L'instrumentala

Il dirigent e cumponist dal Vallais ha gia festivà gronds success. Uss dastga el festivar ses 60avel anniversari. Arsène Duc è naschì il 1965 a Chermignon (VS) e cun 11 onns è el entrà en la musica dal vitg, l'Ancienne Cécilia de Chermignan sco eufonist. El è restà fidaivel a ses vitg patern. Cun 23 onns, il 1988, ha el surpiglià la bitgetta da l'Ancienne Cécilia e diregia la furmaziun dapi lura cun grond success. L'onn 2008 ha el ensemen cun auters fundà la Valaisia Brass Band. Cun questa furmaziun excellenta ha Arsène Duc fitg grond success, tranter auter il titel da campiun europeic il 2018.

Sco sin l’entir mund ha il marsch era en Svizra ina lunga tradiziun. Il marsch accumpogna gia dapi onns paradas militaras e civilas, embellescha festas da tuttas sorts e divertescha en salas da concert. Per oz avain nus pront marschs da chanzuns svizras. D’udir èn tranter auter il Graubündner Marsch cun la melodia «A Trun sut igl ischi», il marsch Appenzeller Gruss cun la melodia «Min Vatter isch en Appenzeller», il marsch da Trin, la marcia Ticinese, la marcha da Scuol ed anc bleras autras melodias enconuschentas.

Per bleras e blers è la tschintgavla stagiun da l’onn la pli bella! Damai che nus essan entamez quella procura era l’instrumentala per in zic atmosfera da tschaiver. Musicantas e musicants da tut il mund èn pronts e sunan per vus ina schelta da melodias divertentas plain temperament – melodias sco fatgas per ina saira da tschaiver. Il bainvegni fa la River City Brass Band cun il marsch «Carnival Day». Plinavant datti da tadlar il toc legendar «Carnival of Venice», ils hits «Samba de Janeiro» e «Carnaval de Paris» ed anc bleras autras bellas melodias per il temp da barlot. Er ina musica da tschaiver svizra e duas dal grischun diverteschan vus, uschia per exempel la Noggeler Guggemusig Luzern, la Guggamusik Tschapatalpas e las Fifferlottas da Segnas.

Las chapellas da musica populara instrumentala guardan enavos sin ina lunga tradiziun. Quai che ha entschet cun furmaziuns pitschnas or da societads da musica, è sa sviluppada oz tar ina vasta e musicalmain ordvart variada e gronda scena da musica. En L’instrumentala dad oz èn musicantas e musicants da la Svizra, Germania, Austria, Slovachia, Tschechia e Tirol dal Sid pronts e sunan per vus marschs, valzers, polcas e musica da divertiment.

L’instrumentala dad oz sa deditgescha a registraziuns dal temp passà. Co tunavan nossas musicas ils onns 70 ed 80? Tge litteratura era lura trumf? L’instrumentala dat las respostas. Sajas pia mirveglius, i po bain esser che Vus udis ina u l’autra reminiscenza da temps passads che sveglia regurdientschas musicalas a bain inqual musicant dad oz mo er als musicants d’antruras.

L'Instrumentala preschenta tschintg novs albums da tschintg TOP Brass Bands da l'Engalterra. Cory Band, Brighouse & Rastrick Band, Whitburn Band, Tredegar Town Band e la Black Dyke han dà ora il 2024 novs discs cumpacts cun grondiusa musica da sturs. Ils mottos da las singulas Bands è different. Entant che la Cory Band festivescha ses 140avel onn d'existenza celebrescha la Tredegar Town Band il 150avel anniversari da Gustav Holst. Er la Black Dyke Band è sa focusada sin in cumponist: Arthur Bliss e la Brighouse & Rastrick Band sa deditgescha a la musica da la cumponista Dorothy Gates. La furmaziun scotta Whitburn Band preschenta ina retscha da fitg buns solists sco er l'ovra principala "Astralis" da Philip Wilby.

