DiscoverLuz de Sefarad
Luz de Sefarad
Claim Ownership

Luz de Sefarad

Author: Radio 5

Subscribed: 20Played: 555
Share

Description

Ofrecemos entrevistas a figuras cercanas al legado del pueblo hispanojudío.
372 Episodes
Reverse
Viashe kontemporáneo traverso poesías ke fueron trokadas en kansiones.Los grandes presonajes de la literatura en muestra lingua destakan en el universo literario djudeo-espanyol, i por esto kompartimos poesías en sus distintos oríjenes. La alma de Sefarad se nutre de la literatura i la tradisión oral, ofresemos un enshemplo del afamado poeta Juan Gelman, en lingua sefardí "Partindu di tu lado", boz Dina Rot. La poesía será la eterna palavra ke kedará en la ovra literaria, para dar a konoser en el avenir la rikeza de la kreasión kontemporánea sefardí, poesías del siglo XIX i XX. Poesía de Matilde Gini Barnatán "Es cosa de bendición"(Flamenco, corríos) múzika y boz Juan Zarzuela Alarcón (Proyecto Linguake).Muestra lingua fraguó una eskola poétika ke kontinúa pujando en la aktualidad kon autores destakados ke son patrimonio espanyol.Escuchar audio
Vos azemos de muevo musafires en la Kuzina de Luz de Sefarad para aparejar una rika recheta tradisional sefardí "Fritikas de espinaka o pasí". Pasí es espinaka en djudeo-espanyol, una vedrura ke es muy usada en la kuzina tradisional sefardí de kualker orijin. Vamos a gostar esta rika recheta para las fiestas, el shabat o kualker okasión en la morada i asperamos ke vos dé muncho plazer. Kante tradisional sefardí "Por la tu puerta" en la interpretasión del Grupo Sirma.Escuchar audio
 Informamos de la Ekspozisión del pintor djudió Marc Chagall: "Chagall: Un grito de libertad" en Madrid para entrar al universo del kolor i la majia. Marc Chagall es uno de los artistas más importantes para komprender el arte del S XX, el pintor djudió ke nasiera en Rusia, en el seno de una famyia djudía ortodoksa, viashamos en el tiempo traverso la ovra de este gran pintor ke pasó su vida artístika reushendo en tener fama. Kante tradisional de amor i natura "Komo el pásharo ke bola" en la boz de Kohava Levy.Escuchar audio
Prezentamos el livro "Gastrosimbología, descifrando las claves ocultas de la gastronomía judía" del Chef Javier Zafra, kon apoyos de la Red de Juderías de España. Mos topimos musafires en la Prezentasión-degustasión de este livro en Madrid ke mos eksplika las rechetas i aonda en los simbols de la kumida djudía i sefardí, para konoser los signifikados de los rituales, ansí komo el motivo por el kualo se meten algunos alimentos en la mesa festiva, en las distintas festividades djudías, una visión únika para atar la kumida kon la istoria i la identidad. Palavras de Javier Zafra, Chef i Investigador de Gastronomía Istórika, Direktor del Proyekto Gastronómiko "Sabores de Sefarad" de la Red de Juderías de España, ke mos prezenta su muevo livro. Kante tradisional "Morenika", en la interpretasión de Marga Grajer.Escuchar audio
En Luz de Sefarad kompartimos un programa dedikado a los Kantes de bodas. La boda es basho la Jupá (palko nupsial en la Sinagoga) es un presepto de la Torá alegrar a los novios. La boda se selevra kon múzika i kantes tradisionales, indemás de kumidas i banketes espesiales muy savuridos kon dulsurias de las tradisiones de los novios. La rikeza del patrimonio muzikal se reflekta kon su diversidad en kantes para los novios komo los de preparasión de la boda i de la Novia, sentimos injuntos: "Ajuar de la Novia galana" en bozes de musheres sefardim (Versión de Sofía, Bulgaria). Kante de bodas "Novia de la cara blanca", interpretado por Rosa Zaragoza.Escuchar audio
