做工á人台語工作室 Chò Kang á Lâng Tâi-gí Kang-chok-sek

64 Episodes

Reverse

【A郎】動畫EP5 全新配樂影片請到Youtube觀賞

2024-09-1909:37

A郎ê bàng-gah來--lio͘h，全新配樂，希望ta̍k-ke ē kah意。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang -- Hosting provided by SoundOn

【A郎】動畫EP4 全新配樂影片請到Youtube觀賞

2024-09-1209:13

【A郎】動畫EP3 全新配樂影片請到Youtube觀賞

2024-09-0512:07

【A郎】動畫EP2 全新配樂影片請到Youtube觀賞

2024-08-2914:32

【A郎】動畫EP1 全新配樂影片請到Youtube觀賞

2024-08-2207:45

【台語講怪奇】 EP06-食飽siuⁿ閒ê巨石文明 Tâi-gí Kóng Koài-kî - Chia̍h-pá Siuⁿ Êng ê Kī-se̍k-bûn-bêng

2024-08-1513:32

咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。用台語來表現，ǹg望ta̍k家聽liáu會感覺趣味。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】歡迎收聽台語講怪奇，咱今á日beh講--ê是神祕ê大石頭建築，mā有人ka hō做巨石文明。 Tī全世界chiâⁿ chē所在，無kâng ê民族，攏有用大石頭起建築物ê文化。 Chit寡建築物，in ê路用有廟寺，有墓，有金字塔，mā有1寡到chit-má，攏無法度確定是beh做啥物用途ê遺跡。 Chit內底上有名ê 1 ê，是英國ê巨石陣，幾十塊ê巨石排列做圓形，有4千年ê歷史，一般是ioh講，he是彼tang陣teh做祭拜儀式ê所在，m̄-koh mā無法度確定。埃及ê Khufu金字塔，相信ta̍k-ê攏bat聽--過，che是tī 4500年前完成ê建築物，伊使用230萬塊ê大石頭ka疊--起-來，ta̍k粒石頭上無攏有2噸半，金字塔起好了後，是全世界上koân ê建築物，一直到700年前，chit ê記錄chiah去hông超--過。法國有1 ê Carnac巨石林，chia ê巨石有超過3千塊以上，m̄知是照啥理路，閣排kah整齊整齊，歷史超過5千年，起造ê年代比金字塔閣khah久，其中有1寡古早時ê墓，m̄-koh chiah大phiàn ê遺跡，是為tio̍h啥物目的起--ê，kāng款無人知影。照咱現此時對古早人ê認bat，四五千年前ê人類，大部分猶teh用石頭做ê工具，上好ê工具，極加to̍h是青銅，in nah有才調來處理chiah大塊ê石頭？而且in一定是有足強ê意志a̍h是需求，chiah會動員hiah-nī-á chē人ê來舞chit寡代誌。咱tú-chiah講--ê hit寡遺跡，伊工程ê規模，to̍h算是用現代ê技術，凡勢to舞bē出--來，真chē專家to̍h teh想，teh hia ioh講，幾千年前in是án怎做--ê？其實mā m̄是現代人ài替in操煩，只是想--tio̍h to m̄甘願，lín chit寡古早人竟然有才調起che有--ê無--ê！ Hèⁿ ā，tio̍h算講阮無hiah gâu搬石頭，上無阮mā ài知影lín是有啥物撇步--ā！江湖一點訣，講--破to̍h無價值，咱chit-má to̍h來教ta̍k-ê án怎搬石頭，頭1 ê是英國巨石陣，thàn落雪ê時陣，用冰車來拖to̍h好！超過9米，30噸以上ê大石頭，閣是寒--人冷ki-ki，若無sè-jī腰會閃--tio̍h ŏ͘！當然mā m̄是1 ê人家己拖--ā，100 ê人做夥拖，閣加100隻Husky。我算--1-ē，30噸，to̍h是3萬公斤，按呢人hâm狗做夥算，平均1 ê ài拖150公斤neh！ 100 ê人若無法--伊，叫所有ê人來搬，庄頭庄尾厝邊隔壁攏總來交陪，順sòa練身體。 Eh，你是當做別人攏閒閒無代誌--o͘h！寒--人無法度作穡--ah，無是beh規工bih tī厝--ni̍h看電視nih，ài加減á運動--lah！運動ê方式chiâⁿ chē--ā，古早人m̄是定定去kâng佔地盤，搶食物，閣刣人兼放火。你用講--ê to̍h khah簡單，he出--去是ài hâm人拚性命neh，猶是搬石頭khah健康--lah！起造巨石陣ê理由是為tio̍h健康，che我真正m̄ bat聽--過，拖大石頭真thiám neh。若siuⁿ thiám，拖kah半路to̍h ka擲tī hia，明年chiah閣轉來拖to̍h好--ā，橫直mā無人會偷the̍h。石頭to̍h bē-tàng食，偷the̍h he beh創啥，ah m̄-koh你慢慢á舞，工程m̄ to̍h ài拖chiâⁿ久。 A̍h無teh趕時間--ā，若無，閣會tàng外包hō͘專業--ê，聖誕老阿伯。 Eh！牽kah tùi hia去，先bàng講hit ê時代聖誕老阿伯根本to猶bē出世，我問--你，你kám有收過聖誕老人送--你ê禮物？無neh，kám是我無夠乖？ M̄是你無夠乖，是你老--ā-lah！ Ái-iò͘，講kah按呢，我本底是想講，聖誕老人ê冰車，載hiah chē禮物tī天頂飛，搬1下石頭小khóa-á代誌，我若有hit台會tàng飛ê冰車，石頭我家己搬mā會使--ā。你連禮物to̍h the̍h無，閣teh siàu想人ê冰車，食khah bái--eh-lah。 Hò͘，chhōe外包mā bē使，ah無你khah巧，石頭你來搬看māi講。好，按呢我來起金字塔，石頭1粒2噸半，超過200萬塊，挖1條運河，用船來載to̍h好。 Ĕ？Chit招聽--起-來bē-bái neh，免搬kah hiah-nī thiám。 Nî-lô-hô，本底to̍h是每1冬，tī固定時間攏會做大水，溪邊ê田攏淹淹--去，無法度種田，閒閒無代誌做，to̍h ta̍k-ke來sńg石頭--ā。 Sńg石頭，練身體閣兼sńg水，比拚性命搶地盤閣khah健康hōⁿ。 Hèⁿ，beh放火mā放bē --起-來-ā。怎樣放bē --起-來？ To̍h teh淹水--ah，是beh án怎放火？是講，金字塔內底上重ê石頭，超過100噸lio͘h，he是án怎搬--ê？你想講超過100噸to̍h chiâⁿ厲害m̄？我kā你講，古早ê埃及人，閣有挖1塊方尖碑，長度有42米，重量超過1千噸。 Eh，1千噸kah 2噸半差足chē neh，he是beh án怎搬？而且，in teh挖ê時陣，koh順sòa ka磨kah平平。先做si-á-geh kám有差？當然mā有差，意思to̍h是講，我teh挖ê時，to̍h已經想好ài án怎搬--ah，而且我確定teh搬ê時陣，絕對bē去ho͘ kha̍p--tio̍h。 Ŏ͘，是按呢o͘h，ah是beh按怎搬，你m̄ to̍h緊講。 He簡單--lah，chhōe外包--ê，叫外星人來tàu搬to̍h好--ah。 Eh，kám會使按呢偷食步？叫外星人來鬥相共，m̄是面對問題ê方式--lah。你閣敢講，頭tú-á到底是siáng講beh外包hō͘聖誕老阿伯？好--lah好--lah，若無chit táu to̍h算無輸無贏。咱tú-chiah講--ê chit 2 ê，to̍h是thàn無法度種田ê時陣，來舞chit寡工程。凡勢是beh用chit ê方式，hō͘參與ê百姓有通食飽，而且ta̍k工工課做kah足thiám，chiah bē想講beh造反。 To̍h是驚人食飽siuⁿ閒，a̍h是食bē飽會想beh亂，想1寡齣頭來hō͘ in舞，算是1種統治ê手段。咱一般攏會想講，文明kap科技是一直teh進步--ê，m̄-koh，mā有可能因為天災a̍h是戰爭，人死了了，khah早ê技術無法度koh傳--落-來。所擺，古早人做會到ê代誌，後--來顛倒soah愈來愈退步，到chit-má，看tio̍h hit寡古早時代ê巨石建築，to̍h會去想講kám會是外星人舞--ê。古早時有1 ê羅馬帝國，足厲害，羅馬人ê建築技術chiâⁿ進步，我相信ta̍k-ê攏bat聽--過。 In m̄-nā四界去搶人ê地盤，閣會吸收在地人ê智慧kap技術，hō͘ in ê文明愈來愈進步。 In ùi希臘人hit pêng，學tio̍h製作吊車ê技術，in閣開時間去研究，發展，tī 2千年前，羅馬人to̍h會tàng用吊車搬幾十噸ê大石頭--ā。講tio̍h羅馬人ê建築，ta̍k-ke頭1 ê想--tio̍h-ê，應該to̍h是羅馬競技場。因為tī hia拍ê電影足有名，閣有電視劇，chit時通人知。窮實tī Lî-pa-lūn，閣有1 ê世界有名ê Baalbek遺跡，che是2千外年前，羅馬人起ê神廟。 He是1 ê足有名ê世界文化遺產。 Hit ê神廟ê柱á，有7層樓hiah koân，疊tī柱á頂頭ê大石頭，1塊to̍h差不多有60噸。 2千年前ê吊車，to̍h chiah-nī-á厲害o͘h！ Hèⁿ ā，hit塊石頭頂面有8 ê孔，專家認為to̍h是in使用吊車ê證據。若1台吊車用1 ê孔，60噸，按呢算--起-來，in使用ê吊車，1台會tàng搬7噸半。 8台吊車同齊作業，che已經chiâⁿ厲害--ā，不而過，閣khah驚--人ê是，廟寺底層，地基用ê大石頭，長度有22米hiah長，重量上無mā有800噸，你是beh án怎搬？用100台吊車來處理kám bē使？ He石頭長度有22米neh，你1 pêng to̍h ài khǹg 50台ê吊車，吊車kám有hiah細台？ Eh，tio̍h hoⁿh，m̄是用khah chē吊車to̍h khah好neh，ah若無，in是án怎搬--ê？我問--你，若是叫你去搬hit支柱á，你會án怎搬？圓形ê柱á，我想--1-ē，ah，土腳鋪ho͘平，用liàn--ê to̍h好。巧ŏ͘，按呢若是800噸ê石頭，你beh án怎搬？ He to̍h m̄是圓形--ê，無法度用liàn--ê，kám是ài chhōe外包--ê？ Bàng閣想聖誕老阿伯--ah！伊若m̄是圓--ê，to̍h bē-tàng用lìn--ê，按呢你ka變做圓--ê，m̄ to̍h好--ah！ Ĕ？四角形--ê，按呢，我tī伊四ê面攏ka裝1 ê架á，將伊變做圓型--ê，to̍h會tàng用liàn--ê，根本to m̄免吊車--mah！ Hèⁿ ā，吊車用來kā石頭吊ho͘ koân to̍h好，免用吊車搬，chit ê方式聽--起-來蓋合理hoⁿh！ Chit ê理論我會tàng接受。 M̄-koh，mā是有人堅持，m̄相信羅馬人有才調搬hiah大粒ê石頭，to̍h teh ioh講，頂頭ê廟是羅馬人起--ê，不過ē層ê大石頭，是5千年前，甚至是1萬年前ê古早文明chhāi tī hia--ê。羅馬人做bē到，顛倒5千年前ê人to̍h做會到，che koh是啥物理路？我想應該是hoⁿh，to̍h算是烏白講，只要你講了有趣味，to̍h有人會kā你捧場，你若講了siuⁿ正經，顛倒無人beh聽。有道理ŏ͘，我若提出1 ê理論講，chit ê世界上無外星人，聽--起-來to̍h無啥趣味，m̄-koh我若是烏白chòaⁿ，講in án怎閣án怎，我認為chit ê世界上，一定有外星人，按呢to̍h會有chiâⁿ chē人來kā我chhi̍h讚。 Hèⁿ ā，若是tú tio̍h啥物古早時代ê代誌，現此時無法度解說--ê，先賴hō͘外星人to̍h tio̍h--ā。雖罔是按呢講，不過，chit寡巨石文明確實mā是有真chē怪奇，可比講，Turkey有1 ê Gô-bé-khí-lí石陣，chit-má ê專家確定，hit ê遺跡，超過1萬2千年。 Hăⁿ？1萬2千年？Ah m̄ to̍h kah Atlantis kāng 1 ê時期？ Hit ê遺跡ê規模mā是足譀古，而且你ài知影，彼tang陣ê人類，猶閣bē曉種田，in食ê物件to̍h是去phah獵，挽果子，nah有才調飼1大陣人，閒閒無代誌去搬石頭？ Eh，che聽--起-來真正有夠怪奇，你閣sòa lŏe講，我想beh聽。 Ta̍k-ke若是有趣味想beh聽，ài會記lih kā阮注文，tàu相報，我是A-chin in ang。我是Ko͘-chiáu。感謝ta̍k-ê收聽，咱後回再會ŏ͘！【Pe̍h-ōe-jī pán】 Hoan-gêng siu-thiaⁿ Tâi-gí Kóng Koài-kî, lán kin-á-ji̍t beh kóng--ê sī sîn-pì ê tōa chio̍h-thâu kiàn-tio̍k, mā ū lâng ka hō-chò Kī-se̍k-bûn-bêng. Tī choân sè-kài chiâⁿ chē só͘-chāi, bô kâng ê bîn-cho̍k, lóng ū iōng tōa chio̍h-thâu khí kiàn-tio̍k-bu̍t ê bûn-hòa. Chit kóa kiàn-tio̍k-bu̍t, in ê lō͘-iōng ū biō-sī, ū bōng, ū kim-jī-thah, mā ū 1 kóa kàu chit-má, lóng bô-hoat-tō͘ khak-tēng sī beh chò siáⁿ-mih iōng-tô͘ ê ûi-chek. Chit lāi-té siōng ū-miâ ê 1 ê, sī Eng-kok ê Kī-se̍k-tīn, kúi cha̍p tè ê kī-chio̍h pâi-lia̍t chò îⁿ-hêng, ū 4 chheng nî ê le̍k-sú, it-poaⁿ sī ioh kóng, he sī hit-tang-chūn teh chò chè-pài gî-sek ê só͘-chāi, m̄-koh mā bô-hoat-tō͘ khak-tēng. Ai-ki̍p ê Khufu kim-jī-thah, siong-sìn ta̍k-ê lóng bat thiaⁿ--kòe, che sī tī 4500 nî chêng oân-sêng ê kiàn-tio̍k-bu̍t, i sú-iōng 230 bān tè ê tōa chio̍h-thâu ka tha̍h--khí-lâi, ta̍k lia̍p chio̍h-thâu siōng-bô lóng ū 2 tòng pòaⁿ, kim-jī-thah khí hó liáu-āu, sī choân-sè-kài siōng koân ê kiàn-tio̍k-bu̍t, it-ti̍t kàu 700 nî chêng, chit ê kì-lo̍k chiah khì hông chhiau--kòe. Hoat-kok ū 1 ê Carnac Kī-se̍k-lîm, chia ê kī-chio̍h ū chhiau-kòe 3 chheng tè í-siōng, m̄-chai sī chiàu sáⁿ lí-lō͘, koh pâi kah chéng-chê chéng-chê, le̍k-sú chhiau-kòe 5 chheng nî, khí-chō ê nî-tāi pí kim-jī-thah koh khah kú, kî-tiong ū 1 kóa kó͘-chá-sî ê bōng, m̄-koh chiah tōa phiàn ê ûi-chek, sī ūi-tio̍h siáⁿ-mih bo̍k-tek khí--ê, kāng-khoán bô-lâng chai-iáⁿ. Chiàu lán hiān-chhú-sî tùi kó͘-chá-lâng ê jīn-bat, 4, 5 chheng nî chêng ê jîn-lūi, tōa-pō͘-hūn iáu teh iōng chio̍h-thâu chò ê kang-kū, siōng hó ê kang-kū ke̍k-ke to̍h sī chheⁿ-tâng, in nah ū châi-tiāu lâi chhú-lí chiah tōa tè ê chio̍h-thâu? Jî-chhiáⁿ in it-tēng sī ū chiok kiông ê ì-chì a̍h-sī su-kiû, chiah ē tōng-oân hiah-nī-á chē ê lâng lâi bú chit kóa tāi-chì. Lán tú-chiah kóng--ê hit kóa ûi-chek, i kang-têng ê kui-bô͘, to̍h sǹg sī iōng hiān-tāi ê ki-su̍t, hoān-sè to bú bē chhut--lâi, chin chē choan-ka to̍h teh siūⁿ, teh hia ioh kóng, kúi-chheng-nî chêng in sī án-chóaⁿ chò--ê? Kî-si̍t mā m̄-sī hiān-tāi-lâng ài thè in chhau-hoân, chí-sī siūⁿ--tio̍h to m̄ kam-goān, lín chit kóa kó͘-chá-lâng kèng-jiân ū châi-tiāu khí che ū--ê bô--ê! Hèⁿ ā, tio̍h sǹg kóng gún bô hiah gâu poaⁿ chio̍h-thâu, siōng-bô gún mā ài chai-iáⁿ lín sī ū siáⁿ-mih phiat-pō͘--ā! Kang-ô͘ chi̍t tiám koat, kóng--phòa to̍h bô kè-ta̍t, lán chit-má to̍h lâi kà ta̍k-ê án-chóaⁿ poaⁿ chio̍h-thâu, thâu 1 ê sī Eng-kok Kī-se̍k-tīn, thàn lo̍h-seh ê sî-chūn, iōng peng-chhia lâi thoa to̍h hó! Chhiau-kòe 9 bí, 30 tòng í-siōng ê tōa chio̍h-thâu, koh sī kôaⁿ--lâng léng-ki-ki, nā bô-sè-jī io ē siám--tio̍h ŏ͘! Tong-jiân mā m̄-sī 1 ê lâng ka-tī thoa--ā, 100 ê lâng chò-hóe thoa, koh ka 100 chiah Husky. Góa sǹg--1-ē, 30 tòng, to̍h sī 3 bān kong-kin, án-ne lâng hâm káu chò-hóe sǹg, pêng-kin 1 ê ài thoa 150 kong-kin neh! 100 ê lâng nā bô-hoat--i, kiò só͘-ū ê lâng lâi poaⁿ, chng-thâu chng-bóe chhù-piⁿ keh-piah lóng-chóng lâi kau-pôe, sūn-sòa liān sin-thé. Eh, lí sī tòng-chò pa̍t-lâng lóng êng-êng bô tāi-chì--o͘h! Kôaⁿ--lâng bô-hoat-tō͘ choh-sit--ah, bô sī beh kui-kang bih tī chhù--ni̍h khòaⁿ tiān-sī nih, ài ke-kiám-á ūn-tōng--lah! Ūn-tōng ê hong-sek chiâⁿ chē--ā, kó͘-chá-lâng m̄-sī tiāⁿ-tiāⁿ khì kâng chiàm tē-pôaⁿ, chhiúⁿ chia̍h-mi̍h, koh thâi-lâng kiam pàng-hóe. Lí iōng kóng--ê to̍h khah kán-tan, he chhut--khì sī ài hâm lâng piàⁿ sèⁿ-miā neh, iáu-sī poaⁿ chio̍h-thâu khah kiān-khong--lah! Khí-chō Kī-se̍k-tīn ê lí-iû sī ūi-tio̍h kiān-khong, che góa chin-chiàⁿ m̄ bat thiaⁿ--kòe, thoa tōa chio̍h-thâu chin thiám neh. Nā siuⁿ thiám, thoa kah pòaⁿ-lō͘ to̍h ka tàn tī hia, mê-nî chiah koh tńg-lâi thoa to̍h hó--ā, hûiⁿ-ti̍t mā bô lâng ē thau-the̍h. Chio̍h-thâu to̍h bē-tàng chia̍h, thau-the̍h he beh chhòng-siáⁿ, ah m̄-koh lí bān-bān-á bú, kang-têng m̄ to̍h ài thoa chiâⁿ kú. A̍h bô teh kóaⁿ sî-kan--ā, nā-bô, koh ē-tàng gōa-pau hō͘ choan-gia̍p--ê, Sèng-tàn Lāu-a-peh. Eh! Khan kah tùi hia khì, seng bàng kóng hit ê sî-tāi Sèng-tàn Lāu-a-peh kin-pún to iáu-bē chhut-sì, góa mn̄g--lí, lí kám ū siu kòe Sèng-tàn-lāu-lâng sàng--lí ê lé-bu̍t? Bô neh, kám sī góa bô kàu koai? M̄ sī lí bô kàu koai, sī lí lāu--ā-lah! Ái-iò͘, kóng kah án-ne, góa pún-té sī siūⁿ kóng, Sèng-tàn-lāu-lâ

