嘅牆啊！ 盧葦/零：呢度就係封閉區域啞鈴洲嘅盡頭。我哋咁多人嘅手掂住呢度，就會引發機關。 *海水上升海浪翻騰聲效 黑烏鴉盧天：海水突然上漲，海浪係咁翻騰！阿爸！發生咩事啊！ 盧綠：係咪島之盡處所發生嘅機關現象？ *破水聲效 *怪動大叫聲效 盧綠：（大驚）你…你地眼下…係…蛇…九…頭…海蛇…出現喺我哋面前啊！ （TBC） Leave a comment and share your thoughts: Powered by Firstory Hosting

時間：180年9月22日 地點：封閉區域Area DB Island 不知名島嶼 達：（讀白）黑烏鴉盧天用鎖鏈鎖住裘智，再用羽毛箭釘住鎖鏈，等裘智唔需要入鐵櫃都可以喺地獄島繼續完成佢二千年嘅刑罰，亦令裘智成為呢一刻地獄島上面唯一一個地獄靈魂。 跟住我、盧綠、黑烏鴉盧天、白烏鴉盧地就利用人工智能K Area DB Island嘅傳送門返回人間。可惜，呢度並唔係啞鈴洲嘅本島，亦唔係百草園同千獸島，而係一個足球場咁大嘅圓形石島。呢個島上面並係任何生物、植物，地面只係沙地。而較早前被地獄靈魂撞入傳送門嘅盧葦，就帶咗我地去呢個島嘅最東位置。 盧葦：我被撞入嚟呢度之後，想嘗試衝返入傳送門，去返地獄島幫你地，可惜傳送門好快就消失咗。而另外兩度嘅傳送門原來都只係可以由地獄島入嚟，並唔可以喺呢度入返去。所以我就喺呢度視察地形，然後等你地返嚟。 黑烏鴉盧天：咁盧葦你有咩發現？ 盧葦：呢個島乜都無，只係喺最東邊嘅位置，有一堆石頭以丫叉嘅方式由圓形島嶼延伸出去。 *手指畫沙地聲效 達：如果由高空望落呢個島，你地覺得呢個島嘅外形似唔似我畫嘅呢個圖形？ 盧葦：似啊，但阿達你呢個係咩符號嚟？ 達：呢個符號叫「α」，係希臘第一個字母。 黑烏鴉盧天：即係阿達你先前所指嘅「南斗主生，北斗主死。島之盡處，向死而生」嘅提示？ *手指畫沙地聲效 達：無錯！喺我嘅世界，有人會用呢7個文字去稱呼北斗七星嘅每一粒星。η（音：Eta）、ζ（音：Zeta）、ε（音：Epsilon）、γ（音：Gamma）就對應住百草園、千獸島、生死中途島、天堂嘅外形。之於 δ（音：Delta）就唔係島嘅外形，而係地獄靈魂頭上所戴嘅魂鎖。而我地身處呢個島嘅外形，就同北斗七星第一粒星 -「 α」 一模一樣啦！而斗之盡處所指嘅地方，就係北極星。我地最終嘅目的地就喺嗰度。 白烏鴉盧地：咁第二粒星，即係呢個符號呢？ 達：呢個符號叫 β（音：Beta）...但呢度又好似無乜有關「β」嘅線索... 盧葦：你地試下扭一扭呢個石頭！ *扭動石頭聲效 *機械升高聲效 達：（讀白）白烏鴉盧地扭動「α」島丫叉位置最大嘅石頭，我地腳下嘅沙地有微微嘅震動，然後有一個接近一個人咁高嘅金屬物件由沙下面升咗上嚟！ 盧葦：呢個就係我一搵到你地所指嘅不知明物件啦。 白烏鴉盧地：呢個物體由一個圓柱體支架，支撐住一個金屬鐵盒 *敲玻璃聲效 白烏鴉盧地：鐵盒嘅兩端用琉璃所組成，會唔會係裘氏嘅發明？ 達：「β」！「β」係度啊！！！ 黑烏鴉盧天：阿達，此話何解呢？ 達：呢個係望遠鏡嚟架！鏡片同外形即係打橫咗嘅「β」！好多人都講過「β」似烏蠅鏡！你地將眼放喺呢個玻璃面度！ 黑烏鴉盧天：玻璃？ 達：即係你地嘅琉璃！不過透明度更高！ *金屬架移動聲效 黑烏鴉盧天：但係...透過呢個「望遠鏡」去望，同我地就咁用肉眼去望，好似無咩分別... 達：呢個應該係好舊嘅形號...通常喺啲高樓大廈或者山頂嘅位置先見到...好似要入錢先可以驅動到...你地等等先... *全知狀態聲效 達：係呢個望遠鏡上面有一粒好微細嘅掣... *激光投射聲效 白烏鴉盧地：金屬鐵盒嘅上方位置投射咗一束光，喺半空之中...有一個地圖？ 達：估唔到咁高科技啊...可以project一個地圖出嚟...你地認唔認得邊度打邊度？ 黑烏鴉盧天：呢個位置應該就係生死中途島 *觸碰螢幕聲效 達：（讀白）當我輕觸地圖投影上面生死中途島嘅位置，呢個「β」望遠鏡隨即轉動！ *金屬機械轉動聲效 白烏鴉盧地：大家小心！阿達口中嘅望遠鏡射出紅光！ 達：你地唔駛驚，呢種叫紅外線，唔會傷到大家嘅 白烏鴉盧地：係喎，當我放手上去阻截呢個光線，只係覺得隻手有輕微嘅熱力... 黑烏鴉盧天：望遠鏡轉動，然後前端射出紅外線嘅方向，係咪表示我地向呢個方向出發，就可以返回生死中途島呢？ *觸碰螢幕聲效 *金屬機械轉動聲效 達：盧綠，我啱啱撳咗啞鈴洲本島嘅位置，你照住紅外線嘅方向飛過去，就可以返到去啞鈴洲。 盧綠：未搵到婷婷...未幫到阿葦重返人世...我係唔會返去架！ 盧葦：阿哥...太嫲之前都講過...我本來已經死咗...依家仲喺靈魂狀態... 盧綠：但係你越嚟越淺色！即係！ 黑烏鴉盧天：之前所有靈魂都喺生死中途島轉世...喺呢個島出現呢個情況...即係盧葦好快就會消失...之後會去到邊度，可唔可以轉世...呢一層我都答你唔到... 盧葦：阿哥...學舅父嗰句，我本來已經死咗，可以再見返你同舅父，已經心滿意足...我喺生死中途島嗰個轉世作業系統度，揀咗下一世想做你嘅仔...希望我消失之後可以順利轉世，咁我就可以再同你相遇啦。只可惜...我地無辦法再重遇舅父... 盧綠：太嫲！太舅公！我盧綠跪係度求下你地想下辦法！ 黑烏鴉盧天：盧綠，生死有命，無人可以打破呢個規則。怒我地渡靈者無能為力。 白烏鴉盧地：就算有，我地都唔會咁做。盧綠，你起返身啦。 達：其實...我有一個方法...不過唔知成功率有幾高... 盧綠：阿達！快講！！！ *紙張聲效 達：當時喺生死中途島，我遇到過身嘅盧葦，我諗盧綠你應該想要返佢嘅屍體，等你返到啞鈴洲嘅時候可以安葬佢...所以我就用左手激光打散盧葦嘅屍體，再吸落黃紙度... 盧綠：阿達！多謝你！但呢個都只係阿葦嘅屍體...你又點樣令佢復活呢？ 達：我喺千獸島同獨角獸激鬥嘅時候...曾經用激光將獵鷹同前世係猿叔嘅大猩猩打散，分別用黃紙吸受佢地之後，就將兩張黃紙綁住一齊燒...之後就出現咗一隻有翼嘅猩猩... 所以，我可以先打散阿葦嘅靈魂，再用黃紙吸收咗佢。跟住將阿葦嘅靈魂及屍體嘅黃紙一齊燒，從而將阿葦復活…但一切都只係我估架啫...唔知得唔得架... 白烏鴉盧地：我反對！阿達整一隻會飛嘅猩猩，已經擾亂過一次呢度嘅秩序。我唔會比你再違返多一次！ 盧綠：太舅公！如果你唔應承嘅話，我盧綠就長跪不起！ 白烏鴉盧地：盧綠！你仲要我地提你幾多次！你係新一任嘅村長嚟架！ 盧綠：如果連自己最親嘅人都保護唔到，我又點可以勝任做村長呢！ 黑烏鴉盧天：盧葦，你又有咩想法？ 盧葦：我...如果可以復活...可以同阿哥一齊搵返婷婷...我願意一試！ 白烏鴉盧地：家姐！你真係比佢一試？ 黑烏鴉盧天：依家我地都唔知盧葦消失之後能唔能夠繼續轉世...我地作為渡靈者某程度上有失職。既然阿達有呢一個方法，盧葦亦想嘗試，我認為可以比一個機會佢地。 白烏鴉盧地：既然家姐你開到口，咁我都唔加以阻攔。 盧綠：太嫲！太舅公！多謝你地！阿達！咁你仲唔快啲開始！ 達：嗱！我講多次，一切都係我推算...唔保證一定成功架 盧葦：阿達，我相信你。 達：好啦，盧綠...如果失敗咗...你唔好怪我啊 盧綠：阿達，我都相信你！ *激光儲氣聲效 達：盧葦，你比隻左手我啦 盧綠：（讀白）當阿葦半透明嘅左手掂到阿達發光左手嘅時候，激光由阿達嘅左手慢慢擴展到阿葦住身！ *激光發射聲效 盧葦：阿哥，一陣見！ *化灰聲效 盧綠：（讀白）阿葦一講完，激光就將阿葦打散，阿葦慢慢化成飛灰...之後阿達拎出一張黃紙，黃紙將所有靈魂嘅灰燼！ *黃紙吸入聲效 盧綠：（讀白）我心中默唸...一定要成功！一定要成功！而阿達拎住張黃紙之後，佢背住我地，望實張黃紙，無出聲...我忍唔住問佢 - 阿達...唔係出現咗咩問題嗎？ 達：呢一層...我都唔知點解釋...總之呢張係盧葦嘅屍體黃紙，呢一張係佢靈魂嘅黃紙…我將兩張黃紙一齊燒，試下將佢復活...然後等佢親口同你地講... *燒黃紙出道具聲效 盧綠：（讀白）黃紙一邊燒，一邊有啲奇特嘅金光喺火陷之中散出，阿葦嘅身體慢慢由金光拼湊…直到黃紙燒完，阿葦完整嘅身體就出現喺我地面前！ 達：我呢...就只可以做到呢一步...依家就等盧葦開眼同開口。 盧綠：阿葦！你覺得點啊！阿葦！ 黑烏鴉盧天：盧葦佢...終於開眼同開口啦！ 盧葦：阿哥，我返嚟啦。 盧綠：太好啦！終於可以再攬實你啦！阿葦！ 盧葦：阿哥，你唔好攬得咁實先...你比我講幾句說話先...可以嗎？ 盧綠：唔好意思...一時太興奮...阿葦你有咩想講？ 盧葦：小天，地仔，好耐無見啦。 黑烏鴉盧天：小天？無人會咁叫我，除咗... 盧葦：雖然你地個樣同我離開嘅時候差唔多，但感覺成熟咗好多。咁多年嚟要你地做渡靈者，真係辛苦曬... 盧綠：（讀白）阿達，點解阿葦咁怪嘅？係咪過程中出現啲咩問題啊？ 達：無出現任何問題...只係黃紙會顯示盧葦之前幾世嘅身份...而佢第一世嘅身份，39年 - 70年 - 盧零。 黑烏鴉盧天 + 白烏鴉盧地 ：你係...阿爸！？ Zip噏劇場 Game of Eden 第二季 小島篇 第94回「α 島」 阿攝 飾演 阿達 Kity 飾演 黑烏鴉 盧天 小白 飾演 白烏鴉 盧地 Cfun 飾演 盧綠 鄧添樂 飾演 盧葦 編劇及製作 阿攝音樂 BEAT FRIDAY (Accent, Playback, Phase, Fairness, Minty, Other Love)封面設計 Followmelikeblack Leave a comment and share your thoughts: Powered by Firstory Hosting

時間：180年9月22日 地點：封閉區域Area DB Island 地獄 達：（讀白）落到嚟地獄區域之後，整個地獄失控…所有鎖住落地獄嘅靈魂鐵櫃被打開，令本身要喺地獄完成刑罰嘅47個靈魂全部走晒出嚟！然後人工智能K Area DB Island 更開咗3個傳送門！有一批靈魂想闖入傳送門返回人間；有一批就想借我左手嘅希望之光離開呢個世間，返回玄武大帝嘅懷抱。經過一輪激戰，我被黑烏鴉盧天用黑羽毛操控，被迫消滅咗一班地獄靈魂…當中盧葦更被撞入傳送門…最後，一共46位地獄靈魂都被我用左手「D」嘅能力消除。盧綠滿心歡喜想同大家一齊返去人間，點知…白烏鴉盧地竟然話 白烏鴉盧地：咪住。仲有一位地獄靈魂未解決。 盧綠：仲有一位？ 黑烏鴉盧天：無錯。就係裘智。 盧綠：太嫲，太舅公！等等先！我知道舅父佢因為偷飲靈魂之水所以被罰落地獄… 白烏鴉盧地：所以你知道要遵守相關嘅規矩。 盧綠：但係舅父喺剛才地獄嘅激戰，佢無好似嗰班靈魂咁攻擊我地，又無偷偷衝入傳送門！佢仲協助我地維持地獄嘅秩序添！所以 黑烏鴉盧天：所以盧綠你想講，裘智將功補過，應該比佢借傳送門復活？ 盧綠：又未至於係將功補過，我只係怕太舅公所指嘅「未解決」...係想用阿達嘅能力...消滅舅父... 白烏鴉盧地：盧綠，你知唔知裘智嘅刑罰係幾多年？ 盧綠：我...唔太清楚... 白烏鴉盧地：裘智，由你自己去講。 裘智：我嘅罪行係偷飲靈魂之水…而刑期係二千年... 盧綠：二千年！？ 黑烏鴉盧天：無錯。二千年之後，裘智就可以重新轉世。 盧綠：二千年後仲有冇啞鈴洲仲係未知之數啦！ 黑烏鴉盧天：盧綠，你係村長，亦都得知啞鈴洲嘅真相。作為呢個地方嘅守護者，我地有必要執行阿爸所訂立嘅規則。 盧綠：舅父都係想知道呢個世界嘅真相！佢都係想同玄武大帝接觸！就要得到呢個懲罰！？太唔合理啦！ 黑烏鴉盧天：阿爸喺現實世界經歷嘅一切，唔係我地能夠明白。佢咁做，都係想我地可以喺呢度生活更加安穩，更加安全。 盧綠：阿達！呢度得你一個喺嗰個所謂現實世界生活過！你講句公道說話啊！ 達：喺我地嘅世界...有各式各樣嘅宗教...亦對天堂、地獄有唔同嘅描述... 盧綠：我唔係要你講呢啲啊！我只係想你講呢個懲罰合唔合理啊！ 達：我諗我呢個外人...好似無權去評論呢件事... 盧綠：180年前，盧零創建啞鈴洲，但都已經係180年嘅事啦！可能有啲規則係不合時宜呢？ 白烏鴉盧地：但呢180年嚟，啞鈴洲一切正常。即係代表阿爸所創立嘅規則無問題。 盧綠：喺我地面前呢個就係問題所在啊！ 黑烏鴉盧天：你指嘅係？ 盧綠：就係阿達！應該係阿達身處嘅世界！大凶日嘅出現，代表我地啞鈴洲所謂嘅安全已經響起警號！婷婷會走失，去到阿達嘅區域，而阿達可以走到入嚟！若果我唔係成為咗村長，就會同其他村民一樣，被矇在鼓裡！ 黑烏鴉盧天：盧綠，有啲事情，普通人係唔需要知道。大家簡簡單單喺度生活，就係阿爸最想要嘅願望。 盧綠：但係凱安佢地都質疑九頭海蛇嘅存在！而裘氏一直望天推算，都係想求見根本唔存在嘅玄武大帝！你地唔覺得呢個謊言...或者已經唔可以繼續落去啦咩... 黑烏鴉盧天：知道真相嘅只有我地。呢個亦係我地盧氏村長接班人嘅責任。 白烏鴉盧地：所以，你明白點解阿爸要重罰偷飲靈魂之水嘅人啦。 達：盧綠，喺我嘅世界...想維持安全就需要付出代價... 盧綠：舅父都只係求知慾比較強啫... 黑烏鴉盧天：佢係挑戰安全嘅底線。所以佢必需要受罰。 盧綠：好！咁叫埋阿爸喺天堂落地獄同舅父一同受罰啊！ 裘智：綠仔...夠啦... 盧綠：舅父，我睇晒你嘅日記！阿爸醉酒將心底話講出嚟，佢有錯！人工智能咁樣擺佈我地！佢都有錯！ 達：（讀白）望住盧綠據理力爭...作為外人嘅我唔識亦都唔應該幫口...但靈魂之水就正如伊甸園嘅禁果一樣...而人類嘅求知慾可以推進文明發展，但同時亦會帶嚟好多想像唔到嘅後果... 白烏鴉盧地：盧葦不惜落地獄代裘智受苦，而盧綠你就想拉喺天堂嘅爸爸嚟地獄。你地兩兄弟究竟諗緊啲咩？ 盧綠：我地都係做盧氏村長應該做嘅工作 - 就係保護啞鈴洲嘅人！ 白烏鴉盧地：你呢啲係狡辯！總之規距就係規距！ 黑烏鴉盧天：盧綠，我問你，如果裘智嘅刑罰，只係一千年？或者五百年？你仲會唔會咁激動？ 盧綠：我... 黑烏鴉盧天：如果一百年？或者只係五十年呢？ 盧綠：都係會不憤！但內心會...好過少少... 黑烏鴉盧天：既然係咁，我地並唔會要求阿達用左手嘅能力去消滅裘智，去淨化所有地獄靈魂。