Hơriso 95:1-7

“Bĕ bơ̆n năm ‘bơ̆t anăp Sư hăm nơ̆r bơnê. Chơt hiôk ‘nă hal hăm nơ̆r hơri bơnê kơ Sư.” (Hơriso 95:2)

Nơ̆r jet tơchĕng pơwao::

–               Bơngai chih Hla bơar Hơriso 95 athei bơngai đŏk hla bơar ‘noh pơm kiơ?

–               Sư roi tơblang ‘Bok Kei-Dei bơih thoi yơ păng lu bơ̆n âu kiơ?

–               Lu bơ̆n kơkuh kơ Kră Yang hăm jơhngơ̆m păng tơ’bôh gah ‘nguaih thoi yơ?

Hơriso 95 pơma tơdrong gĭt kăl tơ’bôh jơhngơ̆m băt bơnê kơ ‘Bok Kei-Dei kơplah bơ̆n hơri kơkuh kơ Sư. Bơngai mă chih hla bơar ‘noh wă kơ lu bơngai đŏk, hơri bĕ, ưang kơ Kră Yang ‘Bok Kei-Dei hăm jơhngơ̆m chơt hiôk păng bơnê (trong 1-2), hăm jơhngơ̆m tơ jur akâu, iŏk đon ala (trong 6). Kon pơlei Kră Yang đei lơ tơdrong ôr jreo wă chơt hiôk hơri ưang kơ Kră Yang lu sư. ‘Bok Kei-Dei trŏ kơ ưang hăm jơhngơ̆m chơt hiôk păng adrin tơpă. Mă khan phŏ phŏ bơ̆n hơri ưang kơ Kră Yang jơhngơ̆m đei sơ’ngon, ‘bĕnh tơdrong  tơchĕng, mălei ‘nĕ kơ bơwei tơdrong ưh kơ hiôk noh. Athei chơt hiôk yua kơ Kră Yang gô tơgŭm wă kơ bơ̆n kĕ hlôi đơ̆ng tơdrong noh păng chơt hiôk lăm tôm tơdrong.

Bơngai chih hla bơar đei tơbăt: “Yua kơ Kră Yang jơ̆ ‘Bok Kei-Dei Tih Hloh. Sư pơtao Tih Hloh kơ đĭ-đăng yang” (trong 3). Lu bơ̆n chơt hiôk ưang kơ Sư bơih Yang kơ đĭ đăng Yang. Tơdrong pơgơ̆r păng gơh yua iŏk đơ̆ng Kră Yang hăm tôm tơmam ‘noh bơih wă kơ bơ̆n hơri ưang kơ Kră Yang hăm kơkuh kơ Sư hăm jơhngơ̆m băt bơnê. Tơdrong bơ̆n kơkuh ‘nĕ kơ hiơt nơ̆r bơnê kơ ‘Bok Kei-Dei. Hlôh băt tơdrong tih hloh Sư păng bơnê kơ Tơ’ngla mă ăn kơ bơ̆n lơ tơdrong, tơgŭm kơ bơ̆n kơkuh kơ Kră Yang mă trŏ păng wă kơ Sư lăp đon (Yôhan 4:23 ).

Bơngai chih hla bơar khan tơbăt hơđăl dơ̆ng tơdrong tih tin Kră Yang  noh đơ̆ng tơdrong mơsêh Sư pơjing tôm tơdrong. Đơ̆ng sơlŭng jrŭ tơ lu wĕch kông, đơ̆ng đak dơsĭ truh tơ teh hrĕng kro, đơ̆ng lăm ti Sư pơjing ngăl (trong 4-5). Sư bơih Yŏng pơgơ̆r jơ̆p jang lăm teh đak, lăm noh đei kon bơngai bơ̆n. Bơngai chih Sơ̆p Hơriso 95 pơtih “Yua kơ Sư boih Kră Yang ‘Bok Kei-Dei bơ̆n. Lu bơ̆n jing kon pơlei oei lăm dơnih ‘nhĕt Sư. Păng jing triu kiơ̆ kơ ti Sư chông anhăk. Năr âu tơdah iĕm kơtơ̆ng nơ̆r Sư” (trong 7). Kơlih kơ thoi noh, bơ̆n kăl kơkuh kơ Kră Yang hăm jơhngơ̆m iŏk đon ala yua kơ Sư bơih Tơ’ngla pơjing lu bơ̆n (trong 6). Lơ bơngai dang ei hiơt bơih tơdrong mă bơ̆n hiơ̆k pŭ iŏk, năm kơkuh kơ lu yang mă bơ̆n pơm kơdih na ưh kơ đei kơkuh kơ Tơ’ngla pơjing. Kon pơlei Kră Yang kăl kơ ‘blŏk răk, kơkuh ‘noh tơdrong jang mă đĭ đăng kăl kơ pơm kiơ̆ hăm Tơ’ngla pơjing.

Hơriso 95 tơ’blŏk kơ bơ̆n gah tơdrong mơsêh tih tin Sư hloh kơ tôm tơdrong. Đơ̆ng noh pơtrŭt jơhngơ̆m kơkuh kơ Kră Yang hăm jơhngơ̆m băt bơnê păng iŏk đon ala. Bơ̆n athei kơkuh kơ Sư đơ̆ng tơdrong arih bơ̆n rim năr ưh kơ sĭ lăp ‘bơ̆t jơ bơ̆n kơkuh kơ Sư tơ hnam akŭm đĕch ôh. Bơ̆n athe ling lang băt bơnê kơ Kră Yang gah tơdrong Sư dŏng pơklaih ‘măn kơ lu bơ̆n păng đĭ jơhngơ̆m kơkuh kơ Sư hăm jơhngơ̆m bơnê.

Kơkuh kơ Ih Kră Yang, apinh Ih mơnat ăn kơ inh yua kơ phŏ phŏ tơdrong inh kơkuh kơ Ih ưh tam băt bơnê. Apinh Ih tơgŭm ăn kơ inh băt kơnăl tơdrong tih tih Ih wă kơ inh đĭ jơhngơ̆m ưang kơ Ih lăm jơhngơ̆m chơt hiôk păng bơnê. Krao khan yua anăn Kră Yang Yêsu Krist, Amen.

Bơ̆n oei arih hăm kơkuh kơ Kră Yang hăm jơhngơ̆m băt bơnê ưh?

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 20

Kênh Youtube BHKTHN:

https://www.youtube.com/c/bhkthn

The post Kơkuh Hăm Jơhngơ̆m Bơnê – 1/11/2025 appeared first on Hội Thánh Tin Lành Việt Nam.