Voice of Tibet

དཔལ་ས་སྐྱའི་གདན་ས་ཐེག་ཆེན་ཕུན་ཚོགས་གླིང་ནས་༸གོང་མ་ཁྲི་འཛིན་ ༤༤ པའི་ཁྲི་འདོན་མཛད་སྒོ་དང་འབྲེལ་ནས་སྔ་ཕྱི་མཛད་འཆར་ཁྲོད་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དབུ་བཞུགས་ཐོག་དཔལ་ས་སྐྱའི་གདན་ས་ཐེག་ཆེན་ཕུན་ཚོགས་གླིང་རྟེན་དང་བརྟེན་པ་གསར་བཞེངས་ལེགས་གྲུབ་ཀྱིས་དབུ་འབྱེད་དང་རབ་གནས་བཀའ་དྲིན་མཛད་ཅིང་། དབུ་འབྱེད་མཛད་སྒོའི་ཐོག་ཁྲི་ཆེན་རྡོ་རྗེ་འཆང་མཆོག་གིས་སངས་རྒྱས་ཀྱི་བསྟན་པ་ནི་ལུང་དང་རྟོགས་པའི་བསྟན་པ་གཉིས་ལ་ཐུག་ཡོད་པ་དང་། ལྷག་པར་བྱང་ཆུབ་ཀྱི་སེམས་རིན་པོ་ཆེར་ཉམས་བཞེས་ལ་ཐུགས་འཁུར་བཞེས་དགོས་པའི་ལམ་སྟོན་བཀའ་དྲིན་ཆེ་བ་སྩལ་འདུག དེ་ཡང་ཕྱི་ཟླ་ ༡༠ ཚེས་ ༢༥ ས་མཆོད་ཆེན་མོ་དང་དུས་ཆེན་ལྔ་འཛོམས་ཉིན་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་མཆོག་དང་། ༸སྐྱབས་མགོན༸གོང་མ་ཁྲི་འཛིན་རྣམ་གཉིས། སྒྲོལ་མ་ཕོ་བྲང་གི་འཁོན་གདུང་ཨ་བི་ཀྲྀ་ཏ་བཛྲ་རིན་པོ་ཆེ་མཆོག་གིས་དབུས་པའི་ས་ངོར་ཚར་གསུམ་གྱི་བསྟན་བདག་བླ་ཆེན་རྣམ་པ་དབུ་བཞུགས་ཐོག །རྒྱ་གར་དང་འབྲུག་གི་ས་མཚམས་ས་ཁུལ་ Jaigaon འཇའ་འོད་སྒང་དུ་རྟེན་གཞི་བྱས་པའི་དཔལ་ས་སྐྱའི་གདན་ས་ཐེག་ཆེན་ཕུན་ཚོགས་གླིང་རྟེན་དང་བརྟེན་པ་གསར་བཞེངས་ལེགས་པར་གྲུབ་པའི་དབུ་འབྱེད་གནང་ཡོད་པ་དང་། སྐབས་དེར་མཁན་བླ་འདུས་མང་དགེ་འདུན་འདུས་པ་རྒྱ་མཚོ་དང་ནུབ་བྷང་གྷལ་མངའ་སྡེའི་ནང་སྲིད་དང་རི་ཁུལ་བློན་ཆེན་ Bishal Lama བི་ཤཱལ་བླ་མ་མཆོག །དབུས་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་མཆོག །དེ་བཞིན་བོད་མི་མང་སྤྱི་འཐུས་ཁག་གཅིག་དང་སྐུ་མགྲོན་གཞན། སྦྱིན་བདག་རྣམ་པ། དད་ལྡན་མང་ཚོགས་བཅས་ལྷན་ཞུགས་གནང་ཡོད་པ་མ་ཟད། ཚེས་ ༢༧ ཉིན་གཙུག་ལག་ཁང་ལ་རབ་གནས་བཀའ་དྲིན་མཛད་ཡོད་པ་རེད། དབུ་འབྱེད་མཛད་སྒོའི་ཐོག་༸སྐྱབས་མགོན་༸གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་གིས། དཔལ་ས་སྐྱ་པའི་བསྟན་པའི་སྲོལ་འབྱེད་འཁོད་གདུང་དཀོན་མཆོག་རྒྱལ་པོ་མཆོག་དང་དཔལ་བརྩེ་ཆེན་ཀུན་དགའ་སྙིང་པོའི་དུས་ཆེན་སོགས་དུས་ཆེན་མང་པོ་འཛོམས་པའི་སྐལ་བཟང་གི་གོ་སྐབས་དང་འབྲེལ། དཔལ་ས་སྐྱའི་གདན་ས་ཐེག་ཆེན་ཕུན་ཚོགས་གླིང་རྟེན་དང་བརྟེན་པ་གསར་བཞེངས་ལེགས་གྲུབ་ཀྱིས་དབུ་འབྱེད་དགའ་སྟོན་ལ་འཚམས་འདྲི་སྩལ་ཞིང་། ༸གོང་ས་༸སྐྱབས་མགོན་ཆེན་པོའི་ཐུགས་སྐྱེད་དང་རྒྱ་གར་གཞུང་མང་གཉིས་ཀྱི་བཀའ་དྲིན་ལ་བརྟེན་ནས། རྒྱ་གར་གཙོ་བོར་གྱུར་བའི་བོད་ཀྱི་ཕྱི་ཕྱོགས་སུ་སངས་རྒྱས་ཀྱི་བསྟན་པ་དང་རིས་སུ་མ་མཆིས་པའི་ཆོས་སྡེ་ཁག །རིག་གཞུང་གི་བསྟི་གནས་ཁག །སློབ་གྲྭ་ཁག །གཞིས་ཆགས་གསར་འཛུགས་གནང་བའི་ཁྲོད། ༸སྐྱབས་རྗེ་བདེ་བར་གཤེགས་པ་འཁོན་གདུང་བདག་ཆེན་འཇིགས་བྲལ་རྡོ་རྗེ་འཆང་མཆོག་གི་དགོངས་བཞེད་ལྟར། རིན་པོ་རྣམ་པ་དང་གཙོ་བོ་འཁོན་གདུང་ཨ་བྀ་ཀྲི་ཏ་བཛྲ་རིན་པོ་ཆེས་ཐུགས་འཁུར་བཞེས་ཏེ་ས་གནས་འདིར་གཙུག་ལག་ཁང་གསར་བཞེངས་ཐུབ་པ་དེ་ནི་ངོ་འཚར་ཅན་ཞིག་ཡིན་པ་དང་། བསྟན་པ་སྤྱི་དང་བྱེ་བྲག་ལ་མིག་རྒྱན་དུ་གྱུར་ཐུབ་པ་བྱུང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་འདུག