Tơdrong Pơđơ̆k 30:11-14

“Năr ei kơnh đei lơ bơngai băt ‘mêm akâu sưkơdih, mă ưh kơ ‘mêm mơnat kơ bôl buăl. Sư hăt kơ jên tơpă. Sư pơang akâu kơdih, păng chă pơma pơsôm kơ đe. Sư pơma kơnê̆ kơ đe. Sư ưh kơ chu yom mĕ ‘bă sư, păng sư ưh kơ băt bơnê kơ đe, sư kư̆ pơm kơnê̆ đĕch” ( II Timôthê 3:2).

Nơ̆r jet tơchĕng pơwao:

–               Nơ̆r ayơ pơma pơlơ̆k pơle lăm puăn nơ̆r âu păng nơ̆r noh wă khan kiơ?

–               Đei ‘bar tơdrong blŭng a mă lu adrĕch kơnê̆ pơm noh kiơ?

–               Dôm tơdrong đei pơm âu wă tơ’bôh kơ chăl lu bơ̆n dang ei thoi yơ?

            Puăn nơ̆r pơma pơđơ̆k âu đei pơma hăm nơ̆r “ đei minh adrĕch adrŭng”, lăp minh chăl arih, adrĕch adrŭng dah minh khul bơngai pơm tơ’bôh đơ̆ng tơdrong kăl kơ pơm ‘lơ̆ng dah đei jơhngơ̆m tơ’bôh hơđăl. Nơ̆r pơma pơlơ̆k pơle puăn wơ̆t wă tơ’bôh tơpă nơ̆r ‘bok khan lê̆ hơdrol pơma lu nơ̆r lăm tơdrong pơđơ̆k âu, păng tơdrong noh đei pơm tơ’bôh hơđăl hloh noh lăm tơdrong Kră Yang Yêsu bơtho. Lăm sơ̆p hla ar Tơdrong ‘Nao ‘Lơ̆ng, nơ̆r khan “lu adrĕch adrŭng âu” đei ‘bôh 16 wơ̆t. Kơplah yua nơ̆r pơma “adrĕch adrŭng âu”, Kră Yang Yêsu wă pơma kơ jơhnơr mă pơm kơnê̆,arih ‘bơ̆r đak klak ŭnh, ayăt kơ Kră Yang, pơ̆ng Kră Yang tơ ‘long pơglang (Mathiơ 23: 13,34-36) jơ̆ jơhnơr pơma pơ ư kơ lu bơngai ayăt kơ Kră Yang Yêsu  Krist (Mathiơ 24:4-6). Thoi noh, lăm jơhngơ̆m lu bơngai lăm teh đak sơngah kơ Kră Yang ‘Bok Kei-De ưh kơ đei tơplih đơ̆ng chăl ‘bok Agur loi 3.000 sơnăm nam tơ adrol, truh tơ chăl Kră Yang Yêsu, păng truh tơ dang ei. 

            ‘Bok Agur đei tơbăt puăn tơdrong arih lu bơngai kơnê̆. Mă mônh noh ưh kơ chu yom (tr.11). Ưh kơ chu yom ưh kơ sĭ khan “ hiap pơtê̆” (Lêch đơ̆ng Êyip tơ21:17 ; Lêwi 20:9), mă ‘noh jơ̆ “ưh kơ sơkat ăn pŭn hiôk”, wă khan ưh kơ ‘mêm mơnat, ưh kơ ‘blŏk tơtă păng ưh kơ pŭ iŏk tơdrong jang hăm mĕ ‘bă. Ưh kơ chu yom noh jơ̆ tơdrong yoch mă đei roi đơ̆ng blŭng a yua kơ bơngai kon ưh kơ chu yom mĕ ‘bă na đei tơdrong pơm glăi kơ tơdrong juăt pơm ‘lơ̆ng đơ̆ng blŭng a, mă loi sư dơ̆ng ưh kơ wei rong mĕ ‘bă đĭ kră wă tơ’bôh tơdrong lui lu khul bơngai lui, yua thoi noh,” tơdrong kơnê̆ sư hloh kơ ưh tam mă lui dơ̆ng” (I Timôthê 5:4,8). Pơma pha dơ̆ng, tơdrong hiap pơtê̆, ưh kơ chu yom mĕ ‘bă jơ̆ tơdrong kơnê̆ mă tih dêh noh sư năm hlôi pah to kơ tơdrong ‘lơ̆ng mă kon bơngai hơpơi wă. Dang ei, kon bơngai gơh “hiap tê̆” păng “ưh kơ sơkat ăn pŭn hiôk” kơ mĕ ‘bă hăm lơ tơdrong pha ra pha thoi kơ: Ưh kơ chu nơ̆r mĕ ‘bă athei păng lăng hơi nơ̆r mĕ ‘bă chrih bơtho, pơm pơ’mê̆ kơ anăn mĕ ‘bă mă ưh kơ băt mơlâu, hưp ham kơ mŭk tơmam mĕ ‘bă, ưh kơ wă wei rong mĕ ‘bă… 

            Mă ‘bar noh jơ̆ ‘bơ̆r đak klak ŭnh (tr.12). Nơ̆r pơđơ̆k đei chih roi kơ chăl arih mă lŭch dêh noh khan bơ̆n kơdih “‘lơ̆ng rơgoh” mă lei mă tơpă sư  “ưh tam sŭt rơgoh tơdorong yoch bơ̆n kơdih”. Jơhnơr âu chăl arih ưh kơ pơm trŏ ‘blep tơdrong ‘lơ̆ng, lăng hơi păng ayăt hăm tơdrong juăt păng jơhngơ̆m đon (Mathiơ 23:27-28; IITimôthê 3:1-5). Satan ling lang hơlĕnh bơngai yoch wă kơ lu sư lăng kơdih khan bơngai ‘lơ̆ng. Kon bơngai bơ̆n dang ei lăng bơ̆n kơdih khan huay kơ yoch dah lăng hơiă păng ưh kơ drơ̆ng lăp đon khan chăl arih bơ̆n hiong răm.Mă tơpă lăm hnam akŭm, lơ bơngai arih ‘bơ̆r đak klak ŭnh, kơplah lu sư wei răk tơdrong juăt bơngai lui, băt tơdrong lui đơ̆ng tơm, mă-lei ưh kơ wei răk pơm kiơ̆ tơdrong lui noh. 

             Ơ Kră Yang, inh bơnê kơ Ih yua kơ Ih đei pơklaih inh đơ̆ng tơdrong yoch kơnê̆ hiong răm. Apinh tơgŭm inh thoi ‘boh kơ teh păng hơdah kơ ala teh wă pơm tơ’bôh Tơdrong ‘Nao ‘Lơ̆ng kơ ala teh âu. Yua anăn Kră Yang Yêsu Krist, Amen. 

Hnam dơnŏ, adrĕch adrŭng lu bơ̆n hăm arih pơm tơ’bôh Kră Yang kơ kon pơlei ưh? 

Đŏk Sơ̆p Hla ar ‘Bok Kei-Dei lăm pêng sơnăm: Tơdrong Pơđŏk 29

Kênh Youtube BHKTHN:

https://www.youtube.com/c/bhkthn

The post Adrĕch Kơnê̆ – Ưh Kơchu păng ‘Bơ̆r Đak Klak Ŭnh – 7/10/2025 appeared first on Hội Thánh Tin Lành Việt Nam.