Claim OwnershipIm Bild - de zemli fotografisch Podcast
Subscribed: 2Played: 43
Subscribe
© Adrian Ehrbar und Cornelius Fischer
Description
Zwoi Bruefsfotografe (Adrian Ehrbar & Cornelius Fischer) mit em Hang zemli vell über d‘Fotografie und Anders (in Mundart) z‘plaudere.
Aregige, Rückmeldige und Froge chönder eus per Mail zuecho loh: hoerer@imbildpodcast.ch
Aregige, Rückmeldige und Froge chönder eus per Mail zuecho loh: hoerer@imbildpodcast.ch
51 Episodes
Reverse
IPFO & Dan Winters isch e Liebesgschicht, eini wo er so zelebriert dasser versproche het er chund zu jeder Usgab wos no geh werd. Was för es Verspreche vo einem vo de grösste Bildermacher eusere Ziit! De Dan het sech met eus vorrem IPFO Publikum zämegsetzt zum echli öber sini Karriere, öber Erlebnis und Fails, öber psychischi Gsundheit und öber sini Art uf d‘Welt zluege z‘rede. Debie isch es spannends und persönlichs Gspröch entstande wommer euch ned wend vorenthalte. Am Schluss simmer de plötzli no zumene Rezeptpodcast wurde… Mer freued eus uf de Dan unds Chilli im Zelt am IPFO 2027! Vor dere Ufzeichnug hemmer no sini unglaublich spannendi National Geographic Doku über in und sis Lebe döffe alueg. Es lohnt sech die vor em Podcast azluege, du findsch sie uf Disney+.PS: Mer sammlet gern no euchi persönliche Chillirezept, chönd sie denn gern metem Dan teile 😉
Info: Podcast isch in Mundart bim Intro und nachere uf englisch!Hey mer send am IPFO (International Photo Festival Olten) und hend die unglaublichi ehr kha metem PLATON, eine vo de international bekantischte Portraitfotografe, chöne z‘plaudere… und plauderet hetter 😉 Über sini Ideal, sini Weltaaschauig, über Chriegsmacher und Chriegsopfer, analogi Fotografie (Adi hets ned chöne loh nochezfröge obwohl er gar ned so gern über Technik redet 😅) und Zuekonft vo eusere Branche. Unglaublich phylosophisch und inspirierend, losed dri!
Bald isches sowit, eis vo de gröschte Fotografie Highlights i de Schwiz findet weder statt, und zwar vom 20. August bis am 24. August 2025! d'Red isch vom IPFO, International Photo Festival Olten.Mer send stolzi Mediepartner vom IPFO met eusem Podcast und döffed au so einiges mache a dem Festival! Mer hend metem Remo Buess, eine vo de Mitbegründer vom IPFO (de ander Part isch niemert gringers als de Marco Grob) über s'kommende Festival und Highlights gredet. Userdem verzellemer was mer alles met eusem Podcast abdecket und was de Cornelius und de Adi no för spannendi Seminar döffed geh.Chömeder au? Jetzt unbedingt amelde und mer freued eus uf euch und spannendi Talks am IPFO 2025!www.ipfo.ch
Hey mer sends weder, damol ohni es Verspreche dasses bald weder ganz viel Material vo eus git (aber gliechwohl, hey eus gets no und es werd sicher weder Content geh 😅😜). Drum hemmer mol als chline Durstlöscher (bi dere Hitz ja nötig) e bombastisch langi Alltagsfolg parat! De Cornelius het sini Canon R5mkII mol weder sehr gern, aber doch au sini negative 😳(!) pönkt hervorghobe, wer hets denkt, aber unbedingt lose was er meint 😜 Und dezue hetter no es cools Portraitkonzept i de pipeline. Seg nume: „Liecht vo unde“De Adi het e Litanei abghalte, zemli was gloffe, aber loset doch selber dri, macht meh Sinn als ich do alles volltexte, isch ja e Podcast 😜 Chli Workflow Tipps und e Newsmoderation gets auno, Päcklirückblick döff ned fehle. Und ja de Adi summt jetzt statt brummt uf de Strasse 🚗🔋Danke förs folge und zuelose, viel Spass!
