DiscoverLa classica
La classica
Claim Ownership

La classica

Author: Radiotelevisiun Svizra Rumantscha (RTR)

Subscribed: 30Played: 559
Share

Description

L’emissiun cun musica classica da differents cumponists ord tut las epocas. Interpretada d’orchesters e solists da renum.
La chaschun po esser in anniversari rodund ubain il mortori dad ina corifea. Quai po esser il giubileum dad in album, d’in stil u d’in fenomen musical istoric. U in chavazzin casual ni ina cumparaziun da diversas interpretaziuns da chanzuns «classicas».
16 Episodes
Reverse
Franz von Suppè: Naschì è el 1819 a Split en Croazia. La gronda part da sia vita ha el vivì e lavurà a Vienna. Là è el mort ils 21 da matg 1895. Franz von Suppè, el vala sco l'inventader da l'operetta da Vienna. Sia musica lev-luc-spiertusa regorda al Parisian Jacques Offenbach. Franz von Suppè ha cumponì ina massa: passa 200 ovras per la tribuna, musica concertanta, marschs, valzers e polcas, chanzuns da solo e musica sacrala. Per gronda part ovras occasiunalas tenor il motto: oz sunadas – damaun emblidadas. Ma tuttina: intginas da sias uverturas appartegnan anc oz tar il repertori dals orchesters: Dichter und Bauer, Ein Morgen, ein Mittag und ein Abend in Wien, Leichte Kavallerie, Die schöne Galathée, Banditenstreiche e Boccaccio cun sia famusa aria da la Fiametta: Habich nur deine Liebe, die Treue brauchich nicht. Redacziun: Giusep G. Decurtins
«Adagio» senza fin

«Adagio» senza fin

2020-06-2159:49

«Adagio» munta per talian tant sco commod u empernaivel. En la musica inditgescha «Adagio» però in tempo ruassaivel e plaun, magari schizunt fitg plaun. En quest'emissiun pudais Vus tadlar ina schelta adagios – musica ch'è savens er trista u melancolica. Il «Adagio for strings» (Adagio per instruments d'artg) da Samuel Barber vala per exempel sco ovra classica la pli trista insumma. En la schelta da adagios sa chatta er l'Adagio tenor Tomaso Albinoni, in'ovra fitg plauna, solenna e medemamain trista. Er quella vegn sunada gugent da sepulturas. Percunter è l'Adagietto or da la 5avla sinfonia da Gustav Mahler ina decleraziun d'amur – almain tenor in raquint d'in ami dal cumponist. Plinavant pudais Vus udir l'Adagio sostenuto or dal concert per clavazin nr. 2 da Sergej Rachmaninov, l'Adagio or da la sonata per clavazin nr. 8 (Pathétique) da Ludwig van Beethoven sco er la Méditation or da l'opera Thaïs da Jules Massenet.
Georges Bizet * 25 doctober 1838 a Paris cul num Alexandre-César-Léopold Bizet; † 3 da zercladur 1875 a Bougival sper Paris. Georges Bizet è stà in cumponist franzos da la romantica e pianist. Ses pli grond success – lopera Carmen. Georges Bizet, el in uffant talentà, ina spezia scheni. Cun 9 onns daventa el scolar da Charles Gounod al conservatori da Paris. Cun 17 onns aveva el gia 4 diploms dal conservatori en tastga: teoria da musica, clavazin, orgla, cuntrapunct e fuga. E quel onn cumpona el sia emprima sinfonia e quai en mo paucs dis. L'Artg musical preschenta lezza, sper extracts da l'opera Carmen, da l'Arlésienne e da sia Petite Suite d'orchestre «Jeux denfants». Georges Bizet è mort ils 3 da zercladur 1875, trais mais avant la premiera da sia Carmen.
En quella Classica udis Vus parts da l'opera Fidelio da Ludwig van Beethoven – sia suletta opera insumma. I va per la libertad u meglier ditg per in cumbat per libertad. L'erox Florestan è en miseria. El è innocentamain en praschun, cunquai ch'el sa chaussas ch'el na dastgass betg savair sur dal directur da la praschun Don Pizarro. Perquai vul lez l'emprim laschar murir Florestan da la fom en sia cella e pli tard, cura ch'i fa prescha, mazzar el. La dunna da Florestan, Leonore sa vestgescha sco um per pudair deliberar ses consort. Ella sa numna Fidelio e cumenza a lavurar en praschun. La finala sa bitta ella tranter Don Pizarro che vul mazzar Florestan e sa mussa sco dunna: «Töt' erst sein Weib».
The Best of Beethoven 6

