VR hlaðvarpið

Verðbólgan mælist nú 5,4% og verðhækkanir á olíu eru farnar að taka til sín. Í nýjasta þætti H fyrir hagfræði fara Halla Gunnarsdóttir, formaður VR og Ásgeir Brynjar Torfason, ritstjóri Vísbendingar, yfir hvernig verðbólga getur verið keyrð áfram af verðhækkunum. Þá fara þau sérstaklega yfir þau víðtæku áhrif sem olíukreppan gæti haft og hvað er hægt að gera í því. Gestur þáttarins er Runólfur Ólafsson, framkvæmdastjóri Félags íslenskra bifreiðaeigenda, sem að hefur lagst yfir heimsmarkaðsverð á olíu og hvernig það getur birst hér á landi. 

Orðið aðhald kemur fyrir tæplega 300 sinnum í ræðusafni Alþingis á yfirstandandi þingi. En hvað er þetta aðhald? Halla Gunnarsdóttir, formaður VR, og Ásgeir Brynjar Torfason, ritstjóri Vísbendingar, halda áfram að spá í spilin í efnahagsmálum. Gestur þáttarins er Runólfur Pálsson, forstjóri Landspítala, sem segir frá því hvernig aðhald í ríkisfjármálum hefur áhrif á stærstu heilbrigðisstofnun landsins.

Hagfræði leikskólanna – er það til?  Já, leikskólar eru ein af grunnstoðum samfélagsins og þeir eru þjóðhagslega hagkvæmir. Í nýjasta hlaðvarpsþætti VR, H fyrir hagfræði eru því leikskólarnir aðalumræðuefnið. Í þættinum ræða Halla Gunnarsdóttir, formaður VR, og Ásgeir Brynjar Torfason, ritstjóri Vísbendingar, saman um efnahagsmál, á mannamáli. Gestur þáttarins að þessu sinni er Henný Hinz, aðstoðarframkvæmdastjóri ASÍ, sem fjallar um leikskólana út frá hagfræðinni – en með mýkt og mildi að leiðarljósi. 

Allt hækkar og ekki lækka lánin! Í síðustu viku tilkynnti Seðlabankinn að stýrivextir yrðu óbreyttir. En til hvers eru eiginlega stýrivextir? Í þriðja þætti af hlaðvarpi VR H fyrir hagfræði fjalla Halla Gunnarsdóttir og Ásgeir Brynjar Torfason um tæki til að draga úr verðbólgu. Hávaxtastefnan er komin í þrot, segja þau, hún er hörð við skuldara og leigjendur en ívilnar þeim sem eiga peninga. Gestur þeirra að þessu sinni er Arnaldur Sölvi Kristjánsson, lektor við hagfræðideild Háskóla Íslands, sem hefur einstaklega mikinn áhuga á fjármálum hins opinbera. Hvert er samspilið á milli opinberra fjármála og peningastefnu 

Verðbólga er komin yfir 5% samkvæmt nýjustu mælingum Hagstofunnar. Er verðbólgan eitthvað náttúrulögmál? Hvað er vísitala neysluverðs?Hlaðvarp VR fjallar að þessu sinni um verðbólgu og verðbólgumælingar. Halla Gunnarsdóttir, formaður VR, og Ásgeir Brynjar Torfason, ritstjóri Vísbendingar, ræða nýjar verðbólgutölur. Ásta Jenný Sigurðardóttir, sérfræðingur í vísitöludeild Hagstofunnar, útskýrir vísitölu neysluverðs.

H fyrir hagfræði er hlaðvarpsþáttur þar sem fjallað er um efnahagsmál út frá sjónarhóli launafólks. Halla Gunnarsdóttir, formaður VR og Ásgeir Brynjar Torfason, doktor í fjármálum, kryfja hugmyndir á sviði hagfræðinnar og draga fram tengslin á milli kenninga og dagslegs lífs. Þau fá til sín góða gesti sem hafa sérþekkingu á sviði efnahagsmála og ræða bæði stórar og smáar hugmyndir, allt á mannamáli! Áherslur hagfræðingsins Mariönu Mazzucato um meiri virkni og aðkomu hins opinbera á mótun atvinnustefnu og þróun atvinnulífs voru til umræðu í nýju hlaðvarpi VR – H fyrir hagfræði – þar sem Sveinbjörn Finnsson, aðstoðarmaður ríkisstjórnarinnar, benti á að forsætisráðherra tali á svipuðum nótum. Mazzucato hélt erindi á fundi um mótun atvinnustefnu Íslands nýlega.

