Voice of Tibet

བོད་ཀྱི་གསུམ་བཅུའི་དུས་དྲན་ཐེངས་ ༦༧ སླེབས་ལ་ཉེ་བ་དང་བསྟུན། དེ་རིང་ཕྱི་ཚེས་ ༤ ཉིན་ཐའེ་ཝན་ནང་བོད་རང་དབང་རྐང་འཁོར་སྐོར་སྐྱོད་ཞེས་པའི་ལས་འགུལ་དབུ་འཛུགས་གནང་འདུག དེ་ཡང་དེ་རིང་བོད་དང་ཐའེ་ཝན་འགྲོ་བ་མིའི་ཐོབ་ཐང་གིས་གོ་སྒྲིག་འོག  ཐའེ་ཝན་གྲོས་ཚོགས་ལྷན་ཁང་མདུན་དུ།  Cycling  for a Free Tibet འམ་བོད་རང་དབང་ཆེད་དུ་རྐང་འཁོར་སྐོར་སྐྱོད་ཀྱི་ལས་འགུལ་འགོ་འཛུགས་གནང་བ་དང་།  སྐབས་དེར་ཐའེ་ཝན་གྲོས་ཚོགས་འཐུས་མི་ CHEN Pei-yu ལགས་དང་། ཐའེ་ཝན་ Keelung  ས་གནས་གྲོས་ཚོགས་འཐུས་མི་ CHANG Chih-hao ལགས། དེ་བཞིན་ཐའེ་ཝན་སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས། གཞན་ཡང་  Taiwan Association for Human Rights འམ་ཐའེ་ཝན་འགྲོ་བ་མིའི་ཐོབ་ཐང་ཚོགས་པ་སོགས་ཀྱི་གཞུང་འབྲེལ་མ་ཡིན་པའི་ཚོགས་པའི་སྐུ་ཚབ་ཁག་གཅིག་ལྷན་ཞུགས་གནང་འདུག རྩ་བའི་ཐའེ་ཝན་ནང་ཕྱི་ལོ་  ༢༠༡༡ ནས་བཟུང་ལོ་ལྟར་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སྲུང་བརྩི་ཞུ་ཉེའི་ཟླ་བ་གཅིག་གི་སྔོན་ཚུད་ནས་རེས་གཟའ་ལྷག་པ་ནམ་ཡིན་ལ་བོད་དོན་དྲིལ་བསྒྲགས་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་སྲོལ་ཡོད་པ་དང་། ལས་འགུལ་དེའི་ཐོག་མའི་དམིགས་ཡུལ་ནི། ཐའེ་ཝན་ནང་གི་རྒྱ་རིགས་ཡུལ་སྐོར་སྤྲོ་འཆམ་པ་དང་སློབ་མ་སོགས་ལ་རྒྱ་ནག་གི་གདུག་རྩུབ་འོག་གཞིས་ལུས་རྒྱ་ཆེ་མི་མང་ལ་རང་དབང་མེད་པ་དང་བོད་ནང་གི་ཛ་དྲག་གནས་སྟངས་ངོ་སྤྲོད་དང་འབྲེལ། བོད་མིའི་སྒྲིག་འཛུགས་ཀྱི་སྲིད་བྱུས་སོགས་མདོར་ན་བོད་དོན་དྲིལ་བསྒྲགས་ཀྱི་ལས་འགུལ་ཞིག་ཆགས་ཀྱི་ཡོད་པ་རེད།   བོད་དང་ཐའེ་ཝན་འགྲོ་བ་མིའི་ཐོབ་ཐང་གསར་འཛུགས་གནང་མཁན་དང་ཚོགས་པའི་དྲུང་ཆེ་བཀྲ་ཤིས་ཚེ་རིང་ལགས་ཀྱིས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་དོན་དུ།  སྤྱིར་མང་ཚོགས་ནས་ལོ་ལྟར་སྤེལ་བཞིན་པའི་ལས་འགུལ་དེར་དོ་སྣང་ཆེན་པོ་གནང་བཞིན་ཡོད་པ་དང་། མ་ཟད་འདི་ལོ་དམིགས་བསལ་གྱི་གཞོན་སྐྱེས་མང་པོས་ལས་འགུལ་དེའི་ཐོག་མཉམ་ཞུགས་གནང་ཡོད་སྐོར་འགྲེལ་བརྗོད་དང་། ཐའེ་ཝན་ནང་ལས་འགུལ་གང་འདྲ་ཞིག་སྤེལ་ཀྱང་རྒྱ་ཡིག་དང་རྒྱ་སྐད་བཀོལ་སྤྱོད་བྱེད་དགོས་ཀྱི་ཡོད་སྟབས། ད་བར་སྤེལ་བའི་ལས་འགུལ་རྣམས་ལམ་ལྷོང་ཡག་པོ་བྱུང་ཡོད་པ་དང་མ་འོངས་མུ་མཐུད་དེ་ལྟར་ལས་འགུལ་སྤེལ་ངེས་ཡིན་སྐོར་འགྲེལ་བརྗོད་གནང་བྱུང་། མ་ཟད་ཁོང་གིས་ཕྱིའི་རྒྱལ་ཁབ་ཁག་ཏུ་གནས་བཞུགས་བོད་མི་ཡོངས་ལ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་སླེབས་ལ་ཉེ་སྟབས། ད་ལྟའི་ཆར་རྒྱལ་སྤྱིའི་སྡིངས་ཆའི་སྟེང་བོད་པའི་འཐབ་རྩོད་ནུས་པ་དེ་གོང་འཕེལ་གཏང་དགོས་ན་བོད་མི་མི་རེ་ངོ་རེ་ནས་དེའི་ཐོག་ཤུགས་སྣོན་རྒྱག་རྒྱུ་གལ་ཆེན་ཡིན་ཞེས་གསུངས་སོང་། The post ཐའེ་ཝན་ནང་བོད་དོན་དྲིལ་བསྒྲགས་ཀྱི་རྐང་འཁོར་སྐོར་སྐྱོད་ལས་འགུལ་དབུ་འཛུགས། appeared first on vot.

ཟླ་བ་འདིའི་ཚེས་ ༡ ཉིན་རྒྱལ་སྤྱིའི་ཡུལ་གྲུ་འདྲ་མིན་ ༢༧ ནང་གི་བཙན་བྱོལ་བོད་མི་རྣམས་ཀྱིས་ ༢༠༢༦ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་ནང་ཆ་ཤས་བླངས་ཡོད་པ་དང་། དེ་རིང་ནས་ས་གནས་འོས་བསྡུ་ལས་ཁང་སོ་སོས་འོས་བསྡུའི་གྲངས་བཤེར་ཕྱོགས་བསྡོམས་གནང་འགོ་ཚུགས་ཀྱི་ཡོད་པ་རེད། འདི་ག་རླུང་འཕྲིན་ཁང་གི་གསར་འགོད་པ་རྣམ་པས་སྔོན་འགྲོའི་འོས་བསྡུའི་ཉིན་འོས་འཕེན་པ་མང་དག་ཅིག་ལ་བཅར་འདྲི་ཞུ་སྐབས། དཀའ་ངལ་མང་དག་ཅིག་གླེང་མཁན་བྱུང་བའི་ཁོངས་ནས་མང་ཆེ་བས་སྤྱི་འཐུས་ཀྱི་འགེངས་ཤོག་ནང་སྤྱི་འཐུས་བཅུ་མ་ཟད། དེ་དག་གི་སྡོད་གནས་དང་ལས་གནས་སོགས་ཞིབ་ཕྲ་མང་དག་ཅིག་དགང་དགོས་པ་དེ་དཀའ་ངལ་ཆེན་པོ་ཞིག་ལ་ངོས་འཛིན་དང་བཅས་མ་འོངས་འགེངས་ཤོག་སྟབས་བདེ་པོ་བཟོ་དགོས་པ་གསུང་མཁན་བྱུང་ཡོད། དེའི་ཁྲོད་ད་ཆ་རྒྱ་གར་ལྷོ་ཕྱོགས་ནང་སྐུ་བཞུགས་གནང་བཞིན་པ་དང་། དེ་སྔ་ལོ་མང་རིང་གཞུང་ཞབས་དང་གསར་འགོད་པ་བཅས་གནང་སྟེ་རྒས་ཡོལ་ལ་ཕེབས་པའི་གཡུ་རྒྱལ་ལགས་ཀྱིས་སེམས་འཚབ་དང་བཅས། དེ་རིང་ཆེད་དུ་མངགས་ནས་འདི་ག་གསར་འགོད་པར་འབྲེལ་བ་གནང་སྟེ་དཀའ་ངལ་དེ་དག་གླེང་གནང་བ་མ་ཟད། འོས་འཕེན་པའི་གྲངས་འབོར་མང་བའི་རྒྱ་གར་ལྷོ་ཕྱོགས་ལྟ་བུར་མཚོན་ན།  སྤྱི་འཐུས་ཀྱི་འགེངས་ཤོག་ནང་མི་བཅུ་པོའི་མིང་ཙམ་མ་ཟད། དོན་ཚན་གཞན་མང་དག་ཅིག་དགང་དགོས་པ་དེ་དཀའ་ངལ་ཆེན་པོར་གྱུར་སྟེ་འོས་འཕེན་པ་ཁག་གཅིག་གིས་རང་ཉིད་ལ་འོས་གཞི་བཅུ་ཡོད་ཀྱང་ཉུང་ཤས་ལས་བཀང་མ་ཐུབ་པ་དང་། དེ་ལྟ་བུའི་དཀའ་ངལ་འཕྲོད་བྲིས་བསུབ་དེ་འདྲ་ཡོང་སྲིད་ཀྱང་འོས་བསྡུའི་སྒྲིག་གཞིའི་ནང་བྲིས་བསུབ་བཏང་ན་རྩིས་མེད་གཏོང་རྒྱུ་ཞེས་པ་ནི་དཀའ་ངལ་ཆེན་པོ་ཡིན་པ་གསུངས་སོང་། དེ་འབྲེལ་ཁོང་གིས་མ་འོངས་པར་སྔོན་འགྲོའི་འོས་བསྡུ་ཆེན་མོའི་སྐབས་འོས་གཞིར་བཞེངས་མཁན་རྣམས་ཀྱིས་སྔོན་ཚུད་ནས་དབུས་འོས་བསྡུ་ལས་ཁང་ལ་དེབ་སྐྱེལ་གནང་བ་དང་འབྲེལ་འོས་བསྡུ་ལས་ཁང་ནས་དོ་དག་སོ་སོར་ཨང་གྲངས་བགོས་ཐུབ་པ་ཡིན་ན། འོས་ཤོག་སྟབས་བདེ་རུ་འགྲོ་རྒྱུ་དང་། སྤྱི་འཐུས་ཀྱི་མིང་འབྲི་སྐབས་བྲིས་བསུབ་བྱུང་ན་འབྲེལ་ཡོད་འོས་གཞི་གཅིག་མ་གཏོགས་འོས་ཤོག་ཡོངས་རྫོགས་རྩིས་མེད་གཏང་རྒྱུ་མེད་པའི་འབོད་སྐུལ་གནང་གི་འདུག རྩ་བའི་རླུང་འཕྲིན་ཁང་གིས་ཐེངས་འདིའི་སྔོན་འགྲོའི་འོས་བསྡུ་ཆེན་མོ་དང་འབྲེལ་ནས་གནས་ཚུལ་རྒྱུས་ལོན་བྱེད་སྐབས། ཁག་ཅིག་གིས་སྲིད་སྐྱོང་དང་དབུས་གཙང་ཆོལ་ཁའི་འགེངས་ཤོག་གི་ཚོན་གཅིག་པར་སོང་འོས་སྒམ་ནང་བླུགས་སྐབས་འཁྲུག་ཉེན་ཆེ་བས་མ་འོངས་པར་ཚོན་མི་འདྲ་བ་དགོས་པ་དང་། དེ་བཞིན་འོས་ཤོག་ནང་དགང་དགོས་པའི་དོན་ཚན་བཞི་པོ་རྣམས་སྟབས་བདེ་པོ་བཟོ་དགོས་པ།  ཡིག་རྨོངས་དང་དམིགས་བསལ་དགོས་མཁོ་ཅན། དེ་བཞིན་ལོ་ན་བགྲེས་པ་རྣམས་ཀྱིས་འོས་འཕེན་སྐབས་སྡོད་གཅིག་ནང་མི་དང་ཡང་ན་ཡིད་ཆེས་བྱེད་སའི་མི་གཅིག་གི་རོགས་རམ་ལེན་ཆོག་གི་ཡོད་པ་ཁོ་ན་མ་ཡིན་པར་དོ་བདག་དཀའ་ངལ་ཡོད་རིགས་ལ་འོས་བསྡུ་ལས་ཁང་ནས་ཟུར་དུ་ཕྱག་རོགས་གནང་མཁན་ཞིག་དགོས་ངེས་ཡིན་པའི་གཞེན་སྐུལ་གནང་མཁན་བྱུང་སོང་བ་མ་ཟད། འོས་བསྡུའི་ས་ཚིགས་གཅིག་གི་ནང་མི་སྐྱ་ཞིག་གིས་རང་ཉིད་སྔགས་པ་ཡིན་སྐོར་བརྗོད་དེ་ཆོས་ལུགས་སྤྱི་འཐུས་ཀྱི་འགེངས་ཤོག་དགོས་པ་བཤད་སྟབས་དེ་འབྲེལ་དཀའ་ངལ་འཕྲད་པའང་བྱུང་ཡོད། The post སྔོན་འགྲོའི་འོས་བསྡུའི་གོང་ནས་འོས་གཞིར་བཞེངས་མཁན་རྣམས་དེབ་འགོད་ཀྱིས་ཨང་གྲངས་སྤྲོད་དགོས་པའི་ཞུ་འབོད། appeared first on vot.

