伊索寓言台語故事

二十一 .《鳥鼠的會議》台語文翻譯/劉倍綺 聲音/劉芳 蔡爸爸 蔡昀融 佇一个暗摸摸的暗暝，一陣鳥鼠仔覕佇壁角開一場緊急會議。因為咧—— 大花貓閣出現啦！ 鳥鼠仔：唉呀！昨暝我才拄𬦰入去灶跤，想欲偷提一寡仔賰飯食，雄雄「喵！」的一聲，大花貓對桌仔下跤跳出來！險仔驚破我的膽！ 黃尾溜鳥鼠：是啊！是啊，我嘛捌拄過幾若改！彼隻貓仔，強欲共阮規家伙仔驚甲起痟矣！ 勇敢鼠：不如按呢，咱逐家鬥陣去！做伙共伊咬一喙，看伊敢閣共咱欺負無！ 黃尾溜鳥鼠：袂使！袂使！彼隻貓真大膽、而且貓仔爪真猛掠，若是去就等於是送死啦！   鳥鼠仔按呢一句來一句去，會議中嗤舞嗤呲…. . 鳥鼠仔合聲：按呢欲按怎啊？咱袂當逐工過按呢心驚驚的日子啊！ 巧鳥鼠：我有法度矣！咱會使佇貓仔頷頸頂縛一个鈃仔，只要聽著鈃仔聲響，就知影伊來矣，隨落跑！ 鳥鼠仔合聲：著乎！這主意真讚啦！哪會遮爾巧！   這時，一直無講話的白喙鬚鳥鼠仔徛起來，勻勻仔講—— 白喙鬚鳥鼠：囡仔，這確實是一个真好的主意。只是…… 有一个問題—— 啥人欲去共貓仔縛鈃仔咧？ 是啊！啥人欲去共大花貓縛鈴仔咧 ? 一陣鳥鼠仔煞恬靜落來，你看我我看你，啥人嘛無想欲去冒彼个險！這个時陣乎鳥鼠仔講話矣 ~ 鳥鼠仔：呃…… 我…… 我袂使…… 勇敢鼠：我頭拄仔只是講啦，其實我驚貓仔…… 黃尾溜鳥鼠：我…… 我軟跤…… 跤步聲漸漸行倚來，逐家你看我，我看你，啥人也毋敢出聲。最後咧，鳥鼠仔一个接一个，恬恬仔、恬恬仔溜去矣……   小朋友，想出一个好辦法是足重要的，但是真正願意去做，才是上困難的、嘛上需要勇氣的代誌。   這个故事共咱講：想出一个好想法並無困難，真正困難的是—— 啥人願意勇敢去做。鳥鼠仔開會討論甲遮鬧熱，人人拍噗仔喝好，但是當需要行動的時陣，煞一个一个勼去。就親像咱生活當中定定看著的情況，有時仔咱講甲喙角是全泡，煞欠缺實際行動的勇氣。干焦講煞無愛做，是無法度解決問題的。真正有路用的智慧，毋但是想法，閣較有願意擔當、願意實踐的行動力。愛勇敢做彼个肯踏出第一步的人！ 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

二十、扛驢仔的爸仔囝 台語文翻譯/劉倍綺 聲音/徐重文 陳信吉 李思瑩 徐一弘  古早~古早~有一對爸仔囝，牽一隻驢仔，欲去市場賣物件。𪜶行咧行咧，經過後庄口，拄著幾个作田的婦人人佇田裡咧作穡。 婦人人：你看彼對爸仔囝，明明有一隻驢仔，煞無欲騎，有戇無？ 阿爸聽著過路人的話，心內做一个決定~ 阿爸：著！敢若有淡薄仔道理乎。阿囝仔，你騎驢仔，囡仔人細漢行較慢，嘛較快忝。 後生：好喔，我第一改騎驢仔呢！ 後生聽阿爸的話，歡歡喜喜跳起去驢仔尻脊骿，這時陣阿爸的朋友拄好看著，就開喙共這个老爸講 ~ 阿爸的朋友：！欸！你哪會按呢倖囝？家己牽驢仔咧行，煞予序細騎驢仔？你會共囝倖歹去！ 阿爸：呃~講按呢嘛著！囡仔，你落來，予我來騎。 後生：好啦！好啦！按呢換我來牽驢仔。 因為爸仔囝聽朋友的話，阿爸騎驢仔，後生牽驢仔，爸仔囝繼續行。路裡拄著擠牛奶的查某囡仔看著爸仔囝倚--來，隨共騎佇驢仔頂的老爸講~ 查某囡仔：你哪會忍心予遮細漢的囡仔行路，你家己煞坐佇驢仔頂咧？你這个做阿爸的嘛傷自私矣！ 阿爸：哎呀，我毋是這个意思…… 阿囝仔，我看，咱猶是同齊騎啦。 後生：真的喔？做伙騎，好喔！ 就按呢爸仔囝就同齊騎佇驢仔的尻脊骿頂！ 驢仔愈行愈慢，揹兩个人真正忝甲袂講得。這个時陣，教堂的牧師拄好經過…… 牧師：阿娘喂！恁哪會遮粗殘對待這隻可憐的驢仔？敢袂傷無同情心矣！ 阿爸：這…… 按呢阮應該愛按怎才好？ 牧師：恁應該共伊扛咧行！毋通閣予伊受苦啦！   就按呢，爸仔囝共彼隻驢仔縛牢咧，兩个人用棍仔扛驢仔行到橋頂，橋邊圍一陣看袂過的村民，佇遐咧指指揬揬。 村民：你看𪜶！共驢仔扛咧行呢！哈哈哈！笑破人的喙矣！ 彼隻驢仔吊佇半空中，幌咧幌咧，又閣熱又閣忝，驢仔真無爽快，大力躘咧～躘咧～，雄雄索仔斷去，噗咚一聲，驢仔落落去水底矣！ 後生：啊…..驢仔落去矣！！ 阿爸：哪會按呢啦? 驢仔…… 驢仔…. . 我的驢仔啊 ~ ~ ~ ~ 就按呢，驢仔去予大水沖走去矣，爸仔囝徛佇橋頂，後悔嘛袂赴矣。 小朋友，做代誌袂使干焦聽人講啥，就改來改去喔。 愛有家己的主見，做對會起家己、嘛對會起別人的選擇，才袂像這對爸仔囝仝款，失去本來好好閣活跳跳的驢仔。 這个故事共咱講：做人袂使傷倚靠別人建議，做萬項代誌攏愛有家己的判斷佮主見。這對爸仔囝沿路聽人講無仝的意見隨就改變做法，結果毋但家己辛苦、糊塗，閣失去一隻活跳跳的驢仔。別人的意見提來參考就好，家己心頭掠予定，袂使無主見，按呢干焦會活佇別人的意見中煞揣無家己的方向。 人生的路咱愛家己行，萬項就愛家己細膩選擇，嘛是著家己負責，別人無法度承擔，家己學會曉思考、堅定立場，才袂因為欲做甲中人的意，顛倒失去上重要的自主權，予家己食苦受罪，按呢就足毋值。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