Gugus, mer hend mol weder e Alltagsfolg z‘standbrocht 💪🏻Das mol weder chli länger duured het (d‘Gründ nachhere) isch grad e sehr e langi wurde 😅Mer verzellet bitz was so gloffe isch, und de Cornelius macht druf ufmerksam was es cha bedüte wemmer erfolgrich sis Businessmodel änderet. Ja, er chönds euch vorstelle, gueti Gwünn aber au viel Arbet und chum Zit för Podcasting 🙃😜De Adi het au was gänderet, 2025 set ja schliesslich s‘Jahr vo de Veränderig sie (het irgendwer irgendwo mol gschribe 😆), chli es neus Blitzssystem und neui Täschene. Au chli philosophiere über s‘aktuelle KI Thema döff ned fehle 🤖 Villicht schaffemers ja weder chli meh zum Podcaste und danked eu förs durehebe und fliessige zuelose!
Happy new year euch allne! 🍾🥳
Guet, mer send au scho weder mitti Januar, mer wössed gar ned recht obs no erlaubt isch zum es «guets Neus» z'wünsche 😜
Aber: Mer zwoi hends emmel mol weder gschafft anezhöckle und zplaudere, so dasses grad e erschti Folg i dem Johr geh hed. Mer wend i dere sehr spontane Folg mol bitz retour luege ufs vergangene Johr, was eus bliebe isch und was mer mitnehmed um grad au en chline Usblick is 2025 z'wage. 🔮
Mer hoffed au ehr chönd echli was mitneh us eusere doch sehr au philosophische Usgab, seged nomol danke för's fliessige zuelose im 2024 und uf ganz viel spannende, interessanti und lehrrichi Moment im 2025!
Es werd no einiges geh zum innelose i dem Johr, das versprechemer euch scho jetzte!
För eusi allererschti Live Ufnahm hemmer eus grad es emotional ufgladnigs Thema usgsuecht: Glichberechtigung i de Fotografie.
Da mer aber au wend druff ufmerksahm mache und mer als Herre ned met de gliche Problem im Bruefsalltag konfrontiert werded, hemmer eus d'Gründerine vo SameKollektiv; (wo sech förd d'Sichtbarkeit vo Fotografinne* isetzt) d'Karin und d'Martina ufd Bühni am letschte Digitalevent gholt. Mer hend einiges zum diskutiere kha und au viel glernt, und mer hoffed mer chönd au met dere Ufnahm meh zur Glichberechtigung i eusem Bruefsalltag bieträge.
Es isch eusi erschti Live Ufnahm gsieh und ganz bestimmt ned eusi letschti. Interessant isch au de Ustusch metem Publikum und mer freued eus euch bi de nächschte Live Ufzeichnig au im Publikum döffe z'begrüesse.
Info: Es het zwoi technischi Fehler i de Ufnahm wo leider Persone bi erne Sätzt gschnitte send, mer send no am Fehler evaluiere und hoffed uf euches Verständnis.
Do fendet ehr alli Infos zu Same Kollektiv:
https://www.samekollektiv.ch
Mer hend mol weder e Alltagsfolg för euch parat. Viel isch passiert i letschter Zit, de Cornelius und de Adi send am schäfferle wie veruckt und ned nume gspüremer de Herbst (=Thema Hochnebel) sondern au vo Site Kamerahersteller isch do einiges gange. Viel Spass bim Itauche i euse Alltag.
Am letschte IPFO letscht Johr hemmer per Zuefall de "jungi Wildi" Levi Fitze kenneglernt. Er het dete scho vo sine grosse Ziel gredet, und es Johr spöter hemmer de Jungi ufstrebendi Wildlife-Fotograf döffe bi eus im Podcast begrüesse. Knackigi 20i und scho Sony Creator, selbstständig und sogar bald scho imene Kinofilm zsgseh, am Levi sini Formkurve zeigt steil nach obe!
Wie er sini witeri Karriere gseht, was en a Tier fasziniert, ob grösser bi de Objektiv immer gleich besser isch und was den raui und glatti Füess met Huener ztue hend, all das erfahreder i dere Folg.
Am Levi sini Website: www.levifitze.ch
d'Judith Erdin aka Streusel betriebt en erfolgrieche Bach-Blog, schriebt Bach-Büecher, macht Youtube Komedie, en Podcast... etc. En Tausendsasa isch sie, aber het ufgrund dem au bitz Idee zu Social Media und get eus zwoi Unerfahrene und euch es paar Inputs met uffe Weg!
