የሩሲያ ጠቅላይ አቃቤ ህግ ቢሮ ሂውማን ራይትስ ዎች የተባለውን የመብት ተሟጋች ድርጅት (HRW) ሩሲያ “የማይፈለጉ ድርጅቶች”ብላ ከሰየመቻቸው ድርጅት ዝርዝር ውስጥ ትናንት አካቷል። የጀርመኑ የዜና ምንጭ ዲፒኤ እንደዘገበው ርምጃው ፤ሂውማን ራይትስ ወችበሩሲያ ውስጥ ያለውን ማንኛውንም እንቅስቃሴ ወዲያውኑ እንዲያቆም የሚያደርግ ሲሆን፤ በሩሲያ ውስጥ ያሉ ሰዎች ወይም ድርጅቶች ከድርጅቱ ጋር መስራትንም ሕገ-ወጥ ያደርጋል።

ሂዩማን ራይትስ ዎች ከሶስት አስርት አመታት በላይ ከድህረ-ሶቪየት ሩሲያ በኋላ ያለው መንግስት ሰብዓዊ መብቶችን እና ነጻነቶችን እንዲያስከብር ግፊት አድርጓል። «የእኛ ስራ አልተለወጠም። ነገር ግን በአስደናቂ ሁኔታ የተለወጠው መንግስት ነው። ሙሉ በሙሉ የአምባገነናዊ ፖሊሲዎች፣ ጭቆና እና በዩክሬን ውስጥ የሩሲያ ኃይሎቹ እየፈጸሙ ያሉት የጦር ወንጀሎች ነው ። በአስደናቂ ሁኔታ እየጨመረ የመጣው ።» ብለዋል የሂውማን ራይትስ ወች ዋና ዳይሬክተር ፊሊፕ ቦሎፒዮን ።

ሩሲያ ዋና ዋና ነጻ የዜና አውታሮችን እና የመብት ቡድኖችን ጨምሮ ከ 270 በላይ ድርጅቶችን "የማይፈለጉ" ስትል ሰይማለች።ሂውማን ራይትስ ወች የሩስያን ጦርነት አጥብቆ ሲተች የቆየ ሲሆን የጦር ወንጀለኞች ናቸው ያላቸውን ዝርዝርም መዝግቧል። በቅርቡ የሩስያ ወታደሮች ሰላማዊ ሰዎችን በሰው አልባ አውሮፕላኖች መግደላቸውን በምርመራ ይፋ አድርጓል።

እንደ ዘገባው ጎረቤት ዩክሬንን ከመውረሩ በፊትም ቢሆን አፋኝ የነበረው የክሬምሊን አገዛዝ ከየካቲት ከጎርጎሪያኑ 2022 ጀምሮ በተቺዎች ላይ የሚያደርገውን አፈና አጠናክሮ ቀጥሏል። ርምጃው፤ የሟቹ አሌክሲ ናቫልኒ ፀረ-ሙስና ፋውንዴሽን "የአሸባሪ ድርጅት" ተብሎ ከተሰየመ ከአንድ ቀን በኋላ የተወሰደ ነው።

ፀሐይ ጫኔ

ታምራት ዲንሳ