【台語講怪奇】 EP05-蘇美文明 Tâi-gí Kóng Koài-kî - Sumer Bûn-bêng

2024-08-0813:44

咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。用台語來表現，ǹg望ta̍k家聽liáu會感覺趣味。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】歡迎收聽「台語講怪奇」。今á日beh kā ta̍k家紹介--ê，是天頂來--ê Sumer文明！ Sumer人ê英語是Sumerians，che是別人kā in hō ê名，in稱呼家己是烏頭人，因為in ê頭鬃是烏--ê，kah我kāng款，水噹噹。 Hńg，你頭毛已經白--ah neh，你有染--過，叫是我m̄知o͘h！你頭毛chiah白--leh，你連目睭to白--ê，白目！烏頭毛ê人種真chōe，kám有需要強調che？ In是beh強調講，烏頭人是外來--ê，in ê生張to̍h是kah在地人無kāng款。人攏mā是beh強調講，我在地--ê，nah會有人teh強調講我外來--ê，是驚人chhōe伊問路nih！ Hèⁿ ā，奇怪hoⁿh，差不多teh 6500年前，Sumer文明to̍h親像香菇，po̍k--1-ē，雄雄出現tī人類ê歷史內底。 M̆？文明應該是慢慢á發展--起-來-ê，是án-nóa會講是雄雄出現？你ài知影，現代ê Iraq南部hit片土地，是1 ê真歹生存ê所在。 Hia to̍h攏沙漠，規片攏全沙，欠水，本底to̍h khah歹生活。雖罔是án-ne，m̄-koh teh古早時代，mā是有人tòa tī hia，一直到有1工，1陣外來ê人，來到hit ê所在。「Eh！Lín來chia是beh創啥？阮chia ê水無夠lim ŏ͘！」「Hăⁿ？水怎樣會無夠lim？Ah m̄是2條溪hiah大條？」「你目睭青暝o͘h，kám無看tio̍h hit 2條溪，tī hiah遠ê所在，我ta̍k工kōaⁿ水to̍h kōaⁿ kah thèⁿ腿。」 Hit陣外來--ê，你看我，我看你，to̍h開始笑講：「Hăⁿ？Kōaⁿ水？Nah會hiah戇？」 Chit時，to̍h看tio̍h hit陣烏頭人，家私chhoân好to̍h開始teh hia舞。水庫--lah，運河--lah，khin-khin-khiang-khiang to̍h攏kā lín起好--ah，閣有kah噴泉--leh！ Nah有chiah簡單，無人kā in教，in to̍h會曉起水庫？ Hèⁿ ā，in ê智識，技術，攏是chhoân便便，規組chah--來-ê，我tăⁿ開始chiah會講，in ê文明是雄雄出現--ê。 Ah m̄ to̍h親像咱進前講--ê hit齣，印度ê死亡崙古城kāng款，1 ê現代化ê城市chhāi tī hia，m̄知tó位來--ê。 To̍h差不多是chit ê意思。是講，in ê技術，是tī tó位學--ê？In chiah厲害，進前tòa ê所在，mā應該發展了chiâⁿ好--ā！ M̄知 neh，in進前是tòa tī tó位？是án怎beh離開故鄉，走來到chia，攏無人知影，橫直烏頭人to̍h開始tī chia建設，人類上早ê城市、學校，to̍h是in起--ê。講tio̍h學校，我會記eh khah早tī學校bat學--過，Sumer人，mā有發明in家己ê文字，算是人類社會，上早ê 1款文字。無錯，而且有挖tio̍h真chē，in hit ê時代ê文字。 Che我知影，因為in ê文字，是刻tī黏土枋頂頭，he bōe àu--去，會當保存到chit-má。 Hit當陣，in to̍h是the̍h 1支尖尖ê工具，kā文字刻tĕ黏土枋頂頭，kā hit塊枋á khǹg邊--á ho͘ ta，枋á to̍h會變kah tēng-kho̍k-kho̍k，成本kē，製作閣簡單。 M̄-koh chit ê方式欠點mā真chōe！ Ŏ͘？啥物欠點？若tú-tio̍h落雨天，to̍h bōe-tàng kah人簽約，若無黏土枋m̄-nā bōe ta，凡勢規塊chŏaⁿ溶--去。 Hò͘，你nah會chiah戇，bē曉用火烘o͘h！你chiah戇--leh，烘烘--leh，規塊燒燙燙，是beh án怎the̍h？你teh邊--á小等--1-ē to̍h好--ā，論真講無等伊ta，mā是bē使--ā。 Hit ê時陣若行tī街á頭，m̄ tio̍h攏會看tio̍h 1陣人khiā teh路邊，tī hia kho̍k-kho̍k-á等。小等--1-下是會án怎，生理kám有做hiah大？你頭á講，有挖tio̍h chiâⁿ chōe in留--落-來ê文字，án-ne應該對烏頭人ê研究真有幫贊hōⁿ！幫贊是有--lah，猶m̄-koh，黏土枋記錄ê內容，足chē物件，準講看有mā無路用。看有，對in ê歷史to̍h有khah chōe ê認bat，nah會講無路用！因為真chē文字，開時間去解讀，結果寫--ê是，菜頭1條25，豬肉1斤150，chit款日常生活ê物件。 Ah m̄ tio̍h bōe-su發票kāng款！ Hèⁿ ā，khah細塊ê黏土枋，親像咱chit-má ê信用卡hiah大niâ，用teh記錄交易ê資料，足成發票無錯。 Án-ne ài收ho͘好，若無，tio̍h 1千萬，結果摔歹--去to̍h無thang換--ā。閣有chiâⁿ chē teh記錄，寫講今年種田收成jōa chē，in囝chit擺考試第幾名，chit寡li-li-khok-khok ê代誌，攏保存到taⁿ。 Án-ne講--起-來，in m̄ to̍h ta̍k-ê人攏bat字。 Eh！你閣翻頭ka想看māi，in ê文字若是chiah-nī-á普遍，百姓平常時to̍h the̍h來teh記錄生活，應該bē烏白寫hoⁿh！你是beh強調講，in寫ê文字，是會當相信--ê？ Hèⁿ，我to̍h是chit ê意思。你敢知，khah早專家bat發現1 ê文件，寫講in有1陣人，開刀kā病人目睭內有問題ê物件the̍h--出-來，hō͘伊閣會當看--tio̍h。 Hăⁿ？是真--ê a̍h是假--ê，siuⁿ hàm--lah！真--ê ō͘，頂koân to̍h án-ne寫，害hit寡專家chhoah 1 tiô。 M̀，若準講chit件代誌是假--ê，án-ne應該閣有別項，會當證明in定定teh烏白寫ê物件--ā。 To̍h是無--mah，親像啥物外交文件，法律條文，攏有挖--tio̍h。 He攏是日常生活用會tio̍h--ê，bōe使烏白寫。上重要--ê是，閣有挖tio̍h，kah烏頭人ê歷史，有關係ê文字！好！In ùi佗位來--ê？是án怎chiah-nī-á厲害？Kám有寫？ Che m̄知neh，凡勢有寫，只是猶未挖--出-來。 M̄-koh，有挖tio̍h 1 ê chiâⁿ重要ê文件，記錄in ê國王，叫做啥物名，統治jōa chē年。政治--lah，統治者--lah，確實蓋重要，一定ài寫--落-來。我kā你講，hit份文件有jōa重要你知--無，chit-má攏總挖tio̍h 16份kāng款--ê neh！ Kám會是考試ê時陣，ta̍k-ke攏偷看kāng 1 ê同學ê答案？ 1 ê人身軀邊，是beh án怎坐15 ê？Hit寡khó͘-pih是beh予tòa tī無kāng所在ê人，攏會當瞭解in ê歷史。所擺是teh無kāng城市遺跡挖--tio̍h-ê！怪奇ê代誌to̍h tī chia，伊頂頭寫講，第1 ê國王，是天頂來--ê！ Hó͘--ò͘！外星人！閣有，頂頭寫講，頭起先有8 ê國王，1 ê紲1 ê，統治ê時間超過24萬年。 Ĕ？我有問題！我知--lah，你頭殼有問題m̄！ M̄是--lah，我是beh問講，Sumer文明m̄是chiah 6千年？In 24萬年是teh tó位統治--ê？ M̀，chit ê問題chiâⁿ好，不而過che考試bē考，黏土枋頂頭無寫--ê，攏無重要。 Ah，臭彈--lah！你感覺聽--起-來蓋臭彈，我會當了解，不過，he路尾有幾ê國王ê名，tī別ê民族ê歷史內面，真正有記--落-來。 24萬年，平均1 ê國王統治3萬年，閣是天頂來--ê，án-ne一定是外星人。真chē人相信外星人chit ê講法，teh烏頭人ê記錄，有講tio̍h咱chit ê太陽系，有1粒惑星，叫做Ni-pí-luh。 Lim啤酒。 M̄是lim啤酒，是Ni-pí-luh，chit粒星se̍h太陽1 liàn ài 3600年。 Án-ne咱一般人是無法度thang看，m̄-koh Sumer人ê國王會當看幾nā擺。烏頭人講，神明to̍h是ùi Ni-pí-luh來--ê，神明teh 45萬年前，創造人類。若是外星人舞--ê，án-ne伊一定有目的。有人推論講，外星人創造人類，是beh來替in挖金á。 Hăⁿ-à，咱人類ê祖先，hō͘外星人當做奴才o͘h！ Eh！神明叫你做代誌，你kám敢講無ài？ Heh heh，m̄敢，抑m̄-koh外星人ài金á beh創啥，beh the̍h去開o͘h！金á m̄-nā是投資niâ，用tī工業方面，mā是足有價值ê物件neh！ Bōe seⁿ-sian，bōe hu--去，確實有伊ê價值，不而過，外星人kám無啥物設備，會當家己挖，to̍h閣飼hiah chōe人去替in挖。我a̍h知，凡勢in to̍h khah無閒，叫奴才去替in挖，chhāi 1 ê國王tī hia管理to̍h好。 1 ê國王ài統治幾nā萬年，想--起-來mā是蓋辛苦。 Ká-ná hō͘人判無期--leh！後--來-leh？後--來to̍h做大水--ah，人類險hō͘水淹kah無--去，凡勢連國王to hông chhiâng-chhiâng--去。 Án-ne活--落-來ê人類tio̍h自由--ah！你食khah bái--leh，liam-mi閣派新ê國王來--ah！ Hăⁿ--à？僥倖o͘h，人類ê祖先chiah-nī-á歹命！做大水chit ê傳說，上早to̍h是ùi Sumer人chia出--來-ê，1點鐘60分，1 ê圓箍á 360度，攏是烏頭人發明--ê。 Ah m̄是1陣挖金á ê奴才，bat chiah chōe是beh創啥？ Chiah通知影幾點聽好下班--ā！閣有1 ê趣味ê現象，本底1 ê國王攏統治幾若萬年，tī做大水了後，soah變做千外年，百外年，幾十年，無親像進前hiah長歲壽--ā。予大水淹1-ē，長歲壽ê功能soah歹--去。若講khah古早時ê國王是神，án-ne後--來ê國王to̍h慢慢á變做kah一般人kāng款。若m̄是神明，to̍h無人驚--ā，無teh ka信táu。自án-ne，Sumer ê王朝tī 4千外年前，因為戰爭，滅亡--ah！古早時因為戰爭滅亡，che定定有--ê-lah，換作現代mā是kāng款--ā。講tio̍h戰爭hoⁿh，我閣想tio̍h 1件代誌，當初發生Iraq戰爭ê時陣，美軍佔領烏頭人留--落-來ê Ur古城，足chē人講in chhōe tio̍h 1 ê門，會當kā人傳去別粒星球。閣teh臭彈--ā，古城tī hia幾若千年，有好物á早to̍h hông搬了了--ah。無 ŏ͘，1百冬前ê研究，chiah tī hit ê遺跡，發現1頂國王teh戴ê頭盔，頂頭竟然是鍍金--ê。鍍金？Án-ne m̄-to̍h ài有電，拜託--eh，幾千年前neh！ Hèⁿ--ā，所擺人chiah會講，戰爭chiah開始，美國to̍h趕緊派軍隊去佔hit ê所在。Chhōe看有啥物好空--ê-無！ He聽--起-來tio̍h是烏白講--ê，tī沙漠內底，無位通bih，親像古城hit款khah koân ê所在，一定是先佔先贏--ê，khah早我做兵ê時陣hoⁿh。好！Tòng--khài！Mài閣講你做兵ê時陣！ Eh！M̄是，你聽我講--1-ē-lah！我是Niau-tāu，咱後回再會ŏ͘！你聽我講--lah！我是Chiá-siông，eh，等--1-ē！【Pe̍h-ōe-jī pán】 Hoan-gêng siu-thiaⁿ “Tâi-gí Kóng Koài-kî”. Kin-á-ji̍t beh kā ta̍k-ke siāu-kài--ê, sī thiⁿ-téng lâi--ê Sumer bûn-bêng! Sumer lâng ê Eng-gí sī Sumerians, che sī pa̍t-lâng kā in hō ê miâ, in chheng-ho͘ ka-tī sī O͘-thâu-lâng, in-ūi in ê thâu-chang sī o͘--ê, kah góa kāng-khoán, súi-tang-tang. Hńg, lí thâu-mo͘ í-keng pe̍h--ah neh, lí ū ní--kòe, kiò sī góa m̄-chai o͘h! Lí ê thâu-mo͘ chiah pe̍h--leh, lí liân ba̍k-chiu to pe̍h--ê, pe̍h-ba̍k! O͘-thâu-mo͘ ê jîn-chéng chin chōe, kám ū su-iàu kiông-tiāu che? In sī beh kiông-tiāu kóng, O͘-thâu-lâng sī gōa-lâi--ê, in ê seⁿ-tiuⁿ to̍h sī kah chāi-tē-lâng bô kāng-khoán. Lâng lóng mā sī beh kiông-tiāu kóng, góa chāi-tē--ê, nah ē ū lâng teh kiông-tiāu kóng góa gōa-lâi--ê, sī kiaⁿ lâng chhōe i mn̄g-lō͘ nih! Hèⁿ ā, kî-koài hoⁿh, chha-put-to teh 6500 nî chêng, Sumer bûn-bêng to̍h chhin-chhiūⁿ hiuⁿ-ko͘, po̍k--1-ē, hiông-hiông chhut-hiān tī jîn-lūi ê le̍k-sú lāi-té. M̆? Bûn-bêng èng-kai sī bān-bān-á hoat-tián--khí-lâi-ê, sī án-nóa ē kóng sī hiông-hiông chhut-hiān? Lí ài chai-iáⁿ, hiān-tāi ê Iraq lâm-pō͘ hit phiàn thó͘-tē, sī 1 ê chin pháiⁿ seng-chûn ê só͘-chāi. Hia to̍h lóng soa-bo̍k, kui phiàn lóng choân soa, khiàm-chúi, pún-tóe to̍h khah pháiⁿ seng-oa̍h. Sui-bóng sī án-ne, m̄-koh teh kó͘-chá sî-tāi, mā sī ū lâng tòa tī hia, it-ti̍t kàu ū 1 kang, 1 tīn gōa-lâi ê lâng, lâi kàu hit ê só͘-chāi. “Eh! Lín lâi chia sī beh chhòng-siáⁿ? Gún chia ê chúi bô-kàu lim ŏ͘!” “Hăⁿ? Chúi chóaⁿ-iūⁿ ē bô-kàu lim? Ah m̄-sī 2 tiâu khe hiah tōa tiâu?” “Lí ba̍k-chiu chheⁿ-mê o͘h, kám bô khòaⁿ tio̍h hit 2 tiâu khoe, tī hiah hn̄g ê só͘-chāi, góa ta̍k-kang kōaⁿ-chúi to̍h kōaⁿ kah thèⁿ-thúi.” Hit tīn gōa-lâi--ê, lí khòaⁿ góa, góa khòaⁿ lí, to̍h khai-sí chhiò kóng: “Hăⁿ? Kōaⁿ-chúi? Nah ē hiah gōng?” Chit sî, to̍h khòaⁿ tio̍h hit tīn O͘-thâu-lâng, ke-si chhoân hó to̍h khai-sí teh hia bú. Chúi-khò͘--lah, ūn-hô--lah, khin-khin-khiang-khiang to̍h lóng kā lín khí-hó--ah, koh ū kah phùn-chôaⁿ--leh! Nah ū chiah kán-tan, bô lâng kā in kà, in to̍h ē-hiáu khí chúi-khò͘? Hèⁿ ā, in ê tì-sek, ki-su̍t, lóng sī chhoân piān-piān, kui-cho͘ chah--lâi-ê, góa tăⁿ khai-sí chiah ē kóng, in ê bûn-bêng sī hiông-hiông chhut-hiān--ê. Ah m̄ to̍h chhin-chhiūⁿ lán chìn-chêng kóng--ê hit chhut, Ìn-tō͘ ê Sí-bông-lūn Kó͘-siâⁿ kāng-khoán, 1 ê hiān-tāi hòa ê siâⁿ-chhī chhāi tī hia, m̄-chai tó-ūi lâi--ê. To̍h chha-put-to sī chit ê ì-sù. Sī kóng, in ê ki-su̍t, sī tī tó-ūi o̍h--ê? In chiah lī-hāi, chìn-chêng tòa ê só͘-chāi, mā èng-kai hoat-tián liáu chiâⁿ hó--ā! M̄-chai neh, in chìn-chêng sī tòa tī tó-ūi? Sī án-chóaⁿ beh lī-khui kò͘-hiong, cháu lâi kàu chia, lóng bô-lâng chai-iáⁿ, hoâiⁿ-ti̍t O͘-thâu-lâng to̍h khai-sí tī chia kiàn-siat, jîn-lūi siōng-chá ê siâⁿ-chhī, ha̍k-hāu, to̍h sī in khí--ê. Kóng tio̍h ha̍k-hāu, góa ē-kì-eh khah chá tī ha̍k-hāu bat o̍h--kòe Sumer lâng, mā ū hoat-bêng in ka-kī ê bûn-jī, sǹg sī jîn-lūi siā-hōe, siōng-chá ê 1 khoán bûn-jī. Bô-chhò, jî-chhiáⁿ ū ó͘ tio̍h chin chē, in hit ê sî-tāi ê bûn-jī. Che góa chai-iáⁿ, in-ūi in ê bûn-jī, sī khek tī liâm-thô͘-pang téng-thâu, he bōe àu--khì, ē-tàng pó-chûn kàu chit-má. Hit-tang-chūn, in to̍h sī the̍h 1 ki chiam-chiam ê kang-khū, kā bûn-jī khek tĕ liâm-thô͘-pang téng-thâu, kā hit tè pang-á khǹg piⁿ--á ho͘ ta, pang-á to̍h ē piàn kah tēng-kho̍k-kho̍k, sêng-pún kē, chè-chok koh kán-tan. M̄-koh chit ê hong-sek khiàm-tiám mā chin chōe! Ŏ͘? Siáⁿ-mih khiàm-tiám? Nā tú-tio̍h lo̍h-hō͘-thiⁿ, to̍h bōe-tàng kah lâng chhiam-iok, nā bô liâm-thô͘-pang m̄-nā bōe ta, hoān-sè kui tè chŏaⁿ iûⁿ--khì. Hò͘, lí nah ē chiah gōng, bē-hiáu iōng hóe hang o͘h! Lí chiah gōng--leh, hang hang--leh, kui tè sio-thǹg-thǹg, sī beh án-chóaⁿ the̍h? Lí teh piⁿ--á sió-tán--1-ē to̍h hó--ā, lūn-chin kóng bô tán i ta ,mā sī bē-sái--ā. Hit ê sî-chūn nā kiâⁿ tī ke-á-thâu, m̄