The Best of Beethoven 6

2020-05-3101:00:01

Avant 250 onns è Ludwig van Beethoven naschì. Quest onn festivescha il mund da la musica classica il giubileum dad in dals gronds cumponists insumma: Ludwig van Beethoven (1770-1827). La classica da RTR deditgescha mintga mais in'emissiun a quest grond architect da musica. La 6avla part porta musica sacrala. Era sche la musica sacrala n'era betg gist sia domena preferida, duas messas ha Beethoven tuttina cumponì. Duas sin empustaziun: sia gronda Missa solemnis e la pli modesta Messa en C-Dur, op. 86 (1807). E quella en C-Dur porta La classica dad oz, e quai en ina registraziun dals 2018 fatga a Minca cun il Chor ed Orchester sinfonic dal radio da la Baviera. Dirigent: Mariss Jansons. Sco introducziun udin nus bain la pli enconuschenta chanzun sacrala da Beethoven: Die Ehre Gottes aus der Natur cun quel renumà incipit: Die Himmel rühmen des Ewigen Ehre, ihr Schall pflanzt seinen Namen fort. Pleds da Christian Fürchtegott Gellert.
En il center da quella Classica stat la vusch da bariton, pia la vusch virila amez – pli bassa che quella da tenor, ma pli auta che quella da bass. Sin Vus spetga in viadi musical da rollas per bariton. Quest viadi cumenza tar ovras da Mozart (Don Giovanni, Le Nozze di Figaro). Ord vista istorica èn Mozart e ses contemporans a la fin dal 18avel tschientaner stads quels ch'han savì co trair a niz las vuschs virilas amez. Da lura dateschan las emprimas rollas per baritons. En quest'emissiun pudais Vus er tadlar ovras ord las plimas dals cumponists talians Gioachino Rossini (Figaro, Guillaume Tell), Gaetano Donizetti (Don Pasquale) u Giuseppe Verdi (Macbeth). Plinavant in schatg dal collega tudestg Richard Wagner (Tannhäuser) sco er la gronda aria d'entrada dal torero ord l'opera Carmen da Georges Bizet.
The Best of Beethoven 5

The Best of Beethoven 5

2020-05-1701:00:21

Avant 250 onns è Ludwig van Beethoven naschì. Quest onn festivescha il mund da la musica classica il giubileum dad in che ha influenzà e marcà l'istorgia da la musica sco mo paucs: Ludwig van Beethoven. Naschì avant 250 onns a Bonn. Mort 1827 a Vienna. Quest onn sa fatschenta La classica da RTR ina giada al mais cun quest grond architect da musica. La 5avla part porta musica dal giuven Beethoven. Cun 14 onns ha el cumponì ses emprim concert per clavazin ed orchester. Betg ina dals tschintg gronds, enconuschents. Na, quest qua porta il nr. 0. Nus tadlain el. Dasperas datti anc trais ulteriuras ovras dal giuven Beethoven: Da ses Quintett in Es-Dur, op. 16 il rondo ed ina bella Romance cantabile, duas ovras che Beethoven ha cumponì cun 16 onns. E da sia Sinfonia Nr. 1, scritta cun 20 onns, ils dus moviments: menuetto e finale.
Haydn a Londra

Haydn a Londra

2020-05-1001:00:00

A Vienna, Paris e cunzunt a Londra n'era nagin auter cumponist uschè dumandà sco el: Joseph Haydn. Ils onns 1790 era la glieud da Londra tut narra dad ir a concert. Haydn è viagià en la citad englaisa per diriger sez sias pli novas ovras. I n'è però betg be restà tar il diriger. Durant ses dus viadis ha el cumponì aposta per il public englais 12 novas sinfonias. Tut en tut ha Haydn cumponì 104 sinfonias. Quellas da Londra èn sias davosas e furman in punct culminant da sia ovra sinfonica ed er da l'epoca da musica classica insumma.
La classica da RTR cun musica da Wagner, Weber e Beethoven. «Grosse Romantische Oper in drei Akten» ha Richard Wagner (1813-1883) numnà ses «Tannhäuser und der Sängerkrieg auf Wartburg». 1845 ha quella gì sia primaudiziun e quai a Dresden. Il patratg fundamental è la liberaziun. Nus tadlain l'uvertura, il chor dals pelegrins che turnan da Roma «Beglückt darf nun dich, o Heimat, ich schaun» ed il marsch «Einzug der Gäste auf der Wartburg». Carl Maria von Weber (1786-1826); ses «Freischütz» vala sco insatge dal pli german insumma. Da quest'opera ch'ha purtà gronda popularitad al cumponist tadlain nus l'uvertura ed il renumà chor dals chatschadurs «Was gleicht wohl auf Erden». Il terz: Ludwig van Beethoven (1770-1827). Ina suletta opera ha el cumponì, il «Fidelio». Er qua datti in chor che vegn adina puspè dà, il chor dals praschuniers «O welche Lust». Ed er qua datti in marsch fitg renumà. Redacziun: Giusep G. Decurtins
La viola

La viola

2016-07-0501:00:00

Comments 
Download from Google Play
Download from App Store