Claim OwnershipNASA 逐工一幅天文圖 APOD Taigi
Subscribed: 34Played: 167
Subscribe
© NASA 逐工一幅天文圖 APOD Taigi
Description
「逐工一幅天文圖 APOD Taigi」Podcast 是 NASA Astronomy Picture of the Day 台語版的有聲頻道。逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者為你解說。
https://apod.tw/
Powered by Firstory Hosting
1379 Episodes
Reverse
冰巨行星 海王星 tī 地球天頂是暗暗一粒 tī 遐。伊 kah 太陽 ê 距離 是 伊 kah 地球距離 ê 30 倍，愛用望遠鏡 才看會著 這粒暗暗 ê 遙遠世界。這个戲劇性 ê 海王星暗暝，是地球附近 ê 望遠鏡翕袂著 ê 景色。Ùi 內太陽系看出去，是干焦看會著 海王星 日時 這爿 ê 景色。實際上這幅 新月形 ê 海王星暗暝 kah 邊仔 ê 海衛一 Triton，是 航海家 2 號太空船 翕--ê。航海家 2 號太空船是 1977 年 ê 時陣 ùi 地球發射，1898 年 ê 時陣 飛倚這粒太陽系上外口 ê 行星。這隻機器人太空船 離開 ê 時陣，回頭看海王星，紲落來就閣繼續 伊 ê 星際旅行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241109/ 影像：Voyager 2, NASA 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241109.html Powered by Firstory Hosting
浮 tī 咱銀河盤附近 ê 厚塗粉分子雲，看起來敢若是宇宙尺度 ê 一支來鬥相共 ê 手。In 是恆星形成星際雲 複合體 ê 一部份，包括 LDN 1358, 1357, kah 1355。這是美國天文學家 Beverly Lynds tī 1962 年piàn ê 烏暗星雲目錄 內底 ê 天體。這寡 3000 光年遠、袂透光 ê 烏暗星雲是 tī 有足濟 恆星 ê 北方星座 仙后座 內底。對天文攝影師來講，翕著 in 是 足困難毋過足值得驕傲 ê 一項代誌。這个距離翕著 ê 這張望遠鏡深空影像，差不多是 80 光年闊。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241108/ 影像：Francesco Radici 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241108.html Powered by Firstory Hosting
這張 美麗 ê 星際景色 Arp 227 是 1996 年 ê「特殊星系圖集」內底 ê 一个特別 ê 星系系統。這个系統 tī 雙魚座方向 1 億光年遠 ê 所在。相片中央倚 倒反頂懸 ê Arp 227 其實是 2 个星系，雲殼星系 NGC 474 kah 伊附近 ê 捲螺仔星系 NGC 470。NGC 474 有 顯目 ê 雲殼 kah 恆星流，應該是 10 億年前 kah 另外一个較細 ê 星系相倚 ê 時陣，受著潮汐力 ê 影響造成--ê。正爿下底 ê 大粒星系 NGC 467 嘛有 雲殼 kah 恆星流，表示講這應該嘛是另外一个 合併星系系統。視野內底閣有足濟美麗 ê 背景星系，前景是 銀河系 內底 ê 天星。這張望遠鏡景色有 25 角分，差不多佔 天頂 ê 一半。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241107/ 影像：George Williams 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241107.html Powered by Firstory Hosting