སེ་ར་བྱེས་མཁས་སྙན་གྲྭ་ཚང་གིས་ཕྱི་ལོ་ ༢༠༢༢ ལོ་ནས་བཟུང་རྒྱ་གར་ལྷོ་ཕྱོགས་མའེ་སོར་གཙུག་ལག་སློབ་གཉེར་ཁང་དང་ཟུང་འབྲེལ་ཐོག་གཙུག་ལག་རབ་འབྱམས་ཀྱི་ཆེད་སྦྱོང་དབུ་འཛུགས་གནང་བ་བཞིན། ཉེ་ལམ་ ༢༠༢༤ ལོའི་ཕྱི་ཟླ་ ༡༠ པའི་ནང་སེར་བྱེས་ཆེད་སྦྱོང་ཉེ་བའི་གཙུག་ལག་རབ་འབྱམས་ཀྱི་སྐབས་དང་པོའི་བསླབ་པ་མཐར་སོན་གྱི་མཛད་སྒོ་གྲུབ་པ་མ་ཟད། མཐར་སོན་སློབ་མ་ ༣༧ གཙོས་པའི་འབྲེལ་ཡོད་དབུ་ལས་རྣམས་ལ་དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་མོན་གྷོ་རུ་བྱེས་ཀྱི་གདན་ས་འབྲས་སྤུངས་སྒོ་མང་གྲྭ་ཚང་གི་ཆོས་གྲྭའི་ནང་མཇལ་ཁ་སྩལ་འདུག དེའི་སྐོར་འདི་གའི་གསར་འགོད་པས་སེར་བྱེས་མཁན་རིན་པོ་ཆེ་བཀྲ་ཤིས་ཚེ་ཐར་མཆོག་ལ་བཀའ་འདྲི་ཞུས་ཡོད། སྤྱིར་མའེ་སོར་གཙུག་ལག་སློབ་གཉེར་ཁང་གི་ངོས་འཛིན་ཡོད་པའི་ཉེ་བའི་གཙུག་ལག་རབ་འབྱམས་ཀྱི་ཆེད་སྦྱོང་ནང་ནང་པའི་ལྟ་གྲུབ་དང་། སེམས་ཁམས་རིག་པ། དེ་བཞིན་བོད་ཀྱི་སྐད་ཡིག་བཅས་སྡེ་ཚན་གསུམ་ལ་བཀའ་བཅད་གནང་ཡོད་པ་དང་། ད་རེས་གཙུག་ལག་རབ་འབྱམས་ཀྱི་བསླབ་པ་མཐར་སོན་ ༣༧ བྱུང་བའི་ཁོངས་ནས་བསྟན་འཛིན་ངག་དབང་ལགས་ནི་བོད་ཀྱི་སྐད་ཡིག་ཐོག་ཆེད་སྦྱོང་གནང་འདུག གཞི་རྩའི་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་རྟེན་གཞི་བྱས་པའི་སེར་བྱེས་མཁས་སྙན་གྲྭ་ཚང་དུ་སྔ་ལོའི་ཕྱི་ཟླ་ ༡༠ ཚེས་ ༡༧ ཉིན་ཀར་ན་ཀྲ་ཀ་མངའ་སྡེའི་ཤེས་རིག་བློན་ཆེན་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་བཅས་སྐུ་མགྲོན་གཙོ་བོར་གདན་ཞུས་ཐོག མའེ་སོར་གཙུག་ལག་སློབ་གཉེར་ཁང་གིས་ངོས་བཞེས་ཡོད་པའི་སེར་བྱེས་ཆེད་སྦྱོང་ཉེ་བའི་གཙུག་ལག་རབ་འབྱམས་ཀྱི་སྐབས་དང་པོའི་བསླབ་པ་མཐར་སོན་གྱི་མཛད་སྒོ་དེ་འཚོགས་ཡོད་པ་རེད། The post སེར་བྱེས་ཆེད་སྦྱོང་ཉེ་བའི་གཙུག་ལག་རབ་འབྱམས་ཀྱི་སྐབས་དང་པོའི་བསླབ་པ་མཐར་སོན་པ་རྣམས་ལ་མཇལ་ཁ་སྩལ་བ། appeared first on vot.

དེ་རིང་ཕྱི་ལོ་ ༢༠༢༦ ཟླ་ ༢ ཚེས་ ༢ ཉིན་གྱི་སྔ་དྲོ་རྒྱ་གར་ལྷོ་ཕྱོགས་མོན་གྷོ་རུ་བྱེས་ཀྱི་གདན་ས་འབྲས་སྤུངས་སྒོ་མང་གྲྭ་ཚང་གི་ཆོས་གྲྭའི་ནང་།  རྒྱལ་སྤྱིའི་དགེ་ལྡན་ལྷན་ཚོགས་ཀྱི་གལ་ཆེའི་ལས་དོན་གཞུང་ཆེན་རིགས་གཅིག་རྐང་འཛིན་བསླབ་པ་མཐར་སོན་གྱིས་རིམ་པ་དང་པོའི་དགེ་བཤེས་ ༣༠ དང་དགེ་བཤེས་མ་ ༥ བཅས་ཁྱོན་གྲྭ་བཙུན་ ༣༥ ལ་༸གོང་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་༸སྐྱབས་རྗེ་དགའ་ལྡན་ཁྲིན་རིན་པོ་ཆེ་ནས་ཕྱག་འཁྱེར་འབུལ་བཞེས་དང་༸གང་ཉིད་མཆོག་གིས་མཇལ་ཁ་སྩལ་སོང་བ་མ་ཟད།  གཞན་ཡང་ཉིན་ཤས་གོང་འདི་ག་འབྲས་སྤུངས་བློ་གསལ་གླིང་སྒོམ་སྒྲུབ་དང་ཚན་རིག་ལྟེ་གནས་ཁང་དུ་ཆོས་ལུགས་ལ་མ་བརྟེན་པའི་བཟང་སྤྱོད་སློབ་གསོའི་ཐོག་ཉིན་གྲངས་གསུམ་རིང་གི་ཟབ་སྦྱོང་ནང་མཉམ་ཞུགས་གནང་མཁན་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་དང་སཱི་ཤེས་ཡོན་སློབ་གསོའི་མཐུན་སྦྱོར་བ་ཁྱོན་མི་གྲངས་ ༨༠ ཙམ་ལའང་༸གོང་ས་༸སྐྱབས་མགོན་ཆེན་པོ་མཆོག་གིས་མཇལ་ཁ་སྩལ་སོང་།  མཇལ་ཁ་གྲུབ་མཚམས་འདི་གའི་གསར་འགོད་པས་དྲི་བར་ལན་འདེབས་ཁྲོད།  རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་དགེ་བཤེས་བློ་བཟང་རྒྱལ་མཚན་མཆོག་གིས།  སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་གཞུང་ཆེན་རིགས་གཅིག་རྐང་འཛིན་གནང་དགོས་གལ་ཐོག་བཀའ་སློབ་ལམ་སྟོན་ལན་མང་ཕེབས་པ་ལྟར།  ༸སྐྱབས་རྗེ་དགའ་ལྡན་ཁྲི་ཐོག་ ༡༠༤ ཞིང་བཤེགས་དམ་པ་རྗེ་བཙུན་བློ་བཟང་བསྟན་འཛིན་མཆོག་དང་། ཡང་སྲིད་རིན་པོ་ཆེ་རྣམ་གཉིས་ཀྱིས་ཐུགས་འཁུར་ཆེ་བཞེས་ཀྱིས་མཐུན་རྐྱེན་འཚོལ་སྒྲུབ་གནང་ནས་ཨ་རིའི་ཀ་ཡ་མཎྜ་ལ་ཚོགས་པ་ནས་ལོ་བཅུའི་རིང་མཐུན་འགྱུར་གནང་རྒྱུ་ཞལ་བཞེས་དང་འབྲེལ། ལོ་གསུམ་རིང་གཞུང་ཆེན་བཀའ་པོད་ལྔའི་ཐོག་རང་སོ་སོས་བརྗོད་གཞི་འདེམས་སྒྲུག་གིས་བསླབ་པ་མཐར་སོན་གྲུབ་པའི་རིམ་པ་དང་པོའི་དགེ་བཤེས་དང་དགེ་བཤེས་རྣམས་ལ་༸གོང་ས་སྐྱབས་མགོན་ཆེན་པོ་མཆོག་༸སྐྱབས་རྗེ་དགའ་ལྡན་ཁྲི་རིན་པོ་ཆེ་མཆོག་ནས་ཕྱག་འཁྱེར་འབུལ་བཞེས་དང་། མགོན་པོ་༸གང་ཉིད་མཆོག་ནས་མཇལ་ཁ་བཀའ་དྲིན་སྩལ་ཡོད་སྐོར་གསུངས་སོང་།  མ་ཟད། འདི་གའི་གསར་འགོད་པས་ཆེས་ཐོག་མའི་གཞུང་ཆེན་རིག་གཅིག་རྐང་འཛིན་གྱི་བསླབ་པ་མཐར་སོན་པའི་དགེ་བཤེས་གཅིག་དང་དགེ་བཤེས་མ་གཅིག་ལ་བཀའ་འདྲི་ཞུས་ཡོད།  རྩ་བའི་གཞུང་ཆེན་རིག་གཅིག་རྐང་འཛིན་ལས་གཞི་འདི་ནི་ཨ་རིའི་ཀ་ཡ་མཎྜ་ལ་ཚོགས་པ་ནས་ལོ་བཅུའི་རིང་མཐུན་འགྱུར་གནང་རྒྱུ་ཞལ་བཞེས་ཀྱིས། ཐོག་མའི་ཆར་ཨ་རིར་ཡོད་པའི་དཔལ་ལྡན་དགའ་ལྡན་ཕོ་བྲང་གི་ཏཱ་ལའི་བླ་མའི་དགེ་རྩ་ཚོགས་པ་དང་། དེ་ནས་ཨ་རི་ (FTM) བརྒྱུད་ནས་མཐུན་འགྱུར་གནང་རྒྱུ་གཏན་ཁེལ་བྱུང་ཞིང། རྒྱལ་སྤྱིའི་དགེ་ལྡན་ལྷན་ཚོགས་ཀྱིས་འགན་ལེན་གྱིས་ཕྱི་ལོ་ ༢༠༢༠ ལོ་ནས་གོ་འཛུགས་གནང་བ་ཞིག་རེད་འདུག གཞན་ཡང་། ཟླ་སྔོན་མའི་ཕྱི་ཚེས་ ༣༠ ནས་དབུ་འཛུགས་ཀྱིས་ཟླ་འདིའི་ཚེས་ ༡ བར་ཉིན་གྲངས་གསུམ་རིང་འབྲས་སྤུངས་བློ་གསལ་གླིང་སྒོམ་སྒྲུབ་དང་ཚན་རིག་ལྟེ་གནས་ཁང་དུ།  བོད་མིའི་སྒྲིག་འཛུགས་ཤེས་རིག་ལས་ཁུངས་དང་འབྲས་སྤུངས་བློ་གསལ་གླིང་སྒོམ་སྒྲུབ་དང་ཚན་རིག་ལྟེ་གནས་ཁང་ཐུན་མོང་གི་གོ་སྒྲིག་འོག་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་དང་སཱི་ཤེས་ཡོན་སློབ་གསོའི་མཐུན་སྦྱོར་བ་ཁྱོན་ ༨༠ ཙམ་ལ་ཆོས་ལུགས་ལ་མ་བརྟེན་པའི་བཟང་སྤྱོད་སློབ་གསོའི་ཐོག་ཟབ་ཁྲིད་སྦྱོང་བརྡར་ཞིག་གནང་ཡོད་པ་དང་བསྟུན།  དེ་རིང་ཕྱི་ཚེས་ ༢ ཉིན་གྱི་སྔ་དྲོ་བྱེས་ཀྱི་གདན་ས་འབྲས་སྤུངས་སྒོ་མང་གྲྭ་ཚང་གི་ཆོས་གྲྭའི་ནང་འབྲེལ་ཡོད་ལྟ་གྲུབ་དགེ་རྒན་དང་སཱི་ཤེས་ཡོན་མཐུན་སྦྱོར་བ་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་སོང་།  དེའི་སྐོར་ཤེས་རིག་ལས་ཁུངས་ཀྱི་ཤེས་ཡོན་ལྷན་ཚོགས་ཡིག་ཚང་གི་འགན་འཛིན་བསྟན་འཛིན་པདྨ་ལགས་སུ་བཀའ་འདྲི་ཞུས་ཡོད།  རྩ་བའི་ཐེངས་འདིའི་ཆོས་ལུགས་ལ་མ་བརྟེན་པའི་བཟང་སྤྱོད་སློབ་གསོའི་ཟབ་སྦྱོང་ཐོག་སྐུ་མགྲོན་གཙོ་བོ་འབྲས་སྤུངས་བློ་གསལ་གླིང་གྲྭ་ཚང་གི་མཁན་རིན་པོ་ཆེ་དགེ་བཤེས་ལྷ་རམས་པ་ཡེ་ཤེས་ལྷུན་འགྲུབ་མཆོག་ཆེད་ཕེབས་གནང་ཡོད་པ་དང་།  ཨེ་མོ་རི་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་དགེ་བཤེས་བློ་བཟང་བསྟན་འཛིན་མཆོག་ནས་ཟབ་སྦྱོང་དང་འབྲེལ་བའི་གསུང་བཤད་གནང་ཡོད་པ་མ་ཟད། ཟབ་སྦྱོང་ནང་ཤེས་རིག་ལས་ཁུངས་ཁྱབ་ཁོངས་རྒྱ་བལ་གཉིས་ཀྱི་བོད་པའི་སློབ་གྲྭ་ཁག་གི་ལྟ་གྲུབ་དགེ་རྒན་ ༤༠ དང་། གདན་ས་གསུམ་གཙོས་པའི་དགོན་སྡེ་ཁག་གི་དགེ་རྒན་ ༤༠ ཙམ་ཡོད་པ་རེད་འདུག འདི་གའི་གསར་འགོད་པས་སྦེལ་ཀོབ་ CVP སམ་བྷོ་ཊ་སློབ་གྲྭའི་སློབ་སྤྱི་ཚེ་རིང་ཆོས་འཕེལ་ལགས་དང་ཨང་རྩི་དགེ་རྒན་བསྟན་འཛིན་གསལ་སྒྲོན་ལགས་གཉིས་སུ་བཀའ་འདྲི་ཞུས་ཡོད། The post གཞུང་ཆེན་རིགས་གཅིག་རྐང་འཛིན་པ་གཙོས་ལྟ་གྲུབ་དགེ་རྒན་དང་སཱི་ཤེས་ཡོན་མཐུན་སྦྱོར་བ་རྣམས་ནས་༸གོང་ས་མཆོག་གི་མཇལ་ཁ་ཞུས་པ། appeared first on vot.