El muevo livro "Ensayo de Historia del Pueblo Judío" del Prof. Shmuel Ettinger, traduisido del ruso al espanyol. Palavras de Ángel Luis Encinas, traduktor del livro "Ensayo de Historia del Pueblo Judío" i autor de las notas i introduksión del livro, indemás de Profesor de la Universidad Complutense de Madrid. Este livro konta desde los primeros tiempos de los Patriarcas, Abraham Isaac i Jacob, base del djudaísmo, pasando por la Edad Media, la era Kontemporánea i toda la istoria de los judíos del mundo por entero asta la guera de los Seis Días. Informasión sovre las Komunidades Djudías en Juderías en España (Sefarad). Un manadero de konosimientos para komprender la istoria djudía en el mundo. Patrimonio muzikal "Donula" en la interpretasión del grupo Sirma.Escuchar audio
Ofresemos un kapitoló istóriko sovre Saloniki, la sivdad grega onde la mayoría de sus sefardim fueron matados en Auschwitz i unotros kampos de konsentrasión nazis. Kontamos la istoria de esta importante Komunidad Sefardí en Grecia onde los djudiós moravan desde el siglo III i avlavan en djudeo-espanyol. Salónica o "Saloniki" en djudeo-espanyol era un sentro djudió muy importante i una de las yamadas "Sivdades Madres de Israel", una de las prinsipales sivdades onde los djudiós ke fueron ekspulsados de España yegaron, kreando una Komunidad rika en todos los rolos. En el momento de la okupasión almana avía unos 50.000 djudiós en Saloniki, te kontamos la istoria de lo ke akontesió malorozamente para esta, la ke fuera una de las más destakadas Komunidades Sefardim.Patrimonio muzikal "Nana de Salónica", "Adiyo kerida" i "En la mar hay una torre". La Memoria de las Komunidades Sefardim son el reflekto de la vida i tradisión sefardí, Patrimonio espanyol i de kultura universal, siempre prezente en Emisión Sefarad.Escuchar audio
Memoria del Holocausto. Shoá. Un programa espesial kon testimonios de Henry, el bebé ke sobrebivió al Holocausto.Ofresemos la istoria del pekenyo Henry, Zvi Szlamowicz ke logró sobrebivir al ekstremino nazi al ser entregado por su padre a una famyia kristiana. Es ansí ke mos konta su istoria, komo fue de los muy pokos o el úniko bebé ke reushó en sobrebivir al inferno de la eksterminasión de djudiós en los kampos de eksterminio nazis, onde pedrió a su madre i su tía en las kámaras de gas.El 27 de Enero, data de la liverasión del kampo de konsentrasión de Auschwitz, se konmemora la Memoria de la Shoá, el Holocausto, sufrido por el puevlo djudió onde fueron asesinados 6.000.000 de djudiós entre eyios 1.500.000 ninyos i bebés, indemás de sienes de jitanos, jazinos, es dizir enfermos, i omosekuales. En el relato de su vida sentimos las palavras de este senyor Zvi Szlamowicz, konosido komo "El bebé del Holocausto" kon parte de su inkreívle i milakrosa istoria de salvasión.Kompartimos múzika del kompositor cheko de orijin djudió Erwin Schulhoff, ke murió en el kampo de konsentrasión de Wülzfurg. 5 Estudios de jazz para piano sólo: "Charleston". (piano: Darío Meta. Concierto Memoria Víctimas del Holocausto. Teatro Círculo de Bellas Artes).Escuchar audio
Vishita a la Ekspozisión "La Edad de Oro de los Judíos en Alandalús", en Centro Sefarad-Israel, amostra el enfloresimiento i dokumentos de la Komunidad Judía en tiempos de Alandalús. En la ekspozisión se reflekta la influensia en la ekonomía, sensias, literaturas, medizina, i kultura, más dokumentos sekretos ke mos permeten konoser komo era la vida i la konbivensia en tiempos de la Edad Media. La ekspozisión está organizada por Centro Sefarad-Israel, kon kolavorasión de Casa del Mediterráneo, el Miller Center for Contemporary Judaic Studies i The George Feldenkers Program in Judaic Studies de la Universidad de Miami, La Red de Juderías de España, el World Jewish Congress y la Fundación Hispano-judía. Indemás konta kon apoyos del Ministerio de Asuntos Exteriores, Unión Europea y Cooperación, de la Comunidad de Madrid, el Ayuntamiento de Madrid, el Instituto Cervantes, la Universidad de Cambridge i la Universidad de Granada. Kurunamos el programa kon el kante "Abraham Abinu" en la boz de Soledad Bentolila.Escuchar audio
