阿愷之聲Podcast

今年初出版的臺語詩集《日花閃爍》已經是現象級的事件，連連再版，討論熱烈。作者温若喬本身是心理師，也是臺語迷眾頁「學台語 @ohtaigi 」的創辦人。臺語是若喬這幾年努力學轉來的話，一方面是想欲增加和序大的感情和記持，然後就是慢慢對這款語言揣著佮這片土地的連結，最後變成日常觀察、甚至是創作的話語。 對鹿港阿愷來講，我好奇為啥若喬會講家己是淡水人（毋是攏叫台北）？對一位重新學臺語的人，沿途的挑戰和風景是啥？若喬以臺語寫詩，阿愷用臺語講萬事萬物，這集節目我準備和若喬來討論各自看待臺語的角度和可能，總講一句，緊來收聽！ ► 來讀詩集｜日花閃爍 https://www.books.com.tw/products/0011039851 ► 節目唸詩｜ 〈浮嶼〉 日光恬恬 曝佇青青闊闊的海面 共微微起落的湧陵 變做一點一點的天星 這粒彼粒 閃閃爍爍 參滿月仝款的浮嶼金金 咧共船頂的阮歡迎 〈等路〉 情人相牽坐河邊 看紅冇冇的日 勻勻仔沉 一分 一刻 一點鐘 總算等著厚禮數的瞑 伊的等路是 一爿幻幻仔光的月 一片恬恬仔爍的星 一个拉圇仔燒的唚 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

“Fremd bin ich eingezogen, fremd zieh' ich wieder aus.”－Gute Nacht／Wilhelm Müller 「咱來的時是孤單，離開時猶是孤單。」－順行／鄭順聰譯 這集阿愷之聲Podcast「洛津浪音樂」單元，節目來賓是臺文里長伯鄭順聰。年初，我注意著一張創作專輯《冬之旅─台語爵士浪遊》，由詩人鴻鴻和爵士音樂家謝明諺共同計畫，林理惠演唱，其中的台文歌詞改編就是順聰師，聽講這是一件頭殼𢯾咧燒的任務？ 兩百年前，維也納作曲家舒伯特完成連篇歌曲《冬之旅》，這是伊人生尾期的作品，歌曲改編Müller的詩，一位歌者一台鋼琴，舒伯特用二十四首歌講了一段被人放捒的浪遊故事，非常精彩。但，到底經典如何改編進當代？音樂家謝明諺透過Jazz的手路予一切有了可能，順聰師台文改編的意義，除了寫出新的語感，甚至予《冬之旅》的歌詞出現下港農村的風和景，正港寫出屬於咱臺灣人的記持和歌詩。 到底兩百年前《冬之旅》內底的寂寞，對現代社會人的意義是啥？這集節目，來聽順聰師精彩的開破！ “Und immer hör’ ich’s rauschen: Du fändest Ruhe dort!”－Der Lindenbaum／Wilhelm Müller 「望你大樹來保佑－有大樹就無憂愁。」－大樹／鄭順聰譯 ► 節目重點 • 順聰師頭一擺聽舒伯特《冬之旅》是何時？ • 兩百年前的寂寞對現代人的意義是？ • 《冬之旅》台文改編的挑戰？ • 來講〈順行〉和〈大樹〉這兩條歌詞改編。 • 古典音樂教咱的代誌？ ► 節目音樂｜感謝黑眼睛文化授權放送 ► 贊助節目｜https://voiceofakai.oen.tw ► 歌詞參考｜ 〈順行〉 咱來的時是孤單，離開時猶是孤單；想起美麗的季節，紅冇冇花蕊開滿滿。 彼當時咱有約束，欲共幸福做成；無疑悟欺騙隱瞞，冰天雪地烏一半。 被擲來這个世界，放揀是咱的運命；四界位荒荒廢廢，家己揣路家己行。 月光照落的形影，做我唯一陪伴；茫茫渺渺無依倚，心頭袂定真驚惶。 躊躇嘛是無較縒，戲敢欲予別人搬？起狂的人像狗吠，痟狂共關佇門外。 愛就愛予伊飄浪，生是生成來註定；自東向西海角天涯，講一聲：順行啦。 喙齒仔根咬予絚絚，莫閣想莫閣聽；輕輕仔輕輕拈跤行，恬恬仔恬恬無出聲。 關佇咧世界之外，弄手講：再會啦；若是恁有來看著，當做無影無跡啦。 〈大樹〉 學校的音樂老師，教阮唱菩提樹；樹欉我毋捌看過，風吹來開喙就唱。 彼工我行到公園，真好運拄著伊；樹影清涼閣清幽，心遐爾媠的樹葉。 歡喜相招好朋友，樹仔跤樂悠悠；同齊𨑨迌手牽手，做眠夢彼款親像。 夢有苦澀有甜蜜，像人生的詩篇；無論束縛抑自由，有朋友就無憂愁。 落尾才知歌所唱，事實毋是菩提樹；好朋友攏走散去，賰我戇戇佇遮守。 冬天過了春夏秋，時間無法度倒流；樹欉猶原徛佇遮，心形的樹葉幼幼。 我有單純的目睭，風吹來歌就唱；心情全然無相全，望你大樹來保佑— 有大樹就無憂愁。 Powered by Firstory Hosting

