Tơdrong Pơđơ̆k 30:5-6

 “Dôm Nơ̆r Kră Yang ‘Bok Kei-Dei đe đei rơ̆ pơlong lăng rơgoh sĭt tơpă. Kră Yang ‘Bok Kei-Dei jơ̆ khêl pĕng lu bơngai mă Kơ’nơp lăm Sư.”  (Pơđơ̆k 30:5)

Nơ̆r jet tơchĕng pơwao:

– ‘Bok Agur tơ ‘bôh dôm lu nơ̆r ‘Bok Kei-Dei noh ‘Bok Kei-Dei hơmet thoi  yơ  bơih?

– Sư  tơbăt liơ wă kơ bơ̆n kơchăng huay kơ thim ming nơ̆r Kră Yang hli kơ Kră Yang hil?

– Kră Yang tơ’blŏk kơ bơ̆n tơdrong kiơ kơplah bơ̆n krao khan tơgŭm teh đak bơ̆n?

Pơđơ̆k 30:5 ‘nâu bơih nơ̆r tơl ăn pơđăm nơ̆r jet păng tơl hơdraih pơlong lăm trong 4: Kon bơngai ưh kơ gơh băt tơpă kơ ‘Bok Kei-Dei tơdah ưh kơ đei Kră Yang pơih tơ’bôh ăn lăm nơ̆r Sư.

‘Bok Agur khan “lu nơ̆r” wă khan rim Nơ̆r Kră Yang noh Kră Yang hơmet rơgoh ngăl thoi đe rơ̆ hling lu hu maih lăm ŭnhlei. Yua kơ rim Nơ̆r Kră Yang mă Kră Yang hơmet rơgoh bơih thoi noh ‘noh, lei na nơ̆r Kră Yang ‘nâu bơih trŏ kơ bơ̆n lui ngeh lăm pơih tơ’bôh ăn kơ bơ̆n băt kơ Kră Yang păng pơih tơ’bôh ăn kơ bơ̆n băt tơdrong sĭt tơpă Sư (Hơriso 12:6).

Nơ̆r Kră Yang gĭt noh ưh kơ trŏ yua kơ Nơ̆r noh pơtho đe, dah mă yua kơ Nơ̆r noh sĭt tơpă, dôm ei đĕch ôh, mă-lei Nơ̆r Kră Yang gĭt noh kư̆m yua kơ Tơ’ngla mă pơma bơtho Nơ̆r ‘noh ‘Bok Kei-Dei. Tơdrong noh kư̆m wă khan tơdrong Yang Bơhngol ‘Lơ̆ng rĕng kơnhăm tih kăl noh Sư yua nơ̆r ‘Bok Kei-Dei wă ba bơ̆n năm tơ Kon ‘Bok Kei-Dei wă khan ba bơ̆n lui  kơ⠀Kră Yang Yêsu, Sư Tơ’ngla mă ăn kơ bơ̆n tơdrong dŏng pơklaih đơ̆ng ‘Bok Kei-Dei. Mă khan Sơ̆p Hla bơar ‘Bok Kei-Dei ‘nâu  hơgei dêh, ‘lơ̆ng dêh ră, kơdih Sơ̆p Hla Bơar nơ̆r ‘Bok Kei-Dei pơklaih bơ̆n ưh kơ gơh ôh. Sơ̆p Hla bơar Nơ̆r ‘Bok Kei-Dei tơ’bôh ăn bơ̆n, ba bơ̆n tơ ‘Bok Krist, Tơ’Ngla Dŏng Pơklaih.

Nơ̆r ‘Bok Kei-Dei đei pơih tơ’bôh ăn kơ kon bơngai mă đe đei chih bơih tơ lăm Sơ̆p hla bơar Sư noh, Nơ̆r ‘BokKei-Dei‘noh hăm Kră Yang Yêsu ‘noh măr sư mĭnh đĕch yua kơ Yêsu dang Nơ̆r ‘Bok Kei-Dei (Yôhan 1:1,14), bơ̆n ưh kơ gơh pleh tơklah lê̆ bre sư pha ra ôh . Mă loi “bơngai mă gơnang” kơ Kră Yang noh, sư bơngai ‘mêm, chu yom, arih kiơ̆ kơ Nơ̆r Kră Yang, bơngai noh Kră Yang, Nơ̆r Kră Yang gô bơwei sư, tơgŭm sư blah tơdrong ayăt pơhlŭ pơlung, pơlong lăng noh jei sư (Hơriso119:11 ).