Matilda y Vivian Barnatán recitan poesías sefardíes.Escuchar audio
Premio Mem Guimel a Matilda Gini Barnatán, por su lavoro de toda una vida dedikada a la difusión i la ensenyanza de la lingua sefardí. Premios Mem Guimel en su XII Edición kere destakar i onorar a Matilda Gini Barnatán, kreadora de Emisión Sefarad en Abril de 1986, istoriadora i investigadora sovre la kultura sefardí. La Asociación Mem Guimel ofrese esta distinsión a Matilda en agradesimiento a su lavoro kontínuo de la konservasión del djudeo-espanyol, ansí komo el lavoro de difusión en Radio Exterior de España y en Radio 5 de la kultura i patrimonio istóriko i muzikal sefardí, en sus importantes aportes en Congresos, prensa i distintos espektákulos. Ansimezmo se valoran sus lavoros de investigasiones istórikas sovre el djudaísmo espanyol, i el kriptodjudaísmo en España, Portugal y en el Río de la Plata. Palavras de Mordejay Guahnich, Prezidente de la Asociación Mem Guimel y Prezidente de la Comunidad Israelita de Melilla, mos kontará sovre el Premio a Matilda, ke se aze entrega en un akto en la Consejería de Cultura de Melilla. Kurunamos el programa kon el kante sefardí "La Novia", autoría i interpretasión Viviana Rajel Barnatán. Muestras felisitasiones a Matilda por este muevo Premio a su inkansavle i destakado lavoro por la difusión i la konservasión de la lingua djudeo-espanyola i del patrimonio kultural-istóriko sefardí.Escuchar audio
Vishita a la ekspozisión 'El espejo perdido, judíos y conversos en la España Medieval', en el Museo del Prado. Kontamos sovre esta interesante ekspozisión reflekto en las ovras de interkamvio entre djudiós i kristianos, una ekspozisión ke se puede vishitar asta el vinien 14 de Enero de 2024. Kurunamos el programa kon el kante tradisional sefardí ke interpreta la kantadera Fortuna (Brasil) 'Buena semana'.Escuchar audio
Despedimos la anyada 2023 injunto a los oyentes de Luz de Sefarad kon tradisión oral i muzikal sefardí. La literatura de tradisión oral se engalana kon el kuentesiko "El ladrón i el konsesho del Rey Shelomó" un kuntesiko sovre la saviduría del Rey Shlomó muy prezente en kuentos i relatos de muestras literaturas. Kurunamos el programa kon el kante "Una pastora" en la interpretasión de Isaac Levy, dezeando muncha salud i alegría en la mueva anyada 2024 ke ya prinsipia, toda la anyada reynada kon kultura, aktualitá, istoria, literaturas i múzika sefardí.Escuchar audio
Mos topamos en el preestreno eksklusivo de la película "Golda" aktividad organizada por la Fundación Hispanojudía en Madrid, filmo biográfiko sovre la vida de Golda Meir, ken fuera Primera Ministra de Israel, en siendo la primera musher en okupar este alto kargo, i la tresera musher en el mundo en este rolo. Golda, yamada "La Dama de Hierro", interpretada por Helen Mirrer, dirijida por Guy Nattiv i eskrita por Nicholas Martin. En el preestreno se toparon prezentes distintas presonalidades de Institusiones djudías i del mundo de la kultura espanyola, el filmo fue prezentado por David Hatchwell, Presidente de la Fundación Hispanojudía i Samuel Bengio, Eks-Presidente de la Comunidad Judía de Madrid i Prezidente de Yad Vashem (Museo del Holocausto) en España. Sentimos palavras de Samuel Bengio sovre el filmo "Golda". Dezeando una Navidad alegre a los oyentes sentimos un viyiansiko por bulerías en la boz de Lola Flores "Con mi borriquillo".Escuchar audio
