كوب تفلسف

تكلّمنا بالحلقة هذي عن مسيرة مصطفى العقاد، المخرج السوري اللي انشهر في عالم هوليوود، شلون دخل مجال الإخراج السينمائي، وبداياته الصعبة كعربي في المجال الفني في أمريكا، تكلّمنا عن صداقته الوثيقة مع محمد السنعوسي والأعمال اللي جمعتهم، بعدها ناقشنا فلم الرسالة، والأسرار والكواليس اللي سبقت ظهور الفلم، وكم الصعوبات اللي واجهها العقاد أثناء عمله، وفلم أسد الصحراء (عمر المختار) والنقلة اللي أحدثها. أخذنا فلم الرسالة بالتفصيل، لأهميته البالغة في وقتنا الحالي، وشلون قدر يوصل للمكانة هذي، ناقشنا مرحلة الإعداد للفلم والتمويل، ومرحلة أخذ الموافقات الشرعية والقانونية، بعدها تكلمنا عن تحضير الممثلين للفلم وآليات عمل العقاد مع الشخصيات، وشلون وصل لنا الفلم متأخراً في نهاية المطاف. ناقشنا فلم أسد الصحراء اللي طُلب من مصطفى العقاد عمله، وشلون كان تقبل الجمهور الغربي والعربي له. تكلّمنا عن إنتاج سلسلة Halloween، وأهمية عمل المنتج ودوره في صناعة الفلم، وشنو الهاجس اللي كان يراود مصطفى العقاد لإنتاج أفلامه، تكلّمنا عن رغبة العقاد بعمل فلم عن صلاح الدين الأيوبي واللي ما شافت النور لأنها ما لقت الدعم الكافي، وختاماً تكلّمنا عن نهاية حياة مصطفى العقاد بشكل غير مُتوقع.

ضيفنا بديوانية الكوب كان يوسف مجيم، سولفنا معاه عن بدايات ظهور أفلام الرعب، وشلون برزت هالفئة بمجال صناعة السينما، وشنو اللي ميزها عن غيرها وكان السبب في استمراريتها مقارنةً بفئات أخرى شبه اختفت عن الساحة. شاركنا تجاربنا مع أفلام الرعب قبل، وذكريات الطفولة وتأثير هالأفلام علينا، وشلون تغيرت الصناعة بشكل ملحوظ بأفلام الرعب الحديثة. قال لنا يوسف أبرز أسماء الأفلام في فئة الرعب، واللي قدرت تحط بصمة بالمجال هذا، وذكر لنا مجوعة تصنيفات لأفلام الرعب وكل فلم يندرج تحت أي تصنيف. ناقشنا الحقبة الصامتة، وشلون كانوا يقدرون يوصلون الأفكار كاملة بشكل بصري بدون حوارات. بعدها تكلمنا عن أفلام الرعب في فترة الثمانينات والتسعينات والأكثر تميزاً فيهم. تكلّمنا عن أفلام الرعب وجوائز الأوسكار، وليش هالنوع من الأفلام ما له نصيب في مجال الجوائز، بعدها تكلّمنا عن أفلام الزومبي وشلون ممكن نصنفها، وبالختام تطرقنا لصناعة أفلام الرعب خارج هوليوود وطريقتها، وليش محد قدر يثبت وجوده في هذا المجال مثل هوليوود إلا بعض الأفلام المعدودة.

ضيفنا بالحلقة هذي كان أحمد جمال، كلّمنا عن دخوله لعالم الرسم والتصميم، بدايةً من رحلة البحث عن تخصص يتناسب مع شغفه وحبه لعالم الرسم، إلى مسابقات الجامعة والسعي للحصول على مراكز فيها، وصولاً لمرحلة التميز في عالم الأنميشن والتعاون مع أسامي كبيرة مثل مارڤل، ديزني، وأبل تي ڤي. كلّمنا عن دور العايلة وأهمية دعمهم، وشلون البيئة الداعمة تساعدك للوصول إلى حلمك مهما كان صعب الوصول له. ناقشنا رحلته في الوصول لمستوى الإحتراف في عالم الأنميشن، شلون قدر يصقل مهاراته، وين ومع منو تعلم، وشلون لقى الفرصة عشان يكون جزء من مشاريع عالمية ضخمة. تكلّمنا عن بيئة العمل في هذي المشاريع، مدى الصلاحيات اللي تنعطى للرسامين والملاحظات اللي توصل لهم، بعدها انتقلنا بالنقاش إلى المقارنة بين مارڤل و دي سي، شنو الفرق بينهم، وأيهم أفضل في مجاله، وناقشنا مجموعة أفلام والانطباع اللي خلته عند الناس. وختاماً قال لنا أحمد عن مشاريعه القادمة وهدفه لإنتاج عمل محلي بمستوى هوليوودي.