因為我相信阿達都應該落唔到手？ 達：我唔會再用左手嘅能力去對付任何一個靈魂！因為呢個唔係我入嚟嘅原因同目的！ 黑烏鴉盧天：所以，裘智只需要繼續佢原本嘅刑罰就可以啦。 白烏鴉盧地：但家姐，好明顯整個地獄區域唔能夠正常運作。就算裘智返入鐵櫃，都無辦法承受原本嘅刑罰。 黑烏鴉盧天：正因如此，我地更唔應該喺呢件事情上糾纏太耐。我地仲要出發去搵今敏同人工智能，要求佢地解釋事件，令啞鈴洲回復正常。 盧綠：舅父！你出句聲啦！舅父啊！ 裘智：綠仔，舅父有你同葦仔咁明白我，咁為我去著想，已經好心滿意足啦。 盧綠：但舅父你唔覺得唔甘心咩？你只係想求真咋嘛 裘智：我依家求到啦…因為我知道死後嘅世界，有天堂，有地獄，亦知道玄武大帝只係虛構嘅故事。而見到阿達，更加知道世界以外嘅世界。就算我返到人間轉生為人，以我嘅性格，應該會同依家嘅我一樣，不斷都追求。但係，呢個啞鈴洲嘅知識，只係一個井，或者係一個湖，有概定嘅框架。當知道呢個現實之後，就好似失去求知嘅勇氣...無咗求知慾嘅我...仲生存嘅話...好似無咩意義... 盧綠：咁留喺度有意思咩？ 裘智：呢度幾好啊，可以靜靜地思考，我有二千年嘅時間，去搵答案... 盧綠：舅父！係二千年啊！ 裘智：係啊，唔知你轉世咗幾多次？經歷過啲咩事呢？ 盧綠：舅父！你唔好再講啦！ 裘智：綠仔，我本來已經死咗，可以再見返你同葦仔，已經係一份禮物。 黑烏鴉盧天：雖然裘智接受唔到原本嘅刑罰，但喺呢度二千年，淨係呢份寂寞，已經係最大嘅懲罰。裘智，你準備好未？ 裘智：我...準備好啦。 *鐵鏈聲效 黑烏鴉盧天：我依家用鐵鏈鎖住你嘅頸、手同腳 *羽毛箭聲效 黑烏鴉盧天：鐵鏈嘅另一端被我嘅羽毛箭牢牢鎖喺地上面。以你嘅能力根本無可能逃脫，而就算你逃脫，我都會感受得到。 白烏鴉盧地：裘智，你最後仲有咩說話想講？ 裘智：綠仔，應承我，好好照顧葦仔，照顧啞鈴洲。 *傳送門消失聲效 達：你地睇下！喺半空嘅傳送門消失咗！ *傳送門閃爍聲效 達：而喺我地附近嘅傳送門，好似之前盧葦被撞入去咁，發出閃光！睇嚟都好快會消失！ 黑烏鴉盧天：應該係今敏或者人工智能去操控搞鬼。我地要盡快回程啦！ 裘智：綠仔...再見啦... 盧綠：舅父！我一定唔會比葦仔、婷婷仲有啞鈴沖有事架！ 裘智：我相信你一定做得到。 達：（讀白）裘智都未講完，盧綠就大力緊抱裘智。佢地相擁咗唔係好耐，黑烏鴉盧天就搭一搭盧綠膊頭 黑烏鴉盧天：盧綠，我地要行啦。 盧綠：舅父！再見啦！ 裘智：再見啦...綠仔... *步行聲效 達：（讀白）黑烏鴉盧天同盧綠率先走入傳送門，跟住到我，白烏鴉盧地殿後。盧綠轉身想多望裘智幾眼，但可惜...當白烏鴉盧地雙腳都離開地獄範圍之後，傳送門瞬間消失！ 裘智暫時成為呢一刻喺地獄唯一一個靈魂... Zip噏劇場 Game of Eden 第二季 小島篇 第93回「地獄·10」 阿攝 飾演 阿達 阿O 飾演 裘智 小白 飾演 白烏鴉 盧地 Kity 飾演 黑烏鴉 盧天 Cfun 飾演 盧綠 鄧添樂 飾演 盧葦 編劇及製作 阿攝音樂 BEAT FRIDAY (Subtitle, Phase, Nutty, Belongs, Other Love, Minty)封面設計 Followmelikeblack *步行地效 達：（讀白）透過傳送門返回人工智能K Area DB Island 所指嘅人間，出現喺我哋面前嘅，只係好似足球場咁大嘅圓形沙地… 白烏鴉盧地：家姐，呢度點睇都唔似生死中途島、百草園同千獸島…究竟呢度係邊度嚟呢？ 盧葦：（由遠到近大叫）阿哥！阿哥！你地終於返到嚟啦！舅父呢？ 盧綠：太嫲話舅父一定要繼續二千年嘅地獄刑罰…所以…佢留低喺地獄嗰度… 盧葦：二千年咁耐！ 盧綠：係… 盧葦：我明明講咗要代佢受刑！我要落返去搵佢！ 黑烏鴉盧天：盧葦，我哋依家當務之急，就要搵到今敏同人工智能出嚟…你比我地早嚟到呢度，你有冇咩發現？ 盧葦：喺等你地呢段時間，我搵到一樣未見過嘅物件，你地跟我過嚟啊 盧綠：（讀白）葦仔轉身嘅同時，一道陽光照射落佢身上…耀眼嘅光線竟然穿過佢嘅身體，照射落我地眼入面… 盧葦：阿哥，你做咩眼定定咁望住我，快啲行啦！ 盧綠：葦仔…你…伸隻手比我啊… 盧葦：你嘅要求咁…奇怪嘅… 達：盧葦…你隻手…穿過咗盧綠嘅手…其實唔單止你隻手，你成個人都變咗半透明啊！ 盧葦：點…點解會咁架！ 盧綠：太嫲！大舅公！葦仔發生咩事啊！ 黑烏鴉盧天：盧葦本來已經過身，所以佢依家仲喺靈魂狀態。睇嚟人工智能所指嘅返回人間復活，又係另一個大話。 （TBC） Leave a comment and share your thoughts: Powered by Firstory Hosting

時間：180年9月22日 地點：封閉區域Area DB Island 地獄 盧綠：（讀白）白烏鴉守住最左邊嘅傳送門，看守住跪喺地面，等待阿達嗰12個地獄靈魂；而阿達就發出強大激光消滅喺中間嘅20個靈魂；而我同阿葦就一前一後護喺傳送門面前，嗰13個靈魂圍圈圍攻我地...我最後抵擋唔住佢地嘅圍攻，就用晒所有羽毛形成一個盾，護喺自己身前，拼命防守！但我被嗰6個地獄靈魂迫到不斷後退！仲有幾步，就會被佢地迫入傳送門！ 而阿葦佢都頂唔住嗰7個靈魂嘅合擊！佢被其中一個靈魂起飛腳一踢！破咗佢防守嘅架勢！再被另一個靈魂撞入傳送門入面！ 達：（大叫）盧葦！！！ 盧綠：（大叫）阿葦！！！ *羽毛箭聲效 盧綠：呢個時候！太嫲嘅羽毛箭趕到！佢用羽毛組成一條黑鞭！衝去想綁住阿葦嘅右腳！然後拉返佢出嚟！同時阿達、舅父都趕到！而嗰7個地獄靈魂亦都把握呢個難得嘅空隙！想跟阿葦跳入傳送門！ *羽毛箭聲效 盧綠：太嫲眼見地獄靈魂準備跳入傳送門！條羽毛黑鞭無拉返阿葦出嚟，反而圍住嗰7個地獄靈魂，將佢地綁埋一齊！太嫲一手拉住佢地 *羽毛鞭聲效 *綁實及拉繩聲效 達：盧綠！黑烏鴉叫你唔好分心！繼續守住傳送門！ 盧綠：但係阿葦佢！ 裘智：佢只喺返回人間，唔會有事嘅！ *傳送門閃礫聲效 達：不過圓形嘅傳送門喺盧葦入咗去之後，由原本嘅白光突然變咗紅光啊！ 盧綠：咁阿葦佢有無事啊？ 裘智：大家放心，葦仔佢只係被撞飛咗入去平地度，佢依家慢慢爬緊起身！ *傳送門閃礫聲效 達：但係！度傳送門閃得好勁！跟住！慢慢縮細！ *傳送門消失聲效 達：傳送門消失咗！ 盧綠：究竟人工智能想玩咩花樣啊？ *拳打腳踢聲效 *跌地聲效 盧綠：（痛叫）啊！ 達：（讀白）眼見傳送門突然消失，原本應付盧綠嗰6位地獄靈魂發狂咁攻擊盧綠！盧綠嘅羽毛盾抵擋唔住，被佢哋撞跌咗落地。跟住用力跑去中間喺半空嘅傳送門度！ *羽毛箭聲效 達：（讀白）黑烏鴉右手操控羽毛鞭綁實7位地獄靈魂，左手喺空氣度指揮淨底嘅羽毛箭飛去追擊跑走嘅地獄靈魂！ *中箭、割傷聲效 達：（讀白）黑烏鴉嘅羽毛箭擊中佢哋膝頭同腳腕嘅關節，令佢哋一時失去行動能力。同之前嘅情況一樣，佢哋好快又會爬返起身，所以黑烏鴉大聲比咗兩個指令 黑烏鴉盧天：阿達！用你嘅左手能力！盧綠！學我整羽毛鞭綁住佢哋！ 達：3,2,1！對唔住啊… *激光發射聲效 達：我數完3聲之後，黑烏鴉即刻收起羽毛鞭。而我左手掂住其中一個地獄靈魂…激光由佢身上擴散到其他同佢身體有接觸嘅靈魂…激光爆發！佢哋就喺我面前化成灰，然後慢慢飄上天… 黑烏鴉：阿達！有一個地獄靈魂喺激光擴散到佢身體之前走甩咗！ *羽毛鞭聲效 達：呢個時候，盧綠操控羽毛鞭，將逃走嗰位靈魂綁實，再將佢送去我面前… 盧綠：阿達，要麻煩你啦。 達：對唔住…第28位靈魂… *激光發射聲效 *羽毛箭聲效 達：同一時間，盧綠再試操控羽毛，飛去跌喺地嗰6位靈魂度！嗰6位地獄靈魂嘅關節雖然仲插住黑羽毛，但佢哋唔理痛楚，一齊企起身，就算幾辛苦，都要行去中間嘅傳送門。呢個時候，盧綠嘅半黑半白嘅羽毛箭趕到，圍住嗰6個地獄靈魂，然後多枝羽毛同一時間收縮！狠狠咁綁實呢6個靈魂！ *羽毛鞭聲效 達：黑烏鴉為免再有靈魂逃脫嘅情況，佢都用羽毛鞭狠狠咁綁實佢哋。呢6位靈魂一路掙扎，一路望住行緊過嚟嘅我… *激光儲氣聲效 達：唔好意思啊…咁多位…對唔住啊… *激光發射聲效 黑烏鴉：好。仲淨低細佬嗰邊嘅傳送門未處理。 盧綠：太嫲，可以比我返去睇一睇阿葦嘅情況嗎？ 黑烏鴉：盧綠。你要記住你喺新一任村長，應該以大任為先。況且盧葦理應返咗人間，照道理應該安全。 盧綠：係嘅… 黑烏鴉：阿達，好快我哋就可以完成呢度嘅工作，然後搵今敏或者人工智能問清楚。 ——— 白烏鴉：家姐，呢12個靈魂一直跪係度，應該就係等阿達嘅希望之光。 達：你哋…不如起身先啦… （讀白）我一講完，呢12位靈魂就起身，喺我面前手拖手，一字排開咁企喺度。 你哋…有冇咩最後嘅說話想講？又或者…你哋其實可以走返入鐵櫃度？繼續之前嘅刑罰？ 盧綠：阿達，佢哋全部低頭，乜都無講…咁即係？ 達：佢哋啱啱傳遞咗訊息比我…話只想快啲得到解脫… 黑烏鴉：既然佢哋去意已決，阿達，咁就請你動手啦。 盧綠：佢哋合埋咗眼…等阿達你落手… 達：希望我左手嘅激光…可以帶你哋去到你哋心目中嘅玄武大帝身邊啦… *激光儲力聲效 達：（讀白）我左手掂住最左邊嘅靈魂嘅手，佢抬頭望我，報以一個微笑。跟住激光好快由第一位擴散到最後一位… *激光聲效 達：呢12位靈魂好快被激光打成灰燼…同之前一樣…慢慢飄上半空之中…我望住我隻左手嘅交叉…直到呢一刻為止…我一共解決咗46位曾經生活喺啞鈴洲嘅靈魂…我呢隻左手變咗做劊子手… 盧綠：好啦！太嫲、太舅公、舅父、阿達，我哋依家可以透過傳送門返去啞鈴洲搵阿葦啦。 白烏鴉：咪住。仲有一位地獄靈魂未解決。 盧綠：仲有一位？ 黑烏鴉：無錯。就係裘智。 盧綠：太嫲，太舅公！等等先！我知道舅父佢因為偷飲靈魂之水所以被罰落地獄… 白烏鴉：所以你知道要遵守相關嘅規矩。 Zip噏劇場 Game of Eden 第二季 小島篇 第92回「地獄·9」 阿攝 飾演 阿達 阿O 飾演 裘智 小白 飾演 白烏鴉 盧地 Kity 飾演 黑烏鴉 盧天 Cfun 飾演 盧綠 編劇及製作 阿攝 音樂 BEAT FRIDAY (Interval, Minty, Messy, Nutty) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 盧綠：由阿達進入啞鈴洲到今日，已經係第十一日。喺佢帶領之外，我地出發前往百草園、千獸島，對付過獨角獸，我跌落山涯之後，同佢喺生死中途島重聚，仲搵到舅父嘅筆記，知道舅父出海之後嘅經歷...可惜...葦仔服用咗舅父嘅新靈魂之水中毒過世...我要同佢陰陽相隔... 後來，我、阿達、同第二任村長，首位渡靈者 - 黑烏鴉盧天去到天堂繼續搵線索。最後發現第一任村長，亦係呢個啞鈴洲嘅創始人 - 盧零嘅遺骸。阿達觸發盧零手上木箱嘅裝置，除咗彈出兩條蛇之外，阿達腳下亦有佢口中第五個題示嘅符號，仲跌咗落未知嘅空間！ 太嫲盧天推測阿達應該被送到去地獄。我借咗阿爺嘅黑白烏鴉袍，暫時借得渡靈者能力，以烏鴉姿態趕到地獄。到達之後，我終於見到舅父、阿葦、阿達啦！ 點知，人工智能K Area DB Island嘅一句說話 -  「各位地獄靈魂，今日玄武大帝特赦！我係東面開咗一度傳送門，只要穿過嗰度門，就可以返迴人間復活！或者，你哋都可以選擇接受玄武童子希望之光嘅祝福！永遠離開呢個世界，返回玄武大帝嘅懷抱！」 盧綠：一共有45個地獄靈魂，佢哋分成兩組，其中33個就衝向圓形傳送門，另外12個就去咗阿達嗰邊，跪喺度求阿達用希望之光消滅自己。經過一輪打鬥，阿達用左手「D」嘅能力消滅傳送門，可惜，人工智能K Area DB Island滅一出三，開啟咗三道傳送門，分別係 -  靠左位置嘅傳送門由白烏鴉用羽毛守護住，同時有12位跪咗喺地下，等待阿達希望之光嘅靈魂； 靠右位置嘅傳送門就交由我同阿葦去守護，我嘅羽毛箭加阿葦嘅玄武拳法對付13個想衝回人間嘅靈魂； 中間半空位置嘅傳送門就由太嫲盧天守護，有4位靈魂被佢用鐵鏈鎖住，行動能力受到限制，但另外嗰16位靈魂就用人層疊嘅方法，企圖疊高跳入傳送門。但係太嫲用黑羽毛圍住阿達令佢飛到半空，再用一枝羽毛插穿佢左手，以控制羽毛嘅能力當阿達係扯線木偶咁，控制佢左手飛到人層疊頂層嘅靈魂塊面度！跟住！ 盧葦：阿哥！你望下阿達嗰邊！有一度強光...喺佢左手度發出啊！ 盧綠：（讀白）阿達左手發出嘅光芒，比之前喺生死中途鳥打破透明牆壁更強更大！激光由佢左手延伸到佢掂住嘅靈魂第一個靈魂，再擴散到所有有接觸嘅十五位靈魂！ *激光聲效 盧綠：（讀白）激光穿透呢十六個地獄靈魂，每個靈魂被擊光打中後，化成灰塵之前，各自露出唔同嘅表情... 有部份仇視阿達、 盧葦：有部份嚟唔切怒叫、 裘智：有部份眼神變得空洞，好似目中一切、 白烏鴉盧地：有部份苦笑、有部份反而露出最後嘅微笑 黑烏鴉盧天：之前劇烈嘅激戰，喺強光之後，整個地獄變得沉寂... 盧綠：強烈光芒之後，十六位靈魂全部變成閃礫嘅灰塵，飄浮喺半空之中 盧葦：慢慢升上地獄嘅高處，之後消失喺我地咁多人嘅視線之中...就好似從來無出現過一樣... 盧綠、盧葦、黑烏鴉盧天、白烏鴉盧地、裘智：呢個...就係阿達嘅能力... *墜地聲效 盧綠：（讀白）黑烏鴉盧天嘅心神放咗喺靈魂灰塵嗰度，一時之間忘記自己操控緊圍住阿達嘅黑羽毛，黑羽毛失去咗控制力，連同阿達一齊喺半空跌咗落嚟地面。我想即刻跑過去想扶起阿達，但比阿葦喝止！ 盧葦：阿哥！我地呢邊嘅地獄靈魂仲未解決架！佢地又再開始衝過嚟啦！ 黑烏鴉盧天：（大叫）盧綠！盧葦！我地處理埋呢度就會過嚟！你地要盡力守住度傳送門！ 盧綠、盧葦：（同時大叫）知道！ ---------- 裘智：阿達...你無事嘛？ 達：（神情空洞）無事...裘智啊...你覺得消失咗嘅靈魂會去邊呢...? 裘智：（緩慢，語重心長咁講）我...自從死咗之後發生嘅事...已經超越咗我知識嘅領域...所以...我都唔清楚... *鎖鏈郁動聲效 黑烏鴉盧天：解決晒所有地獄靈魂，搵到今敏或者人工智能就可以問過一清二楚。所以阿達，我地仍然需要你嘅能力。 *抽出羽毛聲效 *阿達痛叫 *滴血聲效 達：比返條羽毛你... 黑烏鴉盧天：阿達，你要明白，我都係迫不得已先咁做 達：OK，唔駛再講...