En Luz de Sefarad selevramos la Fiesta de Januka en el kalendario evreo, la Fiesta de las kandelikas. La Janukia, kandelavro de mueve brasos es la protagonista de esta festividad ke selevra un echo istóriko, kuando akontesió un milagro kon el azete dempués de la reinaugurasión del Templo. Palavras del Rab Moshé Bendahán sovre el orijin de la festividad de las luminarias, tambyén konosida komo "Fiesta de los milagros". Devemos meter la janukia al lado de la ventana de la morada, i se va asendiendo kada día una kandela más de la janukia, asta kompletar los ocho días de la fiesta. Se akostumvra aparejar birmuelos de Januka, dulsurias típikas de la festividad. Kante de Januka: "Ocho kandelikas", en la interpretasión de un koro de ninyos de Israel.Escuchar audio
Vishitamos la mueva ekspozisión "Picasso 1906, la gran transformación" en el Museo Reina Sofía de Madrid. Una muestra kon motivo del 50 Aniversario de la muerte de Picasso, onde seremos musafires en la vishita al Museo i las grandes ovras de esta etapa de Picasso. En las 8 salas veremos las ovras kon detalyios i deskripsiones, ovras de tiempos de la kultura evropea i afrikana, en la deskuverta del kompleto prozeso artístiko onde Picasso avre su kreasión a un linguashe muevo, un momento entre 1906 i 1907 artístikamente destakado, deskonosido asta agora. Kante kontemporáneo, poesía de Clarisse Nikoidsky "A la mañana dil lugar", múzika i versión: Dina Rot.Escuchar audio
En Luz de Sefarad destakamos el valor del refranero en la vida sefardí de kada'l día, kon sus ekspresiones más afamadas i algunas deskonosidas. Kompartimos sovre el autor sefardí Luis León ke arekoje refranes de sefardim de Turquía, ofresemos varios refranes i dichas de tradisión oral i sus eksplikasiones. Ilustramos el programa kon el tango sefardí "Printzesita", boz Flory Jagoda.Escuchar audio
Vishitamos la ermoza Djudería de Jaén, su Aljama es de las mijores konservadas, en siendo una de las más importantes Aljamas de Castilla. Palavras de Rafel Cámara, Presidente de la Asociación Iuventa, ke lavora anchamente para la difusión i konservasión de la Djudería de Jaén i del Patrimonio sefardí, ansí komo la difusión de aktividades sefardíes, mos ofrese informasiones sovre onde se topavan las Sinagogas. La aljama de Jaén kontava kon una Yeshivá, (eskola talmúdika) soltanto se topavan eskolas talmúdikas en las más importantes Djuderías de Sefarad. Un paseo onde konoseremos la Plasa de los Huérfanos kon la Menorá,(kandelavro de siete brasos) en rekodro a las famyias djudías ke moraron en Jaén (vemos la fotó injunto al programa). Kurunamos el programa sintiendo el kante tradisional sefardí "También de la madrugada", en la interpretasión de Joaquín Díaz.Escuchar audio
El Shabat es el día espiritual, una fiesta para la alma ke rekodramos kada semana.¿Ke signifikado tiene el Shabat en la vida i tradisión Djudía?.¿Kual es el orijin de este mandamiento del Dió?. Kontamos las fuentes en la Torá onde el Dió mos ofrese el kumplimiento del Shabat, un día festivo espiritual por entero, kon sus leyes i tambyén sus tradisiones. El Shabat da empesijo antes de la puesta del sol kon el mandamiento para la musher, o las musheres de la kaza, ke deven aresivir el día sagrado asendiendo dos kandelas, kon sus bendisiones i sus orasiones.Kante kontemporáneo dedikado al Shabat "La Novia" (II Premio Festival Festiladino, de Kantes Kontemporáneos sefardim, Israel), autoría letra, música e interpretasión Viviana Rajel Barnatán.Escuchar audio
En Luz de Sefarad ofresemos poesía sefardí kontemporánea dedikada a las Djuderías de Sefarad, kon akompanyamientos al piano de Darío Meta. Enshemplos: "Molina de Aragón" de Matilda Gini Barnatán i "Arvoles de Cáceres" de Viviana Rajel Barnatán.Kante sefardí tradisional "Los bilbilikos" ke interpreta la kantadera Judy Frankel . Escuchar audio
loading
Comments (1)

Rodo Vale

cuál es el nombre de la cantante " la novia ?"

Nov 23rd
Reply
Download from Google Play
Download from App Store