بكوبنا السينمائي هذي المرة رحنا لعالم السينما المصرية، برفقة ضيفنا الدائم المخرج البوليسي داوود شعيل، كلّمنا عن يوسف شاهين، أحد المخرجين أصحاب النمط المختلف في السينما المصرية تحديداً والعربية عموماً، كلّمنا عن أسباب تميزه وطرحه المختلف عن باقي المخرجين في الساحة المصرية، وشنو الأهداف اللي كان بيوصل لها من وراء هذا الطرح. تكلّمنا عن عائلة يوسف شاهين، دراسته، والأشخاص اللي مروا بحياته، ومدى تأثيرهم على حياته وقراراته، وشلون قدر يوضّح هالتأثير هذا من خلال أفلام السيرة الذاتية بأجزائها المتعددة . تطرقنا للمواهب اللي اكتشفها يوسف شاهين، وبرزت من خلال أفلامه، وتعاونه مع أسماء مميزة مثل فيروز، فريد الأطرش، وعمر خيرت. غطينا أعمال يوسف شاهين من حقبة الستينات إلى حقبة الألفين، بدايةً من عدم تحديد النمط المناسب، إلى الأفلام ذات السردية صعبة الفهم، وصولاً إلى فترة التألق ووضع البصمة، اللي كانت السبب بالوصول إلى تعاونات عالمية عديدة. وبالختام تكلّمنا عن تأثير العرض التلفزيوني على شهرة أفلامه، وآخر أعماله بالألفينات.

ضيفنا بالحلقة هذي كان عبدالعزيز العبيد، تكلّمنا معاه عن وكالات التسويق ونشأتهم، شلون بدوا بالترويج التقليدي ولين وين وصلوا بالخروج عن المألوف، وناقشنا أساليب التسويق واختلافها حسب الجمهور المستهدف، ودور عامل الخبرة في نجاح خطط الترويج من عدمه. تكلّمنا عن مفهوم الضجة الإعلامية، والأفكار اللي تحتاج جرأة في تطبيقها، وثقة من المُعلنين للوصول لشريحة أكبر، وذكرنا أمثلة لبعض الحملات الإعلانية اللي حققت أصداء واسعة. تكلمنا عن سنة 2015 تحديداً، والقفزة النوعية في مجال التسويق والإعلانات اللي صارت بهذي السنة، شنو المفاهيم الجديدة اللي دخلت على مجتمعنا، وأساليب الإعلان والترويج اللي سببت ثورة إعلانية يصعب تكرارها مرة أخرى. ناقشنا قوة تأثير صنّاع المحتوى، ومدى انتشار محتواهم ووصوله خارج حدود مجتمعاتهم، ووصلنا لموضوع الأخلاقيات والضوابط اللي كانوا عامل رئيسي في انتهاء العصر الذهبي لإعلانات صنّاع المحتوى في منصات التواصل الاجتماعي. ناقشنا مفهوم "مافيا الإعلانات" الشهير، ومشاكل التعامل مع العملاء وكيفية تخطيها، وشلون قاعدين نلاحظ تغيّر ثقافة المحتوى في منصات التواصل الاجتماعي بما يواكب العصر، وتأثير هالتغيير على مُختلف المراحل العمرية. وفي الختام كلّمنا عبدالعزيز عن دخوله عالم التسويق، وحبه لمجال الطبخ وشلون تطوّر من هواية انشغل عنها مع الحياة إلى صناعة محتوى مميز عن محتوى الطبخ التقليدي.