身為臺灣的棒球迷，這幾年真正有夠幸福。無想著阿愷之聲Podcast放送以來，Team Taiwan佇國際賽的表現愈來愈精彩，感謝彰化好球友福興君宥和秀水昀志總是願意做伙空中放送，這集節目阮欲來回顧2026年WBC世界棒球經典賽臺灣隊的表現！ ► 節目重點 • 按怎看這回臺灣隊的30人名單？ • 回顧臺灣對日本和韓國這兩場比賽。 • 這回比賽阮各自心目中的MVP球員是？ • 世界棒球的趨勢？ • 身為球迷，按怎觀察這幾年國內球迷的改變？ ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集「台長時間」欲分享今年一月時，阿愷和兩位好朋友寬敏是喫茶中毒者和民雄慢靈魂咖啡廳的頭家阿晉，阮做伙去日本北海道巡禮爵士喫茶店（jazz kissa）旅行的故事。這逝旅程來到小樽、札幌和函館，除了佇爵士喫茶店聽唱片啉beer感受音樂帶來的樂暢，阿愷也佇北海道經驗了人生中頭一場大雪，印象深刻。 這是一場三个爵士好兄弟的旅行，本集節目準備對日本爵士樂的歷史講起，為何爵士喫茶店是日本戰後世代的共同回憶？這逝旅程，阮三个又閣來到啥款的店家，有了啥款趣味的故事和感想？ ► 節目提起的爵士喫茶店｜小樽的FreeLance、札幌的Jamaica和Slowboat、函館的Bop Jazz Bar（バップ）和J.B.ハウス ► 爵士喫茶店聽著的音樂｜Spotify歌單參考 https://open.spotify.com/playlist/5iAdY9nFgCYqoIKxRMMdqE?si=4dd32381caa94eba ► 緊來買票｜阿愷之聲臺灣文學Live Podcast計畫 https://voiceofakai.oen.tw/events/39Sly8oukiz3yh0ka7oYRH2g7w6 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