紫金山-ATLAS 彗星 這馬欲轉去 外太陽系 矣。這粒大粒垃圾雪球 tī 地球 10 月份 行到 太陽附近 ê 時陣，變做是夜空中予人 印象足深 ê 天體，逐家嘛翕著足濟足媠 ê 相片。這張相片 是 10 月中翕--ê，有一條顯目 ê 倒反彗尾。這張相片有翕著 彗星 C/2023 A3 (紫金山-ATLAS 彗星) 長長 ê 塗粉 尾溜 kah 離子 尾溜，方向是指向離開日頭 ê 方向。毋過 內底有較大粒塗粉粒 ê 倒反彗尾，方向是指向 日頭 落去 ê 方向。前景是 意大利 ê Tai di Cadore 庄頭，背景是 足懸 ê Dolomite 山脈。另外一粒 彗星 C/2024 S1 (ATLAS 彗星) 進前去予人認為 kah 紫金山-ATLAS 彗星 有通比並，毋過伊頂禮拜接近太陽 ê 時陣 煞 散去 矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241106/ 影像：Alessandra Masi 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241106.html Powered by Firstory Hosting
木星頂懸彼粒烏斑是啥物？無人知影。NASA ê 機器人太空船 Juno 飛過 木星 ê 時陣，翕著這个 一直攏烏烏 ê 雲，咱 kā 叫做 深坑。邊仔 ê 雲 ê 圖樣表示講，深坑 是 一个 捲螺仔旋 ê 中心。因為 木星大氣 ê 烏色雲 比 淺色雲 較深，所以這个 深坑 看起來就親像是一个 足深 ê 空。毋過咱目前猶無證據，較歹講。深坑 邊仔是一寡複雜、彎彎曲曲 ê 雲 kah 捲螺仔風 風暴系統。有一寡 tī 上懸海拔 ê 雲就是淺色--ê。這張圖 是 2019 年 Juno 太空船飛過 木星雲頂 1 萬 5000 公里懸 ê 時陣翕--ê。後一擺 Juno 太空船 飛過 木星，會發生 tī 3 禮拜後。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241103/ 影像：NASA, Juno, SwRI, MSSS 資料：Gerald Eichstädt & Sean Doran 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241103.html Powered by Firstory Hosting
土星 tī 地球 ê 夜空 是遮爾光。伊美麗 ê 望遠鏡景色 kah 美麗 ê 土星環定定予伊 tī 天星晚會 內底成做主角。毋閣這个遮爾美麗 ê 土星環 kah 土星暗暝，是無可能 tī 倚太陽這爿 ê 望遠鏡翕著，是愛 ùi 另外彼爿才有法度翕。因為倚太陽這爿干焦有法度看著 土星 ê 日時。事實上，這張土星影像是 Cassini 太空船 翕--ê。這是土星去予薄薄 ê 太陽光照甲親像新月 kah 無照著光 ê 土星暗暝。In ê 烏影 to̍h 投射 tī 闊 koh 複雜 ê 土星環系統。Cassini 是地球送去 ê 機器人太空船，伊踅土星 13 冬了後，tī 2017 年 9 月 15 駛入去這粒氣態巨行星 ê 大氣層。這張宏偉 ê 拼鬥影像是 kā Cassini 闊幅 kha-mé-lah tī 伊 落入去土星 進前 2 工記錄 ê 相片組合起來 ê。咱無機會閣看著土星 ê 暗暝矣，除非閣有 另外一台 ùi 地球送去 ê 太空船 踅土星 leh 行。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241102/ 影像：NASA, JPL-Caltech, Space Science Institute, Mindaugas Macijauskas 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241102.html Powered by Firstory Hosting
美麗 ê 大捲螺仔星系 NGC 6744 ê 大細差不多是 17 萬 5000 光年闊，比 咱 ê 銀河系 閣較大。伊 chhāi tī 南方星座 孔雀座 遐，離咱有 3000 萬光年遠。咱若是用細台望遠鏡 kā 看，伊干焦是一个暗暗霧霧 ê 天體。這个島宇宙離咱無蓋遠，伊 ê 星系盤趨 tùi 咱 ê 視線方向，所以這張顯目 ê 望遠鏡景色才看會著詳細 ê 星系肖像。這幅圖 ê 視野大細，差不多 kah 規粒月娘 ê 視角平大。這个大星系 ê 中心，有一个 搝長 ê 黃色星系核。這个黃光主要是 ùi 較老較冷 ê 恆星 來--ê。除了星系核，伊閣有足闊 ê 捲螺仔手骨，面頂攏是藍色少年星團 kah 一搭一搭 ê 粉紅仔色恆星形成區。倒爿下跤有一條較長 ê 捲螺仔手骨，掃過一个較細 ê 衛星星系 NGC 6744A。看著 NGC 6744 ê 星系伴，予咱想著咱銀河系嘛是有一个衛星星系，大麥哲倫星系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241101/ 影像：John Hayes 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241101.html Powered by Firstory Hosting
