Қазақша подкаст/Qazaqsha podcast

Бұл эпизод біздің өмірде көрген, қанша уақыт өтсе де жылуы әлі кете қоймаған жақсылық туралы. Өздерінің мейірімге, жылуға толы естеліктерімен бөліскен достарым Қаламқас Толымбекқызы, Болатбек Мұхтаров, Айсұлтан Жақыпоы, Аян Қалмұрат, Мейірман Ілес, Назерке Низамудинқызына және есімін атамауды жөн көрген досыма көп алғыс.

Qazaqsha podcast жаңа айдары "Maqala tyñda" деп аталады. Мұнда қазақ медиасында жарияланған өзекті де сапалы материалдар туралы айтамын. Алғашқы эпизодта журналист Нұртай Лаханұлының Азаттық радиосы сайтында жарияланған «Шыңжаңнан келгендердің кейінгі легі "лагерь" тақырыбын қозғауға құлықсыз» материалы. – Қытайда қалған туыстарымның амандығын білейін деп келдім. Ол жақта бауырларым, ағайын-жұрағатым бар. Естуімізше, онда қиындық көп болып жатыр. 2017 жылы басталған Қытай саясатының салдарынан түрмеге қамалған достарым бар. Сотталып кеткен ерлі-зайыпты таныстарым да бар. Балалары жетімдер үйінде қалды. Сондағы олардың бар қылмысы – намазға жығылғаны, – дейді Ералы.Осыдан кейін ғана Оралтай: "Қазақстанға барғанда әртүрлі әңгіме айтпайсың деп, қолымызды қайырып, талай қағазға қол қойғызды ғой" деді...

"Бір күн" подкасты түрлі мамандық иелерінің әдеттегі жұмыс күнін баяндайды. Онымен қоса осы кәсіптің қиындығы мен артықшылығы, оған қатысты қоғамда қалыптасқан жаңсақ пікірлер туралы да айтылады. Алғашқы эпизодта аудармашы Гаухар Раянова өзінің әдеттегі күнін сипаттап берді. Аудармашылардың табысы, жақсы аудармашы болу үшін не қажет екенін, "Еркектер қорқақтардың" туындауына қатысты болжамдар және басқа да қызықты дүниелерді біле аласыз. Подкаст жазуға келісімін берген Гаухарға көп рақмет)

Бұл эпизод адамгершілік және әкем туралы

Бұл эпизод қазақтың боғауыз, бейпіл сөздері жөнінде. Ұят, мораль шектеуімен қазақтың ауыз әдебиетінің осы саласы ұмыт болып барады. Бейпіл сөздерді жаңғырту көпшілік орындарда бейәдеп сөйлеуді білдірмейді. Бұл әңгіменің де өз орны, аудиториясы бар. Сондықтан да эпизодқа қатысты 18+ жас шектеуін тағы да еске саламын. Эпизод басындағы дисклеймер Назарбаев Университетінің Ақылды жүйелер мен жасанды интеллект институты қазақ тіліңдегі сөзді синтездеу жобаcымен жасалды. Эпизодта Аршат Қайролланың, "Адаптация" тобының музыкасы қолданылды.

Балалығымыз ауылда өтіп, қалада есейсек те, біз не ауылдық не қалалық болмадық. Кешегі мен бүгінгі, өзім және өзге, ауыл мен қала туралы эпизод Айсұлтан Жақыповпен)

Саясатпен, азаматтық белсенділікпен айналысатын қыз-келіншектер бір жағынан заңсыздықпен күрессе, екінші қоғамда қалыптасып қалған стереотиптермен де күресуге мәжбүр. Бұл подкаст мақсаты - әйелді киелендіріп, ерлерді тұқырту емес, әсте. Тек ой салу.  Подкаст қонақтары: Инга Иманбай, Әсем Жәпішева. 

Бұл эпизод арнайы подкаст ретінде жазылған жоқ. Былтыр, қазан айында Қызылорда қаласына жол түскен болатын. Сондағы бір кездесуіміздің бір ғана бөлігінің аудиожазбасы. Айтпақшы, қонақжай қызылордалық достарым Zhamilya Kassymkhan мен Oskar Gasta көп рақмет.

Ғалымжан Оразымбет екеуміз қыркүйек, қазан айларында Қазақстанның он қаласын: Орал, Атырау, Ақтау, Ақтөбе, Астана, Қарағанды, Қызылорда, Шымкент, Тараз және Алматы аралап, сапарға шығып едік. Осы сапардың дәмін, әсерін ораға салған эпизод.

Саясаттанушы Шалқар Нұрсейітов азаматтық қоғамдағы "саясатпен" айналысатын адам туралы, оған биліктің көзқарасы, оның құндылықтары туралы пікірін айтады. Біздің азаматтық қоғамға жетпейтіні не, оны біріктіретін, күш беретін не? Радикал оппозиция қайдан шығады? Өзгерістер қашан басталады? осы және басқа да сұрақтарға саясаттанушы жауабын осы эпизодтан табасыз.