【台語講怪奇】 EP04-死亡崙古城 Tâi-gí Kóng Koài-kî - Sí-bông-lūn Kó͘-siâⁿ

2024-08-0113:01

咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。用台語來表現，ǹg望ta̍k家聽liáu會感覺趣味。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】歡迎收聽「台語講怪奇」。 Tī 1922年，teh印度MohenjoDaro chit ê所在，發現1 ê古城，因為chit ê城，起teh水邊á ê山崙頂頭，人ka hō做死亡崙古城。古城四界攏有，印度chit ê死亡崙古城kám有khah怪奇？有o͘h！Chit ê古城上有名--ê，to̍h是真chē人懷疑講，khah早tī chia發生過核子戰爭。古早時戰來戰去，che定定有--ê-lah，m̄-koh，你講核子戰爭，che kám有啥證據，你是m̄通烏白講ŏ͘！ Che m̄是我烏白講，che是聽人講--ê-lah！ Ŏ͘？別人是án怎講--ê？ Tī印度，有1 ê 3500年前，流傳--落-來ê故事，內底是teh講1場古早時代所發生ê戰爭。所擺是3500年前ê戰爭。 M̄是--lah，當初講故事ê人mā是聽人講--ê，戰爭是閣khah久進前，差不多4600年前所發生ê代誌。 Hăⁿ？Hiah久進前發生ê事件，kah核子戰爭有啥關係？聽講in 2 pêng teh相戰ê時陣，m̄-nā有giâ刀ê軍隊，閣有teh天頂飛ê UFO，tī hiah射飛彈。啥物？Hit ê時陣to̍h有飛彈？ Hèⁿ ā，in 2 pêng ê boss攏駛UFO，teh天頂射來射去，pin-pin-piàng-piàng，閣有1台UFO，飛去3 ê城市頂頭，原子彈ka結--lòe，pòng，大爆炸！ Ái-iò͘，che nah是戰爭chiàn-cheng？聽--起-來根本to̍h是大屠殺--mah！ He爆炸ê光，親像日頭hiah-nī鑿目，城內ê人攏總死了了，khah遠ê所在，hit寡兵á，身軀攏to̍h火，裝備趕緊thǹg--落-來，隨時to̍h跳--落-去水內底浸。 Kah hiah奇，hit ê時代to̍h有UFO，閣有原子彈，che真正有夠怪奇，你m̄-tio̍h講ho͘khah詳細--leh？有趣味hōⁿ，我專工去chhōe hit ê故事出來看，發現1件閣khah怪奇ê代誌！ Hăⁿ？緊講緊講。 Hit ê故事內底，根本to無寫tio̍h啥物tī天頂teh飛ê戰車--lah，飛彈--lah，原子彈hit寡物件。 Eh！你頭tú-á講chiah久，攏是teh烏白chòaⁿ o͘h？你無彩我ê時間！ Eh eh，m̄是--lah，我頭起先tio̍h有講，che是聽人講--ê，聽人講--ê無teh負責--ê-lah！ Chit寡有--ê無--ê是聽siáng講--ê？叫伊出來負責！ Chit件代誌，上早是瑞士1 ê足有名ê tio̍h獎ê作家講--ê，伊tī 1968年出1本冊，內面寫講，古早古早，有真chē無法度解說ê代誌，攏是外星人舞--ê。 Tio̍h獎ê作家？伊是tio̍h啥物獎？伊the̍h tio̍h 1991年，笑詼Nobel賞。莫怪伊會tio̍h chit ê獎。好，咱轉來講今á日ê主題，印度ê死亡崙古城。 Ĕ？Tio̍h hoⁿh，聽tio̍h UFO，soah差1點á bē記chit咱今á日ê主題。 Chit ê遺跡是teh 1922年發現--ê，伊規劃kah kán-ná棋盤--leh，城市內底ê交通真利便。 Án-ne應該是先kā城市規劃好chiah起--ê，m̄-chiah有法度kā路起做棋盤形。 Chit ê城市ê建築足先進，兩層樓ê厝，ta̍k間攏有馬桶，閣有規劃代先ê下水道系統。幾千年前neh，竟然有下水道ê設計！而且chit ê城市規模足大，專家研究，當時應該差不多有4萬人tòa tī chia。想bē到印度人ê祖先chiah-nī-á厲害！是m̄是印度人ê祖先，che to̍h歹講--à，因為挖--出-來ê物件，頂頭ê文字kah印度文無kâng，無人看有。所擺hit ê文明已經滅亡--ah？是án怎無--去-ê，4萬人neh，上無mā應該有留1寡線索hông研究。若講tio̍h古早文明ê滅亡，一般咱想--tio̍h-ê，攏是hit幾ê理由，天災--lah，戰爭--lah！無的確是外星人kā in接--轉-去！ Mài未曾未to̍h先牽去外星人hia，外星人mā是蓋無辜，我本底是beh接講，凡勢是破病死了了--ah。 M̄是外星人án-ne to̍h無趣味--ā，好--lah，好--lah，無是tó 1款你講看māi？咱拄chiah有講--tio̍h，chit ê城市起teh水邊á，經過專家ê研究，khah早in bat hō͘水淹幾nā擺，有人講in擋bōe牢，搬走--ah！ M̄-koh水若退，to̍h會使轉去--ā，無，chiah-nī-á大ê城市，規ê放ho͘去，m̄是足phah-sńg。 Hèⁿ--ā，hit ê時代，你是beh搬去tó位，chiah有法度ta̍k間厝攏有便所通khû！便所kám是重點？ Eh！便所蓋重要neh，he是咱已經慣勢--ah，無感覺，你若搬去無便所ê所在tòa，你to̍h知--lah！想想--leh，án-ne講mā是tio̍h--lah！叫我搬去無便所ê所在tòa，我chiah無ài。而且便所mā m̄是凊彩起tio̍h好，teh起進前tio̍h ài先挖下水道chiah會使neh，he大工程o͘h！ Ĕ？下水道？M̀，Kám會是in當初淹水ê時，大水流入去下水道，滿--khài，soah規ê he攏浮--起-來。臭1 ē soah無人敢tòa！心理創傷meh！其實hoⁿh，當初teh挖死亡崙古城ê過程，閣有挖tio̍h 40外副ê死人骨頭，有ê規陣死teh路中央，有ê死tī厝內。是臭--死-ê a̍h是去hō͘水淹死--ê？拜託--eh，臭死--ê是看會出來--o͘h！ Nah會看bē出--來？你看伊ê手是m̄是掩tĕ鼻孔hia--a。 Ah若1肢手掩teh嘴--eh，另外1肢手khǹg teh腹肚hia，你kám會講伊是笑死--ê？啥？閣有挖tio̍h笑死--ê！無--lah！ Án-ne hit寡人to̍h是hō͘水淹死--ê-mah！我認為m̄是，若是做大水淹死--ê，應該會chia 1-ê hia 1-ê án-ne，若真正水siuⁿ大，規ê沖了了，mā bōe講規陣死teh路中央chiahtio̍h--ā。有道理，而且in規陣倒tī hia，to̍h是講事件發生了後，攏無人轉來整理，若是4萬人沖了了，無可能留he幾ê，án-ne，kám會是戰爭ê關係？戰爭是1種講法，因為死亡崙古城滅亡ê時陣，拄好是Á-lī-àn人四界發動戰爭ê年代。所以--à，in真有可能是去hō͘ Á-lī-àn人phah--死-ê！ Ah m̄-koh tòa 4萬人ê所在，若是戰爭，應該會死chiâⁿchē人--ā，chhun--ê人--leh？連骨頭tio̍h揣無--ō͘，閣再講，in文明發展hiah-nī-á懸，beh kah人相戰kám會輸？若連骨頭to̍h揣無，án-ne mā無可能是破病死--ê，若有真chē人破病，死kah bē赴埋，一定會挖tio̍h真chē骨頭chiah tio̍h。 Hèⁿ--à，in滅亡ê因端，過四千外年，已經揣無證據--ah，後--來tī hit ê所在活動ê人，對chit ê古城ê代誌，完全無任何ê記錄。 Ŏa-à，in人緣chiah-nī bái nih，攏無朋友通kā in祭拜--o͘h！ To̍h是án-ne，完全死無人知neh，閣有1件足奇怪ê代誌，當初teh挖chit ê古城ê時陣，挖tio̍h足chē玻璃。 Kám講hit ê時代to̍h發明玻璃--ā？ M̄是，hia ah無挖tio̍h啥玻璃罐á，m̄-koh hit kho͘圍á，規土腳攏是碎糊糊ê玻璃，甚至連壁頂mā有，in to̍h kā he玻璃，送去實驗室研究。 Kám有研究出啥物怪奇ê代誌？ Hò͘，一研究--lòe，驚死人，he玻璃竟然是普通ê土砂，經過1400度燒--過，然後溫度雄雄降--lòe，chiah會變做hit款玻璃。 Ái-iò͘，1400度，是發生啥物代誌，燒kah按呢生？後--來inchiah發見講，he竟然是1 ê爆炸ê現場。 Chiah拄好，咱進前chiah講到王恭廠大爆炸，chit回又閣是爆炸！ Chit ê爆炸，無輸王恭廠hit ê，ùi爆炸ê中心tùi外圍算--出-去，1000公尺以內，所有ê厝攏總無--去。驚--死，che爆炸ê規模chiah-nī-á大，規ê城市to̍h因為án-ne無去，mā講ē得過--lah！發現chit ê遺跡到taⁿ已經超過100冬--a，100冬前ê專家，完全想無che是啥物狀況！ Kám會是去hō͘火流星kiat--tio̍h？哪有一日到暗teh火流星，無hiah拄好--lah，chit件代誌一直到幾十冬了後，科技發展--起-來，有人kā in當初挖--tio̍h ê骨頭the̍h去化驗，竟然驗出有輻射留teh頂頭ŏ͘！ Hăⁿ--à，莫怪會有人主張講，古早時發生過核子戰爭。 He to̍h是hit當陣拄好是冷戰時期，ta̍k-ke足驚會發生核子戰爭，m̄ chiah會想tio̍h beh去驗看māi。是講，超過4000年--ah，kám閣驗會出輻射？我a̍h知，有ê人講有，有ê人講無，我想應該是無--lah！你nah ē-tàng確定？若有輻射，kám有可能開放hō͘人去hia chhit-thô。 Hia閣有開放--o͘h？Án-ne若有人beh去印度chhit-thô，ē-tàng去hit ê所在行行看看--leh hoⁿh！ Chit-má若去印度是看bōe-tio̍h--eh-lah！ Hăⁿ？你又閣teh kă騙？ M̄是--lah，發見古城ê hit ê所在，後--來因為Pakistan獨立建國，to̍h變做Pakistan ê領土。 Ŏ͘，是án-ne o͘h，我想講你閣teh kā我騙！無--lah，我nah會敢kā你騙，nā準講是kā你騙，橫直he攏mā是聽人講--ê，我是無teh負責--ê ŏ͘！無負責閣敢講kah chiah大聲！ Án-ne感謝ta̍k家今á日來收聽「台語講怪奇」，我是Niau-tāu，我是Chiá-siông，咱後回再會ŏ͘！【Pe̍h-ōe-jī pán】 Hoan-gêng siu-thiaⁿ “Tâi-gí Kóng Koài-kî”. Tī 1922 nî, teh Ìn-tō͘ MohenjoDaro chit ê só͘-chāi, hoat-hiān 1 ê kó͘-siâⁿ, in-ūi chit ê siâⁿ, khí teh chúi-piⁿ-á ê soaⁿ-lūn téng-thâu, lâng ka hō-chò “Sí-bông-lūn Kó͘-siâⁿ”. Kó͘-siâⁿ sì-kè lóng ū, Ìn-tō͘ chit ê Sí-bông-lūn Kó͘-siâⁿ kám ū khah koài-kî? Ū o͘h! Chit ê kó͘-siâⁿ siōng ū-miâ--ê, to̍h sī chin chē lâng hoâi-gî kóng, khah chá tī chia hoat-seng kòe he̍k-chú chiàn-cheng. Kó͘-chá-sî chiàn lâi chiàn khì, che tiāⁿ-tiāⁿ ū--ê-lah. m̄-koh, lí kóng he̍k-chú chiàn-cheng, che kám ū siáⁿ chèng-kù, lí sī m̄-thang o͘-pe̍h-kóng ŏ͘! Che m̄-sī góa o͘-pe̍h-kóng, che sī thiaⁿ lâng kóng--ê-lah! Ŏ͘? Pa̍t-lâng sī án-chóaⁿ kóng--ê? Tī Ìn-tō͘, ū 1 ê 3500 nî chêng, liû-thoân--lo̍h-lâi ê kò͘-sū, lāi-té sī teh kóng 1 tiûⁿ kó͘-chá sî-tāi só͘ hoat-seng ê chiàn-cheng. Só͘-pái sī 3500 nî chêng ê chiàn-cheng. M̄-sī--lah, tong-chho͘ kóng kò͘-sū ê lâng mā sī thiaⁿ lâng kóng--ê, chiàn-cheng sī koh khah kú chìn-chêng, chha-put-to 4600 nî chêng só͘ hoat-seng ê tāi-chì. Hăⁿ? Hiah kú chìn-chêng hoat-seng ê sū-kiāⁿ, kah he̍k-chú chiàn-cheng ū siáⁿ koan-hē? Thiaⁿ-kóng in 2 pêng teh sio-chiàn ê sî-chūn, m̄-nā ū giâ-to ê kun-tūi, koh ū teh thiⁿ-téng poe ê UFO, tī hia siā hui-tôaⁿ. Siáⁿ-mih? Hit ê sî-chūn to̍h ū hui-tôaⁿ? Hèⁿ ā, in 2 pêng ê boss lóng sái UFO, teh thiⁿ-téng siā lâi siā khì, pin-pin-piàng-piàng, koh ū 1 tâi UFO, poe khì 3 ê siâⁿ-chhī téng-thâu, goân-chú-tôaⁿ ka kiat--lòe, pòng, tōa po̍k-chà! Ái-iò͘, che nah sī chiàn-cheng? Thiaⁿ--khí-lâi kin-pún to̍h sī tōa-tô͘-sat--mah! He po̍k-chà ê kng, chhin-chhiūⁿ ji̍t-thâu hiah-nī chha̍k-ba̍k, siâⁿ-lāi ê lâng lóng-chóng sí-liáu-liáu, khah hn̄g ê só͘-chāi, hit kóa peng-á, seng-khu lóng to̍h-hóe, chong-pī kóaⁿ-kín thǹg--lo̍h-lâi, sûi-sî to̍h thiàu--lo̍h-khì chúi lāi-té chìm. Kah hiah kî, hit ê sî-tāi to̍h ū UFO, koh ū goân-chú-tôaⁿ, che chin-chiàⁿ ū-kàu koài-kî, lí m̄-tio̍h kóng ho͘ khah siông-sè--leh? Ū chhù-bī hōⁿ, góa choan-kang khì chhōe hit ê kò͘-sū chhut-lâi khòaⁿ, hoat-hiān 1 kiāⁿ koh khah koài-kî ê tāi-chì! Hăⁿ? Kín kóng kín kóng. Hit ê kò͘-sū lāi-tóe, kin-pún to bô siá tio̍h siáⁿ-mih tī thiⁿ-téng teh poe ê chiàn-chhia--lah, hui-tôaⁿ--lah, goân-chú-tôaⁿ hit kóa mi̍h-kiāⁿ. Eh! Lí thâu-tú-á kóng chiah kú, lóng sī teh o͘-pe̍h chòaⁿ o͘h? Lí bô-chhái góa ê sî-kan! Eh eh, m̄-sī--lah, góa thâu-khí-seng tio̍h ū kóng, che sī thiaⁿ lâng kóng--ê, thiaⁿ lâng kóng--ê bô teh hū-chek--ê-lah! Chit kóa ū--ê bô--ê sī thiaⁿ siáng kóng--ê? Kiò i chhut-lâi hū-chek! Chit kiāⁿ tāi-chì, siōng-chá sī Sūi-sū 1 ê chiok ū-miâ ê tio̍h chióng ê chok-ka kóng--ê. i tī 1968 nî chhut 1 pún chheh, lāi-bīn siá kóng, kó͘-chá kó͘-chá, ū chin-chē bô-hoat-tō͘ kái-soeh ê tāi-chì, lóng sī gōa-chheⁿ-lâng bú--ê. Tio̍h chióng ê chok-ka? I sī tio̍h siáⁿ-mih chióng? I the̍h tio̍h 1991 nî, chhiò-khoe Nobel siúⁿ. Bo̍k-koài i ē i to̍h chit ê chióng. Hó, lán tńg-lâi kóng kin-á-ji̍t ê chú-tê, Ìn-tō͘ ê Sí-bông-lūn Kó͘-siâⁿ. Ĕ? Tio̍h hoⁿh, thiaⁿ tio̍h UFO, soah chha 1 tiám-á bē-kì-chit lán kin-á-ji̍t ê chú-tê. Chit ê ûi-chek sī teh 1922 nî hoat-hiān--ê, i kui-ōe kah kán-ná kî-pôaⁿ--leh, siâⁿ-chhī lāi-tóe ê kau-thong chin lī-piān. Án-ne èng-kai sī seng kā siâⁿ-chhī kui-ōe hó chiah khí--ê, m̄-chiah ū hoat-tō͘ kā lō͘ khí chò kî-pôaⁿ hêng. Chit ê siâⁿ-chhī ê kiàn-tiok chiok sian-chìn, nn̄g chàn lâu ê chhù, ta̍k-keng lóng ū bé-tháng, koh ū kui-ōe tāi-seng ê hā-chúi-tō hē-thóng. Kúi chheng nî chêng neh, kèng-jiân ū hā-chúi-tō ê siat-kè! Jî-chhiáⁿ chit ê siâⁿ-chhī kui-bô͘ chiok tōa, choan-ka gián-kiù, tong-sî èng-kai chha-put-to ū 4 bān lâng tòa tī chia. Siūⁿ-bē-kàu Ìn-tō͘-lâng ê chó͘-sian chiah-nī-á lī-hāi! Sī-m̄-sī Ìn-tō͘-lâng ê chó͘-sian, che to̍h pháiⁿ-kóng--à, in-ūi ó͘--chhut-lâi ê mi̍h-kiāⁿ, téng-thâu ê bûn-jī kah Ìn-tō͘-bûn bô-kâng, bô lâng khòaⁿ ū. Só͘-pái hit ê bûn-bêng í-keng bia̍t-bông--ah? Sī án-chóaⁿ bô--khì-ê, 4 bān lâng neh, siōng-bô, mā èng-kai ū lâu 1 kóa sòaⁿ-soh hông gián-kiù. Nā kóng tio̍h kó͘-chá bûn-bêng ê bia̍t-bông, it-poaⁿ lán siūⁿ--tio̍h-ê, lóng sī hit kúi ê lí-iû, thian-chai--lah, chiàn-cheng--lah! Bô-tek-khak sī gōa-chheⁿ-lâng kā in chiap--tńg-khì! Mài bōe-chêng-bōe to̍h seng khan khì gōa-chheⁿ-lâng hia, gōa-chheⁿ-lâng mā sī kài bû-ko͘, góa pún-té sī beh chiap kóng, hoān-sè sī phòa-pēⁿ sí-liáu-liáu--ah. M̄-sī gōa-chheⁿ-lâng án-ne to̍h bô chhù-bī--ā, hó--lah, hó--lah, bô sī tó 1 khoán lí kóng khòaⁿ-māi? Lán tú-chiah ū kóng--tio̍h, chit ê siâⁿ-chhī khí teh chúi-piⁿ-á, keng-kòe choan-ka gián-kiù, khah-chá in bat hō͘ chúi im kúi-nā pái, ū lâng kóng in tòng-bōe-tiâu, poaⁿ