2026年開春頭一集阿愷之聲「文學烏亂濺」單元，咱邀請溪州阿倫和福興君宥來節目開獎，這禮拜就是WBC世界棒球經典賽，阮欲趁燒來討論一本和臺灣棒球相關的小說，是Nakao Eki Pacidal寫的《蕉葉與樹的約定》。 臺灣小說的特色，親像攏會處理著後殖民、族群/自我認同、甚至是轉去家鄉的課題。來自花蓮太巴塱部落的Nakao，聽講伊一直到出國讀歷史學，才有了重新理解家鄉的角度，上新的小說《蕉葉與樹的約定》對日本時代花蓮能高野球團的故事發想，離開部落的阿美族少年來到港口做工、甚至去日本訓練野球，面對現代文明和傳統體系的躊躇，這本小說寫的猶原是當代臺灣的命運。 其實運動比賽本身就是政治，這集節目阮準備對小說出發，最後來討論國際棒球比賽對臺灣人的意義是啥，總有一工臺灣敢有可能行出家己的路？ ► 來讀小說｜Nakao Eki Pacidal《蕉葉與樹的約定》 https://www.books.com.tw/products/0011024609 ► 活動預告｜時光二手書店書市集〔落地短講03〕 ​ 主題｜阿愷之聲文學現場濺─Nakao Eki Pacidal《蕉葉與樹的約定》 時間｜3／21 ㊅ 16:00–16:40 地點｜市集主舞台（花蓮市建國路8號） 對談｜鹿港阿愷、溪州阿倫 ► 緊來買票｜阿愷之聲臺灣文學Live Podcast計畫 https://voiceofakai.oen.tw/events/39Sly8oukiz3yh0ka7oYRH2g7w6 Powered by Firstory Hosting

這集阿愷之聲Podcast「空中泡茶間」單元邀請了彰化鄉親aka金鐘影帝莊凱勛，凱勛是今年三月客家電視台的新戲《都市開基祖》的男主角，這集節目欲來討論「搬戲」這回事，到底凱勛按怎演活每一个角色？ 長期以來我攏愛看凱勛演戲，無論是演萬惡自私的立委、人生碎糊糊的更生人、甚至是經營酒店的Drag Queen媽媽，凱勛總是透過寫實的角色搬出逐家的生活故事。自頭講起，我真好奇來到台北拍拚的彰化人，家鄉對一位演員的意義？凱勛三不五時攏咧演別人的「阿爸」（這齣新戲也是演阿爸），到底伊按怎理解家己的阿爸、甚至是今仔日家己也成作兩位囡仔的阿爸之間的連結？ 這集節目，咱準備對凱勛的搬戲人生講到新戲《都市開基祖》，為啥這是一齣適合所有人攏來看的戲？ ► 節目重點 • 啥物機緣予彰化囡仔走往戲劇路？ • 家鄉/彰化對一位演員的意義？ • 搬「阿爸」這款角色的挑戰？ • 新戲《都市開基祖》的阿財是啥款的角色？ • 學習語言（客語）對演員的意義？ ► 來看《都市開基祖》 https://www.facebook.com/CityFoundingPioneer ► 封面相片｜特別感謝林鈺智 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