བཙན་བྱོལ་བོད་མིའི་གནས་ཡུལ་རྒྱ་གར་གཙོས་པའི་འཛམ་གླིང་ཤར་ནུབ་རྒྱལ་ཁབ་ཁག་ཏུ་གནས་བཞུགས་བོད་མི་རྒན་གཞོན་དར་གསུམ་གྱིས། མང་གཙོའི་ཁེ་དབང་ལོངས་སུ་སྤྱོད་དེ་ཁ་སང་ཕྱི་ཟླ་ ༢ ཚེས་ ༡ ཉིན་ ༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་གནང་ཡོད་པ་ལྟར། ཁ་སང་ཡུ་རོབ་རྒྱལ་ཁབ་ཁྱོན་ ༡༥ དང་བྱང་ཨ་རིའི་ས་གནས་ཁག་ ༣༤ ནང་ ༢༠༢༦ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གནང་ཡོད་པ་རེད། དེ་ཡང་ཁ་སང་ནིའུ་ཡོཀ་དང་ནིའུ་འཇར་སིས་གཙོས་པའི་བྱང་ཨ་རིར་གནས་སྡོད་བོད་མི་ཚོས་སྔ་དྲོ་ཆུ་ཚོད་ ༨།༠༠ ནས་ཕྱི་དྲོ་ཆུ་ཚོད་ ༨།༠༠ བར་འོས་ཤོག་འཕེན་རྒྱུའི་དུས་ཚོད་གཏན་འབེབས་ཀྱི་གསལ་བསྒྲགས་སྔོན་སོང་ལྟར། ས་ཚིགས་སོ་སོར་མང་ཚོགས་ནས་ཚ་ཚ་འུར་འུར་ངང་སྔོན་འགྲོའི་འོས་བསྡུ་ཆེན་མོའི་ནང་ཆ་ཤས་བླངས་འདུག །འདི་ག་རླུང་འཕྲིན་ཁང་གིས་བྱང་ཨ་རིའི་ས་གནས་ཁྲོད་ནས་བོད་མི་མི་འབོར་མང་ཤོས་ཡོད་སའི་ས་གནས་ནིའུ་ཡོཀ་དང་ནིའུ་འཇར་སིའི་འོས་བསྡུ་དེབ་འཁོད་འགན་འཛིན་ཚེ་རིང་ཕུན་ཚོགས་ལགས་སུ་འོས་བསྡུའི་གནས་ཚུལ་རྒྱུས་ལོན་ཞུས་པར་ཁོང་གིས། ནིའུ་ཡོཀ་དང་ནིའུ་འཇར་སི་ས་གནས་ཁོ་ནར་ཆ་བཞག་ན་དེབ་སྐྱེལ་བྱེད་མཁན་ ༦༠༦༥ བྱུང་ཡོད་པ་དང་། དེ་དག་ཁྲོད་ནས་དངོས་སུ་འོས་འཕེན་པར་ཡོང་མཁན་ ༣༥༠༠ ལྷག་བྱུང་ཡོད་པ་འགྲེལ་བརྗོད་གནང་བྱུང་། མ་ཟད་ཤེས་རྟོགས་བྱུང་བར་གཞིགས་ན། ཨ་རིའི་རྒྱལ་ས་གཙོས་པའི་ཡུལ་དེའི་གྲོང་ཁྱེར་ཆེ་ཁག་དང་། དེ་བཞིན་རྒྱལ་ས་ Ottawa ཨོ་ཊ་ཝས་གཙོས་པའི་ Canada ཁེ་ན་ཌའི་གྲོང་ཁྱེར་ཆེ་ཁག་སོགས་བྱང་ཨ་རིའི་ས་གནས་ཚང་མར་འོས་བསྡུའི་ལས་རིམ་ཚགས་ཚུད་ལམ་ལྷོང་བྱུང་ཡོད་པ་དང་། བཙན་བྱོལ་བོད་མིའི་འོས་བསྡུ་ཆེན་མོ་རེ་ཞིག་མཇུག་སྒྲིལ་ནས། ད་ལྟའི་ཆར་ས་གནས་ཚང་མའི་འོས་སྒམ་སྐུ་ཚབ་དོན་གཅོད་ལས་ཁུངས་སུ་འབྱོར་དང་འབྱོར་མུས་ཡིན་པ་དང་ཆབས་ཅིག ཚེས་ ༣ ཉིན་བྱང་ཨ་རིའི་ས་གནས་འོས་བསྡུའི་ཚོགས་མི་ལྷན་འཛོམས་ཐོག་འོས་ཤོག་གྲངས་བཤེར་གནང་རྒྱུ་མ་ཟད། དེ་ནས་གྲངས་བཤེར་བྱས་པའི་ཕྱོགས་བསྡོམས་ཐོ་གཞུང་རྣམས་བཙན་བྱོལ་བོད་མིའི་འོས་བསྡུའི་སྒྲིག་དོན་ལྟར་བཞུགས་སྒར་དུ་དབུས་འོས་བསྡུ་ལས་ཁང་དུ་གཏོང་རྒྱུ་ཡིན་པ་རེད་འདུག ཕྱོགས་མཚུངས་ཁ་སང་ཡུ་རོབ་རྒྱལ་ཁབ་ཁྱོན་ ༡༥ ནང་ ༢༠༢༦ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གནང་ཡོད་པ་ལྟར། ཨིན་ཡུལ་དོན་གཅོད་ཀྱི་ཁྱབ་ཁོངས་སུ་གཏོགས་པའི་ཨིན་ཡུལ་དང་ནོར་ཝེ། ཌན་མག སུའི་ཌན། ཨ་ཡར་ལན་ཌི། དེ་བཞིན་པོ་ལན་ཌི་བཅས་སུ་འོས་བསྡུ་ས་གནས་ ༨ ནང་སྲིད་སྤྱི་གཉིས་ཀྱི་སྔོན་འགྲོ་འོས་བསྡུ་གནང་ཡོད་པ་དང་། སུད་སི་དོན་ཁང་ཁྱབ་ཁོངས་སུ་སུད་སི་དང་། ཨི་ཊ་ལི། […] The post ཡུ་རོབ་དང་བྱང་ཨ་རིའི་ས་གནས་ཁག་ནང་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གནང་བ། appeared first on vot.

དེ་རིང་སྟེ། ཕྱི་ལོ་ ༢༠༢༦ ཟླ་ ༢ ཚེས་ ༡ ཉིན་ནི། ཕྱི་ལོ་ ༢༠༢༦ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཉིན་མོ་ཡིན་པ་རེད། ཐེངས་འདིའི་འོས་བསྡུའི་ནང་རྒྱལ་སྤྱིའི་ཁྱོན་དུ་གནས་སྡོད་བཙན་བྱོལ་བོད་མི་སྡོམས་ ༩༡༠༤༢ ནས་དེབ་སྐྱེལ་གནང་ཡོད་པ་དང་།  འོས་བསྡུའི་ནང་དུ་སྲིད་སྐྱོང་གི་འོས་གཞིར་བཞེངས་མཁན་མི་གྲངས་ ༤ དང་སྤྱི་འཐུས་ཀྱི་འོས་གཞིར་བཞེངས་མཁན་མི་གྲངས་ ༡༠༠ ཙམ་ཡོད་པ་རེད། དེ་རིང་འཛམ་གླིང་རྒྱལ་ཁབ་ ༢༧ ནང་གི་ས་ཚིགས་ཁག་ ༣༠༩ ནང་དུ་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་གནང་དང་གནང་མུས་མ་ཟད།  ལྷག་པར་ད་ཆ་བོད་མི་མང་དག་ཞིག་དགུན་དུས་སུད་ཚོང་གཉེར་བཞིན་པའི་དུས་སྐབས་དང་བསྟུན། དབུས་འོས་བསྡུ་ལས་ཁང་གི་ངོས་ནས་བོད་མི་སུད་ཚོང་བ་རྣམས་ཀྱི་ཆེད་དུ་རྒྱ་གར་གྱི་གྲོང་ཁྱེར་འདྲ་མིན་ ༣༡ ཙམ་གྱི་ནང་དུ་འོས་བསྡུའི་ས་ཚིགས་གོ་སྒྲིག་གནང་ཡོད་པ་རེད། རྒྱ་གར་ནང་དུ་དེ་རིང་སྔ་དྲོ་འོས་བསྡུའི་ལས་རིམ་འགོ་འཛུགས་མ་གནང་གོང་དུ། ནིའུ་ཛི་ལེནྜ་དང་ཨོ་གླིང་། ཐའེ་ཝན་དང་ཉི་ཧོང་། ལྷོ་ཀོ་རི་ཡ་སོགས་རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སྟྲེ་ལི་ཡ་ཨེ་ཤི་ཡ་རྒྱལ་ཁབ་ཁག་ཏུ་སྔོན་འགྲོའི་འོས་བསྡུའི་ལས་རིམ་ཚ་ཚ་འུར་འུར་གྱིས་གནང་ཡོད་པ་མ་ཟད། ཤེས་རྟོགས་བྱུང་བར་གཞིགས་ན། ལྷོ་ཀོ་རི་ཡའི་ནང་སྲིད་སྤྱི་གཉིས་ཀྱི་འོས་བསྡུ་ཆེན་མོ་གནང་བ་ཆེས་ཐོག་མ་དེ་ཆགས་ཀྱི་ཡོད་པ་རེད་འདུག རྒྱ་གར་ལ་མཚོན་ན་བཞུགས་སྒར་དྷ་རམ་ལ་གཙོས་བོད་མི་གནས་སྡོད་ས་གནས་ཁག་ཅིག་ཏུ་འོས་བསྡུའི་གནས་ཚུལ་རྒྱུས་ལོན་གནང་ཆེད། འདི་ག་རླུང་འཕྲིན་ཁང་གི་གསར་འགོད་པ་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་དང་། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་། རྒྱ་གར་རྒྱལ་ས་ལྡི་ལིའི་བསམ་ཡས་གླིང་བོད་མིའི་གཞིས་སྒར། དེ་བཞིན་ལ་དྭགས་དང་གཞན་ཡང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་སྒར་བཅས་སུ་ཆེད་བསྐྱོད་གནང་ཡོད།  བོད་མིའི་སྒྲིག་འཛུགས་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་བློ་བཟང་ཡེ་ཤེས་མཆོག་དང་།  བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་འདི་ག་གསར་འགོད་པའི་བཅར་འདྲི་སྐབས། རྒྱ་ནག་གི་དབང་འགྱུར་འོག་བོད་ནང་གི་བོད་མི་རྣམས་ལ་སྨྲ་བརྗོད་རང་དབང་ཙམ་ཡང་མེད་པའི་ཁྲོད།  བཙན་བྱོལ་ནང་དུ་བོད་མི་རྣམས་ནས་ལོ་ངོ་ ༦༠ ལྷག་གི་རིང་བོད་དོན་འཐབ་རྩོད་དང་བོད་མིའི་སྒྲིག་འཛུགས་རྒྱུན་སྐྱོང་གནང་བཞིན་པ་མ་ཟད།  ཚང་མས་ཕྱར་གྲུ་མཉམ་འདེགས་ཐོག་འོས་བསྡུའི་ནང་དེ་ལྟ་བུའི་ཆ་ཤས་ལེན་རྒྱུ་ཡོད་པ་ནི་རྒྱ་ནག་ལ་བརྡ་ལན་གསལ་པོ་ཞིག་ཡིན་པ་གསུངས་སོང་། རྩ་བའི་རྒྱ་གར་གི་ས་གནས་མང་ཆེ་བའི་ནང་དུ་དེ་རིང་ཕྱི་དྲོ་ཚོུད་ ༥ པ་ནས་འོས་བསྡུ་ཆེན་མོ་གྲུབ་ཟིན་པ་དང་།  དེ་བཞིན་ཡུ་རོབ་རྒྱལ་ཁབ་ཁག་ཏུ་གནང་མུས་ཡིན་ཡང་།  ཨ་མི་རི་ཀའི་ནང་མཚོན་ན་འོས་བསྡུའི་ལས་རིམ་འགོ་བཙུགས་ལ་རན་པ་ཞིག་ཆགས་ཀྱི་ཡོད། འདི་ག་རླུང་འཕྲིན་ཁང་གིས་དེ་རིང་སྔོན་འགྲོའི་འོས་བསྡུ་ཆེན་མོ་དང་འབྲེལ་ནས་གནས་ཚུལ་རྒྱུས་ལོན་གནང་སྐབས། མང་ཚོགས་ཕལ་ཆེ་བས་འོས་བསྡུའི་ས་ཚིགས་ཚང་མར་མཐུན་རྐྱེན་གྱི་གྲ་སྒྲིག་ཡག་པོ་གནང་ཡོད་སྐོར་གསུངས་སོང་བ་དེ་ལྟར་ཡང་། ཁག་ཅིག་གིས་སྲིད་སྐྱོང་དང་དབུས་གཙང་ཆོལ་ཁའི་འགེངས་ཤོག་གི་ཚོན་གཅིག་པར་སོང་འོས་སྒམ་ནང་བླུགས་སྐབས་འཁྲུག་ཉེན་ཆེ་བས་མ་འོངས་པར་ཚོན་མི་འདྲ་བ་དགོས་པ་དང་། དེ་བཞིན་འོས་ཤོག་ནང་དགང་དགོས་པའི་དོན་ཚན་བཞི་པོ་རྣམས་སྟབས་བདེ་པོ་བཟོ་དགོས་པ། […] The post བཙན་བྱོལ་བོད་མི་རྣམས་ཀྱིས་རྒྱལ་ཁབ་ ༢༧ ནང་ ༢༠༢༦ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་འཕེན་པ། appeared first on vot.