我會自己出手... （讀白）我擰轉身，無同黑烏鴉盧天多講任何一句說話。佢身為盧零嘅長女，佢要保護呢個啞鈴洲，我明白。我亦知道佢願意付出任何代價，去得到「平安」呢個寶藏。縱使我唔想消滅任何一個靈魂，但喺呢個情況，我只可以服從去協助佢地。 我行到嗰4位被鐵鏈鎖住嘅靈魂，佢地盡力爭紮，什至企圖起身想逃走，不過都逃唔過黑烏鴉嘅羽毛。 *羽毛飛起聲效 *繩束縛聲效 黑烏鴉盧天：阿達，我用羽毛連成一條羽毛繩，將4個地獄靈魂綑綁埋一齊。咁你就可以一次過解決晒呢4個靈魂。 達：我數3聲，就會發出激光，到時你就收返啲羽毛啦。我唔想傷到你。 黑烏鴉盧天：多謝你。 達：3、2、1 *激光發射聲效 *羽毛飛走聲效 *靈魂灰飛煙消聲效 達：咁多位，對唔住... 黑烏鴉盧天：咁我地依家趕去右邊傳送門幫盧綠同盧葦。 ---------- 盧綠：阿葦，因為傳送門嘅兩端都可以通返去啞鈴洲，所以我地一前一後護喺傳送門面前！對付呢13個圍住我地嘅地獄靈魂！ *羽毛箭聲效 盧葦：（讀白）我好想回應阿哥，不過喺我面前呢7個地獄靈魂完全無比機會我開口，就輪流向我攻擊！如果我依家喺百草圍，我可以且戰且退，利用地形逐一同佢地對打。不過我要喺平地守喺傳送門前面，半步都唔可以離開...所以我只可以見招拆招...幸好呢7個靈魂仲未有圍攻嘅默契，其中一個靈魂快步衝出嚟，我快步踏出，單手捉住佢嘅前擘，再用另一隻手肘頂起佢令佢失平衡，跟住用腰部作為支點將佢拋返出去。地獄靈魂嘅重量好似比在生嘅人輕，所以我可以拋得比較遠。其他6個靈魂見到呢個情況，就一齊衝過嚟攻擊。我唔似阿哥咁，可以用羽毛箭做遠距離戰鬥，我只可以近身同佢地肉搏。我盡力將自己嘅集中力同反應提升到極點，但就算對手生前唔係格鬥高手，我雙拳難敵12對手腳...我慢慢被佢哋迫到後退幾步...仲有幾步...就會被佢地迫入傳送門！ 盧綠：阿葦！頂多陣！太嫲同阿達好快會趕到！ 盧葦：（讀白）我眼尾望到阿哥，佢都好盡力用羽毛箭抵擋地獄靈魂嘅攻擊。而佢放棄咗進攻，佢用半黑半白羽毛組合成一個盾，擋住嗰6個靈魂嘅攻擊！佢同我一樣都被迫到好接近傳送門！但就喺我分神去望阿哥情況嘅時候，被我拋開嘅靈魂喺遠距離助跑！再跳起！雙腳重重咁踢開我護喺胸前嘅雙手，我頓時失去重心！另一個靈魂再用膊頭一撞！我向後跌入傳送門入面！ 盧綠：（大叫）阿葦！ *羽毛箭聲效 盧綠：（緊張）呢個時候，太嫲嘅黑色羽毛箭趕到！ Zip噏劇場 Game of Eden 第二季 小島篇 第91回「地獄·8」 阿攝 飾演 阿達 阿O 飾演 裘智 鄧添樂 飾演 盧葦 小白 飾演 白烏鴉 盧地 Kity 飾演 黑烏鴉 盧天 Cfun 飾演 盧綠 Alton 飾演 K Area DB Island 編劇及製作 阿攝 音樂 BEAT FRIDAY (Accent, Minty, Other Love, Good Plus, Subtitle, Interval) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 達：（讀白）當盧綠、黑、白烏鴉飛咗去傳送門阻止地獄靈魂返回人間，我同盧葦、裘智就被12個靈魂圍住…佢哋想我用左手激光消滅佢哋…隔咗無幾耐，白烏鴉飛返過嚟，佢先係用兩支羽毛箭送盧葦過去協助盧綠，再將身上所有嘅羽毛箭飛向我同裘智！ 白烏鴉盧地：不死身嘅地獄靈魂太多！要阻止佢哋返回人間，就要靠你啦！阿達！ 達：（讀白）我未嚟得切反應，嗰堆羽毛箭就已圍住咗我同裘智！跟住白烏鴉揮一揮手指，羽毛箭就飛往佢指嘅方向！即係傳送門嗰邊！同時白烏鴉都狂奔去嗰個方向！我忍唔住不斷大叫！！！ *達由遠到近驚叫 *落地聲效 達：（痛叫）哎喲... 黑鳥鴉：你用羽毛包圍住阿達同裘智，然後控制白羽毛送佢地過嚟？ 白鳥鴉：（用力過度，繼續喘氣）無錯...呢個方法係最好... 黑鳥鴉：就係用阿達左手嘅能力？ 白烏鴉：家姐，咁樣打落去，真係唔係辦法，得阿達先可以幫到我地手... 達：想...用我左手嘅能力...？ 白烏鴉：無錯！ 達：真係要殺死喲靈魂...? 白烏鴉：我係要你消滅度傳送門！ 達：或者...不如咁啊！我地全部人都透過呢個傳送門返去人間，我再喺另一邊用左手消滅度門，咁班地獄靈魂咪繼續留喺地獄囉！ 黑烏鴉：阿達，如果走，我同細佬、仲有盧綠大可以變身飛返去生死中途島，但依家最重要係回復地獄嘅秩序！即係將佢地困返入地獄鐵櫃受苦！ 達：但好明顯依家係K Area DB Island嘅主意 白烏鴉：呢個人工智能只係協助我地，無權干涉我地啞鈴洲嘅運作！除非阿爸親自同我地講，否則我地唔會改變規矩！ 達：但就算我喺地獄呢邊破壞咗度門...佢地都係唔會返入鐵櫃入面架？ 黑烏鴉：都總好過唔知佢地復活後嘅情況！我地渡靈者唔可以比任何事影響啞鈴洲！ 盧綠：（離咪，遠少少，扮喺遠邊）喂！你地快啲落決定啦！我同阿葦未必頂到太耐架啊！ 裘智：阿達，要你呢個外人落決定我知道係好難...一係你將呢個能力交比我地，等我地處理返自己世界嘅事？ 達：好啦！好啦！好啦！我知點做架啦！ *激光儲力聲效 達：傳送門！消失！ *激光發射聲效 *煙飛聲效 達：（讀白）當我想拎另一張黃紙出嚟吸受傳送門嘅時候！ *傳送門聲效  黑烏鴉：係原地5米高嘅半空位置，又出現一度傳送門！ 白烏鴉：阿達，我用羽毛送你上去！破壞多次傳送門！ 黑烏鴉：細佬，無用架，就算你再破壞，人工智能都可以再整一個出嚟... 裘智：（冷笑）哈哈...我地裘氏一族辛苦多年去推敲玄武大帝回歸嘅日子...希望可以同玄武大帝見面，知道世界嘅真相...到頭嚟...一切都係比嗰個所謂人工智能去擺佈... *傳送門聲效 盧綠：太嫲！太舅公！你地望去西邊！本身圍住阿達嗰12個靈魂嗰邊！出現多個傳送門！ 白烏鴉：等我用羽毛箭封住嗰入口位置！唔好比佢地行入去！ *羽毛箭聲效 *傳送門聲效 盧綠：大件事啦！再東面啲地方！即係地獄島東邊嘅盡頭又出現多一度傳送門！依家一共有三度門啊！ *步行聲效 盧綠：本來圍住我地嗰33個地獄靈魂依家分成兩邊！一邊就衝緊過去東邊位置，另一邊...有靈魂係度騎膊馬！ 白烏鴉：嗰個我射羽毛箭射極都唔跌嘅肌肉靈魂做底！另一個靈魂踩上佢膊頭！依家應該有超過三米高！如果再上多個靈魂！佢地就可以掟最頂嗰位入傳送門返去人間界！ 黑烏鴉：細佬你去西邊！盧綠、盧葦你地去東邊！我留喺度！大家分批各自守護一個傳送門！總之唔可以比佢地越界！ *羽毛箭聲效 達：（讀白）白烏鴉飛咗去西面，佢控制羽毛箭技巧比盧綠高，可以將羽毛箭定格停喺傳送門前面，形成一個屏障，防止靈魂穿過傳送門。同時佢擺出玄武拳法嘅架勢，防止嗰12靈魂衝入傳送門。但佢地暫時維持住之前跪拜阿我嘅動作，無其他動靜。 而盧綠同盧葦就趕過去東邊嘅傳送門，佢地兩兄弟好有默契，出盡全力打倒嗰班靈魂！但佢地好似有不死身咁，就算中咗重擊...都會慢慢企返起身... 至於我眼前...嗰兩位又高又有肌肉嘅靈魂，好似玩緊體操咁，踩住膊頭整成一個好高嘅人牆，佢地準備拉第三個靈魂上嚟！佢哋只係差2米，如果夠力掟嗰個女靈魂上去，佢就可以穿過傳送門！ *羽毛箭聲效 達：（讀白）黑烏鴉用羽手箭射返佢落嚟！但呢個位置總共有20個想脫離地獄苦海嘅靈魂，佢地突然好有默契！有10個做肉盾咁，擋係肌肉靈魂前面去保護佢！其他就等被佢哋扔過傳送門！ 黑烏鴉：阿達！裘智！你地快啲幫下手！ 裘智：阿達！你決定成點啊？ *揭紙聲效 達：我...仲有呢啲道具黃紙...包括有地獄之鎖...仲有靈魂之鎖...亦有鐵鏈...等我一次過燒曬佢地出嚟！！！ *火柴聲效 *燒紙聲效 *金屬跌地聲效 達：黑烏鴉...呢啲道具...啱唔啱用啊...? *羽毛箭聲效 達：（讀白）黑烏鴉無講任何野，佢飛咗十幾支羽毛箭過嚟，舉起四條鐵鏈！同一時間，肌肉靈魂準備拋另一個靈魂穿過傳送門，就喺佢伸手只差幾十厘米就到嘅時候，羽毛箭控制鐵鏈飛至！鐵鏈圍住咗嗰個靈魂！再重重跌喺地面！而羽毛箭再控制其餘3條鐵鏈飛去嗰兩個肌肉靈魂對手度！鐵鏈圍住佢地對手轉圈，狼狼咗綁實咗佢地，等佢地無得再掟任何靈魂出去！我以為可以暫時阻擋佢地，點知... 裘智：只有落過地獄受苦嘅人...先知嗰種痛...同嗰種希望快啲完成苦難嘅渴望...無咁容易可以阻止到佢地... 達：（讀白）果然...如裘智所講...佢地離開地獄嘅意志好強！嗰二十個靈魂為咗抵達喺5米高嘅傳送門，佢地竟然做出疊羅漢嘅動作！九個人雙手雙膝掂地伏係度做底，再上其餘四個人做第二層，然後再上兩個人做第三層！ *羽毛箭聲效 達：（讀白）而無論黑烏鴉射幾多羽毛箭都好！佢地都不為所動！無郁過半分！跟住有一個靈魂爬上去最頂層，非常接近傳送門！黑烏鴉同我講 黑烏鴉：阿達，雖然我知係外人，但因為你承繼咗「D」嘅能力... *羽毛箭聲效 達：（讀白）黑烏鴉未講完，佢就控制一堆羽毛箭圍住我嘅身，好似之前白烏鴉咁，用羽毛箭嘅力升起我！黑烏鴉揮動手指，直指去爬到最高，即將可以穿高傳送門嘅靈魂嗰度！ 黑色羽毛快速送我過去！黑烏鴉另一隻手指再揮動！一支黑色羽毛箭向我衝埋嚟！直插我左手手背！ *中箭聲效 *達痛叫！ 達：（讀白）同時黑烏鴉控制羽毛箭飛高，由於羽毛箭插實我手背，所以我隻手就被羽毛箭擺佈，由平放變成向上伸直！我連人帶左手，加左手掌心凸出嘅箭頭直飛去爬到最高嗰個靈魂嘅頭到！ 佢左腳仲踩住第三層嘅靈魂，右腳躍起，準備跳向喺半空嘅傳送門之際，佢擰轉面望住被黑色羽毛包圍住兼被迫飛過嚟嘅我...佢未嚟得切反應，左眼就被我左手掌心嘅箭頭插中！我左手被迫包實佢嘅頭部... 黑烏鴉：阿達！呢一刻我地需要你嘅幫忙！ 達：（讀白）我合埋雙眼...腦海諗起一個畫面...跟住好唔情願咁大叫咗一聲！ *激光聲效 達：（讀白）強大嘅激光由我左手發出！由我左手掂住嗰個靈魂開始，擴散到佢腳掂住，身體有接觸，一共15個靈魂！ Zip噏劇場 Game of Eden 第二季 小島篇 第90回「地獄·7」 阿攝 飾演 阿達 阿O 飾演 裘智 小白 飾演 白烏鴉 盧地 Kity 飾演 黑烏鴉 盧天 Cfun 飾演 盧綠 編劇及製作 阿攝 音樂 BEAT FRIDAY (Nutty, Minty, Fairness, Day Dream, Other Love) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 盧綠：我借咗阿爺件黑白羽毛袍，暫時借用咗佢渡靈者嘅力量，跟黑烏鴉落到地獄搵阿達，點知原本喺地獄鐵櫃受苦嘅靈魂全部被釋放咗出嚟。跟住天上面傳出人工智能把聲，佢話… K Area DB Island : 各位地獄靈魂，今日玄武大帝特赦！ *傳送門打開聲音 K Area DB Island : 我係東面開咗一度傳送門，只要穿過嗰度門，就可以返迴人間復活！或者，你哋都可以選擇接受玄武童子希望之光嘅祝福！永遠離開呢個世界，返回玄武大帝嘅懷抱！ 盧綠：一共有45個地獄靈魂，佢哋分成兩組，其中33個就衝向圓形傳送門，另外12個就去咗阿達嗰邊。我同黑、白烏鴉就飛到傳送門前面，阻止地獄靈魂返回人間！黑烏鴉一聲令下！ 黑烏鴉盧天：（威武）兩位！羽毛箭雨！準備！發射！ *羽毛箭雨聲效 盧綠：（讀白）我地三位用力將身上嘅羽毛射上半空，然後借助衝力，高速射向嗰33個聲獄靈魂！ *身體中箭聲效 盧綠：係咪得咗啦？ 黑烏鴉：佢哋全身中箭，有啲更射中佢地心臟位置，應該會二次死亡，或者至少失去行動能力啦？ 白烏鴉：係你地嚟之前，我曾經用羽毛箭瘋狂射向其中一個全身肌肉嘅靈魂，但佢寸步不移，用身體擋住我嘅羽毛箭…所以，我哋都要睇定啲先 盧綠：佢哋…慢慢企返起身…然後再向我哋行過嚟啊！ *鐵鏈步行聲效 盧綠：我一下子用咗袍上面嘅一半羽毛，咁依家點算啊？ 黑烏鴉：羽毛箭！回歸！ *羽毛箭聲效 盧綠：原來可以操控羽毛箭返嚟身上面！咁…我哋繼續射？ 黑烏鴉：細佬，頭先你係點樣壓制佢地？ 白烏鴉：阿達可以用法術整出一道道鐵閘，我地用鐵閘封住佢哋嘅行動。但依家地獄靈魂嘅數量太多，呢個方法恐怕行唔通 黑烏鴉：咁我哋用鐵閘擋係傳送門面前？ 白烏鴉：好，我依家即刻飛過去拎返剛才封住佢哋嘅大鐵閘！ 盧綠：太舅公，我同你一齊過去！ *變身聲效 *拍翼聲效 黑烏鴉：咁多位村民！呢個世界有呢個世界嘅規律，你哋過身後落地獄，自然需要受罰先可以再轉世！所以，我再講次，請你哋返回自己嘅鐵櫃！ *鐵鏈步行聲效 黑烏鴉：既然係咁，我唯有繼續履行渡靈者嘅職責！ *羽毛箭聲效 黑烏鴉：（讀白）剛才嘅羽毛箭雨唔能夠傷害到佢哋，我估計有兩個原因 - 第一，佢哋喺地獄受嘅各種苦，遠遠痛過羽毛箭嘅攻擊；第二，佢哋已經死過一次，依家係靈魂狀態，所以就算點中箭，都唔會再死亡。我唯有盡力限制住佢哋嘅步伐，等細佬同盧綠帶鐵閘過嚟，又或者…用阿達嘅能力… 而兩者之間，我揀咗前者。為咗慳箭嘅數量，我專瞄準佢哋腳眼嘅關節位發射！ *羽毛箭聲效 黑烏鴉：（讀白）我射出66枝羽毛箭。每枝箭精準射中佢哋嘅腳眼 *倒地聲效 黑烏鴉：（讀白）有部份靈魂中箭倒地，我再補射羽毛箭，射向佢哋嘅手腕！ *中箭聲效 黑烏鴉：（讀白）佢哋嘅手腕被我嘅羽毛箭插中，好似兩根釘，牢牢地將佢哋雙手釘喺地面！令佢哋郁唔到，暫時限制住佢哋！ 至於無倒地靈魂就繼續向我行緊過嚟，同一時間，細佬所講嘅嗰度鐵閘平飛緊過嚟！我細心一睇，鐵閘被一大堆白色羽毛墊起！係細佬控制羽毛送度鐵閘過嚟！跟住度鐵閘飛到傳送門嘅前方，再垂直跌落地面 白烏鴉：盧綠，係時候啦！ *拍翼聲效 *變身聲效 黑烏鴉：（讀白）盧綠飛到鐵閘上方，再變返做人形，雙腳踩住鐵閘頂，用自身嘅重力，將道鐵閘直插喺傳送門嘅前面！ *鐵閘插地聲效 盧綠：太舅公會再送多幾道鐵閘過嚟，圍住嗰傳送門！ 黑烏鴉：但啲靈魂用牙咬走我射喺佢地手上面嘅羽毛箭...跟住企返起身... 盧綠：呢33個靈魂又成兩邊，一堆去阻止太舅公，另一堆就就由慢步變大步跑！ *奔跑聲效 盧綠：佢地一字排開咁跑過嚟，好似想包圍我地咁！ 黑烏鴉：我守住鐵閘前面，你守住傳送門嘅另一邊 *跑步聲效 盧綠：大件事啦！原來道傳送門係一個傳送框，雖然我地用鐵閘封咗前面，但傳送框後面，都可以睇到啲花草樹木嘅景色！