十九 .《針蝟椅頭仔》 台語文翻譯/劉倍綺 聲音：李思瑩 徐一弘 陳信吉 古早時代，樹林仔內有一隻猴山仔，因為伊生做巧巧仔，就成做小動物的「頭人」。毋過伊定定愛喝東喝西叫別人做代誌閣厚性地大細聲，逐家攏驚伊，嘛無人敢反抗。 這工，猴山仔歡歡喜喜欲出門去𨑨迌矣 ~ 伊歡喜甲家己那喃那講： 猴山仔：嘿嘿，今仔日天氣誠好，我欲來尖山𨑨迌矣！毋過…… 欲揣啥物人陪我去咧？ 猴山仔：兔仔，你過來！來陪我去尖山𨑨迌！ 兔仔：呃……歹勢啦！猴山仔，我今仔日欲共阮阿母鬥整理紅菜頭倉庫，後回乎！ 猴山仔：哼，你無愛去就汰，我揣別人啦！ 猴山仔真無歡喜那行那講，行一睏仔，伊去拄著狐狸 猴山仔：狐狸！你一定有閒謼？來！綴我來去尖山𨑨迌！ 狐狸：哎呀～猴山仔，我今仔日欲鬥挖新空，無閒啦，真歹勢啦！ 猴山仔：哼，足歹扭搦的！ 猴山仔：狐狸～狐狸～你陪我來去啦謼！ 狐狸：哎喲，猴山仔你嘛知影我最近操甲腰痠背疼，無~咱約另工啦！ 猴山仔連半个朋友都攏約袂著，心肝內無啥歡喜，猶是家己一个氣怫怫行對尖山去矣。 猴山仔足袂爽快 伊講：哼，無人欲佮我耍，攏是𪜶無共我看在眼內啦！ 伊行咧行咧，看著一隻像刺查某的細隻針蝟，當咧睏中晝，睏甲真四序。 猴山仔：喂！你無看著我這隻「頭人」來矣諾？哪無佮我相借問--一下？ 針蝟：哎喲…… 足吵的，我咧睏晝呢，莫吵啦！ 猴山仔：哼，遮細漢閣敢佮我應喙應舌？看我共你當做我的椅頭仔坐！ 話拄講出來佇喙邊~ 猴山仔隨共尻川坐佇細隻針蝟身軀頂，紲咧就聽著猴山仔佇遐咧喝咻 猴山仔：哎喲喂啊—— 我的尻川䫌！呼呼~足疼的! 曷欲共我疼死矣。 針蝟：哼，你若無欲尊重別人就莫怪我對你無客氣！ 猴山仔：曷欲共我疼死矣～～ 我無愛坐矣！我欲來走矣！ 猴山仔疼甲哀哀叫，尻川疼甲緊掩咧，那跳那哀走轉去厝矣！   小朋友，這个故事共咱講：你若干焦顧共人喝東喝西命令別人、無欲尊重別人，就算你閣較巧，嘛無人會佮意和你做伙喔！真正的朋友，是愛互相尊重、互相關心的！ 這个故事共咱講：囂俳、看人無點的人，終其尾會為家己的驕傲佮無尊重付出代價。猴山仔靠勢家己巧，定定命令別人，無欲體諒朋友的感受，落尾毋但無人願意陪伊𨑨迌，閣因為看袂起針蝟，毋才會食一碗大苦湯。佇生活當中，真正受歡迎的人毋是上厲害的人，是會曉尊重閣體貼別人的人。會曉謙卑、平等來對待每一个人，才會交著真正的朋友，嘛才會當對別人身上學著寶貴的一課。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

十八 .《牛和水雞仔》台文翻譯：劉倍綺 聲音：郭燕靜 楊凱涵 楊敦理   有一工，天氣真好，水池仔邊有兩隻水雞仔當咧迌，四界遮跳遐跳，跳啊跳啊，耍甲足歡喜。 水雞仔：嘿嘿，你看我跳有懸無？ 水雞阿兄：你哪有我厲害？我會當跳甲比樹葉仔閣較遠！   雄雄，一隻大水牛倚來欲啉水，伊根本都無注意著水雞仔…… 水雞仔：啊—— 阿兄，緊走！！！！   水雞阿兄予水牛驚一下愣--去。 水雞仔嘛驚甲欲死，趕緊跳轉去水池仔內，泅轉來揣阿母！   水雞仔：阿母！毋好矣！有一隻足大隻、足大隻的動物，共阿兄驚甲愣愣去矣啦！ 水雞阿母：啥貨？有偌大？敢有遮按呢大？ 水雞阿母大力欶氣…. 水雞阿母：我共腹肚歕甲遐大圈，敢有佮彼隻動物平大？ 水雞仔：無無無，彼隻比你加大足濟的！ 水雞阿母閣大喙欶氣… 水雞阿母：若按呢咧？！ 水雞仔：閣差濟咧… 水雞阿母閣一擺大力欶氣… 水雞仔：抑是…… 抑是閣較大！ 水雞阿母愈歕愈大，愈歕愈圓，若像一粒大氣球！ 水雞阿母：喔!我這馬一定像牛遐大隻…… 像按呢……磅！ 水雞仔：阿母—— 你破空矣！      唉，小朋友，這个故事共咱講：咱攏有自己的樣，毋通想欲假𠢕模仿別人變大。逐个人的款攏是獨一無二，做家己，就是上讚的代誌喔！      親愛的小朋友，你敢有拄過明明家己有影做袂到，煞硬欲學佮別人仝款的樣咧？咱愛會記得：學習別人的好是無毋著，毋過咱閣較愛知影家己天生的條件，這真重要喔！ 每一个性命攏有家己的款佮價值，攏足重要，無人會當取代，是無需要佮人比並的。勉強模仿別人，干焦會予家己受苦、落氣，愈無自信。水雞阿母假𠢕模仿大水牛的款，結果煞予家己付出真悲慘的代價。佇咱生活中，有人感覺別人比咱較𠢕，一直欲佮人比懸低、賭強模仿，顛倒袂記得家己特別的所在，袂記得別人無，咱才有的優點。    愛知影：咱無需要變做別人，咱就是咱，一支草一點露，只要好好發揮家己的特色，承認家己的有限，用咱的有限好好創造無限的價值，會曉欣賞別人，嘛肯定、接受家己，才是上媠的成長！   留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文/劉倍綺 聲音/李思瑩 陳信吉 徐一弘 佇一个好天好時的透早，狗佮雞公相招出去旅行。