འདི་ལོ་བོད་མི་རྣམས་ནས་རྣམ་པ་འདྲ་མིན་ཐོག་༸རྒྱལ་བའི་གོ་སྟོན་སྲུང་བརྩི་ཞུ་བཞིན་པའི་ཁྲོད་འདིར། ལྷོ་ཀོ་རི་ཡཱའི་བོད་རིགས་སྤྱི་མཐུན་ཚོགས་པས་ཟླ་བ་འདིའི་ཕྱི་ཚེས་ ༢༡ ནས་ ༢༨ བར་བདུན་གཅིག་རིང་། ཡུལ་དེའི་ས་གནས་ཁག་བཞིའི་ནང་སྤྱི་ནོར་ ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་མཛད་འཕྲིན་མཚོན་པའི་པར་རིས་འགྲེམས་སྟོན་གོ་སྒྲིག་དང་། ཉི་འོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཁུལ་དེར་ཆེད་ཕེབས་ཀྱིས་ཁོང་ནས་བརྩམས་པའི་དཔེ་དེབ་འབྲུག་གི་དུག་རླུང་ལ་ཁ་གཏད་པ་ཞེས་པ་ཀོ་རི་ཡཱའི་སྐད་ཡིག་ཏུ་སྒྱུར་ཡོད་པ་དེ་དབུ་འབྱེད་གནང་ཐོག  ༸གོང་ས་མཆོག་གི་ཐུགས་བསྐྱེད་དམ་བཅའ་བཞི་ངོ་སྤྲོད། དེ་བཞིན་བོད་དང་ཀོ་རི་ཡཱའི་བར་དུས་རབས་བདུན་པའི་ནང་བཙན་པོ་སྲོང་བཙན་སྒམ་པོ་དང་། དུས་རབས་ ༡༣ པའི་ནང་འགྲོ་མགོན་ཆོས་རྒྱལ་འཕགས་པའི་སྐབས་འབྲེལ་བ་བྱུང་བའི་ལོ་རྒྱུས། རྒྱ་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་ཇི་ལྟར་བྱས་ཚུལ། བོད་ནང་རྒྱ་གཞུང་གིས་ཆེད་འཛུགས་བྱས་པའི་མི་སེར་སྤེལ་ཡུལ་གྱི་གཏན་འཇགས་སློབ་གྲྭ་དང་དེའི་རྒྱབ་ལྗོངས་ཀྱི་སྲིད་བྱུས། དེ་བཞིན་༸སྐུའི་ཡང་སྲིད་ཐད་ཐེ་བྱུས་བྱེད་བཞིན་པའི་གནད་དོན་སྐོར་གསུང་བཤད་དང་དྲི་བ་དྲི་ལན་སོགས་ཀྱི་ལས་རིམ་བསྐྱངས་འདུག The post ལྷོ་ཀོ་རི་ཡཱར་༸གོང་ས་མཆོག་གི་མཛད་འཕྲིན་མཚོན་པའི་པར་རིས་འགྲེམས་སྟོན་དང་དཔེ་དེབ་ངོ་སྤྲོད། appeared first on vot.

ཁ་སང་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག་རྡ་ས་ས་གནས་འགོ་འཛིན་ཚོགས་ཁང་དུ། ༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་དགོངས་པ་ཆོས་དབྱིངས་སུ་ཐིམས་ནས་ལོ་ངོ་ ༣༧ འཁོར་བའི་ཉིན་མོ་དང་བསྟུན། ༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་ལ་བཀའ་དྲིན་རྗེས་དྲན་དང་བོད་ཀྱི་སྐད་ཡིག་ཉིན་མོ་སྲུང་བརྩིའི་མཛད་སྒོ་ཞིག་སྐོང་འཚོགས་གནང་སོང་། སྐབས་དེར་དབུས་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དྲུང་ཆེ་བསྟན་འཛིན་བློ་བཟང་ལགས་ཀྱི་གཙོ་སྐྱོང་འོག་སཱ་ར་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་འབུམ་རམས་པ་གཙང་ཕྲུག་སྟོབས་ལགས་དང་། དགའ་ལྡན་ཕོ་བྲང་གི་ལས་བྱེད་འབུམ་རམས་པ་རོང་བོ་བློ་བཟང་སྙན་གྲགས་ལགས། བོད་ཀྱི་ཤེས་ཡོན་སློབ་གསོའི་སློབ་སྟོན་པ་དང་བོད་དོན་འཐབ་རྩོད་པ་འབུམ་རམས་པ་རྒྱལ་ལོ་ལགས། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཞོན་ངག་དབང་འོད་འབར་ལགས་ཀྱིས་བཅས་ཀྱིས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གི་བོད་ཀྱི་ཆོས་དང་ཆབ་སྲིད། རིག་གནས་གསུམ་གྱི་ཐོག་མཛད་རྗེས་ཇི་ལྟར་བཞག་པའི་ཐོག་གསུང་བཤད་གནང་སོང་། དེའང་གཏམ་བཤད་པ་རྣམས་ཀྱིས་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་ཆེན་པོ་མཆོག་ནི་བོད་ལ་བཀའ་དྲིན་ཤིན་ཏུ་ཆེ་བའི་སྐྱེས་ཆེན་དམ་པ་ཞིག་ཡིན་པ་མ་ཟད། བོད་ཀྱི་སྐད་ཡིག་དང་ཆོས། རིག་གཞུང་། འཐབ་རྩོད། ཆབ་སྲིད་སོགས་ཀྱི་ཐོག་ལ་ཤིན་ཏུ་བཀའ་དྲིན་ཆེ་བའི་མི་སྣ་ཞིག་ཡིན་པ་ནན་བཤད་གནང་བ་མ་ཟད། རིན་པོ་ཆེ་དམ་པ་དེ་ཉིད་རྒྱ་ནག་གི་ཇི་ལྟར་བཀྲོངས་ཚུལ་བཅས་མངོན་གསལ་གནང་སོང་། མ་ཟད་སྐབས་དེར་སཱ་ར་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་འབུམ་རམས་པ་གཙང་ཕྲུག་སྟོབས་ལགས་ཀྱིས། ཕྱི་ལོ་ ༡༩༨༩ ལོར་༸ཀུན་གཟིགས༸པཎ་ཆེན་རིན་པོ་ཆེ་མཆོག་གིས་བོད་ཡིག་སྦྱོང་རྒྱུ་ནི་རང་གི་མི་རིགས་ཀྱི་འོས་འགན་ཞིག་ཡིན་པས། ཕན་ཐོགས་རུང་མ་ཐོགས་རུང་ཅི་ནས་ཀྱང་བོད་ཡིག་སྦྱོང་དགོས། བོད་རིགས་ས་ཁུལ་དུ་བོད་སྐད་མི་ཤོད་པ་དང་བོད་ཡིག་མ་བཀོལ་ན། ས་འདི་ནས་བོད་རིགས་ཞེས་པའི་མི་རིགས་འདི་རང་ཤུགས་སུ་རྩ་མེད་འགྲོ་ངེས་ཡིན། དེར་བརྟེན་ཁྱོད་ཚོས་རང་མི་རིགས་གི་སྐད་ཡིག་དང་རིག་གནས་རྒྱུན་འཛིན་གོང་འཕེལ་གཏོང་རྒྱུ་དེ་བྱ་བ་གལ་ཆེན་ཞིག་ཏུ་བརྩི་དགོས་ཞེས་བཀའ་གནང་བ་ལུང་འདྲེན་དང་སྦྲགས། ༸པཎ་ཆེན་སྐུ་ཕྲེང་བཅུ་པ་ཆེན་པོའི་མཆོག་གིས་སྐུ་ཚེ་ཡོངས་རྫོགས་བོད་ཀྱི་ཆེད་དུ་གཏོང་བ་རེད་ཅེས་གསུངས་སོང་། མཛད་སྒོ་གྲུབ་མཚམས་སུ་འདི་ག་རླུང་འཕྲིན་ཁང་གིས་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་ཚེ་རིང་ཆོས་འཕེལ་ལགས་སུ་བཅར་འདྲི་ཞུས་པར་ཁོང་གིས། བོད་ཀྱི་སྐད་ཡིག་ནི་བོད་མི་རིགས་ལ་གལ་འགངས་ཆེ་ཤོས་ཤིག་ཡིན་པ་མ་ཟད། བོད་ནང་གི་བོད་མི་ཚོར་རྒྱ་ནག་གཞུང་གིས་བཙན་དབང་གིས་རང་ཉིད་ཀྱི་སྐད་ཡིག་ལ་སློབ་སྦྱོང་གནང་རྒྱུའི་གོ་སྐབས་མེད་པ་བཟོ་བཞིན་པའི་གནས་སྟངས་ཤིག་ཡིན་སྟབས། བཙན་བྱོལ་ནང་དུ་བཞུགས་པའི་བོད་མི་རྣམས་ཀྱི་བོད་ཀྱི་སྐད་ཡིག་སོགས་ལ་བདག་ཉར་བྱེད་རྒྱུ་གལ་ཆེ་ཡིན་པ་གསུངས་གནང་སོང་། རྩ་བའི་༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་ཕྱི་ལོ་ ༡༩༨༩ ཟླ་ ༡ ཚེས་ ༢༨ ཉིན་བོད་གཙང་བཀྲིས་ལྷུན་པོའི་གདན་ས་རུ་དགོངས་པ་ཆོས་དབྱིངས་སུ་ཐིམ་ཚུལ་བསྟན་པའི་གནས་སྟངས་བྱུང་ཡོད་པ་མ་ཟད། ༸པཎ་ཆེན་རིན་པོ་ཆེ་མཆོག་གི་སྐུ་ཚེ་ཡོངས་རྫོགས་བོད་ཀྱི་ཆོས་དང་རིག་གཞུང་། སྐད་ཡིག་སོགས་ཀྱི་ཆེད་དུ་གཏོང་བར་བརྟེན། དབུས་བོད་ཀྱི་གཞོན་ནུ་ལྷན་ཚོགས་ཀྱི་འགན་འཛིན་ལྷན་ཚོགས་ཐེངས་ ༤༨ པའི་གྲོས་གཞི་དོན་ཚན་ ༤ པ་ག་པའི་གྲོས་ཆོད་དང་པོའི་ནང་བོད་ཕྱི་ནང་གི་རྒྱལ་སྤྱི་དཔའ་བོ་དཔའ་མོ་ཚོའི་མངོན་འདོད་གྲུབ་ཆེད་དུ་གཞོན་ནུ་དབུས་སྤྱི་ཁྱབ་རྒྱུན་ལས་ཁང་ནས། ཉམས་ཞིབ་ཚོགས་ཆུང་ཞིག་ཆེད་འཛུགས་ཀྱིས། བོད་རྒྱལ་ཁབ་དང་མི་རིགས་ཀྱི་བླ་སྲོག་ཏུ་གྲུབ་པའི་བོད་ཀྱི་སྐད་ཡིག་ཉིན་མོ་ཞིག་གཏན་འབེབས་དང་། འདི་ཉིན་ས་གནས་གཞོན་ནུ་ཁག་ནས་བོད་ཀྱི་སྐད་ཡིག་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་དུ་ལས་འགུལ་སྤེལ་ཏེ། ཡོངས་ཁྱབ་སྲུང་བརྩི་བྱ་རྒྱུ་ཞེས་ཡོངས་ཁྱབ་གཏན་འབེབས་བྱུང་དོན་ལྟར། ཕྱི་ལོ་ ༢༠༡༨ ལོའི་འགན་འཛིན་ལྷན་ཚོགས་ཐེངས་ ༤༩ པས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པ་རིན་པོ་ཆེ་མཆོག་གིས་བོད་ཀྱི་སྐད་ཡིག་དང་རིག་གཞུང་ཆགས་འཇིག་དང་གཉན་ཕྲང་གི་དུས་སྐབས་དེར་བོད་ཀྱི་སྐད་ཡིག་སྦྱོང་སྤྱོད་སྤེལ་གསུམ་ལ་རླབས་ཆེན་གྱི་མཛད་རྗེས་འཇོག་གནང་མཛད་མཁན་གྱི་སྐྱེས་བུ་དམ་པ་ཞིག་ཡིན་པར་བརྟེན། ལོ་ལྟར་ཟླ་ ༡ ཚེས་ […] The post ༸པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གི་བཀའ་དྲིན་རྗེས་དྲན་དང་བོད་ཀྱི་སྐད་ཡིག་ཉིན་མོ་སྲུང་བརྩི། appeared first on vot.