聽眾朋友新年快樂，阿愷之聲團隊祝福各位新的一年攏馬有春/賰，身體健康，閤家平安！ 新的一年欲來宣傳阿愷之聲特別計畫，台長準備對空中來到實地，對臺灣頭放送到臺灣尾，這个「臺灣文學Live Podcast」巡迴計畫總共邀請四位作家＋出版社總編、四个城市、四間獨立冊店、四場對談主題。到底這个特別計畫有啥看頭？趕緊收聽這集節目恁就知！ ► 活動消息｜臺灣文學Live Podcast巡迴計畫 小說家 楊双子 「文學中的台灣史」 4/19（日）15:00-17:00 台中梓書房 小說家 吳明益 「小說中的世界和地方」ft.溪州阿倫 4/25（六）15:00-17:00 台北現流冊店 春山出版社總編輯 莊瑞琳 「面對世界的臺灣書寫和出版」 6/6（六）15:00-17:00 高雄等閑書房 小說家 黃崇凱 「歷史的集體記持和想像」 6/7（日）15:00-17:00 台南南渡策室 ► 活動報名｜ https://voiceofakai.oen.tw/events/39Sly8oukiz3yh0ka7oYRH2g7w6 ► 廣告贊助｜春山出版李根政新冊《此岸與彼岸》 https://www.books.com.tw/products/0011043017 阿愷之聲工商服務時間，現子時春山出版推出好冊《此岸與彼岸：一個社會運動者的身心之旅》。作者李根政來自金門，這是一本結合個人故事和經驗社會運動了後的思考佮書寫，記錄李根政對金門的農家子弟、小學美術老師，後來釘根南臺灣，成作環境運動者的過程和反思。這本冊欲寫予同款關心社會和小我實現，佇大島和小島，咱佮亻因之間，對此岸努力走揣彼岸的各位。 ► 封面相片｜感謝聽友Siā Phòe-hûn ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集阿愷之聲Podcast「查埔人專題」邀請著我臺大城鄉所的老師畢恆達教授，小畢老師2025年底出版自傳《出國吃冰絕不能咳嗽》，透過這本冊，我更加熟似這位教授的成長生活，原來咱攏捌想過類似的代誌啊！ 我想起當年準備考城鄉所，翻小畢老師彼本經典的《空間就是性別》（2004），伊用淺白的文字講出大道理，完全拍開了我看待性別議題的目睭。真歡喜會使透過Podcast和小畢老師開講，雖然我小可仔緊張，但到底老師按怎行向性別研究這條路？緊來收聽！ ► 節目重點 • 按怎動筆來寫關係緊張的阿爸？ • 寫性別專欄對母仔囝關係的影響？ • 查埔人按怎跳脫男性文化來研究性別？ • 生理男性做性別/婦女研究的挑戰？ • 按怎予直男有性別意識？ ► 來讀新冊｜畢恆達《出國吃冰絕不能咳嗽》 https://www.books.com.tw/products/0011040537 ► 廣告贊助｜春山出版李根政新冊《此岸與彼岸》 https://www.books.com.tw/products/0011043017 阿愷之聲工商服務時間，現子時春山出版推出好冊《此岸與彼岸：一個社會運動者的身心之旅》。作者李根政來自金門，這是一本結合個人故事和經驗社會運動了後的思考佮書寫，記錄李根政對金門的農家子弟、小學美術老師，後來釘根南臺灣，成作環境運動者的過程和反思。這本冊欲寫予同款關心社會和小我實現，佇大島和小島，咱佮亻因之間，對此岸努力走揣彼岸的各位。 ► 封面相片｜特別感謝林玟圻 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

這集節目毋是欲來推薦好料，「鰇魚麋的滋味（魷魚粥的滋味）」是夾腳拖劇團 Flip Flops Theatre今年三月準備演出的舞台劇，故事改編自二二八事件受難者李瑞漢律師和牽手邱己妹的生命故事，哎，彼鼎等無人轉來食的鰇魚麋，其實是人生酸甘甜的滋味。 劇團團長吳易蓁長期以來關心台灣史、人權和族群認同等題目，伊除了寫劇本，閣會做繪本，親像《愛唱歌的小熊》（2012）、《說好不要哭》（2018）和《最美的風景》（2022）。節目一開始，先來對彰化囡仔為啥行往劇場這條路講起！ ► 來看戲｜3/7-8 鰇魚糜ê滋味X台北偶戲館 https://www.accupass.com/event/2512120128481452492060 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