即係無論傳送門嘅前後，都可以返去人間！ 黑烏鴉：咁你梗加要守住！ 盧綠：（讀白）黑烏鴉一講完，嗰二十個靈魂就圍圈包圍住地我地，然後靜止唔郁。我同黑烏鴉夾住傳送門咁背對背，喺呢個圓圈嘅中間，我地各自將羽毛箭懸浮喺我地身前，形成一個對峙嘅狀態。呢一刻空氣好似靜止咗咁，靈魂不動，我地不動。跟住，其中一個靈魂踏出第一步，其他靈魂即刻跟隨！我同黑烏鴉即刻射出羽毛箭！ 羽毛箭由圓心飛出！ 我瞄住靈魂嘅雙腳激射過去！希望阻止佢地推進！ 而黑烏鴉就雙手去指揮羽毛箭嘅移動方向，佢好似用手指喺空氣度畫畫或者寫字咁，羽毛箭就按住佢所指嘅地方飛過去！黑烏鴉同我唔同，佢嘅羽毛箭瞄準靈魂嘅腳眼、膝頭嘅位置發射，雖然羽毛箭只係喺皮膚表層割過，但都足已令佢地跌喺地面！當靈魂再企返喺身，黑烏鴉又再用羽毛箭割過佢地嘅關節位，務求減低佢地嘅行動能力！ 黑烏鴉做咗咁多年渡靈者，當然非常純熟！但係我就第一次用呢種能力，所以我一個對上十個靈魂非常吃力！有靈魂突破我嘅箭雨，跑到離我十步嘅位置！但我身嘅羽毛箭接近射曬出去！大部份仲插住喺靈魂身上面，唔夠時間控制佢地返嚟...咁唯有同呢兩個靈魂打近身戰！ 當我諗住駛出玄武拳法嘅寸刺，我聽到我頭頂上面有人叫我！ 盧葦：阿哥！讓開！ 盧綠：（讀白）阿葦佢雙手揸住白色羽毛飛喺半空！然後佢放開雙手，借助落地嘅衝力，狠狠咁踢跌其中一個靈魂！ *身體倒地聲效 盧綠：（讀白）阿葦落地之後，碌咗兩個圈，再順勢用腳掃跌另一個靈魂！呢個動作同之前白烏鴉嘅飛踢好相似！ 盧葦：阿哥，白烏鴉叫我嚟幫你守住度傳送門！咁你用羽毛箭遠攻，我喺你身邊守護住你！ 盧綠：好！ *羽毛箭聲效 黑烏鴉：（大叫）細佬！你搵到鐵閘封住度傳送門未啊！ *奔跑聲效 白烏鴉：（少少喘氣）家姐...我有另一個辦法... 黑烏鴉：細佬，點解你無晒白色羽毛嘅？ 白烏鴉：（少少喘氣）因為...我要送佢地過嚟！！！ 黑烏鴉：我淨係睇到原本追住你嗰13個靈魂跟住你跑過嚟咋！ 白鳥鴉：家姐...你望上去！ *達由遠到近驚叫 *落地聲效 達：（痛叫）哎喲... 黑鳥鴉：你用羽毛包圍住阿達同裘智，然後控制白羽毛送佢地過嚟？ 白鳥鴉：（用力過度，繼續喘氣）無錯...呢個方法係最好... 黑鳥鴉：就係用阿達左手嘅能力？ 裘智：無錯...白烏鴉話我地呢班地獄靈魂喺地獄應該係不死身...我地受過咁多苦痛之後...依家有機會脫離苦海，返回人間...一定會搏盡全力，衝入去傳送門... 白烏鴉：家姐，咁樣打落去，真係唔係辦法，得阿達先可以幫到我地手... 達：想...用我左手嘅能力...？ 白烏鴉：無錯！ 達：真係要殺死喲靈魂...? 白烏鴉：我係要你消滅度傳送門！ Zip噏劇場 Game of Eden 第二季 小島篇 第89回「地獄·6」 阿攝 飾演 阿達 鄧添樂 飾演 盧葦 阿O 飾演 裘智 小白 飾演 白烏鴉 盧地 Kity 飾演 黑烏鴉 盧天 Cfun 飾演 盧綠 Alton 飾演 K Area DB Island 編劇及製作 阿攝 音樂 BEAT FRIDAY (Minty, thing, Interval, Kaji, Nutty） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 達：（讀白）當我猶豫緊點處理嗰四位跪喺我面前嘅地獄靈魂嘅死亡請求嘅時候… *鐵閘打開聲效 達：（讀白）地獄嘅其他鐵櫃都相繼打開…總供有36個靈魂走咗出嚟！ 盧葦：白烏鴉！我褲代入面有野震緊…我拎出嚟一睇！係嗰條黑色羽毛啊！ 白烏鴉盧地：黑色羽毛自己郁？唔通係！ *羽毛箭聲效 達：（讀白）嗰條黑羽毛飛出盧葦隻手衝咗上天！我哋咁多個一齊向羽毛飛去嘅方向一望！嗰條羽毛衝緊去上空嘅一個黑點！而嗰個黑點越嚟越大！大到我地終於睇到係咩啦！ *拍翼聲效 白烏鴉盧地：一隻黑烏鴉，一隻半黑半白烏鴉！即係家姐同姨甥仔都落咗嚟！ 達：（讀白）嗰條黑色羽毛飛返去黑烏鴉嘅翼度，然後兩隻烏鴉全身發光！ *變身聲效 達：（讀白）佢哋喺離地幾米嘅高度變身做人型！黑烏鴉優雅著地行前，不過半黑半白烏鴉就喺變身嗰瞬間企唔穩，仆咗係地！ *仆倒聲效 達：（讀白）我哋咁多個人同一時間望去跌落地，披住半黑半白羽毛袍嘅人，佢慢慢企返起身…估唔到竟然係佢！ 盧葦：阿哥！點解你可以變身嘅？ 盧綠：阿葦！仲有舅父！同埋阿達！我終於都見到你哋咁多個啦！ 裘智：綠仔！你發生咗咩事啊！點解你會做咗渡靈者嘅？ 黑烏鴉盧天：本身我諗住自己一個人落嚟地獄搵阿達，但盧綠話就算死都要跟埋嚟，叫佢行火路又會太慢，所以我叫阿仔借件袍比佢，令佢暫時以渡靈者嘅身份落嚟地獄。 盧綠：人生第一次飛…原來…係咁難控制架喎… 白烏鴉盧地：家姐，唔影響生死中途島嘅運作嘛？ 黑烏鴉盧天：放心，啞鈴洲一切運作如常。不過點解所有鐵櫃都打開咗？地獄靈魂全部都走晒出嚟？仲有，呢四個靈魂做咩跪咗係阿達你前面？ 達：我落嚟地獄之後…打開咗裘智嘅鐵櫃，然後遇到白烏鴉仲有盧葦，但係有十個靈魂走咗出嚟，仲要求我用左手嘅激光殺死佢地… 白烏鴉盧地：阿達情非得已之下，殺咗一個。 *步行聲效 盧綠：咁…呢三十幾個慢慢行緊埋嚟嘅地獄靈魂呢？ 盧葦：就喺你哋出現之前，所有裝有地獄靈魂嘅鐵櫃全部自己打開… 白烏鴉盧地：可以咁做嘅只得一個人，就係人工智能K Area DB Island  黑烏鴉盧天：或者係同阿爸一齊創造呢個區域嘅今敏。 *推金屬鐵板聲效 達：新呢班地獄靈魂合力掹走咗啲鐵板，救返頭先比我哋困住嘅靈魂…依家佢哋集合埋一齊… *步操聲效 達：10、20、30…40…一共有四十個戴住魂鎖嘅地獄靈魂以我哋咁多個人做中心，圍成一個大圈！ 白烏鴉盧地：家姐…我哋依家點做好啊？ 黑烏鴉盧天：好簡單，將佢哋困返去鐵櫃入面，繼續佢哋地獄之路！ 白烏鴉盧地：盧綠、盧葦、裘智，你哋三個都幫手！ 盧葦：咁仲跪緊嗰四個？ 白烏鴉盧地：我哋解決咗呢四十個先，到時再睇下阿達佢點做啦！ 黑烏鴉盧天：（大叫）咁多位靈魂，我係第二任村長盧天，亦係渡靈者，即係你哋死後第一位見嘅人，相信每一位都應該認得我，仲有我細佬。當你哋隻手掂轉世之樹得到黑色樹葉嗰一刻，就代表你哋要喺地獄完成懲罰，先再可以繼續轉世。雖然我唔知點解你哋被放咗出嚟，但作為渡靈者，我有責任維持啞鈴洲嘅運作。所以，我作出最後嘅呼籲，希望你哋自行入返屬於你地獄鐵櫃！ 達：（讀白）黑烏鴉講完之後，所有地獄靈魂互相對望，跟住，上方高處傳嚟一把熟悉嘅聲音！ K Area DB Island : 各位地獄靈魂，今日玄武大帝特赦！ *傳送門打開聲音 K Area DB Island : 我係東面開咗一度傳送門，只要穿過嗰度門，就可以返迴人間復活！或者，你哋都可以選擇接受玄武童子希望之光嘅祝福！永遠離開呢個世界，返回玄武大帝嘅懷抱！ 黑烏鴉盧天：（大叫）喂！人工智能！你做咩落擅自落呢個指令啊！ 白烏鴉盧地：（大叫）人工智能！你同我出嚟！等我修理你！ 盧綠：睇嚟…人工智能已經失控… 盧葦：依家唔係講呢啲野嘅時候啊！你地睇下，班地獄靈魂有動靜啦！ 達：啱啱跪喺我面前嗰四個靈魂，即刻起身跑去東面嗰度傳送門啊！ *奔跑聲效 黑烏鴉盧天：細佬，盧綠，跟我過嚟！ *變身聲效 *拍翼聲效 盧綠：（讀白）我一聽到黑烏鴉盧天嘅指示，即刻變做烏鴉型態，同佢地兩個快速飛向嗰四位靈魂！而白烏鴉飛得最快，就喺距離佢地幾個身位嗰一刻！白鳥鴉再變返做人型！ *變身聲效 盧綠：（讀白）然後佢借助高向低俯衝嘅力度，左右腳各自踢低兩個靈魂！ *重擊及倒地聲效 盧綠：（讀白）佢雙腳落地之後，再一踎，用左腳做重心，一個轉身，貼住地面掃出右腳！一下就掃跌咗第三個靈魂！之後左腳膝頭由屈曲變成伸直，撐起成個人！然後轉用右腳做重心腳，借撐起嘅力度順勢收起左腳，跟住瞄住第四位奔跑嘅靈魂撐出左腳！ *重擊及倒地聲效 盧綠：（讀白）第四個靈魂被白烏鴉盧地踢飛幾米！短短十幾秒！盧地就用幾個動作將嗰四個靈魂擊倒！佢用嘅就係玄武腿法當中幾式！果然係第三任村長！厲害！ *變身聲效 盧綠：（讀白）我同黑烏鴉盧天趕到白烏鴉身邊，變做人型嘅我地望住身後嘅傳送門… 黑烏鴉盧天：呢個傳送門另一邊有啲花草樹木嘅景色，難道係通去百草園嘅？ 白烏鴉盧地：家姐，成件事太古怪同離奇啦... 黑烏鴉盧天：我未聽過有咩玄武大帝特赦，我淨係知道呢班靈魂需要繼續喺度受刑罰，直到指定日期完結為止。 盧綠：太嫲…呢個會唔會係太太公…即係盧零嘅主意？一百八十年嚟一次特赦？ 白烏鴉盧地：如果真係阿爸嘅主意，我哋身為渡靈者應該一早就會知，而唔係有呢位阿達出現，先發生咁嘅事。 黑烏鴉盧天：細佬，你想講因為呢位阿達，所以令到啞鈴洲所有事都失常？ 盧綠：太舅公，我認為阿達…係真心幫我地嘅… 白烏鴉盧地：點都好，我哋首先用全力守住傳送門，阻止想返去人間嘅靈魂！因為若然比佢哋復活，後果更不堪設想！ 黑烏鴉盧天：（大叫）裘智、盧葦、阿達！嗰邊就交比你地啦！ 盧綠：太嫲…太舅公…嗰四個靈魂慢慢爬返起身…然後有二十幾個靈魂向我哋跑緊過嚟啊… 黑烏鴉盧天：（威武）兩位！羽毛箭雨！準備！發射！ *羽毛箭雨聲效 達：（讀白）當黑白烏鴉同盧綠應付緊想返回人間嘅地獄靈魂嘅時候，裘智同盧葦就傾緊有關傳送門嘅事… 裘智：葦仔，你唔好留喺呢度啦，快啲跑過去傳送門返去人間啦！ 盧葦：但係…舅父，我係嚟代你受苦…要返去嗰個應該係你！你可以帶領我哋行得更遠！ 裘智：更遠？（冷笑）葦仔，呢個世界得啞鈴洲，無更多架啦！同埋一切都係第一任村長盧零設計好晒！根本無野值得探索！ 盧葦：但你係第一個搵到另一種靈魂之水製造方法嘅人！ 裘智：咁又點啊？嗰真相係我哋被人框實晒！我哋同我哋喺農場養嘅豬係無乜分別！所以葦仔，聽我講…用傳送門返去，陪我家姐，即係你媽媽！ *步行聲效 達：裘智…盧葦…你哋睇下…有12個靈魂圍住咗我…然後跪喺我面前… 裘智：阿達…你夠唔夠膽用希望之光，送佢哋去玄武大帝身邊啊？ 達：但係…佢哋可能會永遠消失架！ 裘智：佢哋已經做好覺悟，揀咗佢地嘅選擇，咁你呢？ 達：（讀白）我同之前一樣…唔知點算好…頹然坐喺地下…之後其中一個靈魂捉我隻左手掂住佢額頭…佢係一位上咗年紀嘅伯伯…佢笑住想我用左手希望之光幫佢… *激光聲效 Zip噏劇場 Game of Eden 第二季 小島篇 第88回「地獄·5」 阿攝 飾演 阿達 鄧添樂 飾演 盧葦 阿O 飾演 裘智 小白 飾演 白烏鴉 盧地 Kity 飾演 黑烏鴉 盧天 Cfun 飾演 盧綠 Alton 飾演 K Area DB Island 編劇及製作 阿攝 音樂 BEAT FRIDAY (Good Plus, Daydream, Minty, Stuk, Raise) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 白烏鴉盧地：曾經，我覺得死亡係生命嘅完結。我哋啞鈴洲世代嘅傳統儀式係將遺體火化，推出大海，希望靈魂可以回歸玄武大帝身邊。身為盧零嘅二仔，啞鈴洲第三任村長嘅我，當然知道呢個只係一個虛構嘅故事，用嚟掩飾呢個世界嘅運作，好聽嚟講係安撫人心，難聽啲嚟講係控制民生嘅說詞。但我唔介意，因為唯有死亡先可以完結作為盧零嘅仔嘅沉重使命。我做好阿爸同家姐交低比我嘅村長工作，然後期待死亡嘅來臨。 點知…當我過身之後醒返，見到身穿黑色羽毛袍嘅家姐盧天，我先知道死亡對啞鈴洲村民嚟講只係一個過程…而我同家姐就要繼續背負住齒輪嘅角色，生前協助在生嘅村民生活，死後協助靈魂轉世… 見到上天堂嘅靈魂，我無特別高興，因為佢哋只係上到半天堂，歡樂過後，都要輪迴做人； 遇到落地獄嘅靈魂，我無特別難過，因為佢地只要捱過地獄之苦，都可以輪迴轉世。 無靈魂會真正消失。 生於啞鈴洲，困於啞鈴洲。 直到呢一刻，喺我眼前呢位只擁有兩種顏色，由現實世界入嚟嘅阿達，佢左手竟然可以發出激光，將困喺地獄嘅靈魂打到灰飛煙滅… 我望住第一個被佢打散嘅靈魂灰燼…回想返生前出席過嘅葬禮情節，同一樣嘅灰燼飄蕩於半空之中…除咗問佢入嚟嘅目的之外，我腦入面都出現另一個問題，所以當見到嗰四個靈魂跪低喺阿達前面，我就直接問阿達：佢哋…會去邊架？係咪…會永遠消失？ 達：我…都唔清楚啊…我想用黃紙吸返佢嘅…但被依家跪咗喺我面前嘅靈魂阻止咗…你見到我得兩隻色？即係都有全知狀態？你應該感受到呢班靈魂傳遞比我嘅訊息？ 白烏鴉盧地：我感受到…佢哋想你用「希望之光」去解救佢哋… 盧葦：等等先…白烏鴉，仲有呢位阿達…你哋可唔可以解釋發生緊咩事？ 裘智：阿達…你之前自稱自己係玄武童子…咁你即係同玄武大帝有關？ 白烏鴉盧地：裘智…盧葦…唔好意思，根本就無咩玄武大帝…一切嘅神話只係有份創造呢個世界嘅盧零，即係我爸爸去創作出嚟… 裘智：即係…第一任村長盧零先係玄武大帝？ 白烏鴉盧地：「玄武大帝」只係一個象徵，一個故事，一個被你哋去拜嘅像。其實可以叫做飛鳥大帝，或者叫烏龜仙人…只係盧零揀咗叫做「玄武大帝」… 裘智：咁…我哋仲係唔係由深海嘅盧亭進化而成… 白烏鴉盧地：唔係… 裘智：咁…即係好似姐夫所講…呢個世界係虛構嘅… 白烏鴉盧地：咁又唔完全係虛構…至少我哋真係有存在過… 裘智：咁…姐夫所講嘅咩人工智能…又係咩嚟架… 白烏鴉盧地：呢一層，我諗由現實世界嚟嘅阿達去解釋就最清楚。 盧葦：阿達，你之前話入嚟搵我細妹盧婷…又係咩意思？呢個時候，你可以將你所知嘅所有事講曬出嚟未？ 達：（讀白）我望住我身前四位仲繼續跪喺度嘅靈魂，再望住白烏鴉盧地、盧葦同裘智…深吸一口氣，就將我所知嘅所有事，包括 - 現實世界同Game of Eden 嘅關係、盧零嘅背景、佢同今敏創造呢個封閉區域嘅過程、人工智能嘅身份同工作、大凶日嘅事發原因、我點樣遇到盧婷同點樣入嚟、仲有入到嚟之後同盧綠到幾個島嘅經歷都一一講曬比佢哋知。而當中白烏鴉盧地會用佢前村長及渡靈者嘅角色去做補充。用咗好耐嘅時間…我終於都講完！ 而當我一講完，裘智眼神空洞咁企咗係度。過多幾秒，佢枱頭望住我，突然衝去我身前好快咁打咗我一拳！ *急步聲效 *揮拳中拳聲效 *跌倒聲效 盧葦：舅父！你做乜打佢啊？你覺得佢講大話？定係？ 