Unter anderem i dere Folg:
Wieso de Cornelius ned bachet | Was de Adi und Judith gmeinsam hend | Was Kulinarik und Erotik zäme hend | Wieso mer so schnell de Fade verlürt | Dopamin | De Dieter P. wiese alte Mah | Cornelius sini Kommentaradrohig | Wie en Parkhusbsuech zu dem Gspröch gfüert het werd aso auno erklärt... usw.
Viel Spass und Lacher wünschemer euch!
Judith's Bachblog (metem Dinkel Hamburgebun Rezept!): www.streusel.ch
Ihre Podcast metem Simon Balissat: https://open.spotify.com/show/5tk8MZyw9OcIcOwL9X4eJo?si=2e328967ad854607
Hello zäme, ja euse Podcast gets no... De Cornelius und de Adi send so im Zügs dasses jetzt chli länger gange isch bisses mol weder was för'd Ohre get. Aber hey, do isch sie, die neusti Folg "Usem Alltag".
Völlig Uncut und au sehr lang, aber losed doch eifach inne, mer hend au kei Zit för e Aständigi Caption im Moment... 😜
Neurapix Link vom Cornelius: neurapix.corneliusfischer.ch
Und do no d'Infos zum Digital Event: https://www.digitalevent.ch/programm/podcast-liveproduktion-20241019
Shopping Bag bei Brack.ch
20TB Seagate HDD för NAS --> https://www.brack.ch/seagate-harddisk-ironwolf-pro-3-5-sata-20-tb-1609999
5M USB-C Kabel vo onit förs Tethering --> https://www.brack.ch/onit-usb4-kabel-pro-usb-c-usb-c-5-m-1541215
Smarts USB-C Ladegrät för normali Akkus --> https://www.brack.ch/isdt-ladegeraet-c4-evo-smart-charger-fuer-rundzellen-1197719
Adis noi Hybrid Kamera vo Fuji --> https://www.brack.ch/fujifilm-fotokamera-x-h2s-body-schwarz-1391057
Wir suchen Unterstützung!
Wer von euch lieben Hörer:innen kennt sich mit Adobe Audition aus möchte uns beim Schnitt unserer Folgen helfen?
Da unser Podcast ein Freizeitprojekt ist, können wir leider keinen monetären Lohn anbieten. Dafür aber die Möglichkeit bei unseren Aufzeichnungen mit vor Ort zu sein und die Folgen super exklusiv vorweg schon zu hören. 🎧
Kennst du dich mit Adobe Audition aus und möchtest uns helfen zukünftig mehr Content bereitzustellen, dann melde dich per Mail bei uns unter hoerer@imbildpodcast.ch
Danke tuusig!
Mer send weder do, de Cornelius vollbelade met Arbet und de Adi mengisch am schaffe und mengisch am gärtnere.
De het sech no einiges to i de Branche, zum gfalle vom Adi gahts au im Analoge Bereich ziemli vorwärts.
Und euse Podcast het sech zur Shopping-Queen erkore und ziemlich ge'brackt.ch, met hoffentlich guetem Ifluss för euchi Ohre.
Viel hemmer devo gredet, jetzt isch Sie do, eusi SABTA Folg! SABTA en Begriff wo de Adi em Cornelius biebrocht het und ussem Militär chund, bedütet soviel wie «Sicheres Auftreten Bei Totaler Ahnungslosigkeit»
Wieso mer s'Gfühl hend das das immer brucht werd i eusem Bruef und wass mer scho alles för Fails erlebt hend wommer met SABTA grettet hend khöret er i dere zemli spassige Folg.
Und ja au die Folg isch ziemli SABTA gsieh 😂
Netwörke oder ned Netwörke, das isch do d'Frog.
Aso, zum die Frog chli gnauer azluege hemmer eus met em überall uf Fotografische Events aztreffende Marco Nietlisbach zämeto um bitz über s'Thema Network z'phylosophiere. Er meint ja er seg ned de rechtig deför, mer hend gfunde: mol, öpper wo fascht jede us de Branche kennt muess bi dem Thema as Mic, et voila, er het den au metgmacht 😆
För wer isch Network wichtig, was chan eim das för Töre öffne und wie sellmer den um himmels wille gschiede Smalltalk füere? Das und no meh ghöret er i dere neue Folg.