夜空有一个奇怪 ê 面容，去予恆星光照甲爍咧爍咧。人看著這个彎彎曲曲 ê 形體，就 kā 號做 尪姨頭星雲。實際上，這个遮爾迷人 ê 望遠鏡景色，看起來敢若是 尪姨 tùi 獵戶座 彼粒 足光 ê 超巨星 參宿七 硞硞看。尪姨頭星雲 較正式 ê 名是 IC 2118，伊差不多有 50 光年闊，而且是 一堆星際塗粉粒 反射 參宿七 發出 ê 光。尪姨頭星雲 kah 參宿七 邊仔塗粉發出 ê 藍光，毋若是因為 參宿七 有較強 ê 藍光，嘛是因為 塗粉粒散射 藍光 比 紅光 閣較有效率 。仝款 ê 物理機制 造成 地球 日時 ê 天頂 看起來 是藍色 ê，是講 tī 地球大氣 內底 ê 散射物，是 窒素 分子 kah 酸素 分子 按呢。參宿七 kah 尪姨頭星雲，和 踅 tī in 附近 ê 氣體 kah 塗粉，就差不多 tī 800 光年 遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241031/ 影像：Simone Curzi 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241031.html Powered by Firstory Hosting
這个太空氣泡是按怎做出來的？是 ùi 恆星風 kā 歕出來的。這个 唌--人 ê 星雲 就親像是一粒頭，伊 ê 編號是 NGC 7635，一般攏 kā 伊叫做 氣泡星雲.。這个遮爾媠 ê 景色，是愛長時間感光才有法度翕出這粒 宇宙氣泡 kah 伊邊仔 ê 複雜細節。雖罔講伊看起來敢若是會隨破去，毋過這粒直徑 10 光年 ê 氣泡其實會當證明講，進前捌發生過 激烈 ê 活動。氣泡 中心 ê 正爿頂懸有一粒足光 ê 高溫 恆星，就藏 tī 星雲 ê 反射 塗粉內底。一粒差不多是 10 到 20 倍 太陽 質量 ê 恆星，發出 足猛 ê 恆星風 kah 足強 ê 輻射，kā 邊仔 較厚 ê 分子雲 歕開，形成這个 發光 ê 氣體結構。這个 趣味 ê 氣泡星雲 就 tī 仙后座 方向 1 萬 1000 光年 遠 ê 所在。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241030/ 影像：Chad Leader 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241030.html Powered by Firstory Hosting
這寡恆星當咧毀滅雲柱。講較詳細咧，圖中央 有一寡新形成 ê 恆星 發出 ê 光是遮爾強，強甲會 kā 伊邊仔 ê 雲柱 內底 ê 氣體 kah 塗粉 蒸發 去。仝一个時間，這寡 雲柱 嘛想欲形成 新 ê 恆星。這規張圖攏是 星團 NGC 602。這張新 ê 景色是 Webb 太空望遠鏡 tī 幾若个 紅外線 波段翕--ê。咱會當 kah Hubble 太空望遠鏡 翕--ê 可見光 影像做比較。NGC 602 就 tī 小麥哲倫星雲 (SMC) 附近，SMC 是咱銀河系 ê 一个細粒衛星星系。照 SMC 估計 ê 距離來看，這張圖 應該有 200 光年闊。圖 ê 邊仔有一寡足 引人注意 ê 背景星系，in 大部份攏 tī 幾若億 光年 之外。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241029/ 影像：ESA/Webb, NASA & CSA, P. Zeidler, E. Sabbi, A. Nota, M. Zamani (ESA/Webb) 音樂：P!SCO - 鼎鼎 聲優：阿錕 翻譯：An-Li Tsai (TARA) 原文：https://apod.nasa.gov/apod/ap241029.html Powered by Firstory Hosting
有當時仔，天頂會出現一條燒熱 ê 河。這條河會製造 速度增加的強熱輻射，抑是叫做 STEVE 極光，會發出紅色、白色、kah 粉紅仔色 ê 光。STEVE 極光 是 按怎出現欸？這到今猶是一个研究主題。毋過最近 ê 證據表示講，in 是 ùi 地球大氣 100 公里懸 ê 電離層 內底 高速運動 ê 熱離子河 發光 造成--ê。較闊 ê 紅光河川，可能 kah STEVE 極光 有關，毋過嘛有可能是 穩定極光紅弧 SAR，這是一款 較捷 看著 ê 光。這張相片 是這個月 tī 法國 Côte d'Opale 翕--ê 闊幅數位合成相片，變做天頂 ê STEVE 極光弧。雖罔講這个 幻影 才出現幾若分鐘久，毋過 tùi 頭腦動足緊 ê 天文攝影師來講，已經有夠矣！毋知你有揣著伊無？ ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241028/ 影像：Louis LEROUX-GÉRÉ 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241028.html Powered by Firstory Hosting
銀河系內底上使人驚惶 ê 星雲是佗一个？其中一个應該是 LDN 43，伊足成是一隻大型 ê 宇宙 夜婆，佇 萬聖節 暗暝 ê 星空 咧飛。這个 分子雲 就佇 蛇夫座 遐，離咱有 1400 光年 遠。伊厚甲毋但會 kā 背景光線閘牢，嘛 kā 反射星雲 LBN 7 照予光 ê 氣體閘牢矣。這个 12 光年長 ê 氣體 塗粉 雲絲，實際上是一个 恆星托兒所，毋是歹吉兆。這隻夜婆發出 ê 奇怪 光線，是因為這寡光是 ùi 實密 ê 氣體丸 內底照出來--ê，這內底有才拄形成 ê 新恆星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241027/ 影像：Mark Hanson and Mike Selby 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241027.html Powered by Firstory Hosting
有一粒離地球干焦 700 光年遠爾爾、佇 寶瓶座 方向、太陽質量 ê 恆星，當咧死亡。這粒欲死 ê 恆星佇這个階段持續幾若千年，製造出這个 捲螺星雲 (NGC 7293)。伊是一个咱研究足濟 ê 厝邊 行星形星雲，是恆星演化尾期 ê 形態。這張狹頻影像是 kā 紅色 ê 水素原子發射線 kah 藍色 ê 酸素原子發射線疊出來 ê 結果。咱會當看著捲螺星雲足精彩 ê 細節，嘛包括 內底 3 光年闊較光 ê 區域。捲螺星雲中心彼个白點，是佇行星形星雲中央 ê 高溫恆星。拄開始影--著 ê 時陣，叫是講這是一个簡單 ê 星雲。毋過這馬咱知影講，這个捲螺星雲有一个足 複雜 ê 幾何結構。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241024/ 影像：Patrick Winkler 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241024.html Powered by Firstory Hosting
掠著矣！ ft. 阿錕 (20241023) 火箭若是轉來發射台，而且去予掠著，會按怎？這是頭一擺發生 ê 代誌，就發生 tī 10 工前 SpaceX ê Starship 火箭 ùi 美國 德州 Boca Chica ê 發射台 出去了後。照計畫，星艦火箭 分離，頂節降落 tī 太平洋。上特別 ê 部份是下節火箭，超級重型推進器 12 號，tī 7 分鐘後 去予發射台掠著矣！掠著火箭通重複使用，是一款足新 ê 技術，按呢會當降低火箭 ê 飛行成本。未來 NASA 可能 會送 星艦火箭 到 地球軌道、月球、甚至 其他行星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241023/ 影像：SpaceX 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241023.html Powered by Firstory Hosting
