Tơdrong Pơđơ̆k 30:13-14

 “Sư ưh kơ băt ‘mêm mơnat kơ bôl buăl ôh.Bơ̆n bơngai nai ưh kơ băt wă pơma lung sư thoi yơ dơ̆ng, yua kơ kơ sư pơma bơbĭt dêh. Sư chă tơdrong kơnê̆ păng đe. Sư bơngai hơwĕng, sư ưh kơ wă pơm tơdrong ‘lơ̆ng ôh,sư areh kơ bơngai ‘lơ̆ng. Năr ei kơnh đei lơ bơngai plơ̆ plĕch kơ đe,sư bơngai kư̆-kă, sư ‘maih pơhuơ̆ akâu ‘maih chă ngôi đĕch, sư ưh kơ ‘mêm kơ ‘Bok Kei-Dei” (II Timôthê 3:3-4).

Nơ̆r jet tơchĕng pơwao:

–  ’Bar tơdrong đei lăm jơhngơ̆m adrĕch bơngai kơnê̆ mă đei roi tơ kơpal ‘noh hei tơdrong kiơ?

–  Dôm lu tơdrong mă đei lăm jơhngơ̆m lu bơngai kơnê̆ ‘noh sơ̆ kư̆m oei hơnơ̆ng đei truh tơ chăl bơ̆n dang ei ‘bôh rơđah tơdrong noh thoi yơ?

Tơdrong mă pêng đei lăm jơhngơ̆m lu adrĕch bơngai kơnê̆ noh tơdrong pơang (tr.13). ’Bok Agur yua rup “tưk gơnur măt”, wă khan tơdrong lu sư lăng đe noh lăng hăm jơhngơ̆m pơang,pơdê đe, lăng đe ưh kơ rơ-a, lu bơngai âu ưh lăng tơpăt  muh măt bôl buăl wă kơ hlôh dih băl păng pơgơ̆p hơdai băl hơtŏ hơnơ̆ng.Lu sư lăng đe thoi tơmam lu sư yua wă chă lơi ăn kơ sư păng sư lăng đe thoi noh kư̆m wă pôk akâu sư kơdih mơ̆n. Adrĕch adrung “muh măt pơang” păng “tưk gơnur măt” wă pơma kơ adrĕch bơngai pơang, pôk kơdih akâu, pơdê bôl buăl…Dang ei lơ bơngai hơtai oei “tưk gơnur măt” chhôk pơang gah adrĕch adrung krung ioi, pơang kơ sư pơm tih, hơgei, mơdrŏng kư̆m pơang kơ đe đêl sư jang keh, jang đei yua…. ’Noh bơih lu bơngai mă yoch ưh kơ chu yom kơ lu mĕ ‘bă, iung blah ‘Bok Kei-Dei, lăng kơdih akâu tơm hloh, jô̆ kơdih akâu ‘lơ̆ng hloh kơ đe na jing pơang, chhôk kơ tơdrong yoch lu sư kơdih, pơdê kơ đe, areh, pơjăm lu bơngai pơm ‘lơ̆ng (II Têsalônik 2:4). Tơdrong đei lăm jơhngơ̆m lu adrĕch kơnê̆ noh tơdrong khĕnh hơwĕng (tr 14). Tơdrong pơđơ̆k roi gah adrĕch khĕnh, pơm kơnê̆ krưp, ưh kơ ‘mêm kơ  bơngai jih ‘ma. Tơdrong kơnê̆ tŏk kơjung dĭng truh tơ lu sư pơm kơnê̆ kơ lu bơngai “dơnuh hoh” “pơmat tat” wă tơ’bôh lu sư bơngai grên mơng, gơh kĕ, pran kơtang…Dang ei tơdrong khĕnh, tơdrong đe yua jơhngơ̆m pran kơtang pơm kơnê̆ kơ lu bơngai jih ‘ma noh đe pơm kơnê̆ tơ trong glung lăm pơlei tih,ưh kơ pôm tơ trong, tơ lăm pơlei thoi noh đĕch ôh, đe kư̆m rim năr yua hăm jơhngơ̆m khĕnh,pran kơtang pơm kơnê̆ pơma hil lăm brŏ,pơdah lăm Ti vi, lăm Điên thoăi..v..v… Bơ̆n ngăl ‘bôh pơdah lăm Ti vi, lăm Điên thoăi minh tơpôl rôp pơm kơnê̆ kơ minh ‘nu bơngai dĭng mă răm, mălei lu sư noh hiĕk chhôk ngôi yua kơ jei lu sư,chhôk khan lu sư bơngai đei đon ‘lơ̆ng, khan lu sư bơngai ‘lơ̆ng tơpăt, lu sư pơm kơnê̆ kơ đe noh khan lu sư bơwei tơdrong trŏ lu sư noh!

