Profil

Da giuven ha Vincenzo Galati bandunà San Vito per sa render a Milaun. Là nua che blers vischins da San Vito e la Calabria eran sa chasads per tschertgar lavur e fortuna. 1979 ha el visità l'emprima giada la Surselva. Ses giavisch era da turnar e lavurar en Surselva. Quai ha el lura fatg il 1982.

Suenter in temp intensiv, ha la Samedrina decis da trair il frain e demissiunar ses job tar PlusSport. Uss è ella averta per insatge nov en sia vita professiunala. Suenter in temp intensiv ha la Samedrina decis da trair il frain e demissiunar ses job tar PlusSport. Uss è ella averta per insatge nov. Sia abitaziun a Lucerna ha gì ils ultims onns bunamain be la funcziun da basa per midar valischs. Olivia Stoffel è numnadamain stada adina en viadi, dad in’occurrenza sportiva a l’autra. Ses ultim engaschament professiunal tar l’organisaziun PlusSport (sportistas e sportists cun in impediment) ha la Samedrina demissiunà per la fin da l’onn passà. Quai suenter esser stada tranter auter engaschada sco scheffa da sport e suppleanta dal schef da missiun als paralimpics a Paris. Quels han gì lieu suenter ils gieus olimpics e la delegaziun svizra è turnada cun 21 medaglias da la Frantscha. Nov onn, nova vita Entant ha Olivia Stoffel er midà sia dimora da Lucerna a Samedan en Engiadina. La dunna da 43 onns vul uss sa laschar temp e giudair in pèr mais senza obligaziuns. Tuttina s’engascha ella er quest enviern en differents lieus en il rom d’occurrenzas sportivas. Durant la lavu da la Cuppa mundiala da skis a San Murezzan il 2015, è Olivia Stoffel er vegnida en lavina. «Quel mument che la lavina vegn, n’has ti nagina schanza da far insumma insatge.» La dunna sportiva è vegnida salvada suenter 12 minutas or da las massas da naiv da bun trais meters autezza. Per gronda fortuna senza blessuras. Anc oz sa regorda Olivia Stoffel vi da la situaziun sco sch’ella fiss be gist stada. Dapi lura haja ella er fadia cun la stgiraglia e la quietezza. Carriera sportiva Gia fitg baud è la vita dad Olivia Stoffel sa sviluppada en la direcziun dal sport. Sco talent da golf ha ella cumenzà la scola sportiva a Tavau. Causa feridas ha ella dentant stuì capitular e finir il gimnasi en Engiadina. Empè dad ir a studegiar suenter ha la figlia d’hoteliers dalunga cumenzà a lavurar per occurrenzas sportivas sper sia lavur professiunala en banca e tar assicuranzas. Averta per novas vias Suenter vacanzas en l’Asia ed in viadi cun ses bus en Scandinavia per vesair il final dals champiunadis da hockey a Stockholm n’ha Olivia Stoffel anc nagins plans concrets. Ella possia dentant s’imaginar bain da lavurar durant ina stad sin ina chamona.

Cun anarchia e caos datti moviment. Insatgi sa grittenta, in uvestg sto s’occupar cun il tema, sto dumandar Roma perquai ch’el è surdumandà.

Sco uffant vendeva Claude-Curdin Paschoud M&M’s en il stadion durant la Cuppa Spengler. Pli tard ha el lura pudì realisar ses siemi d’era pudair giugar per il HCD en quest turnier da chasa. Ma Claude-Curdin Paschoud ha er emprendì d’enconuscher l’autra vart da la medaglia. Il 2018 ha el survegnì in puck en in’ureglia e gì ina tal greva squassada dal tscharvè ch’el n’ha durant plirs onns strusch betg pudì dar hockey. Oz è Paschoud defensur tar ils SCL Tigers a Langnau ed è ventiraivel ch’el po cuntinuar sia carriera.

