阿愷之聲Podcast

► 趕緊報名阿愷之聲聽友會｜https://reurl.cc/lNeE9Y 歡迎收聽阿愷之聲Podcast「台長時間」單元，真緊，隨年底囉。這集節目台長欲來回顧2024年，閣有2025年的第一件計畫：臺北場聽友會！回顧一年的意義是啥？會啥欲辦聽友會？緊來收聽這集節目！ ► 阿愷之聲聽友會台北場 報名費用｜一人200塊（數量有限） 活動時間｜2025年1月12號（日）15:00-17:00 活動地點｜現流冊店（臺北市大同區重慶北路二段70巷15號） ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

「阿母，彼爿有日頭的所在，開足濟花，為啥要走烏暗的所在？對彼爿行，對有開花的所在行......。」－台文改編自〈東浩的母親〉篇章 本集阿愷之聲Podcast「文學烏亂濺」單元，台長邀請我的好朋友溪州阿倫、秀水奕瑄來講冊，這遍欲來講韓國2024年得著諾貝爾文學獎的作家韓江 ，伊2014年完成的小說《少年來了》主要咧講1980年的政治暴力事件「光州事件」，這个事件予韓國行往民主化，但付出足大的代價。節目開頭唱的彼條歌是光州事件受難者共同創作的「獻給你的進行曲」，臺灣的社會運動改編成「勞動者戰歌」，其實，戰後韓國和臺灣的命運就親像兄弟，民主的路上步步坎坷。 韓江本身就是光州人，後來歸傢伙搬去首爾，彼年拄阿好光州事件發生，後來韓江寫小說出名，這本《少年來了》是伊轉去探討彼件以前大人攏毋願對囡仔講的代誌。小說中寫了六个人的故事，讀者會使透過六種角度來理解光州事件，雖然這段歷史非常沈重，文學的意義就是提供咱想像的力量，有了想像，歷史才有可能自由。 這集節目錄完隔工暗暝，韓國總統尹錫悅雄雄宣布戒嚴，當下我就想起韓江的小說《少年來了》，心內一陣驚惶，哎......。 希望咱的少年攏會使平安佇咱的國家好好大漢，一个民主社會其實足無簡單吶！ ►節目好看頭 • 2024年各自讀過印象上深的冊？ • 誰是韓江？ • 光州事件是啥？後來韓國的轉型正義？ • 各自對這本小說的感想？ • 2025年各自的新年新希望？ ► 緊來讀冊｜韓江《少年來了》 https://www.books.com.tw/products/0010959423 ► 阿倫推薦的冊｜吳晟詩集《泥土：吳晟二十世紀詩集》 ► 奕瑄推薦的冊｜伯納德．札卡《誰讓公務員生了病？》、沈秀華《查某人的二二八》、許雪姬《獄外之囚》 ► 節目音樂｜鹿港新聲閣 ► 報名阿愷之聲聽友會｜https://reurl.cc/lNeE9Y ► 歡迎贊助阿愷之聲Podcast｜voiceofakai.oen.tw Powered by Firstory Hosting

歡迎收聽阿愷之聲Podcast「空中泡茶間」單元，這集節目的特別來賓是兩位資深球迷福興君宥和秀水鄉民代表昀志，阮準備要對臺灣隊提著2024年WBSC世界棒球十二強賽冠軍，講起棒球比賽對阮各自的意義（拭目屎）。 以後來看，2024年11月24號絕對是難忘的一工。彼暝，阿愷和君宥作伙守佇電視頭前看臺灣隊對日本比賽，昀志甚至機票買咧，人直接來到東京巨蛋現場，無人知影這暝續落來會發生啥代誌，這个冠軍，對資深球迷來講，已經等一世人囉......。 各位棒球迷聽眾，這集節目是為恁來講，若是聽完，歡迎和阿愷之聲分享恁看完比賽的感想，想起彼暝猶原感動！ ►節目好看頭 • 這遍臺灣隊提著世界棒球十二強冠軍的意義？ • 咱各自當時開始看棒球？ • 人生中印象上深的一場球賽是？ • 敢捌對棒球失望過？ • 對一日球迷講一句話？ ► 背景相片｜世界棒球十二強預賽臺灣對古巴現場 ► 節目音樂｜臺灣尚勇應援歌、鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast「空中泡茶間」單元，這集節目阿愷出外景，來到彰化的好料首都員林市，這間是我非常意愛的咖哩店美保咖哩，節目邀請了經營者筱彤和米號做伙來開講！ 