I Pêtrôs 2:9-10

 “Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ ‘Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih. Sư ăn kơ bơ̆n jing kon Sư wă kơ bơ̆n ră-roi kơ đe dôm tơdrong ‘lơ̆ng Sư pơm. Sư boih krao iŏk bơ̆n đơ̆ng anih măng mu oei tơ anih hơdah Sư dang ei.”  (I Pêtrôs 2:9)

Nơ̆r jet tơchĕng pơwao:

–   ‘Bok Pêtrôs tơbăt kơ bơ̆n ‘Bok Kei-Dei ăn kơ lu bơngai lui kơ Kră Yang Yêsu gơh pơm tơdrong kiơ?

–   ‘Bok Kei-Dei ăn kơ lu bơngai lui gơh pơm tơdrong noh, Sư kơnhăm wă pơm kiơ?

–   Bơ̆n âu adrĕch adrung ‘lơ̆ng rơgoh, bơ̆n athei pơm kiơ wă pơkeh tơdrong jang mă Kră Yang pơjao ăn kơ bơ̆n noh?

Lu bơngai  ưh kơ lui kơ Kră Yang, lu sư ưh kơ chu pơm kiơ̆ Nơ̆r Kră Yang, ‘bok Pêtrôs athei bơ̆n arih tơplơ̆ hăm lu bơngai ưh kơ lui noh, sư khan thoi âu: “Mă-lei gah bơ̆n, Sư rơih iŏk bơ̆n wă kơ bơ̆n jing  adrĕch adrung Sư,bơ̆n kư̆m thoi lu bơngai soi kơ ‘Bok Kei-Dei Pơtao bơ̆n,bơ̆n dang pơlei pơla Sư, teh đak Sư bơih.” (tr.9).

Mă minh, bơngai lui kơ Kră Yang,  noh “adrĕch adrung Kră Yang rơih”. ’Bok Kei-Dei hlôi rơih iŏk bơ̆n jing thoi adrĕch Isơrael gah bơhngol, adrĕch ‘nao, gah Kră Yang. Kră Yang rơih iŏk bơ̆n, Sư pơklaih bơ̆n hăm tơdrong Sư mơnat ăn đĕch kơ bơ̆n noh. Sư pơklaih bơ̆n ‘nâu ưh kơ đơ̆ng bơ̆n arih ‘lơ̆ng trŏ kơ Sư pơklaih ôh,păng bơ̆n ưh kơ gơh pơm kiơ thim lăm tơdrong KrăYang dŏng pơklaih noh. Lei na bơngai lui kơ Kră Yang ưh kơ gơh jô̆ khan đơ̆ng bơ̆n ‘lơ̆ng, bơ̆n kĕ ‘mơ̆i ôh, kư̆m ưh kơ gơh pơang mơ̆n, mă-lei iŏk đon ala, gĭt kơ bơ̆n bơngai mă ‘Bok Kei-Dei dan ‘bơ̆t anih bơngai mă Sư rơih.