Suenter esser stà 14 onns CEO da las pendicularas Zermatt SA va Markus Hasler la fin da l’onn en pensiun. «Jau sun quel da cifras e quel che tschertga il contact cun ils collavuraturs e las collavuraturas» – quai èn stads dus da ses credos sco schef da passa 300 emploiads ed emploiadas. Esser CEO d’ina interpresa che tutga a quels da Zermatt, cun tut ils clans indigens, saja stà tut auter che simpel. Quai di Markus Hasler ch’è ussa cuntent da pudair surdar quest satgados da responsabladads a ses successur. Co ch’el guarda enavos sin quest temp en la «Champions League» da las pendicularas e tge plans ch’el ha per il futur tradescha l’um da 65 onns che ha stuì sa decider tranter politica e pendicularas en il Profil.

«Nus avain lavurà fitg bler, nus avain ris fitg bler ed igl è stà in bel temp, ma ussa m’allegr jau sin la nova fasa da la vita», di Fritz Wyss. Il team da la mazlaria Wyss a Trun va en il spurt final. Ils 31 da december serran Fritz Wyss e sia dunna Andrea la butia e la producziun da spezialitads. «Igl è bun che nus avain ussa bler da far, uschia n’avain nus betg temp da ponderar tge ch'ans spetga», di Fritz Wyss, spezialist da products da charn. L’istorgia da la mazlaria Wyss a Trun ha cumenzà avant 70 onns cura che Fritz Wyss senior e sia giuvna famiglia han bandunà il chantun da Lucerna per fundar lur interpresa da mazlaria a Trun. La mazlaria Wyss era en cumplaina fluriziun, cura che Fritz junior è naschì. L’uffanza ha Fritz Wyss passentà a Trun. Ils onns d’adolescenza han manà il giuven en il gimnasi a Mustér e lura en Svizra franzosa. L’emprendissadi ha Fritz Wyss fatg a Sursee. Da mattatsch schevia el: «Jau fatsch tut, ma jau na davent mai mazler». Tge ha midà opiniun dal Fritz da lezza giada da tuttina entrar en la branscha da producziun da charn? Tge svilup, crisas e success ha el fatg tras sco interprendider en la branscha da charn durant ils davos 45 onns e pertge n’èsi betg stà pussaivel da chattar ina successiun per la mazlaria da tradiziun? Dals onns sco interprendider, ma era da sia passiun per sia famiglia e per la musica ans raquinta Fritz Wyss da Trun en l’emissiun «Profil» da sonda, ils 14 da december.

Daniel Camenisch è in spezialist da communicaziun e spezialmain la communicaziun da risico e da crisa. Daniel Camenisch è in spezialist da communicaziun. Spezialmain la communicaziun da risico e da crisa fatschenta l’um ch’è creschì si a Mathon en Val Schons adina puspè. Per il chantun è el l’incumbensà per la communicaziun da crisa. Durant il temp da corona ha el ramassà emprimas experientschas – quai ch’è stà planisà per in pèr paucas emnas è la fin finala stà in mandat da trais onns. Il 2024 è stà per il Sutsilvan cun atgna agentura in onn tut spezial. El è stà il manader general dal project da las festivitads 500 onns Stadi liber da las Trais Lias. Per festivar ses 40avel anniversari n’è uschia restà nagin temp. En il «Profil» raquinta Daniel Camenisch da sia emprima crisa sco emprendist da mecanist d’autos ch’el ha stuì interrumper causa in accident e da ses engaschament per la cuminanza per exempel en divers comités d’organisaziun u sco cumandant da la protecziun civila Viamala.

