TơdrongPơđơ̆k 30:1-4

 “Tơpă inh kơtul hloh kơ đe nai, Păng kư̆m ưh kơ đei hlôh wao thoi kon bơngai hmă”(Pơđơ̆k 30:2)

 Nơ̆r jet tơchĕng pơwao:

–               ‘Bok Agur băt kơ kơdih akâu sư thoi yơ?

–               Yua kơ kiơ băt kơ kơdih akâu thoi noh kăl dêh?

–               Bơ̆n kăl kơ krao khan apinh Kră Yang ăn kơ lu bơngai pơgơ̆r teh đak bơ̆n dôm lu tơdrong kiơ?

            ‘Bok Agur âu sư minh ‘nu bơngai hơgei kơplah sư chih dôm lu tơdrong pơđơ̆k đei Yang Bơhngol ‘Lơ̆ng tơ̆k pơchrang chông tơ’bôh păng dan hơdai hăm lu tơdrong pơđơ̆k đơ̆ng Pơtao Salơmơn chih. Lei na tơdrong hơgei ưh kơ trŏ kơ minh ‘nu bơngai ayơ ei đĕch đei ôh,mălei ‘măn kơ đĭ-đăng lu bơngai bu mă băt tơjur akâu păng chơchă Kră Yang (tr 2-4). ‘Bok Agur âu mă khan Kră Yang mơnat ăn kơ sư gơh hơgei dêh ră mălei sư băt kơdih, drơ̆ng kơdih sư bơngai “kơtul kơhlôh” (tr 2), nơ̆r kơtul kơhlôh ‘nâu đei đơ̆ng tơm sư lei lăi hăm nơ̆r khan“sem brem”,păng đe ngăl tơlang khan “ưh kơ hlă”, mă loi,’bok Agur drơ̆ng khan sư kơdih “kơtul kơhlôh hloh kơ đĭ-đăng bơngai nai”.Ưh kơ dơ̆ng ‘bơ̆t doh,sư yua tơdrong hơri pơđơ̆k, sư khan sư  “ưh kơ  hlôh wao hơtŏ dang kon bơngai” wă khan hlôh wao sư lăp dang lu sem brem noh đĕch!

   Trong 4 noh bơ̆n hlôh ‘bok Agur tŏk-bŏk oei pơma ‘bơm kơtul kơhlôh sư lăm tơdrong wă gơh chơchă păng wă kơ gơh băt kơnăl kơ Kră Yang. Mă loi lăm trong 3, ‘bơ̆t sư dan “tơdrong gơh hơgei” hơ’nơ̆ng hăm “tơdrong hơgei ‘Bok mă ‘Lơ̆ng Rơgoh”noh ‘bok Agur wă pơma khan “tơdrong gơh hơgei”tơpă noh băt kơnăl kơ Kră Yang ‘Bok Kei-Dei, ‘nâu bơih tơdrong mă ‘bok Agur “hŏk pơhrăm ưh kơ gơh”. Thoi noh tơpă, bơ̆n ưh kơ đei layơ gơh chă ‘bôh tơdrong hơgei ôh tơdah bơ̆n pôm nger  lăng gah lăm đĕch, ưh kơ ngơk lăng tơ kơpal. Băt kơ Kră Yang ‘Bok Kei-Dei noh bơih pơtơm chă ‘bôh dêh Sư. Dah bơ̆n nŏng kơ tơchĕng pơwao wă kơ hlôh kơ dêh ‘Bok Kei-Dei mălei ưh kơ băt kơ Sư lei bơ̆n dan bơ̆n kơdih ‘bơ̆t anih mă ưh kơ yua kiơ pih pang gleh hrat đĕch (Pơđơ̆k 9:10 ).

   ‘Bok Agur iŏk đon ala, tơjur akâu noh sư ưh kơ chă pơpơm gah ‘nguaih đĕch ôh,noh tơpă đơ̆ng lăm jơhngơ̆m sư. Sư drơ̆ng sư bơngai kơtul kơwao,iŏk ala,tơjur akâu kơplah sư năm jê̆ tơdrong hơdah Nơ̆r Kră Yang, sư pơyom, hli yom kơplah dơ̆ng ‘bơ̆t anăp Kră Yang ‘Bok Kei-Dei (Jop 42:3-6). ‘Bôh băt thoi noh kăl tơpă, yua kơ đơ̆ng ‘noh kơnh ‘bok Agur jing bơngai hơgei;  hăm tơdrong sư tơjur akâu, iŏk đon ala păng chơchă Kră Yang ‘Bok Kei-Dei, Kră Yang ‘Bok Kei-Dei pơih tơ’bôh ăn kơ ‘bok Agur ‘bôh hlôh Nơ̆r Sư.Tơdrong ‘bok Agur băt kơdih sư bơngai kơtul kơwao noh, đĭ-đăng lu bơngai mă Kră Yang tơpŭ ming sư ‘nao bơih,pơih măt gah bơhngol lu sư bơih noh, lu sư băt kơdih kơtul kơwao thoi ‘bok Agur noh mơ̆n.Tơplơ̆ kơ ‘noh, pơang, pôk atŏk kơdih akâu ‘noh tơdra minh ‘nu bơngai tam mă đei tơpŭ ming ‘nao dah tơpŭ ming ‘nao bơih ră mălei oei nge gah bơhngol đĕch. Lu bơngai khan lu sư hlôh wao yua kơ đơ̆ng kơdih lu sư adrin chơchă, hŏk pơhrăm tơchĕng pơwao,na nơ̆r Kră Yang lăm tơdrong pơđơ̆k ‘nâu jô̆ lu bơngai ‘nâu hei yoch. Tơpă sư, lu bơngai ‘noh “kơtul kơhlôh” dĭng mah ưh kơ ‘bôh băt kơdih “kơtul kơhlôh”păng lu sư kư̆m “kơtul kơhlôh” dĭng mah ưh kơ ’bôh kơdih akâu ưh kơ trŏ kơ minh ‘nu bơngai arih tơdrong arih trŏ kơ arih (Êsai 5:21 ;19:11-15).

            Bơ̆n ngăl krao khan wă kơ teh đak bơ̆n đei lu ‘bok pơgơ̆r hơgei, tăr, gơh pơgơ̆r chông anhăk pơm kơ teh đak bơ̆n truh ‘bơ̆t anih mơdrŏng tôm mah. Mălei tơdrong mă bơ̆n kăl kơ adrin đĭ jơhngơ̆m krao khan apinh Kră Yang tơplih jơhngơ̆m lu ‘bok pơgơ̆r noh wă kơ lu sư băt kơnăl păng kơkuh kơ Kră Yang.

Kơkuh kơ Ih Kră Yang, inh đĭ jơhngơ̆m apinh Ih mơnat kơ teh đak nhôn,apinh Ih râu lu ‘bok pơgơ̆r teh đak nhôn băt lui kơ Ih,hli yom kơ Ih, kơkuh kơ Ih.Inh krao khan yua anăn Kră Yang Yêsu Krist, Amen!

 Bơ̆n hơtai oei krao khan tang teh đak bơ̆n thoi yơ?

Đŏk Sơ̆p hla bơar ‘Bok Kei-Dei lăm pêng sơnăm: Kôlôssê 2

Kênh Youtube BHKTHN:

https://www.youtube.com/c/bhkthn

The post Bơngai Pơgơ̆r Băt Kơnăl Kơ Kră Yang – 9/10/2025 appeared first on Hội Thánh Tin Lành Việt Nam.