Musicantas e musicants da tut al mund sun pronts e sunan per Vus ina schelta da melodias divertentas e plaschaivlas, ellas procuran franc er tar vus per curturella ! Il bainvegni fa la band Moravian Winds cun il marsch «Signal to Start». Plinavant tadlain nus il valser «In old Portugal», la «Kwetuschka Polka», il semperverd «Snowbird», musica tradiziunala sco il «Chu Chu Cha Cha» ni «Adios Valentino», intgins marschs ed anc bleras autras bellas melodias. Redacziun: Christa Soliva

La fin da november 2024 è mort a Cuira il dirigent e cumponist Emil Hartmann. L'instrumentala sa regorda dad el. Ils 23 da november 2024 è mort a Cuira il dirigent e cumponist Emil Hartmann (*26.08.1934). Fin en l'aula vegliadetgna ha el anc cumponì ovras per musicas instrumentalas. Ils onns 80 e 90 ha el dirigì la «Buramusig Cazis» (20 onns) e la Musikgesellschaft Zizers (6 onns). Durant 15 onns ha el er sunà il corn en es en la Brass Band Graubünden. Sia gronda passiun era dentant la musica boem-morava (böhmisch-mährisch). El ha cumponì numerusas polcas e marschs. Cura ch'el ha chalà da sunar e diriger ha el scrit numerus artitgels en las gasettas grischunas davart la scena da musica instrumentala grischuna. Sur in lung temp ha el rapportà da festas e concerts da musica instrumentala.

Stailas, tschiel, glina u simplamain la quietezza da la notg è in tema ch’inspirescha adina puspè ils cumponists. L’instrumentala dad oz demussa ch’era la notg stgira ha sias bellas varts. Observar in tschiel plain stailas u tadlar la quietezza da la notg è bain insatge bel? Pia in bun mument per tadlar in pau musica che porscha blers differents aspects: per exempel in viadi tras la notg, in’istorgia, in sentiment da notg u simplamain l’unica atmosfera da notg. Redacziun: Christa Soliva

En l’instrumentala dad oz faschain nus in viadi musical tras noss chantun Grischun. Las musicantas ed ils musicants da las suandantas musicas èn pronts e sunan per vus marschs, polcas ed inqual toc musica da divertiment. La musica da Sedrun, Trun, Breil/Dardin, Glion, Suraua, Greina Vrin, Sagogn, Falera, Flem, Domat, Union Chur, Jenaz, Vaz-Lai, Savognin, Lantsch, Sent, Scuol, Zernez, Concordia Müstair e la musica da S-chanf. Redacziun: Christa Soliva

Musicantas e musicants da tut al mund sun pronts e sunan per Vus ina schelta da melodias divertentas e plaschaivlas, ellas procuran franc er tar vus per curturella ! Bun divertiment cun l’instrumentala plaina cun musica che fa buna luna. Cun swings, in ragtime , ina polca e valzers enfin il marsch, ma er hits, musica tradiziunala e chanzuns popularas mancan betg. Redacziun: Christa Soliva

Co savura Nadal? Qua schessas vus probablamain: da vin chaud, pignol, pizieutas e chanella! E sch’ins dumandass: Co tuna Nadal ? Lura schessas vus probablamain: Sco «Dorma, dorma o bambin» «O tgei buontad, tgei caritad» e lura natiralmain, sco «Clara notg». Il pignol da Nadal cun sias bleras chandailas, sia glischur e sia odur splendura oz ord bunamain mintga stiva. Da quest’atmosfera chauda plain glisch han era las musicantas ed ils musicants laschà inspirar. Els èn pronts e sunan per vus las pli bellas melodias da Nadal. Redacziun: Christa Soliva

Sis musicas instrumentalas ord las quatter regiuns linguisticas dattan concert. Ils 30 da november èn sis musicas instrumentalas stadas envidadas a Berna. Sin la tribuna dal Theater National han ellas sunà in concert da divertiment. Mintga furmaziun ha sunà tschintg tocs ch'èn vegnids registrads en tun e maletg. Las sis musicas represchentan las quatter regiuns linguisticas. Trais sa preschentan en l'Artg musical dals 15 da december, ed en l'Instrumentala sunan il Musikverein Dietlikon, la Fanfare la Dixence d'Hérémence e la Fanfare l'Ancienne de Courgenay.