𪜶行咧行咧，行甲毋知路。𪜶繼續閣行啊行…. 行到…. 行到日頭落山，天欲暗矣！佇暗摸摸的樹林仔內底，看袂清楚頭前的路草，只好揣一个所在過暝。𪜶行來到一欉大樹跤 雞公：這欉樹仔毋但大欉閣真懸，我會當跳起去樹椏頂歇睏！ 狗：著…… 我先佇這欉樹仔跤揣一个空，袂輸是鳥鼠仔的厝仝款。予我佇內底睏一暝，其他的代誌，就等明仔載天光才閣講！ 雞啼矣！天光矣！𪜶平平安安度過一个平靜的暗暝。 雞公：咕—— 咕咕咕！𠢕早喔，日頭！ 這个時陣，蹛佇附近的一隻狐狸拄好聽著叫聲，腹肚嘛枵甲若咧拍鼓……狐狸無意無意來到大樹邊。 狐狸：哎呀，這个聲音真好聽！比音樂聲閣較媠！親愛的雞公啊，你敢會當落來唱一條小曲予我聽看覓咧？ 雞公：哈哈哈，多謝你的呵咾，狐狸先生。毋過我閣有一个朋友佇下跤的樹空內底咧睏呢。你先去共伊叫精神，阮做伙唱予你聽，敢好？ 狐狸：哈，聽起來若像桌頂拈柑遐簡單，我這馬隨來去共叫！ 狐狸行倚來樹空，“Suah”一下，一个影跳出來——是狗！ 狗：Óng-óng！你想欲共阮朋友按怎？！ 狐狸：哎呀！救人喔——！   就按呢，狐狸予狗驚一下隨起豹飆，連尾溜都強欲落--落來矣，一目𥍉就走甲無看見影。佳哉雞公拄著危險無驚惶，才會當成功保護家己佮朋友的安全！ 小朋友，當咱拄著歹人的時陣，莫生狂，嘛毋通凊彩相信別人。愛像雞公仝款保持冷靜，動頭殼，才會當順利解決問題喔！ 這个故事共咱講：拄著危險的時陣，上重要的是愛保持冷靜，用智慧化解困境。雞公雖然家己一隻徛佇頂懸、看起來若像無伴，毋過伊無去予狐狸的甜言蜜語騙騙--去，機巧設一个圈套，予狗會當成功驚走狐狸，才會當保護家己的安全。佇咱生活中，毋是逐个看起來真客氣的人攏是好人，有時歹人嘛會幔好人的外衫，假做好人的款。咱愛學會曉觀察、判斷，拄著代誌莫兇狂，才會當像雞公仝款，毋但用智慧保護家己，嘛保護身軀邊重要的朋友。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文/劉倍綺 聲音/陳信吉 徐一弘 李思瑩 有一工，大草埔的獅和驢仔決定佮狐狸做伙出門拍獵。𪜶講好欲合作分工，毋過…… 行到中途，獅仔講話矣 ~ 獅：哼，我是萬獸之王，我干焦負責指揮，正港若欲動手這款的代誌就予恁去做！ 驢仔：好…… 我來去踢彼箍野豬！ 狐狸：我來囥陷阱掠山雞！ 就按呢，𪜶做伙分工合作，經過規工的走傱，掠著掠袂少獵物呢：有野兔仔、山羊、野豬…… 囤甲若像小山崙遐懸呢！獅看甲真歡喜。 獅：哼哼，袂䆀袂䆀。好，驢仔，你來分配遮的獵物乎！ 驢仔：好，我來分！一份予獅，一份予狐狸，一份予我，按呢逐家攏有，拄拄仔好！ 雄雄獅足受氣的講 ~ 獅：啥貨！？ 你竟然敢和我做三份分！？ 我是萬獸之王愛佮你分平濟？你是咧陷眠喔！ 驢仔：啊—— 等！等！，我~我…… 驚甲話攏講袂出來~ 只好勼去邊仔！ 狐狸看著獅遮歹，一句話都毋敢講，心肝底咧想：「 啊～這改換我矣，愛細膩共應付！」 獅：狐狸，這馬換你來分，莫予我無歡喜！ 狐狸：著、著、著！來來來，這堆全是予你，啊若這隻兔仔尾予我就有夠矣…… 獅：哈哈哈！真好真好！你這箍哪會遮爾巧?啥人共你教愛按呢分配的？ 狐狸：呃…… 是驢仔共我教的，猶毋過…… 是用伊的失敗教的……     小朋友，這个故事共咱講：巧巧的人毋但愛會曉觀察，嘛愛會曉對別人的錯誤中學著教示。 別人跋倒的所在，咱著愛會記得閃開喔！ 狐狸無佮驢仔做仝款的選擇，顛倒對驢仔的教示當中了解，愛按怎應對獅的性地。佇咱的人生當中，咱無的確會當親身經驗著所有的代誌，毋過咱會當藉別人的經驗當做參考，學會曉正確判斷佮應對，嘛會當僻開危險，做閣較巧的選擇。對別人的成功佮失敗學著當中的智慧，才是踏出成長的重要一步。   留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文/劉倍綺 聲音/蔡秉宸 蔡志偉 蔡昀真 莊偉琪 佇咧一片青蘢蘢的大草埔，一陣羊仔蹛佇遮。𪜶逐工食草仔、曝日、歡喜過日。但是𪜶毋知影，有一隻狼覕佇樹林仔內，當咧偷偷仔共𪜶看…… 狼：hmh-hmh…… 遐的羊仔若無彼隻討厭的顧羊仔狗，我早就共𪜶掠來做我的暗頓矣！我愛緊想一个辦法…… 予彼陣戇羊仔共彼隻狗趕走！ 狼：哎呀～各位古錐的羊仔朋友，恁逐家好無？我只是過路爾，想欲共恁提醒一件代誌。 𤆬頭羊：啊你！…… 你敢是狼？你敢是欲來共阮食去？ 狼：（哎喲～恁誤會我矣啦！彼是以早的代誌，我早就改過自新啦！其實我今仔日是來共恁講一个祕密的。 小羊乙：啥物祕密？ 狼：就是講…… 恁彼隻看起來歹衝衝的顧羊仔狗，其實才毋是真心欲保護恁咧！伊逐工假做咧守護，其實伊只是想欲共恁控制牢咧爾爾。恁攏毋知呢，伊佇尻脊後是按怎講恁的歹話！ 𤆬頭羊：啊？真的抑假的…… 狼：當然是誠實的，阮狼才是真正了解恁的好朋友。