Mă khan ‘bok Agur pơma ‘bơm kơ lu bơngai pha ra,pha ra băl ră, mălei đei minh pang noh, đĭ-đăng nơ̆r pơđơ̆k ‘nâu hei pơma ‘bơm gah tơdrong pơang ngăl, bơ̆n lăng tơdrong noh, bơ̆n jô̆ noh lu sư pơrăm păng pơm kơ tơdrong pơgơ̆p tơ’bưh ‘lơ̆ng tơduă kon bơngai noh đĭ peng pong, đĭ pă đei bơih.Tơdrong pơang pơm kơ kon bơngai bơ̆n areh kơ bơngai kơpal kơ bơ̆n,bơngai mă trŏ kơ pơgơ̆r bơ̆n noh, na yua kơ thoi noh na jing ưh kơ chu yom kơ mĕ ‘bă, pơm plơ̆ kơ mĕ’bă (tr.11). Tơdrong pơang pơm kon bơngai dang măt tol ưh kơ ‘bôh kơdih akâu glăi (tr.12). Mă loi, tơdrong pơang kư̆m pơm kơ kon bơngai bơ̆n lăng pơdê kơ đe, lăng đe lŭch kơ bơ̆n (tr.13). Tuch luch sư, tơdrong pơang pơm kơ kon bơngai bơ̆n jing kret tơsen, lăng akâu kơdih gĭt kăl, na jing bơngai pơm kơnê̆ kơ đe krưp dêh, pơm ưh kơ tơpăt hơnơ̆ng hăm lu bơngai mă hơtŭch ‘biơ̆ kơ bơ̆n (tr.14). Pơma pơtôm, đơ̆ng tơdrong pang noh pơm tôm tơdrong yoch,kư̆m  kơlih yua kơ pơang na Lusipher sơ̆ iung blah ‘Bok Kei-Dei. Tơdrong pơang ‘noh tơplơ̆ hăm “jơhngơ̆m Kră Yang Yêsu Krist” ‘mêm,iŏk đon la, tơjur akâu, chu yom, păng chu lôch, chu răm kơdih akâu (Philip 2:5-8).  Hnam dơnŏ bơ̆n, adrĕch adrung bơ̆n arih kiơ̆ kơ Nơ̆r Kră Yang noh bơih hơnă tơm, kơjăp wă kơ teh đak bơ̆n arih lăm tơdrong phĭ jơnap, pŭn hiôk. Bơ̆n athei  krao khan apinh Kră Yang râu tơiung teh đak bơ̆n păng adrĕch adrung bơ̆n.

Ơ Kră Yang, apinh Ih tơgŭm inh bơwei jơhngơ̆m wă kơ iŏk jơhngơ̆m ‘Bok Krist, ling-lang arih ‘mêm   mơnat păng yak năm hăm tơdrong iŏk  đon ala’bơ̆t anăp Ih,’bơ̆t anăp bôl buăl tơduă kon bơngai.  Inh krao khan yua anăn Kră Yang Yêsu Krist, Amen!

Bơ̆n hăm krao khan apinh Kră Yang râu tơiung teh đak bơ̆n ưh?

Đŏk Sơ̆p hla bơar ‘Bok Kei-Dei lăm pêng sơnăm: Kôlôssê 1

Kênh Youtube BHKTHN:

https://www.youtube.com/c/bhkthn

The post Adrĕch Adrung Kơnê̆ – Pơang păng Khĕnh Hơwĕng – 8/10/2025 appeared first on Hội Thánh Tin Lành Việt Nam.