Discover
pe'bIl

pe'bIl
Author: DeSDu'
Subscribed: 4Played: 95Subscribe
Share
© pe'bIl jabbI'ID All rights reserved
Description
DuvuQchugh tera' De' chu' 'ach DIvI' Hol moH Da'IjtaH DaneHbe'chugh vaj SoHvaD pup jabbI'IDvam!
Hoch Hogh potlhbogh De' chu' wImuch, tlhIngan Hol neH wIlo'taHvIS. gho'Ij!
pe'bIl: The Klingon Language News Podcast!
If you're obsessed with Terran news but don't want to listen to ugly Federation Standard, this will be the perfect show for you!
We broadcast important news updates at least once every week in Klingon only! Feel free to listen in!
Hoch Hogh potlhbogh De' chu' wImuch, tlhIngan Hol neH wIlo'taHvIS. gho'Ij!
pe'bIl: The Klingon Language News Podcast!
If you're obsessed with Terran news but don't want to listen to ugly Federation Standard, this will be the perfect show for you!
We broadcast important news updates at least once every week in Klingon only! Feel free to listen in!
19 Episodes
Reverse
peqIm! pe'bIl Da'IjtaH. DeSDu' 'oH pongwIj'e'. DaSjaj 'oH jajvam'e' 'ej DaHjaj qaS DIS cha' pagh cha' pagh jar jav jaj 13. bemI'jIDaq jIHtaH 'ej DaH tera' De' chu' vImuch.
tera' potlhqu'bogh De' chu':
-wa'Hu' ram Qang gheSqa'ta' po'lISqa' Qang, Andrjez Duda. qaStaHvIS latlh vagh DIS Qang ghaHtaH. 'ewrop 'ev tIng 'ev qum Ho'DoS, 'ewrop SepjIjQa' je naDHa'taH. lapta' lapbogh roghvaH SochmaH vatlhvI'. DIS 1989 cha'Hu' ram je qubbID QIv lapmeH mIw jeSwI' SubmaH.
-Jeanine Áñez, bolIvya' Qang, ngejpu' mIv'a' javtIm. Jair Bolsonaro—bIraSIw Qang, latlh 'amerI'qa' tIng chan tIng DevwI' je—ngejpu' mIv'a' javtIm Hu' puS neH 'e' maqlu'. «QaQlaw' DotlhwIj. jIHoSlaw'. jIwegh'eghtaHvIS jIvumtaH» jatlh Áñez, TwitterDaq HaSta ta labDI'.
-ghItlhjaj mu' tetlhDaj tutlhvo' nughmey Sar mawbogh mu' ghIm 'amerI'qa' 'ev chan 'ev SIQab'el yejHaD. cha'vatlh wejmaH jav mu' teq ja' yejHaD.
-'amerI'qa' SepjIjQa' Voice of America tum toy'bogh De' chu' ja'wI' novvaD vummeH chaw' chu' nobbe' 'e' nob tum ja' De' pegh ghajwI'pu'. De' chu' ja'wI' novvaD vummeH chaw' chu' nobQo' tumvam ja' je vu'wI''a'Daj, Michael Pack.
tlhIngan Hol jatlhwI' nugh De' chu''e':
-tugh Hov leng: choQ 'eS muchlu'. 'ej wejHa' mIllogh puS luleghlu'. bIHDaq pIqaD leghlu'. veng 'ay' tlhopDaq 'echlet tu'lu' 'ej 'oHDaq Qo'noSHom ghItlhlu'.
-Do'Ha' qaSpu'be' 'uSgheb qep. qIllu'be' net tul. mImlu' neH net tul. qabpaq, bo'DeghQInpat je, latlh 'Internet Daq lo'bogh tlhIngan Hol nugh je tIqImtaH. pa' De' potlh lI' wanI'vetlh qaSmoHwI'pu'.
-Do'Ha' IndianapolisDaq qaSbe' qep'a' cha'maH SochDIch. DISvam qaSmeH qep'a' 'Internet lo' tlhIngan Hol yejHaD mIv'a' javtImmo'. Hogh puS pIq neH qaS wanI'vetlh Dunqu'. bIjeS'a' SoH'e'?
bemI'jI muD Dotlh'e':
DaHjaj 'aqroS 206 SImyon gheH
rav 195 SImyon gheH
povam loQ jul lubot 'engmey. DungluQ jul lubotchoHchu' 'engmey 'ej wa'maH javvatlh rep tuDchoH 'ej SISchoH.
wa'leS 'aqroS 203 SImyon gheH
rav 193 SImyon gheH
wa'leS loQ jul lubot 'engmey.
ghItlhjaj wovqu' jul.
'ej loghjaj loQ jul lubot 'engmey.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
peqIm! pe'bIl Da'IjtaH. DeSDu' 'oH pongwIj'e'. buqjaj 'oH jajvam'e' 'ej DaHjaj qaS DIS cha' pagh cha' pagh jar jav jaj cha'. 'atlantaDaq jIHtaH 'ej DaH tera' De' chu' vImuch. tagha' De' chu' muchvam vImuchqa'mo' jIQuchqu'! qaStaHvIS wej jar jIDach, mIv'a' javtIm ghu'mo'.
tera' potlhqu'bogh De' chu':
-Dem'oqrat woQ ghom Qang DuH mojlaw'ta' Joe Biden. Qang DuH wIvmeH mIw potlh QapwI' ghaH 'ej naDlaw' woQ ghom'e'. jar wa'maH wa' 'amerI'qa' SepjIjQa' Qang, Donald Trump, qaD, lapDI' Sepvetlh lapwI'pu'. tugh cha'DIchDaj wIv net pIH. DIr qIj ghajbogh be' wIv ghaH luneHlaw' Dem'oqrat woQ ghom jeSwI'pu'. Biden luwIv DIr qIj ghajbogh ghotpu''e' lapDI' chaH 'e' woqlaH wIvvam 'e' luHar. wej cha'DIchDaj maq 'ach wIvlI' ja' beqDaj.
-jar vagh jaj cha'maH vagh George Floyd HoH Minneapolis ghan'Iq yaS, wanI'vam lubejtaHvIS wej latlh ghan'Iq yaSpu'. wanI'vam qon SaHwI'. 'InternetDaq wanI'vam muchbogh HaSta ta'e' labDI', potlh yIn qIj, latlh morghmeH ghom je vangmoH. roghvaHmey naQ je QeHmoH HaSta tavam. MinneapolisDaq morgh QeHwI'. ghIq 'amerI'qa' SepjIjQa'Daq Hoch vengDaq, vengHom HochHomDaq morghchoH QeHwI'. rut ralchoH 'op morghwI'pu'. rut ralchoH je ghan'Iq. meqvammo', 'op veng botlh luQIHqu'lu'. 'op vengDaq taHtaH morghmeH mIw 'a rIn HochHom. 'ach ngachmoHbejpu' HoHvam Do'Ha'. ghan'Iq ghajnISlu'bej'a'? qatlh QI' rur ghan'Iq? ruvna' lughajbej'a' DIr qIj ghajwI'pu'? lughajbejbe', ghorgh luHev?
-taHtaH mIv'a' javtIm chach. latlhpu' tIjun. juHlIj DamejnISbe'chugh, juHlIj yImejQo'. 'amerI'qa' SepjIjQa'Daq ropvam luSIQpu' cha''uy' cha'netlh wejSaD wejvatlh loSmaH Soch SIDpu'. Heghpu' wa'bIp wa'netlh wejSaD chorghvatlh cha'maH ropvammo'. latlh tIqel. latlh tIQan.
tlhIngan Hol jatlhwI' nugh De' chu''e':
-jaj Hut mu' chu' 'otHa'pu'bogh matlh much Lieven Litaer. tach 'oH mu'vam'e'. muchDajDaq yoy mu' rur ja' 'ach loQ pIm ja' je. tachDI' vay', Qot ghIq QotHa' 'ej DopDaj DopDaq QotchoH vay'vetlh. jIHmeH ngem yavDaq ghachchugh SuvwI' ghIq bartIqmey legh neHchugh, chaq tach. pagh chaq raSDaq nav tachmoH SuS. chaq tachDaq ravDaq tachlu', tlhoy HaH'eghlu'chugh! mu'vam chu' yItIv!