Mă ‘bar, bơ̆n “thoi lu bơngai soi kơ ‘Bok Kei-Dei pơtao bơ̆n”. Kơplah Pơgơ̆p pơkă So, ‘Bok Kei-Dei pơchĕp ăn kơ lu ‘bok soi. Lu sư khŏm jang ba Nơ̆r Kră Yang ăn kơ kon pơlei, đơ̆ng noh lu sư roi ăn kơ Kră Yang ‘Bok Kei-Dei dôm tơdrong lu kon pơlei kăl wă. Mă-lei kơplah tơdrong Pơgơ̆p pơkă ‘Nao, đơ̆ng tơdrong Kră Yang Yêsu lôch, đĭ-đăng bơngai lui jing nhen thoi lu ‘bok soi lăm Kră Yang Yêsu Pơtao bơ̆n, bơ̆n gơh năm ‘bơ̆t anăp Kră Yang, gơh awih awăn kơ Sư. Rim ‘nu kon pơlei Kră Yang dang ei, Kră Yang ăn kơ bơ̆n Sơ̆p hla bơar Sư, bơ̆n gơh mơ̆ng ‘bơ̆r Kră Yang pơma, Sư yua nơ̆r Sư lăm Hla bơar Sư noh pơma bơtho bơ̆n, lu bơ̆n kư̆m gơh roi pơdah ăn kơ Sư rim wơ̆t bơ̆n hơch ‘bơm pơm yoch noh păng gơh awih awăn kơ Sư thoi lu ‘bok soi sơ̆. Mă pêng, bơ̆n ‘nâu “kon pơlei ‘lơ̆ng tơpăt, kon pơlei gah Kră Yang ‘Bok Kei-Dei. Sơ̆ Kră Yang ‘Bok Kei-Dei rơih iŏk kon pơlei Isơrael jing kon pơlei Sư, mă-lei yua kơ jơhngơ̆m lu sư kuă kơ lui păng pơm yoch, na lu sư tơhiong lê̆ anih gĭt găl jing kon pơlei Kră Yang ‘Bok Kei-Dei noh, na Kră Yang rơih bơih lu bơngai tơmoi nai lui sơng iŏk Kră Yang Yêsu jing kon pơlei ‘lơ̆ng rơgoh, kon pơlei gah Kră Yang.Lei na ‘Bok Pêtrôs khan: “Sơ̆ iĕm ưh kơ trŏ kơ kon Sư ôh, mă-lei dang ei đĭ-đăng kơ bơ̆n jing kon Sư ngăl bơih. Sơ̆ ‘Bok Kei-Dei kư̆m ưh tam mă tơ’bôh kơ iĕm tơdrong Sư mơnat, mă-lei dang ei iĕm ‘bôh nhen bơih.” (tr.10).

Kră Yang mơnat kơ bơ̆n noh Sư kơnhăm wă jao kơ bơ̆n pŭ iŏk tơdrong jang tih kăl, bơtho tơdrong Kră Yang Yêsu ‘mêm mơnat lôch tang kon bơngai, Sư krao bơ̆n, pơklaih bơ̆n weh đơ̆ng măng mu tơdrong yoch năm tơ tơdrong hơdah păng năm tơdrong arih ling-lang khŏm khŏm. (tr.9). Rim ‘nu kơ bơ̆n athei gĭt kơ tơdrong mơnat mă Kră Yang ăn bơih kơ bơ̆n noh, bơ̆n arih ‘lơ̆ng rơgoh, chơchă Kră Yang păng tơchĕng pơwao Nơ̆r Sư, pre jơhngơ̆m lăp đon bơtho ră roi  kơ lu bơngai jih ‘ma Tơdrong ‘Nao ‘Lơ̆ng dŏng pơklaih.

Bơnê ư-ang kơ  Kră Yang ‘Bok Kei-Dei Tơ’ngla ‘Lơ̆ng Rơgoh.Apinh Ih ăn kơ inh ling-lang ‘blŏk, huay kơ hiơt inh ‘nâu drĕch adrung Ih, adrĕch‘lơ̆ng rơgoh, wă kơ inh ling-lang wei tơdrong tơ’bưh ‘lơ̆ng hăm Ih, hŏk pơhrăm Nơ̆r Ih păng bơtho ră roi kơ lơ bơngai băt tơdrong Ih ‘mêm mơnat.Inh krao khan yua anăn Kră Yang Yêsu Krist, Amen!

Bơ̆n gĭt kơ tơdrong Kră Yang ăn kơ bơ̆n jing adrĕch adrung ‘lơ̆ng rơgoh noh thoi yơ? Păng bơ̆n jang tơdrong Kră Yang jao kơ bơ̆n jang noh thoi yơ bơih?

Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 33.

Kênh Youtube BHKTHN:

https://www.youtube.com/c/bhkthn

The post Tơdrong Jang Tih Kăl, Adrĕch ‘Lơ̆ng Rơgoh Pŭ Iŏk – 14/11/2025 appeared first on Hội Thánh Tin Lành Việt Nam.