དེ་རིང་དབུས་འོས་བསྡུ་ལས་ཁང་ནས་ཕྱི་ལོ་ ༢༠༢༥།༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་དོན་དང་འབྲེལ་བའི་གསར་འགོད་ལྷན་ཚོགས་ཐེངས་གསུམ་པ་སྐོང་འཚོགས་གནང་སྟེ་སྦེལ་ཀོབ་ལུགས་བསམ་གཞིས་མི་ངག་དབང་བློ་གྲོས་སམ་སྨན་པ་རྟ་རར་གཞུང་འབྲེལ་གདམ་བྱ་འདེམ་བྱེད་ཀྱི་ཐོབ་ཐང་ཕྲོག་པ་དང་། གཞན་ཡང་གནས་ཆུང་སྐུ་ཞབས་རྡོ་རྗེ་ལགས་དང་སྲིད་སྐྱོང་འོས་མི་དབུ་དཀར་ཚང་སྐལ་བཟང་རྡོ་རྗེ་ལགས་གཉིས་སུ་ཉེན་བརྡ་བཏང་ཡོད་པའི་གསལ་བསྒྲགས་སྤེལ་སོང་། དེ་ཡང་དེ་རིང་སྔ་དྲོ་ཆུ་ཚོད་ ༡༡ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་དུ། དབུས་འོས་བསྡུའི་སྤྱི་ཁྱབ་འགན་འཛིན་བློ་བཟང་ཡེ་ཤེས་ལགས་དང་འགན་འཛིན་ལས་འཕར་སྤྱི་ཟུར་ཚེ་རིང་གཡུ་སྒྲོན་ལགས།  དེ་བཞིན་དྲུང་ཆེ་ཟུར་པ་སྣང་ས་ཆོས་སྒྲོན་ལགས་བཅས་དབུ་བཞུགས་ཐོག་གསར་འགོད་ལྷན་ཚོགས་ཤིག་སྐོང་འཚོགས་དང་འབྲེལ། ད་ལན་སྲིད་སྤྱི་གཉིས་ཀྱི་འོས་བསྡུ་ཆེན་མོ་འདི་བཞིན་རྒྱལ་ཁབ་ ༢༧ ནང་ས་གནས་འོས་བསྡུ་ལས་ཁང་ ༨༧ འོག་འོས་བསྡུ་བྱ་ཡུལ་གྱི་སྡེ་ཚན་གྲངས་ ༣༠༩ ཚོགས་ཆུང་དང་། ལས་བྱེད་ཁྱོན་གྲངས་ ༡༧༣༧ སུད་ཚོང་ཁག་གྲངས་ ༣༡ བཅས་སུ་སྔོན་འགྲོའི་འོས་བསྡུ་ལག་བསྟར་ཞུ་རྒྱུ་ཡིན་པ་གསུངས་སོང་། མ་ཟད་དེ་རིང་གི་གསར་འགོད་ལྷན་ཚོགས་ཐོག་དབུས་འོས་བསྡུ་འགན་འཛིན་དང་འགན་འཛིན་ལས་འཕར་རྣམ་པས་ཉེ་སྔོན་གདན་ས་ཆེན་པོ་དཔལ་ལྡན་འབྲས་དཀར་སྤུངས་པའི་བླ་སྤྱི་ནས་གཞུང་བསྟེན་དགྲ་ལྷ་གནས་ཆུང་ཆོས་རྒྱལ་ཆེན་པོའི་སྤྱན་འདྲེན་ཞུས་སྐབས་ཀྱི་བཀའ་ལུང་དང་འབྲེལ། སྐུ་ཞབས་རྡོ་རྗེ་ལགས་ཀྱིས་སྲིད་སྤྱི་གཉིས་ཀྱི་འོས་བསྡུའི་ལས་རིམ་འགྲོ་བཞིན་པའི་སྐབས་སུ་འཕྲོས་བཤད་ཀྱིས་ཆབ་སྲིད་དང་འབྲེལ་བའི་བཀའ་མོལ་མང་དག་གནང་རྐྱེན་བཙན་བྱོལ་བོད་མིའི་འོས་བསྡུའི་སྒྲིག་གཞི་དང་རྩ་འཛིན་ལམ་སྟོན་བཅས་འགལ་འཛོལ་བྱུང་བས་ཁོང་ལ་ཉེན་བརྡ་བཏང་ཡོད་པ་བཅས་ཀྱི་གསལ་བཤད་གནང་སོང་བ་དང་ཆབས་ཅིག དེ་བཞིན་སྦེལ་ཀོབ་ལུགས་བསམ་གཞིས་མི་ངག་དབང་བློ་གྲོས་སམ་སྨན་པ་རྟ་ར་ལགས་ཀྱིས་རང་གི་སྤྱི་ཚོགས་དྲ་རྒྱའི་ཐོག་སྐབས་ ༡༧ པའི་སྤྱི་འཐུས་ལྷ་རྒྱ་རྒྱ་རི་རྣམ་རྒྱལ་སྒྲོལ་དཀར་ལགས་སུ་སྒྲོ་བཏགས་དང་གཞི་མེད་སྐྱོན་འཛུགས་བྱེད་པར་འོས་བསྡུའི་སྒྲིག་གཞིར་འགལ་འཛོལ་བྱུང་བའི་ར་སྤྲོད་ཀྱིས་ལོ་བརྒྱད་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུའི་ཐག་གཅོད་གནང་ཡོད་པ་གསུངས་སོང་། དེ་བཞིན་སྲིད་སྐྱོང་འོས་མི་ཨ་རི་སྐུ་ཚབ་དོན་གཅོད་ཟུར་པ་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་སྲིད་སྐྱོང་གི་འོས་མིར་བཞེངས་རྒྱུའི་གསལ་བསྒྲགས་ཤིག་སྤེལ་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བའི་བཀའ་མོལ་གནང་ཕྱོགས་ཞིག་བཅའ་སྒྲིག་དགོངས་དོན་དང་འགལ་འཛོལ་གྱུར་ཉེན་ཡོད་པར་སླད་ཕྱིན་འདི་རིགས་མི་ཡོང་བའི་ཐུགས་གཟབ་གནང་དགོས་པའི་ཉེན་བརྡ་བཏང་ཡོད་པ་གསུངས་སོང་། དབུས་འོས་བསྡུ་ལས་ཁང་ངོས་ནས་ད་དུང་། སྔོན་འགྲོའི་འོས་བསྡུ་འདི་བཞིན་སླེབས་ལ་ཉེ་སྟབས་ས་གནས་འོས་བསྡུའི་ལས་ཁང་དང་སྲི་ཞུའི་ལས་བྱེད་རྣམ་པ། འོས་མི་རྣམ་པ་དང་གསར་འགྱུར་བརྒྱུད་ལམ་ཁག དེ་བཞིན་གཞུང་འབྲེལ་མ་ཡིན་པའི་ཚོགས་སྡེ་ཁག མང་ཚོགས་བཅས་ལ་འོས་བསྡུའི་སྐབས་བྱེད་སྒོ་ལམ་སྟོན་ཁག་ཅིག་བསྐྱར་ནན་དང་དེ་བཞིན་དབུས་འོས་བསྡུ་ལས་ཁང་ནས་རང་དབང་ལྡན་པའི་ཐོག་ལས་དོན་གྲུབ་ཀྱི་ཡོད་པ་མང་ཚོགས་ཀྱི་མཁྱེན་རྟོགས་སླད། དོན་ཚན་བདུན་ཅན་གྱི་གསལ་བཤད་ཅིག་གནང་སོང་བའི་ནང་དུ་། བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་གོ་སྒྲིག་འོག་རིང་མིན་ཕྱི་ཟླ་ ༢ ནང་བོད་རང་དབང་འཐབ་རྩོད་པའི་ལྷན་ཚོགས་ཞེས་པའི་བརྗོད་གཞིའི་ཐོག་གི་ཚོགས་འདུ་རྒྱས་འཛོམས་ཤིག་ཚོགས་གཏན་འཁེལ་ཡོད་པ་དེ་འོས་བསྡུའི་ལས་རིམ་འགྲོ་བཞིན་པའི་སྐབས་གནང་འོས་མ་མཆིས་པས་དངོས་གཞིའི་འོས་བསྡུ་མ་གྲུབ་བར་ཕར་འགྱངས་གནང་བ་བྱུང་ཡོད་ཅེས་སྙན་སེང་ཞུས་སོང་བ་མ་ཟད།  ད་ལྟའི་སྲིད་སྐྱོང་ལས་ཐོག་མཆོག་ནས་གཏན་འབེབས་ཟིན་པའི་འོས་བསྡུའི་ལས་རིམ་དེ་བཞིན་སྔ་སྣུར་ཡོང་བའི་དགོངས་འཆར་གནང་ཡོད་ཀྱང་དབུས་འོས་བསྡུ་ལས་ཁང་ནས་དེར་དང་ལེན་ཞུས་མེད་ཅིང་། ད་དུང་སྲིད་སྐྱོང་མཆོག་ལ་དེ་རིང་གི་གསར་འགོད་ལྷན་ཚོགས་དེའི་ཐོག་ནས་ལྡོག་ཏུ་མེད་པའི་ལས་དོན་ཁག་ཕུད་གཞུང་དོན་ཕྱོགས་བསྐྱོད་དང་རྒྱུན་ལྡན་མིན་པའི་གཞུང་འབྲེལ་མཛད་སྒོ་ཁག་དངོས་གཞིའི་འོས་བསྡུ་མ་གྲུབ་པའི་བར་ཕྱིར་འགྱངས་གནང་སྐྱོང་ཡོང་བའི་སྐུལ་འདེབས་ཞུ་རྒྱུ་ཡིན་པ་གསུངས་སོང་། The post སྦེལ་ཀོབ་ལུགས་བསམ་གཞིས་མི་གཅིག་ལ་གདམ་བྱ་འདེམ་བྱེད་ཀྱི་ཐོབ་ཐང་ཕྲོག་པ་དང་གཞན་ཞིག་ལ་ཉེན་བརྡ་བཏང་བ། appeared first on vot.

དེ་རིང་ཕྱི་ཟླ་ ༡ པོའི་ཚེས་ ༢༣ ཉིན་རྒྱ་གར་ལྷོ་ཕྱོགས་སྦེལ་ཀོབ་ཏུ་བཀའ་ཤག་སྐབས་ ༡༦ པའི་གཏན་འཇགས་འཐབ་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་ ༨ འགོ་འཛུགས་གནང་འདུག དེ་ཡང་དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། ཐེངས་འདིའི་གཏན་འཇགས་འཐབ་བྱུས་འཆར་འགོད་ཚོགས་ཆུང་གི་ཚོགས་འདུ་འདི་བཞིན། དེ་རིང་ནས་འགོ་འཛུགས་ཀྱི་གནངས་ཚེས་ ༢༥ བར་ཉིན་གྲངས་ ༣ རིང་འཚོགས་རྒྱུ་ཡིན་པ་དང་། ཚོགས་འདུའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དབུས་པའི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག ཚོགས་ཆུང་གི་སློབ་སྟོན་པ་བཀའ་ཟུར་བསྟན་པ་ཚེ་རིང་ལགས། ༸གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་ལགས། དམིགས་བསལ་གདན་ཞུས་དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་ལགས། དེ་བཞིན་བཀའ་ཤག་གི་ཆབ་སྲིད་དྲུང་ཆེ་བཀྲ་ཤིས་རྒྱ་མཚོ་ལགས། བདེ་སྲུང་དྲུང་ཆེ་ཀརྨ་རིན་ཆེན་ལགས། ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་ཟླ་བ་ཚེ་རིང་ལགས་བཅས་གཏན་འཇགས་འཐབ་བྱུས་ཚོགས་ཆུང་གི་ཚོགས་མི་རྣམས་ལྷན་ཞུགས་གནང་འདུག གནད་དོན་དེའི་སྐོར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་སུ་བཀའ་འདྲི་ཞུས་ཡོད་པས་གོང་གི་སྒྲ་སྒམ་ནས་གསན་ཐུབ། The post གཏན་འཇགས་འཐབ་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་ ༨ པ་སྦེལ་ཀོབ་ཏུ་དབུ་འཛུགས། appeared first on vot.