紫金山-ATLAS 彗星 ê 尾溜實在是引人注意。相片內底是 C/2023 A3 紫金山-ATLAS 彗星，是頂禮拜伊上媠 ê 時陣 tī 美國 加州 東 Sierra 山脈 天頂翕著--ê。這粒彗星毋但有 足光 ê 彗尾，而且閣有反向 ê 倒反彗尾。正爿是 球形星團 M5，tī 足遠 ê 所在。伊倚近咱 ê 時陣，咱猶毋知影這粒 冰球 是毋是會因為日光傷強 造成溫度變懸 煞破去。實際上，這粒彗星有活落來，而且變甲比夜空中 其他天星 閣較光，伊 ê 視星等 有到 -4.9。毋過真不幸，伊彼陣 離太陽傷近，所以 tùi 一寡臨時欲揣伊 ê 人來講，就較歹揣。紫金山-ATLAS 彗星 是毋是會變做 2024 年 上大粒 ê 彗星，愛看紲落來 欲來 ê 彗星 C/2024 S1 (ATLAS 彗星) tī 未來兩禮拜，是毋是會予人印象閣較深。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241021/ 影像：Brian Fulda 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241021.html Powered by Firstory Hosting
這六張是連紲六工 ê C/2023 A3 紫金山-ATLAS 彗星 tī 過去這一禮拜離開咱地球 ê 相片。這寡影像是 tī 美國加州 用仝一台 kha-mé-lah kah 鏡頭 tī 指定地點 kah 指定時間翕--ê。上正爿彼張是 10 月 12 翕--ê。這粒 ùi 遙遠 Oort 雲來 ê 人客 已經行到 kah 咱上倚 ê 地點矣，差不多是 7000 萬公里，按呢差不多是 4 光分遠。伊有足光 ê 彗鬚 kah 長長 ê 塗粉尾溜，離日頭足倚--ê，毋過 tī 西爿地平線方向猶是真好揣。紲落拉幾若工，這粒欲離開 ê 彗星沓沓仔 peh 到黃道頂懸，較倚北爿較暗 ê 夜空，開始 ùi 視野內底消失去。10 月 14 紫金山-ATLAS 彗星 行過地球軌道面，產生一條 倒反彗尾，向西爿地平線伸過去。10 月 17 日落 ê 時陣，彗星消失 tī 上倒爿 ê 夜空中，彼當陣伊 kah 地球 ê 距離是 7700 萬公里。希望你嘛認為 紫金山-ATLAS 彗星 是 2024 年上讚 ê 彗星。這粒彗星 ê 軌道週期，上開始算是 8 萬年，實際上 伊嘛有可能袂閣轉來內太陽系。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241019/ 影像：Xingyang Cai 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241019.html Powered by Firstory Hosting
10 月 14 已經真歹翕著 整個 C/2023 A3 紫金山-ATLAS 彗星 矣。這張是 tī 彗星離咱美麗地球上倚彼陣翕--ê，彼工暗頭仔 ê 天空景色 to̍h 是按呢。這是 kā 兩張長焦鏡頭翕 ê 相片組合起來--ê 影像，這是 tùi Arizona 州 Tucson 市 ê Gates Pass 向西爿看去 ê 景色，ùi 頂懸到下底差不多有 26 度闊。彼暗，逐彗星 ê 人甚至 會當認出 球形星團 M5 kah 週期彗星 13P Olbers 暗暗 ê 光。這粒彗星就 tī 紫金山-ATLAS 彗星 長長白白 ê 塗粉尾溜 內底彼粒足光 ê 彗鬚頂懸。因為地球拄經過彗星 ê 軌道面，所以 這个角度看著 ê 紫金山-ATLAS 彗星，有一條足顯目 ê 倒反彗尾。倒反彗尾是進前 ê 塗粉尾溜來--ê，ùi 太陽方向 tùi 彗星軌道方向 展開。你會當看著 彗鬚下底 尖尖 ê 彗尾，伸 tùi 西方敧敧曲曲 ê 地平線去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241018/ 影像：Adam Block 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241018.html Powered by Firstory Hosting
