Fiasko Fest

Ganz éierlech. D’Nora Koenig gëtt elo einfach al. Dat muss een dann mol sou soen, wéi et ass, seet d’Schauspillerin. Do brauch de Moderator Luc Spada och guer net sou matt groussen Ae kucken. An ass dat schued? E bëssi, villäicht. Déi Energie ass eben net méi grad sou "wéi fréier". Dofir kennt eppes ewéi Rou an d’Plaz, e bëssi manner »et muss elo sinn« an dofir méi "dann ass et eben net, och okay". An heiansdo geet et eben och einfach an "d’Merde" an dat ass okay. D'Sendung heescht jo net fir näischt: Fiasko Fest.

Net jugéieren, nolauschteren an e Gespréich zouloossen, onofhängeg dovun, ob ee mateneen averstanen ass oder net. Dat ass wichteg fir eng gutt Diskussioun an och eng vun de Richtlinne bei Fiasko Fest. Dës Kéier agelueden ass de Georges Krombach, Chief Commercial Officer vun Heintz van Landewyck. Wéi ass et méiglech Mënsche gären ze hunn an awer och Gëft ze verkafen? Natierlech ass et net ëmmer just schwaarz a wäiss. Eng éierlech an intensiv Ausernanersetzung tëschent dem Luc Spada an engem Invité, dee vill verschidde Säiten huet. Dat mécht et natierlech ëmsou méi interessant op dëser Sich no Sënn a Genoss.

Eppes ass sécher. D'Sylvia Camarda gehéiert net an eng Këscht. Net am Liewen a ganz sécher och net duerno. Wat ass nach sécher? Disziplin ass wichteg, mee net nëmmen. D'Dänzerin a Politikerin ka béides, ofdauchen an zeréckkommen. Et ass vill geschitt: Vun der stolzer Massendéngerin zu Nidderkuer iwwer hir net ganz einfach Zäit beim Cirque du soleil bis hin zu dem Moment virum Spigel, bei deem d'Sylvia Camarda dem Alter begéint ass. Eng weider erausfuerderend Emissioun vu Fiasko Fest mam Luc Spada, op der Sich no Schéinheet a Stäerkt

Guer näischt fillen? Jo, dat geet. Et huet alles mat engem Tinnitus ugefaangen an et huet, am beschte Sënn: mat engem besonnesche Mënsch opgehalen. Esou kéint een ofgekierzt en Deel vum Wee vum Fussballfan, Journalist, Konzept -Kreateur a Stand-up-Comedian Pit Arnold beschreiwen. A mëttlerweil kann hie mat engem gewësse Stolz soen, datt hien zanter 3 Joer d’Panikattacken hanner sech gelooss huet. Et kann also elo voll Power weidergoen. Mee wat maachen? Vun allem e bëssen an näischt richteg? Ass dat déi eenzeg Méiglechkeet en erfëllte Liewen ze féieren? Déi Äntwert kritt Dir bei Fiasko Fest mam Luc Spada.

Et huet alles mat engem Camping zu Stengefort ugefaangen a vun do aus huet d’Indira Idrizovic sech hiert Liewen zu Lëtzebuerg opgebaut. Haut ass si Grafikerin a Mamm vun dräi Kanner. Woubäi de Fokus ëmgedréit ass. Fir d’éischt d’Kanner an dann alles anescht. Dat huet d'Zäit net ëmmer zougelooss an dat bereit si bis haut. Famill huet absolut Prioritéit, dat gëtt ëmmer erëm kloer an dësem intensive Gespréich mam Luc Spada an dëser 10. Episod vu Fiasko Fest. A sécher ass: Erënnerunge sinn do, fir datt ee wuesse kann. Et dierf näischt vergiess ginn.

An dëser Episod vu Fiasko Fest schwätzt de Michel Abdollahi oppen iwwer d'Liewen als Mënsch mat Migratiounsgeschicht an Däitschland. Wéi fillt et sech un, och no ville Joren ëmmer nach als “Auslänner“ ugesinn ze ginn? Mam Luc Spada geet et ëm riets Tendenzen, déi Leit dozou bréngen, iwwer en zweete, net-däitsche Pass nozedenken. A wat bedeit “däitsch sinn". Kann ee jeemools wierklech ukommen, oder bleift ëmmer e Gefill vun net doheem sinn? Leider jo. Eng éierlech Diskussioun iwwer Identitéit, Zougehéieregkeet a firwat et wichteg ass, iwwer dës Theemen ze schwätzen. Deutsche Versioun: In dieser Folge von Fiasko Fest spricht Michel Abdollahi offen über das Leben mit Migrationshintergrund in Deutschland. Wie fühlt es sich an, selbst nach vielen Jahren immer noch als “Ausländer“ gesehen zu werden? Gemeinsam mit Luc Spada geht es um rechte Tendenzen, die Menschen dazu bringen, über einen zweiten, nicht-deutschen Pass nachzudenken. Und was heißt eigentlich “deutsch sein“. Ist echtes Ankommen möglich, oder bleibt immer Fremdheit? Leider ja. Ein ehrliches Gespräch über Identität, Zugehörigkeit und die Notwendigkeit, offen darüber zu reden.

