DiscoverMarella
Marella
Claim Ownership

Marella

Author: Radiotelevisiun Svizra Rumantscha (RTR)

Subscribed: 11Played: 286
Share

Description

L’emissiun focusescha e reflectescha in tema. Ella dat in cuc davos las culissas, explitgescha e metta en context, saja quai fenomens novs e nunenconuschents, ubain istorgias che paran a prima vista enconuschentas.
190 Episodes
Reverse
L'onn 1970 en Svizra: bainstanza, economia prosperaivla e 0% dischoccupaziun. Dad ina vart. Da tschella vart: uffants zuppads en abitaziuns, mansardas e stgaffas. Uffants da stagiunaris n'avevan betg il dretg d'esser en Svizra cun lur geniturs. Perquai han millis d'uffants patì ina vita clandestina cun blers scumonds, temas ed abandun en Svizra. In dad els è stà Egidio Stigliano, figl d'immigrants talians. El ha stuì sa zuppar durant 2 onns ad Altstätten (SG). El n'era però betg zuppà en ina stanza, ha dentant passentà ses dis sulet en il guaud davos chasa. Cun 60 onns sa regorda el en la Marella da sia uffanza cun bleras renunzias. Datti ozendi anc adina uffants zuppads? Segir, ha ditg Marianne Kilchenmann, dal post da cussegliaziun per sans papiers a Berna. Tge ch'èn ils problems actuals e tgi ch'èn ils pertutgads raquinta ella en questa Marella.
La glista da giavischs persunals è savens sulettamain en il chau. Dentant, er quella vala sco glista. Ils siemis e giavischs pon esser pitschens ubain er siemis strusch realisabels. Dentant han els savens ins effect fitg positiv sin quellas persunas che nus avain inscuntrà. Els motiveschan, fan plaschair u han in effect da sa siemiar. René Cavegn, Madleina Manetsch e sia figlia Ceylin Sönmez, Reto Schmid, Claudia Bearth e Faye Dominique Köhler raquintan da lur siemis – da lur bucket list.
Il Magliacudeschs

Il Magliacudeschs

2020-06-0738:37

En il Magliacudeschs discurra Esther Krättli cun giasts davart cudeschs che dattan en egl. En il center da l'emissiun stattan dus cudeschs, nua che duas protagonistas descrivan a moda fitg precisa in tschert temp da lur vita. Preschentads vegnan ils romans «Resto qui» da Marco Balzano e «Mutter. Chronik eines Abschieds» da Melitta Breznik. Ils giasts dal Magliacudeschs èn questa giada las duas lecturas passiunadas Marcella Pult e Christina Caprez.
Mintgin da nus ha gì tozzels magisters en sia vita. Quant impurtanta è la relaziun che nus avain (gì) cun quels? En noss'uffanza passentain nus circa uschè bler temp en scola sco a chasa. La relaziun cun noss magisters lascha pia senza dubi enavos fastizs – positivs ubain era negativs. Quant impurtanta è ina buna relaziun? È ella indispensabla ubain gist «nice to have»? Tge sa la scienza davart l'influenza da talas relaziuns sin l'emprender da l'uffant? Quant conscient èn magisters da l'influenza che la relaziun persunala ha sin l'emprender? La Marella ha tschentà questas dumondas a dudesch pedagogas e pedagogs. Els/ellas raquintan da lur experientschas persunalas e portan exempels: da lieurs da Pasca zuppadas en furmiclers, d'in pitschen regal d'ina magistra cun gronda muntada, d'ina magistra che daventa madritscha e dal bel pled che nus avain en rumantsch: «la clamada».
Luzius Pol, naschì il 1754 a San Murezzan, è in dals emprims scienziads da la natira dal Grischun. Malgrà ch'el era in pionier en divers champs, n'è el ozendi strusch enconuschent. La Marella lascha reviver quest preditgant multitalentà, per ch'el possia raquintar da sias grondas passiuns: da la botanica, da la perscrutaziun d'insects e da cuvels, da sias excursiuns sin differents pizs. Vita duranta è Luzius Pol stà chatschà dal giavisch da far insatge per l'utilitad publica e da meglierar la vita dals concarstgauns. Perquai è el sa fatschentà durant blers onns cun la correcziun dal flum Landquart. Ses plans per dumagnar il flum per garantir uschia ina via charrabla tras il Partenz han la finala dentant fatg naufragi.
Evelina Cajacob è ina da las emprimas artistas grischunas che ha cumenzà a lavurar cun ils pli differents meds: dissegn, objects, videos, e mintgatant er cun la lingua. Uss mussa il Museum d'art dal Grischun a Cuira ina retrospectiva da sia ovra dals ultims 30 onns. Igl è l'emprima exposiziun en il Grischun che preschenta l'art da la Sursilvana a moda uschè extendida. Per questa Marella avain nus discurrì cun l'artista davart si'ovra e sia vita – e tge relaziun ch'ella ha oz cun la Surselva.
La vita va vinavant – er durant quest temp da crisa. En il vair senn dal pled. En Svizra naschan mintga di en media 220 uffants. Quasi adina da la partida – ina dunna da part, ina spendrera. Parturir en in mund dominà dal coronavirus funcziuna anc adina medemamain sco adina – ma las circumstanzas shan midadas. Betg dapertut però listess ferm. Entant ch'igl ha dà en ils ospitals mesiras digiena pli severas, n'è il coronavirus en la chasa da part a Vaz Sut betg tant dominant. Quatter dunnas da part quintan da lur mintgadi, da lur clamada, da la pazienza ch'i dovra e dal miracul da la vita – cun e senza coronavirus. Las opiniuns e tenutas davart quel sa divergeschan fitg – oravant tut en la dumonda quant medischina ch'i dovra per avair ina buna naschientscha.
«Ils 8 da matg 1945»