想看覓，佗一隻狼捌真正共恁咬過？顛倒是彼隻狗仔，一工到暗刺夯夯共恁吠，管恁愛往東，愛行西，恁欲去佗位攏管牢牢！ 聽狼使弄的話了後，戇呆的羊仔竟然相信矣，決定欲趕走真心守護𪜶的顧羊仔狗…… 𤆬頭羊：顧羊仔的，你走啦！阮遮無需要你矣！ 顧羊仔狗：啥？我逐工攏咧共恁保護咧，為啥物雄雄欲趕我走？ 小羊乙：你干焦想欲控制阮爾，著無？阮聽講你才毋是阮的朋友！ 顧羊仔狗：唉…… 恁攏無欲相信我，我嘛無法度矣…… 狗仔就按呢恬恬仔離開矣。 狼：哈哈哈！恁真正是戇甲袂扒癢的！這馬無狗仔共恁保護，看我按怎共恁拆食落腹，食了了！ 這个時陣羊仔著青驚大聲喝~ 羊群：啊啊～救人喔！狼來矣！狼來矣! 羊群真後悔，毋過已經傷慢矣…… 彼工暗時，草埔頂干焦賰狼滿足的笑聲。   小朋友，莫凊彩相信彼款花言巧語的使弄，嘛莫烏白懷疑真心為咱好的人。愛學會曉分辨啥物人是真正的朋友，才會使保護家己袂受傷喔！ 這个故事共咱講：面對唌人的佮甜言蜜語，愛保持清醒，會曉分辨啥物人才是真真正正對咱好的人。羊群因為耳空輕相信狼使弄的話，顛倒趕走一直守護𪜶的顧羊仔狗，結果家己揣死，後悔嘛袂赴矣。真正關心你的人，凡勢講的話無好聽，凡勢共咱管絚絚，煞佇咱需要的時陣恬恬仔咧共咱保護；有一款人看起來袂輸真友善，其實是無好意的歹人，往往歹心烏漉肚。做人袂當干焦聽表面的好聽話，更加愛用心觀察、判斷是非，才會當離危險較遠咧，毋才會使保護家己佮身軀邊重要的人。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文/劉倍綺 聲音/劉玉霜 張長江 張永翰 張永承 佇一个熱翕翕的熱天人透中晝，日頭像彼个大火球，烘甲塗跤燒滾滾，空氣攏強欲溶去矣。有三个姊弟仔，行踮路裡攏熱甲大粒汗細粒汗…… 小弟：有夠熱的…… 我強欲變做烘番薯啦！ 二姊：我感覺我的汗攏會當貯規甌矣！ 大姊：咱緊揣一个所在覕日頭啦！抑無真正會著痧呢……   佇這个時陣，𪜶看著頭前有一欉閣懸閣大欉的梧桐樹，樹葉仔像大涼傘仝款展開，塗跤有涼涼涼的樹蔭！ 小弟：緊！遮有秋凊的所在，緊來去坐一下！ 二姊：啊～總算會當歇喘一觸久仔，有夠涼的！ 大姊：多謝你啊，梧桐樹，若毋是你，咱真正擋袂牢啊！ 三个人坐佇樹仔跤，開始慢慢恢復精神。猶毋過坐一下，有人開始喙咧癢矣……   小弟：毋過講真的啦，這欉樹仔除了會當閘日頭以外，敢若嘛無啥效呢…… 二姊：嘿乎，若是這欉樹仔會當結一寡甜甜的果子，就會閣較讚啦！ 小弟：著！著！著！這陣干焦遮較秋凊，毋過袂結果子，敢若閣差一屑仔啥物…… 梧桐樹：唉…… 恁遮的囡仔啊，一爿那佇我的身軀下跤咧歇涼，那閣嫌我無夠好。恁敢無感覺家己真袂曉共人感恩？ 大姊：哎啊，阮…… 阮毋是彼个意思…… 梧桐樹：我袂結果子，但是我一直恬恬仔徛佇遮，逐工為逐家閘日頭、遮風、閘雨，而且閣予人歇睏。恁享受著我的幫助，煞閣共我批評甲無一塊好，按呢敢真正公平？ 小弟：失禮，失禮。梧桐樹…… 阮傷貪心矣…… 二姊：是啦，阮應該多謝你才著。 大姊：多謝你願意原諒阮，阮以後袂閣烏白批評幫助阮的人矣！ 這个故事共咱講：佇咧生活當中，真濟恬恬仔付出的人和萬物，凡勢無像梧桐樹按呢有明顯的成果，但是𪜶的存在煞不止仔重要。敢若梧桐樹雖然袂結果子，毋過伊用健欉的枝葉替人閘日，予人有清涼的感受佮得著庇護的感覺。當咱接受別人的幫助的時陣，閣較應該會曉感恩佮尊重，毋是干焦怨嘆抑是看家己無起。愛知影珍惜佮回應善意，是做人上基本嘛上媠的品德。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文創作/劉倍綺 聲音/黃子又 溫烜睿 劉富宏 有一工，阿勇仔行佇街仔路，當當(tng-tong)準備欲去市場買麭，想袂到一隻狗仔惡確確衝過來，佇咧伊的跤腿雄雄共咬一喙！阿勇仔疼甲哀哀叫。 阿勇仔：啊——！我的跤！予狗仔咬著矣！ 阿勇仔予狗仔咬一喙，空喙足深的，而且血閣流甲㴙㴙滴；伊就緊走去揣醫生，希望醫生會用得替伊止血，緊治好伊的空喙。 阿勇仔：醫生乎，我的跤一直攏袂好，足疼的！ 醫生乎：唉…… 阿勇仔，我用所有的藥仔攏共你試過矣，毋過效果攏無出來，可能愛靠時間慢慢仔好。   阿勇的好朋友阿宇知影了後，緊走來共看，閣紮一个奇怪的偏方…… 阿宇：阿勇仔，我聽阮阿媽講，庄跤人拄著這種代誌，會當用一片麭欶走空喙的血，然後共彼塊麭擲予彼隻狗仔食，按呢空喙就會好矣喔！ 阿勇仔： 唅？提我的麭予咬我的狗仔食？我毋是變伊的早頓？ 阿宇：毋是啦，是講按呢伊就袂閣來共你咬矣！ 阿勇仔：袂使！袂使！我才袂按呢做！萬不二伊若食了閣感覺好食，後擺所有的狗仔攏走來共我咬欲按怎？！ 阿勇仔：啊！袂使啦！袂使啦，我絕對無愛獎勵彼隻歹狗！   阿勇仔講了真著！對待這款惡質的行為，袂當簡單退讓抑是落軟。若是你予歹人好處，𪜶干焦會加軟塗深掘爾爾。 小朋友，你感覺阿勇仔的選擇敢著？ 