كوبنا السينمائي كان برفقة المخرج داوود شعيل، تكلّمنا بشكل مُفصل عن ستيڤن سبيلبرغ، عن دخوله لعالم الإخراج وبداياته، وشنو الأسباب اللي خلته يتجه للمجال هذا، ومدى تأثير العايلة والبيئة المحيطة على قراره بدخول عالم الإخراج وطريقته الإخراجية. تكلّمنا عن مرحلة ستيڤن سبيلبرغ الهاوي والأفلام القصيرة، وبعدها صراعه الذاتي ومحاولاته لإيجاد نمطه المناسب، وصولاً إلى مرحلة التألق، الصعود إلى القمة، وفوزه بجائزة الأوسكار. ناقشنا تفاصيل أفلام ستيڤن سبيلبرغ المميزة، والسلاسل الشهيرة اللي أخرجها وخلّت اسمه يرتبط بعالم الترفيه، ويبتعد عن أسماء المخرجين المُنافسين في المهرجانات السينمائية. تكلّمنا عن ستيڤن سبيلبرغ المنتج، وتجربته في عالم الإنتاج، وعن المخرجين اللي تأثّر فيهم خلال مسيرته. بعدها تكلّمنا عن رفاق دربه، سواء كانوا ممثلين، مخرجين، أو موسيقيين، ساهموا بوصول ستيڤن سبيلبرغ إلى القمة وجعله من الأعلام المميزة في مجال الإخراج. وفي الختام تكلّمنا عن ستيڤن سبيلبرغ في الفترة الحالية، آخر الأفلام اللي سواها، واستمراريته بالرغم من كبر سنه والدافع وراء هذه الاستمرارية.

ضيفنا كان الناشط في مواقع التواصل الاجتماعي خليل حيات، تكلّمنا معاه عن نشأة مواقع التواصل الاجتماعي، شلون دخلت لمجتمعنا في البدايات، وشلون كان تقبل أفراد المجتمع لها وطُرق استخدامهم لهذه المواقع. ناقشنا تأثير هذه الثورة التقنية على حياتنا، وشلون بدت تتغير سلوكياتنا تدريجياً بسبب مواقع التواصل والمحتوى اللي نتابعه بشكل مستمر، وشلون هالتأثير كبير وجوهري لكن أغلبنا مو واعي له. قال لنا خليل قصة تطور مواقع التواصل الاجتماعي عندنا، كل موقع أو تطبيق متى بدأ ومتى انتشر بمجتمعنا، وكلّمنا عن بداياته في مجال صناعة المحتوى وشلون دخل حياة الشهرة بالصدفة وبدون ترتيب مُسبق لها. ناقشنا مفهوم التدين، وابتعاد الناس عن هذا المفهوم بسبب فهمهم الخاطئ له، ووضحنا مدى إرتباط الدين بالحياة اليومية وشلون الإلتزام الديني يخليك تعيش حياتك على أكمل وجه وبأفضل طريقة ممكنة. تطرقنا لوضع المجتمع الحالي، والتغيير الكبير اللي صار بسلوكياتنا، ومفهوم الحرية المتطرفة اللي قاعدين نشوف أضرارها حوالينا، ومدى إرتباط صنّاع المحتوى بهذا التأثير. تكلّمنا عن المحتوى الهادف، المُتمثل في دعم القضية الفلسطينية، وواجبنا اتجاه اخواننا في فلسطين بنصرتهم عبر الأدوات المُتاحة لنا، وشلون كل شخص كلمته وتفرق ومساهمته لها أثر. وختاماً قدّم لنا خليل مجموعة من النصائح لكل المُترددين باتخاذ قرار الزواج.

