La stailalva

Nus essan gia en il quart mais da l'onn nov, uras per resumar e piclar or inqual melodia ch'ins auda adina puspè sin ils emetturs da schlagher. Da la partida èn Matthias Reim, Maite Kelly, Sonia Liebing, Vincent Gross, Bernhard Brink, Vanessa Mai, Semino Rossi la Beatrice Egli ed anc blers auters stars cun lur pli novs hits. Redacziun: Christa Soliva

La Stailalva beneventa la primavaira, la stagiun che sveglia colurs odurs e sentiments da ventira. As legrai sin il valser «Frühlingszauber» sunà dal Mooskirchner Quintett alura sin il hit «So a schöner Tag» cun die Jungen Zillertaler, il semperverd «Weisser Holunder» cun las soras Sigrid & Marina, «Blau, blau muss der Himmel sein» cun il trio die Grubertaler ed er la Miss Helvetia e sia «Putzpolka» manca betg. Redacziun: Christa Soliva

Geabain! I na deva betg mo schlaghers da mal il cor u d'amur ils onns 1950 e 1960. Na, i deva er ina massa hits da schlagher cun viz. Kriminal-Tango, Ein Student aus Uppsala, Schuld war nur der Bossa Nova, Der Fahrstuhl nach oben ist besetzt, Kleiner Gonzales – tut quels ed anc blers auters titels paran segir enconuschents ad in u l'auter fan dal schlagher dal temp passà. Intginas chanzuns pudais vus per franc anc chantar ed in surrir è garantì. Cun Hazy Osterwald, Kirsti u Manuela fin a Vico Torriani u Conny Froboess èn pli u main tut ils stars da pli baud da la partida.

Musica patgifica e quieta per sa fermar in'urella. Er en il schlagher popular datti in mantun hits e semperverds tar questa tematica. Nus avain preparà in program cun melodias finas, calmas e dultschas sco «Ein Schweigen sagt mehr als Tausend Worte», «Das Abendgebet der Berge», «Das Herz einer Mutter», «Auf seltsamen Wegen» ed anc bleras bellas melodias quietas. Redacziun: Christa Soliva

Nus giain bun 20 onns enavos e tadlain schlaghers dals onns 90. Igl è sco dad ir en in auter mund! Dentant, tgi avess cartì, plirs dals hits da lezzas uras audins anc oz – els èn daventads vairs semperverds. Savais anc seregurdar dal hit «Verdammt, ich lieb'dich» da Matthias Reim, vendiu varga in milliun exemplars ed aschia daventà in grond hit! Plinavant tadlein «Verlieben, verloben, vergessen, verzeihn» da Wolfgang Petry, il hit da la Nicki da la Baviera «Du kannst mir sagn i soll gehn», «Und wer küsst mich» da Roland Kaiser, «Die Gefühle haben Schweigepflicht» l'emprim grond hit dad Andrea Berg ed uschia vinavant.

L'uschenumnà Medley è ina moda d'integrar gist pliras chanzuns ensemen en in arranschament. Ina retscha da chanzuns da Saso Avsenik e ses Oberkrainers unidas en in toc lung. Alura avain nus noss emprim titel da l'emissiun dad oz, numnadamain «Mit Polka durch die Welt». Plinavant tadlain nus il «Granaten Medley», il «Party-Boot-Pourri», il «Medley James lässt grüssen» ed anc bleras bellas enconuschentas melodias integradas en in toc.

Las dunnas dattan en il tun. La Stailalva dad oz cun dunnas che chantan lur hits. Da la partida èn Andrea Berg, Anna Carina Woitschack, Linda Fäh, Laura Wilde, Francine Jordi, Helene Fischer, Beatrice Egli ed anc bleras autras.

La stailalva dad oz è deditgada cumplainamain al bel sport d'enviern. Nus giain cun skis, giudain la natira e sco finiziun natiralmain era l'après-ski. Il bainvegni fan oz ils Zellberg Buam cun «Oi oi oi – ab in die Berge». Plinavant tadlain nus l'anteriur skiunz da cursa Hansi Hinterseer cun «Skilied», ils Ladiners cun «Schilehrer-Romanze», Ines Torelli cun il nunemblidaivel hit «Gigi vo Arosa», Vic Eugster e Sepp Trütsch cun «Alles fahrt Ski», die Edlseer cun «Einkehrschwung» ed anc bleras chanzuns che fan gust dad ir cun skis.

Tu sei l'unica donna per me – Live is Life – Gloria – Tornerò – Blue Bayou - Ding a Dong - It's My Life - I.O.I.O. – No No Never; quai èn be intgins dals hits e semperverds dad oz. En la Stailalva tadlain nus dentant betg las versiuns originalas en lingua taliana, englaisa u franzosa, mabain versiuns da cover interpretadas en lingua tudestga. D'udir èn tranter auter Ils Grubertalers, G.G. Anderson, Francine Jordi, Bernd Clüver, Nicki ed anc blers auters. Redacziun: Christa Soliva