愛會記得喔，拄著若有欺負人的代誌，咱愛勇敢共拒絕，袂當予的歹行為共咱影響！ 這个故事共咱講：面對傷害咱的人抑是代誌，袂當簡單就共退讓抑是落軟，閣袂當對遐的歹人傷好。阿勇仔明白，若是今仔日吞忍，甚至講「獎勵」彼隻咬人的狗仔，未來干焦有閣較濟狗仔規陣來軟塗深掘。咱踮佇人生中嘛仝款，拄著無公平抑是惡意對待的時陣，愛會曉保護家己、堅定立場，毋是一直咧退讓。面對對方的歹意，愛勇敢共「拒絕」才是正港的智慧佮勇氣。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文創作/劉倍綺 聲音/劉富宏 溫烜睿 黃子又 古早時代，有一个辛苦規世人的作田人蹛佇一座葡萄園邊仔。伊有三个後生，作田人感覺家己的身體愈來愈虛荏，但是伊上煩惱的，是囡仔袂曉種田，嘛貧惰落去田底種作……。有一工，作田人共三个後生叫來眠床邊，用真虛弱的聲音對囡仔講話。 作田人：囡仔啊…… 我身體已經強欲袂用得矣，恐驚無法度陪恁傷久…… 大兄：爸，你莫講這號話，你一定會食甲百二歲啦！阮會共你照顧！ 作田人：恁愛會記得…… 等我走了後，到葡萄園内底去挖，彼爿，有我留予恁的…… 寶藏。 二兄：寶藏？是有影抑無？ 小弟：哇！敢會是金幣、銀幣、猶閣有…… 一大箱寶石！ 作田人：恁共挖看覓咧…… 就知矣…… 作田人話就猶未講煞，人就過往矣！三兄弟照in阿爸交代的話，攑鋤頭、鐵黜仔，逐工透早天猶未光就出門，一直到暗才轉來厝裡，三个兄弟仔足骨力佇葡萄園內底按呢無閒𩑾𩑾。 大兄：我遮挖兩工矣，連一塊銀角仔都無看著！ 二兄：可能埋甲足深的，閣揣看咧！ 小弟：寶藏寶藏緊出來～咱攏強欲變做漉糊糜仔矣啦！   三兄弟無揣著任何寶藏，規片葡萄園予𪜶翻透透，田塗予in挖甲鬆鬆鬆，過無偌久，葡萄藤生做特別旺，秋天的時陣結出從來毋捌看過的蓋大粒的葡萄，真正是大豐收呢！ 大兄：這季的葡萄真濟，並較早閣大一倍呢！ 二兄：而且毋但大粒閣蓋甜，連市場的頭家攏搶欲收！ 小弟：原來咱老爸講的寶藏…… 就是這啦！ 大兄：阿爸早就知影，只要咱肯做又閣骨力拍拚，收成就會直直來。   三兄弟總算了解矣，阿爸留予𪜶的，毋是金銀財寶，是勞動的智慧佮收成的歡喜。 親愛的小朋友，愛會記得喔！寶藏無一定藏佇塗跤底；真正的寶藏，是咱願意拍拚的雙手和毋驚艱苦又閣堅定的信心！   這个故事共咱講：真正的寶藏，無一定藏佇塗跤底，是藏佇咧咱願意付出的雙手內底。作田人伊用智慧留予囡仔上寶貴的禮物，就是予囡仔佇勞動中學會曉責任、團結佮拍拚的價值。因為三兄弟用心耕作、親身動手，𪜶收成的毋是干焦葡萄爾爾，更加是性命佮家業的承擔。骨力佮堅持，才是直迵幸福佮成功的真正寶藏。只要願意付出，就一定會收成上甜閣上媠的成果 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

 有一个阿婆，無依無倚，目睭閣出問題，連欲家己出門都無法度。為著生活，伊決定開錢倩醫生來醫治。    in兜附近有一个醫生，聽人咧講阿婆的病情，心內暗爽，想講：趁錢的機會來矣，伊決定主動去揣阿婆。  阿婆想袂到有好心的醫生欲來厝裡共伊服務，心內足感激。這个醫生為著欲趁較濟錢咧，閣共阿婆講予伊逐日攏來⁠兜⁠共醫治。  就按呢，醫生就照佮阿婆的約束，逐工來阿婆厝裡共醫治目睭。不而過，這个醫生有影傷過貪矣，逐擺來共阿婆治病的時，趁阿婆目睭無蓋好，紲手偷拈一寡阿婆兜的物件轉去。  尾後，阿婆目睭好離矣，毋過，佇治療的這段時間，伊厝裡的物件煞予人提甲欲了。阿婆心內知影，伊厝裡的物件絶對是予彼个貪心的醫生偷提去的，因為佇這段時間，干焦彼个醫生會當自在出入伊的厝裡。  拄好這个時陣，彼个規心想欲發財的醫生來共阿婆討進前講好的醫藥費，阿婆擋袂牢共剾洗講：「你看覓，我厝裡已經無錢矣，所有值錢的物件攏無去矣，你是愛我用啥來予你醫藥費咧？」  醫生看伊數想的攏烏有去矣，真毋願，氣一下共阿婆𤆬去見法官。法官感覺這个案件代誌無啥對同，就問阿婆；「你是按怎無欲付予人醫藥費咧？」  這个變竅的阿婆共法官講，伊無欲照的約束付錢予醫生，是講好矣，愛共伊的目睭醫甲好才付錢，毋過，伊經過治療了後，目睭煞比早前較䆀。伊講：「早前我的目睭雺霧看袂明，我猶認會出阮兜物件囥佇佗位，毋過，這馬煞啥物都無看見矣。」  法官聽阿婆講了，心內真緊就清楚矣。伊嘛早就知影這个醫生足𠢕共人偏，法官愖一下，決定欲替阿婆討一个公道。伊共醫生講：「阿婆目睭毋但治無好勢，顛倒比早前閣較嚴重，你煞好意思共伊討醫藥費？有影是食人到到！你愛賠十倍醫藥費予受害的阿婆。」 貪財的醫生聽一下，心內暗叫苦：「這聲有影袂和，了濟矣，我佇伊兜偷提的物件才值無幾仙錢，這馬煞著予人罰遮濟錢。」 這个故事共咱講：貪心袂滿足閣做歹的人，終其尾會去害著家己，台灣有一句俗語按呢講；「痟貪軁雞籠」。   留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