ضيفتنا بالحلقة هذي كانت الدكتورة منى بن علي، تكلّمنا معاها عن الفرق بين ال life coaching والطب النفسي، وشلون شهادة المدرب المعتمد صارت شي سهل وبسيط ولكنها تعطي انطباع للشخص أكبر من قدراته. تطرّقنا لمفاهيم مهمة لكل شخص، الوعي الذاتي، وشلون الإنسان يعرف شنو هدفه، وهل فعلاً مفهوم كره الذات مثل ما احنا نعرفه، وبعدها ناقشنا المشاكل الزوجية المنتشرة بمجتمعنا، واختلاف مفهوم الخيانة بين الجنسين، وأدوات التواصل بينهم. تكلّمنا عن ثقافة مجتمعنا، والتسرع بالحكم على الآخرين بشكل لا إرادي أحياناً، وشلون الأحكام المسبقة مسيطرة علينا بشكل كبير. ناقشنا مفهوم التربية، ولأي مدى الأهل لهم دور في تكوين شخصية أبنائهم، ومتى الخطأ يقع على الآباء ومتى يتحمل الأبناء المسؤولية، وتكلمنا عن عوامل البيئة المحيطة وتأثيرها علينا، وعلى فكرتنا عن نفسنا وانطباعنا عن شخصياتنا. طرحنا التصور العام عن ال life coaching وفكرة الناس عنه، ومفهوم الإيجابية السامة المنتشر عند كثير من ممارسيه واللي كانت السبب بابتعاد الكثيرين عن فهمه، تكلّمنا عن أهمية الواقعية والتوقعات المطلوبة عند محاولة حل مشكلة نواجهها، وبعدها تطرقنا لموضوع التعليقات السلبية وتأثيرها علينا وشلون ممكن تغير منا. وبالختام ناقشنا مشكلة تواجه البنات المبتعثات واستهدافهم من قبل بعض الجهات بزرع مفاهيم خاطئة وتصورات غير واقعية عن حياة الحرية.

ضيفنا كان المخرج زياد الحسيني، وحوار عن فلم ( How I Got There شيابني هني) اللي كان من إخراج وكتابة زياد. كلّمنا عن بداياته في المجال وشلون كل الشغل والأعمال السابقة كانت تمهيد لصناعة فلم شيابني هني على مستوى عالي مثل ما كان مخطط له، قال لنا عن تجاربه مع فرقة ميامي، وشركة النظائر للإنتاج الفني، والأعمال اللي اشتغل عليها محلياً وعالمياً لصقل موهبته عشان يقدر يقدم هذا المستوى الاستثنائي والجديد على مجال صناعة السينما الكويتية. كلّمنا عن طريقة اختيار الممثلين، والتدريب اللي ياخذ شهور عشان يقدرون يأدون أدوارهم على أكمل وجه ويوصلون الإحساس المطلوب منهم، وعن مدة التصوير والصعاب والعثرات اللي واجهوها خلاله، وشلون كان اختيارهم إنهم يقدمون فلم ذو جودة عالية على حساب المدة الزمنية الطويلة اللي خذاها التحضير له، وناقشنا أجواء التصوير وشنو اللي كان يصير من تعب وجهد خلف المشاهد اللي ما تاخذ ثواني أو دقايق بسيطة من وقت الفلم. شاركنا تجاربه اللي ما اكتملت، ولحظات اليأس اللي مر فيها، وشلون ممكن الشخص يمر بأوقات يحس إنه كل شي قاعد يسويه ما له معنى، ومع ذلك استمر يسعى لتحقيق حلمه وعرف شلون يتجاوز اللحظات هذي. تكلمنا عن أهمية العاطفة بالأفلام، واحترام عقلية المشاهد بالمحتوى اللي تقدمه، وشلون تعطيه المجال الكافي إنه يستخدم خياله عشان يوصل حق بعض النهايات المُبهمة.

ضيفنا بالحلقة هذي مساعد خالد، تكلّمنا معاه عن مجال التمثيل والكتابة، شلون دش المجال وبداياته في مسرحيات الجامعة اللي كانت عامل مهم لدخوله المجال ومعرفته فيه بشكل أكبر. تكلّمنا عن سلسلة الأوابد والتجربة الفريدة من نوعها ذات الطابع المختلف، وشلون قدروا يقدمون شي يتسم بطابع الغرابة والخيال يتناسب مع المجتمع الكويتي، بعدها قال لنا عن تجربته بالتمثيل في أحد الأفلام من إنتاج شركة ديزني، وشلون كانت بحكم إنه كان الكويتي الوحيد بطاقم الفلم. وناقشنا أسباب وصول مسلسلاتنا للمستوى الحالي وتأثير سيطرة المحتوى التجاري. تكلّمنا عن ورش الكتابة، شنو يصير فيها والناتج النهائي منها، وعن مجال صناعة الأفلام بالكويت، منو القائمين على الصناعة وشلون قادرين يستمرون مع عدم وجود دعم كافي مُقدم لهم، وناقشنا الموضوع من وجهة نظر المنتجين وسبب عزوفهم عن دعم الأفلام القصيرة، ليش المحتوى التجاري صار هو الاختيار الأول والمُفضل عندهم، وشلون هالشي أثّر على جودة المحتوى الكويتي وخلاه محتوى مُجرد من الإبداع. وتطرقنا لتجربة مساعد في مسلسل بوقتادة وبونبيل، وتعاونه مع قروب شنو يعني، وناقشنا مسلسلات الست كوم والفرق بينها، وشنو الطابع المميز لمسلسل ساينفلد من بينهم، وليش الناس تفضل مسلسل عن مسلسل آخر وشنو دور الكاتب بهذه التفضيلات، وقال لنا مساعد تفضيلاته الشخصية في مجال المسلسلات والأفلام وشاركنا بعضها.