-Do'Ha' qaSpu'be' 'uSgheb qep. qIllu'be' net tul. mImlu' neH net tul. qabpaq, bo'DeghQInpat je, latlh 'Internet Daq lo'bogh tlhIngan Hol nugh je tIqImtaH. pa' De' potlh lI' wanI'vetlh qaSmoHwI'pu'.
-Do'Ha' IndianapolisDaq qaSbe' qep'a' cha'maH SochDIch. DISvam qaSmeH qep'a' 'Internet lo' tlhIngan Hol yejHaD mIv'a' javtImmo'. wa' waQ leS puS je qaS wanI'vetlh Dunqu'. bIjeS'a' SoH'e'?
'atlanta muD Dotlh'e':
DaHjaj 'aqroS 207 SImyon gheH
rav 198 SImyon gheH
povam loQ jul lubot 'engmey 'ach DungluQ jul botchoH pagh. ghIq pov paS loQ jul lubotqa' 'engmey.
wa'leS 'aqroS 208 SImyon gheH
&nbs
peqIm! pe'bIl Da'IjtaH. DeSDu' 'oH pongwIj'e'. DaSjaj 'oH jajvam'e' 'ej DaHjaj qaS DIS cha' pagh cha' pagh jar wej jaj wa'maH jav. 'atlantaDaq jIHtaH 'ej DaH tera' De' chu' vImuch.
tera' potlhqu'bogh De' chu':
-DaHjaj 'ewropDaq, 'amerI'qa'Daq je, 'aSya'Daq je juHchajDaq wegh'egh roghvaH Hoch 'e' poQ Sepmey law'. tera' HochDaq SIQwI' chu' ngejlaw'taH mIv'a' javtIm 'ej rop'a'na' moj rIntaH. juHchajDaq vumlI' vumwI' law'; yaHchajDaq vumlI' 'e' qa' 'ej Qapbe'taH DuSaQmey law'. Sepmey law'Daq Qap tachmey, HaSta muchpa'mey je, paq nojwI' qachmey je net tuch. vengmey law'Daq, Sepmey law'Daq, yoSmey law'Daq je qaS chach 'e' lumaq Daqmeyvetlh qummey.
bIrop chay' 'e' DaSov?
bIHIDqu' qoj bItujqu' qoj bItuSqu' qoj SoHvaD Qatlh tlhuHmeH mIw qoj 'oy'taH logh'oblIj qoj bImISqu'law'taH qoj SuDchoHlaw' wuSDu'lIj net jalchugh, chaq Dungejpu' mIv'a' javtIm. Dungejpu' mIv'a' javtIm (Covid-19), vaj Qel yIrI'. SIbI' ropyaH yIjaHQo', chaq bIropbe'mo'. Qel yIrI' 'ej ghaHvaD DotlhlIj yIDelchu'. Dura'laHchu'meH Qel QaH mIwvam 'ej Dungej rop'a' 'e' botlaH je, bIropbejbe'chugh.
bIropchugh, juHlIjDaq yIratlh 'ej latlhpu' tIHop'eghmoH. yIwegh'eghchu'!
bIropchugh, nuj velwI' yItuQ. bIropbe'chugh, vaj nuj velwI' yItuQQo'. QelvaD, ropwI'pu'vaD je yap nuj velwI' net poQ. nuj velwI'pu' ghajnIS wunwI' neH.
bItuSDI' qoj ghIchlIjvo' 'IqnaH DavujDI', nujlIj ghIchlIj je tISo'. mIwvamvaD 'IqnaH nav ru' yIlo' 'ej mep buq ngaSbogh veQ ngaSwI'Daq 'IqnaH navvetlh ru' yIwoD. ghIq ghopDu'lIj tISay'moH.
ghopDu'lIj DaSay'moHDI', tISay'qu'moHchu' qaStaHvIS 20 lupmey. Say'moHwI' tlhagh yIlo'. pagh Say'moHwI' tlhagh DaSuqlaHchugh, vaj ghop wojwI' yIlo'.
qablIj DaHot 'e' yIjun.
Hoch jaj Dochmey luHotlu'qu'bogh tISay'moH. ghantoH: jI'ev, raS, nItlh 'echlet, QumwI', puch je.
lupwI' mIr, muD Duj joq, ra'wI' lupwI' joq, latlh joq tIlIghQo'. tlhop tIghoSQo'. bIwegh'egh 'e' yInIDqu'.
latlh De' DaghojmeH CDC 'Internet Daq yISuch:
https://www.cdc.gov/coronavirus/2019-ncov/if-you-are-sick/steps-when-sick.html
tlhIngan Hol jatlhwI' nugh De' chu''e':
-jar loS vIraSDaq lIlDaq qaS 'uSgheb qep net nab 'ach mIv'a' javtImmo', qaS qepvam chu' DaH 'e' luSovbejbe' qaSmoHwI'pu'Daj. jar loS 'eq qepvam bopbogh De' chu' lumaq 'e' luHech. chaq jajmeyDaj luchoHlu'. qabpaq yISuch 'ej 'uSgheb qep yInej. Qapla'!
reH vIttlheghvam noy yIqawtaH: wa' Dol nIvDaq matay'DI', maQap. maboQchuqchugh 'ej maQumchuqchugh, vaj maQapbej. yImutQo'. latlh tIqel. DaH wa' Dol toy'nIS Hoch. chaq bIropchoHbe' SoH 'ej vabDot bIropchoHchugh, chaq bIHeghbe'laH. 'ach ropchoHchugh wunwI'pu', vaj HeghmeH ngeDbej. yIwegh'egh. nItebHa' wunwI' DIQanjaj.
'atlanta muD Dotlh'e':
DaHjaj 'aqroS 194 SImyon gheH</
yIqIm! pe'bIl Da'IjtaH. DeSDu' 'oH pongwIj'e'. ghItlhjaj 'oH jajvam'e' 'ej DaHjaj qaS DIS cha' pagh cha' pagh jar cha' jaj cha'maH jav. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
-'Italya'Daq loSSaD ghotpu' ngejpu' Covid-19. mIlanDaq, vene'toDaq je ropchoH SID HochHom. ropvam chu' SeHmeH mIw law' tur 'Italya' qum. DuSaQ, 'ampaS je, HaSta muchpa'mey je luQapHa'moHlu' 'ej nuv qevmoHbogh wanI'mey'e' luqIllu' net poQ.
-wa'Hu' ram charlIStonDaq ngachchuq Dem'oqrat woQ ghom Qang DuH. neva'Da Dem'oqrat woQ ghom Qang DuH wIvmeH mIw Qapta'mo' 'ej Dem'oqrat woQ ghom 'oSmeH mIw Qaplaw'lI', Bernie Sanders naDHa'qu' latlh wIvpu'. lojmItjaj qerolInya' tIng chan tIngDaq laplu'.
-barat monDaq Suvchuq HInDu' lalDan pabwI'pu', muHa'meD lalDan pabwI'pu' je. wej jaj qubbID wej veng 'ay' Qaw'pu' ralwI'pu' 'ej Heghpu' cha'maH nuvpu'. jaj wa' tagh may'Homvam, veng mejDI' 'amerI'qa' SepjIjQa' Qang. barat monvo' morghwI' ghIm ngugh 'e' lay' barat Qang, Narendra Modi. DaHjaj bIttaH vengan 'ach qaSlaw'taH rojHom.
tlhIngan Hol jatlhwI' nugh De' chu''e':
-jar loS vIraSDaq lIlDaq qaS 'uSgheb qep! jaj 23 jaj 25 je qubbID qaS qepvam Dun! qaStaHvIS qep Quj 'ej ghoj 'ej Hol laHchaj qeq 'e' luHech jeSwI'pu'. bIjeSmeH lIl Daleng DaneHchugh, vaj qabpaq yISuch 'ej 'uSgheb qep yInej. pagh mebpa'mey tutlh tu'lu' 'ach Café ItDaq qaSbej qepvam wanI'mey HochHom. Qapla'!