NASA ê Europa 快艇 這馬當咧飛去 地球以外 ê 海洋世界。這張相片是 火箭發射前一工 tī Kennedy 太空中心翕--ê。大隻太空船去予櫼入去獵鷹號重型火箭上頂懸 ê 保護蓋內底。Europa 快艇 ê 星際旅行會先飛去火星，才閣飛轉來地球。紲落來會 利用引力來協助調整軌道，通予伊 tī 2030 年 4 月 ê 時陣飛入去踅 木星 ê 軌道。等伊開始踅木星了後，太空船就會飛過 木衛二 Europa 49 擺，探索這粒有全球地下海洋、通支持性命發展 ê 衛星。相片背景 tī 火箭邊仔 ê 是 紫金山-ATLAS 彗星，這工是彗星離地球上倚 ê 隔轉工。這粒目睭看會著 ê 彗星，是目前夜空中逐家上愛 ê 天體，伊是 ùi 遙遠 ê Oort 雲 來 ê 人客。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241017/ 影像：Ben Cooper (Launch Photography) 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241017.html Powered by Firstory Hosting
有當時仔，規个夜空是媠甲予人料想袂到。這張相片是 頂禮拜 一工暗暝 翕--ê 紐西蘭 南島 ê Lindis Pass ê 夜空。Kah 平常時 恬靜、天星滿滿 ê 夜空無仝，這暗 ê 夜空是足無閒、足鬧熱--ê。會忽然間出現 四界攏有 ê 紅色極光、青色 ê 欄杆形極光、紅色 ê 穩定極光紅弧 (SAR 弧)、STEVE 極光、流星、kah 月娘。In 比咱 銀河系 中心較光，嘛比銀河系 ê 兩粒衛星星系 LMC kah SMC 較光。所有你看著 ê 攏是 tī 5 分鐘內翕--ê 28 改感光相片，才合成這張全景圖。頂禮拜，太陽日冕物質噴射 (CME) 向地球方向噴足濟粒子，結果就是 極光 kā 足濟所在 ê 夜空 照甲足光--ê。本底若是離開地球南北極較遠 ê 低緯度 天頂，應該是看無啥有極光，結果咱煞看著彩色 ê 極光。講較詳細咧，這個月 ê 夜空猶有其他驚喜，毋但有極光，閣會有彗星。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241016/ 影像：Tristian McDonald 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241016.html Powered by Firstory Hosting
紫金山-ATLAS 彗星 ê 彗尾 會變甲偌光？偌特別？這粒彗星 幾若禮拜前 才拄經過 伊 kah 太陽 上倚 ê 時期，三工前才拄經過伊 kah 地球上倚 ê 時期。C/2023 A3 (紫金山-ATLAS 彗星) tī 過去幾若工，變做是這世紀 上光 ê 彗星 之一。毋過真不幸，伊 kah 咱 ê 日頭行傷倚，結果煞真歹看著。這粒 彗星 欲離開太陽 ê 時陣，伊會變甲 足引人注意，毋過嘛有可能會隨變暗去。這支動畫 有展示 ùi 地球看著 ê 彗尾是按怎形成--ê？而且嘛有預測伊會按怎發展。影片 kā 咱講，本來 kah 彗星仝方向 ê 塗粉尾溜，較重 ê 部份 已經開始 變到 倒反爿 去矣。較輕 ê 部份 猶是 kah 離子尾溜 仝爿。離子尾溜 是去予 太陽風 kā 捒出來--ê，就是藍色彼條尾溜。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20241015/ 影像：Nico Lefaudeux 音樂：P!SCO - 鼎鼎 聲優：阿錕 翻譯：An-Li Tsai (NSYSU) 原文：https://apod.nasa.gov/apod/ap241015.html Powered by Firstory Hosting
Comments
Top Podcasts
The Best New Comedy Podcast Right Now – June 2024The Best News Podcast Right Now – June 2024The Best New Business Podcast Right Now – June 2024The Best New Sports Podcast Right Now – June 2024The Best New True Crime Podcast Right Now – June 2024The Best New Joe Rogan Experience Podcast Right Now – June 20The Best New Dan Bongino Show Podcast Right Now – June 20The Best New Mark Levin Podcast – June 2024
Download from Google Play
Download from App Store
United States