【白蔥仔公主】EP06 Pe̍h-chhang-á Kong-chú

2024-07-2518:16

講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】經過半點鐘，白馬王子總算是kā白蔥á公主解說清楚講，伊絕對無偷食啥物蘋果，伊來chia ê時陣to̍h無看tio̍h蘋果--ah。Sòa--lòe伊閣開20分鐘，kā矮á猴兄弟chiù-chōa，伊絕對無趁公主bē振bā動ê時去kha̍p tio̍h伊半ki毛。落尾，伊總算是會當用3分鐘ê時間，kā伊chit chōa出門ê目的，講hō͘ ta̍k家聽，閣the̍h手機á--出-來，kā王后ê通緝海報péng--出-來。白蔥á公主講：「Chit張我去食肉圓ê時陣有看--過。Eh！真正愈看愈sêng阮後母neh！」Chit ê時陣雄雄碰1聲，大門hông lòng--開，有1 ê規身軀hiong-kài-kài，衫頂頭閣有樹葉á ê人，gia̍h 1支尺二á khiā tī門腳口。Hit ê人規ê面烏sô-sô，面頂閣有1蜞，伊kā刀比向白蔥á公主，講：「你…你…你chit ê…。」Hit ê人看--起-來足受氣，氣kah m̄知beh講啥，chit款場面，tú好是白馬王子上愛--ê，伊kā劍拔--出-來，khiā ùi頭前，kā公主cha̍h--leh，準備beh輸贏。Chit時，hit ê人ê刀soah lak tī土腳，koh雄雄哭--出-來。「拜託--eh，kám會使kā我救？」原來伊ê腳有1 ê孔嘴，拖siuⁿ久，已經發hông pū膿--ā。矮á猴in teh替hit ê殺手治療ê時陣，伊供出是王后出錢chhiàⁿ伊刣人，白馬王子聽kah蓋受氣，án-ne王后閣ke揹1條--ā！王子oa̍t頭beh安慰公主，佳哉伊無出代誌，結果人公主teh後壁，the̍h伊ê寶劍hâm殺手ê短刀tī hia khin-khin-khiang-khiang。矮á猴講：「你mài tī hia sńg刀劍，án-ne烏白舞，等--leh去tu̍h tio̍h人beh án怎？伊講ê代誌蓋重要，kah你有關係，你ài注意聽--lah！」公主oa̍t過頭「Hăⁿ？」看tio̍h所有ê人攏teh ka chheⁿ，伊才淡薄á歹勢歹勢，笑--1-ē準tú-soah。隔轉工透早，白馬王子hâm公主beh去報案，in規陣人行出樹林á，總算是看tio̍h城堡--ah。王子騎馬，hō͘白蔥á公主坐teh伊後壁，in先行，矮á猴兄弟腳較短，tòe teh後壁，會較òaⁿ到。入城了後，王子hâm白蔥á公主，直接去警察局報案，受理報案hit ê警察，tú好to̍h是進前講--過，手銬hông捎去sńg，閣去hō͘公主走無--去ê hit ê警察。照行政ê流程，ài先kā國王講--1-聲，國王接tio̍h報告，chhoah 1 tiô，m̄-koh伊尊重司法獨立，to̍h同意配合調查。 To̍h án-ne，國王、白馬王子，kah 1陣警察，規陣人面色嚴肅，行入去王宮內面ê餐廳。王后本底坐tī hia，準備beh食伊ê點心，soah雄雄去hông圍--khài，chit時，白蔥á公主ùi人陣後壁ta̍uh-ta̍uh-á行--出-來。王后看tio̍h公主彼時，心內to̍h知影，伊做ê歹代誌piak-khang--a。M̄-koh伊mā是tī社會行踏--ê，啥物大風大湧m̄-bat看--過？恁祖媽無teh驚--lah！王后看tio̍h白蔥á公主，án-ne 1步1步，慢慢á行到伊身軀邊，伊面á笑笑，哼--1-聲，Kā面頭前hit杯茶phâng--起-來，講：「Ai-iō͘，che kám m̄是咱ê寶貝á公主，chiâⁿ久無看neh，你是走tó位--去？」講soah，慢慢á lim 1嘴茶。白蔥á公主khiā tī伊身軀邊，1句話都無講，sòa--lòe，王后目睭尾眼tio̍h公主kā伊ê手giâ懸懸，伊趕緊用2肢手kā面am--leh，想講公主beh ka搧嘴phóe--à！M̄-koh sòa--lòe啥物代誌攏無發生，顛倒是伊hit甌茶摔tī土腳，茶甌摔1下碎糊糊。「Ĕ？公主m̄是beh搧我ê嘴phóe？」王后oa̍t頭ka看，soah看tio̍h公主the̍h伊tú-chiah beh食ê點心，ùi嘴--ni̍h塞，ná食閣ná笑，對伊講：「O͘h，久無食--ah，che點心kāng款hiah好食！」 Chit時ta̍k家看bē落--去-ah，警察khiā--出-來，kā手銬the̍h--出-來，講：「王后殿下，goán有證據，chit-má beh用詐騙hâm使唆刣人ê罪名逮捕--你，請你配合。」公主看--tio̍h to̍h講：「Che kám m̄是我進前hit副手銬？我叫是phàng見--ah，原來tī你hia--o͘h？」 Hit ê警察聽tio̍h白蔥á公主án-ne講，理智雄雄斷線，伊oa̍t頭kā手銬tu去公主面頭前，講：「Che手銬是我ê，m̄是你ê，mài烏白捎去sńg！」王后趁chit ê時陣，ùi伊手ńg內底，捎出1支扁鑽，準備beh反抗，警察看--tio̍h退1步大聲喝：「你…，你mài烏白來o͘h！」 Chit時白馬王子khiā--出-來，完全無teh ka信篤，伊tò手kā公主moa去後壁，笑笑á對伊講：「公主免驚，伊hit支hiah-nī短，che小可á代誌，交hō͘我處理to̍h好！」講soah oa̍t頭kā王后gîn，正手sóa ùi腰帶hit pêng，準備beh拔出伊ê寶劍，chit時才發見講，「我ê寶劍哪會無--去？」Khiā teh伊後壁ê公主，soah 2肢手插tī腰--eh，ka唸講：「你看，你重要ê物件ài收ho͘好ā，你to̍h是烏白擲，chit-má揣無--ā hōⁿ！」其實hit支寶劍是昨暝去hō͘公主捎去烏白sńg，chit時猶插teh矮á猴in兜ê便所門枋頂頭。王后大聲笑，扁鑽giâ--khài，雄雄to̍h ùi白馬王子ê腹肚tu̍h--落-去，王子bih bē赴，哀1聲：「Ah！」Ĕ？哪會無代誌？王后看伊手頭，「Ĕ？我ê扁鑽--leh？哪會變湯匙á？」原來hit支扁鑽m̄知啥物時陣，去hō͘公主the̍h隔壁桌ê湯匙á偷換--去-lah。公主kā扁鑽giâ懸懸，嘴--eh講：「Ŏa-à，chit支chiah-nī尖，看--起-來足厲害neh！」看tio̍h公主笑kah hiah古錐，ta̍k家iû閣攏hō͘伊迷--去，王后to̍h趁chit ê機會，soan--o͘h！想bē到才走kah餐廳門口，soah發見門去hông鎖--起-來。在場所有ê人oa̍t頭1看，公主閣teh tìⁿ-chhiⁿ，目睭金金看天篷，tī hia kho͘-si-á，看tio̍h ta̍k家攏teh ka gîn，閣展1 ê chiú-mi ê姿勢。王后1下tio̍h急，裙láng--起-來，直接ùi窗á門跳--出-去，國王驚1 tiô，喝講：「Eh eh eh，chia是1…1樓neh…。」王后ná走ná笑，想講：「Hngh-hngh，ah m̄ to̍h佳哉講我有減肥，chit-má chiah會使kah少年時仝款走若飛，若是講tio̍h走警察，無人比我較厲害--lah。雖罔城內人濟，路閣彎彎斡斡，只要出城門，無人jiok會tio̍h恁祖媽，城門to̍h teh眼前，衝--ah！」Chit時，伊soah看tio̍h城門前有人khiā做一排，kā門嘴cha̍h tiâu--eh，ah，hit 7 ê矮á冬瓜擋tī hia創啥！王后硬衝，嘴--ni̍h喝講：「恁chit寡矮á冬瓜，mài擋tio̍h恁祖媽ê路，閃--lah！」矮á猴大兄khiā tī中央，mā喝1聲：「你mài看阮無！」然後phóng 1聲足大聲，王后去撞tio̍h矮á猴大兄，撞1下伊家己soah倒彈飛--出-去，顛倒是矮á猴大兄，規欉好好khiā tī hia，人矮á猴7兄弟，是堂堂ê做工á人，漢草hiah好，kám hō͘你撞有法--eh？ Hit工，白蔥á公主傳2張相片去伊ê迷眾頁，第1張是伊teh chiú-mi ê相片，後壁閣ē-tàng看tio̍h王后去hō͘警察掠--起-來，公主tī頂頭寫講：「阮後母hō͘警察掠--去-ah，想bē到伊是歹人neh！」 Chit張相片不得了--ah，短短1點鐘，竟然有超過100萬ê讚，伊ê fans mā正式超過200萬人，比炸彈少女團閣較烘。第2張相片，是公主kah矮á猴7兄弟攬做夥，上邊--á是白馬王子，看--起-來是硬beh chiⁿ入去畫面內底ê形。白蔥á公主寫講：「Che是阮朋友，in今á日tàu掠歹人，是大英雄ŏ͘！」Chit張相片，soah kan-ta 5000 ê讚，顛倒去hō͘人chhi̍h 80萬ê受氣ê表情，伊ê fans攏teh下腳留話問講：「Hit ê緣投á桑是siáng？」「Kā hit ê查某gín-á放--開！」 Hit 1日，對ta̍k家來講，攏是值得記念ê日子，暗時國王辦1 ê phá-thih，慶祝in破案掠tio̍h歹人，順紲慶祝伊家己閣變做全國身價上懸ê羅漢腳á。平常時一直真pì-sù ê白馬王子，已經chiâⁿ久m̄-bat親像án-ne，hō͘ 1大群美女圍--起-來，ta̍k家tī hia相爭beh捻伊ê嘴phóe，講：「O͘h，你chiâⁿ緣投neh！」「Kám會使hâm人加1-ē-á Lái？」閣有1 ê阿媽硬chiⁿ--過-來，問伊講：「Ah你kám有查某朋友？我介紹阮查某囝hō͘你熟似好--無？A̍h是…你較kah意我chit款有歲--ê，mā是會使ŏ͘！」國王送hō͘矮á猴in 7兄弟1人1支上新ê Pa̍t-á牌手機á，in人生第1 kái接觸tio̍h網路ê世界，ŏa-à，眼界規ê開--開，ta̍k-ê攏點入去白蔥á公主ê迷眾頁，kā伊chhi̍h讚，注文，鬥相報，lin-liang-á sīn-sòa ka開--起-來。矮á猴大兄siōng重義氣，伊講：「白蔥á公主請咱食好料，咱chiah kā伊chhi̍h 1 ê讚，án-ne kám講會過？」「講bē過！」「好！咱1人ka chhi̍h 1萬ê讚，讚hō͘伊piāng--lah！」 In 1陣人bē顧得食，khû teh壁角hia一直chhi̍h讚一直chhi̍h讚，mā無想tio̍h講等in轉到厝，to̍h無網路通用--ā，到時陣che手機á to̍h會比1塊磚á閣較無路用。 Hit ê殺手，伊腳ê孔嘴pū膿，拖siuⁿ久，醫生看--tio̍h，頭hàiⁿ-hàiⁿ--leh kā伊邊--á ê助手講：「Phí-no̍͘h-khò͘，chit肢ka剁--起-來！」帶念伊跳出來做證人，法官判伊免掠去關，ǹg望伊以後好好á做人。為tio̍h生活，伊to̍h去出1本gín-á-kó͘，hō做「手chiān ê白蔥á公主」，chit本冊後--來chhèng kah掠bē tiâu，變成銷路上好ê冊，5冬後，伊已經是6 ê gín-á ê老爸，真正有好好á teh做人。 Hit暗ê phá-thih，一直到12點才soah鼓，白蔥á公主thiám kah liân身軀to無洗，直接to̍h倒teh眠床頂，想講：「Á--ah，我離開厝chiah-nī久，總算是 --轉來-ah，猶是家己ê眠床較好睏。」伊想tio̍h家己已經贏過炸彈少女團，chiâⁿ做全世界上hang ê網chhèng，閣得tio̍h真濟tō͘-né，通hō͘伊去高級餐廳食kah飽，真正是2 ê願望，1 kái總完成。想到chia，伊to̍h漸漸á睏--去，睏--去ê時，嘴閣微微á笑。 Phá-thih結束了後，下腳手人準備beh開始拚掃，雄雄soah chhoah 1 tiô，哪會有7 ê矮á冬瓜，閣khû teh壁角hia teh chhi̍h手機á，ná chhi̍h閣ná講：「Kā我chhi̍h讚！Kā我chhi̍h讚！Kā我chhi̍h讚！Kā我chhi̍h讚！」「Ài kā ta̍k家鬥相報！」「Ài會記eh lin-liang-á ka開--起-來-ŏ͘！」【Pe̍h-ōe-jī pán】 Keng-kòe pòaⁿ tiám-cheng, Pe̍h-bé-ông-chú chóng-sǹg sī kā Pe̍h-chhang-á kong-chú kái-soeh chheng-chhó͘ kóng, i choa̍t-tùi bô thau-chia̍h siáⁿ-mih phōng-kó, i lâi chia ê sî-chūn to̍h bô khòaⁿ tio̍h phōng-kó--ah. Sòa--lòe i koh khai 20 hun-cheng, kā É-á-kâu hiaⁿ-tī chiù-chōa, i choa̍t-tùi bô thàn kong-chú bē-tín-bē-tāng ê sî khì kha̍p tio̍h i pòaⁿ ki mo͘. Lo̍h-bóe, i chóng-sǹg sī ē-tàng iōng 3 hun-cheng ê siā-kan, kā i chit chōa chhut-mn̂g ê bo̍k-tek, kóng hō͘ ta̍k-ke thiaⁿ, koh the̍h chhiú-ki-á--chhut-lâi, kā ông-hiō ê thong-chi̍p hái-pò péng--chhut-lâi. Pe̍h-chhang-á kong-chú kóng: “Chit tiuⁿ góa khì chia̍h bah-oân ê sî-chūn ū khòaⁿ--kòe. Eh! Chin-chiàⁿ jú khòaⁿ jú sêng gún āu-bú neh!” Chit ê sî-chūn hiông-hiông phóng 1 siaⁿ, tōa-mn̂g hông lòng--khui, ū 1 ê kui seng-khu hiong-kài-kài, saⁿ téng-thâu koh ū chhiū-hio̍h-á ê lâng, gia̍h 1 ki chhioh-jī-á khiā tī mn̂g-kha-kháu. Hit ê lâng kui ê bīn o͘-sô-sô, bīn-téng koh ū 1 khî, i kā to pí hiòng Pe̍h-chhang-á kong-chú, kóng: “Lí…Lí…Lí chit ê….” Hit ê lâng khòaⁿ--khí-lâi chiok siū-khì, khì kah m̄-chai beh kóng siáⁿ, chit khoán tiûⁿ-bīn, tú-hó sī Pe̍h-bé-ông-chú siōng ài--ê, i kā kiàm poe̍h--chhut-lâi, khiā ùi thâu-chêng, kā kong-chú cha̍h--leh, chún-pī beh su-iâⁿ. Chit-sî, hit ê lâng ê to soah lak tī thô͘-kha, koh hiông-hiông khàu--chhut-lâi. “Pài-thok--eh, kám ē-sái kā góa kiù?” Goân-lâi i ê kha ū 1 ê khang-chhùi, thoa siuⁿ kú, í-keng hoat-hông pū-lâng--ā. É-á-kâu in teh thè hit ê sat-chhiú tī-liâu ê sî-chūn, i keng chhut sī ông-hiō chhut-chîⁿ chhiàⁿ i thâi-lâng, Pe̍h-bé-ông-chú thiaⁿ kah kài siū-khì, án-ne ông-hiō koh ke phāiⁿ 1 tiâu--ā! Ông-chú oa̍t-thâu beh an-ùi kong-chú, ka-chài i bô chhut tāi-chì, kiat-kó lâng kong-chú teh āu-piah, the̍h i ê pó-kiàm hâm sat-chhiú ê té-to tī hia khin-khin-khiang-khiang. É-á-kâu kóng: “Lí mài tī hia sńg to-kiàm, án-ne o͘-pe̍h bú, tán--leh khì tu̍h tio̍h lâng beh án-chóaⁿ? I kóng ê tāi-chì kài tiōng-iàu, kah lí ū koan-hē, lí ài chù-ì thiaⁿ--lah!” Kong-chú oa̍t kòe thâu “Hăⁿ?” Khòaⁿ tio̍h só͘-ū ê lâng lóng teh ka chheⁿ, i chiah tām-po̍h-á pháiⁿ-sè pháiⁿ-sè, chhiò--1-ē chún-tú-soah. Keh-tńg-kang thàu-chá, Pe̍h-bé-ông-chú hâm kong-chú beh khì pò-àn, in kui-tīn lâng kiâⁿ chhut chhiū-nâ-á, chóng-sǹg sī khòaⁿ tio̍h siâⁿ-pó--ah. Ông-chú khiâ-bé, hō͘ Pe̍h-chhang-á kong-chú chē teh i āu-piah, in seng kiâⁿ, É-á-kâu hiaⁿ-tī kha khah té, tòe teh āu-piah, ē khah òaⁿ kàu. Ji̍p-siâⁿ liáu-āu, ông-chú hâm Pe̍h-chhang-á kong-chú, ti̍t-chiap khì kéng-chhat-kio̍k pò-àn, siū-lí pò-àn hit ê kéng-chhat, tú-hó to̍h sī chìn-chêng kóng--kòe, chhiú-khàu hông sa khì sǹg, koh khì hō͘ kong-chú cháu-bô--khì ê hit ê kéng-chhat. Chiàu hêng-chèng ê liû-têng, ài seng kā kok-ông kóng--1-siaⁿ, kok-ông chiap-tio̍h pò-kò, chhoah 1 tiô, m̄-koh i chun-tiōng su-hoat to̍k-li̍p, to̍h tông-ì phòe-ha̍p tiau-cha. To̍h án-ne, kok-ông, Pe̍h-bé-ông-chú, kah 1 tīn kéng-chhat, kui-tīn lâng bīn-sek giâm-siok, kiâⁿ ji̍p-khì ông-kiong lāi-bīn ê chhan-thiaⁿ. Ông-hiō pún-té chē tī hia, chún-pī beh chia̍h i ê tiám-sim, soah hiông-hiông khì hông ûi--khài, chit-sî, Pe̍h-chhang-á kong-chú ùi lâng-tīn āu-piah ta̍uh-ta̍uh-á kiâⁿ--chhut-lâi. Ông-hiō khòaⁿ tio̍h kong-chú hit-sî, sim-lāi to̍h chai-iáⁿ, i chò ê pháiⁿ tāi-chì piah-khang--a. M̄-koh i mā sī tī siā-hōe kiâⁿ-ta̍h--ê, siáⁿ-mih tōa-hong tōa-éng m̄-bat khòaⁿ--kòe? Lín chó͘-má bô teh kiaⁿ--lah! Ông-hiō khòaⁿ tio̍h Pe̍h-chhang-á kong-chú, án-ne 1 pō͘ 1 pō͘, bān-bān-á kiâⁿ kàu i seng-khu-piⁿ, i bīn-á chhiò-chhiò, hng--1-siaⁿ, kā bīn-thâu-chêng hit poe tê phâng--khí-lâi, kóng: “Ai-iō͘, che kám m̄-sī lán ê pó-pòe-á kong-chú, chiâⁿ kú bô khoàiⁿ neh, lí sī cháu tó-ūi--khì?” Kóng soah, bān-bān-á lim 1 chhùi tê. Pe̍h-chhang-á kong-chú khiā tī i seng-khu-piⁿ, 1 kù ōe to bô kóng, sòa--lòe, ông-hiō ba̍k-chiu-bóe gán tio̍h kong-chú kā i ê chhiú giâ koân-koân, i kóaⁿ-kín iōng 2 ki chhiú kā bīn am--leh, siūⁿ-kóng kong-chú beh ka siàn chhùi-phóe--à! M̄-koh sòa--lòe siáⁿ-mih tāi-chì lóng bô hoat-seng, tian-tò sī i hit au tê siak tī thô͘-kha, tê-au siak 1 ē chhùi-kô͘-kô͘. “Ĕ? Kong-chú m̄-sī beh siàn góa ê chhùi-phóe?” Ông-hiō oa̍t-thâu ka khòaⁿ, soah khòaⁿ tio̍h kong-chú the̍h i tú-chiah beh chia̍h ê tiám-sim, ùi chhùi--ni̍h that, ná chia̍h koh ná chhiò, tùi i kóng: “O͘h, kú bô chia̍h--ah, che tiám-sim kāng-khoán hiah hó-chia̍h!” Chit-sî ta̍k-ke khòaⁿ bē lo̍h-

