Tơdrong Pơđơ̆k 25:11-15

“Iĕm ‘nĕ kơ pơma kơnê̆, athei pơma mă ‘lơ̆ng tơgŭm pơyua lu bơngai mă mơ̆ng iĕm.”

 (Êphêsô 4:29 )

Nơ̆r jet tơchĕng pơwao:

–               Nơ̆r pơma ‘lơ̆ng đei lu tơdrong kiơ?

–               Kon pơlei Kră Yang kăl kơ đei nơ̆r pơma thoi yơ?

–               Lu bơ̆n apinh Kră Yang tơplih tơdrong kiơ wă kơ đei nơ̆r pơma ‘lơ̆ng?

Pơtao Sôlômôn pơma tơpă kơ kon pơlei Kră Yang athei tơ’bôh gah tơdrong hơgei hăm nơ̆r pơma mă ‘lơ̆ng. Nơ̆r pơma athei roi pơdah tơdrong tơpăt păng tơgŭm bơngai mơ̆ng đei yua. Mă khan kăl dêh pơma chrih kăl mă trŏ, nơ̆r tơl trŏ pơm kơ đe hiôk chơt, nơ̆r pơma lăp kiăp ‘lơ̆ng dêh (Tơdrong pơđơ̆k 15:23 ).

Nơ̆r pơma ‘lơ̆ng athei đei lu tơdrong âu: Mă minh, pơma ‘lơ̆ng noh pơma trŏ kơ jơ, nơ̆r pơma trŏ lăp (trong 11). Nơ̆r pơma đei pơtih gia thoi bơngai hơjơ̆m hơmet tơmam đe pơguăng păng maih hling, lu bơngai hơgei băt yua nơ̆r pơma lăp trŏ, trŏ kơ anih. Mă ‘bar, bơngai hơgei chrih kơ đon bơngai oei mơ̆ng (trong 12). Nhen thoi gop maih tơmam đe pơguăng păng maih, tơ’băk trŏ kơ ‘bơ̆t anih, ‘băk ‘bơ̆t ako, ‘bot tơ kokŏng ti wă kơ đe lăng ‘lơ̆ng, lăng gĭt. Dang dơmŏng đe gĭt mă ăn kơ nhŭng, hli kơ lu sư pơm kơ kơnê̆ kơ iĕm dơ̆ng (Mathiơ 7:6). Mă pêng, nơ̆r pơma hơgei athei pơma mă trŏ ‘blep, tơpăt. Bơngai đe wơh tơnăp hăm yŏng sư pơm keh tơdrong jang yŏng tơ’ngla pơjao (trong 13). Tơplơ̆ dơ̆ng, kơplah pơma jô̆ pơang, ưh kơ đei pơyua kiơ kơ bơngai mă mơ̆ng păng kơdih akâu mơ̆n, ưh kơ phara kiơ thoi hơmơ̆l ‘mi đei kial na jor kơ ‘mi dơ̆ng (trong 14). Tuch luch, nơ̆r pơma ‘lơ̆ng đe pơma kơplah kĕ chơ̆n, athei pơma rơngơp, wă ba kơ bơngai mơ̆ng lăp đon, đei pơlung (trong 15). Ngăn hreh păng huay kơ blĕk ưh kơ trŏ wă tơdra tơ’bôh bơngai rơdu mălei tơ’bôh kơ minh ‘nu bơngai pran kơtang (lăng dơ̆ng Pơđơ̆k 16:32 ).

Rim ‘nu bơngai lui kăl kơ krao khan păng arih pơm kiơ̆ kơ Kră Yang Yêsu Krist. Minh lăm lu tơdrong tơplih ‘nao noh jơ̆ tơplih nơ̆r pơma. Lu bơ̆n athei pơhrăm păng yua iŏk nơ̆r pơma ‘lơ̆ng wă pơyua kơ bơngai mơ̆ng. ‘Bok Pôl bơtho: “Iĕm ‘nĕ kơ pơma kơnê̆, athei pơma mă ‘lơ̆ng tơgŭm pơyua lu bơngai mă mơ̆ng iĕm” (Êphêsô 4:29 ).   

Apinh Yang Bơhngol ‘Lơ̆ng chông anhăk rim ‘nu lu bơ̆n wă kơ pơma ‘lơ̆ng gơh tơiung dih băl, wă tơgŭm bơngai mơ̆ng lăp đon, păng tơ’bôh tơdrong ‘mêm, iơ̆m dim na tơgŭm băl wă pơư anăn Kră Yang.

Kơkuh kơ Ih Kră Yang, inh bơnê kơ Ih mơnat tơdrong yoch inh păng tơplih inh jing bơngai ‘nao lăm Ih. Inh apinh Ih tơgŭm inh wă kơ inh iŏk đon ala, băt ‘mêm mơnat, gơh gơ̆t wă đei nơ̆r pơma ‘lơ̆ng tơgŭm đe mơ̆ng lăp đon, păng ưang anăn Kră Yang. Yua anăn Kră Yang Yêsu Krist, Amen.

Lu bơ̆n hăm hiơ̆k kơ bơngai mă mơ̆ng gô đei yua tơdrong kiơ đơ̆ng nơ̆r pơma bơ̆n ưh?

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 42

Kênh Youtube BHKTHN:

https://www.youtube.com/c/bhkthn

The post Nơ̆r Pơma ‘Lơ̆ng – 23/11/2025 appeared first on Hội Thánh Tin Lành Việt Nam.