美保咖哩開佇員林戲院一樓（彰化縣唯一戲院），遮原本是菜市仔，2022年米號和筱彤來遮開了一間佈置相當「雅氣」的咖哩店，氣氛溫暖，咖哩飯有夠好食，生啤酒嘛有夠冰！這集節目阮欲來講經營一間店的鋩角（細節），到底對經營者來講，創業前按怎規劃？創業了後，這間店和經營者的生活有了啥款的變化？ 歡迎收聽這集節目，來聽阿愷，食美保！ ⚠️抽獎注意⚠️ 只要恁聽完這集節目，佇阿愷之聲各大社群媒體包括facebook、instagram、threads、X（twitter），tag一位朋友並留下這句「聽阿愷，食美保」，就有機會抽著「美保貓貓復古落肩tee」一件！（ex: @阿愷 聽阿愷，食美保） 一人只有一遍機會，阿愷會佇2024/12/3拜二暗時十點，佇facebook直播抽獎！ ►節目好看頭 • 為啥店名叫做「美保」？ • 來到員林開店的機緣是？ • 創業敢是一件浪漫的代誌？ • 經營一間店按怎影響原本的生活？ • 和人客之間印象上深的故事？ ► 阿愷推薦｜頭一回食美保咖哩推薦點唐揚雞咖哩👍 ► 工商服務｜美保咖哩商店 www.mihonyanko.co ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast「空中泡茶間」單元，這遍來空中泡茶的來賓是彰化IU（藝名？），伊是一位彰化的婦產科醫生，自細漢佇彰化市大漢，到底為啥想欲轉來彰化生活？興趣聽音樂祭的IU，會按怎看這个小可仔無聊的彰化？閣有，為啥會想欲做婦產科醫生？ 本集節目和韓劇順風婦產科完全無關係，緊來收聽！ ►節目好看頭 • 阿愷對婦產科的幾个印象？ • 為啥IU會選婦產科執業？ • 學霸的求學過程敢捌拄過啥困難？ • 醫生排解壓力的方式是？ • 按怎看彰化這个所在？ ► 彰化IU推薦的獨立樂團｜大象體操、淺堤、拍謝少年 ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast「文學烏亂濺」單元，這集節目欲來講今年春山出版的《#越南現代小說選》，這是臺灣頭一本越南文直接翻譯的短篇小說集。節目特別來賓是阿愷彰化高中的學弟陳俊宇（Trần Tuấn Vũ），阮準備對小說講起「越南」這个臺灣人足熟識也足生份（陌生）的所在。 俊宇的爸爸是臺灣人，媽媽是越南人，伊有兩个家鄉，是咱咧講的「新二代」。阿愷感覺揣俊宇來講這本冊應該足適當，俊宇對家己的身份認同就要對細漢和阿母轉去越南家鄉開始講，這本《越南現代小說選》選了六个無同時代的越南小說家作品，根本是越南百年來的歷史縮影，這个國家的命運一直和戰爭、認同、現代性綁綁作伙，其實和臺灣真同。 講到最後，其實越南就是臺灣，臺灣就是越南？緊來收聽這集節目，聽阮按怎濺文學，濺到越南去。 ►節目好看頭 • 來講阮對《越南現代小說選》印象上深的篇章？ • 這本小說的越南和俊宇熟識的越南有啥無同？ • 以前是用啥款的方式熟識阿母的故鄉？ • 同時有臺灣和越南兩个故鄉是啥感覺？ • 上佮意越南的啥物？ ► 來讀冊｜《越南現代小說選》 https://www.books.com.tw/products/0010984699 ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast「台長時間」單元，這集來賓是阿愷的福興好朋友、也是這遍做伙舞文化部「臺灣當代出版計畫」的影像合作陳君宥，阮準備來回顧這个特別單元幕後的趣味故事。 半年前君宥只是阿愷之聲的聽眾，伊搬轉來彰化福興生活了後，阮變成作伙騎鐵馬的好朋友，後來阮的關係愈來愈複雜，阿愷決定邀請君宥鬥陣製作特別計劃，伊用影像配合我的聲音，對臺灣頭錄到臺灣尾。阮用三個月時間完成十集「臺灣當代出版計畫」，十本冊、六場作者訪問、四場讀冊會，這是頭一遍阿愷之聲「總算有影」，雖然過程辛苦，但是會使和君宥合作，對我來講實在有夠爽啦！ 