【白蔥仔公主】EP06預告 Pe̍h-chhang-á Kong-chú

2024-07-2300:31

講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日先hâm ta̍k-ke相借問--1-ē，這拜四請準時收聽【白蔥á公主】EP03，真ló͘-la̍t。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】害害害！白馬王子出代誌--ah，伊kám chhiâu ē好勢？公主又閣會按怎對付歹心ê王后--leh？Chit禮拜四暗時8點，tī咱做工á人節目平台，請ta̍k-ke準時收聽，白蔥á公主精彩大結局！【Pe̍h-ōe-jī pán】 Hāi hāi hāi! Pe̍h-bé-ông-chú chhut tāi-chì--ah, i kám chhiâu ē hó-sè? Kong-chú iū-koh ē án-chóaⁿ tùi-hù pháiⁿ-sim ê ông-hiō--leh? Chit lé-pài 4 àm-sî 8 tiám, tī lán Chò-kang-á-lâng chiat-bo̍k pêⁿ-tâi, chhiáⁿ ta̍k-ke chún-sî siu-thia, Pe̍h-chhang-á kong-chú cheng-chhái tōa kiat-kio̍k! -- Hosting provided by SoundOn

【白蔥仔公主】EP05 Pe̍h-chhang-á Kong-chú

2024-07-1818:12

講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】入城了後，紅帽á少女ná行ná紹介chit ê國家，伊有去講tio̍h chit ê國家ê國王，伊ê第2 ê後生，號做白馬王子。Chit ê王子伊足gâu舞劍，劍術chiâⁿ厲害，只要伊手頭有劍，to̍h無人有伊法，而且伊尪á頭koh生了chiâⁿ súi，自細漢，大人若看tio̍h伊，定定忍bē牢，捻伊ê嘴phóe，講伊足緣投。Tī王宮內，定定有啥物阿姨--ā，姑婆--ā，甚至是官員ê某，ta̍k家攏相爭beh捻伊ê嘴phóe，hō͘伊感覺足siān。總--是，mā bē-tàng劍拔--出-來to̍h凊彩kâng phut。有時伊穿便服出巡，行tī街á頭，mā 1工到暗去tú tio̍h m̄-bat ê阿桑，ó͘，一直beh紹介in查某孫hō͘伊熟似neh。To̍h因為án-ne，chit ê緣投ê王子，愈來愈無ài kah人鬥陣，過生日ê時，伊to̍h騎伊hit隻白馬，出去趖規工，騎kah馬強beh thèⁿ腿。若是過年，伊無想beh kah人請安交陪，to̍h推講下腳手人歇睏，無人通替伊洗馬，伊會家己走去kā馬á洗身軀，透早洗kah透暗，直直洗，一直洗，洗到hit隻馬phah kha-chhiùⁿ兼liù皮，看tio̍h水to̍h驚，過3工閣m̄敢lim水。Mā因為伊無愛kah人鬥陣，規工m̄是teh舞劍，to̍h是teh舞伊ê馬，m̄-chiah會hông叫做白馬王子。紅帽á少女講tio̍h緣投á桑to̍h興chhih-chhih，se̍h-se̍h-liām，講bē soah，白蔥á公主是tī邊--á嘴nōa chha̍p-chha̍p-tin，m̄是teh siàu想hit ê緣投ê王子，伊kan-na注神teh鼻好食物ê芳味。紅帽á少女紹介伊chit ê城市上有代表性ê好食物----肉圓。「Hit pêng hit 2擔，1擔leh賣炊ê肉圓，1擔leh賣chìⁿ ê肉圓，2擔攏蓋好食，你beh揀tó 1擔？」「Gín-á人m̄-chiah tio̍h揀，我行情敢hiah bái？我2款攏beh！」白蔥á公主嘴--ni̍h that 1粒肉圓，tng leh哺ê時，看tio̍h邊--á壁頂，貼1張海報，ĕ？Chit ê查某人哪會看--起-來面熟面熟？紅帽á少女講：「Hit ê是hông通緝ê歹人，若是掠tio̍h人，警察賞金20萬--ō͘！」白蔥á公主詳細ka看，「Ĕ？Chit ê人to̍h是gún後母--ā！」紅帽á少女chhoah 1 tiô，看hit張海報講：「真--ê a̍h假--ê？Án-ne咱緊來去報警察！」Oa̍t頭soah發見，aih-iò͘，伊哪會是teh hâm 1 ê生份人講話？Hit ê人khiā teh伊身軀邊，嘴koh teh哺檳榔。Ah公主--leh？哪會走無--去？原來咱白蔥á公主，2種肉圓sut了了，liam-mi to̍h趖去chhōe別項物件食--ah，根本to̍h閣kā伊放bē記。因為幾偌工無se̍h街--ah，白蔥á公主一直se̍h，一直買，一直食，食kah真歡喜，伊閣想講：「M̄-m̀，gún矮á猴哥哥hoⁿh，一定m̄-bat lim過真珠奶茶，我若是買轉去hō͘ in lim，in一定會足歡喜。」伊to̍h去買奶茶，算好好1人1杯，kōaⁿ kah重khoâiⁿ-khoâiⁿ。伊閣想講：「規氣今á日暗頓食較chheⁿ-chhau--leh，雖罔我bē曉煮食，m̄-koh火鍋應該hâm泡麵差不多，煮ho͘熟to̍h好。」伊to̍h開始買材料，愈買愈濟款，後--來真正kōaⁿ bē去，規氣--à kā hit寡奶茶，攏總灌了了。到天beh暗ê時，伊chiah家己chhōe tio̍h路通轉去別莊。Chit táu買tio̍h chiâⁿ濟高級ê食材，龍蝦、海膽、刺五加，攏總ka下下--入-去，無teh計較成本，閣kā 8粒市內上有名ê肉圓，khǹg-khǹg--入-去。咱chit ê公主hoⁿh，足搭心，伊閣會記eh ta̍k ê人愛食ê物件o͘h，蒜頭，芋á，芫荽，mā攏總kā伊參--入-去，sòa--lòe閣gia̍h 1支大支湯匙tī hia烏白lā，lā kah 1鼎火鍋，變kah有夠thái-ko，閣有1 ê hiàn走--出-來，佳哉使用--ê攏是上chhiⁿ--ê高級料，he矮á猴7兄弟hoⁿh，一世人to̍h m̄-bat食過chiah-nī-á特別ê料理，食kah是真歡喜。顛倒是白蔥á公主，hit頓無hâm in做夥食，伊講伊下晡食siuⁿ飽，家己坐tī邊--á teh gè俗pháng。咱閣轉來講王宮chit pêng，白蔥á公主出去辦代誌，辦kah無khoàiⁿ影，王后感覺真滿意，尤其是hit ê殺手，攏無來chhōe家己討賬尾，想--tio̍h伊to̍h笑微微。想bē到chiah過無幾工，竟然koh看tio̍h公主ê消息，伊ê迷眾頁閣有新ê相片，伊竟然teh渡假！Ĕ？Chit間別莊看--起-來哪會chiah面熟？王后認出hit張相片內底ê別莊，to̍h是進前有人檢舉，講是teh樹林á內底，有人侵佔國有地，tī hia起ê別莊。Chit聲害--ā，伊chhōe人去刣公主，公主若無死，代誌piak-khang是beh án怎？伊趕緊kā進前人檢舉備案ê hit份報告péng--出-來，chhōe tio̍h hit間別莊ê位，想講：「Chhōe外包--ê實在bē信用--得，代誌若beh做ho͘好勢，猶是tio̍h ài家己來！」王后先去倉庫，家己貯1籃á蘋果，閣特別揀1粒較大粒較水--ê，the̍h轉去房間，kā毒藥抹tī hit粒蘋果頂頭，khǹg teh邊--á lāng風，sòa--lòe家己chng kah親像1 ê老大人，驚án-ne閣去hō͘白蔥á公主認--出-來，伊閣專工tī鼻頭點1粒痣，目睭尾閣畫1 tah斑。王后chhiau出伊衫á櫥內底上舊--ê hit su烏色ê洋裝，ka擲teh土腳，踏踏--leh，伊本底是想beh hō͘ hit su洋裝看--起-來較lah-sap，踏kah腳有淡薄á酸，才想tio̍h講，ah！烏色本底to̍h較看bē出hiong--ā。王后準備好勢，to̍h kā hit籃蘋果kōaⁿ--leh，ùi城堡ê後門出--去。白蔥á公主睏到中晝，起床teh等紅帽á少女，chit時，khok khok khok！有人teh撞門。「有人tī--leh-無？」「來--ā！咱tó位beh chhōe？」門phah開，是1 ê穿烏衫ê阿婆，笑微微徛tī hia。「Hĕ？看你規身軀穿kah烏mà-mà，蓋成阮後母neh。」聽tio̍h公主án-ne講，hit ê阿婆緊張kah，應講：「你…，你mài烏白講，我哪有親像伊hiah水！」阿婆趕緊比家己ê鼻á講：「你看，伊kám有chit粒痣？」擱比目睭尾，「你看，伊kám有chit tah斑？」白蔥á公主想想--leh，án-ne講mā有影，to̍h問hit ê阿婆：「Ah你哪會無代無誌走來chia，chia是無網路信號--ê ŏ͘。」阿婆kā籃á蓋掀--開，1籃蘋果紅kì-kì閣芳貢貢，伊kā hit粒有毒ê蘋果the̍h--出-來，tu去公主面頭前，講：「我來賣蘋果--ê-lah，來，chit粒請你食。」公主看tio̍h面頭前chit粒chiah-nī-á大粒ê蘋果，愛睏神攏走無--去，目睭thí kah大大蕊，講：「Ŏa-à，看--起-來足好食款！」伊伸手beh去接hit粒蘋果，阿婆歡喜kah嘴角翹翹，想bē到chit ê時陣，白蔥á公主soah講：「M̄-koh chit粒看--起-來siuⁿ過分，我ài較脆--ê。」話猶未講soah，伊to̍h直接伸手ùi籃á內底捎另外1粒khiaih食。阿婆猶未放棄，講：「Chit粒mā真芳，你食看māi！」白蔥á公主無ka應，閣家己揀另外1粒khiaih食，無teh kah伊客氣。「我拜託--你，chit粒先食看māi--lah！」阿婆一直kā伊手tēⁿ--leh hit粒蘋果，tu去白蔥á公主面頭前，公主應講：「你是m̄甘hō͘我食o͘h？」伊1手捎1粒蘋果ùi嘴--ni̍h塞，soah去kê--tio̍h。阿婆去ho͘驚1 tiô，規ê籃á lak teh土腳。「Ah！Beh án怎beh án怎，hit ê há-muh li̍p去啥--ê beh án怎創….ĕ？我chhap-chhap伊去死！」白蔥á公主倒teh土腳，chhoah--1-ē，chhoah--1-ē，to̍h無閣再振動--ah。阿婆伸指頭á ka thuh 2下，「Eh！喂！」看公主死giān-giān攏無反應，歡喜kah笑hai-hai，人to̍h隨走--去。矮á猴兄弟轉到厝，看tio̍h公主倒teh土腳，bē振bē動，看--起-來蓋成死--去-ah，in足m̄甘，哭kah足大聲。「白蔥á公主無--去-ah，以後咱食bē tio̍h chheⁿ-chhau--ê-a。」「我beh食火鍋--lah…。」 In哭1分鐘了後，to̍h開始討論beh án-nóa處理公主ê代誌。「橫直咱上gâu--ê tio̍h是挖孔--ā，咱挖1 ê窟á kā伊tâi--起-來。」「Bē-sái！公主請咱食好料--neh，chiah-nī-á偉大ê人，哪會使凊彩ka埋？」最後in決定beh做1 ê玻璃罩，kā白蔥á公主裝teh內底，chhāi tī客廳通ta̍k工ka拜。閣講轉來2工進前，因為有報馬á提供情報，白馬王子to̍h受命去追查通緝犯。雖罔伊m̄是警察，但是伊ē-tàng利用外交身分去進行調查，伊騎馬入去樹林á內底，想bē到chhōa路機ka烏白亂報，行到手機á攏無信號，伊soah chhōe無路。這時拄好看tio̍h矮á猴ê別莊，伊去撞門想beh問路，撞規晡久攏無人應。白馬王子ùi窗á門ka看--入-去，看tio̍h 1 ê玻璃罩，內底閣倒1 ê水姑娘á。王子m̄知發生啥物代誌，伊to̍h ùi窗á門跳--入-去。看tio̍h桌頂khǹg 1塊俗pháng，伊腹肚iau，想講無人khoàiⁿ，to̍h kā俗pháng捎起來食。白馬王子ná食ná行到白蔥á公主邊--á，心內想講m̄知伊是做啥物歹代誌，哪會hō͘人chhāi tī chia。 Chit時拄好矮á猴兄弟轉到厝，in kāng款bih tī外口看，細細聲á討論講：「哪會又閣有生份人來tī咱兜？」「閣hâm公主kāng款，凊彩the̍h咱ê物件食！」「Lín看外口hit隻白馬，kám講伊是….」「白賊！」「To̍h kā你講白賊m̄是chit ê意思--lah！」「等--leh等--leh，lín ka看！」 In看tio̍h hit ê生份人愈倚愈近，伸手kā白蔥á公主ê玻璃罩掀--開，矮á猴兄弟看kah有淡薄á緊張，m̄知伊是想beh創啥？白馬王子感覺chit ê查某gín-á ká-ná閣teh喘氣，伊倚去查某gín-á ê面hia，想beh確認--1-ē。Chit ê時陣，hit ê查某gín-á雄雄目睭peh金，1嘴蘋果to̍h án-ne吐teh伊ê面！「食siuⁿ緊，血糖雄雄chhèng懸，soah睏--去-ah。M̆？你是siáng？你kám是beh來kā我搶蘋果--ê？蘋果--leh？我hit籃蘋果--leh？」 Chit ê時陣，矮á猴兄弟chông--入-來，1陣人kā白馬王子圍--起-來，王子想講，chit ê場面伊bat聽--過，che是仙人跳，che一定是仙人跳！【Pe̍h-ōe-jī pán】 Ji̍p-siâⁿ liáu-āu, Âng-bō-á siàu-lú ná kiâⁿ ná siāu-kài chit ê kok-ka, i ū khì kóng tio̍h chit ê kok-ka ê kok-ông, i ê tē 2 ê hāu-seⁿ, hō-chò Pe̍h-bé-ông-chú, chit ê ông-chú i chiok gâu bú-kiàm, kiàm-su̍t chiâⁿ lī-hāi, chí-iàu i chhiú-thâu ū kiàm, to̍h bô lâng ū i hoat, jî-chhiáⁿ i ang-á-thâu koh seⁿ liáu chiâⁿ súi, chū sè-hàn, tōa-lâng nā khòaⁿ tio̍h i, tiāⁿ-tiāⁿ jím-bē-tiâu, liàm i ê chhùi-phóe, kóng i chiok iân-tâu. Tī ông-kiong lāi, tiāⁿ-tiāⁿ ū siáⁿ-mih a-î--ā, ko͘-pô--ā, sīm-chì sī koaⁿ-oân ê bó͘, ta̍k-ke lóng sio-cheⁿ beh liàm i ê chhùi-phóe, hō͘ i kám-kak chiok siān. Chóng--sī, mā bē-tàng kiàm poe̍h--chhut-lâi to̍h chhìn-chhái kâng phut. Ū sî i chhēng piān-ho̍k chhut-sûn, kiâⁿ tī ke-á-thâu, mā 1 kang kàu àm khì tú tio̍h m̄-bat ê a-sáng, ó͘, it-ti̍t beh siāu-kài in cha-bó͘-sun hō͘ i se̍k-sāi neh. To̍h in-ūi án-ne, chit ê iân-tâu ê ông-chú, jú lâi jú bô ài kah lâng tàu-tīn, kòe seⁿ-ji̍t ê sî, i to̍h khiâ i hit chiah pe̍h-bé, chhut-khì sô kui-kang, khiâ kah bé kiōng-beh thèⁿ-thúi. Nā sī kòe-nî, i bô siūⁿ beh kah lâng chhéng-an kau-pôe, to̍h the kóng ē-kha-chhiú-lâng hioh-khùn, bô lâng thang thè i sé bé, i ē ka-tī cháu-khì kā bé-á sé seng-khu, thàu-chá sé kah thàu-àm, ti̍t-ti̍t sé, it-ti̍t sé, sé kàu hit chiah bé phah kha-chhiùⁿ kiam liù-phôe, khòaⁿ tio̍h chúi to̍h kiaⁿ, kòe 3 kang koh m̄-káⁿ lim chúi. Mā in-ūi i bô ài kah lâng tàu-tīn, kui-kang m̄-sī teh bú-kiàm, to̍h sī teh bú i ê bé, m̄-chiah ē hông kiò chò Pe̍h-bé-ông-chú. Âng-bō-á siàu-lú kóng tio̍h iân-tâu-á-sàng to̍h hèng-chhih-chhih, se̍h-se̍h-liām, kóng bē soah, Pe̍h-chhang-á kong-chú sī tī piⁿ--á chhùi-nōa chha̍p-chha̍p-tin, m̄-sī teh siàu-siūⁿ hit ê iân-tâu ê ông-chú, i kan-na chù-sîn teh phīⁿ hó chia̍h-mi̍h ê phang-bī. Âng-bō-á siàu-lú siāu-kài i chit ê siâⁿ-chhī siōng ū tāi-piáu sèng ê hó chia̍h-mi̍h “Bah-oân”. “Hit pêng hit 2 tàⁿ, 1 tàⁿ leh bē chhoe ê bah-oân, 1 tàⁿ leh bē chìⁿ ê bah-oân, 2 tàⁿ lóng kài hó-chia̍h, lí beh kéng tó 1 tàⁿ?” “Gín-á lâng m̄-chiah tio̍h kéng, góa hâng-chêng kám hiah bái? Góa 2 khoán lóng beh!” Pe̍h-chhang-á kong-chú chhùi--ni̍h that 1 lia̍p bah-oân, tng leh pō͘ ê sî, khòaⁿ tio̍h piⁿ--á piah-téng, tah 1 tiuⁿ hái-pò, ĕ? Chit ê cha-bó͘-lâng nah ē khòaⁿ--khí-lâi bīn-se̍k bīn-se̍k? Âng-bō-á siàu-lú kóng: “Hit ê sī hông thong-chi̍p ê pháiⁿ-lâng, nā sī lia̍h tio̍h lâng, kéng-chhat siúⁿ-kim 20 bān--ō͘!” Pe̍h-chhang-á kong-chú siông-sè ka khòaⁿ, “Ĕ? Chit ê lâng to̍h sī gún āu-bú--ā!” Âng-bō-á siàu-lú chhoah 1 tiô, khòaⁿ hit tiuⁿ hái-pò kóng: “Chin--ê a̍h ké--ê? Án-ne lán kín lâi-khì pò kéng-chhat!” Oa̍t-thâu soah hoat-kiàn, ai-ioh, i nah ē sī teh hâm 1 ê chheⁿ-hūn-lâng kóng-ōe? Hit ê lâng khiā teh i seng-khu piⁿ, chhùi koh teh pō͘ pin-nn̂g. Ah kong-chú--leh? Nah ē cháu bô--khì? Goân-lâi lán Pe̍h-chhang-á kong-chú, 2 chióng bah-oân sut liáu-liáu, liam-mi to̍h sô khì chhōe pa̍t-hāng mi̍h-kiāⁿ chia̍h--ah, kin-pún to̍h koh kā i pàng bē-kì. In-ūi kúi-nā-kang bô se̍h-ke--ah, Pe̍h-chhang-á kong-chú it-ti̍t se̍h, it-ti̍t bé, it-ti̍t chia̍h, chia̍h kah chin hoaⁿ-hí, i koh siūⁿ kóng: “M̄-m̀, gún É-á-kâu ko-ko hoⁿh, it-tēng m̄-bat lim kòe chin-chu-leng-tê, góa nā sī bé tńg-khì hō͘ in lim, in it-tēng ē chiok hoaⁿ-hí.” I to̍h khì bé leng-tê, sǹg hó-hó 1 lâng 1 poe, kōaⁿ kah tāng-khoâiⁿ-khoâiⁿ. I koh siūⁿ kóng: “Kui-khì kin-á-ji̍t àm-tǹg chia̍h khah chheⁿ-chhau--leh, sui-bóng góa bē-hiáu chú-chia̍h, m̄-koh hóe-ko èng-kai hâm phàu-mī chha-put-to, chú ho͘ se̍k to̍h hó.” I to̍h khai-sí bé châi-liāu, jú bé jú chē khoán, āu--lâi chin-chiàⁿ kōaⁿ bē khì, kui-khì--à kā hit kóa leng-tê, lóng-chóng koàn liáu-liáu. Kàu thiⁿ beh àm ê sî, i chiah ka-tī chhōe tio̍h lō͘ thang tńg-khì pia̍t-chong. Chit táu bé tio̍h chiâⁿ chē ko-kip ê si̍t-châi, liông-hê, hái-táⁿ, chhì-ngó͘-ka, lóng-chóng ka hē-hē--ji̍p-khì, bô teh kè-kàu sêng-pún, koh kā 8 lia̍p chhī-lāi siōng ū miâ ê bah-oân, khǹg-khńg--ji̍p-khì. Lán chit ê kong-chú hoⁿh, chiok tah-sim, i koh ē kì eh ta̍k ê lâng ài chia̍h ê mi̍h-kiāⁿ o͘h, soàn-thâu, ō͘-á, iân-sui, mā lóng-chóng kā i chham--ji̍p-khì, sòa--lòe koh gia̍h 1 ki tōa-ki thng-sî tī hia o͘-pe̍h lā, lā kah 1 tiáⁿ hóe-ko, piàn kah ū kàu thái-ko, koh ū 1 ê hiàn cháu--chhut-lâi, ka-chài sú-iōng--ê lóng sī siōng chhiⁿ--ê ko-kip liāu, he É-á-kâu 7 hiaⁿ-tī hoⁿh, chi̍t-sì-lâng to̍h m̄-bat chia̍h kòe chiah-nī-á te̍k-pia̍t ê liāu-lí, chia̍h kah sī chin hoaⁿ-hí. Tian-tò sī Pe̍h-chhang-á kong-chú, hit tǹg bô hâm in chò-hóe chia̍h, i kóng i e