ཁ་སང་ཕྱི་ཟླ་ ༡ ཚེས་ ༢༡ ༸རྒྱལ་བའི་སྐུའི་བླ་གཟའ་དང་བསྟུན། ཁྲིག་སེ་ཤེས་རབ་སྐྱེད་ཚལ་གླིང་དཔེ་མཛོད་ཁང་དང་། ཤེས་ཡོན་བསྟི་གནས་ཁང་གི་གོ་སྒྲིག་འོག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་དགུང་ལོ་དགུ་བཅུར་ཕེབས་པའི་བྱམས་བརྩེའི་ལོ་སྲུང་བརྩི་ཞུས་ཏེ། སློབ་ཕྲུག་ནང་ཁུལ་གཏམ་བཤད་དང་རི་མོའི་འགྲན་བསྡུར་གྱི་ལས་འགུལ་ཞིག་སྤེལ་སོང་།  རྩ་བའི་༸གོང་ས་མཆོག་གིས་དེ་སྔོན་ས་གནས་ཡུལ་མི་རྣམས་ནས་སོ་སོའི་དགོན་པར་ཞབས་འདེགས་གང་ཐུབ་ཞུས་ཡོད་པར། ད་ཆ་ཡུལ་མི་རྣམས་ཀྱི་བདེ་སྡུག་དང་ཤེས་ཡོན་སློབ་སྦྱོང་སོགས་ལ་དགོན་པའི་ངོས་ནས་ཞབས་འདེགས་ཞུ་དགོས་ཞེས་བཀའ་སློབ་ལམ་སྟོན་ཕེབས་པ་བཞིན། ༸སྐྱབས་རྗེ་ཁྲིག་སེ་རིན་པོ་ཆེས་གཙོས་པའི་ཁྲིག་སེ་ཤེས་རབ་སྐྱེད་ཚལ་གླིང་དཔེ་མཛོད་ཁང་དང་། ཤེས་ཡོན་བསྟི་གནས་ཁང་གི་ཚོགས་སྡེ་གཉིས་ནས། ས་ཁུལ་ ༡༢༠ ཙམ་ནས་སློབ་ཕྲུག་ ༣༥༠ ཙམ་ལ་དགུན་ཁའི་གུང་སེང་དང་བསྟུན།  རིན་མེད་ཐོག་ཟུར་ཁྲིད་ཉིན་ ༤༥ རིང་འཚོགས་བཞིན་ཡོད་ཅིང་། དེའི་ཁྲོད་ཉིན་དགུང་གི་ཞལ་ལག་དང་། སློབ་ཕྲུག་ཚོ་རང་ཁྱིམ་དུ་སྐྱེལ་རྒྱུ་སོགས་ཀྱི་མཐུན་རྐྱེན་སྦྱོར་གྱི་ཡོད་པ་མ་ཟད། ད་རེས་དགུན་ཁའི་ཟུར་ཁྲིད་དེ་ཐེངས་བདུན་པ་ཆགས་ཀྱི་འདུག ཁྲིག་སེ་ཤེས་རབ་སྐྱེད་ཚལ་གླིང་དཔེ་མཛོད་ཁང་དང་། ཤེས་ཡོན་བསྟི་གནས་ཁང་གི་དབུ་འཛིན་དགེ་བཤེས་བྱམས་པ་བཀྲ་ཤིས་ལགས་སུ་མཛད་རིམ་དེ་དང་འབྲེལ་ནས་བཅར་འདྲི་ཞུས་པར་ཁོང་གི་གསུང་དོན་དུ།  དགུན་ཁའི་ཟུར་ཁྲིད་དེའི་ནང་ལ་དྭགས་བྱང་ཐང་དང་། ལྡུམ་ར། ཟངས་དཀར། གཤམ་སྟོད་བར་གསུམ། ཆོས་ལུགས་དང་མི་རིགས་དབྱེ་བ་མེད་པའི་སྒོ་ནས་སློབ་ཕྲུག་རྣམས་ལ་སློབ་སྦྱོང་གནང་བཞིན་ཡོད་པར་མི་མང་ཚོས་ཀྱང་དགའ་མོས་ཆེན་པོ་གནང་གི་འདུག་ཅེས་གསུངས་སོང་། གཞན་ཡང་དགུན་ཁའི་ཟུར་ཁྲིད་གནང་བའི་ཁྲོད་༸གོང་ས་མཆོག་གིས་ཆོས་ལུགས་དང་མ་འབྲེལ་བའི་བཟང་སྤྱོད་འམ་ SEE Learning ཡང་སློབ་ཁྲིད་གནང་གི་ཡོད་པ་རེད། གཞན་སློབ་ཕྲུག་བར་གྱི་གཏམ་བཤད་འགྲན་བསྡུར་གྱི་བརྗོད་གཞི་ནི། ༸གོང་ས་མཆོག་གི་ཐུགས་བསྐྱེད་དམ་བཅའ་བཞི་དང་། ཁོང་གི་འཛམ་གླིང་ཡོངས་ལ་བྱམས་དང་སྙིང་རྗེས་སྐྱོང་བཞིན་ཡོད་པའི་སྐོར་ཡིན་པ་དང་། མཉམ་ཞུགས་ཁྲོད་སློབ་མ་ཉི་ཤུ་ཙམ་གྱི་དབྱིན་སྐད་དང་། བོད་ཡིག ཨུར་དུ། ཧིན་དྷི་བཅས་སྐད་ཡིག་བཞིའི་ལམ་ནས་གཏམ་བཤད་གནང་བ་དང་། སློབ་མ་མང་དག་ཅིག་ནས་རི་མོའི་འགྲན་བསྡུར་ནང་མཉམ་ཞུགས་གནང་སོང་། ཕྱོགས་མཚུངས་ཁ་སང་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་གོ་སྒྲིག་ཚོགས་ཆུང་ནས་ས་གནས་མང་ཚོགས་ཀྱི་རྒྱབ་སྐྱོར་འོག་རྒྱལ་ས་གླེ་ཁུལ་དུ་དུད་འགྲོ་སེམས་ཅན་རྣམས་ལ་ཟས་རིགས་སྦྱིན་གཏོང་གི་དགེ་བའི་ལས་འགུལ་སྤེལ་བའི་བརྒྱུད་ནས་བྱམས་བརྩེའི་ལོ་སྲུང་བརྩི་གནང་འདུག དེའང་ལས་འགུལ་བ་རྣམས་ནས་ས་ཁུལ་གཙོ་བོ་བཞི་སྟེ། ཕོ་བྲང་དགའ་འཕེལ་གླིང་དུ་ར་ལུག་དང་། བྱམས་པ་དུད་འགྲོ་ཉམ་ཐག་སྐྱོབ་གསོ་ཁང་དུ་ཁྱི་འཁྱམས། དེ་བཞིན་ Live to Rescue ཞེས་པའི་སེམས་ཅན་སྨན་བཅོས་དང་སྐྱོབ་གསོ་ཁང་། ཨོ་རྒྱན་རིན་པོ་ཆེ་དགོན་པར་རི་བོང་དང་བྱ་རིགས་བཅས་ལ་བཟའ་བཅའ་འབུལ་ཡོད་འདུག ལས་འགུལ་དེའི་དམིགས་ཡུལ་གཙོ་བོ་ནི། ༸གོང་ས་མཆོག་གི་བྱམས་བརྩེའི་བཀའ་སློབ་ལམ་སྟོན་ཁྱབ་སྤེལ་དང་། […] The post ལ་དྭགས་ཁྲིག་སེ་དགོན་པར་ཤེས་ཡོན་དང་སྦྱིན་གཏོང་བཅས་ཀྱི་ལས་འགུལ་ཐོག་ནས་བྱམས་བརྩེའི་ལོ་སྲུང་བརྩི། appeared first on vot.

དབུས་བོད་ཀྱི་བུད་མེད་ལྷན་ཚོགས་ཀྱི་ངོས་ནས་རྒྱ་གར་གྱི་རྒྱལ་ས་ལྡི་ལིའི་ Press Club of India ཞེས་པར་གསར་འགོད་ལྷན་ཚོགས་ཤིག་བསྐྱངས་ཏེ།    ཁོང་ཚོའི་ངོས་ནས་རྒྱ་གར་གྱི་སྲིད་བློན་ མོ་ཌི་མཆོག་གི་དབུས་པའི་རྒྱལ་ས་ལྡི་ལིའི་ནང་རྟེན་གཞི་བྱས་པའི་ཕྱི་རྒྱལ་གཞུང་ཚབ་ཁག་སུམ་ཅུ་ཙམ་ལ་བོད་ནང་གི་ཛ་དྲག་ཁོར་ཡུག་གནས་སྟངས་དང་།   རྒྱ་གར་གཞུང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་ Bharat Ratna འབུལ་བཞེས་གནང་དགོས་པ།   བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་སྲུང་སྐྱོབ་ཐུབ་ཐབས།  ཉེས་མེད་བོད་མིའི་ཆབ་སྲིད་བཙོན་པ་རྣམས་གློད་བཀྲོལ་ཡོང་ཐབས་དང་།  དབུ་མའི་ལམ་གི་ཐོག་ནས་བོད་དོན་བདེན་མཐའ་སེལ་བའི་ཐབས་ལམ་བསྐྲུན་ཐབས་ཡོང་བ་བཅས་ཀྱིས་དོན་ཚན་ལྔ་ཡོད་པའི་ཞུ་སྐུལ་གནང་འདུག གསར་འགོད་ལྷན་ཚོགས་དེའི་ཐོག་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ཀྱི་དབྱིན་སྐད་དང་།    ཟུང་འབྲེལ་དྲུང་ཆེ་ཆོས་དབྱིངས་སྒྲོལ་མ་ལགས་ནས་ཧིན་རྡི་སྐད་ཡིག་སོ་སོར་འབོད་སྐུལ་དགོས་འདུན་དེ་དག་གསར་འགོད་པ་ཚོར་སྙན་སྒྲོན་དང་སྦྲགས།   རྒྱལ་སྤྱིའི་སྤྱི་ཚོགས་ཀྱི་ངོས་ནས་ཀྱང་ཛ་དྲག་གི་གནད་དོན་དེ་དག་ཐོག་རྒྱབ་སྐྱོར་གནང་དགོས་པའི་སྐུལ་མ་ཞུས་པ་མ་ཟད།   སྐབས་དེའི་གསར་འགོད་ལྷན་ཚོགས་ཐོག་ད་དུང་  Bharat Tibbat Samanvay Sangh ཞེས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ Sandhya མཆོག་ནས་ཀྱང་རྒྱ་ནག་གཞུང་གི་ངོས་ནས་བོད་ནང་གི་བཅའ་སྡོད་སློབ་གྲྭའི་སྲིད་བྱུས་འོག་བོད་པའི་ངོ་བོ་རྩ་མེད་གཏོང་བའི་ཛ་དྲག་གི་སྲིད་བྱུས་དང་།  རྒྱ་གར་གཞུང་མང་གཉིས་ཀྱི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེ་བསྟོད་ཀྱི་གཟེངས་རྟགས་ཕུལ་དགོས་པ་སོགས་ཀྱི་གནད་དོན་ཡང་གླེང་སློང་གནང་སོང་། The post བུད་མེད་ལྷན་ཚོགས་ཀྱིས་རྒྱ་གར་སྲིད་བློན་དང་ཕྱི་རྒྱལ་གཞུང་ཚབ་སུམ་ཅུ་ཙམ་ལ་བོད་དོན་ཞུ་སྐུལ་གནང་འདུག appeared first on vot.

རྒྱ་གར་བ་སྐུ་ཞབས་  Sandesh Meshram ལགས་ཀྱིས་ཟླ་བ་སྔོན་མའི་ཚེས་ ༩ ཉིན་འཕགས་བོད་ས་མཚམས་འབུམ་ལ་ནས་འགོ་འཛུགས་གནང་བའི་བོད་དོན་ཆེད་རྐང་འཁོར་སྐོར་སྐྱོད་དེ་བཞིན་ཁ་ཉིན་ Meghalaya མངའ་སྡེའི་རྒྱལ་ས་ཤི་ལོང་ནང་མཇུག་སྒྲིལ་གནང་འདུག དེའང་བོད་ཀྱི་གྲོགས་པོ་དང་རྒྱ་གར་བོད་དོན་རྒྱབ་སྐྱོར་ཚོགས་པའི་ས་གནས་འབྲེལ་མཐུད་པ་ Sandesh Meshram སཱན་ཌེ་ཤ་མཱེ་ཤེ་རམ་མམ་བསམ་གཏན་ཡེ་ཤེས་ལགས་ཀྱིས། འདི་ལོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གོ་སྟོན་དང་བསྟུན་བྱམས་བརྩའི་ལོ་སྲུང་བརྩའི་ཆ་ཤས་སུ། སྔ་ལོའི་ཕྱི་ཟླ་ ༡༢ པའི་ཚེས་ ༩ ཉིན་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ནང་ཆགས་པའི་འཕགས་བོད་ས་མཚམས་འབུམ་ལ་ནས་འགོ་འཛུགས་ཀྱིས་བོད་དོན་དྲིལ་བསྒྲགས་སླད་རྐང་འཁོར་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་ཡོད་པ་ལྟར། རྒྱང་ཐག་སྤྱི་ལེ་ ༢༦༠༤ ཙམ་གྱི་སྐོར་སྐྱོད་དེ་ཉིད་འདི་ཚེས་ ༡༩ ཉིན་ Meghalaya མངའ་སྡེའི་རྒྱལ་ས་ཤི་ལོང་ནང་མཇུག་སྒྲིལ་གནང་འདུག ཐེངས་འདིའི་རྐང་འཁོར་སྐོར་སྐྱོད་དེ་བཞིན་སྐུ་ཞབས་ Mesharam ལགས་ཀྱིས་ད་བར་བོད་དོན་སླད་རྐང་འཁོར་སྐོར་སྐྱོད་གནང་བའི་ལས་འགུལ་ཐེངས་ ༦ པ་དེ་ཆགས་ཀྱི་ཡོད་པ་དང་། ད་ཐེངས་ཀྱི་ལས་འགུལ་དེའི་དམིགས་ཡུལ་གཙོ་བོ་ནི་རྒྱ་གར་མི་མང་ལ་བོད་དོན་གོ་རྟོགས་དང་། དམིགས་བསལ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པ་མ་ཟད། ལྷག་དོན་དུ་ཉེ་སྔོན་ཨ་རུ་ན་ཅལ་བུད་མེད་ཅིག་ཧྲང་ཧེ་གནམ་ཐང་བརྒྱུད་ཉི་འོང་དུ་བསྐྱོད་སྐབས། ཧྲང་ཧེ་གནམ་ཐང་དུ་ཁོ་མོར་གནམ་ཐང་གིས་ལས་བྱེད་ཚོས་ཆུ་ཚོད་ ༡༨ ཙམ་བཀག་འགོག་བྱས་ཏེ།  ཁོ་མོའི་རྒྱ་གར་གྱི་ཕྱི་བསྐྱོད་ལག་འཁྱེར་དེ་འགྲིག་མེད་སྐོར་དང་། ཨ་རུ་ན་ཅལ་དེ་ཉིད་རྒྱ་ནག་གི་ས་ཁོངས་ཡིན་ཚུལ་བཤད་པ་དེ། བདེན་དཔང་མིན་པ་དྲིལ་བསྒྲགས་ཆེད་ཡིན་པ་རེད་འདུག བསམ་གཏན་ཡེ་ཤེས་ལགས་ཀྱིས་ཐེངས་འདིའི་ལས་འགུལ་ཁྲོད་ཨ་རུ་ན་ཅལ་མངའ་སྡེའི་བསྟན་འཛིན་སྒང་དང་། མེའོ་ཆོས་འཕེལ་གླིང་སོགས་ཀྱི་བོད་མིའི་གཞིས་ཆགས་ཁག་ལྔ་ཙམ་ནང་དུ་སྐོར་སྐྱོད་གནང་འདུག  ཁོང་གིས་འདི་ག་རླུང་འཕྲིན་ཁང་གི་བཅར་འདྲིའི་སྐབས་བོད་མི་རྣམས་ཀྱིས་ཁོང་ལ་རྒྱབ་སྐྱོར་ཧ་ཅང་ཡག་པོ་གནང་བ་དང་། རྒྱ་གར་བའི་ཡུལ་མི་རྣམས་ནས་ཀྱང་དོ་སྣང་ཆེན་པོ་གནང་ཡོད་སྐོར་གསུངས་བྱུང་བ་མ་ཟད། ཁོང་གིས་སླར་ཡང་འདི་ལོའི་ཕྱི་ཟླ་ ༡༠ ཙམ་ནས་བོད་དོན་དྲིལ་བསྒྲགས་ཆེད་སྐོར་སྐྱོད་གནང་འཆར་ཡོད་པ་དང་། བྱུང་ན་ད་ལྟའི་ལས་འགུལ་མཇུག་སྒྲིལ་སའི་ཤི་ལོང་ནས་འགོ་འཛུགས་འཆར་ཡོད་སྐོར་འགྲེལ་བརྗོད་གནང་སོང་། དེ་བཞིན་བསམ་གཏན་ཡེ་ཤེས་ལགས་ཀྱི་རང་གི་ངོ་དེབ་ཐོག་དེ་འབྲེལ་གནས་ཚུལ་སྤེལ་བར་ལྟར་ན། ཕྱི་ཚེས་ ༡༩ ཉིན་ནས་ཁོང་གི་རྐང་འཁོར་སྐོར་སྐྱོད་ཀྱི་ལས་འགུལ་དེ་བཞིན་མཇུག་སྒྲིལ་གནང་རྗེས། འདི་ཚེས་ ༢༠ ཉིན་ཤི་ལོང་དུ་གསར་འགོད་ལྷན་ཚོགས་ཤིག་འཚོགས་ཡོད་ཅིང་། དེར་ཤི་ལོང་ས་གནས་འགོ་འཛིན་ལས་ཁུངས་དང་། […] The post བསམ་གཏན་ཡེ་ཤེས་ལགས་ཀྱི་བོད་དོན་རྐང་འཁོར་སྐོར་སྐྱོད་ལས་འགུལ་ཐེངས་དྲུག་པ་མཇུག་སྒྲིལ། appeared first on vot.

