Hơriso 116:3-11

“Kră Yang wei-lăng lu bơngai tơpăt; Tơdah inh pơmat-tat Sư pơklaih inh hloi” (Hơriso 116:6)

Nơ̆r jet tơhĕng pơwao:

–               Bơngai chih tơ’bơ̆p dôm tơdrong anat ayơ?

–               Kră Yang ‘Bok Kei-Dei đei pơm kiơ kơ sư lăm năr tơ’bơ̆p tơdrong anat thoi noh?

–               Kră Yang đei pơm kiơ kơ bơ̆n păng bơ̆n kăl kơ đei jơhngơ̆m thoi yơ kơplah băt tơdrong ‘nâu?

Bơngai chih khan Kră Yang ‘Bok Kei-Dei “pơgling đon” mơ̆ng “nơ̆r inh krao khan” (Hơriso 116:1-2), păng dôm trong lăm nơ̆r ‘Bok Kei-Dei năr ‘nâu, tơbăt Kră Yang băt tơpă dôm tơdrong pơmat mă sư oei tơ’bơ̆p păng dŏng Sư

‘Bok bơtho Charles Spurgeon khan thoi âu 3 trong pơma kơ rup pơtih gia đe chă hoang jĭl juei sơ̆ kơplah bơngai mă chă hoang chông ba kŏ khĕnh grĕnh jum dăr wă kăp jĭl juei păng pơm kơ sư  tôch trong. Bơngai mă chih kư̆m đei tơ’bơ̆p tơdrong thoi noh, yua kơ tơdrong jĭ jăn truh ưh kơ tam kơ băt (trong 3), tơdrong pơ̆k huŏng (trong 8) păng tơdrong hơlĕnh đơ̆ng bơngai jum dăr (trong 11). Lăm tơdrong truh pơmat ưh kơ pă hơmĕng, sư lui ngeh kơ tơdrong dŏng pơklaih đơ̆ng Kră Yang gô “wei lăng lu bơngai tơpăt” (trong 6).

Gah bơhngol, ‘Bok Kei-Dei pơklaih bơ̆n đơ̆ng tơdrong măng mu wă kơ jing kon Sư. Tơdrong dŏng pơklaih mă bơ̆n đei ‘nâu, ưh kơ sĭ đơ̆ng bơ̆n ‘lơ̆ng kơdih dah đơ̆ng kơ̆l ‘ngok gơh hơgei, mălei ‘noh đơ̆ng tơdrong rơih iŏk đơ̆ng tơdrong ‘Bok Kei-Dei mơnat ‘măn kơ bơ̆n (Êphêso 2:4-9). Tơdrong dŏng pơklaih noh tơdrong mơnat hlĭch chrơp, tơdrong mơsêh hlĭch, tơdrong hlĭch đơ̆ng ‘Bok Kei-Dei.

Gah sĕch akâu akar, ‘Bok Kei-Dei kư̆m đei dŏng bơ̆n klaih đơ̆ng tơdrong jĭ jăn, pơmat gah jên tơmam, păng klaih đơ̆ng tơdrong đe hơlĕnh pơdăr. Minh tơdrong gĭt kăl ‘noh nơ̆r “dŏng pơklaih” lăm Hơriso ‘nâu mă đơ̆ng sơ̆ (trong 8), păng mă dang ei (trong 6): ‘Noh bơih tơdrong wă kơ bơngai chih lui gơnang kơ tơdrong dŏng pơklaih đơ̆ng Kră Yang ning mônh.

Ưh kơ sĭ thoi noh đĕch, sư kư̆m đei tơbăt Kră Yang “pơm ‘lơ̆ng” kơ bơngai mă hli yom kơ Sư (trong 7). “pơm ‘lơ̆ng” wă khan pơm ‘lơ̆ng tôm mah păng tôm tơdrong. Ưh kơ sĭ ‘Bok Kei-Dei lăp mơ̆ng nơ̆r bơ̆n krao khan, dŏng bơ̆n đĕch ôh, na ba bơ̆n tơ tơdrong arih tôm mah păng pŭn hiôk. Kră Yang “pơm ‘lơ̆ng” ưh kơ sĭ khan Sư dŏng bơ̆n klaih đơ̆ng tơdrong pơlong pơmat đĕch ôh, mălei Kră Yang pơm kơ bơ̆n “pơdơh” lăm Sư, hơđơ̆ng tơ’bơ̆p hăm dôm tơdrong (trong 7; Philip 4:6-7). ‘Bok Kei-Dei kư̆m “pơm ‘lơ̆ng” kơ bơ̆n kơplah bơwei bơ̆n “huay kơtơih pơ̆k” lăm dôm tơdrong pơlong, pơmat (trong 8; I Kôrintô 10:13 ). Đơ̆ng tơdrong noh bơ̆n băt bơ̆n âu iĕ ioch đĕch, ‘Bok Kei-Dei tơpăt tơpă, ‘mêm mơnat păng mơsêh dêh, na thoi ‘bok Pêtrôs, Kră  Yang Yêsu kư̆m oei krao khan tang bơ̆n, “Mă-lei Inh krao khan kơ ‘Bok Kei-Dei wă kơ Sư tơgŭm ih huay kơ tŭk lê̆ tơdrong lui ih. Na lăp ih kơnăl tơdrong ih wă sơngah kơ Inh noh kơnh, na ih athei pơlung lu ‘nhŏng oh ih âu wă kơ lu sư kư̆m lui kơjăp dơ̆ng.” (Luka 22:32 ).

Kơkuh kơ Ih Kră Yang, inh bơnê kơ Ih yua kơ tơdrong ‘mêm tih Ih ăn kơ inh gơh jing kon Ih. Bơnê kơ Ih ling lang ‘mêm mơnat bơtho păng tơgŭm inh wơ̆ ‘lŏ lăm tơdrong băt kơ Ih, dŏng inh đơ̆ng tơdrong hơlĕnh, ăn kơ inh arih lăm khei sơnăm, lăm teh đak wă kơ inh đei jơ năr kơkuh păng bơ̆jang kơ Ih, krao khan yua anăn Kră Yang Yêsu Krist, Amen.

Bơ̆n hlôi mơn tơdrong dŏng pơklaih đơ̆ng Kră Yang thoi yơ lăm chăl arih bơ̆n kơdih? 

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 23

Kênh Youtube BHKTHN:

https://www.youtube.com/c/bhkthn

The post Băt Bơnê kơ Kră Yang Yua Sư Dŏng Pơklaih – 4/11/2025 appeared first on Hội Thánh Tin Lành Việt Nam.