【白蔥仔公主】EP05預告 Pe̍h-chhang-á Kong-chú

2024-07-1600:41

講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日先hâm ta̍k-ke相借問--1-ē，這拜四請準時收聽【白蔥á公主】EP03，真ló͘-la̍t。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】白蔥á公主人生頭1擺煮火鍋，to̍h準備kah有夠phang-phài，看伊chit-lō khut勢，凡勢以後會當開火鍋店neh！緊來o͘h！Chit禮拜四暗時8點，tī咱做工á人節目平台，白蔥á公主請恁食火鍋！【Pe̍h-ōe-jī pán】 Pe̍h-chhang-á kong-chú jîn-seng thâu 1 pái chú hóe-ko, to̍h chún-pī kah ū kàu phang-phài, khòaⁿ i chit-lō khut-sè, hoān-sè í-āu ē-tàng khui hóe-ko-tiàm neh! Kín lâi o͘h! Chit lé-pài 4 àm-sî 8 tiám, tī lán Chò-kang-á-lâng chiat-bo̍k pêⁿ-tâi, Pe̍h-chhang-á kong-chú chhiáⁿ lín chia̍h hóe-ko! -- Hosting provided by SoundOn

【白蔥仔公主】EP04 Pe̍h-chhang-á Kong-chú

2024-07-1114:39

講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】矮á冬瓜招白蔥á公主坐loăi講，問看到底是發生啥物代誌。白蔥á公主講：「我是chit ê國家ê公主，mā是1 ê網chhèng。Ê早á出門ê時陣，goán父王ká-ná有吩咐我啥物代誌，m̄-koh我腹肚iau--起-來，soah ka放bē記。」彼7 ê矮á冬瓜，細細聲á討論講：「Liam-mi是公主，liam-mi閣是國王，伊kám會是teh kā咱騙？」「凡勢是頭殼歹--去！」「Bē-tàng án-ne講，每1 ê查某gín-á，攏是公主--ā！」 Sòa--lòe，in mā開始紹介家己，原來，in 7 ê人是親兄弟，厝內較歹過日，所以in ê身材自細漢to̍h比人較矮，驚hō͘人欺負，to̍h攏行做夥，人濟，身軀邊to̍h無人敢kā in欺負。In兄弟á chhèng-kōa-kōa行tī街á路，7 ê人行做1排，規條街á攏去hō͘ in that tiâu--leh，影響tio̍h別人做生理，人受氣soah m̄敢講，teh kha-chiah-āu to̍h罵in猴死gín-á，久--來，in to̍h hông叫做矮á猴7兄弟，因為in 7兄弟一直攏行做夥，人mā直接叫in矮á猴，無閣分tó 1 ê。白蔥á公主問講：「Ah恁是án怎會tòa leh chit ê所在？」原來，In是1 ê做工á人團隊，上gâu to̍h是挖孔hông跳，佳哉跳入去孔內底--ê，通常m̄是人。譬喻講，若有人beh掠活ê山豬á，to̍h ē chhōe in去tàu挖孔。1冬前，有人chhōe in去bāu 1 ê工程，teh替市政府挖捷運地下道。In想講ta̍k工去做工課，若是走siuⁿ遠會chiok thiám--ê，to̍h家己teh樹林á內底chhìn-chhái揀1 ê所在，起厝家己tòa，後--來，因為in下班了後siuⁿ無聊，to̍h一直舞，舞kah hit間厝soah愈來愈大間，1年後to̍h變做1間100坪ê別莊，koh有kah游泳池--leh。講tio̍h teh樹林á內底起厝chit層代誌，本底是白蔥á公主chit chōa beh調查--ê，m̄-koh伊bē記--eh準tú煞。In講好勢，隔轉工透早，to̍h會送白蔥á公主出樹林á，hō͘伊ē-tàng家己 --轉-去。彼暗，白蔥á公主睏tī客廳膨椅，啾啾啾，天光--a，矮á猴兄弟準備beh叫伊起床，想bē到公主出腳，1腳1 ê，2 ê矮á猴兄弟soah去ho͘ that 1-ē黏teh壁頂，公主ná睏ná講：「閣hō͘我睏5分鐘--lah！」Chhun--ê hit 5 ê兄弟á，趕緊離伊ê腳較遠--淡-薄-á，大兄用手指頭á輕輕á thuh公主ê手講：「Eh！緊起床o͘h，你m̄是beh轉--去？」Chit時白蔥á公主手ia̍t--1-ē，直接kā矮á猴大兄搧kah ùi窗á門飛--出-去，lak teh樹á叢內底，白蔥á公主閣tī hia嚷，喝講：「我破病--ah，我發燒--ah，我無ài去讀冊--lah！」 Chhun--ê彼4 ê兄弟á，看tio̍h chit-lō範勢，m̄敢koh ka叫，in先kā黏teh壁頂hit 2 ê兄弟pak--落-來，koh去樹á叢內底kā大兄khiú--出-來，to̍h直接去做工課--ah。白蔥á公主to̍h án-ne睏kah中晝，腹肚iau--ah chiah peh--起-來，伊lak袋á khêng-khêng--eh，khêng tio̍h 50 kho͘，想講附近m̄知有利便商店--無，想beh買飯丸來食。Chit時樹林á出現1 ê查某gín-á，身軀頂moa 1領紅--ê，帶帽á ê moa-á，手kōaⁿ 1 kha籃á，行ùi chia來。伊看tio̍h公主，真好禮ka相借問：「你好，食飽bē？」話tú講soah，聽tio̍h白蔥á公主ê腹肚，kū 1聲足大聲。因為chit ê少女不管時，攏kā in阿媽thīⁿ hō͘伊ê hit領紅moa-á moa牢牢，人to̍h ka hō做紅帽á少女。伊問講：「矮á猴阿兄kám無tī--leh？今á日kám m̄是in ê歇睏日？」知影in無tī厝--ni̍h，紅帽á少女ùi伊ê籃á，the̍h出1把原子筆，問白蔥á公主：「你kám會使kā我買幾支á愛心筆，做1-ē-á愛心，1支100 kho͘。」Che筆，tio̍h是公主cha-mê看--tio̍h-ê he，1桶貯kah tĭⁿ-tīⁿ，足歹寫ê愛心筆。Chit款àu-nōa筆，1支賣到100 kho͘，in買規桶是beh創啥？白蔥á公主應講：「你che筆chiah-nī歹寫，mài講1支，半支我mā無愛kā你買！」紅帽á少女kā筆khǹg入去籃á內，koh ùi內底摸出1罐果子醬，講：「你nā是1 pái kā我買5支，我koh送你1罐天然ê果子醬。」看tio̍h果子醬，公主隨kā伊ê 50 kho͘ jîm--出-來，問講：「買半支kám會使送我1罐？」「無…無人án-ne teh做生理--ê-lah！」「Eh！你是m̄通án-ne講neh，做生理我內行--ê ŏ͘！」白蔥á公主想tio̍h伊chiah tú上過王后ê經濟課，趁tio̍h 50 kho͘ hâm規籃á ê蘋果，伊差不多ē-tàng出師--ah，ài展出來hông看。白蔥á公主講：「你che筆1支chiah賣1百kho͘，利純siuⁿ薄，koh khǹg kah規籃á攏是，看--khài to̍h足粗俗。」講soah，公主to̍h kā裙腳láng懸，ùi伊ê長襪á內面，the̍h出3枝白色ê鉛筆，鉛筆頂頭koh有1粒白蔥á公主ê蔥á頭，細細粒á，刻了真水，色水mā真好看，工有夠幼路，鉛筆頂面koh有印伊迷眾頁ê網鏈，péng過另外1面，頂頭寫「白蔥á公主正版授權商品」。公主講：「Che是我做來賣--ê周邊商品，是限量版--ê，市面上已經絕版--ah，你kă the̍h去賣，替我趁寡所費，我chiah hō͘你khong-mí-sióng！」紅帽á少女賣愛心筆已經3冬--ah，定定去hông嫌，去hông趕，今á日頭1回，無去hông趕，顛倒beh割貨hō͘伊賣。閣聽講che筆，1枝通賣800 kho͘，驚死人，800 kho͘ neh！白蔥á公主koh ka講：「你若賣了，順紲kā我買1寡好食--ê，只要kōaⁿ有法--lih，你盡量買。Eh eh，等--leh等--leh，你果子醬to̍h免收--轉-去-ah，留teh chia，我替你處理。」紅帽á少女the̍h 3枝鉛筆，趕轉去市場，chhōe 1 ê人濟ê所在，kā鉛筆giâ懸懸，大聲喝：「白蔥á公主，限量版蔥á頭鉛筆，beh買--ê緊來o͘h！白蔥á公主，限量版蔥á頭鉛筆，beh買--ê緊來o͘h！」雖罔tī in chit ê國家，無hiah濟人熟似白蔥á公主chit ê網chhèng，m̄-koh聽到限量版，一大陣人走來相爭beh買，sòa--lòe soah變做teh喝價，1600，1800，一直喝到1枝8800才成交，紅帽á少女m̄-bat看過chiah濟錢，算錢算kah kiōng-beh戇面，後--來伊koh會記chit去買1寡好食ê點心，芋粿、甜粿、菜頭粿，捎捎做一夥，閣走轉去chhōe白蔥á公主。公主收tio̍h錢hâm點心，mā真大方，the̍h 1000 kho͘ hō͘紅帽á少女，講：「你代誌辦了bē-bái，來，che 1千kho͘ hō͘你做khong-mí-sióng，以後你to̍h改做外送，ta̍k工替我去買好料--ê。」白蔥á公主將hit寡芋粿、甜粿、菜頭粿，hâm一大堆伊家己mā m̄-bat食過--ê外國物á，khǹg kah規桌頂，想講等--leh矮á猴in轉--來ē-tàng鬥陣食。過無外久，in兄弟á kōaⁿ 2袋俗pháng轉到厝，入門to̍h看tio̍h濟濟in m̄-bat看--過ê食物，排kah半塊桌á，芳貢貢，貢貢芳。公主講che是beh請in食--ê，in攏歡喜kah，m̄-koh in m̄知影，he是已經hō͘公主sut 1半--去-ah。To̍h án-ne，in用俗pháng配甜粿，暗頓食kah飽飽飽。原來，矮á猴in細漢時厝--ni̍h散，爸母騙in講食物to̍h是俗pháng，tú tio̍h生日a̍h是過年ê時，才有果子醬通配，in m̄-bat食過別項物á，極加to̍h是tú-tio̍h人揀食，tu 1寡無ài食ê蒜頭、芫荽hō͘ in食。一直到chit-má，白蔥á公主請in食好料，in才知影原來食飯m̄-nā是食飽，閣ē-tàng食tio̍h幸福ê滋味！In拜託公主kám會使ta̍k工替in chhoân食--ê，公主想講，雖罔chia無網路，猶m̄-koh ē-tàng睏kah中晝無人吵，koh ē-tàng食tio̍h chiah濟外國物á，tòa--幾-工-á mā bŏa緊，to̍h答應--ah。想bē到48點鐘了後，伊to̍h擋bē牢，無網路ê生活伊實在活bē落--去！白蔥á公主to̍h拜託紅帽á少女，chhōa伊去隔壁國se̍h街。沿路伊一直看手機á，chi̍t-ē看tio̍h有網路信號，伊to̍h趕緊傳1張teh別莊翕--ê相片，kā伊ê fans報告講伊人chit-má teh渡假。【Pe̍h-ōe-jī pán】 É-á-tang-koe chio Pe̍h-chhang-á kong-chú chē loăi kóng, mn̄g khòaⁿ tàu-té sī hoat-seng siáⁿ-mih tāi-chì. Pe̍h-chhang-á kong-chú kóng: “Góa sī chit ê kok-ka ê kong-chú, mā sī 1 ê bāng-chhèng. Ê-chái-á chhut-mn̂g ê sî-chūn, goán hū-ông ká-ná ū hoan-hù góa siáⁿ-mih tāi-chì, m̄-koh góa pak-tó͘ iau--khí-lâi, soah ka pàng bē-kì.” Hit 7 ê é-á-tang-koe, sè-sè-siaⁿ-á thó-lūn kóng: “Liam-mi sī kong-chú, liam-mi koh sī kok-ông, i kám ē sī teh kā lán phiàn?” “Hoān-sè sī thâu-khak pháiⁿ--khì!” “Bē-tàng án-ne kóng, múi 1 ê cha-bó͘-gín-á, lóng sī kong-chú--ā!” Sòa--lòe, in mā khai-sí siāu-kài ka-tī, goân-lâi, in 7 ê lâng sī chhin-hiaⁿ-tī, chhù-lāi khah pháiⁿ kòe-ji̍t, só͘-í in ê sin-châi chū sè-hàn to̍h pí lâng khah é, kiaⁿ hō͘ lâng khi-hū, to̍h lóng kiâⁿ chò-hóe, lâng chē, sin-khu piⁿ to̍h bô lâng káⁿ kā in khi-hū. In hiaⁿ-tī-á chhèng-kōe-kōa kiâⁿ tī ke-á lō͘, 7 ê lâng kiâⁿ chò 1 pâi, kui tiâu ke-á lóng khì hō͘ in that tiâu--leh, éng-hióng tio̍h pa̍t-lâng chò seng-lí, lâng siū-khì soah m̄-káⁿ kóng, teh kha-chiah-āu to̍h mē in kâu-sí-gín-á, kú--lâi, in to̍h hông kiò chò É-á-kâu 7 hiaⁿ-tī, in-ūi in 7 hiaⁿ-tī it-ti̍t lóng kiâⁿ chò-hóe, lâng mā ti̍t-chiap kiò in É-á-kâu, bô koh hun tó 1 ê. Pe̍h-chhang-á kong-chú mn̄g kóng: “Ah lín sī án-chóaⁿ ē tòa leh chit ê só͘-chāi?” Goân-lâi, in sī 1 ê chò-kang-á-lâng thoân-tūi, siōng gâu to̍h sī ó͘-khang hông thiàu, ka-chài thiàu ji̍p-khì khang lāi-té--ê, thong-siông m̄ sī lâng. Phì-jū kóng, nā ū lâng beh lia̍h oa̍h ê soaⁿ-ti-á, to̍h ē chhōe in khì tàu ó͘-khang. 1 tang chêng, ū lâng chhōe in khì bāu 1 ê kang-têng, teh thè chhī-chèng-hú ó͘ chia̍t-ūn tē-hā-tō. In siūⁿ kóng ta̍k-kang khì chò khang-khòe, nā sī cháu siuⁿ hn̄g ē chiok thiám--ê, to̍h ka-tī teh chhiū-nâ-á lāi-té chhìn-chhái kéng 1 ê só͘-chāi, khí chhù ka-tī tòa, āu--lâi, in-ūi in hā-pan liáu-āu siuⁿ bô-liâu, to̍h it-ti̍t bú, bú kah hit keng chhù soah jú lâi jú tōa keng, 1 nî āu to̍h piàn-chò 1 keng 100 pêⁿ ê pia̍t-chong, koh ū kah iû-éng-tî--leh. Kóng tio̍h teh chhiū-nâ-á lāi-té khí-chhù chit chân tāi-chì, pún-té sī Pe̍h-chhang-á kong-chú chit chōa beh tiau-cha--ê, m̄-koh i bē-kì--eh chún tú soah. In kóng hó-sè, keh-tńg-kang thàu-chá, to̍h ē sàng Pe̍h-chhang-á kong-chú chhut chhiū-nâ-á, hō͘ i ē-tàng ka-tī--tńg-khì. Hit àm, Pe̍h-chhang-á kong-chú khùn tī kheh-thiaⁿ phòng-í, chiu chiu chiu, thiⁿ-kng--a, É-á-kâu hiaⁿ-tī chún-pī beh kiò i khí-chhn̂g, siūⁿ bē-kàu kong-chú chhut kha, 1 kha 1 ê, 2 ê É-á-kâu hiaⁿ-tī soah khì ho͘ that 1-ē liâm teh piah-téng, kong-chú ná khùn ná kóng: “Koh hō͘ góa khùn 5 hun-cheng--lah!” Chhun--ê hit 5 ê hiaⁿ-tī-á, kóaⁿ-kín lī i ê kha khah hn̄g--tām-po̍h-á, tōa-hiaⁿ iōng chhiú chéng-thâu-á khin-khin-á thuh kong-chú ê chhiú kóng: “Eh! Kín khí-chhn̂g o͘h, lí m̄ sī beh tńg--khì?” Chit sî Pe̍h-chhang-á kong-chú chhiú ia̍t--1-ē, ti̍t-chiap kā É-á-kâu tōa-hiaⁿ siàn kah ùi thang-á-mn̂g poe--chhut-khì, lak teh chhiū-á-châng lāi-té, Pe̍h-chhang-á kong-chú koh tī hia jiáng, hoah kóng: “Góa phòa-pēⁿ--ah, góa hoat-sio--ah, góa bô ài khì tha̍k-chheh--lah!” Chhun--ê hit 4 ê hiaⁿ-tī-á, khòaⁿ tio̍h chit-lō pān-sè, m̄-káⁿ koh ka kiò, in seng kā liâm teh piah-téng hit 2 ê hiaⁿ-tī pak--lo̍h-lâi, koh khì chhiū-á-châng lāi-té kā tōa-hiaⁿ khiú--chhut-lâi, to̍h ti̍t-chiap khì chò khang-khòe--ah. Pe̍h-chhang-á kong-chú to̍h án-ne khùn kah tiong-tàu, pak-tó͘ iau--ah chiah peh--khí-lâi, i lak-tē-á khêng-khêng--eh, khêng tio̍h 50 kho͘, siūⁿ kóng hū-kīn m̄ chai ū lī-piān siong-tiàm--bô, siūⁿ beh bé pn̄g-oân lâi chia̍h. Chit sî chhiū-nâ-á chhut-hiān 1 ê cha-bó͘-gín-á, sin-khu téng moa 1 niá âng--ê, tài bō-á ê moa-á, chhiú kōaⁿ 1 kha nâ-á, kiâⁿ ùi chia lâi. I khòaⁿ tio̍h kong-chú, chin hó-lé ka sio-chioh-mn̄g: “Lí hó, chia̍h pá bē?” Ōe tú kóng soah, thiaⁿ tio̍h Pe̍h-chhang-á kong-chú ê pak-tó͘, kū 1 siaⁿ chiok tōa-siaⁿ. In-ūi chit ê siàu-lú put-koán-sî, lóng kā in a-má thīⁿ hō͘ i ê hit niá âng-moa-á moa tiâu-tiâu, lâng to̍h ka hō chò Âng-bō-á siàu-lú. I mn̄g kóng: “É-á-kâu a-hiaⁿ kám bô tī--leh? Kin-á-ji̍t kám m̄ sī in ê hioh-khùn-ji̍t?” Chai-iáⁿ in bô tī chhù--ni̍h, Âng-bō-á siàu-lú ùi i ê nâ-á, the̍h chhut 1 pé goân-chú-pit, mn̄g Pe̍h-chhang-á kong-chú: “Lí kám ē-sái kā góa bé kúi-ki-á ài-sim pit, chò 1-ē-á ài-sim, 1 ki 100 kho͘.” Che pit, tio̍h sī kong-chú cha-mê khòaⁿ--tio̍h-ê he, 1 tháng té kah tĭⁿ-tīⁿ, chiok pháiⁿ siá ê ài-sim pit. Chit khoán àu-nōa pit, 1 ki bē kàu 100 kho͘, in bé kui tháng sī beh chhòng-saⁿh? Pe̍h-chhang-á kong-chú ìn kóng: “Lí che pit chiah-nī pháiⁿ siá, mài kóng 1 ki, pòaⁿ ki góa mā bô ài kā lí bé!” Âng-bō-á siàu-lú kā pit khǹg ji̍p-khì nâ-á lāi, koh ùi lāi-té bong chhut 1 koàn kóe-chí-chiùⁿ, kóng: “Lí nā sī 1 pái kā góa bé 5 ki, góa koh sàng lí 1 koàn thian-jiân ê kóe-chí-chiùⁿ.” Khòaⁿ tio̍h kóe-chí-chiùⁿ, kong-chú sûi kā i ê 50 kho͘ jîm--chhut-lâi, mn̄g-kóng: “Bé pòaⁿ ki kám ē-sái sàng góa 1 koàn?” “Bô…Bô lâng án-ne teh chò seng-lí--ê-lah!” “Eh! Lí sī m̄-thang án-ne kóng neh, chò seng-lí góa lāi-hâng--ê ŏ͘!” Pe̍h-chhang-á kong-chú siūⁿ tio̍h i chiah tú siōng kòe ông-hiō ê keng-chè khò, thàn tio̍h 50 kho͘ hâm kui nâ-á ê phōng-kó, i chha-put-to ē-tàng chhut-sai--ah, ài thián chhut-lâi hông khòaⁿ. Pe̍h-chhang-á kong-chú kóng: “Lí che pit 1 ki chiah bē 1 pah kho͘, lī-sûn siuⁿ po̍h, koh khǹg kah kui nâ-á lóng sī, khòaⁿ--khài to̍h chiok chho͘-sio̍k.” Kóng soah, kong-chú kā kûn kha láng koân, ùi i ê tn̂g boe̍h-á lāi-bīn, the̍h chhut 3 ki p

