Tơdrong Pơđơ̆k 30:3-4

 “Inh ưh kơlah pơhrăm ôh tơdrong gơh hơgei, Păng kư̆m ưh kơ đei đon hlôh wao gah Yang ‘Lơ̆ng Rơgoh.”  (Tơdrong Pơđơ̆k 30:3)

Nơ̆r jet tơchĕng pơwao:

– ‘Bok Agur dan lu nơ̆r jet tơdrong kiơ wă kơ ‘bôh kon bơngai bơ̆n gơh ưh kơ tôm,’bôh kon bơngai bơ̆n bơ̆n hơtŭch?

– Nơ̆r tơl liơ?

– Ih ‘bôh ih kơdih kăl kơ krao khan tơgŭm lu bơngai pơgơ̆r teh đak tơdrong kiơ?

      ‘Bok Agur ưh kơ dơ̆ng ‘bơ̆t sư băt sư kdih kơtul kơhlôh lăm tơdrong ưh kơ băt kơnăl kơ Kră Yang ‘Bok Kei-Dei, mă lei sư oei dan pơđăm nơ̆r jet wă pơma kơ kon bơngai bơ̆n hơtŭch,băt kơ Kră Yang ưh kơ tôm. Na Sơ̆p hla bơar nơ̆r ‘Bok Kei-Dei tơl bơih nơ̆r jet ‘noh: “Bu tŏk tơ plĕnh bơih, na jur dơ̆ng?” Minh ‘Bok Kei-Dei đĕch (Blŭng a 11:7; 28:12 ;Hơriso 68:18 ) “Bu pơpôi bơih kial lăm tơpang ti sư?” Minh ‘Bok Kei-Dei đĕch (Lĕch đơ̆ng Êgiptơ 15:10 ; Hơriso 104:3, 135:7, Êsai 40:12 ; Amôt 4:13 ) “Bu ‘nŭng bơih đak lăm ao sư?” Minh ‘Bok Kei-Dei đĕch (Jop 26:8; 38:8-9).

“Bu man pơjing bơih tôm kơ teh đak âu kơjăp?” Minh ‘Bok Kei-Dei đĕch (Jop 38:4; Hơriso 24:1-2; Pơđơ̆k 8:27-30). Nơ̆r tơl ăn kơ puăn nơ̆r jet tơ kơpal noh hei rơđah hơđăl kơ ‘Bok Kei-Dei hloi bơih, na jơ noh ‘bok Agur wă kơ băt anăn Sư bu, anăn kon Sư bu. Lăm jơhngơ̆m tơdrong tơchĕng lu bơngai Juđê thoi âu: Mưh băt anăn bơngai bu noh lei băt hloi lăm bơngai noh thoi yơ thoi yơ hloi bơih. ‘Bok Agur hlôi dan puăn nơ̆r jet blŭng a wă tơ’bôh jơhngơ̆m sư ‘maih wă kơ băt tơdrong jang Kră Yang, na nơ̆r jet mă pơđăm ‘nâu tơ’bôh sư oei ‘maih wă kơ băt kơdih Kră Yang noh thoi yơ dơ̆ng mơ̆n: “Anăn Sư bu?” Anăn Sư Yang ‘Lơ̆ng Rơgoh (Tr 3).

Anăn Sư’Bok Kei-Dei (Tr 5,9),anăn Sư Kră Yang Yêhôwa (tr 9). “Anăn kon tơdăm sư bu?” Lu bơngai Juđê tơblang nơ̆r ‘Bok Kei-Dei khan: Kon tơdăm ‘Bok Kei-Dei noh Jakôp (Lĕch đơ̆ng Êyiptơ 4:22 , Jêrêmi 31:9; Ôsê 11:1), đei bơngai mơ’nah khan Ađam (Luka 3:38 ). Mă khan lei ră, Hla bơar Pah ‘Nao tơl khan: “Kon tơdăm ‘Bok Kei- Dei ‘noh Tơ’ngla mă hơdai pơjing tôm tơmam kơpal plĕnh, tơ ala teh, Sư Tơ’ngla mă đei đơ̆ng sơ̆, đei adral kơ pơjjng tôm tơmam (Pơđơk 8:22-31), Tơ’ngla mă tŏk bơih tơplĕnh jur dơ̆ng ‘noh Kră Yang Yêsu (Yôhan 3:13 ; Êphêsô 4:8-10).