ལྷག་པར་གལ་ཆེ་ཤོས་ནི་སངས་རྒྱས་ཀྱི་བསྟན་པ་ནི་ལུང་དང་རྟོགས་པའི་བསྟན་པ་གཉིས་ལ་ཐུག་ཡོད་པར་དེ་ནི་དགེ་འདུན་གྱི་སྡེ་ལ་རག་ལུས་ཡོད་སྟབས། ལུང་རྟོགས་ཀྱི་བསྟན་པ་རྒྱས་པར་ཐུགས་འཁུར་མུ་མཐུད་བཞེས་དགོས་གལ་དང་། འབྲེལ་ཡོད་སྔ་ཕྱི་བར་གསུམ་དུ་ལས་དོན་གནང་མཁན་ཡོངས་ལ་ཐུགས་རྗེ་ཆེ་ཞེས་བཀའ་སྩལ་ཐོག །དུས་ཆེན་ཁྱད་པར་ཅན་དང་བསྟུན་ནས་དགེ་བའི་ལས་ལ་འབད་སྒྲུབ་དང་། ལམ་ཐམས་ཅད་ཀྱི་སྙིང་པོ་བྱམས་པ་དང་སྙིང་རྗེས་ཀུན་ནས་བླངས་བའི་བྱང་ཆུབ་ཀྱི་སེམས་སྒོམ་དགོས་གལ་གྱི་ལམ་སྟོན་བཀའ་དྲིན་ཆེ་བ་སྩལ་འདུག དེ་བཞིན་ཚེས་ ༢༥ ཉིན་རྒྱབ་༧སྐྱབས་མགོན་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་དབུ་བཞུགས་ཐོག་ནས་ས་མཆོད་ཆེན་མོ་ཚོགས་ཡོད་པ་དང་། ཟླ་བ་འདིའི་ཚེས་ ༢༧ ཉིན་ཐེག་ཆེན་ཕུན་ཚོགས་གླིང་གི་གཙུག་ལག་ཁང་རྟེན་དང་བརྟེན་པ་བཅས་པར་རབ་གནས་བཀའ་དྲིན་མཛད་ཡོད་པ་རེད། རྩ་བའི་དཔལ་ས་སྐྱ་ཕུན་ཚོགས་གླིང་གཙུག་ལག་ཁང་ཆེན་མོ་འདི་བཞིན་བདེ་བར་གཤེགས་པ་༸སྐྱབས་མགོན་བདག་ཆེན་འཇིགས་བྲལ་རིན་པོ་ཆེ་མཆོག་གིས་སངས་རྒྱས་ཀྱི་མདོ་སྔགས་ཀྱི་བསྟན་པ་ཡོངས་སུ་རྫོགས་པ་ནང་བསྟན་ཆ་ལག་དང་བཅས་པ་སྟེ། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་དར་སྤེལ་སྲུང་སྐྱོབ་ཀྱི་མ་འོངས་མི་རབས་གསར་པར་བརྒྱུད་སྤྲོད་བྱ་རྒྱུའི་ལྟེ་གནས་གསར་སྐྲུན་ཞུ་རྒྱུའི་དགོངས་བཞེད་ལས་བྱུང་བ་ཞིག་ཡིན་པ་དང་། ཕྱི་ལོ་ ༢༠༠༦ ནས་ལས་གཞི་དེ་འགོ་འཛུགས་བྱས་ཏེ། ཕྱི་ལོ་ ༢༠༠༩ […] The post ཐེག་ཆེན་ཕུན་ཚོགས་གླིང་གཙུག་ལག་ཁང་ཆེན་མོ་རྟེན་དང་བརྟེན་པ་བཅས་དབུ་འབྱེད་དང་རབ་གནས་བཀའ་དྲིན་མཛད་པ། appeared first on vot.

དེ་རིང་ཕྱི་ལོ་ ༢༠༢༦ ཟླ་ ༡༠ ཚེས་ ༢༦ ཉིན་སྐབས་ ༡༥ པའི་རྡ་ས་ས་གནས་བོད་ཀྱི་བུད་མེད་ལྷན་ཚོགས་ཀྱི་ངོས་ནས་སྐུ་མགྲོན་གཙོ་བོ་བོད་མི་མང་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག་གདན་ཞུས་ཐོག །རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་བོད་བསྟན་སྲིད་མི་རིགས་དོན་དུ་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་བ་ལ་རྗེས་དྲན་མཚོན་སླད། བཞུགས་སྒར་ལྷ་རྒྱལ་རིར་དཔའ་བོ་རང་བཙན་བློ་དགའ་ལགས་ཀྱི་འདྲ་སྐུ་ཞིག་དབུ་འབྱེད་གནང་སོང་།  འདྲ་སྐུ་དབུ་འབྱེད་ཀྱི་མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག་དང་། གཞན་ཡང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་གཙོས་པའི་རྡ་ས་ཁུལ་གྱི་མི་མང་མི་ཉུང་བ་ཞིག་ནས་མཉམ་ཞུགས་གནང་སོང་ལ། སྐབས་དེར་སྐུ་མགྲོན་གཙོ་བོ་མཆོག་གིས།  རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་དྲན་རྟེན་འདྲ་སྐུ་བཞེངས་བསྐྲུན་གྱི་ལས་གཞིར་བསྔགས་བརྗོད་དང་འབྲེལ།  