جزمة مقطعة
تمام زيى أنا …. رسم عليها تراب الطريق ميت ألف تجعيدة
ياما خدتنى وراحت فى الزحام ,, مشاوير بعيدة
وفى النهاية تترمى جنب السرير .. منهكة …
لكن سعيدة

…………………………………………

من كام سنة صاحبت خُطايا
مرة فى خير
مرااااااااات خطايا
لا عمرها يوم اشتكت
لكن بكت على صوت بكايا
على أهه منى على تنهيدة

………………………………………….

والنهاردة ميعاد طلوعها عالمعاش
مش باقى من نعلها حتة قماش
حتى رباطها اللى اتلضم ميت مرة باش
لكن سؤال واجعنى الليلة عاش
هى ديا المجدعة
انى ارمى جزمة مقطعة
دابت عشانى
عشانى أنا
يا مشاعرى البليدة