‘Bok Agur pơtôch nơ̆r sư jet noh hăm nơ̆r hơdraih pơlong: “Tơdah ih băt, roi bĕ kơ inh.” Nơ̆r jet hơdraih pơlong ‘nâu tơ’bôh jơhngơ̆m sư ‘maih dêh chơchă wă kơ hlôh băt kơ’Bok Kei-Dei, mă lei bu gơh băt kơ ‘Bok Kei-Dei Tơ’ngla mă bơ̆n ưh kơ gơh ‘bôh păng măt tơdah Sư kơdih ưh kơ tơ’bôh Sư kơ kon bơngai, tơpă ưh kơ đei bu gơh băt kơ Kei-Dei ôh.

Pă ‘măng dơ̆ng, trong 4 tơ ‘bôh nơ̆r tơl ăn kơ lu nơ̆r jet ‘bơm kơ Yang ‘Lơ̆ng Rơgoh, nơ̆r jet ‘nâu ưh kơ lăm tơdrong tơchĕng pơwao kon bơngai ôh, mălei lăm tơdrong pơih tơ’bôh ăn gah bơhngol. Mĭnh Kră Yang đĕch gơh pơma roi gah lu kơ̆l ‘bai thoi noh.

Bơ̆n hơpơi kơ teh đak bơ̆n, Khŭl Lui bơ̆n, hnam dơnŏ bơ̆n đei lu bơngai pơgơ̆r, lu ‘bok  bơtho, lu mĕ ‘bă hơgei mă-lei tơdrong hơgei noh đei kơ lu bơngai iŏk đon ala, băt ‘bôh  kơdih akâu  bơngai hơtŭch,băt kơnăl kơ Kră Yang kơ kuh kơ Sư, “Băt hli yom kơ Kră Yang noh tơm tơdrong hơgei; băt hlôh kơ Kră Yang  Rơgoh, noh bơih tơdrong hlôh wao”. (Pơđơ̆k 9:10 ). ‘Nâu bơih tơdrong mă bơ̆n kăl kơ đĭ jơhngơ̆m krao khan tơgŭm kơ lu bơngai pơgơ̆r teh đak, lu bơngai wei lăng Khŭl Lui, lu bơngai mĕ ‘bă wei hnam dơnŏ.

Kơkuh kơ Ih Kră Yang, apinh Ih tơgŭm mơnat wă kơ inh đei lu bơngai pơgơ̆r teh đak, đei bơngai pơgơ̆r tơdrong lui, đei bơngai pơgơr lăm hnam dơnŏ noh lu sư ling-lang băt kơdih gơh ưh kơ tôm,băt kơdih hơtŭch na lu sư iŏk đon ala chơchă Ih đĭ jơhngơ̆m. Inh krao khan yua anăn Kră Yang Yêsu Krist, Amen!

Bơ̆n hăm tơchĕng bơ̆n kơdih gơh tơl dôm lu nơ̆r jet ‘bơm kơ  Yang ‘Lơ̆ng Rơgoh ưh?

Đŏk Sơ̆p Hla bơar ‘Bok Kei-Dei lăm pêng sơnăm: Kôlôsse 3

Kênh Youtube BHKTHN:

https://www.youtube.com/c/bhkthn

The post Bơngai Pơgơ̆r ’Bôh Băt Kơdih Akâu Hơtŭch – 10/10/2025 appeared first on Hội Thánh Tin Lành Việt Nam.