裘智：（冷靜）阿達，你痛唔痛啊？ 達：咁大力！梗係痛啦！ 裘智：葦仔，捉住阿達！擘大佢個口！ 盧葦：舅父，你做咩啊？冷靜啲啦！ 裘智：你唔做，等我做！ *抓泥聲效 盧葦：（讀白）舅父佢抓起一堆泥，然後一隻手撳住跌喺地嘅阿達，另一隻手迫阿達食泥！ 達：喂！裘智！你做咩啊！裘智！ 裘智：快啲同我食咗佢！然後話我知係咩味！ 盧葦：舅父！你唔好咁啦？ 白烏鴉盧地：癲夠啦裘智！你再唔停手，我就用羽毛箭令你收手！ 裘智：我癲？我只係想證明我地同佢哋有冇分別咋！ *達吐泥聲 達：有少少咸，好鞋，同海灘濕咗嘅沙泥無分別！我都話咗，現實世界嘅我同生活喺呢度嘅你地係一樣架！我哋只係活喺兩個唔同空間啫！ 裘智：但你地隨時可以令我哋再有大凶日！同埋你哋可以隨時入嚟！但我哋唔可以出去！呢兩件事，就係我哋嘅分別！ 達：咁至少…你哋真係有天堂、地獄同好實在嘅因果制度…同埋有好靚嘅藍天、白雲同海洋…仲有好清新嘅空氣… 裘智：咁我同你交換啊！ 盧葦：（讀白）舅父無等阿達回應，就轉身行開幾步，跟住就自己一個人背住我哋坐低咗… 白烏鴉盧地：阿達…你係呢百幾年嚟第一個由現實世界入嚟嘅人。除咗島之盡處，向死而生之外，你對呢度一無所知？ 達：我連點樣離開呢度嘅方法都唔知… 白烏鴉盧地：盧葦同裘智要進行換血嘅儀式，佢哋交換血液，由盧葦代裘智喺地獄受罪，咁我就可以帶裘智走。不過裘智依家應該無心情同理智去做呢個儀式… 盧葦：等我同舅父講下… 白烏鴉盧地：盧葦，你話曬都係我後人，我今次用親人嘅身份問多你一次，你知道呢個世界嘅運作之後，都決心要繼續代你舅父喺地獄受苦？ 盧葦：我決定咗嘅事就唔會去改變。等我同舅父溝通一下。 *步行聲效 白烏鴉盧地：阿達，咁你呢？諗住點處置呢四位跪咗喺度咁耐，等緊你用「希望之光」嘅靈魂？ 達：佢哋好似好想得到解脫咁… 白烏鴉盧地：但係…我哋到依家都唔知你打到佢哋灰飛煙滅之後嘅結果會係點…你咁做好有可能破壞呢個區域嘅機制… 達：或者…佢哋會去返生死中途島？ 白烏鴉盧地：又或者佢哋會從此消失喺呢個世界？你左手嘅光究竟係希望定絕望？ 達：嘩…你好似講到我掌握佢哋生死咁嘅… 白烏鴉盧地：實情如此。 達：嘩…好大壓力喎…你…比啲時間我諗下啦！ （讀白）就係我糾結緊應該點做嘅時候…突然又聽到四方八面傳嚟鐵櫃開門嘅聲！ 盧葦：白烏鴉！啲鐵櫃又打開咗！ 達：唔係啲…似係所有啊！你地睇下！有好多靈魂行出咗鐵櫃啊！ 盧葦：10…20…30…有成三十幾個靈魂向我哋呢邊行緊過嚟啊！ 達：係頭先嘅3倍？ 白烏鴉盧地：可以做到呢件事，得人工智能！人工智能！你同我出嚟！ 盧葦：白烏鴉！我褲代入面有野震緊…我拎出嚟一睇！係嗰條黑色羽毛啊！ 白烏鴉盧地：黑色羽毛自己郁？唔通係！ *羽毛箭聲效 Zip噏劇場 Game of Eden 第二季 小島篇 第87回「地獄·4」 阿攝 飾演 阿達 鄧添樂 飾演 盧葦 阿O 飾演 裘智 小白 飾演 白烏鴉 盧地 編劇及製作 阿攝 音樂 BEAT FRIDAY (Fairness, Ignorance, Minty, Independence, Good Plus) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island監控室 莫十三：（讀白）K Area DB Island走咗去執行另一個指令之後，我喺呢個監控室已經有兩日，見住阿達坐住獨角獸離開千獸島飛去另一個島，之然上天堂，再落埋地獄。由於我只係喺2060年收命令將盧零、盧如嘅靈魂傳入呢個封閉區域，其後所有設計都係由今敏負責。我都係到呢一刻先知原來成個封閉區域係設計成咁架... *電子門聲效 今敏：莫十三醫生，呢個啞鈴洲係咪比Area 15嗰個，甚至現實世界嗰個仲美好啊？ 莫十三：咁遲先出嚟見我啊，今敏。你又掛住去黑市做腦像創作師啊？ 今敏：呢個封閉區域咁多腦像比我玩，仲駛乜去黑市呢？ 莫十三：點解你叫K Area DB Island 請我入嚟，究竟做咩呢？我好忙架 今敏：你嘅忙咪又係去三分甜走吧飲酒。入嚟同我聚下舊唔好咩？ 莫十三：我無咩同你傾。 今敏：莫十三好似無莫九咁成熟。我都係鍾意同前輩傾計多啲 莫十三：你係咪屈喺度屈到好悶啊？定太耐無同人類傾計，所以啲態度變成咁啊？我都係鍾意同當年嘅你傾計多啲 今敏：放心，我好快可以變返以前嘅我。你有好好幫我睇住佢嗎？ 莫十三：你都放心。就算我點變，我都係一位醫生。 今敏：有你呢句就得啦。我地就嚟可以睇到呢個封閉區域嘅結局。 莫十三：其實你同盧零想玩啲咩呢？又天堂，又地獄？ 今敏：想挑戰公平同因果，將現實世界好虛無嘅事，喺呢度實體試驗。 莫十三：但呢個制度都係由你地兩個創作出嚟，咁真係公平咩？ 今敏：我地提供一個機制比大家體驗。而結局將會由啞鈴洲村民去決定。 莫十三：咁阿達呢？佢同大家嘅恩怨一啲關係都無架。 今敏：咁就只好怪佢承繼咗D嘅能力。 莫十三：佢依家比啲地獄靈魂鎖頸鎖到就嚟死咁濟，呢啲就係K Area DB Island所講嘅咩「向死而生」？你快啲叫嗰班靈魂放開佢啦。 今敏：我喺嗰堆靈魂嘅腦入面投射咗一個畫面，就係阿達用左手去解救佢地。睇下阿達佢又會點做？ 時間：同日 地點：封閉區域Area DB Island 地獄 達：（讀白）白烏鴉不斷用羽毛箭飛射一個全身充滿肌肉嘅靈魂...而嗰個盧葦就徒手打低另一個手型瘦削嘅靈魂...但仲有兩個擋住佢...而喺鐵櫃走出嚟嘅靈魂太多，我被淨低嗰四個靈魂纏住，仲用手箍實我全身，迫我伸出左手...而犯咗竊聽罪行嘅靈魂，佢雙膝跪地，用手掹走插住佢口同喉嚨嘅箭，用沙啞嘅聲線同我講：救…救下我哋…啊… 救下佢地？ 即係咩意思啊？ 我可以點救啊？ 佢用佢額頭掂實我左手手掌...變咗好似係我用左手捉實佢嗰頭咁...其他4個箍實我手手腳腳嘅靈魂一齊發出低沉同沙啞嘅嗚嗚聲...好似想哀求我做啲乜咁... 跟住接住落嚟嘅畫面…係一瞬間發生： 首先，白烏鴉佢跳起，然後變做烏鴉型態。 *變身聲效 *拍翼聲效 佢拍翼飛上四、五層樓高嘅位置。全身插咗幾支白色羽毛嘅大隻肌肉靈魂顎高頭望住白羽鴉。跟住白羽鴉向佢大大力拍羽俯衝過去！就喺仲有幾米嘅距離，白烏鴉又突然變返人形！ *變身聲效 跟住佢收起左腳伸出右腳！由上而下借助高空衝落嚟嘅加速力同力度！右腳重擊落大隻肌肉靈魂嘅頭度！ *重擊聲效 *身體墮地聲效 大隻肌肉靈魂反應唔切，被佢踢中！然後暈咗喺地面！白烏鴉再即刻大叫！ 白烏鴉：盧葦！你快啲將你面前嘅兩個靈魂拋過嚟！ 達：（讀白）盧葦點頭。然後好快咁跑入擋住佢面前嘅兩個年紀比較老嘅靈魂嘅中間。佢講咗一聲 盧葦：兩位叔父，唔好意思啦！ 達：（讀白）畢竟嗰兩位叔父外貌嘅靈魂年紀比較大，加上四肢仲拖住手扣鐵鏈，行動一定無盧葦咁敏捷。盧葦捉住其中一個叔父靈魂嘅右邊膊頭，好似托米咁將佢孭係背脊，再用力一拋！ *身體墮地聲效 拋到去大隻靈魂嘅附近！另一個叔父輩靈魂嚇到呆咗，想擰轉身跑去我呢邊。點知，裘智原來無聲無息咁跑到佢附近，用力將佢推去盧葦身前！盧葦重施故技，一捉一孭一拋，將另一位叔父靈魂拋去同一個方向！ *身體墮地聲效 白烏鴉：裘智，你快啲燒著張黃紙，然後拋去呢三個靈魂嘅上空！ *火柴聲效 *燒黃紙聲效 達：（讀白）裘智按住白烏鴉嘅意思去做，即刻點火柴燒咗寫上靈魂鐵閘嘅黃紙，跟住拋去嗰三位暈喺地面嘅靈魂嘅上方位置 *變道具聲效 黃紙燒完嗰一刹那，一度好大塊嘅鐵閘今次變咗打橫水平出現喺上空。然後唔駛一秒 *鐵墮地聲效 度鐵閘就打平咁厭住嗰三個靈魂。白烏鴉又跳起，再次發動羽毛箭！不過今次係唔係攻擊其他靈魂，而家一堆羽毛箭分成四個方向，分別就係鐵閘嘅四個角位！ *羽毛箭聲效 *擊中金屬聲效 啲羽毛箭變咗好似釘咁，狠狠地釘實大鐵閘嘅四角位！一張鐵閘黃紙一瞬間就可以壓制住三個靈魂！果然係第三代盧氏嘅村長 - 盧地！ 盧葦：阿達，我哋三個依家嚟救你！ 達：（讀白）我仍然被四個靈魂纏實全身，被佢哋強行伸出我左手，掂住犯咗全身中箭，犯咗竊聽罪靈魂嘅額頭。 *全知狀態聲效 我開咗全知狀態，竟然同一時間感受到呢十個靈魂傳送比我嘅訊息！就係 - 救…救下我哋…啊… 同之前竊聽罪靈魂口講嘅說話係一樣…不過仲有下一句，就係：我哋…好辛苦…好想離開呢度… 你地想離開咪離開囉！捉實我做乜啫！ 當我大叫咗呢一句，竊聽罪靈魂傳送咗一個畫面比我…就係我左手發光…將佢打到變成粉末… 原來佢哋想用我嘅左手離開呢度…但咁做真係好咩？話晒佢哋生前都係人喎… 竊聽罪靈魂繼續跪嘅同時，用雙手揸實我左手，不斷比一個訊息我，話我隻左手係希望之光！ 被纏實嘅我並無其他方法…唯有順佢意啦！ *激光聲效 我左手發出激光，激光由佢嘅魂鎖開始，然後擴展到全身…對上一次對有生活嘅物體用D嘅能力…係對獨角獸嘅時候…但獨角獸佢好拼命爭扎，但呢個竊聽罪靈魂竟然無，仲笑住同我講 - 多謝… *灰燼聲效 佢變成灰燼嘅同時，纏實我嗰四個靈魂終於都鬆開手，望住飄散喺空中嘅靈魂灰燼… 我諗住拎一張黃紙出嚟吸受靈魂粉末…但一個少女外貌嘅靈魂面帶笑容伸手阻指…我眼白白見住竊聽罪靈魂係我面前消失咗！ 呢個時候，白烏鴉帶同裘智、盧葦行到我身邊想保護我… 白烏鴉：你得兩隻色…同我阿爸盧零一樣，都係現實世界嘅人？你入嚟有咩目的？ 達：係…我入嚟係想搵盧婷…因為佢係你哋大凶日嘅時候，去咗Area 15… 盧葦：即係舅父所講，呢個世界以外，仲有另一個世界嘅諗法，係真嘅！ 達：（讀白）當我想回答佢哋嘅時候…嗰四個靈魂同一時間跪地！ *身體墮地聲效 然後發出同一個訊邊：用左手嘅希望之光！解救佢哋！ Zip噏劇場 Game of Eden 第二季 小島篇 第85回「地獄·3」 阿攝 飾演 阿達 彬臣 飾演 莫十三醫生 Ant 飾演 今敏 鄧添樂 飾演 盧葦 小白 飾演 白烏鴉 盧地 編劇及製作 阿攝 音樂 BEAT FRIDAY (Daydream,  Minty, Likewhere, Drunken Koiwa, Fairness) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 *行火路聲效 盧葦：（辛苦）呢條…就係舅父所行嘅火路…呢啲痛…就係佢曾經所受過嘅苦… 白烏鴉：盧葦，好快就會到火路嘅盡頭，之後就會進入你舅父裘智嘅地獄。 盧葦：白烏鴉…你送過幾多村民落地獄啊…？ 白烏鴉：唔好用過「送」字。佢哋會落地獄，全因佢哋生前犯過嘅錯。我只係陪佢哋行最後呢段路。 盧葦：點解你好似無咩感情嘅？ 白烏鴉：生於啞鈴洲，死於啞鈴洲。世界嘅組成，一切因果嘅定數，都唔係由我決定，我亦唔能夠控制以及左右到大局。既然係咁，我只好做好本份，維持呢個世界嘅運轉。所以，盧葦，我問你最後一次，你真係願意代你舅父受罪？ 盧葦：係… 白烏鴉：依家返轉頭仲嚟得切架喎。 盧葦：如果舅父輪迴轉世，一定可以帶領我哋行得更遠… 白烏鴉：縱使一切已有定數，最後會徒勞無功，都唔會後悔？ 盧葦：除咗盧氏村長以外嘅人，都應該有權知道呢個世界嘅真相。舅父選擇做雀仔而唔係豬，就由我去幫佢繼續飛。 白烏鴉：雖然我唔同意你嘅選擇，但我尊重你嘅決定。我哋就快到火路嘅盡頭啦。 盧葦：（讀白）白烏鴉講完之後，我哋再行多幾百步，就到達火路嘅盡頭。火路嘅末端連接住一大片暗紅色嘅土地。 白烏鴉：呢一片暗紅色嘅土地就係地獄區域。你見唔見到一個個被鎖鏈鎖住嘅鐵櫃？鐵櫃入面，就係落地獄受苦嘅靈魂。 蘆葦：鐵閘上面有一個木牌，寫住年份同罪行…即係佢哋要受苦到指定年期先可以轉生？ 白烏鴉：無錯。我哋依家就要搵出你舅父嘅鐵櫃。而佢嘅罪行就係偷飲靈魂之水。 蘆葦：咁佢地一行完火路會直接進入鐵櫃定係？ 白烏鴉：佢地拎住屬於佢哋嘅黑色樹葉，到火路嘅盡頭，黑色樹葉就會轉化成鐵櫃，困住佢哋。 盧葦：照你咁講，佢哋應該唔會知有幾多個靈魂，以及睇唔到我哋面前嘅一個好似廢墟嘅鐵櫃情景？ 白烏鴉：無錯。喺呢個地獄受苦，係孤獨而漫長。 盧葦：但係你望下嗰邊。點解係遠處，好似有人向我哋呢邊跑過嚟？ *全知狀態聲效 白烏鴉：有十一個有三種顏色嘅靈魂…但有一個只係得兩種顏色？無可能架！ *變身聲效 盧葦：喂！白烏鴉！ *拍翼聲效 盧葦：（讀白）白烏鴉由人形瞬間變成烏鴉型態，向嗰班靈魂飛過去！而我就用盡全力向嗰個方向跑過去！ *奔跑聲效 盧葦：（讀白）我越跑越近！跟住就見到幾百米外有一個熟悉嘅身影！就係舅父！但佢全身充滿大大少少嘅疤痕！手腳都鎖上鐵鏈同手扣…究竟佢受咗咩苦？另外，佢身邊有一個我從來未見過嘅人係佢旁邊。而佢哋身後有十個頭戴頭箍，手腳被鐵鏈鎖住嘅靈魂追住佢地。其中一個身上插住好多枝箭嘅靈魂就衝向佢地！跟住，白烏鴉又變返人型！ *變身聲效 盧葦：（讀白）佢變身落地嘅同時，射出三枝白色羽毛箭！直插落嗰個靈魂！佢應聲倒地！ *墮地聲效 盧葦：（大叫）舅父！ 裘智：葦仔！你都落咗嚟地獄！？點解會咁架？ 白烏鴉：佢諗住落嚟代你受苦。但點解你會離開到鐵櫃？ 裘智：因為呢個叫阿達嘅人…佢話佢係另一個世界嚟嘅…仲自稱自己係「玄武童子」添！ 白烏鴉：你究竟係邊個？點解可以入到嚟啞鈴洲？ 達：我下次寫定啲傳單…見一個派一個…但依家唔係重逢或者講身世嘅時候啊！你哋睇下！嗰個中羽毛箭嘅靈魂企返起身，仲向我哋行埋嚟啊！ *步行聲效 白烏鴉：從來無靈魂可以離開鐵櫃！究竟發生咩事！ *羽毛箭聲效 *中箭聲效 盧葦：無用喎！佢好似完全唔覺得痛！繼續向我哋行緊過嚟！ 裘智：除咗佢，其他9個靈魂都慢慢向我哋行過嚟！白烏鴉，咁依家點算好啊！ 白烏鴉：自我做呢個職位以嚟，我都未遇過呢件事…或者家姐會知道點處理… 達：你家姐盧天仲有盧綠喺天堂嗰度，你有冇辦法通知佢哋啊？ 盧葦：阿哥上咗天堂？ 達：我哋不如解決咗眼前嘅情況先再慢慢問啦！ 盧葦：火路！我哋沿返住火路咪可以行返去生死中途島囉！ 白烏鴉：每個靈魂離開火路踏上地獄嗰一刻，條火路就會消失。所以，呢個方法行唔通。 裘智：呢十個靈魂嘅眼神都好空洞…好似只係識向前行過嚟… 達：既然係咁…唯有用呢招… *撻火柴聲效 *燒黃紙聲效 達：（讀白）我拎出一張寫住靈魂鐵閘嘅黃紙，然後黃紙一燒。我將燒緊嘅黃紙拋過去全身中箭嘅靈魂前面。黃紙燒完嘅一刹！ *道具變出聲效 *鐵閘插落地聲效 達：（讀白）一度大鐵閘擋住嗰個靈魂！但我得返4張鐵閘嘅黃紙…但仲有九個追住我哋…唔知咁做得唔得呢…？ *撕紙聲效 達：（讀白）我將一張黃紙撕咗4份，變成4小張，然後比咗3張佢哋，我自己拎住一張。 裘智：阿達…你想？ *火柴燃燒黃紙聲效 達：我哋快啲衝去最近我哋嗰個靈魂嗰度，然後我哋四個一人一邊，包圍住佢！ 白烏鴉：你想用鐵閘圍住佢？ 達：無錯！我唔知得唔得，但都試下啦！ 裘智、盧葦、白烏鴉：知道！ 達：（讀白）最近我哋嗰個靈魂…雙目被木簽撐開…應該就係之前我見到犯咗姦淫嘅靈魂…我哋四個喺黃紙燒完之前，白烏鴉再飛出十幾枝白色羽毛箭，插實佢雙腳，暫時鎖住佢嘅行動！ *羽毛箭聲效 *箭插中身體聲效 達：（讀白）我哋四個圍住佢，而佢望實我，雙手伸出嚟，好似想捉住我咁。但我地四個無理會，東南西北四個方位圍住佢，然後黃紙燒完！即刻變出四度較矮嘅鐵板！圍住咗佢！ *道具變出聲效 *鐵閘插落地聲效 盧葦：成功咗啦！你仲有幾多張黃紙啊？ 達：仲有3張…但仲有8個靈魂… 白烏鴉：咁一係我哋引佢哋集中埋一齊，然後再用呢個方法圍住佢地？ 裘智：我諗唔駛啦…你哋睇下，嗰八個靈魂，連同頭先全身中箭嘅靈魂，已經集中埋一齊，向我哋行緊埋嚟… 達：嗱…呢度有三枝火柴，三張黃紙…你哋一人一張 盧葦：咁你呢？ 達：我去收返頭先嗰度大鐵閘，咁就可以一人一邊圍住佢地！大家執生！ *奔跑聲效 達：（讀白）我跑過去，諗住用左手激光消滅嗰度大鐵閘，然後用黃紙吸收返佢。點知我一跑，嗰九個靈魂竟然向我衝過嚟！ *羽毛箭聲效 *插中身體聲效 白烏鴉：阿達，我用羽毛箭插住佢地對腳，你快啲過去！ 達：知道！ 盧葦：白烏鴉！你啲羽毛箭好似唔夠力，佢哋用手拔返啲羽毛箭出嚟！ 白烏鴉：唔好睇少我啊！ *羽毛箭聲效 *插中身體聲效 裘智：有一個全身肌肉嘅靈魂檔晒啲羽毛箭！而另外八個靈魂繼續衝向阿達度！ 盧葦：等我去救佢！ *奔跑聲效 盧葦：（讀白）我跑過去呢個叫阿達嘅男人度。我唔可以比佢有事！因為得佢知道發生咩事，同埋我都好想知道另一個世界嘅真相！一個身型比較瘦削嘅男人靈魂轉身望向我，佢擘大口，我發現佢口入面條脷被剪咗一半…佢發出嗚嗚聲…雖然我唔知佢生前發生咩事…但真係唔好意思啦！我向前模仿寸刺嘅動作刺出右手！ *身體擊中倒聲效 裘智：（大叫）葦仔，快啲去救阿達！佢被啲靈魂圍緊！ *羽毛箭聲效 盧葦：（讀白）白烏鴉嘅羽毛箭射極都唔能夠令嗰個大隻靈魂移動半步…而淨底嗰7個靈魂，有兩個行緊去我嗰度…其他嗰五個就包圍住阿達！ 阿達！小心啊！ *步行聲效 達：（讀白）呢個被圍嘅情況…同喺千獸島好似…佢哋都係有目的咁攻擊我…唔通有人控制緊佢地？但依家唔係諗呢啲野住…目前最重要係點樣甩身！不過，完全唔識打架嘅我！完全無計可施…佢哋五個已經前後左右包圍住我，仲同一時間衝向我度！ *奔跑聲效 達：（讀白）我唔夠佢地快！一個手長腳長嘅靈魂撲跌咗我！另外兩個捉住我對手，一個抱實我條腰，硬生生將我由地下拉上嚟！我被箝制住，完全郁唔到！ 跟住，全身插住箭嘅靈魂慢慢行埋我前面…突然雙膝跪地…嗰隻捉實我用嘅靈魂用力將我隻左手移到插住箭嘅靈魂嘅額頭嗰度… 然後呢個全身插住木箭嘅魂，佢用手掹走插住佢口同喉嚨嘅箭，用沙啞嘅聲線同我講：救…救下我哋…啊… Zip噏劇場 Game of Eden 第二季 小島篇 第85回「地獄·2」 阿攝 飾演 阿達 阿O 飾演 裘智 鄧添樂 飾演 盧葦 小白 飾演 白烏鴉 盧地 編劇及製作 阿攝 音樂 BEAT FRIDAY (Belongs, Daydream, thing, Minty, Kaji) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 達：（讀白）喺呢個一望無際嘅暗紅色空間，有好多個貨櫃，成嗰感覺好似大型回收場或者垃圾場...而空氣之中漓漫住一陣陣嘅血腥味...原因好簡單，因為每個貨櫃入面都有一個被罰落到嚟呢個地獄受苦嘅靈魂...只有還清罪孽，先可以離開呢一度… 但係我可以點樣離開呢？唔通我要好似佢地一樣，贖罪先可以返去出去？ 我不斷行，被其中一個貨櫃吸引咗我行過去，因為貨櫃嘅鎖上面嘅木牌寫住： 1800314-21800314 罪行：偷飲靈魂之水 呢個應該就係盧綠嘅舅父。 成個地獄我唯一比較認識嘅人就係佢，但佢都係第一次落地獄...加上佢完全唔知我嘅存在...就算搵佢...對我離開呢度都好似無幫助... 我望住摸一袋入面最後一個紙紮人仔道具，再望一望呢個鎖... 我決定... *激光聲效 *鎖鏈斷裂聲 我左手掂住鎖鏈，發出激光將鎖鏈打成粉碎，然後我本住用得唔好嘥啲精神，用黃紙一吸！ *吸受聲效 將鎖鏈粉末吸受。黃紙啲背面寫住地獄之鎖。個名好似好勁咁。不過重點喺我面前嘅鐵閘...鎖鏈消失之後，我面前我鐵閘自動咁緩緩打開... *鐵閘開聲效 *拍鐵閘聲效 但同一時間，四方八面都傳出大大少少嘅拍鐵閘聲！唔通其他靈魂咁敏感，聽到呢道閘開咗？ 不過我無理會，慢慢行入屬於盧綠舅父嘅受罰鐵櫃入面... *踩泥漿聲效 鐵櫃太黑...我未睇到究竟有嗰空間有幾大...但呢度嘅血腥味仲勁過出面...因為成地都係血...佢被人罰啲咩？咁殘酷呢？ *踩到硬物聲效 嘩，我踩到啲咩啊？嘩！隻手指！仲識郁嘅？你...係裘智...? 然後，我隱約聽到有一把怪聲喺我身後，即係入口處嗰度傳嚟，講：你…係邊個啊…？ 隻斷指不斷郁，擺脫咗我嘅手，跌咗落地，跟住我聽到好多物體喺地面拖住面郁動嘅聲！ 把怪聲再問我問題，不過方向就轉變咗，去到我正下方！ 怪聲：你...係...其...他..烏鴉？ *畫火柴聲效 達：（讀白）我用火柴嘅光一望，竟然見到一個半裂開嘅嘴加皮膚有好多疤嘅頸係度講野！我嚇到即刻跌咗個火柴！ 怪聲：啊！ *物件拖泥漿聲效 *身體黏合聲效 物體喺地面郁動嘅聲越嚟越快！而我靠鐵閘外僅餘嘅光線，望到漆黑中嘅鐵櫃入面，見到有腸、肝、肺、手臂等等嘅部位向鐵櫃中間嘅位置郁動！ 而當我再等多一陣，就有一個人喺漆黑嘅空間慢慢向我行過嚟！ *腳步加拖鐵鏈聲 而把怪聲接近回復正常！我終於可以聽得清楚裘智講嘅說話！ 裘智：（少少虛弱）點...解...你知道...我叫...裘智...? 達：因為...我識得盧綠... 裘智：（少少虛弱）你...係...咪...玄武... 達：Er…我呢...點解釋呢... 裘智：我唔駛報夢…啊！ *鐵鏈聲效 *身體拉扯聲效 裘智：（痛苦叫聲）啊！！！唔...好... 達：裘智！你點啊！啲鐵鏈點解扯得咁緊嘅！？ 裘智：（痛苦叫聲）啊！我未...問...啊！！！ *身體跌地聲效 達：（讀白）裘智就咁喺我面前被鐵鏈扯爆咗！噴到我成身都喺血！佢身體各個部位爆到周圍都係！好似睇緊Cult片！我真係嚇到呆咗！ 呢個就係裘智偷飲靈魂之水嘅懲罰！ 裘智：（怪聲）玄武...大...帝... 達：裘智！你唔好講野住啦... *物件拖泥漿聲效 達：（讀白）裘智好似頭先咁，好用力想將散落喺四周圍嘅身體黐返埋一齊。不過今次仲碎過上次！所以花費嘅力氣同時間好似要更多！而我…就企喺原位慢慢睇佢「回復」人形…然後…我又聽到怪聲喺我身後傳過嚟… 裘智：（怪聲）我有...好多野...想問...你 達：裘智！你唔好完整嘅黐返自己嘅身體，如果唔係！又爆架啦！ *捉住物品聲效 達：（讀白）突然有隻手腕捉住我腳踭！我再朝住佢手指指住嘅方向望，見到一個有鼻有口有耳仔有喉嚨但無眼嘅頭對住我，頭頂仲戴緊魂鎖。然後兩隻眼珠分前一左一右彈住地咁跳入嚟，再彈跳入埋眼嘅凹位！眨幾眨之後，就可以正視我！ 裘智：（虛弱）我知…或者我淨係維持頭部圓整…唔黐返身體、內臟同四肢…可能唔駛分屍… 達：咁…裘智…你知唔知道…點樣離開地獄啊？ 裘智：（虛弱）你咁問…即係你同我一樣…都係落嚟地獄受苦嘅人…但係…我點解未見過你嘅…你係…？ 達：我…叫阿達…係… *鐵鎖拉扯聲效 裘智：（痛苦）唔…唔好 達：（讀白）裘智嘅頭又喺我面前被分裂成碎片… *物件拖泥漿聲效 跟住，我又見佢好努力咁黐返埋自己…佢呢個懲罰…根本就好似西西弗斯推石頭咁…裘智一黐返埋身體就會被懲而爆裂…正確啲嚟講…呢度所有落地獄嘅靈魂…都同西西弗斯一樣…受無間嘅苦… 裘智：（怪聲）你…唔係…啞 達：裘智鍥而不捨…好快黐好聲帶，然後再拼湊返自己嘅頭顱… 裘智：（虛弱）鈴洲…嘅…人…你係…邊…個…？ 達：我…係嚟自另一個世界嘅人…我叫阿達… 裘智：（虛弱但興奮）另…另一個…世…界…？（痛苦）又….又嚟啦… *鐵鏈聲效 達：裘智！你快啲將你嘅手手腳腳移到嚟我度！ 裘智：（痛苦）點…點解…啊？ 達：快啲啦！ *物件拖泥漿聲效 達：（讀白）裘智雖然好痛苦，但佢好用力將啲手手腳腳黐埋，然後再移動到去我附近。 *激光聲效 達：（讀白）跟住，我好快咁發射出四度激光，將鎖住佢四肢嘅鐵鏈射到粉碎。然後再拎出一張黃紙，一下吸受晒鐵鏈嘅粉末！ *吸受聲效 裘智：（虛弱）點…點解…你… 達：我一陣先解釋比你聽 *鐵鏈飛出聲效 *鐵鏈緊扣聲效 裘智：（虛弱）無…無用啊…啲鐵鏈…又嚟… 達：啲鐵鏈又飛出嚟鎖返裘智啲手手腳腳…唔通，要離開呢個鐵櫃先得…？ 裘智：（痛苦）啊…我嗰頭… 達：頭？啊！我知啦！係佢頭上面嘅魂鎖！ *跑動聲效 達：裘智！合埋眼！ *發射激光聲效 *物件被打散聲效 達：再用黃紙一吸！ *吸受聲效 達：黃紙背面…寫住靈魂之鎖… 裘智：你…係點…做到…架… *物件拖泥漿聲效 達：（讀白）裘智頭頂嘅魂鎖消失之後，身體拼合嘅速度快咗好多。不過四腩都仲有新嘅鐵鏈鎖住，我諗住行去幫佢嘅時候 *腳步聲效 裘智：咩…叫另一個世界啊…？你…唔講清楚…唔好行埋嚟啊… 達：我….阿達，係玄武大帝派嚟嘅玄武童子！ 裘智：玄武童子…？ 達：係啊…所以我識咁做囉 *激光儲力聲效 達：我可以令你困住嘅鐵櫃消失！ *激光發射聲效 達：不過…由於比較大塊！所以要啲時間… *物件粉散聲效 *吸入聲效 達：（讀白）黃紙吸咗成塊鐵皮之後。外來暗紅嘅光線照亮原本漆黑一片嘅鐵櫃。 裘智：呢個…就係地獄嘅全貌？鐵櫃入面…全部都係？ 達：無錯。全部同你一樣，只不過服刑嘅時間唔同。裘智，勉強嚟講，你自由啦！ 裘智：即係…我可以離開呢度？ 達：嗯…但問題係…我哋點樣可以一齊離開呢度？返到去中途島呢…？ *鐵鎖解鎖鐵效 x10 達：裘智…你聽唔聽到啊？ *開鐵門聲效 x 10 *腳步聲效 達：喺我哋附近10個鐵櫃嘅鎖自動打開咗…鐵閘緩緩打開…跟住，困喺入面嘅靈魂…頭戴魂鎖，緩緩咁行出鐵櫃…佢哋同一時間望住我同裘智…其中一個身被插住好多箭嘅靈魂仲向我哋跑過嚟！ *羽毛箭聲效！ Zip噏劇場 Game of Eden 第二季 小島篇 第84回「地獄·1」 阿攝 飾演 阿達 阿O 飾演 裘智 編劇及製作 阿攝 音樂 BEAT FRIDAY (Minty, Nutty, thing, Surface, Phase) 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年3月14日 地點：封閉區域Area DB Island 地獄 *火燃燒聲效 *行路聲效 裘智：（辛苦）究竟...仲要行幾耐啊... 白烏鴉：對比你即將要受嘅苦，呢條火路好快行完，放心。 *跪地聲效 裘智：（辛苦）幾辛苦都好，都唔可以跌咗手上面嗰塊黑色樹葉啊，若然樹葉被燒，我就會永遠喺呢個世界消失 （讀白）由細到大，我以為啞鈴洲就係世界嘅中心同全部。但原來死咗之後...人會轉世、上天堂或落地獄...咁上天堂，係咪代表可以回歸玄武大帝身邊，可以再見佢一次，知道呢個世界所有嘅真相呢？ 可惜...因為我因為三番四次偷飲靈魂之水，得到嘅懲罰就係要落地獄... 而就算我對腳被火燒得有幾痛...都唔可以跌咗手上嗰塊寫住「1800314-21800314」嘅黑色樹葉...因為為咗真相...無論要等幾多年...要受幾多苦...我都頂到嘅... *火燃燒聲效 *行路聲效 裘智：（讀白）而我忍住痛，不斷向前行，旁邊嘅光就越嚟越少…前面嘅路被火路映照住…我只係見到一大片暗紅色…再過咗無幾耐… 白烏鴉：到啦。 裘智：到？呢度就係地獄？呢度得我一個？即係得我一個人落地獄？ 白烏鴉：每個人都有自己嘅地獄。裘智，我地有緣再見。 *變身聲效 *烏鴉叫聲及拍翼聲效 裘智：喂！ *拍翼聲效 裘智：（讀白）白烏鴉乜都無講，就變身飛走咗…而我手上面嘅樹葉無端端發光，跟住 *鐵閘聲效 有好幾塊大鐵閘飛過嚟圍住咗我！我被困咗喺一個啱啱搭建嘅鐵櫃入面！ *拍打鐵櫃聲效 喂！究竟發生咩事？ *鐵鏈聲效 跟住有鐵鏈飛過嚟鎖住我手手腳腳，再綁實我全身！然後每條鐵鏈係唔同方向拉扯！好痛啊！最後我頂唔到啦！ 啊！！！ *身體跌聲效 我身體好似一個跌散咗嘅積木咁…身體撕裂…散落喺唔同嘅位置…咁係咪代表…我再死多一次？ 但最奇怪嘅係…我全身雖然好痛…但無失去知覺…我仲可以慢慢控制身體唔同嘅部位…向我頭嘅方向慢慢行過嚟…用咗唔知幾耐嘅時間…我終於可以黐返埋成個身體… 跟住我聽到一把聲… 神秘聲音：裘智，你依家可以報夢比一個人。 裘智：報夢？ 神秘聲效：無錯。係你搵返自己身體嘅一個獎勵。 裘智：我…我要報夢比綠仔！ 神秘聲效：好。 裘智：（讀白）跟住係我面前有一度光！我見到綠仔喺第三個島啊！即係佢去咗搵我？咁葦仔呢？唔得啦！我即刻同佢講！ （夢中聲效）綠仔！快啲救阿葦！千祈唔好比佢飲靈魂之水啊！ 盧綠：（夢中聲效）舅父！我可以喺邊度搵到你地啊！ 裘智：（夢中聲效）總之你一直向西行！一直行！唔好停啊！！！ *中斷聲效 神秘聲效：時間到。裘智，你要繼續受罰！ *鐵鏈聲效 裘智：（讀白）鐵鏈又飛過嚟！將我身體拉扯！ *身體跌地聲效 裘智：（讀白）我身體又被分撕到唔同角落…不過唔緊要！只要我黐返埋身體，我就可以再報夢！ 而有上次經驗，我今次快咗好多！跟住！ *身體黏合聲效 神秘聲音：裘智，今次你想報夢比邊個？ 裘智：我想見葦仔！ 神秘聲音：好。 *發光聲效 裘智：（夢中聲效）葦仔！你唔好瞓啊！ 盧葦：（夢中聲效）舅父…我係咪…發夢啊… 裘智：（夢中聲效）綠仔好快會嚟救你！你唔好瞓啊！ 