-qen tlhIngan Holqoq much mIllogh lut mIr Family Guy. jaj 23 tlhIngan Holqoq lujatlh cha' ghotpu' potlh: Peter, Lois je. vabDot chang Sa' cha'lu' je. tlhIngan HolvaD mu'tlheghmeychaj mughmeH Bing mughwI' lulo'law'pu' lut mIr chenmoHwI'pu'. nom bo'DeghQInpatDaq wanI'vam lurIchchoH tlhIngan Hol jatlhwI'pu' 'ej lut mIr chenmoHwI'pu' naDHa'choH, buDmo' 'ej tlhIngan Hol jatlhwI'vaD mughmeH Qu' nobbe'pu'mo' chaH. vabDot Family Guy lutvam ret naDHa'meH HaSta ta qonta' Quvar. DabejmeH wIvvam yInaw': https://www.youtube.com/watch?v=crjwHjDMouQ
SIqa'gho muD Dotlh'e':
DaHjaj 'aqroS 182 SImyon gheH
rav 176 SImyon gheH
peD 'ej jul tamghay lubot 'engmey Hurgh.
wa'leS 'aqroS 182 SImyon gheH
rav 175 SImyon gheH
loQ jul lubot 'engmey.
buqjaj loQ jul lubotqa' 'engmey 'ej lojmItjaj wovtaHbogh jul bot pagh.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. ghItlhjaj 'oH jajvam'e' 'ej DaHjaj qaS DIS cha' pagh cha' pagh jar cha' jaj wa'maH cha'. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
-wa' Hogh ret ram Heghpu' Kirk Douglas. wa'vatlh wej ben nuyorgh SepDaq boghpu'. qaStaHvIS vaghmaH jav DIS loSenjelISDaq ghet Douglas. DIS 1960 Spartacus HaSta muchvaD Spartacus ghet 'ej Michael Douglas vav ghaH. Hollywood «qol'om bov» ghetwI' Qav ghaHpu' Douglas'e'.
-povjaj ram nuHamSIr Dem'oqrat woQ ghom Qang DuH wIvmeH mIw Qapta' Bernie Sanders 'ach vatlhvI' puSmo' neH Qap. patlh cha'DIch baj Pete Buttigieg 'ej patlh wejDIch baj Amy Klobuchar.
-loSnetlh ghotpu' ngejpu' 'ej wa'SaD HoHpu' javtIm chu'. nom ropvam vor 'e' lunID QulwI'pu' 'ej SID chu' wegh 'e' nIDqu' jungwoq qum. 'op nuv moghmoH weghmeH mIw 'ej jajmey ret weghmeH mIw 'omchoH nuvvetlh.
tlhIngan Hol jatlhwI' nugh De' chu''e':
- jar loS vIraSDaq lIlDaq qaS 'uSgheb qep! jaj 22 jaj 25 je qubbID qaS qepvam Dun! qaStaHvIS qep Quj 'ej ghoj 'ej Hol laHchaj qeq 'e' luHech jeSwI'pu'. bIjeSmeH lIl Daleng DaneHchugh, vaj qabpaq yISuch 'ej 'uSgheb qep yInej. pagh mebpa'mey tutlh tu'lu' 'ach Médiathèque Jean LevyDaq qaSbej qepvam wanI'mey HochHom. Qapla'!
SIqa'gho muD Dotlh'e':
DaHjaj 'aqroS 184 SImyon gheH
rav 176.6 SImyon gheH
ram peDchoH 'ej qaStaHvIS ram Hoch peD 'e' mevbe'.
wa'leS 'aqroS 179 SImyon gheH
rav 166 SImyon gheH
peDtaH.
buqjaj wovqu' jul 'ej loQ tujqa'. lojmItjaj jul lubotqa' 'engmey.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. ghItlhjaj 'oH jajvam'e' 'ej DaHjaj qaS DIS cha' pagh cha' pagh jar cha' jaj vagh. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
- DaHjaj Trump Qang SughHa'be' 'e' wuq 'amerI'qa' SepjIjQa' yejquv HochHom. DaH rIn bo'DIj mIwvam potlhqu' 'ej latlh Soj qelqa' 'e' lunID 'oSwI'pu'.
-wej 'ayowaDaq rIn Qang DuH wIvmeH mIw. DaSjaj ram Hoch yoS wIv woqlaHbe' Dem'oqrat woQ ghom. wa'Hu' gher'ID SochmaH wa' vatlhvI' 'otHa' Dem'oqrat woQ ghom 'ach Hoch wIv 'angQo'. wej QapwI' ngu'lu' 'ach Qaplaw' Pete Buttigieg, Bernie Sanders ghap.
-'amerI'qa' SepjIjQa'Daq wa'vatlh cha'maH vagh ngevwI' QapHa'moH rIntaH Macy's malja'. wIvvam Do'Ha'mo' cha'SaD Qu' lughanglu'.
tlhIngan Hol jatlhwI' nugh De' chu''e':
-wa'maH wa'Hu' qaS lu'vIl qepHom. jeSpu' Soch nuvpu'. qaStaHvIS vagh rep ghomtaH 'ej ghojtaH 'ej nItebHa' jatlhtaH! Qapla'na' 'oHbej qepHomvam chu''e'!
SIqa'gho muD Dotlh'e':
DaHjaj 'aqroS 182 SImyon gheH
rav 180 SImyon gheH
peDtaH.
wa'leS 'aqroS 182 SImyon gheH
rav 180.5 SImyon gheH
peDtaH.
buqjaj, lojmItjaj je chal lubotqa'taH 'engmey. jaj wa' peDqa'.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. ghItlhjaj 'oH jajvam'e' 'ej DaHjaj qaS DIS cha' pagh cha' pagh jar wa' jaj cha'maH Hut. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
- Trump Qang HubmeH mIw luvan Trump chut qeSwI'. wej jaj qubbID Trump SughHa'meH mIw ghanroq naDHa' 'ej Trump SughHa'be'meH 'oSwI' quv tungHa' Trump chut qeSwI'. DaHjaj tagh ghelmeH mIw 'ej ghaytan nguHwI' QoymeH mIw lajmeH lap 'oSwI'pu'. nguHwI' lajQo' yejquv net jalchugh vaj ghaytan SIbI' Trump SughHa'meH lap yejquv. qaSchugh wanI'vetlh'e', vaj ghaytan 'amerI'qa' SepjIjQa' Qang SughHa'lu'be'.
-jaj wa' Heghpu' 'unwatmoQ QujwI' noy, Kobe Bryant. qaStaHvIS cha'maH DIS NBAvaD 'unwatmoQ Quj Bryant. qaStaHvIS poHvetlh, van'a', qaD mIr je Qapta' 'ej noyqu'choH. qaStaHvIS poHvetlh HochHom wa' beqvaD Quj: loSenjelIS Lakers. DIS 2003 ghaH wem Bryant 'e' pum mebpa'mey toy'wI' 'ej vaj cha' DIS qubbID Hub'eghnIStaH Kobe Bryant qaStaHvIS bo'DIj mIw. tagha' pum 'e' mev pumwI' 'ej nItebHa' SutlhchoH ghaH Bryant je. jaj wa' puypu' muD Duj lIghlI'bogh Bryant, puqbe'Daj, Soch latlhpu' je. wa'maH wej ben neH boghpu' Bryant puqbe', Gianna.