L’affarist da Zuoz ha investì bler en ses affar da decoraziun e seller e negligì sur onns da tgirar relaziuns cun amis e famiglia. En sasez fiss Victor Rufinatscha gia da ditg pensiunà. Dentant lavura el anc adina e maina sia atgna galaria d’art e d’antiquitads vi da la Maistra a Zuoz. En l’ufficina lavura l’um da 74 onns ultra da quai mintgadi sco enramader da maletgs. Emprendì da far quai haja el a Cuira durant quels dis che ses emprendists eran a scola. Giacomettis e Carigiets En sia galaria La Laterna Talvo a Zuoz ha Victor Rufinatscha exponì da tutta sorts maletgs d’artists enconuschents e differentas classas da pretschs. La valur da tut quai che sa chatta en sia galaria, na possia el betg quantifitgar exacant, dentant sa tractia d'in import cun 6 nullas. Ses favurit sajan ovras dad Augusto Giacometti, ch’el avess gugent anc emprendì ad enconuscher persunalmain. En la vegliadetgna da 16 onns na saja l’interess per l’art dentant anc stada propi gronda, admetta Victor Rufinatscha. Ch'el haja emprendì successivamain, er durant aucziuns da maletgs, ad emprender ad enconuscher il mund da l'art. Reussì sco affarist indepent Emprendì ha Victor Rufinatscha seller a Zuoz, ina professiun ch’el haja amà fitg. La crisa d’ieli ils onns 1973 / 1974 aveva er influenzà ferm il martgà da lavur en Engiadina, uschè ch’il patrun da Victor Rufinatscha n’aveva betg pli avunda lavur. Per el sez saja quai dentant er stà in mument decisiv da ristgar da far il pass en l’independenza e fundar in agen affar da decoraziuns internas e tapezzader. Lavur, lavur.... Ch’el haja pudì profitar dals buns onns en il sectur da construcziun, agiunscha l’um vestì cun scharpa, chamischa alva e chautschas cotschnas. Dentant n’haja el betg dà avunda attenziun durant quel temp a tut quai enturn el, pia er l’amur, deplorescha’l. Oz viva el sulet a Madulain. Cun sia figlia adoptada ha Victor Rufinatscha pir puspè contact dapi intgins onns.

Marian Gort da Flem è ipnotisadra e trenadra mentala. Ella ha fatg bler en sia vita: educatura d’uffants pitschens, teleoperatrice e scolasta primara fin ch’ella ha chattà sia clamada. Dapi sis onns ha Marian Gort si’atgna pratica a Flem cun il num rumantsch «Temps per tei». Tar ella vegnan persunas cun problems: temas, conflicts da relaziuns, da quels che vulan chalar da fimar u prender giu. Però era persunas che na sa sentan betg segiras da sasezzas u ch’han traumas. L' ipnotisadra va en il subconscient, en las emoziuns. Il trenament mental stoppian ins exercitar, quel dovria pli ditg, di Marian Gort en il «Profil». Cun quai ch’ella fa ussa saja ella pli datiers da sasezza. Sco trenadra mentala ed ipnotisadra survegnia ella fitg bler da la glieud, malgrà che lezza vegnia tar ella cun problems.

Cun set onns ha Simon Zurfluh, oriund da Castrisch, cumenzà a far karate en il dojo a Glion, suenter l’emprima lecziun èsi stà cler, quai èsi.

Cun 33 onns è Alois Bearth da Curaglia suandà ses siemi da viagiar tras l'America latina. El è viagià trais giadas per plirs mais en Columbia. La quarta giada è el restà 13 onns. El ha avert là ina scrinaria cun sia partenaria Belsy Castaño. Nov onns han els gì success cun lur interpresa. L'onn passà è il «Medelin da Medellin» dentant returnà a chasa a Curaglia en Val Medel cun sia dunna Belsy. Pertge turnar en patria sche tut gieva bain en Coumbia? Davart experientschas, sfidas ed ils blers plaschairs che Alois Bearth ha vivì en sia secunda patria, la Columbia, ans raquinta l'um da 50 onns en il «Profil» da RTR.