盧葦：（夢中聲效）阿哥…？ 裘智：（夢中聲效）撐住啊！葦仔！ *中斷聲效 神秘聲效：時間到。裘智，你要繼續受罰！ *鐵鏈聲效 裘智：（讀白）又要被鐵鏈分屍！但唔緊要！我忍得到！ *身體跌地聲效 裘智：（讀白）我唔可以令葦仔同綠仔重蹈我嘅覆轍！我要快啲黐返我嘅身體！ *身體黏合聲效 神秘聲音：裘智，你今次又想報夢比邊個？ 裘智：我要見葦仔！我想確定佢無事。 神秘聲音：裘智，對唔住。盧葦已經死亡。你唔可以報夢比佢。 裘智：（讀白）聽到呢個消息…我成個人跪咗喺地上面…個心好痛…如果唔係我咁想知道呢個世界嘅真相，唔係咁想見玄武大帝，就唔會出事，葦仔就唔會去咗搵我…佢就唔會步我後塵…點解…點解會發展成咁！ 神秘聲音：裘智，你想報夢比邊個？ 裘智：我…想報夢比綠仔… *發光聲效 裘智：（夢中聲效）綠仔… 盧綠：（夢中聲效）舅父！你依家係邊啊？ 裘智：（夢中聲效）綠仔…舅父依家安好…你唔駛擔心我啊… 盧綠：（夢中聲效）舅父！我睇咗你留比我同阿葦嘅日記！我終於知道你發生咗咩事啦！ 裘智：（夢中聲效）綠仔…你唔好再理我嘅事，全心全意做村長，好好照顧啞鈴洲所有村民啦… *中斷聲效 神秘聲效：時間到。裘智，你要繼續受罰！ *鐵鏈聲效 *身體拉扯聲效 裘智：（讀白）今次被鐵鏈拉扯，雖然都痛，但都唔及我心咁痛…係我累死咗葦仔…係我嘅錯… *身體跌地聲效 裘智：（讀白）今次鐵鏈拉扯嘅力度更大…身體被扯嘅部位更多…除咗四肢同內臟…我條脷同眼球都抵受唔住鐵鏈嘅力，被扯離身體原本嘅位置…今次真係全身都散晒… 雖然我知我用力黐返埋身體之後，可以再報夢…但我已經無呢個需要…就等我用呢個全身分離嘅狀態…喺呢個地獄受苦…直到黑色樹葉上面寫住嘅嗰一日 - 2180年3月14日…2千年後嘅世界…會係點嘅呢…？ 我緩緩合埋雙眼…承受住肉體分離嘅痛…慢慢迎接呢一日… *拉鐵窗聲效（細聲） *腳步聲效（細聲） 呢個係…咩聲…？ 可惜我左眼被扯散到係最遠嘅角落，至於右眼… *腳踩到物體聲效 *裘智大聲痛叫 裘智：（讀白）啊！我隻手指！！ 達：嘩…隻手指… 裘智：（讀白）呢把聲…唔係白烏鴉…咁係邊個呢？ 我好用力想好似之前咁黐返自己嘅身體！然後再好用力將兩隻隔得好遠嘅眼球移到去同一個方向！我見到嘅光越嚟越多…之後就見到一個對腳…跟住就有一個人拎起我隻手指，同我講 達：仲識郁嘅？你...係裘智？ 裘智：（讀白）雖然我未組合返自己嘅喉嚨，但我都好用力去問呢條問題 - （怪聲）你…係邊個啊…？ Zip噏劇場 Game of Eden 第二季 小島篇 第83回「裘智的地獄」 阿攝 飾演 阿達 阿O 飾演 裘智 小白 飾演 白烏鴉 編劇及製作 阿攝 音樂 BEAT FRIDAY（Half, Before Dawn, Extension, Fairness, Other Love, Minty） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 地獄 達：（讀白）喺真正天堂跌落咗全黑空間，再被神秘聲音趕走出嗰個全黑空間之後…出現喺我面前嘅係一個望唔到盡頭嘅暗紅色區域…唔同角落都有唔同嘅鐵櫃…感覺似一個無垃圾味嘅大廢墟…或者回收場…究竟出口係邊？我點先可以返上去第三個島？ *全知狀態聲效 我打開全知狀態，呢個空間同所有鐵櫃都係墨綠色嘅編碼，某啲鐵櫃入面困住咗人…每個都係由墨綠色遊戲碼加灰色人工智能碼包住靈魂顏色碼…佢哋應該係呢個封閉區域Area DB Island 嘅村民… *步行聲效 我行到去其中一個有人被困嘅鐵櫃前面，鐵櫃外面有一個人咁高嘅閘，閘嘅視線位置有一個類似防盗眼嘅視窗，閘嘅開鎖位被鐵鏈鎖住…鎖上面掛住一塊木牌…木牌上面無刻到名，不過有一組數字…上面寫住：1090730-3090730 罪行：竊聽… 我再用全知狀態感受呢個鐵櫃入面嘅情況…我感知到入面有一個人不斷跑嚟跑去…好似閃避緊一啲野… 為咗更了解實際情況…我決定打開鐵閘上面嘅視窗，我緩緩拉開之前，入面嘅人好似感受到呢度有光，所以好快咁跑過嚟！ 唔駛幾秒，有個雙眼貼住視窗位置，再用力拍拍打鐵閘…好似哀求我開閘放佢出去咁！ 當我猶豫之際 *射箭聲效 有兩枝箭喺鐵櫃中央射過嚟！ *射穿物件聲效 然後從嗰個人嘅後腦射穿咗佢雙眼… 但佢好似無辦法開口講野… 只係發出「嗚…嗚…」嘅哀鳴聲音… 我被呢個畫面嚇呆咗… 再過咗幾秒…呢個人連眼帶箭被拖返去中央位置… 我行前幾步…透過視窗望入去鐵櫃…用全知狀態提高眼嘅感光度…先睇到呢個人喺鐵櫃入面不斷避開從四方八面射過嚟嘅箭…剛才被射傷嘅雙眼仲插住兩枝箭…而其他嘅箭瞄住嘅…除咗係佢嘅眼睛，仲有耳朵… 佢又再察覺到我望住佢，所以又急步跑過嚟我呢邊！我唔想再睇到佢被射盲嘅畫面…所以好狼心咁閂埋鐵閘嘅視窗！ 佢不斷拍打鐵閘…但我…乜都做唔到… 仲轉身離開咗… *步行聲效 我轉身行到另一個鐵櫃…閘上面嘅木牌寫住： 711219 - 2711219 罪行：姦淫 全知狀態下…我淨係感受到有一個人懸浮喺鐵櫃中央位置…剛才犯咗竊聽罪嘅人…就被萬箭穿眼同耳…呢呢個犯姦淫之罪嘅…又會受到咩懲罰呢？ 我好奇打開鐵閘上面嘅視窗…見到係鐵櫃嘅左邊嘅盡處竟然有一個投影…而投射緊嘅畫面…有一個男人非禮緊一個年輕女子…而嗰個男人嘅樣…正正就係懸浮喺鐵櫃正中央嘅男人！佢雙目被木籤撐開，雙目發紅，眼嘅血管爆烈！不斷流出血眼淚！而佢四肢被鎖上鐵鏈…整個人郁唔到…依家係封閉區域180年…唔通佢已經被綁咗喺度109年？木牌上寫住2711219…即係要過多91年，佢先可離開地獄？ *步行聲效 呢度有咁多個鐵櫃…但凡木牌有寫上日期同罪行嘅…都係犯咗事落咗地獄受苦嘅村民… 如果係咁…盧綠嘅舅父咪都會喺其中一個鐵櫃入面？ 我再行去另一個鐵櫃…木牌上面寫住950922-19950922… 罪行係傲慢、嫉妒、憤怒、怠惰、貪婪、暴食、色慾…即係犯晒七宗罪… 我打開鐵閘上面嘅視窗一睇… 發現嗰一個罪人被鐵鏈鎖住，同一時間被施以七種不同嘅酷刑…分別有： 。被不斷餵食不明液體…餵到個肚嚴重發漲… 。被利刀不斷切害身上嘅肥肉… 。眼睛同上一個鐵櫃嘅罪人一樣…被木籤撐開，重複翻睇自己強暴罪行嘅經過… 。但同一時間，原來佢企喺一個不斷轉動嘅巨輪入面，好似倉鼠咁要不斷跑動！ 。隔咗一段時間…會有不明物體潑去佢塊面度…令佢本來五官端正嘅樣貌即時被毁… 。跟住視窗嘅投映內容由不雅嘅強暴畫面變成佢同另一個女人結婚…一家幾口開心嘅景像… 。最後佢大叫一聲！我感受到佢嘅憤怒…但巨輪加速…佢被迫要跑得更快！ 然後呢個循環不斷循環…要直到1900年後…先會完結… 呢個就係盧零同今敏所設計出嚟…善惡賞罰分明嘅世界… 我深深咁透咗一啖大氣…如果現實世界同封閉區域Area DB Island 一樣…有天堂同地獄…又會點呢？ 啱啱嗰三個受罰嘅靈魂…如果被懲罰嘅時候，反省自己，知道過錯…可唔可以有另一個結局… 我望住我左手掌毛嘅交叉疤痕…諗返起之前被困喺鐵櫃嘅一個說話： 「贖罪。希望佢兩個女可以為佢糾正錯誤。而依家呢種能力落咗係你手上。」 創造者康希望佢兩個女用「D」嘅能力幫佢贖罪，究竟係咩意思？D for delete…可以刪除Game of Eden 嘅任何事物…咁佢想佢兩個女幫佢刪除啲咩呢？ *步行聲效 我邊諗邊行…行到其中一個鐵櫃前面，木牌寫上：1800314-21800314 罪行：偷飲靈魂之水 咁佢咪即係盧綠嘅舅父？ Zip噏劇場 Game of Eden 第二季 小島篇 第82回「罪與罰」 阿攝 飾演 阿達 Harry 飾演 裘雪 Alton 飾演 k Area DB Island 編劇及製作 阿攝 音樂 BEAT FRIDAY（Half, Rain or Shine, Drunken Koiwa, Round and Round, Minty） 封面設計 Followmelikeblack 時間：180年9月22日 地點：封閉區域Area DB Island 百草園 裘雪：（剛剛蘇醒）依家係幾多點…我暈咗有幾耐呢？要快啲返去睇凱安先得！ *頭痛叫聲 *全知狀態聲效 裘雪：點解…我面前嘅景像全部都變晒一點點嘅！啲花草樹木全部都係墨綠色碼！而嗰條有奇怪符號嘅蛇就係墨綠色加灰色碼！而我對手仲有我嘅身體！竟然有三隻色！ 唔通中毒大深！所以對眼出咗事！ *傳送門聲效 K Area DB Island：唔係中毒，而係改變緊你嘅身體結構啫 裘雪：（驚恐）你…係邊個！點解你得灰色碼架？點解你會無端端喺我眼前面出現架！ K Area DB Island：條蛇嘅頭上面有「ᚨ」（音：Ansuz）同「ᚲ」（音：Kenaz）嘅盧恩符文，分別代表知慧、知識同創造。裘雪你被佢咬到，應該會醒咗好多架？唔同程式出錯？ *數據傳輸聲效 裘雪：等等…只係我啱啱蘇醒，頭腦一時未運行得順暢啫。你係人工智能K Area DB Island，係嗎？ K Area DB Island：無錯！裘雪你被呢條蛇咬中，真係最好嘅安排啊！你知唔知啊，雪嘅英文係 裘雪：我知，係snow。我哋下一步要點做？ K Area DB Island：除咗你，仲有一個人會被蛇咬到，我哋搵埋佢就可以進行呢一個循環嘅最終計劃啦！ （TBC） Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

 時間：180年9月22日 地點：封閉區域Area DB Island 未知空間 達：（讀白）當我係真正天堂撳咗盧零手上木箱嘅空白盧恩符文「」之後，喺我腳下嘅雲海竟然出現咗希臘第5個字母δ（Delta）外形嘅圖案！而呢個圖案發光！之後嗰光圈變黑！形成黑洞！我就跌咗落去！嚟到呢個全黑嘅空間… 當我想郁嘅時候… *鐵鏈鎖上聲效 我四肢都鎖上鐵鏈！仲被佢扯上半空！無論我點掙扎都無用！跟住我聽到一把怪聲 迷之聲音：傲慢、嫉妒、憤怒、怠惰、貪婪、暴食、色慾。你犯咗邊一宗罪？ 達：你係邊個！ 迷之聲音：你想我喺邊一個？ Gigi：阿達，你已經登入咗Game of Eden超過 24小晚 Sabraina：阿達，我想問Gigi係一個點樣嘅女仔？ 4哥：Christoper，你要記住兩樣野...第一...唔好加入404…第二...唔好搵阿J報仇.. 迷之聲音：以上幾把聲，你最想聽到邊一把聲？ 達：喺呢個封閉區域做到偷取人地記憶嘅呢個能力...你就係今敏？定係K Area DB Island啊！ 迷之聲音：如果我話比你知，我係佢呢？ J：4哥，Thank you for your service！ 達：啊K！！！ *激光聲效 *鎖鏈聲效 迷之聲音：咁容易憤怒，點得架 達：（讀白）當我想用左手激光嘅能力...我左手五隻手指都被佢用鐵鏈鎖住咗！由於我要掂到物件先可以發動到刪除嘅激光...所以...呢一刻...我乜都做唔到... 迷之聲音：咁樣會唔會可以令你平息靜氣呢？ 盧婷：哥哥！你點啊？ 達：你究竟想點！ 迷之聲音：落到嚟地獄，當然要令罪人得到應有嘅懲罰！ 達：我都無罪！！！ 迷之聲音：第一 - 為咗尋找失蹤爸爸嘅下落，擅自駭入各個機關嘅電腦 第二 - 協助 K 404 繼續運行收藏組織404 第三 - 偷取創造者康留比佢兩個女嘅八卦型全盒 達：你咁樣偷取我嘅記憶，又唔係罪咩？ 迷之聲音：呢個唔係偷取，而係進行審判必需要有嘅過程！加上你一登記做玩家，就知道呢啲資料嘅最終用途啦。 達：呢個就係 π 先生資助創造者康嘅真正目的？ 迷之聲音：第四 - 偷取 “D” 嘅能力，傷害 K404嘅手 第五 達：等等！係Gigi、Sabrina授權比我使用八卦型全盒，我都唔知到會有Area Zero同 “D”嘅能力！ 迷之聲音：第五 - 偷取平安包印台，開啟Area 15通去封閉區域Area DB Island嘅隱藏機關，更令盧婷被九頭海蛇捉走 達：我根本就唔想嘅！一切都係由八卦型全盒開始！ 迷之聲音：就係因為你嘅好奇心，所以就打開唔屬於你嘅秘密？即係犯咗貪婪之罪！然後引發出一連串嘅連鎖效應！ 達：你咁講，不如話阿康係一切嘅根源！ 迷之聲音：第六 - 擅自闖入封閉區域Area DB Island，偽做「玄武童子」嘅身份，令本來平靜嘅封閉區域造成恐慌 達：我都係想救盧婷！完全唔知會變成咁！ 迷之聲音：正如你爸爸為咗救你，解決晒所有收藏組織404嘅成員。 *掙脫鎖鏈聲效 達：你唔好再提我阿爸同阿J！！！ *激光聲效 *鎖鏈聲效 迷之聲音：憤怒。七宗罪之一。 達：咁阿康咪都有罪！傳聞佢想將佢太太嘅意識喺遊戲度重現，所以先會有Game Of Eden！而Pi先生都係因為想借呢個技術控制整個城市，先會有唔同嘅組織出現！如果講罪！佢地先係罪嘅源頭！由佢地嘅慾望，衍生咁多事件！ 迷之聲音：阿達，你腎上線素急升，心跳同呼吸加快。不如，我再幫下你啊 J：4哥，Thank you for your service！ 達：都話唔好再提我阿爸同阿J！！！ *激光聲效 *鎖鏈斷裂聲效 *墮地聲效 迷之聲音：憤怒，令你由原本要掂到事物先可以令佢消失，變成只要你想，就可以發出刪除嘅激光。D 係你身上代表 dark，而你手上delete呢個能力，將會好危險 達：所以，你唔想消失嘅，就即刻放我出去！ 迷之聲音：阿達，有人認為人一出生就有罪。有人認為人性本惡，而善良係一種選擇。呢個世界有咁多人，每一個人每日要做咁多個選擇，每個選擇都有機會形成無五挽救嘅蝴蝶效應。 達：所以…我只係做我認為「正確」嘅事… 迷之聲音：正確？你「正確」嘅標準可以代表嘅多人？而每個世代善惡、道德、正義嘅標準都唔一樣。所以有事都係一體兩面。正如創造者阿康創造Game of Eden，都估唔到會發展成咁。所以，佢創造咗「D」嘅能力。 達：但呢個能力本身係屬於佢兩個女…其實創造者康有咩目的？ 迷之聲音：贖罪。希望佢兩個女可以為佢糾正錯誤。而依家呢種能力落咗係你手上。 *鐵門打開聲效 迷之聲音：正如莫菲斯醫生所講，Game of Eden 遠比你所想嘅複雜。我唔能夠係短時間分析出你嘅本質同得到「D」嘅能力嘅後果。只係呢種能力因為各種巧合嘅情況之下落咗係你手上。唯有交比命運嘅安排啦。