DiscoverRadioarchiv
Radioarchiv
Claim Ownership

Radioarchiv

Author: Radiotelevisiun Svizra Rumantscha (RTR)

Subscribed: 3Played: 12
Share

Description

Ils archivs dal Radio Rumantsch èn voluminus e cuntegnan bleras emissiuns d’antruras. Ina giada l'emna avain nus avert noss archiv per noss public. Dapi il favrer 2016 chattais Vus ivettas ord l'archiv en la rubrica "Fundus" sin rtr.ch
14 Episodes
Reverse
Avant 30 onns era il poet ed autur sursilvan Theo Candinas vegnì purtretà en il radio. Quai cun dumondas persunalas sco era cun exempels ord sia litteratura. La morala dubla era in tema, lura ils dus pols dal negativ e positiv. Plinavant eran vegnids tematisads ils spierts existents e nunexistents e las autoritads d'antruras en ina societad stretga da noss vitgs e nossas vischnancas. Vistas interessantas e provocantas da Theo Candinas ch'è vegnì enconuschent da sias uras ad ina vasta populaziun cun il cudesch cun las «Historias da Gion Barlac». El che vegniva numnà da pitschen «il Dosi dalla tatta». Redacziun: Flavio Huonder
L'Uniun per la litteratura rumantscha, che nagin auter che Tista Murk ha fundà, po festivar quest onn 70 onns. Tge è in bun text rumantsch? Tgi dastga daventar commember da l'uniun per la litteratura rumantscha? Tgi valitescha ils texts? Da quellas ed autras dumondas aveva il Radio Rumantsch tematisà avant 30 onns en in'emissiun. En il focus era stà l'Uniun per la litteratura rumantscha che po festivar quest onn 70 onns. Oriundamain era l'uniun vegnida fundada sin iniziativa da Tista Murk per l'avischinaziun da scripturs e scripturas da Müstair a Mustér. Redacziun: Flavio Huonder
Oriundamain vulevan las Ovras Electricas da Turitg construir in mir da fermada a Rona. Ma las relaziuns geologicas eran main adattadas. Uschia ch'il mir da fermada è vegnì bajegià a Murmarera. Il contract tranter la vischnanca e l'EWZ è vegnì suttascrit il 1948. 6 onns pli tard è la vischnanca vegnida messa sut aua. Bonifaci Plaz aveva realisà il 1951 in'emissiun da radio sur da la cultura, l'idiom rumantsch e la folcloristica d'antruras a Murmarera. Plinavant aveva el laschà explitgar ils plans da metter l'entira vischnanca sut aua. In document radiofonic istoric d'avant 65 onns. Redacziun: Flavio Huonder
In dals gronds chavacristals dals davos decennis po festivar quest onn ses 85avel anniversari: Giusep Venzin da Fuorns sisum la Val Medel. Sia professiun principala era atgnamain il far il pur. Sia passiun dentant il chavar cristals. Ses siemi era quel dad avrir in museum da cristals en Val Medel, sco el aveva raquintà en in'emissiun da radio il 1985. In siemi che n'ha mai pudì ir en vigur. Ma ses museum persunal cun ina vitrina a chasa en stiva admira Giusep Venzin era anc oz di per di. Redacziun: Flavio Huonder
Ils onns 80 dal davos tschientaner vegnivi discurrì da la muria dal guaud e da plievgias aschas. La polluziun da l'ambient e la destrucziun da la natira eran gronds temas medials. Blers manegiavan che la fin dal mund saja baud arrivada. Ina apocalipsa chaschunada dal carstgaun uschè da dir. In chemicher, in fisicher, in astrolog ed in spiritual avevan dà pled e fatg il 1990 en in'emissiun dal Radio Rumantsch davart l'apocalipsa. Redacziun: Flavio Huonder
Il scriptur e poet sursilvan Gion Deplazes ha bandunà il terrester avant 2 mais en la vegliadetgna da 97 onns. «Forsa ch'il vinars d'ansauna quotidian ha gidau mei da vegnir aschi vegls», veva el ditg avant paucs onns. Il Radioarchiv dal Radio Rumantsch lai vegnir a pled l'um da Surrein en in'emissiun dal 1987. Redacziun: Flavio Huonder
Il 1990 aveva il suveran grischun laschà ir da la glatscha giu l'iniziativa populara «Naiv senza chanuns». Circuls per la protecziun da l'ambient, politichers da la sanestra e politicras verdas vulevan limitar fermamain il far naiv a moda artifiziala en ils territoris da skis. Ord la vista retrospectiva in quart tschientaner pli tard ina chaussa nunchapibla. Strusch pli in territori da skis en il Grischun po desister sin l'agid da la naiv ord il chanun. Redacziun: Flavio Huonder
Il santeri da Lantsch è anc oz in santeri mo cun cruschs da fier. Ils usits da bara e sin santeri eran fitg differents antruras. Per exempel vegnivi mess cudeschs religius en il vaschè. Il rusari e l'oraziun per il moribund vegniva fatg durant l'entira notg senza fin. Ils parents stuevan plinavant metter a disposiziun in bloc paintg culà. E per ils nuncartents existiva in santeri per ils pajauns. In'emissiun dal RR dal 1990 aveva resumà ils differents usits da bara en noss chantun. Redacziun: Flavio Huonder
Ils babs d'ozendi