古早古早，有一个生理人靠運送物資買賣來維持生活。為著欲方便運送物件，伊就飼一隻驢仔來鬥相共載貨。三不五時，這个生理人就會牽驢仔去鬧熱的大城市補貨。毋過欲去城裡的路途遙遠，生理人攏會把握每一逝出門的機會，伊攏會買足濟物件縛佇這隻驢仔的身上。      有一工，生理人買真濟包鹽，疊甲親像一座山。伊歡歡喜喜牽驢仔那行那想，：「買愈濟鹽，就會當趁愈濟錢！」這个貪心的生理人，害驢仔強強欲予鹽山硩甲行袂振動。賣鹽的生理真好趁，生理人就決定欲加走一逝，伊又閣牽驢仔去買鹽。      無疑悟回程咧過溪的時陣，驢仔無細膩煞摔倒佇溪流裡。浸佇溪水裡的驢仔，發覺伊身上的重量突然間減輕矣！原來，鹽浸佇水裡就會溶去。鹽溶去矣，生理人嘛無法度閣再做生理，只好憂頭結面牽驢仔倒轉去。      隔轉工，這个生理人閣出門去買鹽；回程仝款經過這條溪。驢仔想起昨昏佇溪裡摔倒的代誌，就刁持閣摔倒一改。果然，鹽真正攏溶去矣！ 驢仔足歡喜的！因為伊毋免閣遐爾仔辛苦揹鹽矣。      生理人知影驢仔的歹心機，決定欲予這隻驢仔一點仔教示。伊閣牽驢仔去買物件，等待回程閣再行到溪仔邊，驢仔心肝內暗暗仔歡喜閣刁持摔倒佇溪裡，想欲予鹽浸佇溪水攏溶了去。      毋過這改無通予伊遐好空矣！聽候驢仔欲躘起身的時，伊發現身上的物件變甲足重的，比原本揹的鹽山閣較重！原來，這个生理人這改買的物件，是和鹽山仝款重量的──棉仔。      鹽浸水會溶去，棉仔浸水會欶水，變甲足重足重的。這聲食力矣！驢仔愛揹這緟重khuâinn-khuâinn的棉仔倒轉去！   從今以後，驢仔毋敢閣刁故意佇溪水裡摔倒矣！     台灣有一句俗語講：「痟貪軁雞籠」，生理人貪著利益，無顧驢仔的負擔佮艱勞；驢仔為著欲減輕身上的重量煞顛倒換來閣較重的負擔！這个故事的啟示教咱愛互相體諒佮尊重。                       留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

                                                            台文翻譯：Gina Chan 校稿：林朝龍 聲音：莉娟 一个熱甲強欲著火的熱天，雄雄透一陣大風。有一隻狗蟻無細膩煞予風搧落去水池仔內，狗蟻拚性命咧拍翸滾躘，毋過猶是無較縒，狗蟻緊早慢會無命。狗蟻大聲咻：「救命喔！救命喔〜」就佇這个時陣爾爾，去予樹仔頂一隻粉鳥看著。粉鳥講：「今害矣，彼隻狗蟻有夠可憐，看來我愛出手來共鬥相共。」講煞，粉鳥緊飛去咬一片葉仔擲落水池仔，閣大聲喝：「狗蟻先生，緊，緊起去葉仔頂！」      就按呢，狗蟻起去葉仔頂，葉仔綴水流來到水池仔岸邊，狗蟻總算共命抾轉來矣。狗蟻心內暗暗仔咧想：「好佳哉！無予水淹死。若毋是粉鳥出手來解救，我早就無命囉！」狗蟻共粉鳥救伊的這點情囥佇心肝頭。      過一站仔，有一日，樹林仔來一个拍獵的，伊看著歇佇樹仔頂彼隻粉鳥，就用銃共伊相予準，按算欲共彈落來。樹仔頂彼隻粉鳥根本無智覺危險到位。這个時陣爾爾，拄好去予樹仔跤的狗蟻看著，狗蟻要緊爬起去拍獵的的跤頂，大喙共拍獵的的跤指頭仔咬落。拍獵的疼甲大聲哀：「哎喲喂！有夠疼，是啥物咧共我咬？！」拍獵的疼甲哀哀叫，銃子煞彈歪去。      就按呢，粉鳥閃過一擺劫數，狗蟻嘛順勢報答粉鳥的救命恩情。     這个故事咧共咱講：善有善報，惡有惡報。因為粉鳥看著狗蟻拄著危險，就出手鬥相共的善行，予伊得到脫離危險的回報。有一句台灣俗語咧講：「食人一口，還人一斗。」咱做人就愛會記得別人的恩情，愛知恩報恩！ 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

   有一日，兩隻貓仔同齊揣著一塊好食物，不而過，𪜶攏共這塊食物欲占做是家己孤一个的，就按呢，𪜶佇遐花甲強欲相拍。 兩隻貓仔共食物搝牢牢攏毋相讓，當咧舞袂好勢的時陣，有一隻狐狸拄好對遐經過，看𪜶咧冤家，就行倚去，講：「囡仔兄，有啥代誌無法度排解，敢會當講來予我聽看覓咧？」 「啊，狐狸先生，這食物是我先看著的，伊煞來咧搶。」 「你白賊，明明是我先看著的。」講煞𪜶兩个閣冤起來矣。 「好、好、好，我知矣，莫閣冤矣，我來共恁兩个分分咧，一定會分甲公平閣 合理。這馬恁先去提秤仔來。」狐狸共食物擘做兩爿，用秤仔秤重。 「欸? 正爿的較重喔！」狐狸講了就共正爿彼半細細喙仔咬一喙。 「啊，這擺變倒爿的較重矣！」講煞，狐狸閣共倒爿的彼半細細喙仔咬一喙。 就按呢，狐狸毋是正爿咬一喙，無就倒爿咬一喙，兩隻貓仔目睭金金看秤仔頂的食物愈來愈細塊，落尾，干焦賰像一粒豆仔的大細爾爾。 「唉，我實在無辦法矣，規氣我共食食掉準拄煞。」結果，食物就按呢予狐狸食甲清氣噹噹，連一屑仔肉幼仔都無留。 狐狸共喙拭拭咧講：「恁的食物實在有夠好食，你兩个毋通閣冤矣，我欲來去矣，再會！」 狐狸實在有夠奸巧，兩隻貓仔戇戇徛佇遐，兩對目睭你看我，我看你，紲落來懊惱甲頭𩑾𩑾，講：「咱若莫冤家，一个食一半毋知偌好咧。」兩隻貓仔只好失望轉去矣。自按呢起，兩隻貓仔就知影愛仝心，愛互相矣。 這个故事共咱講：咱鬥陣愛互相相讓，互相關心；家己人若袂和，就會予人有機會來使弄。   留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