"Үрей. Күйзеліс. Паранойя. Психикалық дерті бар адамдардың басынан кешіретін жағдайы осы. Карантин кезінде біз уақытша олардың не сезінетінін білетін болдық. Бұдан былай оларға түсіністікпен қарайтын шығармыз деп ойлаймын"... Бұл эпизодта біз: Сая Бақимова, Ернар Бекенов және мен үрей, қорқыныш сезімдері туралы айтамыз. Үрей қайдан шығады? Оның пайдасы бар ма? Оны қалай жеңуге болады? Сонымен қоса бұл эпизодта Нұрлыбек Зинабдин, Гаухар Раянова, Абылай Амантай, Ғалымжан Оразымбет және Бекзатбектің естеліктері қолданылды.

Сауат деген не? Қатесіз жазу ма, білгеніңді іске жарату ма? Біз өзімізді сауаттымыз деп айта аламыз ба? Ал тұтас халықты ше? Бұл эпизодта медиатренер, медиа зерттеуші Асхат Еркімбай, аудармашы, блогер Асқар Базарбай (Oskar Gasta) және блогер, азаматтық белсенді Ғалымжан Оразымбет біздің заманымыздағы адамның сауат деңгейі туралы ой бөліседі.

Бұл пандемия адамға, қоғамға, сезімге, экономикаға, сенімге сынақ іспеттес. Біз оны қалай қабылдаймыз? Үміт беретін не? Неден қорқамыз? Осы төңірегінде Ғалымжан Оразымбет және Бэлла Орынбетова ой бөліседі. Подкаст барысында айтылған ресурстарға сілтемелер: https://www.coronavirus2020.kz/ Қазақстан бойынша ресми мәліметтер Әлемдік жағдайды қадағалайтын сайт: https://www.worldometers.info/coronavirus/#countries

Бұл эпизодта Айсұлтан Жақыпов, Meihua Zheng және мен - Бэлла Орынбетова ксенофобия туралы әңгіме айттық. Подкастта мораль жоқ, тек жеке басымыздан өткен оқиғалар, қорытқан ойлар және аздаған әзіл-қалжың ғана) Негізі күлетін тақырып емес, әрине.

Бұл подкастты қалай атарымды білмедім шындап келгенде. Жаңа жылдық көңіл күй бар. алайда мерекеден гөрі, жылдан жылға жасымызға жас қосылған сайын өмірге, таңғажайыпқа, досқа, сырға деген көзқарас айтылады.

Кітап сүйерлердің клубы The Re отырысында жазылған подкаст. Мұнда Дж. Оруэллдың "Мал фермасы" повестінен басталған әңгіме қазірге қазақ қоғамы, білім жүйесі, жемқорлық сияқты тақырыптарды да қамтиды. Подкаст сапасы ұнамай қалса (дыбыс өзіме де ұнаңқырамай тұр), әңгімеге қосылғыңыз келсе, оқыған шығармаңызды талқылайтын адам іздесеңіз Астана, Алматы қалаларында өтетін кітап клубының отырыстарына келіңіз)

Өміріңді онсыз елесте алмайтын адамдар болады. Алайда ажал ол адамның қаншалық қымбат екеніне, сенің оған деген мұқтаждығыңа қарамайды. Тіпті дайындалуға уақыт бермейді. Мұндай қайғыны еңсере алмайтын сияқты боласың. Бірақ уақыт өте келе... Жоқ орны толмайды. Бір кезеңдер болады. Бұл эпизод осы туралы. Сонымен қоса қазақтың қазаға байланысты салт-дәстүрлердің ұмнамсыз тұстары, өмірдің мәні туралы айтылады. Айтпақшы, ешқашан телефон арқылы көңіл айтпаңыздар. Ешқашан!

Бұл подкастта дизайнер, жас блогер, болашақ жиһанкез Symbatbyek Darigyerkhanuly АҚШ сапары, Моңғолия мен Қазақстан арасындағы айырма мен ұқсастық, өмірін өзгерткен әдеттер, жақсы адамдар туралы пікірлерімен бөліседі ;)

2019 жылдың 20-21 мамыр күндері Париж Конференциясы өткен еді. Бұл жиынға елдегі азаматтық қоғам өкілдері мен оппозициялық партия мүшелері қатысып, елдегі саяси, қоғамдық мәселелерді талқылады. Осы жиынға қатысқан саясаткер Әкежан Қажыгелдинмен сұхабттасудың сәті түскен еді.

Біздің ойымыздағы қарттар образы қандай? Біз қартайғанда қандай болғымыз келеді? Қарттарға қажеті қамқорлық па түсіністік пе? Келбеті жас, ойы қарт Ғалымжан Оразымбетпен әңгіме ;) Қымбатты тыңдарман, ойларыңызды, ұсыныс-пікірлеріңізді, сұрақтарыңызды әр подкаст астына коммент ретінде жазуыңызға болады. Ешбір коммент елеусіз қалмайды