-jungwoqDaq nuv law' ngejchoH javtIm chu'. wej SIDpu''e' ngejpu'bogh javtImvam Huj vormeH Hergh 'oghlu'ta'. jungwoqDaq ghurtaH SID mI' 'ej latlh SepDaq narghpu' javtIm. 'amerI'qa' SepjIjQa'Daq vagh SIDpu' ngejlu'pu' 'e' woqlu'.
-jar 1 jaj 23 Hov leng lut mIr chu', pIqarD, labpu' CBS. Qatlaw'. tomat naHmey nonDaq lut mIrvam chu'vaD patlh pup SochmaH Soch vatlhvI' nob cha'maH wej chovwI'pu'.
tlhIngan Hol jatlhwI' nugh De' chu''e':
-wa'Hu' 'eSrIv lablu'. 'oHDaq chu'bogh mu' puS 'otHa' matlh. DaH naDev mu'meyvam chu' vImuch:
baStan Boston
bIQ notron waterfall
curtain, drape je 'oS notron 'ach portcullis, rurbogh lojmIt je 'oSlaH.
boSporoS Bosporus
ju'pIter
yIqIm! pe'bIl Da'IjtaH. DeSDu' 'oH pongwIj'e'. lojmItjaj 'oH jajvam'e' 'ej DaHjaj qaS DIS cha' pagh cha' pagh jar wa' jaj wa'maH chorgh. qebeq vengDaq jIHtaH 'ej DaH tera' De' chu' vImuch.
tera' potlhqu'bogh De' chu':
-jungwoqDaq nargh javtIm chu'. vaghmaH SID ngejlu'pu'bogh tu'lu' 'e' woq jungwoq qum 'ach wa'SaD Sochvatlh ghotpu' ngejpu' javtIm chu' 'e' luHar jungwoq 'en Qel law'. wuHanDaq tagh ropvam chu' 'ach tayya'Daq cha' nuv lungejlu'pu' 'ej nIponDaq wa' nuv ngejlu'pu' 'e' woqlu'. maleSya'Daq, SanvIranSISqoDaq je, HongqongDaq je leng pagh ghot'e' ngejpu'bogh javtImvam 'e' lu'olchoH muD Duj vergh HungpInpu'.
-loSmaH Hu' vIraSDaq morghchoH vumwI'pu', vumwI' DIb choH 'e' nabchoHmo' Sepvetlh qum. tugh rInbe'law'.
-loghjaj Trump SughHa'meH bo'DIj mIwvaD noHwI' yuDHa' gheS 'e' lu'Ip 'amerI'qa' SepjIjQa' yejquv 'oSwI'pu' 'e' qaSmoH 'amerI'qa' SepjIjQa' bo'DIjquv DevwI', John Roberts noHwI''a'. povjaj tagh meqba' 'e' nablu'.
-cha'maH wej ben meHghem 'angweDvo' Gustav Klimt nagh beQ, joH cha'bogh nagh beQ, nIHlu' 'ach qen tu'qa'. wa'wen 'Italya'Daq Ricci Oddi 'angweD reDvo' 'arDeH teqlI' wIjwI'Hom, lojmIt mach tu'pu'DI'. loQ poS lojmIt 'ej vaj nuD. 'oHDaq naghHey beQ ngaSbogh mep buq tu'lu' 'ej buqDaq 'oHlaw'taH nagh beQ'e' nIHlu'pu'bogh. SIbI' nagh beQ pojchoH meHghem quntej 'ej nagh beQ nIHlu'pu'bogh 'oHbej naghvam beQ nom 'e' luwoq. vaj nagh beQ nIHpu' 'Iv? qatlh? qatlh 'angweD reDDaq DeSwarHomDaq 'oH So'pu'? naghvam beQ ngevlaHbe', tlhoy noymo' ghaytan 'e' luthoj nIHwI'. joH cha'bogh nagh beQ nIHlu'pu' 'e' lulIj nuvpu' ghaytan 'e' loS HejwI' 'ach not wanI'vetlh lIjlu' vaj reDDaq ratlhtaH nagh beQ.
tlhIngan Hol jatlhwI' nugh De' chu''e':
-qaStaH 'eSrIv jav qaD. qaDvamvaD qID yIqon! 'ach tlhaQ meq taQ 'e' luHar tlhIngan not 'e' yIlIj!
qebeq veng muD Dotlh'e':
DaHjaj 'aqroS 169 SImyon gheH
rav 164 SImyon gheH
loQ jul lubot 'engmey 'ej SuS puS tu'lu' 'ej ramvam peDchoH.
wa'leS 'aqroS 174 SImyon gheH
rav 168 SImyon gheH
wa'leS pem peDtaH 'ach ram peDHa'.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. povjaj 'oH jajvam'e' 'ej DaHjaj qaS DIS cha' pagh cha' pagh jar wa' jaj wa'maH vagh. qebeq vengDaq jIHtaH 'ej DaH tera' De' chu' vImuch.
tera' potlhqu'bogh De' chu':
- yejquvvaD Trump Qang SughHa'meH ghItlh tutlh ngeH 'oSwI' yej. wa' Hogh pIq tagh yejquv bo'DIj mIw net pIH. ngugh Trump Qang SughHa'ghach laj pagh lajQo'. SughHa'ghach lajQo' yejquv SeHqu'bogh Republican woQ ghom 'e' pIH 'amerI'qa' SepjIjQa' woQ HaDwI' HochHom.
-raSya' che'meH pab choH'e' neHbogh Putin Qang ngeDmoHlaw'meH DaHjaj pajpu' raSya' DevwI' potlh Dojmey. Qang gheSmeH poH vuSHa' neHlaw' Putin Qang.
-'amerI'qa' SepjIjQa' che'meH ghItlh choH 'e' laj vIrjInya' yejquv, Equal Rights choH'a' lajta'DI'. be'pu'vaD DIb woq choH'a' lajchugh 'amerI'qa' SepjIjQa' Sepmey HochHom ja' choH'a' naDwI'pu' puS. DIS 1972 choH'a' lajpu' 'amerI'qa' SepjIjQa' yejquv 'ach DIS 1977 laj Sep ret, 'InDIyana. DIS 1982 choH'a' lajmeH poH nI'qa'moHpu' yejquv 'ach lajqa'be' latlh Sep, lajpa' vIrjInya'. choH'a' lajmeH poH naDqa'laH 'amerI'qa' SepjIjQa' yejquv ja' choH'a' naDwI'pu' 'ach Qoch ruv loH. 'amerI'qa' SepjIjQa' che'meH ghItlhvaD choH'a'vam ret chel ta loH 'e' lubot luneH wej Sepmey: 'alabama, luwISIyana, Daqo'ta tIng chan tIng je.
tlhIngan Hol jatlhwI' nugh De' chu''e':
-jarvam jaj cha'maH vagh DungluQ wa'maH Sochvatlh rep je qubbID qaS Louisville qepHom. jeS wejHa' 'e' luwoq loS jeSwI'. bIjeS 'e' DaHech'a'?
-jar loS jaj cha'maH wej jar loS jaj cha'maH vagh qubbID lIlDaq qaS 'uSgheb qep wa'DIch. bIjeSlaH'a'? latlh De' DaSuqmeH qabpaq yInaw'!
qebeq veng muD Dotlh'e':
DaHjaj 'aqroS 179 SImyon gheH
rav 175 SImyon gheH
jul lubot 'engmey qaStaHvIS jaj Hoch.
wa'leS 'aqroS 178 SImyon gheH
rav 164 SImyon gheH
wa'leS peD.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. jaj wa' 'oH jajvam'e' 'ej DaHjaj qaS DIS cha' pagh cha' pagh jar wa' jaj vagh. qebeq vengDaq jIHtaH 'ej DaH tera' De' chu' vImuch.
tera' potlhqu'bogh De' chu':
-buqjaj 'Ir'aq mon muD Duj vergh retlhDaq 'Ir'an potlh, Soleimani Sa', HoHta' 'amerI'qa' SepjIjQa' QI'. 'amerI'qa' SepjIjQa' waw', latlh Daq potlh HIvmeH mIw nab Soleimani Sa' 'e' pIHmo' 'amerI'qa' SepjIjQa' qum, HoH 'e' wuq Trump Qang. wIvvam QatHa' naDHa'meH wa'Hu', DaHjaj je 'Ir'aqDaq, 'Ir'anDaq je morgh cha' Sepmeyvetlh rewbe'pu'. DaHjaj ghom 'Ir'aq 'oSwI' yej 'ej Sepchajvo' 'amerI'qa' SepjIjQa' QaS ghIm 'e' wuq.