རྒྱ་གར་ལྷོ་ཕྱོགས་མོན་གྷོ་དགའ་ལྡན་ཤར་རྩེའི་ཆོས་རྭ་ལེགས་བཤད་ཀུན་སྒྲོག་གླིང་དུ་བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་ ༡༨ པ་འགོ་འཛུགས་གནང་སོང་བ་དང་འབྲེལ། རང་དབང་ལུང་པའི་ནང་ཡོད་པའི་བོད་པའི་གཞོན་སྐྱེས་ཚོས་བོད་ཀྱི་སྐད་ཡིག་མི་ཉམས་རྒྱུན་འཛིན་གནང་དགོས་གལ་ཡིན་པ་ནན་བརྗོད་གནང་སོང་། དེ་ཡང་རྒྱ་གར་ལྷོ་ཕྱོགས་དགའ་ལྡན་ཤར་རྩེ་གྲྭ་ཚང་གི་གོ་སྒྲིག་འོག་བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་ ༡༨ པ་འདི་བཞིན། དེ་རིང་ཕྱི་ཟླ་ ༡ ཚེས་ ༢༡ ཉིན་རྒྱབ་ཕྱག་ཚོད་ ༢ ནས་འགོ་འཛུགས་ཀྱིས་ཚེས་ ༢༦ བར་ཉིན་གྲངས་དྲུག་རིང་འཚོགས་བཞིན་ཡོད་པ་དང་། དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོར་ཞྭ་སེར་བསྟན་པའི་གསལ་བྱེད་མཚུངས་མེད་ཤར་པ་ཆོས་རྗེ་༸རྗེ་བཙུན་ངག་དབང་འབྱོར་ལྡན་མཆོག་གིས་དབུས་པའི་དམིགས་བསལ་སྐུ་མགྲོན་དགའ་ལྡན་ཤར་རྩེ་མཁན་རིན་པོ་ཆེ་བྱང་ཆུབ་སངས་རྒྱས་མཆོག དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག མོན་གྷོ་འདོད་རྒུ་གླིང་གི་ས་གནས་འགོ་འཛིན་རིན་ཆེན་དབང་མོ་ལགས། སྐུ་མགྲོན་གཞན། མཐོ་རིམ་སློབ་མའི་ཚོགས་ཆེན་སྐབས་ ༡༨ པའི་ཚོགས་གཙོ་དང་རྒྱུན་ལས། དེ་བཞིན་མཐོ་སློབ་དང་དགོན་སྡེ་ཁག་ ༣༠ ལྷག་ནས་ཚོགས་བཅར་བ་དང་ཧྥ་རན་སི་དང་སུད་སི་སོགས་ཕྱི་རྒྱལ་ཡུལ་གྲུ་ཁག་གི་སློབ་མ་བཅས་ཁྱོན་མི་གྲངས་ ༨༠ ཙམ་ནས་ལྷན་ཞུགས་གནང་འདུག སྐབས་དེར་སྐུ་མགྲོན་གཙོ་བོ་མཆོག་གིས། ད་བར་བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་ ༡༨ ཚོགས་ཐུབ་ཡོད་པར་ཧ་ཅང་ཡག་པོ་རེད་ཅེས་བསྔགས་བརྗོད་དང་འབྲེལ། འཛམ་གླིང་འདིའི་ནང་ཤེས་ཡོན་ཡོད་པའི་ཐོག་ནས་སྤྱི་ཚོགས་ཞབས་ཞུ་རྒྱ་ཆེ་སྒྲུབ་བཞིན་ཡོད་པའི་སྐྱེ་བུ་དེ་དག་ལ་ཁ་མིག་ཡར་ལྟ་བྱས་ནས། སོ་སོ་རང་ཉིད་ཀྱང་དེ་མཚུངས་ཀྱི་དམིགས་ཡུལ་རྒྱ་ཆེར་འཛིན་ན། མ་འོངས་པར་དེ་ལྟར་བསྒྲུབ་རྒྱུ་ངེས་པ་ཡིན་སྟབས་པར་དེའང་གཞན་ལ་ཕན་ཐོགས་དགོས་རྒྱུ་གལ་ཆེན་པོ་ཡིན་མ་ཟད། བོད་ཀྱི་སྐད་དང་ཡི་གེ་ལ་གཅེས་འཛིན་དང་། དེང་དུས་ཀྱི་སློབ་སྦྱོང་ཡོད་པའི་ཐོག་ནས་ཡ་རབས་བཟང་སྤྱོད་ལྡན་པའི་མི་ཞིག་བྱ་དགོས་གལ་སོགས་ཀྱི་ལམ་སྟོན་གནང་སོང་། དམིགས་བསལ་སྐུ་མགྲོན་དགའ་ལྡན་ཤར་རྩེ་མཁན་རིན་པོ་ཆེ་མཆོག་གིས། སྔ་ལོའི་ཚོགས་ཆེན་ཐོག་སྐབས་ ༡༨ འདི་བཞིན་དགའ་ལྡན་ཤར་རྩེར་འཚོགས་རྒྱུ་སྤྱི་མོས་ཀྱིས་གཏན་འབེབས་བྱུང་སྟེ་ལན་གསལ་འབྱོར་བར་ཧ་ཅང་དགའ་ཚོར་ཆེན་པོ་བྱུང་ཞེས་གསུངས་བ་དང་འབྲེལ། འབྲེལ་ཡོད་གྲྭ་ཚང་གི་སྡེ་ཁག་ནས་མཐུན་འགྱུར་ཞུས་ཡོད་པ་མ་ཟད། ད་རེས་ཚོགས་ཆེན་དེའི་བརྒྱུད་ནས་བློ་སྐྱེད་ཡོང་རྒྱུར་འབད་བརྩོན་གནང་གལ་དང་། དུས་ཚོད་ཆུ་ཟོས་སུ་མ་ཡོང་བ་བྱ་དགོས་ཤིང་། མ་འོངས་བོད་ཀྱི་ཆབ་སྲིད་དང་དགོན་སྡེ་ཁག་གི་འཛིན་སྐྱོང་སྤེལ་གསུམ་དེ་དག་མི་རབས་གསར་པར་ཐུག་ཡོད་སྟབས། དེའི་ཐོག་གོ་རྟོགས་དང་ཤེས་ཡོན་ཡག་པོ་ཤིག་དགོས་རྒྱུ་གལ་ཆེན་པོ་ཡིན་པའི་ལམ་སྟོན་སོགས་གནང་སོང་། དམིགས་བསལ་སྐུ་མགྲོན་དགའ་ལྡན་ཕོ་བྲང་གི་དྲུང་ཆེ་བློ་བཟང་སྦྱིན་པ་མཆོག་གིས། རྩ་ཆེ་བའི་བཀའ་འགྱུར་དང་བསྟན་འགྱུར་དེ་དག་བོད་ཡིག་ནང་བཞུགས་ཡོད་ཅིང་། དེ་དང་འབྲེལ་ནས་རིག་གཞུང་རྒྱུན་འཛིན་གནང་དགོས་གལ་ཡིན་པ། ཆོལ་གསུམ་གཅིག་སྒྲིལ་ནི་སྐད་ཡིག་གི་མཚོན་ཐུབ་ཀྱི་ཡོད་པ། མ་ཟད་སྤྱི་ནོར་༸གོང་ས་༸སྐྱབས་ཆེན་པོ་མཆོག་གིས་བཙན་བྱོལ་དུ་ཕེབས་མ་ཐག་བོད་པའི་སློབ་གྲྭ་ཟུར་འཛུགས་ཀྱིས་ད་བར་བོད་མི་རིགས་ཀྱི་ངོ་བོ་རྒྱུན་མཐུད་ནས་འཛིན་ཡོད་པར། མ་འོངས་པ་ལའང་གཞོན་སྐྱེས་ཚོས་དེ་བཞིན་རྒྱུན་འཛིན་གནང་དགོས་གལ་ཡིན་པའི་དྲན་སྐུལ་གནང་སོང་། ལྷག་པར་ད་ལྟའི་ཆར་རྒྱ་ནག་གི་སྲིད་བྱུས་འོག་བོད་ཀྱི་སྐད་ཡིག་ལ་དམ་བསྒྲགས་ཆེན་པོ་བྱེད་བཞིན་ཡོད་པར་བརྟེན། བཙན་བྱོལ་རང་དབང་ལུང་པར་ཡོད་པའི་བོད་མི་ནས་སྐད་ཡིག་སྲུང་སྐྱོབ་བྱ་དགོས་གལ་ཡིན་པ་བརྡ་ལན་གནང་སོང་། རྩ་བའི་བོད་ཀྱི་མཐོ་རིམ་སློབ་མའི་ཚོགས་ཆེན་འདི་བཞིན་ཕྱི་ལོ་ […] The post བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་ ༡༨ པ་འགོ་འཛུགས་དང་འབྲེལ་གཞོན་སྐྱེས་ཚོས་བོད་ཀྱི་སྐད་ཡིག་རྒྱུན་འཛིན་དགོས་པ་ནན་བརྗོད། appeared first on vot.

