I Kôrintô 1:1-3

 “Chih hơpong kơ lu ‘nhŏng oh bơngai lui tơ pơlei iĕm Kôrintô. ‘Bok Kei-Dei rơih iŏk iĕm jing kon Sư, iĕm jing bơngai tơpăt yua kơ iĕm lui kơ Yêsu Krist, noh kư̆m thoi lĕ đĭ đăng bơngai mă krao khan kơ Yŏng bơ̆n Yêsu Krist jơ̆p kơ anih; Sư Kră Yang đĭ đăng kơ bơ̆n.”   (I Kôrintô 1:2)

Nơ̆r jet tơchĕng pơwao:

–               ‘Bok Pôl roi tơpăt thoi yơ gah bơngai chih kơthơ?

–               Sư tơ ‘blŏk roi anăn bơngai nai hăm jơhngơ̆m păng tơ’bôh jơhngơ̆m thoi yơ?

–               Tơdrong lăng gah tơdrong gĭt kăl bơngai nai đei yua kiơ?

Pơih nơ̆r pơma jet gia đơ̆ng bơngai chih kơthơ, ‘bok Pôl chih pơtơm đơ̆ng I Kôrintô hăm tơdrong roi tơbăt gah bơngai chih kơthơ păng bơngai iŏk kơthơ pêng trong nơ̆r ‘Bok Kei-Dei pơih nơ̆r pơma blŭng a tơ’bôh kơ bơ̆n ‘bok Pôl lăng gah tơdrong gĭt kăl bơngai nai.

Blŭng a, lăm pơih nơ̆r pơma đơ̆ng bơngai chih kơthơ, ‘nguaih kơ anăn ‘nhĕng sư, ‘bok Pôl ‘blŏk kơ Sôten, “’Nhŏng oh bơ̆n” lăm tơdrong jing bơngai chih kơthơ (trong 1). Tơdrong tơ’blŏk kơ Sôten tơ’bôh ‘bok Pôl ưh kơ đei khan kơdih sư bơih tơm păng lu bơngai nai tơgŭm đĕch, ưh kơ trŏ wă ‘blŏk roi anăn. Tơplơ̆ dơ̆ng, sư ling lang pơyom kơ lu bơngai  jang hơdai sư, lăng lu sư thoi “’nhŏng oh”, lei lăi băl păng tơgŭm dih băl.

Mă ‘bar, gah bơngai mă iŏk kơthơ, sư pơkă gơih ăn “chih hơpong kơ lu ‘nhŏng oh bơngai lui tơ pơlei iĕm Kôrintô. ‘Bok Kei-Dei rơih iŏk iĕm jing kon Sư, iĕm jing bơngai tơpăt yua kơ iĕm lui kơ Yêsu Krist, noh kư̆m thoi lĕ đĭ đăng bơngai mă krao khan kơ Yŏng bơ̆n Yêsu Krist jơ̆p kơ anih; Sư Kră Yang đĭ đăng kơ bơ̆n.” (trong 2). Tơdrong mă yua kiơ̆ kơ sư chih kơthơ ‘nâu ưh kơ sĭ yua kơ Khul Bơngai Lui Kôrintô hiôk ‘lơ̆ng trŏ kơ lăp đon ôh, na yua kơ lu sư oei tơ’bơ̆p lơ tơdrong lăm tơdrong lui păng tơdrong kơkuh. Mă khan lu sư tơbơ̆p thoi noh, sư oei tơchĕng păng chih ăn kơ lu sư hăm nơ̆r pơyom hloh. Sư băt hơđăl lu sư “bơngai lui”, ưh kơ đei gơnang kơ akâu kơdih, na gơnang kơ pham Kră Yang Yêsu.

Bơngai pơtrơp dơ̆ng ‘bok Pôl chih gơh ăn kơthơ noh “chih hơpong kơ lu ‘nhŏng oh bơngai lui tơ pơlei iĕm Kôrintô. ‘Bok Kei-Dei rơih iŏk iĕm jing kon Sư, iĕm jing bơngai tơpăt yua kơ iĕm lui kơ Yêsu Krist, noh kư̆m thoi lĕ đĭ đăng bơngai mă krao khan kơ Yŏng bơ̆n Yêsu Krist jơ̆p kơ anih; Sư Kră Yang đĭ đăng kơ bơ̆n.” (trong 2. Pơma pha ‘biơ̆, kơthơ sư chih ‘nâu ưh kơ sĭ ‘măn kơ Khul Bơngai Lui Kôrintô đơ̆ng sư pơjing đĕch ôh. Sư chih kơthơ wă bơtho, chrih khă păng tơ’blŏk kơ đĭ đăng kơ bơngai krao Anăn Kră Yang Yêsu, wă khan lu bơngai mă lui kơ ‘Bok Kei-Dei đơ̆ng Sơ̆p Hla bơar Nơ̆r Sư, ‘Bok mă ăn Kră Yang Yêu jur tơ lăm teh đak chu lôch wă dŏng pơklaih kon bơngai. ‘Bok Pôl lăng ‘bôh, Khul Bơngai Lui kơ ‘Bok Kei-Dei ưh kơ sĭ jơ̆ lu bơngai rok kiơ̆ sư bơtho gah tơdrong kơkuh đĕch ôh mălei jơ̆ khul tơpôl tih să dai lui kơ Kră Yang Yêsu lei lăi mă khan phara kơ tơdrong pơjing păng tơdrong kơkuh.

Lăm tơdrong jang bơ̆jang kơ Kră Yang, bơ̆n ưh kơ đei jang kơdrô̆ bơ̆n na jang hơdai hăm bơngai lui nai. Mă khan tơdrong jang rim ‘nu phara mălei đĭ đăng kơ bơ̆n tă kơ bơngai bơ̆jang  kơ Kră Yang ngăl. Wă kơ tơdrong bơ̆jang kơ Kră Yang đei yua, rim ‘nu kơ bơ̆n kăl kơ lăng băt tơdrong gĭt kăl dih băl, pơih să gah Khul Bơngai Lui kơ ‘Bok Kei-Dei jơ̆p jang wă kơ pôm jơhngơ̆m đon tơgŭm dih băl ră roi Anăn Kră Yang jơ̆p anih.

Ơ Kră Yang, kơkuh kơ Ih, inh bơnê kơ Ih yua kơ Ih băt kơ inh đơ̆ng ‘long pơglang Kră Yang Yêsu. Apinh Ih ăn kơ inh pơhrăm pơjuăt tơchĕng păng pơma roi gah lu ‘nhŏng, mŏ, oh lăm đon lui kiơ̆ kơ nơ̆r Kră Yang pơma gah lu sư wă kơ nhôn hŭt lê̆ lu tơdrong phara, wang rôp băl ti bơ̆jang kơ Kră Yang. Krao khan yua anăn Kră Yang Yêsu Krist, Amen.

Bơ̆n lăng thoi yơ gah tơdrong gĭt kăl đơ̆ng ‘nhŏng oh bơ̆n păng gah Khul Bơngai Lui kơ ‘Bok Kei-Dei.

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 18

Kênh Youtube BHKTHN:

https://www.youtube.com/c/bhkthn

The post ‘Bar ‘Nu Bơngai Lăng – 30/10/2025 appeared first on Hội Thánh Tin Lành Việt Nam.