欲佇彰化生存是一件無簡單的代誌，恁若佮意君宥的影像，歡迎發案，阿愷之聲保證絕對讚！最後要感謝一直以來贊助阿愷之聲的善男信女，因為有恁，這个臺語Podcast才有氣力繼續放送落去，再次感謝，阿愷有夠愛恁！ ►節目好看頭 • 各自印象上深的一場錄音？ • 上挑戰的一場錄音是？ • 影像按怎配合臺語唸出文學作品？ • 流量時代的困擾？ • 上滿意的一集節目？ ► 來聽好聲｜阿愷之聲╳陳君宥「臺灣當代出版計畫」 https://youtube.com/playlist?list=PLuD2ZZPHq7q1q-vvzl0ubjXUicq1TMDve&si=O2HHCFYqfb_clonq 作者訪問｜吳晟╳朱和之╳胡慕情╳王昭華╳黃崇凱╳陳思宏 來讀冊會｜陳柔縉《大港的女兒》╳李金蓮《暗路》╳黃瀚嶢《沒口之河》╳張郅忻《山鏡》 ► 贊助阿愷之聲｜ https://voiceofakai.oen.tw/ ► 歡迎作伙交流｜加入「阿愷之聲Podcast聽友會」line社群 https://line.me/ti/g2/uS2PKqXbuTY7TvzDwtiACCQwj_kmQZb4VO0XRQ?utm_source=invitation&utm_medium=link_copy&utm_campaign=default ► 相片故事｜完成最後一場錄音的合影（電量用盡） ► 節目音樂｜鹿港新聲閣 Powered by Firstory Hosting

歡迎收聽阿愷之聲Podcast「空中泡茶間」單元，這集節目阿愷邀請著我的頭家aka臺大地理系教授洪伯邑來到節目空中，阮欲來討論「社會角色」這回事，到底大學教授敢會食得？（大學教授可以吃嗎？） 恁敢捌訪問家己的頭家？（你們訪問過自己的老闆嗎？） 我和伯邑老師結緣雖然是因為工課（工作），但自早我就對「 地理角 GeoCorner」研究室印象足深，遮氣氛有夠溫暖，這敢是因為人文地理學特別對人有關懷？而且我真好奇洪教授敢是一開始就知影按怎做一个老師？甚至轉來家庭生活上，伊是按怎學會曉做一个好阿爸？ 總講一句，阿愷好不容易有機會來質詢（？）我的頭家，這遍洪教授無欲講落落長的學術，一開始先來講阮舊年做伙去英國倫敦皇家地理學會（Royal Geographical Society,RGS）發表論文的趣味故事，緊來收聽！ ►節目好看頭 • 參加英國皇家地理學會印象上深的代誌是？ • 大學教授敢是一開始就會曉做老師？ • 學生論文寫袂出來欲按怎？ • 按怎學會曉做一个爸爸？ • 按怎看待人生的各種躊躇？ ► 讀新冊｜流動的界域：從在地、跨域到多物種／陽明交大出版社（11/1上市） 「傷痛地景的驅力：氣候變遷下的水與茶山社會／洪伯邑、王麒愷」 https://www.books.com.tw/products/0011004007 ► 聽好聲｜阿愷之聲特別單元「阿里山放送」ft.洪伯邑 https://youtube.com/playlist?list=PLuD2ZZPHq7q3cHjcvB6K2Elt7irD4zBGi&si=7saAlPOT1DHeBU67 ► 錄音場所｜感謝 阿里山奮起湖 石園民宿/ 山石園-啡嚐好茶 ► 節目音樂｜鹿港新聲閣 ► 節目贊助｜國家科學及技術委員會 ► 歡迎贊助阿愷之聲Podcast：voiceofakai.oen.tw Powered by Firstory Hosting