Et ass ganz kloer: Mir schwätzen hei net iwwer den Elefant am Raum. Fiasko Fest mam Luc Spada ass ëmmerhin eng Show iwwer déif Gefiller a grouss Gespréicher a net iergendeng Klatsch an Traatsch Sendung. Okay, e bëssi vläicht, obwuel d’Tessy Antony de Nassau eigentlech net wëllt. Et gëtt nämlech vill méi ze soen, wéi just déi Saach do mat de Krounen an esou weider. D’Nidderkuerer Meedchen, dat gären an de Bësch geet a bësse verréckt ass, huet vill ze erzielen iwwer hir Zäit als Zaldotin, de versichten Iwwergrëff op si, de Suizid vun hirem beschte Kolleeg an hir Relatioun zu hire Kanner. E Liewen ouni Paus oder och: Eng Gewënnerin ass eng Verléierin, déi et méi wéi eng Kéier probéiert.

Et ass wichteg sech Hëllef ze huelen, wann een Hëllef brauch. Dat kléngt eigentlech logesch, mee d’Theorie ass méi komplex wéi d’Ëmsetzung. De Kapp an de Mënsch souwisou. Dat weess och d’Sandy Heep, déi mat Suicidegedanken, Depressiounen a jo, et kann een et net anescht soen: mat sech selwer ze kämpfen huet. Déi gutt Noriicht ass: Hëllef ass méiglech. An déi fënnt een dacks scho beim Hausdokter an enger éischter Etapp. Eng Episod, an där d'Donkelheet vill present ass, mee et gëtt och gelaacht, no der Hoffnung gesicht an och schlecht Spréch komme mam Luc Spada an den Asaz: et kann een net ëmmer gewannen, mee et léiert een ëmmer dozou. An dem Sënn: Bonne Ecoute!

„Ach, ich glaube, ich bin ein Mensch, der ständig auf der Suche nach sich selbst ist (...)“. Dat ass den Ufank vun der Äntwert op d'Fro vum Luc Spada, wat seng Invité, d'Schauspillerin Maja Juric ausmécht. Eng ideal Basis fir Fiasko Fest, wou de Moderator sech zwar op den Invité preparéiert, awer keng konkret Froe virbereet. Dat hei ass ëmmerhin nach e Gespréich a keen Interview. Et geet uerdentlech an d'Déift. Iwwert Grenzen, déi net op derSchauspillschoul agehal ginn, e Suizidversuch an der Famill an dem Maja Juric seng Ex-Sucht. DE: DE Versioun: „Ach, ich glaube, ich bin ein Mensch, der ständig auf der Suche nach sich selbst ist (...)“, beginnt die Antwort von der Schauspielerin Maja Juric auf die Frage von Luc Spada, was sie als Person ausmacht. Das ist eine ideale Grundlage für Fiasko Fest, wo sich der Moderator zwar auf den Gast vorbereitet, sich aber keine konkreten Fragen aufschreibt. Schließlich handelt es sich hier immer noch um ein Gespräch und kein klassisches Interview. Es geht dabei ordentlich in die Tiefe: Über Grenzen, die an der Schauspielschule nicht respektiert werden, einen Suizidversuch in der Familie und Maja Jurics ehemalige Sucht.

Wat d'Emilie Boland sécher net brauch, ass Opmierksamkeet. Dovun huet déi eemoleg Miss Luxembourg a Besëtzerin vum Moudelabel Bogere méi wéi genuch an dat huet si sech selwer verdéngt. Wat d'Gewalt an hirer Ex-Bezéiung ugeet, hat si keen anere Choix, wéi ëffentlech goen. Alles wat si wollt, ass, dass hier gegleeft gëtt. Awer einfach war de Wee net an de Luc Spada schwätzt bei Fiasko Fest mat hier iwwert hier donkelst Momenter no enger Xanax-Iwwerdosis bis zum dem haitegen Dag, wou si matt Stolz soe kann: Et geet hier gutt.

Mara Stieber ass Aktivist, politesch aktiv bei déi Lénk, spezialiséiert am Genderberäich a versteet sech selwer als non-binär. Et kann ee soen, datt Mara sech fir eng gerecht Gesellschaft fir all Mënsch asetzt. Oder wéi de Cliché vum ale wäisse Mann Mara bezeechne géif: woke. Wéi och ëmmer, et ass eng Welt, déi engem Angscht maache kann an dacks net vill Plaz fir Hoffnung léisst. De Luc Spada geet der Saach bei Fiasko Fest op de Gronn.

De Luca De Michele huet am 6. Schouljoer vu senger Léierin gesot krut, hie soll sech ophänken. Déi brutal Ausso huet de jonke Maquilleur staark markéiert. Haut kann hien doriwwer laachen an dës Erënnerung huet him och gehollef sech vun allem, wat him net guttdeet, ze distanzéieren. An engem intensive Gespréich mam Luc Spada deelt de Makeup-Artist vill perséinlech Momenter aus sengem Liewen a Fiasko Fest beweist eng Kéier méi wéi no beienee Laachen a Kräische kënne sinn.