Ils babs d'ozendi

2015-11-1054:11

Il bab va a lavurar, la mamma fa il tegnairchasa. Quai è il model tradiziunal da famiglia. Il 1990 aveva il Radio Rumantsch discurrì cun 4 babs da famiglias che vivevan sper la norma. In bab era spartì. In bab era malsaun è stueva far sfurzadamain il chasarin. In auter era vegnì bab senza vulair. Ed il quart aveva ina trista sort: sia dunna era morta cura ch'ils uffants eran anc pitschens. Tuts quatter umens avevan raquintà co che lur vitas da bab eran sa midada per els. Redacziun: Flavio Huonder
Dapi 25 onns pelegrineschan scrivents e scriventas rumantschas onn per onn a Domat, als dis da litteratura. Quai che sa chapescha ozendi da sa sez, quai era in novum il 1990. L'ura eran vegnids organisads ils emprims dis da litteratura a Domat. Tranter auter cun ils auturs Clo Duri Bezzola, Felix Giger e Flurin Spescha. Era la Lia Rumantscha era stada da la partida cun l'anteriur secretari general Bernard Cathomas. Il Radio Rumantsch era ì suenter a la dumonda: Tge faschevan ils scrivents e las scriventas avant 25 onns a Domat? E tge fan els ils proxims dis a Domat? Era quella dumonda vegn sclerida. Redacziun: Flavio Huonder
Sontgs datti blers, surtut en la baselgia catolica. Per exempel Sontg Antoni che lascha chattar las clavs persas per ina modesta premia. U Son Niclà che vegn ils 6 da december cun las nuschs spagnolas. E lura ils nums da vischnancas sco San Murezzan u Val Sontg Pieder. Ma era mintga carstgaun sa esser sontgs, quai aveva in spiritual pretendì en in'emissiun dal Radio Rumantsch avant 25 onns. Linard Bardill aveva manegià che mintga uman stoppia chattar sez sia sontgadad. Redacziun: Flavio Huonder
L'usit da «trer schibettas» exista gia dapi decennis a Danis/Tavanasa e Dardin. Tge mat ha la pli bella? Quel survegn era las pli bunas patlaunas cun groma da las mattauns. Pader Flurin Maissen aveva realisà antruras ina reportascha sur dal trair rudellas. Davent da l'organisar ogna e collers per las rudellas, rimnar laina per ils fieus fin la saira cura ch'i gieva lura per propi cun il punct final da pudair mangiar patlaunas cun groma tar las mattas e mattauns. Redacziun: Flavio Huonder
Durant 23 onns ha il cristiandemocrat Luregn Mathias Cavelty represchentà il Grischun a Berna. Il giurist oriund da Schluein ha battì per ina Svizra averta vers l'Europa ed il mund. Sco tipic represchentant da la democrazia cristiana è el s'engaschà per il consens ed il cumpromiss. Oriundamain da chasa tar la partida cristiansociala ha Cavelty era adina gì in'ureglia averta per chaussas socialas. Tranter auter ha el presidià il Padrinadi per las vischnancas muntagnardas ed è stà president da l'anteriura CRR, la Cuminanza rumantscha da radio e televisiun, oz SRG-R. In vegl ami da Luregn Mathias Cavelty, l'anteriur cusseglier guvernativ Aluis Maissen, raquinta insaquantas interessantas episodas da l'anteriur politicher da Schluein. Ed avant 10 onns aveva Luregn Mathias Cavelty dà sez pled è fatg sur da sia vita politica e privata. Redacziun: Flavio Huonder
Il tunnel per il sviament da Flem è vegnì avert il 2007. Responsabel per la construcziun dal tunnel ch'ha cuzzà passa 10 onns è stà Ciril Giger. Il capo-constructur aveva dà pled e fatg sur da la construcziun dal tunnel curt avant l'avertura. In grond problem era stà ch'ils miniers avevan tutgà en il tunnel ina avaina d'aua tar lur lavurs. Ciril Giger è mort questa stad per consequenza d'ina malsogna en la vegliadetgna da mo 51 onns. Redacziun: Flavio Huonder
Comments 
Download from Google Play
Download from App Store