-me'toDIS QIStoS lalDan tlhach wav Har'eyngan bopbogh wIv'a'. me'toDIS chIrghmeyDaq tlhoghchuq Har'eyngan 'ej maqlegh moj Har'eyngan 'e' chaw' neH me'toDIS QIStoS lalDan tlhach pabwI' bID 'ej choHmeyvam lajQo' neH latlh bID. meqvammo', tugh chen cha' me'toDIS QIStoS lalDan tlhach; wa' qa'. Qatbe' wIvvam 'ach latlh moSmeH Ho'DoS jallaHbe'law' me'toDIS quppu'.
-SubHa'taH parIy chIrgh'a' 'ej DejlaHtaH ja' Jean-Louis Georgelin Sa'. jar loS chIrgh'a' tI'meH mIw pIn moj Georgelin Sa', chIrgh'a'Daq qul taghlu'pu'DI' 'ej Dejpu'DI' chalqachDaj lang. qaStaHvIS jav jarmeyvam ret chIrgh'a' toDmeH vumqu' tI'meH beq. 'ach QobbejtaH ghu'. parIy chIrgh'a' tlhoy' yorDaq pet baS qal'aq 'ej pumchugh vaj chaq Dej je tlhoy'. yepqu'taH tI'meH beq 'ej SuDbe'chu'.
tlhIngan Hol jatlhwI' nugh De' chu''e':
-jarvam jaj cha'maH DungluQ wa'maH Sochvatlh rep je qubbID qaS Louisville qepHom. jeS wejHa' 'e' luwoq loS jeSwI'. bIjeS 'e' DaHech'a'?
-DaHjaj 'eSrIv vagh lablu'! DalaD 'e' yIlIjQo'! javmaH tenwalDaq lut ngaj, ghuQ je, mIllogh 'IH je, qaD Daj je, no' Hol bopbogh ghItlh je much jarvam paqHom. 'eSrIv DalaDmeH Hol 'ampaS 'Internet Daq (hol.kag.org) yISuch. Hay-'ot-lay-DoD-kay-'at-gee-DoD-'ot-ray-gee.
qebeq veng muD Dotlh'e':
DaHjaj 'aqroS 177 gheH
rav 168 gheH
loQ jul lubot 'engmey 'ej SuS puS tu'lu'.
wa'leS 'aqroS 176 gheH
rav 173 gheH
wa'leS loQ jul lubottaH 'engmey 'ej ram peD.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. DaSjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH cha' jaj wejmaH. qebeq vengDaq jIHtaH 'ej DaH tera' De' chu' vImuch.
tera' potlhqu'bogh De' chu':
-wa'Hu' nuyorgh vengDaq maqlegh yID juH qachDaq vagh Hanu'qa lopwI' HIv taj Qachbogh loD. vagh nuv QIDta' loD 'ach nom ghaH qopta' ghan'Iq. Grafton E. Thomas 'oH HIvwI'Hey pong'e'. wejmaH Soch ben boghpu'. HIvwI'Hey De'wI' nuDDI' ghan'Iq, 'Internet tameyDajDaq yIDwI' muSmeH 'Internet Daq tu' 'ej QonoSDajDaq DujtlhuQ yID DIjpu' ja' je ghan'Iq 'oSwI'. Michael Sussman 'oH Thomas chut qeSwI' pong'e'. yIDwI'pu' muSbe' Thomas 'ej rop neH yabDaj ja' ghaH.
-marSal 'ambayDaq woj tlhuDbogh DI nuD tugh 'e' nID 'amerI'qa' SepjIjQa'. rav DIS 1946 'aqroS DIS 1958 marSal 'ambay mIrDaq HeySel jorwI''a' waH 'amerI'qa' SepjIjQa' QI'. rInDI' ngongchaj, wa' DaqDaq woj tlhuDbogh DI yIr 'ej mol. 'ach qen Sab tungyen yughbogh mol net tu'. Dejchugh DI velbogh tungyen moQbID, vaj bIQ'a'Daq nIjlaH woj.
-HanDI' rop SIQ John Lewis 'oSwI'. SochmaH Hut ben boghpu' 'amerI'qa' SepjIjQa' 'oSwI'vam 'ej qaStaHvIS yInDaj Hoch, tlhab DIbvaD vum. DIS 1987 'atlanta 'oSwI' gheS.
tlhIngan Hol jatlhwI' nugh De' chu''e':
-jar loS vIraSDaq lIlDaq qaS 'uSgheb qep 'e' yIlIjQo'! latlh De' DaghojmeH Apprenez le klingon qabpaq ghom yISuch.
-leS puS neH 'eSrIv vagh lablu'! DalaD 'e' yIlIjQo'! vaghmaH Hut tenwalDaq lut ngaj, ghuQ je, mIllogh 'IH je, qaD Daj je, no' Hol bopbogh ghItlh je much jarvam paqHom. 'eSrIv DalaDmeH Hol 'ampaS 'Internet Daq (hol.kag.org) yISuch. Hay-'ot-lay-DoD-kay-'at-gee-DoD-'ot-ray-gee.
SIqa'gho muD Dotlh'e':
DaHjaj 'aqroS 189 gheH
rav 179 gheH
chal Hoch lubot 'engmey 'ej SuS law' tu'lu'.
wa'leS 'aqroS 182 gheH
rav 178 gheH
wa'leS chal Hoch lubotqa' 'engmey 'ej ghaytan SuS law' tu'qa'lu'.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. DaSjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH cha' jaj Hut. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
-nu'SIylanDaq jor qulHuD. wanI'vammo' Heghpu' vagh nuv 'ej ropyaHDaq wejmaH wa' nuv luranglu'lI'. wej chorgh latlhpu' luSamlu'.
-ngormeH Hergh Hat lo'mo' raSya' 'ovwI'pu', loS DIS qubbID jeSlaHbe' raSya' beq qaStaHvIS 'olImpIya' Quj'a'mey 'e' maq WADA (tera' Hergh Hat botmeH tum). wIvvam qaDlaHtaH raSya' beq.
-DaHjaj Trump SughHa'meH mIw qellI' 'amerI'qa' SepjIjQa' 'oSwI' yej ruvrIp. nguHwI' Dojmey yu' 'e' nID Democrat woQ ghom DevwI'pu', Trump Qang naDHa'meH lappa'. Qochqu'chu' Democrat woQ ghom jeSwI'pu', Republican woQ ghom jeSwI'pu' je 'ej moSqanglaw' pagh.
tlhIngan Hol jatlhwI' nugh De' chu''e':
-'eSrIv vagh qaD yIlIjQo'! qaSpa' jar wa'maH cha' jaj cha'maH Soch lut Daqonta'bogh yIngeH! rav vaghvatlh mu' 'aqroS cha'SaD vaghvatlh mu' ngaSnIS lut 'ej lut Damughta'bogh 'oHlaHbe' lut'e' Dabonbogh. ghoboq 'at gmail DoD com 'oH 'eSrIv 'ul QIn Quv. yIjeS! yIjeS!
SIqa'gho muD Dotlh'e':
DaHjaj 'aqroS 189 gheH
rav 176 gheH
chal Hoch lubot 'engmey 'ej loQ SIS.
wa'leS 'aqroS 179 gheH
rav 173 gheH
wa'leS loQ jul lubot 'engmey 'ach SISbe' net 'aq.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
yIqIm! pe'bIl Da'IjtaH. DeSDu' 'oH pongwIj'e'. lojmItjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH cha' jaj Soch. SIqa'ghoDaq jIHtaH 'ej DaH tera' De' chu' vImuch.