གནས་མཆོག་རྡོ་རྗེ་གདན་དུ་འདི་ཚེས་ ༡༩ ནས་དབུ་འཛུགས་ཀྱིས་ཉིན་གྲངས་བཅུའི་རིང་དཔལ་གསང་ཆེན་སྔ་འགྱུར་རྙིང་མའི་འཛམ་གླིང་ཞི་བདེའི་སྨོན་ལམ་ཆེན་མོ་ཐེངས་ ༣༧ པ་དེ་འཚོག་བཞིན་འདུག གཞི་རྩའི་དཔལ་གསང་ཆེན་སྔ་འགྱུར་རྙིང་མའི་འཛམ་གླིང་ཞི་བདེའི་སྨོན་ལམ་ཆེན་མོ་དེ་ཐོག་མར་ཕྱི་ལོ་ ༡༩༨༩ ལོར་དབུ་འཛུགས་གནང་ཡོད་པ་དང་། སྐབས་དེར་སྨོན་ལམ་ཆེན་མོ་དེ་ཉིད་ལོ་གསུམ་རིང་མ་གཏོགས་ཚོགས་འཆར་མེད་པ་དེ་ལྟར་ཡང་ཕྱིས་སུ་སྔ་འགྱུར་རྙིང་མའི་བླ་སྤྲུལ་མཁན་པོ་བར་གྲོས་བསྡུར་རིམ་པ་བྱུང་རྗེས་སྔ་འགྱུར་རྙིང་མའི་སྨོན་ལམ་ཆེན་མོ་དེ་མུ་མཐུད་ལོ་ལྟར་འཚོག་དགོས་པའི་ཐག་གཅོད་བྱུང་འདུག །ཕྱི་ལོ་ ༡༩༩༣ ལོར་༸སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེ་མཆོག་གིས་ཐུགས་འགན་བཞེས་ཏེ། རྒྱ་གར་ལྷོ་ཕྱོགས་སུ་ Nyingma Monlam Chenmo International Foundation ཞེས་རྒྱལ་སྤྱིའི་རྙིང་མའི་སྨོན་ལམ་ཆེན་མོའི་ཚོགས་པ་ཞིག་གསར་འཛུགས་ཀྱིས་གཞུང་འབྲེལ་དེབ་སྐྱེལ་གནང་སྟེ། དེ་ནས་བཟུང་དཔལ་གསང་ཆེན་སྔ་འགྱུར་རྙིང་མའི་འཛམ་གླིང་ཞི་བདེའི་སྨོན་ལམ་ཆེན་མོ་དེ་ཉིད་ལོ་ལྟར་ཚོགས་ཀྱི་ཡོད་པ་རེད་འདུག དེ་ཡང་ཐེངས་འདིའི་རྒྱལ་ཡོངས་སྔ་འགྱུར་རྙིང་མའི་སྨོན་ལམ་ཆེན་མོ་སྐབས་ ༣༧ པ་དེ་བཞིན་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་མོའི་རྭ་བའི་ནང་ཕྱི་ལོ་ ༢༠༢༦ ཟླ་ ༡ ཚེས་ ༡༩ ནས་ ༢༨ བར་ཉིན་གྲངས་བཅུའི་རིང་འཚོགས་ཀྱི་ཡོད་པ་དང་། སྨོན་ལམ་ཆེན་མོར་༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་དང་། ༸སྐྱབས་རྗེ་སྨིན་གླིང་མཁན་ཆེན་རིན་པོ་ཆེ་མཆོག ༸སྐྱབས་རྗེ་གདུང་འཛིན་དགའ་རབ་རིན་པོ་ཆེ་མཆོག ༸སྐྱབས་རྗེ་སྨིན་གླིང་པད་རྣམ་རིན་པོ་ཆེ་མཆོག ༸སྐྱབས་རྗེ་རྨུགས་སངས་སྐུ་ཆེན་རིན་པོ་ཆེ་མཆོག ༸སྐྱབས་རྗེ་དགྱེས་སྤྲུལ་འཇིགས་མེད་རྣམ་རྒྱལ་རིན་པོ་ཆེ་མཆོག ༸སྐྱབས་རྗེ་སྒོ་ཆེན་སྤྲུལ་སྐུ་གསང་སྔགས་རིན་པོ་ཆེ་མཆོག་བཅས་གདན་ཞུས་ཀྱིས། ཐོ་འགོད་གནང་བའི་ནང་དགོན་སྡེ་ཁག་  ༢༡༨ དང་དགེ་འདུན་པ་ ༥༡༤༦ བཙུན་མ་ ༧༠༠ དེ་བཞིན་མཁན་སྤྲུལ་ ༡༨༨ བཅས་ཁྱོན་ཚོགས་བཅར་བ་ ༨༠༠༠ ཙམ་ནས་མཉམ་བཞུགས་གནང་འདུག །དགོན་སྡེ་ཁག་སོ་སོའི་བླ་སྤྲུལ་གཙོས་སྔགས་པ་དང་དགེ་འདུན་པ། བཙུན་མ་སོ་སོ་ནས་རྒྱུན་ལྡན་ལྟར་སྔ་དྲོའི་ཆ་ལ་ཟབ་ཏིག་སྒྲོལ་མའི་ཆོ་ག་དང་། དེའི་མཚམས་སུ་རྒྱུད་ཐམས་ཅད་ཀྱི་རྒྱལ་པོ་འཇམ་དཔལ་མཚན་བརྗོད། སྨོན་ལམ་ཐམས་ཅད་ཀྱི་རྒྱལ་པོ་བཟང་པོ་སྤྱོད་པའི་སྨོན་གཉིས་ལ་རྩལ་འདོན་གནང་ཞིང་མཐར་བསྟན་རྒྱས་སྨོན་ལམ་སོགས་ཀྱི་མཐའ་རྒྱན་ནས་སྨོན་ལམ་གསུང་འདོན་གནང་བཞིན་ཡོད་པ་རེད་འདུག འདི་ག་རླུང་འཕྲིན་ཁང་ནས་སྔ་འགྱུར་རྙིང་མའི་སྨོན་ལམ་ཆེན་མོའི་ཚོགས་པའི་དྲུང་ཆེ་མཁན་པོ་འགྱུར་མེད་ཚུལ་ཁྲིམས་ལགས་སུ་ཐེངས་འདིའི་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་ ༣༧ […] The post དཔལ་གསང་ཆེན་སྔ་འགྱུར་རྙིང་མའི་འཛམ་གླིང་ཞི་བདེའི་སྨོན་ལམ་ཆེན་མོ་ཐེངས་ ༣༧ པ་འཚོག་བཞིན་འདུག appeared first on vot.

༸གོང་ས་མཆོག་ནས་མང་མཇལ་ཁྲོད་བོད་ལ་ཏན་ཏན་སླེབས་ཀྱི་རེད་ཅེས་བཀའ་སྩལ་འདུག The post ༸གོང་ས་མཆོག་ནས་མང་མཇལ་ཁྲོད་བོད་ལ་ཏན་ཏན་སླེབས་ཀྱི་རེད་ཅེས་བཀའ་སྩལ་འདུག appeared first on vot.

གནས་ཆེན་ Udaygiri རུ་གུ་རུ་རིན་པོ་ཆེའི་སྨོན་ལམ་ཆེན་མོ་དང་རྒྱལ་སྤྱིའི་བགྲོ་གླེང་ཚོགས་འདུ་ཐེངས་ ༢ པ་འཚོག་བཞིན་པ། The post གནས་ཆེན་ Udaygiri རུ་གུ་རུ་རིན་པོ་ཆེའི་སྨོན་ལམ་ཆེན་མོ་དང་རྒྱལ་སྤྱིའི་བགྲོ་གླེང་ཚོགས་འདུ་ཐེངས་ ༢ པ་འཚོག་བཞིན་པ། appeared first on vot.

ཀོལ་ཀ་ཏའི་བོད་མིའི་ཁྲོམ་ས་ ༡༡ ལ་མེ་སྐྱོན་གྱིས་གོད་ཆགས། The post ཀོལ་ཀ་ཏའི་བོད་མིའི་ཁྲོམ་ས་ ༡༡ ལ་མེ་སྐྱོན་གྱིས་གོད་ཆགས། appeared first on vot.

ས་སྐྱའི་མཁན་རིན་པོ་ཆེ་བསོད་ནམས་རྒྱ་མཚོ་མཆོག་དགོངས་པ་ཆོས་དབྱིངས་སུ་ཐིམ་འདུག The post ས་སྐྱའི་མཁན་རིན་པོ་ཆེ་བསོད་ནམས་རྒྱ་མཚོ་མཆོག་དགོངས་པ་ཆོས་དབྱིངས་སུ་ཐིམ་འདུག appeared first on vot.

དེ་རིང་ཕྱི་ཚེས་ ༥ ཉིན་གྱི་སྔ་དྲོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་སྤྱིའི་པཱ་ལི་དང་ལེགས་སྦྱར་བའི་དགེ་འདུན་དབར་ཤེས་ཡོན་བརྗེ་ལེན་གྱི་ལས་གཞི་ཐེངས་བཞི་པའི་ཚོགས་བཅར་དང་དགོན་སྡེ་ཁག་གི་མཁན་རིན་པོ་ཆེ་བཅས་ལ་མཇལ་ཁ་བཀའ་དྲིན་སྩལ་ཡོད་པ་དང་སྦྲགས། ལྷག་པར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གོ་སྒྲིག་འོག་ནང་པའི་སློབ་གཉེར་ཁང་གསར་འཛུགས་ཀྱི་ལས་གཞིར་ཐུགས་འགན་བཞེས་མཁན་གདན་ས་ཁག་གི་མཁན་རིན་པོ་ཆེ་དང་སློབ་སྟོན་པ་ University Grants Commission (UGC) རྒྱ་གར་གཙུག་ལག་སློབ་གཉེར་ཁང་རོགས་དངུལ་ལྷན་ཁང་གི་དྲུང་ཆེ་གཞོན་པ་ Dr. Vinod Singh Yadav ཝེ་ནོད་སིང་ཡཱ་ཌེབ་བཅས་ལ་མཇལ་ཁ་བཀའ་དྲིན་སྩལ་འདུག དེ་ཡང་དེ་རིང་གི་མཇལ་ཁའི་སྐབས། བོད་བརྒྱུད་ནང་བསྟན་ནི་དཔལ་ན་ལེནྜའི་ཆོས་བརྒྱུད་དྲི་མ་མེད་པ་ཡིན་པ་དང་། ཕྱི་འདུལ་བ། ནང་བྱང་སེམས། གསང་བ་གསང་སྔགས་དང་བཅས་པའི་ཆོས་ཧ་ཅང་གི་སྤུས་དག་པོ་ཡོད་སྟབས། ལོ་བརྒྱ་ཕྲག་དང་སྟོང་ཕྲག་གནས་པའི་དོན་དུ་མུ་མཐུད་རྒྱུན་འཛིན་བྱ་དགོས་གལ་ཙམ་མ་ཟད། རྒྱ་ནག་སོགས་འཛམ་གླིང་ཡུལ་གྲུ་གང་སར་ནང་ཆོས་ལ་དོ་སྣང་ཆེན་པོ་བྱེད་ཀྱི་ཡོད་པར་སྤུས་དག་པོ་ཞིག་དར་ཁྱབ་ཡོང་རྒྱུའི་ཐད་འགན་འཁུར་དང་དགོངས་བཞེས་དགོས་གལ་སོགས་ཀྱི་བཀའ་སློབ་བཀའ་དྲིན་ཆེ་བ་སྩལ་འདུག མཇལ་ཁ་གྲུབ་མཚམས་འདི་ག་གསར་འགོད་པས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་དྲུང་ཆེ། དགའ་ལྡན་ཤར་རྩེ་མཁན་རིན་པོ་ཆེ་བྱང་ཆུབ་སངས་རྒྱས་ལགས་སུ་བཀའ་འདྲི་ཞུས་སྐབས། ཁོང་གིས་རྒྱལ་སྤྱིའི་པཱ་ལི་དང་ལེགས་སྦྱར་བའི་ཆོས་བརྒྱུད་ཀྱི་དགེ་འདུན་དབར་ཤེས་ཡོན་བརྗེ་ལེན་གྱི་ལས་གཞི་འགྲོ་བཞིན་ཡོད་ཅིང་། ད་རེས་ཐེངས་ ༤ པ་ཆགས་ཀྱི་ཡོད་པ་དང་། ད་ལོའི་ལས་གཞི་དེ་ཐོག་མ་གནས་མཆོག་རྡོ་རྗེ་གདན་དུ་དབུ་འཛུགས་གནང་། དེའི་རྗེས་གནས་མཆོག་ཝཱ་རཱ་ན་སཱིར་རྟེན་གཞི་བྱས་པའི་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་ཚོགས་པ་དེའི་སྐོར་མགོན་པོ་༸གང་ཉིད་མཆོག་ལ་སྙན་སེང་དང་། ཆོས་བརྒྱུད་གཉིས་ནས་སྨོན་ལམ་གསུང་འདོན་ཞུས་ཡོད་སྐོར་འགྲེལ་བརྗོད་གནང་སོང་། རྩ་བའི་ད་རེས་ལས་གཞི་དེའི་ནང་པཱ་ལིའི་ཆོས་བརྒྱུད་འཛིན་པའི་ཁོངས་ནས་ཐའེ་ལེནྜ་དང་ལ་འོ་སི། ཀོམ་བྷོ་ཌི་ཡ། བྷར་མ། ཤྲི་ལངྐ་བཅས་དང་། ལེགས་སྦྱར་ཆོས་བརྒྱུད་ཁོངས་ནས་གདན་ས་གསུམ་གྱི་གྲྭ་ཚང་དྲུག བཀྲ་ཤིས་ལྷུན་པོ། ར་སྟོད། རྒྱུད་གྲྭ་རྣམ་གཉིས། རྣམ་རྒྱལ་གྲྭ་ཚང་། ཇོ་ནང་། དཔལ་ས་སྐྱ་སོགས་དགོན་སྡེ་ཁག་མང་པོ་ཞིག་ནས་མཉམ་ཞུགས་གནང་ཡོད་པ་མ་ཟད། ལས་གཞི་དེའི་ཐོག་ནས་ཆོས་བརྒྱུད་གཉིས་ཕན་ཚུན་བར་འདུལ་བའི་ཉམས་བཞེས་དང་གཞི་གསུམ་གྱི་ཆོ་ག སྒོམ་སྒྲུབ་ཉམས་བཞེས། སློབ་གཉེར། འཚོ་བའི་གནས་སྟངས། སྒྲིག་འཛུགས་ཀྱི་གནས་སྟངས་སོགས་གནད་དོན་མང་པོའི་ཐོག་གོ་བསྡུར་དང་ཤེས་ཡོན་བརྗེ་ལེན་གནང་གི་ཡོད་རེད། ལྷག་པར་དགེ་འདུན་པའི་བར་ཐུགས་མཐུན་ཁྲིམས་གཙང་ཡོང་རྒྱུར་ཕན་ཐོགས་ཡོང་གི་ཡོད་པ་རེད་འདུག ལས་གཞི་དེ་ནི་རྒྱལ་སྤྱིའི་དགེ་ལྡན་ལྷན་ཚོགས་དང་དགའ་ལྡན་ཕོ་བྲང་ལྷོ་ཤར་ཨེ་ཤི་ཡའི་འབྲེལ་མཐུད་པའི་གོ་སྒྲིག་འོག་བསྐོང་ཚོགས་གནང་གི་ཡོད་ཅིང་། ད་བར་གདས་ས་ཆེན་པོ་འབྲས་སྤུངས་དང་སེར་ར། དགའ་ལྡན་བཅས་སུ་རིམ་པ་ཚོགས་ཡོད། མ་ཟད་དེ་རིང་༸གོང་ས་མཆོག་གིས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་གོ་སྒྲིག་འོག་ནང་པའི་སློབ་གཉེར་ཁང་གསར་འཛུགས་ལས་གཞིའི་སློབ་སྟོན་པ་རྒྱ་གར་གཙུག་ལག་སློབ་གཉེར་ཁང་རོགས་དངུལ་ལྷན་ཁང་ University Grants Commission (UGC) […] The post རྒྱལ་སྤྱིའི་པཱ་ལི་དང་ལེགས་སྦྱར་བའི་དགེ་འདུན་དབར་ཤེས་ཡོན་བརྗེ་ལེན་ཚོགས་བཅར་བ་དང་། UGC དྲུང་ཆེ་གཞོན་པར་མཇལ་ཁ། appeared first on vot.