Marco Nietlisbach: www.nietlisba.ch
April, April, oder nai es isch Mai... Witz lass nach, s'Wetter macht grad uf April obwohls doch Mai isch und net so Wechselhaft sett sie. Jano, mer verschiebed fliessig und müend demet lebe.
Suscht verzellemer mol weder was so (oder ebe ned) gloffe isch. Fascht überhitzt isch übrigens am Adi sini Kamera... Usserdem gets einigi News uss de Branche vo Site Canon und Fuji.
Apropo Fuji: De Adi het sech sogar mol no als Reviewer versuecht und för Brack.ch die neuei Fuji Instax Mini 99 usprobiert: https://www.brack.ch/blog/2024/05/die-neue-fujifilm-instax-mini-99-sofortbildkamera-im-test
Übrigens metem Promo Code INSTAX99 chasch d'Kamera bi Brack.ch bitz günschtiger bstelle ;) (Gültig bis am 10.06.2024)
Work Life, Work Work, Life Life?
Die rechtigi Balance do zfinde isch ned eifach. De Adi het sech dodezue is Soloturnische begeh und es spannends Gspröch metem Simon Kurt, wo zäme met sinere Frau de Tanja unter em Name Digitale Massarbeit unterwegs send, gfüert. Sie beid managed ire brueflichi Alltag met de gmeinsame Tochter Ella unglaublich guet, und de Adi isch dem chli uffe Grund gange.
Well de Cornelius auno spannendi Asätz het zu dem Thema hett er denn au nochli döffe was derzue verzelle 😜
E spannendi und au lehrrichi Folg öber es grosses und au aktuells Thema bim Selbständig sie.
Digitale Massarbeit:
www.digitalemassarbeit.ch
Hu es lauft weder was, isch ja au guet so. De Podcast chund drum weder bitz drunder und ehr müend euch leider bitz gedulde met neue Folge, aber es chömed bald ganz spannendi neue Interviews. Nichtsdestotrotz hemmer jetzte au chli redebedarf, isch doch bitz was gloffe in letschter Zit.
Und zwar vo Routineufträg bis zu verschissne Chappe 💩🕊️... doofi Tube...
Und vor allem enere grosse Frog: Duze bi de Chunde oder ned? Het fascht en Disput geh zwösched em Cornelius und em Adi... 🥊 Wörd eus wunderneh was ehr devo haltet!
Usserdem hemmer au trurigi News aber au ganz vell spannendi Neuigkeite. Losed doch dri 🎧
Eus gets no 😆 Sorry för de langi Unterbruch, de Cornelius het grad es bitz viel um d'Ohre, hauptsächlich wege Privatem 👷🏻♂️🔨🦺🏗️⚒️
Nichtsdestotrotz hemmer e neui Alltagsfolg parat för euch, schliesslich het de Adi sis Januarloch hinder sech und het weder fliessig was zverzelle vo Jobs und Kulturellem. Und au de Cornelius kriegts irgendwie no uf d'Reihe sis Studio bim Laufe zbhalte.
Ergendwie redemer au mega vell vo Analogfotografie, de Adi het sogar no es neus Agebot, es Fotilabor wonner euchi Filme chönd entwickle loh. Achtung, isch bitz wie e Dauerwerbesendig wurde. Und ja, gshoppet hemmer au no wie die Wahnsinnige...
Do no de Link zum Adi sim Fotilabor:
www.ehrbare-filmentwicklung.ch
Kenned ehr das au, das berüemtberüchtigte Januarloch? De Adi irgendwie scho, de Cornelius grad so gar ned…
Jano, jede vo eus weiss wie demet umgo. De Cornelius het sech no bimene KI Vortrag witers Fachwösse zuegleit, au wenn eher im Administrative Bereich. Und trotz (teils) Januarloch hend mer beid förs neue Jahr vorgsorgt und send es bitz inen Shoppingrusch bi brack.ch cho 🤑💸 ah und öber Moiré redemer auno 😵💫
Comments
Download from Google Play
Download from App Store
United States