阿愷之聲Podcast特別單元「臺灣當代出版計畫」最後一集，來賓是國際大明星，也是阿愷彰化高中的「學姊」aka旅德作家陳思宏。思宏學姊是永靖人，自少年就足愛寫，出過幾落本散文和小說，2019年完成一本寫永靖的小說《鬼地方》已經翻譯成十二國語言（閣咧增加中），2022年出版另外一本寫員林的《樓上的好人》猶原好看，伊準備今年發表一本寫社頭的小說，到底「彰化三部曲」背後的創作企圖是啥？節目一開始，先來講阮的家鄉「彰化」這個鬼仔所在。 真無簡單逃出彰化，去到足遠足遠的德國柏林，為啥欲轉來寫永靖？ 彰化有夠保守閣亂糟糟，但是這个所在出了邱妙津（1969-1995）這位作家，若是伊後來無佇法國巴黎結束生命，無的確就會轉來寫永靖？思宏學姊講，伊寫小說時定定想起邱妙津。彰化就親像臺灣人的精神原鄉，躊躇佇傳統和現代性之間，咱其實毋捌認真想過家己是誰（who am I）？透過文學，陳思宏關心性別權力、文化差別和城鄉發展，伊寫的角色攏是予社會咬到糊糊的人物，讀了會疼，疼完會有力量。 特別單元「臺灣當代出版計畫」第一集咱對彰化溪州開始，訪問吳晟老師按怎寫出這片土地的詩句，最後一集咱轉來彰化永靖，來聽半世紀了後的彰化文學，按怎佇陳思宏的筆下活出驕傲的模樣？緊來聽節目！ ►節目好看頭 • 為啥小說內底的角色攏咧「逃走」？ • 按怎看彰化這个無可能改變的保守環境？ • GAY佇彰化這款保守所在的成長處境？ • 世界各國讀者對彰化故事的反應？ • 對阿愷之聲的彰化聽眾來講一句話？ ► 來讀冊｜陳思宏的夏日壞掉三部曲/ 鏡文學 https://www.books.com.tw/products/0010917275 ► 阿愷推薦三本陳思宏的作品｜ 先讀《樓上的好人》的員林，然後看《叛逆柏林》，最後轉來《鬼地方》永靖 ► 特別感謝｜員林演藝廳、阮劇團、吳紫莖 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第九集讀冊會，作伙講冊的是咱溪州阿倫，阮準備來讀張郅忻佇九歌出版的「客途三部曲」，這三部曲分別是2017年《織》、2020年《海市》閣有2023年的《山鏡》。張郅忻對家族史開展出各種小人物的故事，這三本小說寫出複雜豐富的大時代，實在非常精彩！ 咱會使對張郅忻2013年發表的散文《我家就是聯合國》看著，伊是佇一个有客家長輩、越南和印尼阿妗（舅媽）閣有阿美族血統小妹的環境中成長，「多族群」是伊後來寫作小說的特色。這套「客途三部曲」會使講是張郅忻對家己家族史出發的故事，第一齣《織》寫著阿公來到越南投資紡織事業，第二齣《海市》是阿母孤身來到台北西門町打拼，第三齣《鏡》寫了來到山頂做原住民保留地中人（仲介）的阿爸。張郅忻寫的攏是毋甘願的小人物，遮的小人物攏想欲做頭家，想欲活出家己。 小人物到最後按怎失敗，按怎予這个社會咬到糊糊？張郅忻的小說作品有足大的關懷，咱會使看著女性按怎佇父權環境中毋認輸，彼款生命力的韌性。最後，其實阿愷之聲講冊的節目足罕咧講女性的作品，毋管是女性作家抑是寫女性的主題，這集節目咱來讀張郅忻，感觸足深，有影適當。 總講一句這三本小說非常好看，趕緊來收聽節目！ ► 咱來讀冊｜客途三部曲 https://www.books.com.tw/products/0010962096 ► 特別感謝｜九歌出版、包說女士、陳俊宇 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第八集的特別來賓是作家黃崇凱，作家阿凱足愛用文學來挑戰歷史，毋管是濺戰後臺灣藝文史的《文藝春秋》（2017）、抑是古巴和臺灣運命大交換的《新寶島》（2021）等，咱總算佇今年（2024）八月等著伊上新的小說《反重力》 ，本集節目就欲來講這本燒燙燙的新冊！ 這本小說媠噹噹的封面寫著一个日期「1969年7月21號」，這是啥？ 這是人類第一遍來到月娘的日子，當時美國和蘇聯當咧太空比賽，隔當年佇日本大阪世界博覽展示文明的進步。同一个時間佇臺灣，彭明敏教授順利逃出國民黨的控制，流亡瑞典，後來發生泰源監獄事件、臺南美國新聞處爆炸，閣有臺灣人佇美國計畫暗殺蔣經國......。若講「反重力」的物理意義是創造一種跳脫重力的力量，按呢彼時代的人，毋管是來到外太空的美國人，也是佇戒嚴時代的臺灣人，逐家的夢想就是反重力。 