Als Dänzerin, Kënschtlerin a Fra schafft d’Anne-Mareike Hess sech ëmmer erëm un de Mëssstänn vun eiser Gesellschaft of. Dat ass engersäits Aarbecht, anerersäits eng ongeschriwwe Pflicht fir si. Dobäi ass d’Haaptinstrument als universell Sprooch de Kierper. Mee och deen ass net onendlech a stéisst u seng Grenzen. Virun allem wann den Drock vun Erwaardungen, Leeschtung an dem Alter schwéier op engem leie kënnen. An dësem wéi gewinnt ausféierleche Gespréich mam Luc Spada, bitt Fiasko Fest en ongeschminkte Bléck hanner Kulisse vun enger eenzegaarteger Kënschtlerin.

Mam Motto "Heiansdo deet et wéi" geet Fiasko Fest schonn an déi 3. Staffel. An dowéinst brauch et e puer Ännerungen, well och d'Scheiteren dierf net langweileg ginn. Et gëtt just nach en/eng Invité:e fir esou richteg an d'Déift ze goen. A fir déi éischt Show vun der neier Staffel ass dat d’Schauspillerin Julie Kieffer. Si erzielt dem Luc Spada vun hiren Ängschten, wéi onfair den Doud ass oder ka sinn an och wat et heescht eng gutt oder schlecht Schauspillerin ze sinn.

D'Cindy Oliveira ass Comedian an d'Anne Faber ass eng, jo, wéi soll ee soen? Eng Journalistin, déi gäre kacht. Sécher ass: Iergendeppes mat Iessen. Iergendeppes mat schlechter Stëmmung? Jo, dat muss och heiansdo sinn. Et brauch just dee richtege Moment an e gudde Grond dofir. Dëst ass déi lescht Episod vun der 2. Staffel Fiasko Fest mam Luc Spada, mee mam Scheiteren ass et nach laang net eriwwer.

D'Mandy Graff huet Karriär gemaach, huet laang Zäit als Model geschafft an ass haut Léierin. Huet si d’Gefill, datt si et zu méi hätt brénge kënnen? Vläicht esouguer internationale Superstar? Net wierklech. Oder dach? Vläicht e bëssi. Vläicht e bëssi méi virsiichteg ass de Kënschtler Emile Schlesser, wann hien déi nächste Kéier an d’Mier geet. Dat ass sécher. Wisou? Do gëtt et just eng Äntwert: Lauschtert Fiasko Fest mam Luc Spada.

Fir mol direkt kloer ze sinn: E Sträit heescht net, datt ee seng Stëmm hiewe muss. Esou gesäit dat jiddefalls den Thomas Roland aka de Museker Maale Gars, deen et elo wierklech wot: Fort vun enger fester Plaz an d’fräiberufflech Welt. Eng Welt, déi der Designerin Ruth Lorang scho méi laang bekannt ass. Wat brauch et nach? Gesond Grenzen, dat ass emol sécher. An um Enn muss och mol gekrasch ginn. An dat ëmmer nach am beschte bei Fiasko Fest mam Luc Spada

D'Eugénie Anselin an d'Anne Klein si Schauspillerinnen a maachen och Comedie. An allen zwee wëlle si, datt ee si gären huet an trotzdeem kann ee jo net alles richteg maachen. Datt dat okay ass, muss ee léieren. An heiansdo geet et engem och mol richteg schlecht an et weess een net wisou. An esouvill sief gesot: Dofir muss ee sech net schummen. Nimools an am allermannste bei Fiasko Fest mam Luc Spada.

An dëser Show vu Fiasko Fest geet et vill ëm den Doud, ëm Kierperen an och Ängscht. De Priv.-Doz. Dr. med. Thorsten Schwark ass Head of Department vum Laboratoire Nationale de Santé a säin Alldag ass Läichen opschneiden. An d'Miss Sappho aka Mandy Boehm huet et gepackt sech aus dem perséinlechen Déifpunkt eraus ze kämpfe fir haut e glécklecht Liewen ze féieren. An dat mat Hëllef vun enger Schwëster. Du wëlls méi wëssen? Lauschter Fiasko Fest mam Luc Spada.

Den Isaiah Wilson an d'Ceci si kreativ ënnerwee, awer a ganz verschiddene Genren. Den Isaiah Wilson als Choreograph an d’Ceci als Content Creator (Influencer héiert si net esou gär) an och als Moderatorin vum Podcast “Ceci, Do You Love Me?.“ Et geet vill iwwer Schwächten a wéi een doraus och eng Stäerkt maache kann, mee um Enn bleift eng Angscht an et ass net déi virum Doud. Lauschtert Fiasko Fest mam Luc Spada an Dir gitt alles gewuer.