I Petus 2:9-10

Nqe cim:

“Tiamsis nej yog haivneeg uas Vajtswv twb xaiv cia lawm, nej yog cov povthawj uas ua Vajtswv txoj haujlwm, nej yog haivneeg uas dawbhuv. Thiab nej yog Vajtswv haivneeg uas Vajtswv yuav txib mus qhia tej haujlwm tseemceb uas Vajtswv tau ua los lawm rau sawvdaws paub. Vajtswv yog tus uas hu nej tawm hauv qhov tsaus ntuj los nyob hauv qhov pom kev.” (I Petus 2:9)

Lus nug rau sawvdaws xav:

–       Timthawj Petus qhia paub Vajtswv pub rau tus uas ntseeg Tswv Yexus muaj qhov meejmom twg?

–       Lub homphiaj Vajtswv pub tus ntseeg Nws muaj meejmom ua dabtsi?

–       Peb yuav tsum ua dabtsi kom ua tiav lub luag haujlwm ua Vajtswv haivneeg?

Txawv li cov neeg uas tsis ntseeg tsis mloog Vajtswv Txojlus, Timthawj Petus hais tias “Tiamsis nej yog haivneeg uas Vajtswv twb xaiv cia lawm”, thiab Nws pub lub meejmom ua “cov povthawj uas ua Vajtswv txoj haujlwm, nej yog haivneeg uas dawbhuv” (nqe 9).

Tim ib, tus ntseeg Vajtswv yog “haivneeg uas Vajtswv twb xaiv cia lawm”. Vajtswv twb xaiv peb los ua haivneeg Yixalayees sab ntsujplig, peb yog Nws haivneeg. Vajtswv xaiv thiab pub txojkev cawm dim tsis xam nqi rau peb. Peb dim tsis yog vim peb tsimnyog tau, thiab peb kuj ua tsis tau dabtsi pab txojkev cawm dim uas Vajtswv ua. Yog li ntawd, cov neeg uas ntseeg Vajtswv tsis xam nqi thiab tsis khavtheeb, tiamsis txo hwjchim thiab saib lub meejmom tau Vajtswv xaiv muaj nqis. Tim ob, peb yog “cov povthawj uas ua Vajtswv txoj haujlwm”. Nyob hauv tej lus cog tseg qub, Vajtswv tsa cov povthawj. Lawv muaj feem xyuam coj Vajtswv Txojlus mus rau cov pejxeem, sawv cev thov Vajtswv pab rau cov pejxeem. Tiamsis nyob rau tej lus cog tseg tshiab, los ntawm Tswv Yexus txojkev tuag txhiv, tagnrho cov ntseeg puavleej ua Tswv Yexus cov povthawj, peb muaj cai tau mus cuag Vajtswv, ua Nws tes haujlwm. Txhua tus uas yog Vajtswv haivneeg nimno Vajtswv pub muaj Phau Vajluskub, peb hnov Vajtswv tej lus dhau los ntawm Nws Txojlus, tau zam txim, thiab tau ua haujlwm zoo ib yam tus povthawj hnub thaud. Tim peb, peb “yog haivneeg uas dawbhuv”. Haivneeg uas dawbhuv yog haivneeg tshwjxeeb rau Vajtswv. Hnub thaud Vajtswv xaiv haivneeg Yixalayees ua haivneeg dawbhuv tshwjxeeb rau Nws, tiamsis vim lub siab tsis ntseeg thiab ua txhaum, lawv thiaj poob lub meejmom tsimtxiaj ntawd, thiab Vajtswv thiaj xaiv lwm haivneeg uas ntseeg Tswv Yexus los ua haivneeg dawbhuv, ua Nws haivneeg. Yog li Timthawj Petus hais tias: “Yav tas los nej tsis yog Vajtswv haivneeg, tiamsis nimno nej yog Vajtswv haivneeg lawm; yav tas los nej tsis tau Vajtswv txojkev hlub, tiamsis nimno nej twb tau Vajtswv txojkev hlub lawm” (nqe 10).

Lub homphiaj Vajtswv pub txoj koob hmoov rau peb yog Nws muab tes haujlwm qhia Tswv Yexus txojkev hlub thiab kev tuag txhiv cov neeg txhaum dim hauv qhov tsaus ntuj los nyob hauv qhov pom kev (nqe 9). Peb txhua tus yuav tsum saib taus txoj koob hmoov Vajtswv pub, ua lub neej dawbhuv, nrhiav tus Tswv thiab kawm Nws Txojlus, txaus siab hlo qhia Txojmoo Zoo cawm neeg ntiajteb.

Thov Vajtswv,

Thov qhuas Vajtswv tus uas dawbhuv. Thov Koj qhia kom nyuam yaus paub tias nyuam yaus yog cajces ntawm Koj haivneeg dawbhuv, nyuam yaus thiaj paub txuag txojkev sib raug zoo nrog Koj, kawm Koj Txojlus, thiab qhia Koj txojkev hlub rau txhua tus. Nyuam yaus tuav Tswv Yexus lub npe thov, Amees.

Ib tsoom mloog uas hmov thiab tshua,

Peb yuav saib lub meejmom ua haivneeg dawbhuv, thiab ua tiav lub meejmom ntawd zoo li cas?

Nyeem Vajluskub hauv peb xyoo: Yelemis 33

Kênh Youtube BHKTHN:

https://www.youtube.com/c/bhkthn

The post Lub Nra Ntawm Cajces Dawbhuv – 14/11/2025 appeared first on Hội Thánh Tin Lành Việt Nam.