Zoë Schurter è scolasta, inschigniera da lambient, pedagoga da museum. mumma giast dal Profil.  Daco sa noda glatsch en l'aua e tge succeda precis sch'ins metta sal sisur? Pertge udin nus trasora insatge, sche gea ch'igl è tut ruassaivel enturn nus? Ha la glisch ina colur? E sche gie, tgenina? Daco vesain nus insumma colurs? E datti in spray da buna luna? Dumondas senza fin, precis talas dumondas fatschentan adina puspè la scolasta, inschignera da l'ambient e pedagoga da museum, Zoë Schurter (44). Pertge che sia gronda passiun nè betg sco tar ses frar Nino dad ir cun mountainbike, mabain da dar vinavant savida a moda creativa per fascinar giuven e vegl per las pli differentas tematicas. En il «Profil» raquinta la mamma da trais uffants, oriunda da Tersnaus, da sia lavur sco pedagoga en il Museum retic, da ses engaschi instancabel per intermediar a moda attractiva ils pli divers cuntegns a grond e pitschen e da sia relaziun cun Nino, ses frar pitschen.

Avant in onn è il pilot da helicopter crudà giu durant in sgol da transport en l'Italia ed ha survivì quest accident be per pauc.  El ha spendrà e salvà bleras vitas en sia carriera da 40 onns sco pilot da helicopter, «l'anghel da Schlans», sco ch'el vegn era numnà dapi las malauras dal 2002. Savens saja el ì al limit per gidar, di l'um da 66 onns. Dal sgol fatal d'avant in onn na saja quai però betg stà uschia. Da ses accident, dal grev temp da guariziun en clinicas ed ospitals e cunzunt da sias strategias per puspè vegnir en il vair senn dal pled puspè en pe raquinta el en il Profil.

La cuschina – quai è ses mund. Suenter ses emprendissadi da cuschinier a Flem ha Martin Sialm lavurà durant pliras stagiuns en differents lieus da Lai fin a Crans-Montana.  Durant quest temp è el dentant er adina puspè turnà a Mustér per sa gidar en lHotel Alpsu chel ha lura surpiglià, ensemen cun sia dunna, dals geniturs la fin dal 1995, e quai en quarta generaziun. Dapi indesch onns è el schefcuschinier en lARGO a Glion, la fundaziun grischuna per lavuratoris e dimoras per persunas cun impediments. En la cuschina da lARGO a Glion survegn Martin Sialm sustegn din segund cuschinier sco er da tschintg persunas cun impediments. Di per di cuschinan els en media 150 fin 180 gentars, quai betg mo per las cussadentas ed ils cussadents, mabain er per persunas externas sco er per diversas scolas da la regiun. Sper il cuschinar tutga tar la lavur da Martin Sialm er dorganisar, planisar e controllar. Cun strusch 30 onns ha Martin Sialm surpiglià lHotel Alpsu a Mustér dals geniturs che han manà lhotel passa 20 onns. El enconuscheva bain quest manaschi, uschia che quai na saja stà nagin problem. Ensemen cun sia dunna ha el manà lHotel Alpsu fin il 2010, avant che vender tut a la sora Annalisa chha manà 20 onns la Pizzeria Surselva gist da lautra vart da la via. Martin e sia dunna, in team chha collavurà fitg bain. Martin en cuschina, Stephanie en il restaurant ed en il biro. Durant quest temp èn els er vegnids «campiuns mundials da capuns». Cun la tratga da capuns han cumenzà gia ils geniturs e gia da lezzas uras han ils capuns cuntanschì in status da cult en lHotel Alpsu. Sper la lavur en cuschina giauda Martin Sialm cunzunt ses hobis en la natira. Dasper il dar golf chel fa gia dapi prest 30 onns ha el cumenzà avant dus onns dad ir a pestga. E gia dapi ses emprendissadi va el cun velo. Er il viadi a la lavur da Panaduz a Glion fa Martin Sialm, sche laura lubescha, adina cun il velo. Prest milli giadas ha el gia fatg quest viadi tras la Ruinaulta.