   有一對交情足má-tsih的好朋友，相招欲去郊外行行咧。𪜶一路那行那𨑨迌，行來到枝葉生甲不止仔茂的樹林內。 雄雄，一隻足大隻的熊對樹林內遠遠衝倚來，其中一个人看範勢䆀，隨共伊的伴放咧，做伊peh起去樹仔頂覕。 等到另外一个人發覺的時，生生狂狂煞毋知欲按怎才好，看彼隻歹tshìng-tshìng的熊就欲倚來矣，雄雄去予伊想著一个辦法;伊緊倒佇塗跤禁氣，定定倒佇塗跤假死。熊搖搖擺擺行來到伊的身軀邊，閣跔落來倚近伊的面，詳細咧共鼻，掠準伊死矣，就越頭做伊走矣。 覕佇樹仔頂的彼个人看熊走遠矣，才放心仔對樹仔頂落來，伊行來到拄才假死的朋友身軀邊，刁工共詼講：「你有代誌無？拄才彼隻熊倚你遐近，伊是咧共你講啥？」 伊的朋友嘛無意無意共應講：「彼隻熊共我點拄講，後擺千萬毋通閣佮這種佇生死關頭共朋友放咧做伊走的人鬥陣。」 這个故事共咱講：真正的朋友是拄著代誌愛互相相伨，互相相楗才著。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

台文翻譯：曾譯瑤 校稿：林朝龍 聲音：黃莉娟 &蘇子恆 有一隻狗仔佇街市揣著一支肥朒朒、真好食款的肉骨。心肝內歡喜閣煬，想講：「哼！今仔日運氣不止仔好，這支肉骨我就提轉來去寬寬仔啖糝。」 狗仔暢甲，咬肉骨沿路行。這工天氣袂䆀，鳥仔嘛歡喜咧唱歌詩。狗仔共肉骨咬牢牢，那行目睭閣四界那相，若像咧驚隨時有大隻狗仔會來搶伊的肉骨的款。 狗仔咬肉骨行咧行咧來到一座橋頂，伊若直接過橋就好矣，伊煞無代無誌停佇橋頂，閣對橋頂看對橋跤去，伊雄雄看著水裡嘛有一隻狗仔喙裡閣咬一支大大支的肉骨。「啊！彼支肉骨我嘛欲愛。」伊隨大聲共吠「uáng！uáng！uáng！」。這个時陣，伊喙裡咬的肉骨就按呢落落去溪裡，沉落去水底矣。 「誠害，原來彼隻狗仔是我家己佇水裡的倒照影啦。」狗仔真懊惱。 這个故事咧共咱講：貪心的人，不時都咧煩惱、計較，永遠都嫌得著的傷少，結局，啥物攏無。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

 翻譯/Gina Chan 校稿/林朝龍 聲音/黃莉娟 許岑竹 盧姿毓 盧柏丞 春天燒烙的日頭光炤佇青蘢蘢的草仔埔，四界攏是幼茈的牧草。規陣羊仔誠樂暢咧享受天公伯仔所賞賜的上天然的好味，無想著死亡也當咧接近當中。 雄雄，一隻大隻⁠鴟鴞⁠若箭仝款對天頂揤低衝落來，用兩肢利劍劍的爪仔共一隻羊仔囝掠咧就走，顧羊仔的人袂赴反應，干焦看著伊若一陣風仝款隨飛遠去。覕佇樹仔頂的烏鴉，看著拄才發生的代誌予伊真驚惶，嘛去予⁠鴟鴞⁠的猛醒佮殺氣大大下共伊拍一下生驚，來自內心暗暗仔咧共鴟鴞佩服。伊心內咧想：「若準鴟鴞有法度，按呢我嘛一定有法度。」伊決心欲學鴟鴞仝款去掠一隻羊仔囝來食。 有一日，一隻羊仔囝頭向向注心咧食草，烏鴉想講機會來矣，雄雄展開伊的烏翼股，學⁠鴟鴞⁠對懸懸的天頂揤低衝落來，用伊利劍劍的爪仔欲去掠彼隻羊仔囝，煞發見伊的爪仔毋但無法度掠著羊仔囝，顛倒去予羊毛纏牢咧，毋管按怎躘就是無法度躘開。 可憐的烏鴉拚勢咧展伊的翼股，就是無法度像鴟鴞仝款若一陣風按呢飛走。落尾，烏鴉舞甲虛leh-leh，目睭金金去予顧羊仔的人掠轉去。顧羊仔的人共烏鴉的翼股毛尾鉸掉，紥轉去予𪜶兜的囡仔通𨑨迌。囡仔問講：「這是啥物鳥？哪會去予人掠著？」顧羊仔的人笑講：「哈哈哈，烏鴉伊嘛想欲學鴟鴞來偷食羊仔囝，煞毋知家己都無鴟鴞的本頂，毋才會予人掠著。」 這个故事咧共咱講：咱愛知影家己的能力佮條件到佗位，毋通干焦想欲學人。做咱做會到就好，無，會親像烏鴉仝款毋成樣，予人當做笑詼。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