1. tera' potlhqu'bogh De' chu':
-Donald Trump Qang SughHa'meH mIw tagh loghjaj 'e' maq Nancy Pelosi, 'amerI'qa' SepjIjQa' 'oSwI' yej DevwI'. wej meqmo' Qangvam SughHa'nIS 'e' qap Democrat woQ ghom. meq wa': woQDaj ghong Qang 'ej tlhongmeH patlhDaj lo'. meq cha': HeSHeyDaj nuD 'e' nIDDI' 'oSwI' yej, bot Qang. meq wej: ruv bot Qang. wej SughHa'meH mIw nablu' 'ach ghaytan qaSpa' QISmaS, naDHa'meH lap 'oSwI' yej. naDHa'chugh, vaj yejquvDaq qaS meqba'. DIv 'e' tu'chugh yejquv, vaj Qang SughHa'nIS.
-'amerI'qa' SepjIjQa' quntej tlhabmoH 'Ir'an ja' juH qach chIS 'oSwI'. qaStaHvIS wej DIS 'Ir'anDaq qama' ghaH HanwI''e'. wejben 'Ir'anDaq qun HaDlI' 'ej ngugh ghoqwI' ghaH 'e' pum 'Ir'an qum 'ej bIghHa'Daq weghta'. 'Ir'an ghoqwI' SuqmeH ghaH mech 'Ir'an qum.
-vIraSDaq morghtaH vumwI'pu', vumwI' Deq Huch mab choH 'e' nabmo' Emmanuel Macron Qang, loHDaj je. SepDaq tIngvo' 'evDaq chanDaq way'ar tu'lu' 'ej Qapbe'taH lupmeH pat.
-wa'Hu' po'lISqa'Daq Auschwitz weghmeH raQ Such DoyIchlan Qang, Angela Merkel. not pa'logh raQvetlh Such Merkel Qang, Qang ghaHtaHvIS 'ej wejlogh neH 'oH Such DoyIchlan Qang. Auschwitz-Birkenau tumvaD javmaH'uy' 'ewro nob DoyIchlan qum 'e' maq Qang SuchtaHvIS. quq wanI'vam, Auschwitz-Birkenau tum DISjaj wa'maHDIch. jatlh Merkel « DaHjaj tlhIH tlhopDaq jIQam 'ej Sajatlh, DoyIchlan Qang jIHtaHvIS; ngebbe' Qu'vam. HeS wIH turta'mo' DoyIchlangan, jItuHchu'&m
peqIm! pe'bIl Da'IjtaH. DeSDu' 'oH pongwIj'e'. DaSjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH cha' jaj cha'. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
-DaHjaj tagh muD 'umber rIchmeH qep'a'. nuyorgh vengDaq tera' SepjIjQa' ra'ghomquvDaq qaS qep'a'vam vu'bogh tera' SepjIjQa' Qang, António Guterres. tera' muD 'umber luchoHtaHbogh Humanpu' rIchlu' net nab.
-QuStaHbogh Hong Kong qum naDmo' 'amerI'qa' SepjIjQa' 'oSwI' yej, Hong KongDaq vergh 'amerI'qa' SepjIjQa' veSDuj 'e' tuch jungwoq qum. jatlh jungwoq ghar nov rIp 'oSwI', Hua Chunying, « QaghDaj tI'meH wIvvam qelqa' 'amerI'qa' SepjIjQa' qum 'ej jungwoq Sojvam mun 'e' mev 'ej jungwoq 'om 'e' mev 'amerI'qa' SepjIjQa' wIneH; wItungHa'.»
-ghItlhjaj qaStaHvIS yu'meH mIw jeSbe' Trump Qang ja' juH qach chIS 'oSwI'. rInlaw' 'oSwI' yej nompuq ghermeH mIw 'ej DaH taghlaw' chut HaDmeH mIwchaj.
tlhIngan Hol jatlhwI' nugh De' chu''e':
-rIn Starbase Indy 'ach wanI' lutIv tlhIngan Hol jatlhwI'pu' law' net Sov. qabpaqDaq, bo'DeghQInpatDaq je qepvam cha'bogh mIllogh Dojmey lulanlu' 'ej SoH'ochDaq tlhIngan Hol bom chu' cha'bogh HaSta ta chu' lanlu'pu'. lujwI'pu' vIneHbe' 'oH bomvam chu' pong'e' 'ej qonta' jenbom. jenbom, pIHoy'! Dunqu'!
SIqa'gho muD Dotlh'e':
DaHjaj 'aqroS 184 gheH
rav 181 gheH
chal Hoch lubottaH 'engmey.
wa'leS 'aqroS 186 gheH
rav 182 gheH
loQ jul lubot 'engmey.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
peqIm! pe'bIl Da'IjtaH. DeSDu' 'oH pongwIj'e'. buqjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH wa' jaj cha'maH Hut. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
-wa'Hu' 'amerI'qa' SepjIjQa'Daq qaS tlho'lop. lopmeH raSDaq qev qorDu' Dojmey 'ej nItebHa' 'uQ'a' luSop. motlh lopvamvaD tera' taqnar jablu'.
-ghItlhjaj, loghjaj je 'amerI'qa' SepjIjQa' 'ev chan 'ev SepmeyDaq peDqu'. wanI'vammo', SaqHa'laHbe' muD Duj law' 'ej Sat lengwI' law'.
-DaHjaj qaS buqjaj qIj. qav'ap le'vaD ngevwI'mey qoch je'wI' Dojmey. Qat lurDechvam Huj 'ach DISvam nup jeSwI' SubmaH. buqjaj qIj QISmaS nobchaj HochHom je' wejben ja' 'amerI'qa' SepjIjQa' roghvaH vaghmaH wa' vatlhvI'. buqjaj qIj QISmaS nobchaj HochHom je' DISvam ja' 'amerI'qa' SepjIjQa' roghvaH wejmaH jav vatlhvI' neH. meq nap tu'lu'law': je'meH 'Internet lo' 'e' maSchoH je'wI' ghIl.
-paj 'Ir'aq Qang. cha'wen qumchaj lunaDHa'meH morghchoH 'Ir'aqngan.
-lanDanDaq cha' nuvpu' HoH 'ej wej nuvpu' rIQmoH taj Qachbogh loD'e'. jorbogh yIvbeH ngeb tuQtaH HoHwI'. HoHwI'Daq bach ghan'Iq yaSpu' 'ej luHoHta'.
-'avghanIStan Such Donald Trump Qang. wanI'vam pIHlu'be' 'ej QaSvaD jatlhtaHvIS Sutlhqa' 'amerI'qa' SepjIjQa' qum, ta'lIban je ja' 'amerI'qa' SepjIjQa' Qang.
-vaghvatlh ben Heghpu' Leornado da Vinci, DIjwI' po'qu', 'oghwI' po'qu', tej po'qu' je.
tlhIngan Hol jatlhwI' nugh De' chu''e':
-DaHjaj qaS Starbase Indy jaj wa'DIch! qaStaHvIS qepvam noy jeS tlhIngan Hol jatlhwI' law'qu' 'ej jeS je Qangma' quv ghetwI': Mary Chieffo. lIr'el, qep yItIv!
SIqa'gho muD Dotlh'e':
DaHjaj 'aqroS 185 gheH
rav 184 gheH
chal Hoch lubot 'engmey 'ej ramvam SISchoH net 'aq.
wa'leS 'aqroS 186 gheH
rav 185 gheH
ghaytan SIStaH.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
peqIm! pe'bIl Da'IjtaH. DeSDu' 'oH pongwIj'e'. DaSjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH wa' jaj cha'maH vagh. SIqa'ghoDaq jIHtaH 'ej DaH tera' De' chu' vImuch.
tera' potlhqu'bogh De' chu':
-'amerI'qa' SepjIjQa' Qang lugheS 'e' lunID ghot law'qu' net Sov. Qang gheS 'e' nIDchoH je wa'Hu' 'e' maq Michael Bloomberg. qaStaHvIS jar law' jeSQo' Bloomberg 'a tlhoy ngotlh Sanders, Warren je 'ej tlhoyHa' vaQ Joe Biden 'e' Harlaw'mo' jeS tagha' 'e' wuq.