【白蔥仔公主】EP04預告 Pe̍h-chhang-á Kong-chú

2024-07-0900:41

講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日先hâm ta̍k-ke相借問--1-ē，這拜四請準時收聽【白蔥á公主】EP03，真ló͘-la̍t。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】啥？白蔥á公主工課放--leh，人soah走去渡假？伊teh樹林á內底閣會tú tio̍h啥物神秘人物--leh？Chit禮拜四暗時8點，tī咱做工á人節目平台準時放送，白蔥á公主，歡迎ta̍k-ke鬥陣來收聽！【Pe̍h-ōe-jī pán】 Siáⁿ? Pe̍h-chhang-á kong-chú khang-khòe pàng--leh, lâng soah cháu khì tō͘-kà? I teh chhiū-nâ-á lāi-té koh ē tú-tio̍h siáⁿ-mih sîn-pì jîn-bu̍t--leh? Chit lé-pài 4 àm-sî 8 tiám, tī lán Chò-kang-á-lâng chiat-bo̍k pêⁿ-tâi chún-sî hòng-sàng Pe̍h-chhang-á kong-chú, hoan-gêng ta̍k-ke tàu-tīn lâi siu-thiaⁿ! -- Hosting provided by SoundOn

【白蔥仔公主】EP03 Pe̍h-chhang-á Kong-chú

2024-07-0415:46

講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】各位線頂ê聽眾朋友，ta̍k-ke平安, ta̍k-ke好, 歡迎收聽做工á人phá-kheh-su̍h-to͘h，我是主持人Bí-leng！講趣味ê台語，做趣味ê代誌，【狡怪囡仔古】chit ê節目是由咱做工á人工作室製作，今á日beh講--ê，是咱「白蔥á公主」第3集，王后派人欲下殺手，公主危險--à！紲--lòe會發生啥物代誌，咱緊ka聽--落-去！王后派hō͘白蔥á公主ê chit ê查埔人，是較早伊tī詐騙集團ê時陣，熟似--ê 1 ê烏社會大歹人，chit táu chhōe伊來接ê chit ê khè-suh真簡單：「你kā公主chhōa入去樹林á內面，無人chhōe會tio̍h ê所在，ka tu̍h ho͘死，án-ne to̍h有…3萬。」「Eh eh eh！你是m̄-bat行情nih，chit款khè-suh，攏mā是100萬起跳！」「Hăⁿ--àⁿ？Chiah貴？Ah無50萬？」「你到底是beh chhōe我刣人，a̍h是beh chhōe我刣價haⁿh？」落尾chit條in chhiâu kah 99萬，王后koh想beh ka開6個月ê票，m̄-koh殺手驚伊會跳票，堅持kan-na beh收現金，出發進前to̍h愛先la̍p 7成。白蔥á公主kah chit ê殺手裝ê護衛，行走入去樹林á內底，公主沿路ná行ná食，行無半點鐘久，to̍h kā 2人份ê便當食--去-ah。殺手看tio̍h伊ê便當去hông sut了了，淡薄á吞忍bē loeh，準備beh kā伊藏--起-來ê刀拔--出-來，雄雄1肢白蔥蔥ê手，伸入去伊ê外套內底，kā hit支刀khiang--去，to̍h看tio̍h白蔥á公主笑微微講：「Ŏa-à，chit支刀真水neh，借我sńg--1-ē。」殺手規ê人戇神--去，過3秒鐘，chiah想tio̍h ài趕緊去kā刀搶--轉-來，目1-ē chîn，soah看tio̍h公主kā刀giâ懸懸，歡喜kah tī hia ná笑ná跳舞，chit款天真ê gín-á性，hō͘咱chit ê殺手先生--à，看1下soah去ho͘迷--去，koh過5秒鐘，伊chiah雄雄回魂，目睭kheh-kheh teh hia大力hàiⁿ頭：「M̄-tio̍h，我ê任務是beh ho͘死，ài較專心--leh，我是phú-lo͘h--ê！」伊目睭thí開，滿面殺氣，soah發見白蔥á公主m̄知走去toeh--ah，伊趕緊喝：「公主，你tī tó位？」想講，kám會藏teh樹á叢內底？伊to̍h附近ê樹á叢，1欉1欉ka péng看māi，chit時，soah m̄知去踢tio̍h啥，規ê人跋跋--倒，ai-ioh，痛kah beh死，伊ê腳去ho͘ liô 1 sûn 3寸長ê孔嘴，血直直流，伊注神ka看，竟然是伊hit支刀，hō͘人插teh樹根頂頭！「Ái-iā，chit ê該死ê白蔥á公主，敢kā我創孔，che gún祖傳ê寶刀，你凊彩kă捎去sńg，koh烏白擲害我受傷，氣死人--ah！」白蔥á公主chit-má人食飽飽，tī樹林á內se̍h來se̍h去，伊想講：「Teh厝--ni̍h khû chiah久--ah，第1 kái走kah chiah遠ê所在，chiâⁿ好sńg neh。」 Tī林á內，伊看tio̍h較早m̄-bat看--過ê大隻蝶á，「Ŏa-à」，看tio̍h花chōa親像虎kāng款，黃--ê、烏--ê 1 chōa 1 chōa，有夠大隻ê虎頭蜂，伊mā是「Ŏa-à」，koh看tio̍h 1尾蛇，頭展--開ká-ná飯匙ê形，伊mā是「Ŏa-à」。伊看tio̍h啥攏感覺chiok新奇，根本to̍h無注意tio̍h講，原本tòe teh身軀邊ê hit ê護衛早to̍h無--去-ah，伊tú-chiah kā人ê寶刀凊彩捎去sńg，koh烏白擲，伊mā ka放bē記，上hàm--ê是，伊是為tio̍h啥代誌出門--ê，mā攏總bē記--chit。伊一直sńg kah beh暗á，chiah想tio̍h講：「Ah，我kám會走siuⁿ遠？」雄雄發見伊行m̄知路--ah，到chit陣伊chiah想tio̍h講，beh出門ê時，王后有派1 ê護衛陪tī伊身軀邊。「Ĕ？Hit ê人nah ē走無--去-ah？Hò͘，chit kho͘ nah ē chiah無責無任haⁿh！Ah m̄是beh chhōa我去食好料--ê？」公主kā手機á the̍h--出-來，想beh看1-ē-á網路地圖，soah發見chia根本都無信號，伊kā手機á giâ懸懸，chia比--1-ē，hia比--1-ē，天公khah án怎拜mā無信號。「Nah ē án-ne--lah，無網路我是beh án怎活--落-去，救人o͘h，救人o͘h！」白蔥á公主tī樹林á內底án怎都chhōe無路，過無偌久，天色to̍h規ê暗--落-來，伊行規工，實在有夠thiám，1 ê人tī hia，強beh哭--出-來，chit時，伊看tio̍h面頭前有1間大別莊，he別莊koh有kah游泳池。公主趕緊去挵門，「有人tī--leh-無？有人tī--leh-無？」挵規晡久soah攏無人應。伊對窗á門ka看--入-去，內底暗眠摸，看--起-來是無人tī--leh。窗á無鎖，公主直接to̍h ka peh--入-去，蠟燭ka點--leh to̍h四界看，無彩che厝起kah chiah大間，無糖無鹽koh無電視，灶腳無米mā無點心，架á頂ê小說破糊糊，ang-á冊soah chhun he第2集。白蔥á公主目睭眼tio̍h壁角hia有1腳大桶á，內底攏是原子筆，he原子筆hoⁿh貯kah tīⁿ-tīⁿ-tīⁿ，公主to̍h凊彩捎1支起來看。原子筆ê頂頭有1粒愛心，he愛心ka chhi̍h--lòe，筆尾to̍h會thóng--出-來，to̍h ē-tàng寫字。白蔥á公主chŏaⁿ gia̍h原子筆，teh人壁頂烏白chō，伊原本想beh畫1隻豬，chiah畫無2撇，to̍h發見，ĕ？Che筆nah ē chiah歹寫？Koh換2支筆，ta̍k支都chiok歹寫，chiah-nī歹寫ê筆，in是án怎ài chhoân chiah濟支？Kám講，che筆nā收集100支，to̍h ē-tàng換限定版ê便當？白蔥á公主ná tī hia烏白想，手ná chiān，厝--eh啥物物件攏ka摸摸看看--leh，櫥á門1-ê-á 1-ê ka phah ho͘開，總算是去hō͘伊chhiau tio̍h 2罐果子醬hām 3包俗pháng，想講規工to̍h kan-na早起食hit 2粒便當，chín腹肚chiok iau--ê，湯匙á the̍h--leh，果子醬to̍h ka挖起來食，2罐1-ē-á to̍h sut了了，sòa--落-來，he俗pháng 1塊接1塊chiⁿ teh嘴--eh，a̍h無物件通配，愈食愈感覺無滋味。 Chit ê時陣，外面有幾ê烏影，liam腳liam手，bih tī外口偷看。In攏總有7 ê人，ta̍k-ê攏生kah矮tàiⁿ-tàiⁿ，m̄-koh漢草koh chiâⁿ好，武腯武腯án-ne。In bih tī外口講：「是án怎有生份人teh咱兜？」「Koh凊彩捎咱ê物件去食！」「伊一定是賊á！」「Lín ka看，伊皮膚有夠白，kám講…伊是….」「白賊！」「白賊m̄是chit ê意思--lah！」原來，chit間別莊是in兜，in今á日工課tăⁿ做soah，tú到厝beh食飯，soah發見厝--ni̍h ke 1 ê生份人。In其中1 ê尿緊kah bē顧--eh，a̍h m̄管生份人猶tī厝內，to̍h beh入去顧便所，想bē到鎖匙插入去鎖匙孔，soah發見門去hông ùi內面鎖--起-來。伊大聲挵門，「Eh！你是siáng？你是án怎tī goán兜內底，koh kā門鎖--起-來？」內底hit ê生份人soah顛倒ka問講：「Beh chhōe siáng，主人無tī--leh-ō͘！」 Hăⁿ？你koh知影你m̄是主人o͘h？白蔥á公主kā門phah開，in 7 ê人隨to̍h chông--入-去，kā chit ê生份人圍--起-來。有1 ê人看tio̍h桌頂he食無了ê俗pháng，to̍h問講：「你是án怎kā goán ê物件食kah chhun án-ne？He是goán 7 ê人，按算beh食2工ê gia̍h neh！」「Hăⁿ--à？Lín nah ē食hiah少，莫怪ē生kah chiah-nī矮！飯ài加食--寡，m̄通揀食，知--無？」 Chit寡人足氣--ê，一直問講：「你是siáng？」「你是án怎tī goán壁頂畫1隻豬？」公主看tio̍h chit幾ê人án-ne歹chhèng-chhèng，趕緊the̍h出伊ê絕招，嘴舌thó͘--1-ē，目睭nih--1-ē，1 ki腳khiàu--起-來，koh比1 ê啾咪，然後自我紹介，講：「我是有180萬fans ê白蔥á公主，chiú-mi！♥」想bē到圍tī伊身軀邊chit幾ê矮á冬瓜，完全無hō͘伊面子，應講：「我無愛白蔥á！」「我較ài蒜頭！」「芋á！」「芫荽！」，in竟然m̄-bat白蔥á公主，mā m̄知啥物是啾咪，chit招對in無效--lah。公主koh問：「Án-ne，lín kám知影tó位有網路信號？」「Hăⁿ？He是啥？」 Chit聲白蔥á公主chiah知影，原來chit ê樹林á內面，根本to̍h無網路信號，chit寡人平常時mā無teh看電視，chiah會m̄-bat伊chit ê網chhèng，甚至in內底看--起-來上細漢ê hit ê，koh問講：「伊講 ê hit ê fans是啥haⁿh？」另外1 ê ka應講：「He in鬥陣--ê-lah！」「Hăⁿ？In鬥陣--ê有180萬ê？」 Chit 7 ê人，kā白蔥á公主圍kah密chiuh-chiuh，beh走都走bē離，in koh the̍h伊食chhun ê俗pháng，tu去伊面頭前，問伊講：「Goán ê食物--leh？你講--ā！你講--ā！你講--ā！」公主一世人m̄-bat tú-tio̍h chit款範勢，伊有淡薄á驚，in一直teh問講：「Goán ê食物--leh，你講--ā，你nah ē m̄講話？」Chit時，白蔥á公主雄雄笑--出-來，伊chit-má chiah想tio̍h講，chit幾ê人，chiah-nī興食，án-ne應該足好鬥陣。伊ùi伊ê lak袋á，khêng出7塊梅á餅，雙手捧--leh，hō͘ in 1人ni 1塊，1234567，ĕ？Nah會有1 ê人無分tio̍h餅？原來是最後1塊餅，公主iau-sâi kâng食食--去，無食--tio̍h hit-ê teh激氣，走去邊--á teh使性地。Ah ū食tio̍h餅ê hit 6 ê--leh？Ĕ--è，梅á餅吞lŏe腹肚--ni̍h，m̄-bat食--過ê好滋味，心內是歡喜koh好奇，自然to̍h無koh再受氣！若是講tio̍h食--ê，ta̍k-ke攏足有趣味，ah無我先來食宵夜，咱今á日ê節目to̍h先講到chia，感謝ta̍k-ke收聽咱狡怪囡á古，白蔥á公主！ Chit ê故事，是由咱做工á人工作室製作，編劇：Chiá-siông，演出：Bí-leng，音樂kah影片：Niau-tāu，字幕/校對：A-chin in ang。今á日ê故事聽了若感覺有趣味，請kā阮chhi̍h讚，注文，tàu宣傳--ō͘！Lín小小ê鼓勵，lóng會hō͘阮大大ê動力！Ló͘-la̍t！再會！【Pe̍h-ōe-jī pán】 Kok-ūi sòaⁿ-téng ê thiaⁿ-chiòng pêng-iú, ta̍k-ke pêng-an, ta̍k-ê hó, hoan-gêng siu-thiaⁿ Chò-kang-á-lâng phá-kheh-su̍h-to͘h, góa sī chú-chhî-jîn Bí-leng! Kóng chhù-bī ê Tâi-gí, chò chhù-bī ê tāi-chì, “Káu-koài Gín-á-kó͘” chit ê chiat-bo̍k sī iû lán Chò-kang-á-lâng Kang-chok-sek chè-chok, kin-á-ji̍t beh kóng--ê, sī lán “Pe̍h-chhang-á Kong-chú” tē 3 chi̍p, ông-hiō phài lâng beh hē sat-chhiú, kong-chú hûi-hiám--à! Sòa--lòe ē hoat-seng siáⁿ-mih tāi-chì, lán kín ka thiaⁿ--lo̍h-khì! Ông-hiō phài hō͘ Pe̍h-chhang-á kong-chú ê chit ê cha-po͘-lâng, sī khah-chá i tī chà-phiàn chi̍p-thoân ê sî-chūn, se̍k-sāi--ê 1 ê o͘-siā-hōe tōa pháiⁿ-lâng, chit táu chhōe i lâi chiap ê chit ê khè-suh chin kán-tan: “Lí kā kong-chú chhōa ji̍p-khì chhiū-nâ-á lāi-bīn, bô lâng chhōe ē tio̍h ê só͘-chāi, ka tu̍h ho͘ sí, án-ne to̍h ū 3 bān.” “Eh eh eh! Lí sī m̄-bat hâng-chêng nih, chit khoán khè-suh, lóng mā sī 100 bān khí thiàu!” “Hăⁿ--àⁿ? Chiah kùi? Ah bô 50 bān?” “Lí tàu-té sī beh chhōe góa thâi lâng, a̍h sī beh chhōe góa thâi-kè haⁿh?” Lo̍h-bóe chit tiâu in chhiâu kah 99 bān, ông-hiō koh siūⁿ beh ka khui 6 kó-goe̍h ê phiò, m̄-koh sat-chhiú kiaⁿ i ē thiàu-phiò, kian-chhî kan-na beh siu hiān-kim, chhut-hoat chìn-chêng to̍h ài seng la̍p 7 siâⁿ. Pe̍h-chhang-á kong-chú kah chit ê sat-chhiú chng ê hō͘-ōe, kiâⁿ ji̍p-khì