Gia è la segunda dumengia d’advent passada. L’entir conturn è decorà e las chandailas dal tschupè d’advent traglischan. En «L’instrumentala» dad oz procuran musicantas e musicants da l’entir mund per quell’atmosfera ruassaivla e paschaivla. Emblidai per quell’ura tut ils quitads e giudai la musica.

En l’instrumentala dad oz pudais Vus as persvader da las abilitads musicalas da l’armada dal salit. Il plevon William Booth ha fundà l’armada dal salit l’ onn 1865 a Londra. Cura ch’el ha decidi che mintgina da sias baselgias duai posseder in’atgna brass band na sminava anc nagin tge influenza che quai vegn ad avair en la cultura da musica da sturs. Oz san ins che questa è stada enorma, cunzunt perquai che l’armada dal salit ha sco emprims insumma promovì e scolà musicistas e musicists. Il resultat: blers buns musicists ma era cumponists han marcà la scena enfin oz. Ina da las brass bands, la Brass of Praise, è naschida avant 50 onns en Svizra. Ella avra l’instrumentala dad oz cun il marsch “Long Point” che è medemamain naschì l’onn 1974. Sper la Brass of Praise tadlain furmaziuns internaziunals e naziunalas da l’armada dal salit.

A chaschun dal 25avel World Band Festival han tschintg furmaziuns da musica instrumentala dà in concert. Il Jugendblasorchester Luzern, l'ensemble Southbrass, la Black Dyke Band, Die kleine Egerländer Besetzung e la Brass Band 13 Étoiles B-Band han divertì in grond publicum sin la plazza Europa, gist avant il KKL e sper il port da bastiments al Lai dals Quatter Chantuns. Musica divertenta sin aut nivel e preschentada cun grond gust. «L'instrumentala» porta ina part dal concert direct.

Marschs tradiziunals èn oriundamain cumposiziuns en trais parts e cun in tact da dus. I dat però er marschs d’in autra furma, marschs da parada e marschs concertants. Sper ils marschs da via che fan adina puspè gronda impressiun a la populaziun datti er ils uschenumnads « gronds » marschs u marschs sinfonics. Quai èn marschs che paran d’esser pli nobels, pli pompus ch’ils simpels marschs per marschar. Tar questa sparta tutgan per exempel il Radetzky-Marsch, Florentiner Marsch, Pomp and Circumstances ma er il grond marsch militar Stars and Stripers Forewer da John Philip Sousa. Prendai plaz e giudai in’ura marschs pompus, eroics che vegnan preschentads sunads da diversas musicas svizras ed er da furmaziuns da l’exteriur.

Nus envidain vus da passentar cun nus in’ura cun musica instrumentala ch’empermetta in'atmosfera cumadaivla e patgifica sco fatga per ina saira da november. Diversas furmaziuns sunan per vus enconuschents chorals, imnis, ina motetta ma era melodias sco «Der Mond ist aufgegangen», «Mia steila», ed era la chanzun da ninanana «Tutta nana tgu» na manca betg. Giudai «l’instrumentala» per ina giada in pau auter.

Il retg da marschs american ha era scrit autra musica, per exempel valzers. Avant 170 onns, ils 6 da november 1854 è naschì a Washington John Philip Sousa sco terz dad 11 uffants. El è creschì si circumdà da musica militara. Ses bab ha sunà posauna en il United States Marine Corps, ina furmaziun nua che John Philip ha era sunà pli tard. Davent da 1880 ha el dirigì la band e manà ella a numerus success. Il marsch «Semper Fidelis» ha el publitgà il 1888 e deditgà als offiziers ed umens dal Marine Corps. Dapi lura vala el sco marsch uffizial dal Marine Corps. In auter fitg renumà marsch è «Stars and Stripes forever», in marsch ch'il congress american ha declerà l'onn 1987 sco «National March of the United States».

En l'instrumentala d'oz tadlain nus ina selecziun cun megahits dals onns sessanta enfin oz. D'udir en hits e semperverds da pop sco; Baby One More Time – Grüezi wohl Frau Stirnimaa – Lady Madonna – Gloria – Flowers ed anc blers auters. Interpretadas vegnan questas melodias dentant betg da Britney Spears, dals Minstrels, Umberto Tozzi, dals Beatles u la Miley Cyrus, mabain d'enconuschentas furmaziuns da sturs.