-Huch nojlu'pu'bogh 'e' poQHa'lu' luneH cha' Qang qa'wI' DuH: Elizabeth Warren, Bernie Sanders je. Warren'e', ngIq Huch nojlu'pu'bogh HevwI'vaD vaghnetlh DeQ poQHa'qang loHDaj. Sanders'e', ngIq Huch nojlu'pu'bogh HevwI'vaD wa''uy' DeQ poQHa'qang ghaH. Huch Dojmey tatlhnISbogh lapwI'vaD Qatqu' qechvam 'ach vaQbej'a' Dupvam? nabchaj qav'ap nuq? DuHbej gher'ID QaQ. jatlh Lawrence Yun Huchtej « SIbI' juH qach ngevwI'vaD, juH qach je'wI'vaD je nIvbej ghu'vam. »
Hoch DIS ghaytan wejbIp latlh juH qach luje'choHlu' 'ej ghurchoH 'amerI'qa' SepjIjQa' lo'laHghach. nab'a'chaj chavmeH ghaytan rav wa'SaD Saghan DeQ lo'nIS 'amerI'qa' SepjIjQa' qum 'ej Huchvam SuqmeH ghaytan roghvaH rupnIS, vaj bechbej je je'wI'pu', ngevwI'pu' je 'e' lupIH Huchtejpu'.
vaj nab'a'vam DIlmeH mIpqu'wI'pu' 'e' lunab Sanders, Warren je 'a loQ qay' je wIvvam. mIpqu'be'wI' Seng qImqu'be' mIpqu'wI' HochHom 'ej chaH pIlmoHqu'be' mIpqu'be'wI' Sengmey vaj ghaytan nab'a'vam bot 'e' lunID.
-DaSjaj Adnan Syed HeSHey nuDqa'Qo' ja' 'amerI'qa' SepjIjQa' bo'DIj'a' noHwI''a'. DIS cha'SaD bangDaj Deq chotta' Syed 'e' pum Baltimore ghan'Iq. DIv 'e' wuq Maryland bo'DIj 'ej bIghHa'Daq weghlu' qaStaHvIS yInDaj Hoch 'e' ra'lu'. DIS cha'SaD wa'maH loS noyqu'choH HeSwI'Hey, jabbI'ID mIrmo', Serial. jabbI'ID mIrvetlhDaq Syed HeSHey nuDqa' 'ej qaD 'e' nID NPR toy'bogh De' chu' ja'wI''e' 'ej DIS cha'SaD wa'maH jav noHmeH mIw chu' laj Maryland bo'DIj. wIvchaj luQIjQo' noHwI''a'pu'.
-bo'DIj mIw ghangmeH vumwI' yonHa' ghomvaD cha'maH jav'uy' DeQ nob McDonald's Do Qe' tlhoQ. qaStaHvIS DIS law', bo'DIjmeyDaq ghoH McDonald's ra'ghomquv, vumwI'pu'Daj je. Huch yapbe' Hev ja' McDonald's vutwI'pu', tebwI'pu' je. batlhHa' vang 'e' temHa'Qo' McDonald's.
-Hong KongDaq yoS qIp 'oSwI' chu' wIvmeH lapta' vengvetlh nganpu'. Qapta' qum'e' wIvlaHbogh rewbe'pu' QutlhwI'pu'. Hong Kong yoSDaq wa'maH chorgh yoS qIp tu'lu' 'ej DaH wa'maH Soch qIp SeH qum'e' wIvlaHbogh rewbe'pu' QutlhwI'pu'. jeylu'bejta' 'ach lapmeH mIwvam ret gher'ID laj 'e' Hech ja' Carrie Lam, Hong Kong ra'wI'quv. cha'ben neH ra'wI'quv gheSta'.
tlhIngan Hol jatlhwI' nugh De' chu''e':
-lojmItjaj DoyIchlan torSIv rorgh tev Hev Quvar, nIvmo' ghItlh mughta'bogh, ta'puq mach. lojmItjaj ram qabpaqDaq De'vam chu' maq. qaSpa' lojmItvam ret, torSIv tev baj pagh tlhIngan Hol lo'bogh ghItlh. Quvar, pInaDqu' 'ej tuqlIj wInaDqu' je! Qapla'!
SIqa'gho muD Dotlh'e':
DaHjaj 'aqroS 192 gheH
rav 184 gheH
loQ jul lubot 'engmey 'ej chaq loQ SIS.
peqIm! pe'bIl Da'IjtaH. DeSDu' 'oH pongwIj'e'. buqjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH wa' jaj cha'maH cha'. SIqa'ghoDaq jIHtaH 'ej DaH tera' De' chu' vImuch.
potlhmey
-'aSralya'Daq SochbIp chorghnetlh mun'a' menbogh yer meQpu' qul'a' tlhab. HeghmoHbej qul'a'mey. jav nuvpu' HoH qul'a' 'ej javvatlh juH Qaw'pu'. New South WalesDaq meQtaH javmaH qul'a'. 'aSralya'Daq DISvam QaD law' Hoch QaD puS ja' 'aSralya' muDQeD yejHaD HanwI'.
-wa'waQ chorghleS je SIqa'ghoDaq mubchoH qa'nabIS. ghu'vam chu' ghuHmeH vumqu'choH vengvetlh qum. puqpu'vaD, nenwI' QupvaD je Qobbej San'emDervam 'e' Sov Hoch 'e' woq luneH SIqa'gho DevwI'pu' 'ej vaj SIqa'gho roghvaH ghojmoHmeH mIw'a' vu'. qaSpa' vay' DIS cha'maH javDIch, nentaH QoghIjDaj 'ej nenmeH mIw munlaH qa'nabIS 'e' lumaq tej HochHom. HatHa'DI' qa'nabIS je'laH vay' cha'maH wa'ben boghpu'chugh neH ghaH.
-'eQ rInlaw' 'amerI'qa' SepjIjQa' Qang SughHa'meH mIw 'ay' paghDIch. qaStaHvIS poH ngaj law'bogh nguHwI' potlh yu'ta' 'amerI'qa' SepjIjQa' 'oSwI' yej HungqIp. qaS qIchmeH mIw tugh 'e' wuq 'oSwI' yej. qIch 'e' wuqchugh 'oSwI' yej, vaj Qang noHnIS yejquv.
« jIyuDHa'nIS: qIchmeH mIw vIneH jIH » jatlh HungqIp DevwI', Adam Schiff 'oSwI'.
loghjaj po to'chaj rIchmeH Qang, beqDaj je ghom yejquv Republican woQ ghom jeSwI'pu'.
tlhIngan Hol jatlhwI' nugh De' chu'
-loSSaD mu' ngaS tlhIngan Hol mu'tay' ja' Quvar. DaHjaj QIn tetlh jeSwI'vaD De'vam chu' bon ghaH. toghmeH Ho'DoS law' tu'lu' 'e' Sov ja' 'ach wa' toghmeH Ho'DoS'e' qImlu'chugh, loSSaD mu' ngaSbej tlhIngan Hol mu'tay', mu'tay' retqu'mo' 'otHa'pu'bogh matlh. nom Sach Holmaj Dun net Sov!