«Ils 8 da matg 1945»

2020-05-0341:12

In sguard en l'istorgia en maletgs, suns e tuns. Quai è il victory-day, il di da la victoria dals alliads dals Stadis Unids, da la Gronda Bretagna, la Frantscha e la Russia sur da la Germania dals nazis. Cun la capitulaziun da la Wehrmacht tudestga è a fin la Segunda Guerra mundiala en Europa. En Grischun è ils 8 da matg 1945 stà in di sco blers auters, cun ina normalitad dalunsch dals champs da guerra e da las maisas radundas da diplomazia e da dictaturs. Cun sfegliar en gasettas grischunas, tadlar ina u lautra vusch, infurmaziuns e musica dal temp emprova questa Marella da skizzar latmosfera da quels 8 da matg 1945 en Grischun. Redacziun: Isabelle Jaeger
Mi'amia la tema

Mi'amia la tema

2020-04-1947:50

Tar blers è la tema per il mument fitg preschenta en il mintgadi. Ma è la tema propi insatge che sto far tema? Igl emporta pauc, sche jau hai tema dad in virus, da filiens u da l'autezza – quai che succeda en mes corp en situaziuns da tema è adina il medem: ils ormons da stress ma lubeschan da focussar sin il privel e dad emblidar tut il rest. Mia tema è pia in instrument da protecziun, senza il qual mes perdavants n'avessan forsa gnanc survivì. Ma tge succeda, sche mia tema è constanta e dominescha tut mias acziuns? Cura è ina tema sanadaivla e cura discurr'ins dad in «disturbi» da la tema? Pertge hai jau dapli temas che mes vischin? Pon ins emprender d'affruntar la tema u è quai ina chaussa da caracter? En La Marella ans dumandain nus er, sche la tema ha propi merità sia schletta reputaziun! È ella forsa tuttina dapli «amia» che «inimia»? È ella quella che ma mussa, tge ch'è impurtant per mai, tgenins ch'èn mes desideris ils pli profunds e per tge che jau sun pronta da cumbatter? Discurrer da la tema na fan blers betg gugent – ma La Marella rumpa il silenzi enturn quest'emoziun, quai ensemen cun Bettina Inauen che vegn sco sanitaria da salvament confruntada regularmain cun las temas da pazients e confamigliars, cun ils psicologs Mathias Egger e Silvia Deplazes e lura er cun Roland Vögtli (alias Cha da Fö) che ha in di schizunt scrit ina carta postala a si'atgna tema. Il cabarettist e musicist Flurin Caviezel, lez tradescha a nus, pertge ch'el n'ha ina notg insumma betg savì durmir, quai pervia da la tema. Cura che la tema sa transfurma en odi Nossas temas pon tenor situaziun er sa transfurmar en odi. Sco pli ferma emoziun negativa che l'uman po resentir è l'odi responsabel per guerras, genocids, assassinats e fanatissem. Il 2017 era La Marella sa fatschentada cun quell'emoziun che po nascher dapertut: en famiglia, tranter vischins, sin plazza da pausa, tranter naziuns, en la politica u en la rait. Tge è tipic per l'odi? Pertge è el uschè grev da sragischar? E tge profil psicologic han «haters» che passentan uras a disfamar glieud en l'internet? Il psicolog Philipp Ramming tradescha en quest'emissiun, pertge che l'odi è in'emoziun existenziala per persunas destabilisadas. E cun Jon Pult (che era lura anc deputà en il Cussegl Grond) era La Marella sa dumandada, schebain l'odi daventa pli e pli er in instrument politic. Nagin gust da sa fatschentar cun tema ed odi? Lura po questa Marella or dal 2018 forsa esser insatge per vus: Cura es Ti ventiraivel? Questa dumonda ha La Marella tschentà ad audituras ed auditurs. Las respostas èn uschè variadas sco las persunas sezzas; rirs duffants, tschivliez dutschels, far tschaiver, esser sulet, far viadis, turnar a chasa, chantar, far sport e.u.v. La tschertga da la ventira cuzza dapi millennis, mo ina resposta definitiva ed ina che vala per tuts nha lumanitad anc betg chattà. La Marella sa metta tuttina a la tschertga da ventira, quai cun agid dal filosof Iso Camartin e da Marina Berini, docenta per luschenumnà Schulfach Glück. Weitere Themen: Cura che la tema sa transfurma en odi - Cura es ti ventiraivel?
Vulain telefonar?

Vulain telefonar?

2020-04-1246:34

En quest temp ha il telefon puspè survegnì ina muntada in pau autra. Telefonar, raquintar, discutar, chapir e dumandar, e quai enstagl da sa scuntrar. Blers lavuran en il homeoffice ed exact uschia è era questa Marella vegnida realisada. Sin la dumonda vulain nus telefonar? hai dà reacziuns e la finala fitg bels discurs sur da la vita en questa situaziun extraordinaria, e quai cun Esther Tomaschett, Urezza Famos, Cilgia Koller Mengiardi, Adriana Caminada ed Annina Sedlacek
Duas generaziuns e lura èsi finì – normalmain. Finì cun dar vinavant la lingua minoritara en la diaspora. En noss cas la lingua rumantscha en la Bassa. Quai mussa almain la statistica. I dat dentant era excepziuns. Per exempel Niculina Plebani a Winterthur che ha emprendì bel ed aposta rumantsch per dar vinavant la lingua a sia figlia. U Seraina Thom che n'avess betg pudì s'immaginar da betg discurrer rumantsch cun ses poppin. U er Mara Truog che ha cumenzà, ha lura dà si ed ha uss puspè prendì l'iniziativa da discurrer er rumantsch – e quai sin giavisch da sia figlia. En questa Marella raquintan las trais dunnas da la motivaziun e da las sfidas da dar vinavant il rumantsch, sch'ins è sco ellas gia creschì si giu la Bassa en in conturn plainamain tudestg.
Lain sautar!

Lain sautar!

2020-03-2248:28

In'emissiun sur dal saut? En quests temps da crisa? Gea. Pli che mai! L'uman sauta dapi millennis. L'emprim era quai tgunsch in act natiral e spontan – pli tard lura cunzunt er in act da ritual. Lura è il saut daventà ina furma da sa divertir en cumpagnia u er in'expressiun artistica. Ma igl emporta pauc, sch'il saut è hobi, mastergn ubain terapia: igl è demussà che saut è bun per noss spiert e noss corp (cunzunt er per noss sistem d'immunitad). Perquai envida La Marella gist bel ed aposta ad in'emissiun che ans maina davent dad isolaziun sociala e pandemias. Nus sautain tras l'emissiun cun trais protagonistas: Eleni Casanova – passiunada da flamenco Cun tschintg onns ha Eleni Casanova vesì in placat da reclama per ina festa en Spagna. E dapi lura ha ella savì, ch'ella veglia in di sautar flamenco! Ussa va Eleni mintg'emna ad in curs da flamenco a Turitg e numna quest saut sia passiun, ma era sia terapia. Christina Thurner – professuressa per scienzas da saut En la Marella raquinta Christina Thurner da las entschattas dal saut, da sia impurtanza e funcziun ed ella declera er, pertge ch'ella pensa che nus Svizzers sautain memia pauc. Dina Sennhauser – sautunza e choreografa Per Dina Sennhauser (25), creschida si en Surselva e che viva oz a Berlin, è saut passiun e mastergn. L'atun passà ha ella fatg en Germania ses master en choreografia, avant ha ella studegià saut contemporan en Svizra. Pertge ch'ella è sa decidida per il saut enstagl ils skis, pertge ch'ella inscenescha gugent choreografias senza musica e tge plans ch'ella ha per ses avegnir sco artista independenta – tut quai tradescha ella en la Marella.
Or da la nova praschun

Or da la nova praschun

2020-03-0830:13

Dacurt ha la nova praschun a Cazas Tignez avert sias portas. Ina praschun trais giadas uschè gronda sco il vegl Sennhof entamez la citad veglia da Cuira. Ils schurnalists Gieri Venzin e Sabrina Bundi han accumpagnà la bardigliada e survegnì in'invista en la nova praschun. Els han pudì paterlar cun persunas che lavuran ubain vivan en praschun, davent da la directura sur il survegliader, la spirituala ubain il praschunier che raquintan da lur mintgadi e da las sfidas. Redacziun: Sabrina Bundi e Claudia Cadruvi
Coworking en las Alps

Coworking en las Alps

2020-03-0140:17

Lavurar nua ch'ins vul – a la mar u sin in culm cun ina bella survista – quai è il siemi da blers che lavuran en in biro. Cun in mund da lavur adina pli digitalisà po quest siemi vegnir realitad. Tut quai ch'i dovra è ina rait d'internet sperta ed in spazi da lavur. Uschenumnads «Coworking Spaces» datti gia uss en las grondas metropolas dal mund. Ussa vegn il fenomen era en las Alps. Coworking Spaces a Scuol, Tavau, Laax u Cuira na sa drizzan betg mo a turists e proprietaris da segundas abitaziuns, ma era ad indigens che vulan star en lur val u turnar suenter in studi da la Bassa.
La famiglia Castelberg da Rabius ha ina relaziun tut speziala cun il passlung. Igl è quai che collia la famiglia. Oravant tut il bab Thomas e la figlia giuvna Brida. Il bab Thomas è l'um che guarda dapi 25 onns, enviern per enviern, ch'i dat ina buna loipa tranter Trun e Mustér. Per el lavur e passiun enina. Sia figlia Brida (25) ha dapi sia naschientscha in impediment da la vesida. Ella na vesa quasi nagut ed ha uschia adina gì pli grev, saja quai en scola u er en il temp liber. Tut quai n'impedescha dentant betg ella dad ir cun skis e far passlung.  Ina marella davart ina famiglia cun in mintgadi ch'è mainsvart auter che usità e mainsvart betg simpel. Dentant er davart ina famiglia che sa tegna ensemen sco rascha.
Tge pomai pon ins far per vegnir 100 onns? Quella resposta n'hai jau betg survegnì. Persuenter ina pluna istorgias or da la vita da la Johanna Petschen da Trun. Da sia vita sco buobetta ed il chasti ch'ella aveva survegnì per esser stada cun skis, da sia voluntad da vulair far ina scolaziun en in temp, nua che quai n'era betg usità per buobas. Da ses temp sco scolasta da lavur, la vita sco mamma e las mirveglias ch'ella ha adina gì. Questa Marella è in inscunter cun ina dunna che sa regorda e quai cun gust.
En Svizra vivan bun 80'000 persunas cun in disturbi dal spectrum da l'autissem – e cun mintgina dad ellas èn era confamigliars e l'entir conturn pertutgads. La Marella dat il pled a trais persunas che discurran per quels e quellas che na san betg s'exprimer en in microfon.
Dapi radund 20 onns è il luf enavos en il chantun Grischun, e dapi lura s'occupan ins era cun la protecziun da muntaneras. Lemprim chaun da protecziun veva anc mors a las nursas en las ureglias. Oz han er ils chauns emprendì da far la differenza tranter lufs e viandants. La marella dat in sguard sin listorgia da la protecziun da muntaneras el Grischun, discurra cun Jan Boner dal Plantahof, da la sfidas per purs e pasters, tutga il puls al WWF e raquinta da l'Alp Stutz sur Spleia, nua che la societad dalp ha il mument da cumbatter dapli cun ils uffizis chantunals che cun il luf. Redacziun: Rafael Müller
Internet svelt saja ozendi «infrastructura da basa», quai di almain il cusseglier guvernativ Marcus Caduff. En quel punct sto il chantun Grischun dentant anc far bler. In sguard sin tge ch'è avantmaun e tge che fiss planisà en Grischun. En Grischun il datti dapi l'onn 2018 in concept chantunal per bindels ultralads. Tenor il concept duess il Grischun avair «in plaz a la testa en il congual svizzer». Per il mument è quai dentant plitost ina visiun. Quai di Jon Erni, ch'ha collavurà vi dal concept. «Per il mument essan nus – gist quai che pertutga la sveltezza da sur 100 mbits/s – propi a la cua da la Svizra.» 5G – La tschintgavla generaziun mobila En il Grischun datti dapli antennas da 5G che quai ch'ins pensa. Per il mument chattan ins en il Grischun pli che 100 antennas cumpatiblas cun 5G. Per gronda part èn quai antennas da 3G u 4G ch'ins ha fabritgà or. La mira da la Swisscom è stada, da porscher fin la fin dal 2019 a 90% dals Svizzers 5G. Sco ch'els communitgeschan curt avant Nadal 2019, saja quai er gartegià. Protestas en differentas vischnancas u perfin moratoris chantunals hajan dentant franà il progress.
Al Tavulin litterar sa scuntran per la davosa giada Bettina Vital, romanista ed amatura da cudeschs, e Claudia Knapp, dunna da cultura e cuntadina d'ulivas. En il center da l'emissiun stattan dus cudeschs cun notizias autobiograficas. Ils auturs èn tuts dus da l'Engiadin'Ota. Discutà vegn sur da «Leinen los» da Jürg Oschwald e «La pultruna/Annäherungen», l'emprima part d'ina trilogia da regurdientschas da Romedi Arquint. Jürg Oschwald descriva en ses diari da viadi co ch'el ha vendì sia fatschenta da coiffeur ch'era per trais generaziuns en possess da la famiglia. Cun sia bartga «Grischa» e ses dus chauns è el girà tras la Mar Mediterrana. Cun sia aventura vul el far curaschi a la glieud da midar vita. Cun «La pultruna/Annäherung», «Cubadreams» e «A spass a lur dal tschêl » va il teolog ed anteriur politicher Romedi Arquint sin ils fastizs da persunas e muments che han influenzà sia vita: la relaziun cun ses geniturs, la mort da sia dunna u era dumondas filosoficas e teologicas. Redacziun e moderaziun: Esther Krättli
loading
Comments 
Download from Google Play
Download from App Store