كلمنا مع يوسف نجم بالحلقة هذي عن الصوت، شنو تعريفه وطريقة تعاملنا معاه، وشلون قدرنا نوظف معرفتنا بالصوت وخواصه بمجال هندسة الصوت عشان تساعدنا نوصّل المعنى المطلوب بشتى المجالات. ناقشنا تطوّر المعدات الصوتية، وشلون جودة الصوت قاعدة تتغير مع مرور الوقت بطريقة مو الكل يلاحظها، وعن تأثير الحصول على جودة صوت أفضل بالعروض والفعاليات. تكلمنا عن المطربين وخفايا حفلاتهم، وطلباتهم الغريبة اللي الناس ماتعرفها وماتظهر للعلن.

ضيفنا كان المخرج السينمائي داوود شعيل، تكلّمنا بشكل رئيسي عن كريستوفر نولان، وشلون صار علم في هوليوود وأحد أهم الأسماء في عالم الإخراج بعمر صغير نسبياً مقارنةً بباقي المخرجين اللي بنفس مكانته، ناقشنا أفلامه من منظور سينمائي، طريقة الإخراج، أساليبه الخاصة بالتصوير، والتفاصيل الدقيقة اللي خلّت أفلام كريستوفر نولان مميزة. تكلمنا عن حب كريستوفر نولان لاستخدام العلوم بأفلامه، والموسيقى المميزة بكل فلم، وعمله مع أفراد عائلته بكثير من الأفلام. بعدها ناقشنا تفضيله لتصوير الأفلام بالكاميرات التقليدية وعدم استخدام كاميرات الديجتال، وشرحنا تطوّر الكاميرات وشلون بدت ولين وين وصلت. ناقشنا أفلام كريستوفر نولان من بداياته إلى آخر فلم له Oppenheimer، شنو اللي ميّز كل فلم وأسباب نجاحهم، عن ثلاثية باتمان وكونها نقطة محورية في مسيرته، وطريقة كريستوفر في الخدع البصرية واعتماده بشكل كبير على الواقعية.

ضيفتنا بالحلقة هذي ريم نضر، صانعة محتوى بالسوشيال ميديا، وتعمل في مجال الإعلانات والتسويق من 2013، تكلّمنا عن مجال الإعلانات وشلون تغيّر مفهومه وأساليبه مع مرور الوقت، وعن ارتباط اسم لبنان بمجال الدعاية والتسويق، ومدى صحة الصورة النمطية السائدة عن سيطرة اللبنانيين على هذا المجال. تكلّمنا عن أهمية حب المجال والشغف بالعمل فيه، والفرق بين الشغل بهدف صناعة منتج ذو جودة عالية والشغل بهدف الكسب المادي فقط.

حديثنا بالحلقة هذي كان عن مجال تنظيم الأعراس، والخفايا اللي محد يعرفها في هذا المجال. ضيفنا كان حمد الهويشل، صاحب خبرة تتعدى الـ15 سنة في مجال هندسة الصوت والإضاءة، كلّمنا عن تنظيم الأعراس، واختلاف العادات بين دول الخليج، ووضّح لنا التفاصيل والمجهود الكبير اللي محد يدري عنه، وشلون ياخذون المُنظمين أيام وشهور عشان يطلع العرس بالمستوى المطلوب ويتلخص اللي سووه كله في مدة ما تتجاوز الست ساعات.

ضيفنا بالحلقة هذي جاسم العوضي، صاحب مبادرة كويت كوميوت اللي تهدف لزيادة الوعي لنظام النقل العام وحالة المرور بالكويت، ناقشنا الباصات تحديداً كأهم وسيلة حالياً من وسائل النقل العام، شنو تاريخ الباصات كوسيلة نقل بالكويت وشلون وصلت للوضع الحالي، وشلون بدت المبادرة في بيئة غير مُهيئة لاستخدام وسائل النقل العام.