ཕྱག་ལས་འདི་ལྟ་བུ་ནི་དུས་ལ་བབས་པ་ཞིག་ཆགས་ཡོད་སྐོར་གསུངས་སོང་བ་མ་ཟད། བོད་འཐབ་རྩོད་དོན་དུ་ལས་ཀ་ག་རེ་ཞིག་བྱེད་པ་ཡིན་ན་དེར་བོད་མི་སྐྱ་སེར་དབྱེ་བ་མེད་པ་ཚང་མས་ཕྱར་གྲུ་མཉམ་འདེགས་གནང་དགོས་གལ་ནི་ཤིན་ཏུ་ནས་གནད་འགག་ཆེན་པོ་ཡིན་པ་དང་། བོད་པ་ཡིན་ཕྱིན་ཆད་ལ་བོད་ཀྱི་འཐབ་རྩོད་ཐོག་བསམ་བློ་ངེས་པར་དུ་ཡོད་དགོས་གལ་སོགས་གསུངས་སོང་། རྩ་བའི་སྐབས་ ༡༥ པའི་རྡ་ས་ས་གནས་བོད་ཀྱི་བུད་མེད་ལྷན་ཚོགས་ལྟ་བུ་ཡིན་ན་ད་ལྟའི་ཆར་ལོ་ངོ་གཉིས་དང་ཕྱེད་ཀ་ཙམ་གྱི་ལས་ཡུན་མཚམས་སུ་རྒྱུན་ལས་ཆ་ཚང་དགོངས་པ་ཞུས་ཟིན་པའི་གནས་སྟངས་ཞིག་ཆགས་ཀྱི་ཡོད་པ་དང་།  དེ་ཡང་ཉེ་ལམ་དབུས་བོད་ཀྱི་བུད་མེད་ལྷན་ཚོགས་ཀྱིས་གཞུང་འབྲེལ་མ་ཡིན་པའི་ཚོགས་པ་གཞན་བཞི་དང་ལྷན་དུ་རྒྱལ་ས་ལྡི་ལིར་རྒྱ་ནག་གི་སྲིད་འཛིན་ཞི་ཅིན་ཕིང་ BRICS ཚོགས་ཆེན་ཐོག་མཉམ་ཞུགས་ཆེད་དུ་འབྱོར་གྱི་ཡོད་པ་དང་བསྟུན་ནས།  སྲིད་འཛིན་ཁོ་པར་རྒྱ་གར་དུ་བཅར་གྱི་ཡོད་པ་དེར་དགའ་བསུ་འཚམས་འདྲི་ཞུས་པའི་གནད་དོན་དང་འབྲེལ་བ་ཡོད་པ་ཞིག་ཡིན་པ་རེད། འདི་གའི་གསར་འགོད་པས་དེ་རིང་གི་དུས་སྐབས་དང་བསྟུན་ནས་སྐབས་ ༡༥ པའི་རྡ་ས་ས་གནས་བོད་ཀྱི་བུད་མེད་ལྷན་ཚོགས་ཀྱི་ཚོགས་ཟུར་བསྟན་འཛིན་ཀུན་གསལ་ལགས་སུ་གནད་དོན་དེའི་སྐོར་བཀའ་འདྲི་ཞུས་པར། རྡ་ས་ས་གནས་བོད་ཀྱི་བུད་མེད་ལྷན་ཚོགས་ངོས་ནས་དབུས་ཀྱིས་རྒྱ་ནག་གི་འགོ་ཁྲིད་ཞི་ཅིན་ཕིང་ལ་འཚམས་འདྲིའི་གསར་འགོད་བསྒྲགས་གཏམ་སྤེལ་བ་དེ་ས་གནས་བོད་ཀྱི་བུད་མེད་ལྷན་ཚོགས་ཀྱི་རྒྱུན་ལས་ཚོ་དང་གྲོས་བསྡུར་གནང་མེད་པ་མ་ཟད།  དགའ་བསུའི་བསྒྲགས་གཏམ་འདི་ལྟ་བུ་ནི་ཉེ་ལམ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱིས་རང་ལུས་མེར་བསྲེགས་གནང་སྟེ་ཉིན་གྲངས་ཉུང་ཤས་ལས་ཕྱིན་མེད་པའི་དུས་སྐབས་སུ་བཙན་བྱོལ་བོད་མི་ཚང་མས་ཚ་ཚ་འུར་འུར་གྱིས་རྒྱ་ནག་ལ་ངོ་རྒོལ་གྱི་ལས་འགུལ་སྤེལ་བཞིན་པའི་ཁྲོད་དུས་ལ་དཔག་པའི་འཚམ་པོ་མིན་པའི་ཐོག  །དེ་འབྲེལ་དབུས་རྒྱུན་ལས་ལ་གསལ་བཤད་དགོས་པའི་རེ་སྐུལ་ཐེངས་དགའ་ཤས་བྱེད་ཀྱང་དབུས་ཀྱི་ངོས་ནས་ཡ་ལན་གནང་མེད་པ་སོགས་ཀྱིི་རྐྱེན་པས་ལས་མཚམས་བཞག་པ་ཞིག་ཆགས་ཡོད་པ་གསུངས་སོང་། འོན་ཀྱང་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱིས་འདི་གའིགསར་འགོད་པར། དབུས་བུད་མེད་ལྷན་ཚོགས་ཀྱི་རྒྱུན་ལས་རེ་རེའི་ངོས་ནས་ས་གནས་བུད་མེད་ལ་ལས་མཚམས་བཞག་རྒྱུ་མེད་པའི་རེ་སྐུལ་རིམ་པ་གནང་ཡོད་སྐོར་འགྲེལ་བརྗོད་གནང་བ་དེ་ལྟར་ཡང་། དབུས་ཀྱི་ལྡི་ལིར་གསར་འགོད་སྒྲགས་གཏམ་སྤེལ་བ་དེ་ནོར་མེད་སྐོར་གསུངས་སོང་བ་མ་ཟད། གནད་དོན་དེའི་རྐྱེན་པས་མང་ཚོགས་ཁྲོད་སེམས་འཚབ་བྱུང་བར་དགོངས་སེལ་ཞུས་གནང་སོང་། The post བཞུགས་སྒར་དུ་རྒྱལ་གཅེས་དཔའ་བོ་བློ་དགའ་རང་བཙན་ལགས་ཀྱི་རྗེས་དྲན་འདྲ་སྐུ་ཞིག་དབུ་འབྱེད་གནང་སོང་། appeared first on vot.