 Í síðasta þættinum af hlaðvarpsseríunni með konum í VR spjallar Halla Gunnarsdóttir, formaður VR, við reynslumiklar konur úr atvinnulífinu sem hafa einnig allar verið kjörnar til trúnaðarstarfa fyrir VR. Viðmælendur eru Ólafía B. Rafnsdóttir, fyrsti kvenformaður VR, Svanhildur Ólöf Þórsteinsdóttir, núverandi stjórnarkona og Stefanía Magnúsdóttir sem sat í stjórn VR í 20 ár og einnig varaformaður um tíma. Þær ræða um Kvennárið, þýðingu jafnréttisbaráttunnar fyrir þær og ýmislegt varðandi barneignir, blæðingar og breytingaskeiðið.

Ferðaþjónustan er orðin ein stærsta atvinnugreinin á Íslandi og í þessum þætti spjallar formaður VR, Halla Gunnarsdóttir, við konur sem starfa við fjölbreytt störf innan hennar. Rætt er við Eyrúnu Gunnarsdóttur, móttökustjóra hjá Fosshótelum, Eriku Martins Carneiro sem starfar sem leiðsögukona hjá Góu Travel og Jennifer Schroder, söluaðila hjá 360 Wanderlust og stjórnarkonu í VR. Opið og fræðandi spjall um ferðaþjónustuna, reynslu erlendra kvenna af því að aðlagast íslensku samfélagi, framkomu ferðamanna og margt fleira.

Í þessum þætti er rætt við konur sem starfa við lagerstörf og eru í VR. Rætt er við þær Sunnevu Blöndal hjá BYKO, Ágústu Ýr Írisardóttur hjá Bauhaus og Rebekku S. Hannilbalsdóttur sem starfar hjá Halldóri Jónssyni. Rætt er um ýmislegt sem viðkemur því að starfa á lager, hvernig er að vera kona í því starfi, framkomu viðskiptavina, fordóma, Kvennafrídaginn og margt fleira.

Í tilefni af Kvennaári 2025 hefur VR hleypt af stokkunum hlaðvarpi um stöðu kvenna á vinnumarkaði. Í þessum þætti tekur Halla Gunnarsdóttir formaður VR á móti þeim Arndísi Arnarsdóttur hjá Hagkaup, Júlíönu Einarsdóttur hjá Aðföngum og Kristínu Sævarsdóttur hjá Húsasmiðjunni. Heiti þáttarins gefur fyrirheit um innihaldið, Margt hefur breyst til hins betra en það er alls konar eftir! Til umræðu er kvennabaráttan, þriðja vaktin og þrjú b – blæðingar, barneignir og breytingaskeiðið, svo fátt eitt sé nefnt.

Félagsfólk VR vinnur við fjölbreytt störf í þjóðfélaginu en rætur félagsins liggja í verslun. Það er því vel við hæfi að hefja þessa þáttaröð með konum í verslun. Hér ræðir Halla Gunnarsdóttir, formaður VR, við þær Alexandriu Petrinu Arnarsdóttur hjá Ikea, Guðrúnu Maríu Jóhannsdóttur hjá Húsasmiðjunni og Guðnýju S. Bjarnadóttur hjá Vero Moda um starfið í versluninni, vinnuumhverfið og helstu áskoranir í starfinu. Þær ræða einnig kvennabaráttuna, jafnrétti, fordóma ásamt því að tala opinskátt um blæðingar, barnsburð og breytingaskeiðið.

Konur í VR  VR hleypir nú af stokkunum hlaðvarpinu Konur í VR þar sem formaður félagsins, Halla Gunnarsdóttir ræðir við VR konur í hinum ýmsu störfum. Tilefnið er Kvennaár 2025 en í ár eru fimmtíu ár frá fyrsta kvennaverkfallinu 24. október 1975 þegar íslenskar konur lögðu niður launuð og ólaunuð störf og samfélagið lagðist á hliðina. Árið í ár er helgað konum og þátttöku þeirra í samfélaginu. Markmið með hlaðvarpinu er að bregða ljósi á hin ólíku störf sem konur gegna innan VR og veita innsýn í reynslu þeirra á vinnumarkaði. Margt hefur breyst til hins betra á hálfri öld en engu að síður er enn langt í land að konur og karlar standi jafnfætis á vinnumarkað. Hlaðvarp VR er ein leið til að auka sýnileika kvenna og efla enn frekar umræðuna um réttindi og frelsi þeirra.