按怎講三十歲的查埔人適合聽貝多芬的尾期弦樂四重奏？ 這集阿愷之聲Podcast「查埔人專題」邀請了石牧民老師，頂遍用台語開講馬勒的交響曲（EP126）實在樂暢，這擺阮欲對古典音樂探討人生階段的課題，特別是男性三十歲這關。我真好奇，石牧民老師三十歲的時陣咧想啥、煩惱啥？阿愷的三十歲竟然開始聽起以前感覺真無聊的貝多芬弦樂四重奏，到底古典音樂按怎使人認捌家己？ ► 廣告贊助｜沐羽的上新小說《代代》／春山出版 https://www.books.com.tw/products/0011043019 ► 貝多芬弦樂四重奏的經典版本｜阿班貝爾格弦樂四重奏（Alban Berg Quartett）、義大利弦樂四重奏（Quartetto Italiano） ► 加碼推薦三个弦樂四重奏版本｜史麥塔納弦樂四重奏（Smetana Quartet）、茱莉亞弦樂四重奏（Juilliard String Quartet）、Végh Quartet ► 貝多芬晚期四重奏的推薦版本｜Busch Quartet、史麥塔納弦樂四重奏 ► 石牧民老師推薦三首送予2026年阿愷之聲聽眾的歌 Busch Quartet演奏貝多芬第十五號弦樂四重奏第三樂章：https://youtu.be/e76ma9n52j0?si=dIcAwJ6m80mpoOwx Claudio Arrau演奏李斯特三首音樂會練習曲之二「嘆息（Un sospiro）」：https://youtu.be/S_bVk3RMPyk?si=YIS2XTWsnzQJ8OqK Sviatoslav Richter演奏李斯特巡禮之年第二年義大利的第二首「婚禮（Sposalizio」：https://youtu.be/cdzaMUw98pc?si=A2GYWkaBSMHiRaO2 ► 節目音樂｜布達佩斯弦樂四重奏演奏貝多芬第七號弦樂四重奏（1960） ► 贊助節目｜https://voiceofakai.oen.tw Powered by Firstory Hosting

今仔日來空中作伙泡茶的是阿愷的嘉義好朋友下港女子和灰鴿，恭喜兩位完成人生的第二本冊《下港好料》🎉 節目一開始先來同業開講，下港女子和灰鴿經營的「鴿在吹雞歸Podcast」已經半冬，這段時間製作節目的感想是啥？若講做Podcast有法度揣出家己的聲音，這擺新冊《下港好料》和頂一本《裏嘉義》（2023）有佗位更加進步？來聽阿愷的嘉義好朋友努力挑戰自我的故事！ ► 來讀新冊｜下港女子《下港好料》 https://www.books.com.tw/products/0011039445 ► 廣告贊助｜春山出版香港作家沐羽的全新小說《代代》 https://www.books.com.tw/products/0011043019 阿愷之聲工商服務時間，現子時春山出版推出好冊《代代》，作家沐羽來自香港，第二十六屆臺北文學獎提著年金大獎。上新的小說《代代》講了八代香港人離散的命運，香港是一个前往的所在，也是一个逝去的城市。這本小說按一對阿公和孫的故事講起，阿公是一九五七年對中國廣東泅水來到香港討生活的彼輩，阿孫風仔是反送中運動移民到台灣的彼代。「到底咱想欲過啥款的日子？」沐羽透過食物的滋味重新連結香港人的記持，雖然香港的命運漂浪，但無的確，香港人已經佇世界各地重新活出家己，故事就對這本《代代》來講起。 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

2026年頭一集節目，阿愷竟然來到裝咖人樂團主唱張嘉祥的房間錄音兼泡茶，其實三年前頭一擺約嘉祥錄節目的地點是阿愷住的飯店，實在是每一遍的錄音空間攏真奇妙啦（？） 這集節目一開始對「行出同溫層」討論起，當代面對分眾、甚至是中國抖音歌和資訊戰的時代，到底創作的意義是啥？啥物是台灣感性？面對韓國和法國的讀者/聽眾，外國人按怎理解臺灣的鄉村文化？ 嘉祥講，其實一開始發表小說《夜官巡場》（2022）和同名專輯，伊家己並無樂觀，完全料想袂到後來作品會使行遮遠。這本小說2025年翻譯成韓文和法文版，嘉義民雄的故事也有了機會面對世界，嘉祥也帶著樂團來到國外唱著台語創作的歌謠。這集節目就來聽這段日子嘉祥和裝咖人作伙行過的路。 ► 廣告贊助｜有理文化《台灣ê故事—寫予咱ê島嶼》 https://www.books.com.tw/products/0011037478 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