تكلمنا مع عبدالعزيز السريّع عن رحلته في عالم التصوير، وطريقه إلى أن وصل للمستوى الحالي وصنع لنفسه هوية مميزة في المجال هذا، شاركنا تجاربه بمرحلة الدراسة الجامعية، تغيير التخصصات وصعوبة تحديد الوجهة، والموازنة بين حب التصوير وبين صنع المستقبل بالطريقة التقليدية، وشلون كل التجارب اللي مر فيها ضافت له بشكل أو بآخر.

ضيفنا في هذه الحلقة داوود شعيل، المخرج السينمائي الشغوف في مجال صناعة السينما، تميّز بمجموعة من الأفلام القصيرة، وساهم بشكل كبير بالحركة السينمائية الكويتية، تكلمنا معاه عن بداياته البسيطة في المجال، وتأثره الكبير في دور السينما بالكويت في فترة منتصف التسعينات، وذكرياته عن هذيك الأيام، وشلون صار عنده الشغف الكبير هذا لصناعة المحتوى السينمائي. بعدها شاركنا تجاربه على أرض الواقع، وشلون قدر يطلع من إطار المتابع النهم للأفلام إلى إطار صانع المحتوى السينمائي، تكلمنا عن أفلامه القصيرة، الدعم اللي لقاه، والصعوبات اللي واجهها، شلون كل مرحلة وكل تجربة كانت سبب في تطوّر مهاراته واكتسابه لخبرات أكثر في سبيل أعمال أفضل، مع سعيه للمحافظة على قدر كافي من الواقعية. تكلمنا عن دور المهرجات في تقديم الدعم المعنوي لصنّاع الأفلام السينمائية، ناقشنا الفرق بين أنواع الأفلام والممثلين، وحللنا مجموعة أفلام من الناحية الفنية والتقنية. ناقشنا أهمية الثقافة، والهوية الأصيلة، وشلون الشخص يقدر يقدّم ما يتناسب مع بيئته ويتميز فيه، وشلون يقدر يتعامل مع ثقافة التعليق السلبي المنتشرة في المجتمع.

حلقتنا مع يوسف المجيم كانت عن مجال صناعة الأفلام، تكلمنا عن الأدوار اللي تصير خلف الكواليس في مجال صناعة الأفلام، شلون الشخص ممكن يطوّر مهاراته بنفسه وينمي من قدراته، وتجارب يوسف المجيم في مجال صناعة الأفلام والأدوار اللي قام فيها. تكلمنا عن طفولته وعن حبه للمجال هذا منذ الصغر، تطوّر التقنيات ومواكبة العصر، وسوق صناعة الأفلام عندنا والصعوبات اللي قاعدين يواجهونها كصنّاع أفلام في دولة لا يوجد فيها صناعة، ناقشنا موضوع انتشار منصات عرض الأفلام والمسلسلات الخليجية والعربية سلبياته، إيجابياته، وكيفية تطويره. تطرقنا لتفضيلات يوسف الشخصية في عالم الأفلام، حبه للإثارة والتشويق وأسبابه، وبعدها تكلمنا عن المسلسلات الخليجية وسبب ثباتها على نفس المستوى بدون تطوّر يُذكر أو تغيير باستثناء بعض المسلسلات اللي قدرت تطلع بطرح مختلف.

ضيفنا هذه بالحلقة يوسف بن علي، تكلمنا عن بداياته في عالم الإعلانات، أجوائه الخاصة قبل التصوير، وشلون صرنا نشوف يوسف بن علي بكثير من الواجهات الإعلانية. بعدها انتقلنا لعالم السلوك البشري والسعي لإرضاء الآخرين، شلون تكتشف النمط السلوكي المحتاج لتغيير وتعدله، تجاربه في تطوير الذات والسعي لتقبل النفس تكلمنا عن النظام التعليمي إيجابياته وسلبياته، ومشكلة الشتات المنتشرة بين أفراد جيلنا وعدم معرفتهم وجهتهم وأهدافهم المستقبلية، الموروث الثقافي وشلون نتعامل معاه، وآثار التأثير المستمر علينا خصوصاً من وسائل التواصل الاجتماعي.