Mathiơ 22:8-14

 “Na Yêsu khan dơ̆ng thoi âu: Tơdrong ‘noh pơtih gia kơ ‘Bok Kei-Dei krao lơ bơngai lui kơ Sư mă-lei Sư rơih iŏk lăp tŏ sĕt đĕch.” (Mathiơ 22:14 )

Nơ̆r jet tơchĕng pơwao:

–  Đơ̆ng rŏng kơ lơ bơngai sơngah kơ tơdrong et sa, pơtao đei pơm tơdrong kiơ?

–  Yua kơ kiơ pơtao krao wơ̆n “mă bơngai ‘lơ̆ng dah kơnê̆”?

–  Pơtao pơm thoi yơ hăm bơngai mă et sa pơkong mă ưh kơ tah hơbĕn ao tơdrong juăt đe pơkong?

– Lu bơ̆n đei yua iŏk ‘bai pơhrăm ayơ ăn kơ bơ̆n đơ̆ng nơ̆r ‘Bok Kei-Dei ‘nâu?

Lăm tơdrong roi hơ’mon ‘nâu Yêsu roi tơdrong et sa pơkong kon drŏnglo pơtao, kơplah lu bơngai đei krao wơ̆n mă ưh kơ mơ̆t sŏng sa pơkong, pơtao khan lu sư ưh kơ trŏ gơh mơ̆t lăm anih đe pơkong, thoi noh na sư athei lu đĭch đam sư năm rim trong jơ̆p anih “Thoi noh boih na dang ei iĕm năm răp rim trong bĕ, kư̆ kơ ‘bôh bơngai, krao sư sŏng sa tơ âu.” (trong 9). Na lu đĭch đam năm răp rim trong jơ̆p jang anih, krao wơ̆n rim bơngai “mă bơngai ‘lơ̆ng dah bơngai kơnê̆” wă khan ưh kơ pơdê bơngai ‘lơ̆ng dah kơnê̆. Yua kơ kiơ pơtao krao wơ̆n “mă bơngai ‘lơ̆ng dah kơnê̆”? Rŏ lăng kiơ̆ kơ kon bơngai bơ̆n lăng, bơngai ‘lơ̆ng, bơngai kơnê̆ mălei kiơ̆ kơ Kră Yang lăng đĭ đăng “Đĭ đăng kon bơngai weh ataih đơ̆ng ‘Bok Kei-Dei kiơ̆ tơdrong yoch ngăl.” (Rôm 3:23 ). Đĭ đăng kăl kơ sơng iŏk tơdrong dŏng pơklaih đơ̆ng ‘Bok Kei-Dei ngăl. Lu bơngai mă đe krao wơ̆n mơ̆t sa pơkong, đei tơplih hơbĕn ao kiơ̆ tơdrong juăt pơkong ‘noh wă pơtih kơ hrŭk ao ‘lơ̆ng tơpăt Kră Yang Yêsu, lu sư kăl kơ đei tơdrong Kră Yang ‘mêm noh, păng arih trŏ kơ tơdrong ‘mêm Kră Yang ăn đĕch kơ bơ̆n, pơkă pơkăm păng chu kiơ̆ dôm tơdrong pơtao hơgăt lăm anih sa pơkong noh, wă kơ trŏ kơ gơh mơ̆t lăm anih pơkong noh. Lăp truh jơ sa pơkong noh ‘bĕnh ‘bang kơ bơngai mơ̆t. Kơplah roi hơ’mon tơdrong ‘nâu, Kră Yang wă bơtho tơ’bôh kơ kon pơlei Juđê sơngah kơ Kră Yang Yêsu, păng tơdrong dŏng pơklaih ‘măn kơ lu bơngai tơmoi.

Đei minh ‘nu bơngai ưh kơ hrŭk tơplih hơbĕn ao tơdrong juăt pơkong. Bơngai ‘nâu kiơ̆ kơ đon sư kơdih, pơang, ưh kơ pơyom kơ pơtao păng tơdrong sa pơkong. Lăp pơtao khan kơ bơngai noh na sư ưh kơ pơ̆n tơl pơtao thoi yơ. “Na ‘bok pơtao athei lu bơngai jang kơ sư chô̆ jơ̆ng ti bơngai noh tơlơ̆ tŭk tơ anih măng mu lê̆ sư nhơ̆m hmoi tơkăp sơnĕnh tơ noh.” (trong 13). Bơngai ‘nâu ưh kơ gơh mơ̆t tơ anih đe et sa pơkong ôh, yua kơ sư ưh kơ băt sơng iŏk tơdrong ‘mêm mă pơtao ăn đĕch kơ sư mălei arih kiơ̆ kơdih wă.

Bơnê kơ Kră Yang tơpă yua kơ lu bơ̆n đei sơng iŏk tơdrong ‘mêm đơ̆ng Kră Yang mă ăn đĕch kơ bơ̆n. Lu bơ̆n âu trŏ kơ bơngai tơmoi ưh kơ trŏ đei tơdrong dŏng pơklaih păng ưh kơ hơnhŏ năm et sa pơkong Kon Triu đei akăn, mălei Kră Yang Yêsu dŏng pơklaih tơdrong yoch lu bơ̆n bơih “’Bok Kei-Dei ‘mêm mơnat kơ bơ̆n tơpă na Sư pơklaih bơ̆n đơ̆ng tơdrong yoch păng Sư jô̆ bơ̆n bơngai ‘lơ̆ng păng Sư boih. Sư ăn kơ bơ̆n jing kon Sư, na bơ̆n arih ling lang păng Sư ning-mônh.” (Tit 3:7). Lu bơ̆n athei gĭt kơ ao ‘lơ̆ng tơpăt mă Kră Yang Yêsu đei pơhrŭk ăn kơ lu bơ̆n, athei arih pơyom, tơ jur akâu chu yom Kră Yang yua kơ Sư ‘mêm kơ bơ̆n, ‘mêm lăm chăl arih bơ̆n. ‘Nĕ tơhiong tơdrong ‘mêm Kră Yang ăn kơ bơngai năm et sa pơkong mălei ưh kơ tơplih hơbĕn ao tơdrong juăt pơkong. Athei pơ’lơ̆ng lăm chăl arih kiơ̆ Kră Yang “Na Yêsu khan dơ̆ng thoi âu: “Tơdrong ‘noh pơtih gia kơ ‘Bok Kei-Dei krao lơ bơngai lui kơ Sư mă-lei Sư rơih iŏk lăp tŏ sĕt đĕch.” (trong 14).

Ơ Kră Yang mă ‘mêm, bơnê kơ Ih yua kơ inh minh ‘nu bơngai ưh kơ rơ a kiơ mălei Ih đei tơ’bôh tơdrong ‘mêm Ih ăn kơ inh. Apinh Ih tơgŭm inh băt bơnê kơ Ih, ưh kơ arih kiơ̆ kơdih wă, na tơhiong lê̆ tơdrong ‘mêm Ih ‘măn kơ inh. Krao khan yua anăn Kră Yang Yêsu Krist, Amen.

Lu bơ̆n hăm băt bơnê kơ Kră Yang păng chu kiơ̆ Sư lăm chăl arih rim năr ưh?

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 2

Kênh Youtube BHKTHN:

https://www.youtube.com/c/bhkthn

The post ‘Nĕ Tơhiong Tơdrong ‘Mêm Kră Yang Ăn Đĕch – 14/10/2025 appeared first on Hội Thánh Tin Lành Việt Nam.