2025年最後一集台長時間，我想對最近網路討論度真烈的「特權（privilege）」現象來回顧今年，咱敢有可能意識著家己，然後理解別人處境？對我來講，2025年是重新熟似家己的一年，感謝各種人事物的發生，落尾這集節目也會來回答聽眾朋友的call in。 最後，感謝今年各界聽眾朋友對阿愷之聲Podcast的支持和照顧，明年我猶原會努力放送，請繼續收聽！ ► 廣告贊助｜有理文化《台灣ê故事—寫予咱ê島嶼》 https://www.books.com.tw/products/0011037478 ► 阿愷之聲聽友會line社群｜ https://line.me/ti/g2/uS2PKqXbuTY7TvzDwtiACCQwj_kmQZb4VO0XRQ?utm_source=invitation&utm_medium=link_copy&utm_campaign=default ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

「黃皙暎的《悠悠家園》是我這世人看過上精彩的小說！」－溪州阿倫 2025年最後一集阿愷之聲「文學烏亂濺」單元，再次邀請咱懷念的溪州阿倫，阮欲來討論今年由盧鴻金老師翻譯、春山出版韓國國寶級作家黃皙暎的小說《鐵道家族》，這本小說佇2024年閣入圍國際布克獎決選名單，透過家族四代人的故事寫出韓國的近代史，非常精彩！ 今年八十三歲的黃皙暎一生傳奇，伊經歷過韓戰、民主化運動甚至也捌入獄，雖然時代的變動是無奈，但黃皙暎相信文學有可能回應時代，伊的作品豐富，甚至翻譯到世界各國語言。黃皙暎目前佇臺灣的翻譯本包括2002年由陳寧寧翻譯的《悠悠家園》、今年由林瑞翻譯的《5.18光州！光州！》閣有這本《鐵道家族》。這集節目準備對黃皙暎來介紹，到底伊的作品按怎寫出東亞史？黃皙暎和韓江這兩代作家各自用啥款的角度來寫韓國民主化運動？甚至，黃皙暎的作品如何對照咱台灣？ 這集節目相當澎湃，雖然現子時火車無法度駛往滿洲的平原，但文學的列車會繼續前往彰化溪州。阿愷之聲文學烏亂濺製作已經來到四年半，這過程親像佇煙筒管靜坐抗議的李鎮五，但這條路有恁相陪收聽，阿愷之聲就會繼續堅持放送落去，再次感謝！ ► 節目預告｜「開往溪州的文學列車」陳君宥製作 https://youtu.be/9UqmJt9OV9c?si=zxAR7qxWQ-P3cst3 ► 來讀小說｜黃皙暎《鐵道家族》盧鴻金譯 https://www.books.com.tw/products/0011018605 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

歡迎收聽阿愷之聲Podcast「文學烏亂濺」單元，這集欲來討論一本八十年前的經典小說，英國作家喬治・歐威爾寫的《動物農莊》，但本節目無預算觀落陰作家，所以咱歡迎這本冊的華語翻譯aka來自嘉義的廖靖。 今年逗點文創結社出版了《動物農莊》新譯本，但面對現子時至少二十本以上的譯本，重新翻譯的意義是啥？我更加好奇，對譯者廖靖來講，伊會按怎看這本小說？這本冊特別收錄的兩篇歐威爾的文章〈出版的自由〉和〈烏克蘭語譯本序〉，佇2025年的臺灣，重新讀歐威爾的小說，有啥款特殊的意義？ 這集節目，恁甚至會使聽著譯者廖靖念原文的〈英格蘭之獸〉，內容精彩，緊來收聽！ ► 來讀小說｜喬治・歐威爾《動物農莊》廖靖譯 https://www.books.com.tw/products/0011028982 ► 來賓推薦｜安娜．方德《喬治．歐威爾之妻的隱形人生》、契科夫《凡尼亞舅舅》、潘克印的電影《我家的事》 ► 特別感謝｜民雄一樂酒家場所支持 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

阿愷之聲Podcast總算來到第200集，咱佇葡萄牙旅行的鹿港學姊總算會記著通轉來囉。這遍，學姊因為一場馬拉松來出發，但完全無規劃的旅途意外發生各種料想袂到的代誌，這集節目就來講頂个月攏佇歐洲的學姊到底發生啥款精彩的故事？ 又閣是一年的年底，每一年攏親像一場走標（賽跑），過程有可能躊躇、甚至想欲放棄，但沿途拄著各種和你give me five的生份人，攏有可能是一段美麗的意外故事，予人繼續有氣力走落去。2025準備來到2026年，會記著對家己講一聲多謝！ ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

