II Hơ’mon 34:1-3

“…mă sư oei ‘lơ̆p mơlôh, sư pơtơm chơchă Kră Yang ‘Bok Kei-Dei Đawit, ‘bok sư”

(II Hơ’mon 34:3a)

Nơ̆r jet tơchĕng pơwao:

–               Pơtao Jôsia pơtơm chơ chă Kră Yang kơplah hơyơ?

–               Pơtao đei pơm kiơ păng arih thoi yơ kơplah wă chơ chă Kră Yang?

–               Dang ei bơ̆n kăl kơ pơm kiơ wă kơ bơ̆n kơdih păng kon sâu bơ̆n pơtơm chơ chă Kră Yang?

Pơtao Jôsia jơ̆ pơtao pơgơ̆r ‘lơ̆ng tuch luch lăm dêh char Juđa. Sư pơgơ̆r pêng jĭt mônh sơnăm păng đei Kră Yang yua wă râu tơiung, hơmet ming tôm tơdrong lui ăn kơ bơngai Juđa mă puh pơ̆ng huŏng jrŭ lăm tơdrong kơkuh kơ rup yang. Đơ̆ng rŏng kơ đe pơlôch pơtao Ammôn, Jôsia tŏk pơm pơtao kơplah sư ‘nao lăp tơhngam sơnăm. ‘Bă sư bơngai mă pơm tơdrong kơnê̆ ‘bơ̆t anăp Kră Yang ‘Bok Kei-Dei, soi sơmah păng bơ̆jang kơ lu rup yang. ‘Bok sư Manase kư̆m minh ‘nu pơtao pơm kơnê̆, mă khan tuch luch chăl arih sư đei wih brŏk tơ Kră Yang, mălei dôm tơdrong kơnê̆ đêl pơtao Manase pơm adrol sơ̆ oei ‘bơm ưh kơ ‘lơ̆ng hơnơ̆ng lăm kon pơlei.

Ưh kơ đei năm kiơ̆ trong ‘bă păng ‘bok sư, pơtao Jôsia rơih iŏk trong kiơ̆ pơtao Đawit, ‘bok adrĕch adrung sư, mă khan Đawit arih jô̆ đơ̆ng sư truh tơ pơtao Jôsia puăn hrĕng sơnăm. Kơplah rơih iŏk trong ‘mêm kơ Kră Yang pơtao Đawit, lei na pơtao Jôsia arih nhen thoi pơtao Đawit “’Nĕ kơ weh achăng hŭt lê̆ nơ̆r tơtă inh bơtho khan năr ‘nâu, ‘nĕ kơ weh tơ ‘ma dah tơ ‘ngiĕo ‘nĕ kơ năm bơ̆jang kiơ̆ lu yang nai.” (Bơtho khôi juăt 28:14 ), păng lăp năm kiơ̆ trong Kră Yang wă kơ sư năm. Kơplah sư mơjĭt tơdrâu sơnăm, pơtao Jôsia pơtơm chơ chă Kră Yang ‘Bok Kei-Dei, minh tơdrong pơtơm ‘nao lăm trong gah bơhngol wă năm lăm trong Kră Yang, bơ̆jang păng kơkuh kơ Sư đĭ jơhngơ̆m.

Ưh kơ đei bơngai bu rơih kơdih khan wă kơ tơpŭ lăm hnam dơnŏ ayơ dah mă wơ̆ ‘lŏ lăm teh đak ayơ. Lơ bơngai hơmuh hơmŏng, đe tơpŭ lăm hnam dơnŏ mă ưh kơ băt kơ Kră Yang đei lơ jơ năr wă kơ Kră Yang yua, phŏ yua. Lu bơngai đe tơpŭ păng wơ̆ ‘lŏ lăm hnam dơnŏ lui yom kơ Kră Yang lei na rai đei jơ năr hloh. Mă đe tơpŭ lăm dơnŏ ayơ, arih thoi yơ, tơdrong gĭt kăl noh bơ̆n athei rơih ăn kơ bơ̆n kơdih trong năm kiơ̆ ‘Bok Krist, rok kơmĭl Kră Yang Yêsu, arih kiơ̆ thoi Sư lăp đon. Wă kơ đei thoi ei, bơ̆n athei “Ưh kơ weh gah ‘ngiĕo dah gah ‘ma” ưh kơ rơih kiơ̆ kơmĭl kơnê̆ đơ̆ng lu bơngai ưh kơ lui yom dah mă lu bơngai blah plơ̆ Kră Yang.

Dang ei, lơ bơngai lui kơ Kră Yang đunh bơih mălei bơ̆n hăm tam băt hơđăl tơpă bơ̆n oei chơ chă Kră Yang dah ưh? Apinh Kră Yang tơgŭm kơ lu bơngai hơ’lơ̆p hơmuh hơmŏng yua iŏk jơ năr pơtơm chơ chă Kră Yang dang ei hloi wă kơ gơh đei Kră Yang yua thoi pơtao Jôsia. Lu bơngai hơ’lơ̆p oei iĕ, lu hơ’lơ̆p mơlôh kư̆m gơh pơtơm chơ chă Kră Yang đơ̆ng tơdrong hŏk pơhrăm Nơ̆r Sư, pơtơ̆p pơjuăt bơ̆jang kơ Kră Yang đơ̆ng dôm tơdrong jang lăp trŏ trŏ ‘măn ăn kơ lu sư. Lu bơngai mĕ ‘bă athei chơ chă Kră Yang dang ei hloi, păng kăl kơ tơgŭm kon sâu bơ̆n jah pơtơm chơ chă Kră Yang ‘Bok Kei-Dei rai ‘lơ̆ng hloh, yua kơ tơdah ưh lei na lu sư gô chă tơdrong chơt hiôk lăm teh đak âu.

Ơ Kră Yang, kơkuh kơ Ih, apinh ăn kơ jơhngơ̆m inh tŏ chhông, maih wă chơ chă Kră Yang ‘Bok Kei-Dei đơ̆ng dang ei hloi, wă kơ inh păng kon sâu inh ăn Kră Yang yua lăm tơdrong jang hnam Yang ‘bă Krao khan yua anăn Kră Yang Yêsu Krist, Amen.

Bơ̆n oei chơ chă Kră Yang dah oei chơ chă tơdrong kiơ nai?

 Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 17

Kênh Youtube BHKTHN:

https://www.youtube.com/c/bhkthn

The post Pơtơm Chơchă Kră Yang – 29/10/2025 appeared first on Hội Thánh Tin Lành Việt Nam.