翻譯/Gina Chan 校稿/林朝龍 聲音/黃莉娟 狐狸/蘇子恆 羊仔/劉富宏 有一隻狐狸一下無細膩煞落落去一口足深的井裡，毋管伊按怎，按怎控，攏無法度出去。用盡氣力的狐狸蝹佇井裡，心肝內咧想：「這聲慘矣，我死期欲到矣。」  這个時陣，有一隻羊仔當咧喙焦，兇兇狂狂來到井邊，伊向井裡看看咧，發見井裡有一隻狐狸。戇tuh-tuh的羊仔開喙就問狐狸：「這井水好啉無？」狐狸腦筋隨轉踅一下，心肝暗暗仔歡喜，閣假甲誠鎮靜，一直呵咾井水清涼甘甜無地比，講了閣一直使弄羊仔跳落來井裡佮伊做伙啉予爽快。  想袂到羊仔共當做真的，攏無斟酌想一下就跳落去井裡。等羊仔共水啉煞，狐狸開喙問伊：「羊仔先生，你啉有夠氣矣乎？我借問一下，這馬你按算欲按怎出去咧？」  羊仔聽一下煞愣去：「慘矣，這聲咱欲按怎出去才好？」 狐狸心肝內早就有按算，伊足奸巧的共羊仔講：「無，按呢啦，你徛起來覆佇井的壁堵，我踏你的尻脊骿跳出去，等我跳出去了後才共你搝起來，你看按怎？」  羊仔共狐狸呵咾講：「這步有影媠氣，若換做是我就想袂出來矣。狐狸先生，你遮巧，閣會共人鬥相共，有影是一个值得人信任的好朋友。」  就按呢，羊仔照狐狸講的話去做，狐狸嘛順序跳出去彼口井。 等狐狸跳出去了後，羊仔閣佇井裡耐心等規半晡，攏等無狐狸來搝伊出去，才智覺著家己中計矣。  羊仔大聲詈，大聲罵狐狸無守信用。狐狸煞用看人無的氣口共羊仔講：「你這个孝呆，落井進前你就愛先想予便，若落去欲按怎起來的步數矣，你想都無想就跳入井裡，這遍就予你學一擺乖。」講煞，共羊仔擲咧，做伊大伐大伐走矣。  這个故事咧共咱講：咱做代誌進前，愛想予清楚，千萬毋通為著眼前的小可仔利益，就來懵懂出手。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

3.狗蟻佮蟋蟀仔  狗蟻真骨力是通人知的，就準講是熱人日頭赤焱焱，嘛規工骨力咧作穡。若講著蟋蟀仔，規工閒仙仙顧𨑨迌，伊真正無法度理解狗蟻規工硞硞傱是咧傱啥？伊真好玄，共狗蟻問：「各位狗蟻，咱借問一下，恁是按怎涼勢涼勢的日子毋過，對透早到暗按呢無閒𩑾𩑾？恁敢無想欲佮我仝款閒閒就來唱歌？」  狗蟻那無閒手裡的穡頭，那應蟋蟀仔講：「阮有影無啥閒工通唱歌𨑨迌，阮愛趁熱人的時間加攢寡糧食，通好準備應付長lòng-lòng的寒天。蟋蟀仔無咧要意狗蟻按怎講，伊心肝內咧想：「就予這陣咧操煩未來，傱袂煞的癮頭去無閒，阮欲來去好好仔享受涼勢的生活矣。」  寒天到矣，霜風吹著是爍爍顫，大雪落袂煞，佇這片白鑠鑠的世界，根本揣無物件通食，蟋蟀仔枵甲瘦硞硞，予霜風搧甲毋知欲行佗位去。蟋蟀仔顛顛蹁蹁來到狗蟻𪜶兜的門跤口，熱人無閒𩑾𩑾的狗蟻，這時逐家歡歡喜喜圍做伙，當咧享受腥臊的好食物。  蟋蟀仔歹勢歹勢開喙共狗蟻講：「好心好行的狗蟻，恁嘛施捨淡薄仔食的予我，我強欲枵死矣。」  「你敢毋是彼个蟋蟀仔先生？」一隻狗蟻誠意外咧共問。「熱人的時看你一直咧唱歌唱袂煞，掠準講恁若到寒人閣欲跳舞咧。來來來緊入來，做伙來食寡物件。」  這个故事咧共咱講：知影觀前顧後，好天著積雨來糧的人才是真正巧的人。   留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting

  獅踏跤步佇樹林裡咧巡伊的地盤。逐隻動物若看伊到位，攏覕甲無看見影跡，驚會去惹著這隻歹性地的萬獸之王。獅看規陣的動物驚伊驚甲咇咇掣，感覺真煬，伊心內暗想：「佇這片大樹林裡，毋管佗一隻動物攏嘛驚我，哈哈，我確實是遮上尊貴、上𪁎趒的國王啦。」 有一日透中晝，獅細細聲仔家己咧踅踅唸：「今仔日哪會遮熱，我愛來揣一位仔較秋凊的所在通覕熱歇睏一下。 誠拄好，頭前有一跡樹蔭，蔭真闊，獅真滿意，䖙落去就欲睏矣。眯無偌久，獅的耳空邊有一陣嗚嗚叫，噪人耳的聲，致使獅心肝頭齷齪甲睏袂落眠。獅目睭褫開，看著一隻細隻蠓仔佇伊面頭前咧颺颺飛。獅大聲共蠓仔喝，愛伊閃較遠咧，莫吵著伊的眠。想袂到，彼隻蠓仔無咧插伊，照常佇遐飛來飛去，閣講：「莫當做你是萬獸之王我就會驚你。」 獅袂堪得逆，大聲嚷：「我一个堂堂樹林的國王，啥物大場面毋捌看過，今仔日哪有可能會輸你這隻細隻蠓仔？」 蠓仔嘛無咧共信篤，講：「你喔，大隻好看頭爾，其實你干焦是一箍大癮頭。」 獅聽著氣怫怫，無加一句話，隨用伊厚tuh-tuh的手爪大力共蠓仔𢼌落去，想袂到蠓仔早一步就閃邊仔去矣。土公仔性的獅毋但拍無著蠓，顛倒去搧著家己的面，搧一下烏暗眩。蠓仔趁機會閣共獅叮面，予獅是癢甲規面烏白抓。 落尾，獅舞規晡久忝甲虛lè-lè，姑不而將共蠓仔求情，承認蠓仔確實有兩步七仔，有影比伊較𠢕。 蠓仔就按呢，衝kuā-kuā做伊飛走矣。 蠓仔真風神咧共逐家展伊拍敗獅的消息，一下無細膩煞去挵著蜘蛛網仔。一隻蜘蛛寬寬仔來到蠓仔的身軀邊，蠓仔氣怫怫講：「你這个孝呆，緊共我放開，我是連獅都共夾起來滴水的厲害腳數喔。」 蜘蛛講：「我才無咧插你是啥物腳數，在我看來，你干焦是我的中晝頓爾爾。」 蜘蛛愈徙愈倚蠓仔，蠓仔毋管按怎翸就翸袂開蜘蛛網。這隻可憐的蠓仔一直到死都想袂曉，是按怎連獅伊都無共看在眼內矣，竟然會有這款悲慘的結局。 這个故事咧共咱講，就算咱人閣較有才情，嘛毋通傷囂俳、傷臭屁，咱人往往攏會因為按呢，才會來踢著鐵枋，千萬愛會記得，囂俳無落魄的久。 留言告訴我你對這一集的想法： https://open.firstory.me/user/cmhxcxa39007r01w89fsc84k7/comments Powered by Firstory Hosting