-tera' DIS cha'SaD cha'maH qaS cha' qep chu'. jar wa' jaj cha'maH vagh Louisville Public LibraryDaq qaS Louisville qepHom. wanI'vam vu' Jeremiah Rose 'ej qabpaqDaq latlh De' Samlu'. jar loS jaj cha'maH wej jar loS jaj cha'maH vagh qubbID LilleDaq qaS 'uSgheb qep. wanI'vam wIvu' jIH, ghItlhjaj je 'ej qabpaqDaq latlh De' Samlu'. wanI'meyvam luDIlnISbe'lu' 'ach bIjeS nom 'e' yImaq!
tera' muD Dotlh
SIqa'gho:
DaHjaj 'aqroS 184 gheH
rav 181 gheH
pe'vIl wovtaH jul 'ej 'oH bot pagh.
wa'leS 'aqroS 187 gheH
rav 182 gheH
loQ jul lubot 'engmey.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
jar 11 jaj 19
peqIm! pe'bIl Da'IjtaH. DeSDu' 'oH pongwIj'e'. povjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH wa' jaj wa'maH Hut. SIqa'ghoDaq jIHtaH 'ej DaH tera' De' chu' vImuch.
potlhmey
-qo' HochDaq 'Iw HanDI' naQHa' SIQ 'uy' law'. wIH ropvam 'ej pa'logh 'oH SIQbogh SID vormeH qItbe'. 'ach qen ropvam SIQbogh SID vormeH CRISPR lulo' Qel. CRISPER 'Iw HanDI' Doq tI'meH mIw chu' SIQbogh SID wa'DIchDaq 'opSaghan HanDI' luchoHlu' 'e' 'otHa' poj chu'. ngablaw'taH 'oy' chenmoHbogh rop.
« maSeyqu'chu' » jatlh Haydar Frangoul Qel. NashvilleDaq Sarah Cannon QulmeH yejHaD toy' 'ej SID rachlI'. « tagha' 'Iw HanDI' naQHa' rop SIQbogh SID QaH HanDI' choHmeH mIw 'e' 'agh pojmeymaj wa'DIch. »
Sey 'ach tlhoy Sey'eghmoHbe'. « Qapla'na' 'oH 'e' wItul » jatlh 'ach « lopmeH tlhoy 'eq. »
-DaHjaj 'amerI'qa' SepjIjQa' monDaq taH Qang SughHa'meH mIw vu'lI'bogh 'oSwI' yej. DaHjaj Alexander Vindman Sogh, Jennifer Williams je luyu'lu'. HubbeqqIp jeSwI' ghaH Alexander Vindman Sogh'e' 'ej Qang cha'DIch, Mike Pence, toy' Jennifer Williams. 'uqranya' Qang rI' 'amerI'qa' SepjIjQa' Qang, Donald Trump, 'e' lu'Ij Vindman Sogh, Williams je.
-Julian Assange HeSHey nuD 'e' mev Suverya' ja' Suverya' bo'DIj DevwI' cha'DIch, Eva-Marie Persson. jatlh ghaH « tlhoy pujchoH nompuq. »
DIS cha'SaD wa'maH, Suverya' monDaq qaSpu'DI' Wikileaks qep, be' wem Assange 'e' pum be' 'ej vaj HeSHey nuDchoH Suverya' qum. nga'chuq nItebHa' 'e' wuq ja' Assange. qaStaHvIS Hut DIS lanDanDaq Assange lulIgh 'oHtaH 'eqwaDor rIvSo''e'. DIS cha'SaD wa'maH Soch rIvSo'vo' ghImlu'.
« qenHa' qaSmo' wanI' wInuDbogh, tlhoy pujchoH nompuq 'ej vaj wInuD 'e' wImevnIS » jatlh Persson.
tlhIngan Hol jatlhwI' nugh De' chu'
-tlhIngan Hol QIn tetlhDaq mu' chu'mo' ngach tlhIngan Hol jatlhwI' law'. tanje'rIn 'oH mu'vam'e'. tanje'rIn naH jatlhnISlu' 'e' Har nuv bID 'ej tanje'rIn neH jatlhlu' 'e' Har latlh bID. meqvammo', latlh tera' naHmey lubuSchoHlu'. 'epIl neH wIjatlhlaH'a'? tomat? banan? pIlam? Sov 'Iv? QIn tetlhDaq vuDlIj tlhIn yImaq!
tera' muD Dotlh
SIqa'gho:
DaHjaj 'aqroS 187 gheH
rav 183 gheH
loQ peD 'ej SIS.
wa'leS 'aqroS 189 gheH
rav 186 gheH
loQ jul lubot 'engmey.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
peqIm! pe'bIl Da'IjtaH. DeSDu' 'oH pongwIj'e'. buqjaj 'oH jajvam'e' 'ej DaHjaj qaS DIS cha'SaD wa'maH Hut jar wa'maH wa' jaj wa'maH vagh. SIqa'ghoDaq jIHtaH 'ej DaH tera' De' chu' vImuch.
potlhmey
-'amerI'qa' SepjIjQa' monDaq taH Qang SughHa'meH mIw vu'bogh 'amerI'qa' SepjIjQa' 'oSwI' yej. jajvam 'amerI'qa' SepjIjQa' 'uqranya' Duy'a' Deq, Marie Yovanovitch yu' 'oSwI' rIpHom. luSughHa'moH Rudy Giuliani, cha' boQDu'Daj je ja' Duy'a' Deq 'ej Trump Qang naDHa'.
-loghjaj po qalIvornIya DuSaQDaq ghojwI'pu' wID pu' bachwI'. Santa ClaritaDaq Saugus High SchoolDaq Heghpu' cha' ghojwI' 'ej rIQ wej latlhpu'. wa'maH jav ben boghpu' HIvwI' 'ej DuSaQvetlh rapDaq HaD je. qaS qoSDaj.
-'Ir'aqDaq morghtaH SI'It lalDan tlhach pabwI' Qup Dojmey. qumchaj lunaDHa'qu'taH 'ej qal ja'. Han 'Ir'aq QupwI'pu' 'ach pagh vummeH 'eb lutu'lu' ja'. vummeH 'eb tu'lu'DI', Hev nov ja'.
-DaHjaj ghoqwI' tam latvIya', noregh, raSya' je. latvIya' lupaw cha' latvIya'ngan, wa' noreghngan je. DIS cha'SaD wa'maH jav raSya' bIghHa'Daq luweghlu'.
tlhIngan Hol jatlhwI' nugh De' chu':
-wa'Hu' qaS qepHom'a' jaj wa'DIch
-SaarbrückenDaq ghom jeSwI'pu' 'ej nItebHa' Holmaj Dun luHaD 'ej luqeq. qaStaHvIS qep mu' chu' Dojmey lu'otHa'lu'. matlh, pItlho'! DaHjaj wa'leS je loptaH 'ej ghojtaH jeSwI'pu'. jaj wa' Dor qepHomvam Dun.
-javHu' teqSaSDaq 'oStInDaq qaS Sepqep wa'DIch. qaStaHvIS cha' jaj ghom tlhIngan Sep Hol Sar venwI'pu' 'ej Sep Hol Sar laHchaj luqeq. jeSpu' wej ghotpu'.
tera' muD Dotlh
-'amerI'qa' 'ev chan 'ev:
SIqa'gho:
DaHjaj 'aqroS 185 gheH
rav 182 gheH
wa'leS 'aqroS 185 gheH
rav 181 gheH
loQ jul lubot 'engmey.
SeplIj muD Dotlh DaQoybe''a'? ghoSovmoH 'ej tuch SeplIj muD Dotlh wImuchqangba'.
DaH rIn De' chu' muchvam. DatIv 'e' wItulqu'. tugh jabbI'IDmaj yI'Ijqa' 'ej Hoch tera' potlhmey tIqImtaH!
rIn.
ChicagoDaq bIrbej net Sov. DaH, SImyon pat vIyajchoH, ghantoHmeyna' vIghajmo'. Dunqu'!
tobqu' jabbI'IDvam, 'ej lI'. De' chu' vISovchoH 'ej jIQoytv Hol vIqeqlaH. 'a Qo'noSvo' De' chu' vIQoy vIneH je'!