Tơdrong Pơđơ̆k 25:1-3; Rôm 11:33-36

 “’Bok Kei-Dei pơm thoi noh bơ̆n băt kơ Sư ‘mêm kơ bơ̆n tơpă păng bơ̆n kư̆m băt kơ Sư hơgei dêh. Na bơ̆n kon bơngai ưh kơ băt ôh tơdrong tơchĕng Sư thoi yơ… Yua kơ Sư gơh pơjing kơdih tôm tơdrong păng Sư gơh pơgơ̆r wei-lăng tôm tơdrong. Tôm tơdrong noh wă kơ đĭ đăng bơngai ư-ang kơ Sư. Na bĕ bơ̆n ư-ang kơ Sư ưh kơ layơ tôch. A-men.”    (Rô-ma 11:33 , 36)

Nơ̆r jet tơchĕng pơwao:         

–   Tơdrong ư-ang ‘Bok Kei-Dei păng tơdrong ư-ang lu pơtao tơ’bôh thoi yơ?

–   Tơdrong hơgei kon bơngai ưh kơ tôm liơ?

–   Pơm thoi yơ wă kơ bơ̆n chă đei tơdrong hơgei đơ̆ng Kră Yang wă kơ arih pơm kơ Sư lăp đon?

Bơngai mă pơtao Hesêkia yua ei, sư đei chih iŏk nơ̆r pơtao Salơmơn bơtho wă bơtho dơ̆ng kơ lu kon sâu se.Kơplah tŏk pơm pơtao,pơtao Salơmơn hlôi krao khan apinh Kră Yang ăn kơ sư tơdrong hơgei, yua kơ sư băt kơnăl kơ ‘nâu bơih tơdrong mă gĭt kăl ngơngei lăm tơdrong jang pơgơ̆r kon pơlei (I Pơtao 3:8-9). Nơ̆r pơđơ̆k ‘nâu tơ’bôh kơ bơ̆n tơdrong hơgei hlơp lăm tơdrong ‘Bok Kei-Dei pơjing plĕnh teh noh jơ̆ tơdrong ư-ang ‘Bok Kei-Dei păng tơdrong mơsêh Sư; mălei tơdrong đe ư-ang kơ lu pơtao noh yua kơ đơ̆ng lu sư tơchĕng, hlôh, lu sư chă’bôh lu tơdrong wă pơgơ̆r kon pơlei lăm teh đak sư noh.Tơdrong pơting lăm trong 2’noh pơma hơđăl kơ tơdrong hơrĭ hơrĭ đơ̆ng kơpal truh tơ ala, noh pơma gah tơdrong hơgei, tơdrong gơh pơgơ̆r, tơdrong kĕ pran, wă khan hơrĭ hơrĭ đơ̆ng tơm sư ‘Bok Kei-Dei, truh tơ lu pơtao,đơ̆ng noh truh tơ kon pơlei.

Lu pơtao noh, đei đe ư-ang kơ lu sư noh yua kơ lu sư tơchĕng, chă ‘bôh lu tơdrong Kră Yang pĕng ôn. Tơdrong lu sư tơchĕng chă ‘bôh ‘noh ưh kơ đơ̆ng lu sư mơn đêl hơgei dah yua kơ đơ̆ng lu sư mơdrŏng ôh, mălei đơ̆ng ‘Bok Kei-Dei pơih tơ’bôh ăn kơ lu sư. Tơdrong ư-ang ‘Bok Kei-Dei noh yua kơ Sư gơh ôn hlơp dôm lu tơdrong gĭt kăl noh, mălei tơdrong đe ư-ang kơ lu pơtao noh ‘bơ̆t Kră Yang  pơih ăn lu sư ‘bôh minh lăm lu tơdrong hlơp ei. Lu pơtao noh, lu sư đei tơdrong jang chơchă đon wă hơmet lu tơdrong anat lu kon pơlei noh, mălei lu pơtao ‘nâu lu sư kon bơngai,ưh kơ gơh hlôh ôh dôm tơdrong mă Kră Yang ôn hlơp noh.

Trong 3 ‘nâu tơ’bôh kơ bơ̆n ưh kơ đei bơngai bu gơh hlôh hơđăl ôh dôm lu tơdrong kăl kơ hlôh băt gah tơdrong Kră Yang Tơ’ngla tih tin, Tơ’ngla pơjing plĕnh teh, ưh kơ gơh hlôh gah tơdrong, tơmam mă Kră Yang pơjing bơih thoi yơ, thoi yơ noh (Rôm 11:33-36),kư̆m thoi noh mơ̆n, ưh kơ đei bu gơh hlôh hơđăl kơ jơhngơ̆m lu pơtao. Jơhngơ̆m pơtao noh đe pơtih kơjung thoi  lu hơtăl plĕnh,jrŭ thoi teh. Kơdih lu pơtao kư̆m ưh kơ đei băt tôm tơdrong ôh,’nhŏ akâu lu sư kơdih lu sư kư̆m ưh kơ hlôh hơđăl kơ lu sư kơdih ‘mơ̆i, lei liơ kon pơlei gơh hlôh hơđăl kơ jơhngơ̆m lu pơtao tơchĕng chă đon wă jang kiơ, pơm kiơ noh.

‘Bok Pôl bơngai jơ̆ng ‘bang Kră Yang, sư bơtho khan đĭ-đăng lu bơ̆n ‘nâu tơmam ‘Bok Kei-Dei pơjing,wă ư-ang kơ Sư ling-lang ưh kơ layơ tôch (Rôm11:36 ), lei na bơ̆n ưh kơ gơh gơnang kơ đêl bơ̆n mơn đei, ưh kơ gơh gơnang tơdrong hơgei bơ̆n kơdih khan wă hlôh băt hơđăl kơ ‘Bok Kei-Dei. Yua kơ thoi noh bơih, apinh Kră Yang tơgŭm bơ̆n đĭ jơhngơ̆m lui gơnang kơ Sư, arih chu yom kơ tơdrong ‘Bok Kei-Dei pơgơ̆r păng chu yom kơ lu pơtao đơ̆ng Kră Yang pơchĕp ăn gơh pơgơ̆r teh đak ‘noh mơ̆n.

Minh tơdrong kăl hloh kơ đĭ-đăng,bơ̆n kon pơlei Kră Yang,bơ̆n  athei đĭ jơhngơ̆m krao apinh Yang Bơhngol‘Lơ̆ng chông anhăk bơtho tơ’bôh wă kơ bơ̆n băt kơnăl kơ tơdrong Kră Yang wă, arih gơh hơgei, đei yua ăn hnam dơnŏ, đei yua ăn Khul Lui, đei yua ăn kon pơlei pơla păng ư-ang kơ Anăn Kră Yang.

Kơkuh kơ Ih Kră Yang, inh bơnê kơ Ih hlôi pơjing bơih plĕnh teh,pơjing inh păng dŏng pơklaih huai iŏk inh. Ơ ‘Bok Kei-Dei, apinh Ih tơgŭm inh ling-lang chu yom tơdrong Ih pơgơ̆r. Apinh Yang Bơhngol ‘Lơ̆ng tơ’blŏk păng ăn kơ inh ling-lang lui gơnang păng chơchă tơdrong Ih bơtho tơ’bôh chông anhăk lăm chăl arih. Inh krao khan yua anăn Kră Yang Yêsu Krist, Amen!

Bơ̆n chă tơdrong gơh hơgei thoi yơ lăm chăl arih bơ̆n rim năr?

Đŏk Sơ̆p hla bơar ‘Bok Kei-Dei lăm pêng sơnăm: Philêmôn.

Kênh Youtube BHKTHN:

https://www.youtube.com/c/bhkthn

The post Tơdrong Ưang ‘Bok Kei-Dei păng Lu Pơtao – 12/10/2025 appeared first on Hội Thánh Tin Lành Việt Nam.