Yua kơ nơ̆r Kră Yang “đei rơ̆ hling hơmet bơih”, ‘lơ̆ng tôm tơdrong, yua kơ ‘noh na ‘bok Agur kư̆m dan nơ̆r khă “’nĕ kơ thim kiơ lăm lu nơ̆r Kră Yang” (Tr 6). Sư tơchĕng kơ dôm lu Nơ̆r Khan Lê̆ Hơdrol păng nơ̆r lăm Sơ̆p Hla Bơar ‘Bok Kei-Dei đe đei chih đơ̆ng sơ̆ truh jơhnơr sư noh. Kư̆m đei mĭnh nơ̆r tơbăt athei bơ̆n kơchăng ‘nĕ kơ thim kiơ lăm nơ̆r Kră Yang, noh Nơ̆r lăm Hla bơar Tơdrong Tơ’bôh 22:18 ,19; bu tơplih lê̆ nơ̆r Kră Yang, lu đe bu thim nơ̆r sư kơdih thim tơchĕng kon bơngai tơmơ̆t lăm nơ̆r Kră Yang, Kră Yang “hil tơpă” bơngai noh, yua kơ bơngai noh hơlĕnh pơdăr. ’Noh nơ̆r tơbăt pơtôm lê̆ đĭ-đăng Nơ̆r lăm Hla bơar ‘BokKei-Dei đơ̆ng Pah So truh tơ Pah ‘Nao hloi.

Sơ̆p Hla bơar ‘Bok Kei-Dei ăn kơ bơ̆n băt dôm tơdrong mă kăl kơ băt gah Kră Yang ‘Lơ̆ng Rơgoh, păng ăn kơ bơ̆n băt arih kiơ̆ kơ Sư wă. (Bơtho khôi juăt 29:29 ). Sơ̆p Hla bơar ‘Bok Kei-Dei kư̆m pơchrang hơdah wă ba bơ̆n năm tơ Kră Yang lăm tơdrong pơgơ̆p tơ’bưh dŏng pơklaih, păng tơgŭm bơ̆n yak năm hăm Kră Yang lăm tơdrong chu yom hiôk chơt păng đei yua tih (II Timôthê 3:16-17). Minh pôm teh đak, minh khŭl lui, mĭnh pôm hnam dơnŏ gô pŭn hiôk tơpă tơdah lu bơngai mă pơgơ̆r noh băt pơyom kơ Nơ̆r Kră Yang, lu sư pơgơ̆r, chông anhăk teh đak, khul lui, păng hnam dơnŏ kiơ̆ thoi nơ̆r Kră Yang bơtho. Bơ̆n kăl kơ đĭ jơhngơ̆m krao khan wă kơ lu bơngai pơgơ̆r teh đak, wă kơ lu ‘bok bơtho băt tơpă kơ Nơ̆r Kră Yang wă kơ jang tơdrong pơgơ̆r wei lăng noh hăm jơhngơ̆m chu kiơ̆ Nơ̆r Kră Yang.

Ơ Kră Yang, apĭnh Ih ăn kơ inh đĭ jơhngơ̆m ‘mêm mơnat păng krao khan tơgŭm lu bơngai pơgơ̆r mă đơ̆ng Ih pơchĕp ăn noh wă kơ lu sư băt kơ lu sư thoi tơmam lăm tơpang ti Ih mă Ih yua jang, wă kơ lu sư jang tơdrong pơgơ̆r wei lăng đơ̆ng Ih pơjao noh hăm jơhngơ̆m chu yom kơ Ih. Inh krao khan  yua Anăn Kră Yang Yêsu Krist, Amen!

Bơ̆n hăm băt lu bơngai pơgơ̆r noh kăl dêh kơ lu sư băt kơnăl kơ nơ̆r Kră Yang, wă kơ lu sư pơgơ̆r trŏ?

Đŏk Sơ̆p Hla bơar ‘Bok Kei-Dei lăm pêng sơnăm: Kôlôsê 4

Kênh Youtube BHKTHN:

https://www.youtube.com/c/bhkthn

The post Bơngai Pơgơ̆r Băt Kơnăl Kơ Nơ̆r Kră Yang – 11/10/2025 appeared first on Hội Thánh Tin Lành Việt Nam.