阿愷之聲Podcast「查埔人專題」這集邀請好朋友婦產科醫生彰化IU，阮準備對人類學和諮商心理背景的魏明毅老師彼本《靜寂工人》講起，到底𠢕（gâu）文化（男子氣概文化）按怎影響一个查埔囡仔的成長？續落來透過潘客印導演的電影《我家的事》，來講阮成長過程和阿爸、甚至和公司主管的互動經驗，這毋是一件簡單的代誌，透過冊和電影意識著這款文化造成的矛盾和辛苦，最後咱敢有可能轉來做家己？ 照理講是人生勝利組的醫生，伊和阿爸的故事又閣是啥？ ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

阿愷之聲Podcast「查埔人專題」真歡喜邀請台中理解身心診所的精神科醫師陳璿丞，陳醫師本身會寫專欄也主持Podcast「從大腦到心理」。這集節目阮準備對最近一本社會學家許雅淑寫的新冊《何苦為男？》講起，到底父權文化按怎養成一位男性？為啥頂一个世代的阿爸無慣習表達情緒？最後，現代的咱敢有可能行出一條新男性之路？ 這集節目非常精彩，也是阿愷之聲頭一遍佇身心診所會談室錄音！ ► 節目重點 • 精神醫學按怎理解父權文化中成長的男性？ • 為啥電影中的中年阿爸攏遮恬靜？ • 孤單敢是一款病？ • 如何練習面對家己的情緒？ • 按怎陪伴厝內序大面對中年？ ► 陳璿丞醫師推薦的冊｜許雅淑《何苦為男？》、張慧慈《長女病》和譚蕙芸《家鎖》 ► 特別感謝｜引書店Podcast許皓甯學長牽線 ► 節目音樂｜鹿港新聲閣 ► 贊助節目｜https://voiceofakai.oen.tw Powered by Firstory Hosting

歡迎收聽阿愷之聲Podcast講音樂的「洛津浪音樂」單元，節目來賓是咱懷念的聲音溪州阿倫，這集欲來開講阮各自人生的台語歌！ 啊恁人生的台語歌是佗一首？ ► 節目講著的音樂｜ 陳一郎：酒味菸味、歹命囝、行船人的純情曲／陳雷：往事就是我的安慰、心愛的甭哭／葉啟田：夜霧的港口、男性的復仇、三年前的我、回鄉的我／江蕙：五更鼓、藝界人生／西卿：相思燈／方瑞娥：風中燈、水車姑娘、黑玫瑰／黃乙玲：孤女的願望、臺北SAYONARA／許富凱：純情青春夢／鳳飛飛：白牡丹／林文隆：紅瓦厝／林強：向前行／詹雅雯：濁水溪之戀、人生公路、北極星、心悶／黃三元：佈田姑娘、思念故鄉的情人／澎恰恰：六十年前的一張批／伍佰：樹枝孤鳥、心愛的再會啦／李竺芯：拌拌咧、賀爾蒙／農村武裝青年：予你的歌／洪第七：懷念的播音員 ► 相片提供｜Richie Chan ► 贊助節目｜https://voiceofakai.oen.tw Powered by Firstory Hosting

鳳凰風颱的暗暝，來聽這集阿愷之聲「台長時間」，我欲分享最近去南投竹山國中週會演講的感想，閣有EP195訪問音樂人林生祥的故事。交工樂隊的彼首〈風神125〉唱出足濟人（很多人）的心聲，這集節目台長就準備來分享我的風神125。 恁的人生中敢有親像〈風神125〉這款的歌？ ► 節目音樂｜城鄉放送局樂隊〈凝望1935〉、〈風神125〉 ► 贊助節目｜https://voiceofakai.oen.tw Powered by Firstory Hosting