崇凱是國家人權博物館的駐館藝術家（2020-2021年），這本小說會使講是延續《新寶島》的話尾，隨著國家機密檔案一步一步開放，咱總算會當讀著這本寫冷戰時代臺灣的小說，這時陣文學按怎補足歷史，來寫出時代中各種複雜的情緒？ 這集節目非常精彩，歡迎收聽阿凱和阿愷空中相會！ ►節目好看頭 • 啥原因決定寫冷戰背景的小說？ • 按怎對歷史來發展小說？寫冷戰的挑戰是啥？ • 阿凱的作品定定有強烈的現實基礎，寫作時敢捌設想讀者是誰？ • 寫作歷史人物時按怎設想彼時代的人咧想啥？ • 啥機緣聽著阿愷之聲XD？ ► 來讀冊｜黃崇凱《反重力》 https://www.books.com.tw/products/0010998193 ► 特別感謝｜春山出版、臺南醉仙閣和鄭韶昀 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

【EP143 空中泡茶間：老屋曆？木都嘉義的規劃藍圖 ft.學邑工程顧問蔡佳明董事長】 ► 工商服務｜老屋曆x木都2025臺灣建築圖鑑 https://r.zecz.ec/pPLT ► 阿愷之聲聽眾落單前只要寫〖KAI60〗就會使折60塊！ 歡迎收聽阿愷之聲Podcast「空中泡茶間」單元，這集的特別來賓是阿愷佇臺大城鄉所的學長aka學邑工程顧問公司董事長蔡佳明。現子時，阿明和阿愷空中相會，阮欲來講嘉義木都的故事！ 小等咧，為啥一間都市規劃公司欲來舞一本桌面蠟曆（桌曆）？ 佮嘉義市的機緣，除了來賓本身是嘉義囝婿（女婿），阿明董事長講閣有兩个關鍵角色：第一是台長阿愷本人，第二是南華大學建築系陳正哲教授。今仔日嘉義的街仔路有真濟（多）木造建築，這和這个城市的歷史有關係，三年前學邑團隊和嘉義市政府合作，透過都市更新來規劃城市中一叢一叢的木造建築群，但是阿明董事長毋甘願代誌只有按呢，所以有了學邑團隊用心製作的這本「老屋曆X木都 2025 臺灣建築圖鑑」，一筆一劃記錄嘉義的面模（地景），講出這个城市珍貴的故事。 若講城市是一个人，街路建築就是城市的面，老屋曆會使講是一本嘉義市的故事，咱對嘉義瞭解臺灣的故事，2025年就用這本老屋曆陪伴咱每一工（天），緊來聽節目。 ►節目好看頭 • 啥款機緣予這間臺北的規劃公司落南來嘉義？ • 嘉義是一个啥款的城市？木都是啥？ • 都市更新和木造建築維護按怎同時可能？ • 規劃公司來做蠟曆是毋是想袂開？ • 為啥恁需要一本「老屋曆」？ ► 節目音樂｜鹿港新聲閣 ► 節目支持｜學邑工程顧問/學聯不動產 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第七集讀冊會作伙講冊的有秀水奕瑄和鹿港學姊，阮準備來讀李金蓮 2023年九歌出版的短篇小說集《暗路》，這本小說內底寫了七段寂寞的人生故事，雖然苦澀，但是讀完會回甘。 「我敢有可能繼續寫作？」 這是工作幾落年了後的李金蓮問家己的問題，這位昔日的文學少年，後來有了家庭工作以後，文字漸漸仔變成一款討生活的工具。伊進前是中國時報「開卷周報」的主編，負責評論冊、選出年度好冊，影響幾落世代的臺灣讀者，但後來報社環境愈來愈歹，李金蓮決定離職，同時向國藝會提出寫作補助計劃，伊用五年時間完成頭一本長篇小說《浮水錄》（2016年），這本冊後來提著金鼎獎，對作者來講是足大的鼓勵，也叫醒伊的文學夢。 抱著可能是最後一本冊的屈勢（姿態），李金蓮決定繼續挑戰短篇小說，伊佇2023年完成這本《暗路》，對阿愷來講，李金蓮正港是寫短篇小說的高手，伊將對人性的觀察寫入去小說當中，雖然寫著生活中足細、足幼的故事，但李金蓮就是有法度寫出予人搥心肝的故事，咱會使佇這本小說看著家己的人生。 風颱天，阿愷之聲猶原佇空中陪伴各位，逐家就要注意安全，乖乖踮厝內聽阿愷之聲、讀小說，希望風颱莫造成嚴重災情，各位保重！ ► 咱來讀冊｜《暗路》 https://www.books.com.tw/products/0010962070 ► 特別感謝｜九歌出版 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

「我們先不要一直問什麼是原生種或外來種，什麼是自然或人為，或什麼是原始或現代——可能根本就沒有什麼不是自然，一切自然而然。」－〈銀合歡〉 歡迎收聽阿愷之聲Podcast特別單元「臺灣當代出版計畫」，第六集讀冊會作伙講冊的有溪州阿倫和秀水奕瑄，阮準備來讀黃瀚嶢 2022年的冊《沒口之河》，這本冊是春山出版最近臺灣非常厲害的自然書寫，佇2023年提著臺灣文學金典獎，討論度足懸（高）。 講著台東知本，恁會想著啥？ 黃瀚嶢因為大學參加自然保育社團，伊來到台東調查生態，煞意外參與反對知本濕地設置光電場運動，「知本濕地」會使講是因為環境抗爭出現的地景概念。這本《沒口之河》對知本溪寒天的沒口現象，講到岸邊各種植物，黃瀚嶢幼路的文筆，用植物寫出台東族群文化和歷史經濟的故事，面對人類世界的各種慾望，咱按怎向大自然和傳統文化體系學習？ 毋管你敢捌自然生態，這本冊會使對知本瞭解臺灣的故事，非常推薦，緊來聽節目！ ► 咱來讀冊｜《沒口之河》 https://www.books.com.tw/products/0010942100 ► 特別感謝｜春山出版 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第五集是讀冊會，作伙講冊的是溪州阿倫，阮準備來讀 #陳柔縉 2020年的長篇小說《#大港的女兒》，這是伊頭一本小說，也是最後一本......。 陳柔縉是誰？伊是記者、歷史研究者也是小說家，早期走政治線新聞走出這本《總統的親戚》（1999年），這本冊非常出名，內底詳細寫出臺灣政商階級的家族關係，甚至後來變作各家記者的參考冊。2000年了後本土政權執政，各種臺灣研究鬧熱出聲，陳柔縉走出一條新的路，伊開始寫逐家人的歷史故事，作品大概分作兩類，第一類是物件的歷史，包括2005年的《臺灣西方文明初體驗》、2007年的《囍事台灣》、2009年的《人人身上都是一個時代》等，第二類是寫人物的故事，包括2006年寫外交官張超英的《宮前町九十番地》、2015年寫臺獨運動者羅福全的《榮町少年走天下》等。 對寫政商關係到寫大眾歷史，陳柔縉的作品非常豐富而且好讀，但我感覺這一切親像為著寫小說咧準備，這本《大港的女兒》綜合了所有作品的特色，會使講是陳柔縉全部寫作的收線。《大港的女兒》參考女性實業家孫雪娥的人生故事，對日本時代到戰後，對高雄到東京，對大家族到小家庭，陳柔縉透過寫出女性的時代處境來暗示臺灣的運命，這本小說的企圖真有份量，但手路足溫暖。 看完這本冊，阮也咧想，若是陳柔縉無佇2021年發生車禍往生，續落來伊閣會寫出啥款的作品？咧看，這个問題永遠攏無答案囉。 ► 節目開場｜カラス（karasu）是日語烏鴉的意思 ► 咱來讀冊｜《大港的女兒》 https://www.books.com.tw/products/0010876263 ► 特別感謝｜包說 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast「文學烏亂濺」單元，這集欲來講一本新經典文化今年六月出版的棒球小說《斷棒》，作者是來自台中的捕手陳尚季（阿季），但因為阿愷是出一支喙的運動白痴，所以邀請溪州右投阿倫作伙講冊，到底阿季是按怎用小說起造棒球場？ 意識著家己無可能變作職業選手，雖然鬱卒，陳尚季決定用小說來接近球場，這本短篇小說集是伊繼續愛棒球的方式。《斷棒》有八篇短篇小說，場景根本是臺灣近代棒球史，小說主角有原住民選手、外國仔球員、外省仔教練、閣有做手套的人，雖然是一本棒球小說，但故事講的是球場背後親情、友情和個人的向望，看完非常感動，原來棒球迷人是因為咱佇當中看著人生。 