阿達，你可以走啦。 達：（讀白）當我想講野嘅時候，一道怪力送咗我出嚟！而我一擰轉身，就發現我剛才身處係一個貨櫃… 我再四圍望，喺我面前係一個望唔到盡頭嘅空間，天同地都係暗紅色，而最恐怖嘅係呢個空間有數之不盡嘅黑色鐵櫃…每個鐵櫃都刻有一個編碼… 呢個…就係封閉區域Area DB Island 嘅地獄… Zip噏劇場 Game of Eden 第二季 小島篇 第81回「罪與地獄」 阿攝 飾演 阿達 Harry 飾演 裘雪 編劇及製作 阿攝 音樂 BEAT FRIDAY（Minty, Fairness, Round and Round, Rain or shine, Daydream） 封面設計 Followmelikeblack 時間：180年9月22日 地點：封閉區域Area DB Island 百草園 裘雪：（讀白）凱安飲完靈魂之水之後…不斷發燒…身體更出現異常情況…佢皮膚竟然生出魚嘅鱗片…我整走一塊佢就生返一塊…呢個情況真係從未見過…可惜安放喺觀星閣嘅典籍被我燒毁咗…我又唔敢問仁叔…因為一旦比村民發現凱安嘅病情…我怕佢哋會誤會佢係被玄武大帝懲罰…然後做出一啲傷害凱安嘅事…所以，我獨自出去百草園，希望可以搵到合適嘅藥草，去醫治凱安… 但其實…我毫無頭緒…所以，我唯有搵我所認知嘅草藥，拎返去混合配搭，睇下有無機會可以整到一種可以醫治到凱安嘅藥物…同時去摘啲迷幻蘑菇…希望可以緩和凱安嘅痛… 而當我採摘迷幻蘑菇嘅時候…我竟然聽到… *蛇叫聲效 百草園只係得各類昆蟲…而蛇亦只會喺千獸島出現…點解呢度會有蛇呢？ 仲有…呢條蛇嘅頭上面有啲奇怪嘅符文…我從來無見過呢種蛇！ 不過唔緊要，蛇膽都係藥材嘅一種，所以我決定活捉佢！話唔定對凱安嘅病有幫助！ *拔出匕首聲效 *蛇快速移動叫聲效 哎喲！ 我唔夠佢快！被佢咬到隻手！ *斬殺蛇聲效 就喺佢咬實我手臂嘅時候，我唔理咁多！為求自保，我一刀解決咗佢！但佢對牙好有力…傷口好深… *啜毒聲效 傷口呈瘀黑色… 啲毒上得好快…我個腦…聽到好多怪聲啊！呢啲係咩聲嚟架？ *數據傳送聲效 Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 第四個島 真正天堂 盧綠：阿達！撳啦！ 達：唔撳！ 盧綠：嚟啦！撳啦！ 達：唔撳！ 盧綠：你都試咗兩次囉，唔差在試多次啦！ 達：就係撳完木箱上面嘅盧恩符號，你嘅祖先 - 盧零嘅木箱打開咗兩次，兩次都係彈條蛇出嚟！嚇死我啦！ 盧綠：我再一次應承你，我唔會再比條蛇走甩！ 達：黑烏鴉，不如你諗下你阿爸同啲蛇有咩關係仲好啦！ 黑烏鴉盧天：關於蛇...我淨係諗起玄武大帝同九頭海蛇嘅戰鬥故事...但我哋三個都知道，九頭海蛇只係我阿爸創造出嚟嘅故仔，令村民敬拜並非真實嘅玄武大帝。 達：頭先已經有兩條飛咗出嚟...你地係咪想我儲齊九條？到時就唔係九頭海蛇，而係九條海蛇禍害人間啦 黑烏鴉盧天：阿達，我媽媽成為獨角獸之後，能夠管理整個啞鈴洲嘅動物，呢一層你唔駛操心 盧綠：而唯一知道真相嘅方法，就係嘗試 達：嗱，一陣呢個木箱變咗潘多拉盒子，你地唔好怪我啊 盧綠：潘多拉？邊個嚟架？ 黑烏鴉盧天：我相信又係阿達居住嘅現實世界嘅其中一個神話或傳說故事。 達：對上兩次，我每撳一個盧恩符號，盧零嘅頭同左右膊頭都係有一把火，撳咗三次集齊三把之後，佢身後嘅生命之樹石碑，上面嘅圓圈會因應我撳嘅符號而發光。所以我今次決定唔撳呢24個盧恩符號啦 盧綠：阿達，你係咪開緊玩笑啊？唔撳又點開到木箱呢？ 黑烏鴉盧天：盧綠，你再咀嚼一下阿達講嗰番說話，思考下佢嘅重點？重點係呢24個 達：無錯！我地眼見有24個盧恩符文，但其實盧恩符文總共係有25個！ 盧綠：但個木箱得24個凸出嘅符文，咁第25個呢？係邊啊？ 達：呢個世界由無到有，由一片黑暗嘅混沌到充滿光嘅一切，所以最後一個盧恩符文就係「無」，即係空白 盧綠：無？空白？即係唔駛撳？ 黑烏鴉盧天：我諗阿達嘅意思係有24個凸出嚟嘅字，同時應該會有凹咗嘅位置。 達：第25個盧恩符文叫做「 」（讀音：Wryd），但一個空白符號，而字嘅出處同北歐神話中編織命運嘅諾恩三女神（Norns）有關。 呢三姊妹掌握咗人類嘅命運，甚至能預告諸神、巨人以及侏儒嘅命運，同時亦係司掌法律嘅女神。它代表著過去、現在、未來之間嘅聯繫，以及因果關係同無限可能性。 盧綠：咁你摸唔摸到凹咗嘅位置？ *摸木箱聲效 達：摸到！分別係左、右同底部各有一個一隻手指咗大咁長嘅凹位！ 黑烏鴉盧天：所以，你諗住三次都撳曬第25個盧恩符文？ 達：係啊，既然上兩次我地好有計劃咁撳，出到嚟都係蛇。咁不如今次交比命運去決定啦 *機關啟動聲效 X 3 *著火把聲效 X 3 *燈熄左聲效 盧綠：但係...原本石碑上發緊光嘅生命之樹圖案！無曬光，變返一開始嚟最普通嘅石碑啊！ 黑烏鴉盧天：阿爸手上嘅木箱無任何異樣...但係...阿達你...腳下面... *發光聲效 達：嘩！做咩事我腳底嘅雲層，會由原本白色，變成有條光圍住我嘅？ 盧綠：太嫲！你望下阿達腳底嘅光圈圖案！似啊似舅父頭頂上嗰個？（被打斷） 黑烏鴉盧天：似啊！係魂鎖嘅圖案！ 達：咁咪即係...同第五個島應有嘅希臘字母 - δ（Delta）嘅外形一樣！ *魔幻聲效 盧綠：魂鎖圖案完成！阿達你腳底嘅圖案有啲七彩嘅光走嚟走去！ 黑烏鴉盧天：阿達，好古怪，你快啲跳出嗰圈！ 達：係！ *跑跳聲效 達：死啦！嗰圈跟住我郁啊！我跳唔到出嚟！ *魔幻聲效 盧綠：個圈由七彩光突然變咗黑色啊！ 黑烏鴉盧天：（緊張）阿達！捉住我隻手！ 達：係！知！ *達跌落黑洞並大叫 盧綠：（緊張大叫）阿達！！！！！！（*拖長幾秒，整回音效果） 達：（回音）救...命...啊...（越嚟越細聲） 黑烏鴉盧天：等我嚟！ *變身聲效 *拍翼聲效 *撞地聲效 *變身聲效 黑烏鴉盧天：（痛叫）啊！ 盧綠：太嫲...你變身遲咗一步...個黑圈無咗...阿達都...消失咗... 黑烏鴉盧天：可惡！就係遲咗嗰一步！ 盧綠：太嫲...頭先嗰黑圈外形同舅父嘅魂鎖咁相似...你覺得阿達會唔會跌咗去...地獄呢...? 黑烏鴉盧天：我地...只有一個驗證方法... Zip噏劇場 Game of Eden 第二季 小島篇 第80回「空白的盧恩符文」 阿攝 飾演 阿達 Cfun 飾演 盧綠 Kity 飾演 黑烏鴉 編劇及製作 阿攝 音樂 BEAT FRIDAY（Accent, Cross, Minty, Kaji） 封面設計 Followmelikeblack *達（回音）大叫 *墜地聲效 *達大聲痛叫 達：（讀白）呢度黑到乜都睇唔到...咁似入咗去Area 0嘅時候咁！ *鐵鏈郁動聲效 *鐵鏈鎖上聲效 達：（讀白）做咩我手手腳腳會被鎖鏈鎖住咗架！ *鐵鏈拉扯聲效 達：（讀白）我仲被佢拉咗上半空！ *投映機聲效 達：（讀白）喺我身後有一度光射去我前面嘅空間...形成一個白色圓圈...我見到自己大字形被鎖鏈吊起嘅倒影... *鐵鏈拉扯聲效 達：（讀白）啊！嗯！唉...無論我點拉扯...我都逃走唔到... *收音機調效頻道聲效 達：（讀白）然後...有一把好古怪嘅聲問我以下呢條問題 迷之聲音：傲慢、嫉妒、憤怒、怠惰、貪婪、暴食、色慾。你犯咗邊一宗罪？ Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 第四個島 真正天堂 達：（讀白）盧恩呢個字源自古日耳曼語，解做「秘密」，或者「隱藏的智慧」。最早可以追溯到公元2世紀，好多北歐民族都用佢嚟紀錄資訊，當中尤其以維京人最具代表性。到咗中世紀晚期嘅歐洲，北歐語言同文字被拉丁字母取代，令盧恩文字失去日常溝通嘅功能，反而向神秘學方面發展。 而盧恩文字同北歐神話嘅眾神之王奧丁有關。傳說奧丁將自己倒吊喺世界之樹，身受長矛嘅刺傷，用自己做祭品，將自己獻祭比自己，九日九夜之後佢向下望，終於盧恩文字由自己身體釋放出嚟，散落地上。 而當我同盧綠仲有黑烏鴉由半天堂行到嚟真正天堂嘅時候，喺真正天堂嘅盡頭發現一個有四層樓高嘅石碑，石碑上面刻有一棵倒轉嘅生命之樹，九枝樹幹分代表唔同嘅意思，而喺最低代表王國嘅圓圈前面有一位無生命跡象嘅老人家，亦係黑烏鴉盧天嘅爸爸，有份創造呢個封閉區域Area DB Island嘅盧零。佢盤膝而坐，雙手拎住一個印有24個盧恩符文嘅木盒... 黑烏鴉盧天：我完全唔明白阿爸嘅用意...人工智能話適當嘅時候，我就會知道。而我一等就等咗80年。 盧綠：（用力聲效）咦！啊！（索氣聲）無論我點用力，個木箱都打唔開嘅！ 達：（讀白）我用全知狀態一睇，見到眼前無論石碑、盧零屍體定木箱，都有人工智能編碼...所以我好奇是旦撳咗一個類似「M」嘅盧恩符文 *機關啟動聲效 達：竟然成功撳到機關！石碑上嘅生命之樹圖案更好似著咗燈咁發光！ 黑烏鴉盧天：唔通...要現實世界嚟嘅人...先可以啟動阿爸嘅機關？阿達，你撳嗰個符號有咩意思架？ 達：24個盧恩符文入面，有兩個嘅形狀同英文「M」好似。一個係排第19嘅「ᛖ」（音：Ehwaz）；另一個係排第20嘅「ᛗ」（音：Mannaz），好似兩個「P」一左一右面對面咁。 盧綠：阿達，嗰24個盧恩符文，分3行，每行8個咁排列，你撳嗰個好似係第20個？ 達：咁即係「ᛗ」（音：Mannaz），意思係人類。 *著火把聲效 黑烏鴉盧天：唔單止石碑嘅圖案發光，阿爸頭頂上面有一個拳頭咁大嘅藍色火球！ *火球燃燒聲效 盧綠：但呢個火好有趣，只有形，無實。因為我伸手靠近火球，完全感受唔到熱力。而我仲可以伸身穿過火球添！ 達：喺我生活嘅世界...有一個習俗係話人有三把火，分別頭頂同左、右兩個膊頭，代表每個人嘅精、氣、神所在... 盧綠：如果撳入一個盧恩符文，就可以有一把火...咁係咪暗示要撳多兩個符文，令盧零出曬三把火？ 黑烏鴉盧天：阿達，得你可以撳到木盒上面嘅符文，亦都得你了解現實世界各種宗教。眼前嘅機關就要靠你啦。 達：之但係...仲有23個...要撳邊一個呢？ 盧綠：呢咁多個盧恩符文，有冇邊一個係最勁？ 達：最勁？應該係第4個「ᚨ」（音：Ansuz），佢代表溝通、智慧同靈感，所以會聯想到北歐眾神奧丁或者諸神，亦象徵嘴巴，透過說話、文字傳遞智慧同知識。 *機關啟動聲效 *著火把聲效 黑烏鴉盧天：阿爸右邊膊頭有多一把火啦！ 盧綠：阿達，照依家嘅推斷，撳一個符文就會多一把火，按你所提供嘅習俗，有齊三把火理應會令木盒打開？咁應該撳邊一個符文好？ 達：有一個符文係代表火...就係第6個「ᚲ」（音：Kenaz）。呢個火除咗係基本火焰嘅意思，亦代表知識及照亮，亦象徵創造力。 *機關啟動聲效 *著火把聲效 黑烏鴉盧天：阿爸唔單止左邊膊頭有把火！你地睇下！ *霓虹光管聲效 黑烏鴉盧天：同一時間，生命樹上面嘅左上同右上角嘅圓圈比其他更光！ 達：嗰兩個圓圈代表智慧同理解...我明呢個機關嘅意思啦！第6個盧思符文「ᚲ」（音：Kenaz）代表知識，第4個盧恩符文「ᚨ」（音：Ansuz）代表溝通，相對應咗生命之樹上面較光嘅智慧同理解圓圈！原來木盒嘅符文同石碑上面嘅9大圓圈係有咁嘅關連！ *木盒緩緩打開聲效 盧綠：你地睇下！嗰木盒終於打開啦！ 黑烏鴉盧天：究竟阿爸收埋咗啲乜野秘密喺呢個盒度呢？ *木盒打開聲效 *蛇叫聲效 盧綠：阿達！小心！ 達：（讀白）喺我驚惶失措，連大叫 - 「嘩！咩嚟架！」都叫唔切嘅時候，條蛇已經迅速由木盒飛撲去我面前！！！ *飛出羽毛聲效 黑烏鴉盧天：可惡！只能夠打走到條蛇！殺唔到佢添！ 盧綠：太嫲...條蛇好似直跌出咗天堂範圍...怕唔怕佢會落到其他島上面，咬到村民？ 達：盧綠...呢度咁鬼死高！條蛇跌落去一定死啦！與其關心村民，不如關心下我好過啦... 盧綠：你仲可以講咁多野，即係代表你無事啦。 達：喂，黑烏鴉，你阿爸仲咩要收埋條蛇喺嗰木盒入面架？ 黑烏鴉盧天：如果我知道嘅，就唔駛苦等80年啦... 盧綠：阿達，唯一嘅方法就係再試多次。你睇下，無論石碑、木盒都回復原狀。 達：仲嚟？？？ 黑烏鴉盧天：你唔係好想搵線索架咩？線索就係你眼前。 達：啊，之前喺半天堂見到裘智戴住嗰個頭箍線索又唔見你咁講嘅... 黑烏鴉盧天：好，咁我應承你。當你解開呢個木盒嘅秘密，我就帶你同盧綠落地獄。 盧綠：阿達！咁你仲唔快啲開！ 達：嗱！盧綠！你要企喺我旁邊...一陣有咩彈出嚟！你要幫我擋啊！ 盧綠：得啦！ 達：既然盧恩符文同生命之樹係相對應，頭先啟動咗智慧同理解嘅圓圈，今次試下用另一啲符文組合，睇下木盒出嚟嘅事物會唔會有所不同先。第三個盧恩符文「ᚦ」（音：Thurisaz），成個斧頭象形文字咁，代表巨人、雷神科爾。 *機關啟動聲效 *著火把聲效 黑烏鴉盧天：石碑上嘅生命之樹再次發光！阿爸頭頂上面又有火把！ 達：撳咗雷神不如就撳埋戰神啦～第17個符文「ᛏ 」（音：Tiwaz），外形係一個向上嘅箭咀，係戰神提爾，代表法律、正義、勝利及戰士精神。 *機關啟動聲效 *著火把聲效 黑烏鴉盧天：盧綠，我同你守住喺阿達左右兩邊。 盧綠：知道！ 達：每個生命之樹嘅圈都有一個天使守護住。而第22個盧恩符文「ᛝ」（音：Inguz），上下連住嘅交叉圖案，代表天使，象徵新嘅開始同希望。 *機關啟動聲效 *著火把聲效 *霓虹光管聲效 黑烏鴉盧天：今次到石碑生命之樹嘅左中同右中圓圈發光！ 達：呢兩個圓圈代表慈悲同力量。 *木盒緩緩打開聲效 達：我即刻企去你地兩個後面先！ *木盒打開聲效 *蛇叫聲效 盧綠：又係蛇！（出力叫一聲） *拍走蛇聲效 達：盧綠！你無比蛇咬到嗎？ 盧綠：無事...只係又比條蛇跌出天堂範圍啫... 黑烏鴉盧天：究竟阿爸喺天堂呢個機關...有咩玄機架... 盧綠：阿達...不如你再試多次！最後一次！ Zip噏劇場 Game of Eden 第二季 小島篇 第79回「盧恩符文木盒」 阿攝 飾演 阿達 Cfun 飾演 盧綠 Kity 飾演 黑烏鴉 編劇及製作 阿攝 音樂 BEAT FRIDAY（Daydream, Minty, Fairness, Cross ） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting