NASA 逐工一幅天文圖 APOD Taigi

這隻蝶仔會孵卵，孵一粒行星！Ùi 恆星 IRAS 04302+2247 湠出去 ê 星雲，看起來就敢若是一隻蝶仔 ê 翼。影像中央彼條直直 ê 烏線，就親像是蝶仔 ê 身軀。毋過其實這是一个活動力足強 ê 行星形成系統。這張相片是 最近用 Webb 太空望遠鏡 翕--ê 紅外線影像。圖內底 chhāi 直 ê 氣體盤主要是氣體 kah 塗粉，是做行星 ê 所在。這个氣體盤會 kā 中央恆星發出 ê 可見光 kah 大部份 ê 紅外光閘咧，顛倒予咱看會著包 tī 外口、反射光線 ê 塗粉。煞落來幾若百萬年內，這个塗粉盤可能會受著新孵出來 ê 行星 ê 引力作用，碎做一輪一輪 ê 圓箍仔。閣過幾若億年後，賰 ê 氣體 kah 塗粉可能會散去，賰行星爾爾，就親像咱 ê 太陽系仝款。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250908/ 影像：NASA,ESA,CSA,Webb 處理：M. Villenaveet al. 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250908.html Powered by Firstory Hosting

地球 ê 衛星月球，有偌大粒？若 kah 太陽系內底其他 ê 衛星比，伊 ê 大細排佇第五名，頭四名是：木星 ê 衛星 木衛三 Ganymede、土星 ê 衛星 土衛六 Titan、木星 ê 衛星 木衛四 Callisto kah 木衛一 Io。月球比木星 ê 衛星 木衛二 Europa kah 海王星 ê 衛星 海衛一 Triton，閣卡大粒。伊嘛比 矮行星 冥王星 kah 鬩神星 閣卡大粒。月球 ê 直徑有 3475 公里，差不多是地球 ê 四分一爾爾。毋過若是考慮 母行星 ê 大細，月球是上大粒 ê 衛星。佇這个 恬 chih-chih ê 8 月黃昏海岸，拄 peh 起來 ê 月圓，看起來猶是細細粒，就敢若去予古早時代 掠魚 ê 網仔 掠著仝款。這張長鏡頭相片，是 tī 義大利 Trabocchi 海岸 ê Adriatic 海 翕--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250823/ 影像：Marco Bellelli 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250823.html Powered by Firstory Hosting

土星環面對咱 ê 角度逐年攏會無仝，差不多每 15 冬一个週期。今年 ê 角度看起來就親像土星環消失去矣。這个足光足媠 ê 土星環系統，若是愈來愈狹、愈來愈暗，地球頂懸 ê 人就愈來愈無法度看著伊。毋過，這嘛予咱一个好機會，會當觀察土星 ê 衛星 ùi 伊面頭前行過，看伊 ê 烏影是按怎閘著這粒有環、足光 ê 氣體巨行星。這个現象，就叫做 凌土星。是講，土星上大粒 ê 衛星 土衛六 Titan，是上好觀察 ê 對象。佇這張 7 月 18 翕--ê 望遠鏡相片內底，Titan 是 tī 相片 ê 倒爿頂懸。伊 ê 烏影就投影 tī 土星環 頂懸 彼粒烏烏 ê 圓點。事實上，這馬是 Titan ê 烏影 凌土星 ê 季節，每 16 工就會出現一擺。Titan 上尾一擺 ê 烏影 凌土星 會發生 tī 10 月 6 號。毋過，若是用望遠鏡看，Titan 本身猶會繼續 每 16 工 ùi 土星面頭前行過，一直到 2026 年 1 月 25 為止。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250724/ 影像：Volodymyr Andrienko 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250724.html Powered by Firstory Hosting

是啥物造成火星頂懸出現這个無四常 ê 窟仔？這張地形圖內底一空一空，四界攏是，就親像是瑞士 chhì-suh 仝款。等較淺色 ê 二酸化炭素冰層蒸發了後，下底出現 ê 空，大部份攏是暗色、厚塗粉 ê 火星地表。毋過正爿頂懸這个較特別，伊差不多有 100 公尺闊，看起來親像欲迵對地下層去。這个窟仔是按怎會 tī 遮，伊 ê 邊仔是按怎會箍一輾隕石坑結構，到今猶毋知。有一个主要 ê 假設是講，伊是去予太空石頭舂--ê。逐家會對這款窟仔有興趣，是因為 in 可能是迵對地下層 ê 入口，下底可能有地下洞穴。若是按呢，這寡自然形成 ê 地下磅空，就袂受著火星地表氣候 ê 影響。相對來講，會是較適合火星性命生存 ê 所在。所以，這款窟仔嘛是未來太空船、機器人，抑是人類星際探險家 主要欲揣 ê 目標。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250413/ 影像：NASA,MRO,HiRISE,JPL,U. Arizona 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250413.html Powered by Firstory Hosting

這个星際噴射流 ê 尾溜是啥物？咱先來看這个噴射流：伊是 ùi 一个拄形成 ê 恆星系統噴出來--ê，這个系統 ê 編號是 HH 49。噴出這个噴射流 ê 恆星系統 tī 正爿下跤，毋過咱看袂著。James Webb 太空望遠鏡 翕 ê 這張紅外線影像，看會著複雜 ê 三角桶形結構，其中閣有另外一个編號 HH 50 ê 噴射流。懸速度 ê 噴射流粒子 kah 邊仔 ê 星際氣體相挵，激發出來 ê 光是 tī 紅外線波段，就是影像內底 咖啡紅 ê 山陵形結構。這張 James Webb 太空望遠鏡翕 ê 影像，予咱了解 HH 49 尾溜 彼个奇奇怪怪 ê 結構到底是啥物：伊其實是一个遙遠 ê 捲螺仔星系。所以，中央彼个藍色 ê 部份毋是一粒恆星，是一大陣恆星。邊仔 ê 圓箍仔，其實是捲螺仔手骨。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250409/ 影像：NASA, ESA, CSA, STScI, JWST 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250409.html Powered by Firstory Hosting

這幅深空視野拼鬥圖 leh 展示一个 hŏng 足讚嘆 ê 景色，這是 James Webb 太空望遠鏡 ê NIRCam 紀錄 loài ê 星系團 Abell 2744。Abell 2744 嘛叫做 Pandora 星系團，伊敢若是 3 个無仝 ê 大質量星系團合併 ê 結果。伊就 tī 玉夫座方向 35 億光年遠 ê 所在。這个大型星系團 因為 內底攏是烏暗物質，所以伊就 kā 時空扭曲去，這个 重力透鏡 效應嘛 影響著 閣較遠方 ê 天體。比 Pandora 星系團閣較紅 ê 天體，有足濟攏是受著透鏡效應 ê 影響，in 大部份攏是早期宇宙 ê 遙遠星系。受著透鏡效應扭曲 ê 影響，in ê 影像 去予搝長、拗彎，變做弧形。是講影像內底這寡 特別 ê 繞射光針，是銀河內 ê 前景星。照目前估計 ê Pandora 星系團 距離來看，這个宇宙盒仔差不多有 600 萬 光年大。毋過免驚！你閣會當看 這支 2 分鐘 ê 影片，來探索這个迷人 ê 天區。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20251003/ 影像：NASA, ESA, CSA, Ivo Labbe (Swinburne), Rachel Bezanson (University of Pittsburgh) 資料：Alyssa Pagan (STScI) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap251003.html Powered by Firstory Hosting

這个烏影景色 就是冥王星暗暝彼半爿。遮是一个暗淡 koh 遙遠 ê 世界。這張予人讚嘆 ê 太空視角內底，太陽 to̍h tī 49 億公里遠（差不多是 4.5 光時遠）ê 所在。這張相片是 飛足遠 ê 新視野號太空船 tī 2015 年 7 月 翕 ê。彼陣 ê 太空船離冥王星 2 萬 1 千公里遠，差不多是伊 ùi 離冥王星 上近彼位飛--出去 ê 19 分鐘後。這个 Kuiper 帶 ê 成員有戲劇性 ê 外形。Ùi 這張相片來看，咱知影冥王星 霧霧 ê 大氣層其實是蔫蔫，而且實在是 有夠複雜 ê。Tī 這張相片頂懸彼个月眉形 ê 晨昏區景色 內底，有南部地區 ê 窒素冰原，這馬叫做 Sputnik 平原，嘛有 坎坎坷坷、有水冰 ê Norgay 山脈。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20251002/ 影像：NASA, Johns Hopkins Univ./APL, Southwest Research Institute 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap251002.html Powered by Firstory Hosting

這寡無四常 ê 斑 是按怎來--ê？這個月初 咧探索 火星 ê NASA 毅力號探測車，發現 火星岩石 頂懸有 淺色 ê 斑，每一搭外口攏有一輾較烏 ê 箍仔。這寡奇怪 ê 圖樣 去 hŏng 叫做 豹紋，kah 地球頂懸 ê 哺食者 足仝--ê，所以科學家 咧 研究這寡圖樣 是毋是 古早時代 ê 火星性命 留落來--ê。相片 內底 ê 斑，直徑才幾若 毫米 爾爾，是 tī 一塊 叫做 Cheyava Falls ê 大塊岩石 頂懸揣著--ê，有一个 hŏng 激動毋過 猶未證明 ê 解說 是，足久以前 ê 微生物 透過 化學反應產生能量，予岩石 ùi 紅色 變做 白色，而且留一輾烏色箍仔落來，就親像是地球岩石頂懸出現 ê 斑仝款。就算其他 非生物學 ê 解說 可能會贏，毋過這款 kah 生物起源可能有關係 ê 解說，會引起較濟人注意。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250928/ 影像：NASA, JPL-Caltech, MSSS, Perseverance Rover 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250928.html Powered by Firstory Hosting

這張 tī NGC 6914 附近 ê 彩色天景，是欲用來研究內底 ê 恆星、塗粉、kah 發光氣體。這个 星際星雲複合體 離咱有 6000 光年遠，伊就 tī 北天星座 天鵝座 咧飛，嘛是 tī 銀河盤 ê 面頂。這規張宇宙畫布攏是紅色 ê 水素 發射星雲 kah 厚塗粉 ê 藍色 反射星雲。烏色剪影 ê 部份，就是閘光 ê 星際塗粉。Tī 天鵝座 OB2 星協內底 ê 大質量、高溫、少年恆星發出 ê 紫外光輻射，kā 星協內底 ê 原子 水素氣體 離子化去，產生質子 kah 電子 複合 ê 特徵紅光。Tī 天鵝座 OB2 內底 ê 恆星嘛因為反射塗粉雲，產生足強 ê 藍色恆星光。這个超過 1 度闊 ê 望遠鏡視野，按照 NGC 6914 ê 距離來推算，差不多是 100 光年遐爾闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250919/ 影像：Tommy Lease 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250919.html Powered by Firstory Hosting

毋知你上佮意 ê 行星 ê 自轉是啥物款--ê？伊敢是踅足緊--ê？伊 ê 自轉方向是墜直--ê？坦平--ê？抑是踅倒反--ê？這支影片 有 kā NASA 翕--ê 太陽系 八粒行星 影像畫做動畫，按呢咱就會當看著 in 排做一排做伙自轉，咱嘛較好做比較。Tī 這支 縮時攝影影片 內底，地球 ê 一工，就是地球自轉一輾，才幾若秒爾爾。木星 自轉 ê 速度較緊，金星 自轉毋若較慢（是講你敢看有？），而且是踅倒反--ê。動畫頂半爿是岩石質 ê 太陽系內行星，大部份應該是 tī 太陽系形成早期 kah 其他天體有 激烈 ê 相挵，造成自轉方向改變。這寡行星 ê 自轉 kah 趨角是按怎變做這馬按呢，是一个 研究主題。這會當 ùi 現代 電腦模擬 kah 最近發現--ê 幾若百粒 系外行星 ê 分析，得著啟發。系外行星就是 踅其他恆星咧行 ê 行星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250914/ 影像：NASA 動畫：James O'Donoghue (JAXA) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250914.html Powered by Firstory Hosting

地球有偌濟成份是水？實際上，足少--ê。雖罔講 海洋 佔地球表面 70 葩，in kah 地球半徑比起來其實是 足淺--ê。這張插圖 有畫予咱看，咱若是 kā 地球表面 kah 附近所有 ê 水，攏收集做一粒 水球，會變做啥款。這粒水球 ê 半徑是干焦 700 公里爾爾，比咱 地球 ê 月娘 半徑 ê 一半閣較細。毋閣是比土星 ê 月娘，土衛五 Rhea，較大淡薄仔。Rhea kah 咱 太陽系 內底其他衛星仝款，主要是水冰組成--ê。這粒大粒水球邊仔較細粒 ê 水球，是 地球 表面所有液態淡水。上細粒 ê 水球，是地球表面 ê 淡水湖 kah 河川。這寡 水 是按怎來到 地球--ê？是毋是閣有大量水藏 tī 地表下底？攏是咱欲研究 ê 主題。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250907/ 影像：Jack Cook, Adam Nieman, Woods Hole Oceanographic Institution 資料：Igor Shiklomanov 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250907.html Powered by Firstory Hosting

華麗 ê 捲螺仔星系 NGC 4565 ùi 咱地球 kā 看是側向--ê。因為伊狹狹--ê，所以伊嘛叫做 繡針星系。這个光-iàⁿ-iàⁿ ê NGC 4565 tùi 天文觀測團 ê 群眾來講，是北天關注 ê 目標，伊就 tī 暗暗毋閣整齊 ê 后鬃座 遐。這个清楚閣多彩 ê 影像，看會著星系中心有一个 盒仔形、脹脹 ê 星系核。有一條 閘光 ê 塗粉帶，就迒 tī NGC 4565 薄薄 ê 星系盤遐。NGC 4565 離咱有 4000 萬 光年 遠，伊 ê 闊度有 10 萬光年闊。因為咱用細台天文望遠鏡就揣會著 NGC 4565 矣，所以 天文愛好者 認為講，這个遮爾出眾 ê 天體無 tī Messier 星表內底，應該是 伊編星表 ê 時陣 kā 落勾去矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250904/ 影像：José Rodrigues (IA, OFXB) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250904.html Powered by Firstory Hosting

毛蟹星雲 ê 核心有一粒 kah 城市平大、有磁性 ê 中子星，伊一秒鐘會自旋 30 擺。伊就叫做 毛蟹星雲脈動星，是 tī 星雲核心 這寡咧轉踅氣體 ê 中央 上光彼點。毛蟹星雲 中心彼搭 ê 發光氣體、閬空、kah 捲踅 ê 雲絲，實在是足壯觀--ê，這差不多有 12 光年闊。這張相片 是 kā 三个波段 ê 影像疊做一張--ê。Hubble 太空望遠鏡 ê 可見光 是茄仔色--ê，Chandra X-光太空天文台 ê X-光 是藍色--ê，Spitzer 太空望遠鏡 ê 紅外線 是紅色--ê。毛蟹星雲脈動星就親像是一台 宇宙發電機 仝款，伊會 予毛蟹星雲動力 產生發射線，ùi 四箍圍仔 ê 物質驅動 震波，kā 轉踅 ê 電子加速。這粒 會自旋 ê 脈動星，是大質量恆星 爆炸 了後崩塌 ê 核心。伊 ê 質量比 太陽 較大，毋閣伊 ê 密度 kah 原子核 仝款。毛蟹星雲脈動星 ê 外層，是做恆星 ê 氣體脹大 ê 殘骸。是講，地球人 tī 1054 年 ê 時陣，就捌看過 超新星爆炸矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250824/ 影像：NASA: X-ray: Chandra (CXC), Optical: Hubble (STScI), Infrared: Spitzer (JPL-Caltech) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250824.html Powered by Firstory Hosting

你敢知影這寡上光 ê 天星 ê 名？你可能知影。有一寡仔 天星 ê 名，是老甲拄開始有 書寫系統 ê 時陣就有矣。世界上足濟文化對這寡 上光 ê 天星 攏有 in 家己號名 ê 方式，而且知影 in ê 名 tī in ê 文化 kah 歷史佔足重要 ê 地位。毋過，為著欲予全球 ê 人有較精確 ê 溝通，國際天文聯合會 (IAU) kā 這寡天星 ê 名標準化。這張相片是這 25 粒 上光 ê 天星 kah IAU kā in 號 ê 名。相片內底這寡天星 ê 色彩，是咱 人 目睭真正看著 ê 色彩。有一寡天星 ê 名實在是 誠有意思，包括 天狼星 (tī 拉丁文 內底是臭火焦 ê 意思)，織女星 (tī 阿拉伯文 內底是落落去 ê 意思)，kah 心宿二 (tī 希臘文 內底是火星 ê 死對頭 ê 意思)。有一粒你可能較熟 ê 是：北極星。毋過伊無 tī 這張圖內底，因為伊無夠光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250611/ 影像：Tragoolchitr Jittasaiyapan 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250611.html Powered by Firstory Hosting

Tī 火星日第 46 工（2021 年 4 月 6 號），毅力號探測車 tī 火星伸出一支機器手骨自翕。Tī 手骨尾節 ê WATSON kha-mé-lah 是設計來翕火星岩石 kah 表面細節 ê 特寫，毋是欲來做 kah 朋友歡喜做伙 ê 速翕。落尾是需要 團隊合作 kah 幾若禮拜 ê 火星時間，來設計一系列 ê 感光 kah kha-mé-lah ê 運動 來翕毅力號 kah 伊 ê 環境。這 62 張相片煞會當組合做一張真清楚 ê 拼鬥影像，是歷史上上複雜 ê 火星探測車自翕。Tī 這个版本 ê 自翕，探測車 ê Mastcam-Z kah SuperCam 儀器當 leh 看 WATSON kah 探測車伸長 ê 手骨。離毅力號差不多 4 公尺遠 ê 所在，有另外一台機器人，是 火星獨創號直升機。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250607/ 影像：NASA, JPL-Caltech, MSSS 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250607.html Powered by Firstory Hosting

Messier 63 是 tī 北天一个足光 ê 捲螺仔星系。伊 kah 附近 彼个忠心 ê 星座獵犬座 ê 距離，差不多是 3000 萬光年左右。伊嘛去予編做 NGC 5055，這个雄偉 ê 島宇宙 差不多有 10 萬光年大，kah 咱 銀河 ê 大細是差不多。這个星系有明亮 ê 星系核 kah 雄偉 ê 捲螺仔手骨，所以伊才會提著一个足奅 ê 名，日頭花星系。這張感光特別深 ê 相片，嘛有翕著較暗 ê 弧形 恆星流，流 tùi 星系暈 內底去。這个恆星流 ùi 星系中心延伸出去，一直到 18 萬光年遠 ê 所在。這敢若是 M63 ê 衛星星系 去予潮汐力 搝甲弄家散宅 ê 殘骸。M63 ê 其他衛星星系嘛會當 tī 這張出色 ê 闊幅影像 內底揣著。像一寡較暗 ê 矮星系，嘛會 tī 紲落來幾若十億年 ê 時間內，變做 M63 ê 恆星流 ê 一部份。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250522/ 影像：Sophie Paulin, Jens Unger, Jakob Sahner 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250522.html Powered by Firstory Hosting

媠閣大範 ê 捲螺仔星系 M101 是 Charles Messier's 彼个有名 ê 星表內底上尾一个天體，毋過伊絕對毋是上普通 ê 一个。這个星系 ê 大細差不多有 17 萬光年大，伊足大--ê，差不多是咱銀河系 ê 2 倍大。M101 嘛是 19 世紀 用 Rosse 伯爵上大台 ê 望遠鏡 Leviathan of Parsontown 觀測著 ê 原始 捲螺仔星雲 之一。這是 kā Hubble 太空望遠鏡 tī 20 世紀 kah 21 世紀 紀錄 ê 51 擺感光 kah 地面望遠鏡 ê 觀測資料組合起來 ê 相片。這張組合相片主要是 M101 中央 4 萬 光年闊 ê 範圍。M101 是 Hubble 公佈 ê 捲螺仔星系內底，解析度上懸 ê 其中一个。這張清楚 ê 影像 有翕著 正向盤仔形星系 hŏng 足注意 ê 特色，包括恆星、塗粉，kah 一寡 M101 後壁 ê 背景星系。M101 嘛叫做風吹星系，差不多 tī 2500 萬光年遠 ê 所在，咱會當 tī 北方 ê 大熊座 內底揣著伊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250516/ 影像：NASA, ESA, CFHT, NOAO 感謝：K.Kuntz (GSFC), F.Bresolin (U.Hawaii), J.Trauger (JPL), J.Mould (NOAO), Y.-H.Chu (U. Illinois) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250516.html Powered by Firstory Hosting

這个美麗 ê 星雲 是 tī 1500 光年遠 ê 所在。Tī 這个望遠鏡景色內底，伊 ê 形體 kah 色光，予人感覺伊看起來 敢若是花眉仔卵。這个宇宙雲有 3 光年闊，就 tī 南方星座 天爐座 ê 邊界內底。NGC 1360 是行星形星雲，是卵形--ê，毋過伊毋是恆星拄開始 ê 階段。伊是一粒 較老 ê 恆星，是恆星演化到上尾一个足短 ê 階段。實際上，咱會當 tī 這張圖 ê 中心看著一粒中心恆星，伊是一个雙星系統，應該是有 2 粒演化尾期 ê 白矮星 組成--ê。In ê 紫外光輻射 足強--ê，這 tī 可見光看袂著。輻射能 kā 包 tī 白矮星外口 幾若層氣體內 ê 原子 ê 電子 擲出去。NGC 1360 顯目 ê 青藍色，是電子 kah 雙離子化酸素原子 複合 ê 時陣 產生 ê 強輻射光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250514/ 影像：Dong Liang 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250514.html Powered by Firstory Hosting

毛蟹星雲 是 彼个有名 ê Charles Messier 星表 ê 頭一粒天體。伊 ê 編號是 M1，毋是彗星。實際上，咱這馬知影 毛蟹星雲 是一个 超新星殘骸，是懸質量恆星死亡爆炸了後產生 ê 脹大星雲 ê 雲屑仔。天文學家 tī 1054 年 ê 時陣有看著這个激烈出世 ê 毛蟹星雲。這个星雲 ê 直徑差不多有 10 光年，伊 ê 脹大 速度 是一秒鐘 1500 公里。你若是比較 Hubble 太空望遠鏡 kah James Webb 太空望遠鏡 ê 清楚影像，就會發現 伊咧脹大。2005 年 Hubble 太空望遠鏡 ê 可見光波段 kah 2023 年 Webb 太空望遠鏡 ê 紅外光波段，有翕著毛蟹星雲 ê 雲屑仔 kah 雲絲 ê 活動。這隻宇宙甲殼類動物，就 tī 金牛座 方向差不多 6500 光年遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250508/ 影像：NASA, ESA, CSA, STScI; Jeff Hester (ASU), Allison Loll (ASU), Tea Temim (Princeton University) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250508.html Powered by Firstory Hosting

Tī 這个足厲害 ê 電腦視覺化影像內底，咱看會著 踅雙超大烏洞吸積盤發出 ê 光，去予極端重力扭曲 ê 時空彎曲去。這个 模擬吸積盤 是用幾若色來 kā 標記，紅色是踅 20 億太陽質量烏洞 ê 吸積盤，藍色是踅 10 億太陽質量烏洞 ê 吸積盤。這會當予咱較簡單 to̍h 揣著光 ê 源頭，毋過這款方式 mā 反應現實。較燒 ê 氣體倚光譜 ê 藍光彼爿，而且踅小粒烏洞 ê 物質有較強 ê 重力效應，閣會產生較懸 ê 溫度。像這款質量，兩个吸積盤攏會 tī 紫外線 發出 大部份 ê 光。Tī 這支影片內底，特寫影像是扭曲 ê 藍色烏洞。這是 ùi 紅色烏洞看伊 ê 另外一伴。會當 tī 前景看著絞做伙 ê 紅色吸積盤。這支影片會當予咱 tī 仝一个時間看著去予藍色烏洞扭曲 ê 紅色烏洞。因為咱會當看著紅色烏洞看著 ê 藍色烏洞，嘛會當直接看著藍色烏洞，所以咱會當同齊看著兩爿 ê 藍色烏洞。Ùi 兩粒烏洞發出 ê 紅光 kah 藍光會當 tī 上內底 ê 光環看著，這个環 to̍h 是 光子環。這个環 to̍h 差不多 tī 事件地平線附近。天文學家預測，免偌久，in to̍h 會當 觀測著重力波。這是一个時空 ê 水波痕，是兩粒超大烏洞 tī 仝一个系統內底 互相轉踅 kah 合併，to̍h 親像遮內底模擬 ê 這款 sio-siâng。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20250506/ 影像：NASA, Goddard Space Flight Center, Jeremy Schnittman and Brian P. Powell 文稿：Francis Reddy 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap250506.html Powered by Firstory Hosting