聽眾朋友恁若是興棒球，這本小說和這集節目一定要聽！ ►節目好看頭 • 棒球的熱情對佗開始？ • 知影無可能變成職業選手的心情？ • 為啥欲用寫小說來接近球場？ • 影響阿季的棒球文學是啥？ • 寫作上對照現實場景、人物和事件的意義是？ ► 來讀冊｜《斷棒：陳尚季短篇小說集》 https://www.books.com.tw/products/0010990876 ► 相片提供｜福興游擊手陳君宥 ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

“人類世的裂縫”－陳冠彰對這張相片的解釋 歡迎收聽阿愷之聲Podcast，這集節目準備大膽來濺一本人類學研究《在世界盡頭遇到松茸》，作者是美國加州大學Santa Cruz分校人類學系教授安清（Anna Tsing），作伙來和阿愷講冊的特別來賓是臺南藝術大學藝術創作理論研究所博士陳冠彰，聽講伊捌佇曾文溪拄著Anna Tsing（聽說他曾在曾文溪遇見Anna Tsing）？？ 安清對松茸講出一段按美國奧勒岡荒廢樹林到日本高級禮物的精彩故事，故事中，人類學家提醒咱看待世界的角度莫只有人類本身，要對主流之外的物件保持關心才對。今年初完成博士學位的陳冠彰，伊的論文田野竟然是一條溪，曾文溪是一條充滿自然和人類互相干擾的溪流，對中游到頂游，甚至西拉雅和鄒族族群對這條河有各自的理解，到底冠彰是按怎對安清的研究得著靈感，曾文溪的故事會使按怎講？ 總講一句緊來聽節目，聽阮作伙濺這本人類學經典！ ►節目好看頭 • 安清的冊對咱做研究的影響？ • 一開始按怎理解如此複雜的曾文溪？ • 對西拉雅到鄒族，這條溪會使講啥物故事？ • 多物種民族誌對當代社會的意義？ • 推薦啥款的朋友來讀這本書？ ► 來讀冊｜《在世界盡頭遇到松茸：論資本主義廢墟中生命的可能性》 https://www.books.com.tw/products/0010983168 ► 冠彰博士論文口試｜Yih-Ren Lin老師的現場紀錄 https://www.facebook.com/share/p/5nohx33nU1gsudAn/ ► 阿愷的碩士論文研究｜鹿港木工岫：家族企業頭家與木工師傅的關係生產 https://blog.geogsoc.org.tw/siu-of-furniture-industry-in-lukang-ck-wang/ ► 特別感謝｜陳世岸建築師的牽成 ► 背景相片｜曾文溪的攔沙壩（陳冠彰,2022） ► 節目音樂｜鹿港新聲閣 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第四集咱邀請了作家王昭華，伊的頭一本臺語文散文《我隨意你盡量》佇2023年出版，出版後隨得著臺灣文學金典獎。這是一本用聲音填畫面的散文集，對淡水真理街開始，咱來綴（跟）昭華老師散步！ 可能有一寡人是對電影《大佛普拉斯》片尾曲「有無」這條歌熟識昭華老師，這條歌得著2017年金馬獎最佳原創電影歌曲，歌詞簡單，意義足深。一直以來昭華老師創作不斷，按寫歌寫詞到出專輯，對寫文章寫繪本到提文學獎，臺語是伊觀察世界的方式，對屏東潮州到台北淡水，各種日常生活的細節攏有文學上的意義，有心適（趣味）、有感性、有向望（希望），這本《我隨意你盡量》充滿昭華老師的生活哲理，媠氣（漂亮）的臺語文予每一篇散文充滿聲音的美感，呢讀呢念呢感動。 到底「昭華式散步」是啥？緊來收聽這集節目！ ►節目好看頭 • 家鄉對一位寫作者的意義是啥？ • 啥原因決定來寫淡水的生活？ • 按怎培養出「昭華式散步」？ • 為啥欲用臺語來寫作？初初的挑戰有啥？ • 敢有彼本一段時間就會提出來讀的文學作品？ ► 來讀冊｜《我隨意你盡量》 https://www.books.com.tw/products/0010951856 ► 特別感謝｜九歌出版社 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast，這集節目阿愷準備和鹿港學姊出外景來去屏東看豬，阮來到屏東縣竹田鄉的 #旺緒畜牧場，這是一間現代化飼豬場，到底這个所在和傳統豬寮有啥物差別？ 食品安全是臺灣人愈來愈重視的代誌，健康的豬肉就要有快樂的成長環境，所以現代化飼豬場就是一種產業升級。以前咱感覺傳統豬寮就是臭閣垃圾（骯髒），但是這馬的飼豬場有電腦控制的好環境，降溫通風，而且豬寮的高床式設計予環境衛生，豬仔袂臭，低密度飼養加上對飼料的堅持，這款環境大漢的豬，就是毛病少閣大了緊。 這集節目就對阿愷和學姊來去看豬，一開始，先來講豬肉料理！ ►節目好看頭 • 好食的豬肉口感是......？ • 行過二十冬，揮別口蹄疫暗影的臺灣養豬業？ • 來去現代化飼豬場竟然要穿太空衫？ • 豬快樂的祕訣？ • 學姊推薦的豬肉料理是......？ ► 填表抽獎｜台經院國人養豬場形象活動成效認知調查 https://tier.surveycake.biz/s/Mve1a ► 相片來源｜下港女子 ► 節目音樂｜鹿港新聲閣 ► 節目支持｜財團法人台灣經濟研究院、開屏趣 #現代化養豬場、 #旺緒畜牧場、#屏方根文化有限公司 ► 現代化養豬場推廣活動歡迎參加｜ 🐖8/31-9/13： HAPPY PIG HAPPY TEAM 那些你不豬道的事－空間展覽（屏東市瑞光里活動中心－屏東縣屏東市瑞中路13號） 🐖9/7：HAPPY PIG HAPPY TEAM 那些你不豬道的事－繪本講座：小豬不會飛（黎記眷村食堂－屏東縣屏東市青島街99號） 🐖9/8：HAPPY PIG HAPPY TEAM 那些你不豬道的事－C&C Butcher 健康肉食體驗（屏東西市場 6 號攤位－屏東縣屏東市和平路320號） ► 歡迎贊助阿愷之聲Podcast：voiceofakai.oen.tw Powered by Firstory Hosting

歡迎收聽阿愷之聲Podcast特別單元「臺灣當代出版計畫」，第三集咱邀請了記者 #胡慕情，伊的新冊《#一位女性殺人犯的素描》非常好看，本集的主題是逼近事件的寫作，敢講新聞永遠只有單一結果？ 第一遍讀胡慕情的冊，彼時阿愷咧讀研究所，三不五時就去台北市社子島做田野調查，面對市政府譀古（誇張）的開發計畫，我的冊包隨時帶著《黏土》，這本冊紀錄了苗栗灣寶農民按怎抗爭無理土地徵收的故事，讀了誠感動，是當時我重要的參考冊。 2015年出版的《黏土》，隔當年得著金鼎獎，彼時陣得獎致詞的毋是作者，是冊中主角洪箱阿姨，因為慕情講這本冊是灣寶的冊。後來慕情的報導關懷對環境議題來到社會新聞，伊開始追蹤隨機殺人事件，我感覺慕情是一位毋甘願的記者，毋甘願這款新聞定定潦草講煞，到底是啥款的環境造成事件的發生？今年（2024）胡慕情完成新冊《一位女性殺人犯的素描》，這本冊追蹤一件發生佇十年前的殺人事件，主角林于如是目前猶未處刑的死刑犯，到底新聞標題「驚世媳婦」背後，是啥原因予這位女性決定行動？ 無管你相信報導有可能改變社會抑無，這集節目攏值得你來收聽！ ►節目好看頭 • 為啥欲繼續追蹤一件十幾年前的新聞？ • 為啥欲寫林于如？寫作者面對事件的位置？ • 對《黏土》到新冊，寫作關懷的轉變？ • 想欲透過寫冊來對這个社會講啥？ • 倒轉來問，為啥想欲做一位記者？ ► 來讀冊｜《一位女性殺人犯的素描》 https://www.books.com.tw/products/0010979752 ► 特別感謝｜鏡文學、洪育增 ► 影像製作｜陳君宥 ► 節目音樂｜鹿港新聲閣 ► 節目贊助｜文化部 #文化部國家語言整體方案支持 #台語主流化 ► 歡迎贊助阿愷之聲Podcast：voiceofakai.oen.tw Powered by Firstory Hosting