བཞུགས་སྒར་རྡ་རམ་ས་ལར་བོད་ཁྱིམ་སློབ་ཟུར་སྒྱུ་རྩལ་བ་དམ་པ་གཅུང་པོ་ཚེ་རིང་ལགས་ཀྱི་བྲིས་པའི་རི་མོའི་སྒྱུ་རྩལ་དང་ཁོང་གི་མི་ཚེའི་ལོ་རྒྱུས་དེ་བཞིན་བོད་མིའི་སྤྱི་ཚོགས་དང་དམིགས་བསལ་གཞོན་སྐྱེས་རྣམས་ལ་དམིགས་ནས་པར་རིས་འགྲེམས་སྟོན་གནང་འདུག དེ་ཡང་ཟླ་བ་འདིའི་ཚེས་ ༢༣ ཉིན་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༦ འཁོར་བའི་དུས་དྲན་སྲུང་བརྩི་དང་བསྟུན། སློབ་གླིང་ནང་དང་དེ་ནས་རིམ་པས་རྡ་ས་ས་གནས་འགོ་འཛིན་ཚོགས་ཁང་བཅས་སུ་བོད་ཁྱིམ་སློབ་ཟུར་སྒྱུ་རྩལ་བ་དམ་པ་གཅུང་པོ་ཚེ་རིང་ལགས་ཀྱི་སྙན་གྲགས་ཆེ་བའི་རི་མོའི་སྒྱུ་རྩལ་དང་། ཁོང་གི་མི་ཚེའི་ལོ་རྒྱུས་སྐོར་མང་ཚོགས་ལ་གོ་རྟོགས་ཡོང་ཆེད་ཧྥ་རན་སི་གནད་སྡོད་གནང་མཁན་བོད་མི་ཚེ་རིང་བཟང་པོ་ལགས་ཀྱིས་འགྲེམས་སྟོན་ཞིག་གོ་སྒྲིག་ཞུས་འདུག་པ་དང་། འདི་ག་རླུང་འཕྲིན་ཁང་ནས་ཚེ་རིང་བཟང་པོ་ལགས་སུ་འགྲེམས་སྟོན་དེའི་སྐོར་བཀའ་འདྲི་ཞུས་སྐབས་ཁོང་གིས། ཐེངས་འདིའི་སྒྱུ་རྩལ་བ་དམ་པ་གཅུང་པོ་ཚེ་རིང་ལགས་ཀྱི་སྒྱུ་རྩལ་དང་པར་རིས་འགྲེམས་སྟོན་དེ་ནི་ཁོང་རང་ཉིད་སྒེར་གྱི་མ་སྐུལ་དྭང་བླངས་ཐོག་གནང་བ་ཞིག་ཡིན་ཞིང་། ཕྱི་རྒྱལ་ཁག་ལ་སྒྱུ་རྩལ་བ་དམ་པ་ཁོང་སྙན་གྲགས་ཆེན་པོ་ཡིན་པ་དེ་ལྟར་ཡང་། བོད་པའི་སྤྱི་ཚོགས་ཁྲོད་ཁོང་གི་སྐོར་ལ་རྒྱུས་མངའ་དེ་ཙམ་མེད་སྟབས། གཅུང་པོ་ཚི་རིང་ལགས་ཁོང་འདས་གྲོངས་སུ་གྱུར་ཟིན་ཡོད་ནའང་ཁོང་གི་བསམ་བློ་དེ་བཞིན་བོད་མི་གཞོན་སྐྱེས་རྣམས་ལ་གོ་རྟོགས་སྤེལ་རྒྱུ་གལ་ཆེན་པོར་མཐོང་ནས་དེ་ལྟར་གནང་བ་ཞིག་ཡིན་པ་མ་ཟད། དེ་སྔོན་ཧྥ་རན་སི་ནང་འགྲེམས་སྟོན་ཐེངས་གཉིས་ཙམ་གོ་སྒྲིག་ཞུས་ཟིན་སྐོར་སོགས་འགྲེལ་བརྗོད་གནང་སོང་། རྩ་བའི་གཅུང་པོ་ཚེ་རིང་ལགས་ནི།  ཕྱི་ལོ་ ༡༩༧༩ ལོར་བོད་དིང་རི་ཁུལ་དུ་སྐྱེས་པ་ཞིག་དང་རང་ལོ་ ༤ ལ་སོན་སྐབས་སྤུན་མཆེད་དང་ལྷན་རྒྱ་གར་དུ་བཙན་བྱོལ་ལ་ཕེབས་ནས་རྡ་སྟེང་བོད་ཁྱིམ་སློབ་གྲྭར་འཛུལ་ཞུགས་གནང་། འཛིན་རིམ་བརྒྱད་པ་བར་སློབ་གྲྭར་འགྲིམས་རྗེས་ཐང་འབྲི་སློབ་སྦྱོང་གནང་། དེ་རྗེས་བལ་ཡུལ་དུ་ཕྱིན་ནས་མུ་མཐུད་རི་མོའི་ཐོག་ལ་ཕྱག་ལས་གནང་། དུས་རྒྱུན་ནས་རི་མོ་འབྲི་སྐབས་ཆབ་སྲིད་དང་འབྲེལ་བའི་རི་མོ་འབྲི་རྒྱུར་དགའ་ཞེན་ཆེ་བའི་སྒྱུ་རྩལ་བ་ཞིག་ཡིན་སྟབས་མཐར་བལ་ཡུལ་སུ་སྡོད་མི་ཐུབ་པར་ཕྱིར་ཐོན་དགོས་པ་བྱུང་ཞིང་། ལྷོ་ཀོ་རིའི་ནང་སྒྱུ་རྩལ་གཙུག་ལག་སློབ་གཉེར་ཁང་ཞིག་གི་ནང་ལོ་གཅིག་ཙམ་སློབ་སྦྱོང་གནང་རྗེས། ཨ་རི་ནིའུ་ཡོག་དང་ཀེ་ལི་ཕོར་ནི་ཡར་གནས་སྡོད་གནང་། དེ་ནས་ཁོང་ཅེག་སྤྱི་མཐུན་རྒྱལ་ཁབ་ནང་དུ་གནས་སྤོ་གནང་སྟེ་ཕྱི་ལོ་ ༢༠༢༤ ལོར་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་བྱུང་ཡོད། དམ་པ་ཁོང་གི་སྒྱུ་རྩལ་ཁྲོད་གྲགས་ཆེ་བ་གཅིག་བོད་ཀྱི་ Jan Palchas ༡༥༩ ལ་རྗེས་དྲན་ཞེས་བོད་མིའི་རང་ལུས་མེར་བསྲེགས་གནང་མཁན་དཔའ་བོ་དཔའ་མོ་རྣམས་ལ་རྗེས་དྲན་དང་གོ་རྟོགས་སྤེལ་གཞིའི་སྒྱུ་རྩལ་དེ་ཡིན་ཞིང་། ཕྱི་ལོ་ ༢༠༡༤ ལོར་ཨ་རི་ནེའུ་ཡོག་ཏུ་རྟེན་གཞི་བྱས་པའི་ Queens འགྲེམས་སྟོན་ཁང་དུ་འགྲེམས་སྟོན་གནང་ཡོད་པ་མ་ཟད། སྒྱུ་རྩལ་དེ་རིན་གོང་ཇི་བྱུང་བོད་རང་བཙན་སློབ་ཕྲུག་ཚོགས་པར་ཞལ་འདེབས་གནང་བ་སོགས་བོད་མིའི་སྤྱི་ཚོགས་ཁྲོད་འཐབ་རྩོད་དང་འབྲེལ་བའི་ལས་དོན་གནང་ཡོད། གཞན་ཡང་བཞུགས་སྒར་དུ་ཀརྨ་ཕུན་ཚོགས་ལགས་ཀྱིས་རང་ཡུལ་དུ་ཕྱིར་ལོག་ཅེས་པའི་ནང་དོན་མཚོན་པའི་གནང་དེང་ཟུང་འབྲེལ་གྱི་རི་མོའི་སྒྱུ་རྩལ་འགྲེམས་སྟོན་གནང་ཡོད་པ་དང་། འགྲེམས་སྟོན་དེ་བཞིན་ཁ་དོག་སྒྱུ་རྩལ་མཐུན་ཚོགས་ཀྱིས་གོ་སྒྲིག་ཞུས་པ་ཞིག་ཡིན་འདུག་ཅིང་། སྒྱུ་རྩལ་བ་ཀརྨ་ཕུན་ཚོགས་ལགས་སུ་བཀའ་འདྲི་ཞུས་སྐབས་ཁོང་གིས། ད་རེས་འགྲེམས་སྟོན་ནང་ལོ་གཅིག་ནང་ཚུད་དུ་འབྲི་པའི་རི་མོ་ ༢༥ ཙམ་ཡོད་པ་དང་། རི་མོ་དེ་དག་བོད་ཀྱི་སྲོལ་རྒྱུན་ཐང་ག་དང་དེང་དུས་རི་མོ་སྒྱུ་རྩལ་ཟུང་དུ་སྦྲེལ་ནས་སྣ་ཁ་མང་པོ་ཡོད་ཅིང་། གཙོ་ཆེ་ཤོས་བོད་པའི་གཞོན་སྐྱེས་རྣམས་ལ་བསམ་ཚུལ་གསར་པ་དང་དོ་སྣང་གསར་པ་སླེབས་ཐབས་དང་། བོད་ཀྱི་སྲོལ་རྒྱུན་ཐང་ག་སྒྱུ་རྩལ་ལས་གཞན་པའི་དེང་དུས་ཀྱི་རི་མོའི་སྒྱུ་རྩལ་ལ་ངོས་འཛིན་ཐོབ་ཐབས་ཙམ་མ་ཟད། ཕྱི་རྒྱལ་བ་ཚོས་ནང་ཆོས་དང་བོད་དོན་དང་དོ་སྣང་ཡོངས་ཐབས་སོགས་ཀྱི་འབད་བརྩོན་ཞིག་ཡིན་པ་འགྲེལ་བརྗོད་གནང་སོང་། ཁ་དོག་སྒྱུ་རྩལ་མཐུན་ཚོགས་ཀྱི་ཚོགས་མི་བཀྲ་ཤིས་ཉི་མ་ལགས་སུ་བཀའ་འདྲི་ཞུས་སྐབས་ཁོང་གིས། ཀརྨ་ཕུན་ཚོགས་ལགས་ནི་བོད་པའི་སྤྱི་ཚོགས་ཁྲོད་སྒྱུ་རྩལ་བ་གལ་ཆེན་པོ་ཞིག་ཡིན་པ་དང་། ཁ་དོག་སྒྱུ་རྩལ་མཐུན་ཚོགས་ཀྱི་ངོས་ནས་འགྲེམས་སྟོན་གནང་བ་དེ་དག་བོད་པའི་སྤྱི་ཚོགས་ཀྱི་སྒྱུ་རྩལ་བ་མི་རབས་གཞོན་པ་ཆགས་ཀྱི་ཡོད་སྟབས། ད་རེས་མི་རབས་རྒན་པ་ཀརྨ་ཕུན་ཚོགས་ལགས་ཀྱི་སྒྱུ་རྩལ་འགྲེམས་སྟོན་དེའི་བརྒྱུད་ནས་གཞོན་སྐྱེས་རྣམས་ལ་མིག་དཔེ་དང་སྒྱུ་རྩལ་གཅིག་པུ་མིན་པར་སྒྱུ་རྩལ་བའི་འཚོ་བའི་གནས་སྟངས་དང་མི་ཚེ་སྐྱེལ་སྟངས་ཇི་ཡིན་གསལ་སྟོན་བྱ་རྒྱུར་དམིགས་ཡོད་པ་འགྲེལ་བརྗོད་གནང་སོང་། གཞི་རྩའི་ཁ་དོག་སྒྱུ་རྩལ་མཐུན་ཚོགས་ཀྱི་ངོས་ནས་ཀརྨ་ཕུན་ཚོགས་ལགས་ཀྱི་སྒྱུ་རྩལ་འགྲེམས་སྟོན་གནང་ཡུལ་དེ་དང་ Dakini […] The post བཞུགས་སྒར་དུ་བོད་ཁྱིམ་སློབ་ཟུར་སྒྱུ་རྩལ་བ་དམ་པ་གཅུང་པོ་ཚེ་རིང་ལགས་དང་ཀརྨ་ཕུན་ཚོགས་ལགས་ཀྱི་སྒྱུ་རྩལ་འགྲེམས་སྟོན། appeared first on vot.

ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་དུས་སྟོན་ཐེངས་གཉིས་པ་དབུ་འཛུགས་དང་འབྲེལ། སྐུ་མགྲོན་གཙོ་བོ་མཆོག་གིས་ད་ལྟའི་ནོར་གླིང་གི་ཐོན་སྐྱེད་ལ་བསྔགས་བརྗོད་དང་འབྲེལ། རིག་གཞུང་མི་ཉམས་རྒྱུན་འཛིན་ནི་ལུས་ཀྱི་སྦྱོང་བརྡར་དང་མཉམ་དུ་རིག་པའི་གཞུང་ལུགས་རྩ་འཛིན་བྱས་དགོས་རྒྱུ་གལ་ཆེན་པོ་ཡིན་པ་གསུངས་སོང་། དེ་ཡང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་དུས་སྟོན་ཐེངས་གཉིས་པའི་དེ་བཞིན་སང་ཚེས་ ༢༤ བར་ཉིན་གྲངས་གཉིས་རིང་གནང་གི་ཡོད་པ་དང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་བཀའ་བློན་ཁྲི་ཟུར་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་གིས་དབུས་པའི་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་འཇིགས་མེད་རྣམ་རྒྱལ་ལགས་དང་། སྐུ་བཅར་རྣམ་རྒྱལ་གྲྭ་ཚང་གི་མཁན་རིན་པོ་ཆེ་བློ་བཟང་བསམ་གཏན་མཆོག །བོད་ཀྱི་དཔེ་མཛོད་ཁང་གི་ངེས་སྟོན་པ་དགེ་བཤེས་ལྷག་རྡོར་ལགས། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་ཟུར་བློ་བཟང་སྙན་གྲགས་ལགས། སྤྱི་ཁྱབ་འགན་འཛིན་ཚེ་རིང་ཕུན་ཚོགས། གཞན་ཡང་རྒྱ་གར་གྱི་སྐུ་མགྲོན་སོགས་སྐུ་མགྲོན་གཞན་ཁག་གཅིག་དང་མང་ཚོགས་བཅས་ལྷན་ཞུགས་གནང་སོང་། ཐེངས་འདིའི་དུས་སྟོན་གྱི་བརྗོད་གཞི་གཙོ་བོ་དེ་བྱམས་སྙིང་རྗེ་ཡི་རིག་གནས་དང་། སྲོལ་རྒྱུན་སྒོམ་གཤིས་ཀྱི་འཚོ་གནས་ཞེས་པ་དེ་ཡིན་པ་དང་། མཛད་སྒོའི་ཐོག་སྐུ་མགྲོན་གཙོ་བོ་མཆོག་གིས་གསུང་བཤད་ཁྲོད། བོད་པའི་སྤྱི་ཚོགས་ནང་སྒྲིག་འཛུགས་མང་པོ་ཡོད་པའི་ནང་ནས་རང་ཁ་རང་གསོ་ཐུབ་མཁན་ཉུང་ཤས་ནང་ནས་གཅིག་དེ་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དེ་ཡིན་ཞིང་། ཐོན་སྐྱེད་རྣམས་དངོས་དོན་བོད་ཀྱི་ནང་དོན་རིག་པའི་གཞི་རྩ་ལ་བརྟན་པ་ཞིག་ཆགས་ཀྱི་ཡོད་སྟབས་རྗེས་སུ་ཡི་རངས་དང་བསྔགས་བརྗོད་ཡོད་ཅེས་གསུངས་སོང་། དེ་བཞིན་བོད་ཀྱི་རིག་རྩལ་འགའ་ཤས་ཚོང་ལས་རང་གི་ཐོག་ནས་བསམ་ན་ཁེ་ཕན་ཆེན་པོ་མེད་ཀྱང་། སྤྱིར་རིག་གནས་རྒྱབ་ལྗོངས་ཀྱི་ཐོག་ནས་བསམ་བློ་བཏང་ཚེ་ཧ་ཅང་གནད་འགག་ཆེ་བ་མང་པོ་ཡོད་པ་དང་། དེ་དག་ད་བར་མི་ཉམས་རྒྱུན་འཛིན་གནང་ཡོད་པ་དང་མ་འོངས་པ་ལའང་གནང་དགོས་ཤིང་། མི་ཉམས་རྒྱུན་འཛིན་གནང་སྟངས་དེའང་ལུས་ཀྱི་སྦྱོང་བརྡར་དང་མཉམ་དུ་རིག་པའི་གཞུང་ལུགས་རྩ་འཛིན་བྱ་དགོས་རྒྱུ་གལ་ཆེན་པོ་ཡིན་པའི་ལམ་སྟོན་གནང་སོང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་ཟུར་བློ་བཟང་སྙན་གྲགས་ལགས་ཀྱིས་གསུང་བཤད་གནང་བའི་ཁྲོད། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གསར་འཛུགས་གནང་བའི་བརྒྱུད་རིམ་འགྲེལ་བརྗོད་དང་སྦྲགས། ད་ལྟའི་ཆར་སྒྲིག་འཛུགས་དེའི་འཛིན་སྐྱོང་གི་སྒྲིག་གཞི་གཙོ་བོར་གྱུར་བའི་ལས་བྱེད་ཀྱི་བླངས་དོར་དང་ཐོབ་ཐང་སྒྲིག་གཞི་ཆ་ཚང་གཏན་ལ་ཕབ་ལ་ཉེ་བའི་དུས་སྐབས་སུ་སླེབས་ཡོད་པ་དང་། ནོར་གླིང་དེ་བཞིན་གང་ཟག་གི་དབང་སྒྱུར་མིན་པར་ཁྲིམས་དང་སྒྲིག་གཞིས་དབང་སྒྱུར་ཐོག་འགྲོ་ཐུབ་པའི་འབད་བརྩོན་ཞུ་བཞིན་ཡོད་ཅིང་། འཚོ་བ་རང་སྐྱོང་གི་སྡེ་ཚན་ཞིག་ཡིན་སྟབས། དཔལ་འབྱོར་འདུ་འགོད་ནི་མེད་དུ་མི་རུང་བ་ཞིག་ཆགས་ཀྱི་ཡོད་པར་ཚོང་གི་ལམ་ནས་དཔལ་འབྱོར་འདུ་འགོད་ཀྱི་ལས་གཞིར་འབད་བརྩོན་ཞུ་བཞིན་ཡོད་པ་གསུངས་སོང་། ལྷག་པར་ཐོན་སྐྱེད་ཙམ་མིན་པར་བོད་ཀྱི་རིག་གཞུང་དང་འབྲེལ་བའི་སྒྱུ་རྩལ་ཐོག་འབད་རྩོན་དང་། འཛིན་སྐྱོང་ཚག་ཚུད། ཕྱི་གསལ་ནང་གསལ། ཚང་མས་མོས་པ་ཡོང་ཐུབ་པ་ཞིག་བཟོ་རྒྱུའི་འབད་བརྩོན་ཞུ་རྒྱུ་ཡིན་པ་གསུངས་སོང་། རྩ་བའི་དུས་སྟོན་འདིའི་ཐོག་བོད་ཀྱི་སྲོལ་རྒྱུན་རྩེད་མོ་དང་ན་ཆུང་རི་མོའི་འགྲན་བསྡུར། བོད་ཀྱི་ཟས་རིགས། རིག་གཞུང་འཁྲབ་སྟོན། བཟོ་རིག་སྒྱུ་རྩལ། བརྩམས་ཆོས་འགྲེམས་སྟོན་སོགས་གནང་གི་ཡོད་པ་རེད། འདི་ག་རླུང་འཕྲིན་ཁང་ནས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་སྤྱི་ཁྱབ་འགན་འཛིན་ཚེ་རིང་ཕུན་ཚོགས་ལགས་སུ་ཐེངས་འདིའི་དུས་སྟོན་དང་འབྲེལ་ནས་བཀའ་འདྲི་ཞུས་སྐབས། ཁོང་གིས་སྔ་ལོ་དུས་སྟོན་ཐེངས་དང་པོ་གོ་སྒྲིག་ཞུས་པའི་སྐབས་མང་ཚོགས་དང་ཡུལ་སྐོར་སྤྲོ་འཆམ་པ། དེ་བཞིན་རྡ་ས་ཁུལ་གྱི་རྒྱ་གར་དཔོན་རིགས་ཚོས་དགའ་ཚོར་ཆེན་པོ་གནང་གི་ཡོད་པ་དང་། ད་དུང་མང་ཙམ་གོ་སྒྲིག་ཞུ་དགོས་སྐོར་གསུང་མཁན་ཡང་བྱུང་ཡོད་སྟབས། ཟླ་བ་རེ་རེའི་ནང་ཟླ་སྟོན་ཞེས་པ་གོ་སྒྲིག་ཞུ་བཞིན་ཡོད་པ་གསུང་སོང་། ད་དུང་འདས་པའི་ལོ་བཅུ་དང་བསྡུར་ན་ད་ལྟའི་ཆར་བོད་པའི་བཟོ་རིགས་སྦྱང་བཙོན་བྱེད་མཁན་བོད་མི་གཞོན་སྐྱེས་ཉུང་དུ་འགྲོ་བཞིན་ཡོད་སྟབས། བོད་ཕྲུག་དང་མཉམ་དུ་ཧི་མ་ལ་ཡའི་རི་རྒྱུད་ནས་བོད་པའི་སློབ་གྲྭ་འགྲིམ་མྱོང་མཁན་དང་དགོན་སྡེ་ཁག་ལ་ཕེབས་མྱོང་མཁན་གཙོས་པའི་བོད་ཡིག་ཤེས་མཁན་གཙོ་བར་བཟུང་ནས་སློབ་ཕྲུག་གསར་བསྡུའི་འབད་བརྩོན་ཞུ་བཞིན་ཡོད་པ་དང་། ལྷག་པར་དུས་རབས་དང་བསྟུན་ནས་བོད་པའི་རིག་གཞུང་རྒྱུན་མཐུད་པ་ལ་བོད་པའི་སློབ་ཕྲུག་ཡོང་ཐབས་སུ་འབད་བརྩོན་ཞུ་བཞིན་ཡོད་པ་འགྲེལ་བརྗོད་གནང་སོང་། གཞི་རྩའི་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ནི་ཕྱི་ལོ་ ༡༩༨༨ ལོར་ཐོག་མར་གསར་བཞེངས་དབུ་བཙུགས་ཏེ། ཕྱི་ལོ་ ༡༩༩༥ ལོའི་ཕྱི་ཟླ་ ༡༡ ཚེས་ ༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འབྱེད་བཀའ་དྲིན་བསྐྱངས་ཏེ། བོད་གངས་ཅན་ལྗོངས་ཀྱི་ལེགས་བྱང་བསྡུས་པའི་སྒྱུ་རྩལ་གྱི་རྣམ་གྲངས་ཁག་མྱུར་སྐྱོབ་གཅེས་གཉེར་བྱེད་པའི་ལྟེ་གནས་ཤིག་ཡིན་པ་དང་། […] The post ནོར་གླིང་དུས་སྟོན་ཐེངས་གཉིས་པ་དབུ་འཛུགས། appeared first on vot.

རྒྱ་ནག་གི་མི་རིགས་མཐུན་སྒྲིལ་ཟེར་བའི་ཁྲིམས་ཡིག་ལ་ངོ་རྒོལ་དང་སྦྲགས། བཙན་བྱོལ་བོད་མི་ཚོས་བོད་ཀྱི་སྐད་ཡིག་བཀོལ་སྤྱོད་རྒྱུན་འཛིན་དགོས་པའི་གཞེན་སྐུལ་དང་མཉམ་དུ། རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༦ འཁོར་བའི་དུས་དྲན་སྲུང་བརྩི་ཞུས་སོང་། དེ་ཡང་དེ་རིང་ཟླ་བ་ ༡༠ ཚེས་ ༢༣ ཉིན་བཞུགས་སྒར་རྡ་རམ་ས་ལར་སྐུ་མགྲོན་གཙོ་བོ་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་དང་། ཆེ་བསྟོད་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག། བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག། སྲིད་སྐྱོང་སྤེན་པ་ཚེ་རིང་མཆོག་གཙོས་པའི་མཛད་གཙོ་རྣམ་པ་དབུ་བཞུགས་ཐོག རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༦ ཧྲིལ་པོ་འཁོར་བའི་དུས་དྲན་སྲུང་བརྩི་ཞུས་སོང་། མཛད་སྒོའི་ཐོག་མར་རྡ་སྟེང་བོད་ཕྲུག་ཁྱིམ་སྡེའི་སྤྱི་ཁྱབ་གཙོ་འཛིན་བསོད་ནམས་སྲི་གཅོད་ལགས་ཀྱིས་བོད་ཁྱིམ་སློབ་གྲྭ་ཁག་གི་སྤྱི་ཡོངས་ལས་བསྡོམས་སྙན་སྒྲོན་དང་སྦྲགས། རྒྱ་ནག་གཞུང་གིས་བོད་མི་རིགས་རྩ་མེད་གཏོང་བར་དམིགས་པའི་མི་རིགས་མཐུན་སྒྲིལ་ཟེར་བའི་ཁྲིམས་ཡིག་དེ་ལ་བོད་མི་ཚོས་བོད་ཀྱི་ཆོས་དང་རིག་གཞུང་རྒྱུན་འཛིན་དང་། ལྷག་པར་བོད་ཕྲུག་ན་གཞོན་རྣམས་ལ་བོད་ཀྱི་སྐད་ཡིག་སློབ་སྤེལ་བྱས་པའི་ལམ་ནས་གདོང་ལེན་བྱེད་དགོས་པའི་སྐུལ་མ་གནང་སོང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། རྒྱ་ནག་གཞུང་གིས་ཁྲིམས་ཀྱི་འབག་གཡོག་ནས་བོད་ཀྱི་ངོ་བོ་ནག་བསུབ་གཏོང་ཐབས་བྱེད་ཀྱི་ཡོད་ནའང་། གཞིས་བཞུགས་བོད་མི་ཚོས་དཀའ་སྡུག་དྲག་གནོན་འཛེམས་མེད་ཐོག་ནས། བོད་ཀྱི་རིག་གཞུང་རྒྱུན་འཛིན་ལས་དོན་ལ་འབད་འབུངས་ལྷོད་མེད་གནང་གི་ཡོད་པར་བསྔགས་བརྗོད་དང་སྦྲགས། འབྱུང་འགྱུར་མུ་མཐུད་བོད་མིའི་ངོ་བོ་སྲུང་སྐྱོབ་ཀྱི་ལས་ལ་འབད་དགོས་པའི་གཞེན་སྐུལ་གནང་སོང་། དེ་ལྟར་བོད་མི་མང་སྤྱི་འཐུས་ཚོགས་གཙོ་བཀྲས་ཁང་སྒྲོལ་མ་ཚེ་རིང་མཆོག་གིས་ཀྱང་། བོད་མི་རྣམས་ཀྱིས་གནས་སྐབས་ཀྱི་དགོས་མཁོ་དང་སྟབས་བདེར་བལྟས་ནས་བོད་ཀྱི་སྐད་ཡིག་བེད་སྤྱོད་བྱ་རྒྱུར་སྣང་མེད་གཏང་ན། མ་འོངས་པར་ནམ་ཞིག་བོད་ཀྱི་ངོ་བོ་མཚོན་པའི་སྐད་ཡིག་རིག་གཞུང་རྩ་མེད་དུ་འགྲོ་རྒྱུའི་ཉེན་ཁ་ཆེན་པོ་ཡོད་པས། ད་ལྟའི་དུས་ནས་བཟུང་བོད་མི་རྒན་གཞོན་ཚང་མས་བོད་ཀྱི་སྐད་ཡིག་གཙོས་པའི་རིག་གཞུང་གི་ངོ་བོ་རྒྱུན་འཛིན་དགོས་པ་དང་། ལྷག་པར་དུ་བོད་མི་ནང་ཁུལ་བཀའ་མོལ་གནང་སྐབས། སྲེ་ལྷད་མེད་པའི་བོད་སྐད་གཙང་མ་སྐྱོན་རྒྱུར་འབད་རྩོལ་དགོས་པའི་སྐུལ་མ་གནང་སོང་། ཕྱོགས་མཚུངས་སྐུ་མགྲོན་གཙོ་བོ་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་ནས་ཀྱང་། བོད་མི་རིགས་ཀྱི་ངོ་བོ་མཚོན་པའི་རྩ་བ་ལྟ་བུ་དེ། སྐད་ཡིག་ཡིན་པ་ཤེས་པའི་ཐོག་ནས་བོད་ཀྱི་སྐད་ཡིག་བཀོལ་སྤྱོད་བྱེད་པར་དང་འདོད་དགོས་པ་མ་ཟད། བོད་མི་ཕན་ཚུན་ཁ་བརྡ་བྱེད་པའི་སྐབས་སུ་བོད་སྐད་གཙང་མ་སྐྱོན་ཐབས་ལ་འབད་དགོས་པ་གསུངས་སོང་། དེ་མ་ཟད་རིན་པོ་ཆེ་མཆོག་གིས་སློབ་ཕྲུག་ན་གཞོན་རྣམས་ཀྱི་རྒྱུད་ལ་ཤེས་ཡོན་སློབ་གསོ་དང་མཉམ་དུ། བོད་མིའི་ཆོས་རིག་དང་འབྲེལ་བའི་ཡ་རབས་བཟང་པོའི་སྤྱོད་ཚུལ་རྣམས་འཇགས་ཐབས་སུ། གཞོན་དུས་ནས་བཟང་སྤྱོད་ཀྱི་བསླབ་བྱ་རྣམས་སློབ་དགོས་རྒྱུ་གལ་ཆེན་པོ་ཡིན་པ་དང། དེ་འབྲེལ་ཕ་མ་དང་དགེ་རྒན་རྣམས་ཀྱིས་ཐུགས་ཁུར་བཞེས་དགོས་པའི་ལམ་སྟོན་གནང་སོང་། གཞན་ཡང་མཛད་སྒོའི་ཐོག་བོད་ཕྲུག་ཁྱིམ་སྡེའི་ཞབས་ལོ་ ༢༠ འཁོར་བའི་ལས་བྱེད་གྲངས་ ༢༡ ལ་གཟེངས་རྟགས་དང་། སློབ་ཕྲུག་ ༥ ལ་ཤེས་ཡོན་གྱི་ལེགས་སྐྱེས། སློབ་ཕྲུག་རྩེ་ཕུད་གཉིས་ལ་ཤེས་རིག་ལས་ཁུངས་ཀྱི་བུམ་སྐྱོན་གསུམ་བྲལ་གྱི་ཕྱག་འཁྱེར་གནང་རྗེས། ༸གོང་ས་མཆོག་སྐུ་ཚེ་ཞབས་པད་བརྟན་པའི་གསོལ་འདེབས་དང་། བོད་ཀྱི་རིག་གཞུང་སྲུང་སྐྱོབ་དར་སྤེལ་མཚོན་པའི་ལུས་རྩལ་གཟིགས་འབུལ་ཞུས་སོང་། དེ་རྗེས་མུ་མཐུད་ཉིན་གྲངས་གསུམ་རིང་ལ་འགྲེམས་སྟོན་དང་། གཞས་སྣ་འཁྲབ་སྟོན། སློབ་གྲྭའི་ཁང་ཚན་ནང་ཁུལ་རྩེད་འགྲན། ལྷ་གཞུང་གཟིགས་འབུལ་སོགས་ཀྱི་ལམ་ནས་དུས་དྲུན་སྲུང་བརྩི་གནང་གི་འདུག གཞི་རྩའི་རྡ་སྟེང་བོད་ཕྲུག་ཁྱིམ་སྡེ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་དུ་ཕེབས་མ་ཐག་བོད་ཕྲུག་འཁོས་ཞན་རྣམས་ལ་གཟིགས་སྐྱོང་བྱ་སའི་ལྟེ་གནས་ཤིག་དགོས་གལ་ཆེ་བའི་བཀའ་སློབ་ལམ་སྟོན་གནང་བ་ལྟར། ཐོག་མར་ཕྱི་ལོ་ […] The post བོད་ཀྱི་སྐད་ཡིག་རྒྱུན་འཛིན་དགོས་པའི་གཞེན་སྐུལ་དང་བཅས་རྡ་སྟེང་བོད་ཕྲུག་ཁྱིམ་སྡེ་དབུ་བརྙེས་ནས་ལོ་ངོ་ ༦༦ འཁོར་བའི་དུས་དྲན་སྲུང་བརྩི་ཞུས་སོང་། appeared first on vot.