Marcel Köhle è stà plevon catolic. Ils 15 da fanadur 2018 ha el annunzià sia demissiun. Il motiv: l'amur tar ina dunna. Sco plevon è Marcel Köhle s'inscuntrà cun ina dunna. In grond ristg. La finala è el sa decidì da vegnir plevon catolic e da viver en il celibat. Quai sajan stads grevs muments, di Marcel Köhle en il «Profil» da RTR. I saja stà in cumbat da stuair decider tranter la baselgia e sia partenaria.

Co èsi da sa muventar tranter las linguas? Pirmin Bundi (36) sa co che quai è. El ha geniturs da la Surselva, è creschì si a Turitg, veva oz cun sia dunna ed il figl Laurin a Berna, lavura dentant en Svizra franzosa nua ch'el è professer a l'Universitad da Losanna. En l'emissiun «Profil» raquinta Pirmin Bundi da la sfida da navigar tranter las differentas culturas linguisticas, da clients che n'èn betg adina cuntents cun ils resultats da sias retschertgas e sia passiun per lamerican football, nua ch'el ha las hottas enta maun.

Franz Huber è atgnamain inschignier da maschinas. Suenter la Scola politecnica ETH ha el lavurà divers onns en firmas ed adina è carbon stà il material ch'ha accumpagnà el. L'entschatta 2023 ha el midà cumplettamain sia vita professiunala. El ha cumprà in affar da velos, maina quel uss ed è schef da dus emploiads – il carbon, quel dals velos, è restà. En il Profil raquinta el da quella midada radicala, ch'è gnanc uschè radicala sco tgi para e tuttina ha il surmiran e bab da famiglia sutvalità insatge. Cun lavurar independentamain è il temp liber per seser sez sin in velo ì a perder in pau – era perquai ch'el ha avant curt surpiglià in segund affar da velos.

La directura da las agenturas da la Banca chantunala en Engiadina Bassa, Val Müstair e Samignun di chella dovria raubas concretas e calculablas en sia vita. La vita professiunala ha Cilgia Rest passentà per gronda part tar la medema patruna da lavur. Dapi 24 onns lavura la dunna oriunda da Susch tar la Banca Chantunala Grischuna, dapi tschintg onns en la funcziun da directura da las agenturas en Engiadina Bassa, Val Müstair e Samignun. Il contact direct cun la clientella la stettia anc adina ferm a cor. Era schi dettia mintgatant situaziuns betg agreablas, per exempel sche la banca sto dar ina resposta negativa ad ina dumonda per in credit. «Dir na nè mai bel, ma fa mintgatant da basegn». Tschintg onns ha Cilgia Rest fatg ina pausa dal mund da banca. In da quels ha ella nizzegià per far in viadi enturn il mund. Cura che la dunna da 49 onns è turnada en Engiadina, ha ella manà durant dus onns in hotel a Zernez. Ella è però vegnida a la conclusiun chil mund da finanzas saja tuttina sia gronda passiun, uschia chella è puspè turnada sin banca. Recreaziun chatta Cilgia Rest lenviern faschond sport da naiv e la stad en ses iert.

El è quel dal chant, dal teater, da l'istorgia locala, dal sport, da las uniuns. Ma il pli fitg stat il rumantsch a cor ad Erwin Ardüser. Il rumantsch ha era da far cun ses interess per la cultura e cun sia vita professiunala.  31 onns ha Erwin Ardüser da Laax lavurà en las pli differentas funcziuns per RTR. Avant in pèr mais è el ì en pensiun anticipada.

Sco buob vuleva el be giugar ballape. Oz è il Sursilvan da 42 onns CEO dad in'assicuranza en Spagna. Sia vita è marcada da midadas, sfidas, aventuras e bler'ambiziun. Sco mecanist d'autos è el sa lavurà si enfin tar il CEO. El ha studegià a las pli differentas universitads, da Stanford enfin a la HSG a Son Gagl. Tut il mund da l'economia na fiss dentant nagut senza il sustegn da sia dunna e famiglia. «Jau sun in tip da famiglia, per mai èn emoziuns essenzialas», di el. Dapi passa sis onns viva el cun sia dunna e las trais figlias a Sevilla e taidla là Radio RTR.