chhiū-nâ-á lāi-té, kong-chú iân-lō͘ ná kiâⁿ ná chia̍h, kiâⁿ bô pòaⁿ tiám-cheng kú, to̍h kā 2 lâng hūn ê piān-tong chia̍h--khì-ah. Sat-chhiú khòaⁿ tio̍h i ê piān-tong khì hông sut liáu-liáu, tām-po̍h-á thun-lún bē loeh, chún-pī beh kā i chhàng--khí-lâi ê to poe̍h--chhut-lâi, hiông-hiông 1 ki pe̍h-chhang-chhang ê chhiú, chhun ji̍p-khì i ê gōa-thò lāi-té, kā hit ki to khiang--khì, to̍h khòaⁿ tio̍h Pe̍h-chhang-á kong-chú chhiò-bi-bi kóng: “Ŏa-à, chit ki to chin súi neh, chioh góa sńg--1-ē.” Sat-chhiú kui ê lâng gōng-sîn--khì, kòe 3 bió-cheng, chiah siūⁿ tio̍h ài kóaⁿ-kín khì kā to chhiúⁿ--tńg-lâi, ba̍k 1-ē chîn, soah khòaⁿ tio̍h kong-chú kā to giâ koân-koân, hoaⁿ-hí kah tī hia ná chhiò ná thiàu-bú, chit khoán thian-chin ê gín-á-sèng, hō͘ lán chit ê sat-chhiú sian-seⁿ--à, khòaⁿ 1 ē soah khì ho͘ bê--khì, koh kòe 5 bió-cheng, i chiah hiông-hiông hôe-hûn, ba̍k-chiu kheh-kheh teh hia tōa la̍t hàiⁿ-thâu: “M̄-tio̍h, góa ê jīm-bū sī beh ho͘ sí, ài khah choan-sim--leh, góa sī phú-lo͘h--ê!” I ba̍k-chiu thí khui, boán-bīn sat khì, soah hoat-kiàn Pe̍h-chhang-á kong-chú m̄ chai cháu khì toeh--ah, i kóaⁿ-kín hoah: “Kong-chú, lí tī tó-ūi?” Siūⁿ kóng, kám ē chhàng teh chhiū-á-châng lāi-té? I to̍h hū-kīn ê chhiū-á-châng, 1 châng 1 châng ka péng khòaⁿ-māi, chit sî, soah m̄ chai khì that tio̍h siáⁿ, kui ê lâng poa̍h-poa̍h--tó, ai-ioh, thiàⁿ kah beh sí, i ê kha khì ho͘ liô 1 sûn 3 chhùn tn̂g ê khang-chhùi, hoeh ti̍t-ti̍t lâu, i chù-sîn ka khòaⁿ, kèng-jiân sī i hit ki to, hō͘ lâng chhah teh chhiū-kin téng-thâu! “Ái-iā, chit ê kai-sí ê Pe̍h-chhang-á kong-chú, káⁿ kā góa chhòng-khang, che gún chó͘-thoân ê pó-to, lí chhìn-chhái kă sa khì sńg, koh o͘-pe̍h tàn hāi góa siū-siong, khì sí lâng--ah!” Pe̍h-chhang-á kong-chú chit-má lâng chia̍h pá-pá, tī chhiū-nâ-á lāi se̍h lâi se̍h khì, i siūⁿ kóng: “Teh chhù--ni̍h khû chiah kú--ah, tē 1 kái cháu kah chiah hn̄g ê só͘-chāi, chiâⁿ hó sńg neh.” Tī nâ-á lāi, i khòaⁿ tio̍h khah chá m̄-bat khòaⁿ--kòe ê tōa chiah ia̍h-á, “Ŏa-à”, khòaⁿ tio̍h hoe-chōa chhin-chhiūⁿ hó͘ kāng-khoán, n̂g--ê, o͘--ê 1 chōa 1 chōa, ū kàu tōa chiah ê hó͘-thâu-phang, i mā sī “Ŏa-à”, koh khòaⁿ tio̍h 1 bóe chôa, thâu thián--khui ká-ná pn̄g-sî ê hêng, i mā sī “Ŏa-à”. I khòaⁿ tio̍h siáⁿ lóng kám-kak chiok sin-kî, kin-pún to̍h bô chù-ì tio̍h kóng, goân-pún tòe teh sin-khu piⁿ ê hit ê hō͘-ōe chá to̍h bô--khì-ah, i tú-chiah kā lâng ê pó-to chhìn-chhái sa khì sńg, koh o͘-pe̍h tàn, i mā ka pàng bē-kì, siōng hàm--ê sī, i sī ūi-tio̍h siáⁿ tāi-chì chhut-mn̂g--ê, mā lóng-chóng bē-kì--chit. I it-ti̍t sńg kah beh-àm-á, chiah siūⁿ tio̍h kóng: “Ah, góa kám ē cháu siuⁿ hn̄g?” Hiông-hiông hoat-kiàn i kiâⁿ m̄-chai lō͘--ah, kàu chit-chūn i chiah siūⁿ tio̍h kóng, beh chhut-mn̂g ê sî, ông-hiō ū phài 1 ê hō͘-ōe pôe tī i sin-khu piⁿ. “Ĕ? Hit ê lâng nah ē cháu bô--khì-ah? Hò͘, chit kho͘ nah ē chiah bô chek bô jīm haⁿh! Ah m̄-sī beh chhōa góa khì chia̍h hó-liāu--ê?” Kong-chú kā chhiú-ki-á the̍h--chhut-lâi, siūⁿ beh khòaⁿ 1-ē-á bāng-lō͘ tē-tô͘, soah hoat-kiàn chia kin-pún to bô sìn-hō, i kā chhiú-ki-á giâ k

【白蔥仔公主】EP03預告 Pe̍h-chhang-á Kong-chú

2024-07-0200:41

講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日先hâm ta̍k-ke相借問--1-ē，這拜四請準時收聽【白蔥á公主】EP03，真ló͘-la̍t。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】緊張緊張緊張，王后chit táu欲出殺招--lo͘h，樹林á內底有夠危險，白蔥á公主chit關kám有才調度--過？Chit禮拜四暗時8點，tī咱做工á人節目平台準時放送，歡迎ta̍k-ke鬥陣來收聽，白蔥á公主！【Pe̍h-ōe-jī pán】 Kín-tiuⁿ kín-tiuⁿ kín-tiuⁿ, ông-hiō chit táu beh chhut sat chiau--lo͘h, chhiū-nâ-á lāi-té ū kàu hûi-hiám, Pe̍h-chhang-á kong-chú chit koan kám ū châi-tiāu tō͘--kòe? Chit lé-pài 4 àm-sî 8 tiám, tī lán Chò-kang-á-lâng chiat-bo̍k pêⁿ-tâi chún-sî hòng-sàng, hoan-gêng ta̍k-ke tàu-tīn lâi siu-thiaⁿ, Pe̍h-chhang-á kong-chú! -- Hosting provided by SoundOn

【白蔥仔公主】EP02 Pe̍h-chhang-á Kong-chú

2024-06-2714:06

講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】各位線頂ê聽眾朋友，ta̍k-ê平安, ta̍k-ê好, 歡迎收聽做工á人phá-kheh-su̍h-to͘h，我是主持人Bí-leng！講趣味ê台語，做趣味ê代誌，【狡怪囡仔古】chit ê節目是由咱做工á人工作室製作，今á日beh講--ê，是咱「白蔥á公主」第2集，王后teh kā公主上課。Eh！老師teh講話，ta̍k-ke ài認真聽heh！頭1工kā公主上課，che王后假--出-來ê氣質，to̍h演bē落--去，伊想講：「Chit-má ê gín-á是án怎haⁿh？Nah ē chiah歹教！Goán細漢ê時陣nah有án-ne！」第2工，lesson two，教經濟。王后想tio̍h講：「我做詐騙kâng諞錢，錢ùi別人ê褲袋á走ùi我chia來，che to̍h是1種經濟ê流通--ā！我趁tio̍h錢，捎去烏白開，買我kah意ê皮包á，這tio̍h是市場ê需求，廠商to̍h會出閣較濟、閣較好看ê皮包á來賣--我，che to̍h是供給。有需求，有供給，chit ê皮包á ê市場m̄-chiah發展會起--來。」Nā是講tio̍h kah錢有關係ê代誌，che王后to̍h真正有伊ê專業，m̄-koh伊閣bē-tàng kā伊拐錢ê經驗the̍h出來臭屁，伊to̍h想講ài用簡單ê方式，來教白蔥á公主。王后準備1 ê 50 kho͘ ê銅sián，hâm 1籃蘋果，伊kā銅sián khǹg tī白蔥á公主面頭前，閣oa̍t頭去the̍h 1粒蘋果，tú beh kā蘋果khǹg tī桌頂ê時，soah看tio̍h公主kā tú-chiah hit ê 50 kho͘，tē入去伊ê lak袋á內底，連1聲多謝都無講。王后hoah：「Eh！He是教材neh，the̍h--出-來！」想bē到公主soah對伊hàiⁿ頭，笑笑á應講：「母后，你ê氣質--leh？氣質，來，tòe我講1遍，氣質。」王后是氣kah phi̍h-phi̍h-chhoah，m̄-koh伊是專業ê諞仙á，伊硬ka忍--落-來，手伸入去lak袋á內底，閣the̍h另外1 ê 10 kho͘ ê銀角á出--來，oa̍t頭soah看tio̍h公主手伸長長，準備beh kā銀角á接--過-來，koh較hàm--ê是，tú-chiah khǹg桌頂hit粒蘋果，已經ho͘捎去khè kah chhun 1半--ah！王后氣kah kiōng-beh斷腦筋，大聲詈：「你chit ê不受教ê iau鬼死gín-á！」想bē到白蔥á公主目睭thí kah足大蕊，手指伊ê鼻á講：「你…你竟然kā我罵，你kám m̄知影goán老爸是siáng？Ŏ͘-ò͘，我to̍h知，你ê氣質是假--出-來-ê，我…我beh去kā goán阿爸講！」講soah，白蔥á公主to̍h ùi教室chông--出-去，tùi王后身軀邊走--過ê時，koh順手kā hit籃蘋果捎--去，chit聲，王后ê詐騙資金hâm裝備攏去hông拐了了，供給、需求，hâm市場，規ê總害--去。伊氣kah強beh吐血，m̄-koh伊真緊to̍h冷靜--落-siàⁿ來，想講：「我to̍h猶未ùi國王hia騙tio̍h錢，chit-má koh加了50 kho͘，bē用--chit，代誌絕對bē-tàng tī這時piak-khang！」王后裙腳láng--起-來，趕緊走去chhōe國王，伊衝kah chok青狂，走kah bē-hù假淑女，一直到走入去國王ê辦公室，看tio̍h國王真無閒，khû tī邊á teh phah電動，王后chiah趕緊身軀khiā ho͘直，激kah真大範真優雅。國王聽tio̍h聲，頭giâ--起-來，問伊講：「Honey，啥代誌？」「Ĕ？Ah白蔥á公主--leh？伊nah會無tī chia？」當時á咱白蔥á公主，ùi教室chông--出-去了後，to̍h bē記tit beh創啥，伊想都無想，直接ùi廚房chông--去，the̍h hit籃蘋果，kah人換2 ki雞腿，實現上原始ê交易，人類ê經濟to̍h是án-ne發展--起-來-ê，而且伊ê服務koh足好，「He籃á我sa-bì-suh--ê，免細膩。」講soah，1 ki雞腿the̍h tī手頭，另外1 ki直接that tī嘴--ni̍h，oa̍t--leh to̍h閣出--去。Beh離開ê時，廚房ê門koh順sòa tùi外口ka鎖--起-來。講轉來王后chit pêng，雖罔白蔥á公主無來chia tâu伊假pai，m̄-koh伊感覺tio̍h先kā國王注1-ē-á預防siā。王后kā國王講：「咱chit ê查某囝hoⁿh，真正是細漢歹育飼，大漢歹教示--lah，伊足愛講白賊，伊若是kā你講啥，你千萬to̍h m̄通信。」國王ná phah電動ná應講：「Taⁿ你是teh講啥？伊細漢時a̍h m̄是你育飼--ê。」王后koh想beh講話，國王soah sòa-lŏe講：「雖罔伊有淡薄á較皮，m̄-koh逐家攏足愛--伊。愛kah啥物程度--o͘h？親像咱王宮舊年ê尾牙，頭賞是啥hō͘妳ioh，是公主ê簽名相片！伊koh足搭心，加kah 1腳伊穿--過ê襪á，逐家攏想beh抽tio̍h hit ê獎品--nē！」「Hăⁿ？襪á？哪會kan-na 1腳？」「Ah to̍h伊襪á thǹg--落-來to̍h烏白擲，1腳phàng見，chhun--ê hit腳to̍h捎來做獎品--ā。」「Án-ne mā會使o͘h？」「我kā你講，chhun 1腳算bē-bái--ah，有時hoⁿh，伊規雙攏會使phah無--去-o͘h！」王后想講：「你chhōa我來做某，kan-na kā我講你有1 ê水查某囝，mā無kā我講lín查某囝是1 ê習慣hiah-nī bái ê猴死gín-á，kám講…我去tú-tio̍h詐騙？」國王koh講：「尤其是伊ê fans hoⁿh，對伊真好，hō͘伊chiâⁿ濟tō͘-né o͘h，你看伊平常時四界teh買sì-siù-á，攏是食伊家己趁--ê neh。Chhun ê錢，我to̍h ka當做是紅包，ka收收--khài，替伊保管。一直到舊年，咱chit ê國家，有百分之二十ê預算，是開白蔥á公主ê tō͘-né--lah！」王后驚1 tiô，想講：「Ăⁿ？M̄是講替伊保管？Ná-ē chŏaⁿ ka the̍h去做預算？害--ā害--ā害--ā，chit kho͘ chiah-nī無良心，我真正去tú-tio̍h詐騙--ah！」王后想想--leh，koh問講：「伊舞he啥物迷眾頁，做he啥物網chhèng，he kám真正足好趁？」「He到底是啥，我mā m̄知，m̄-koh伊真正趁bē少--lah。」話講了，國王to̍h繼續tī hia無閒phah電動，心神攏ho͘鉤鉤--去，kan-na注意teh看電視畫面內底hit仙ang-á，tī hia跳--1-ē 跳--1-ē，tin-tong，ŏ͘-ò͘，1百分！看國王無koh講話，王后mā頭oat--leh行--出-去，伊一直teh想頭tú-á聽--tio̍h-ê，講he公主趁真濟，王后to̍h想講：「Hò͘ⁿ，伊規工顧teh食，無代無誌to̍h tī hia hip啥物chiú-mi ê相片，án-ne to̍h會使趁錢o͘h？Che真正無天理！不如，我家己mā來做網chhèng。」王后to̍h家己去申請1 ê迷眾頁，hō做「全世界上水ê王后」，伊本底to̍h真gâu妝，koh學少年gín-á cosplay，ta̍k工穿無kāng軀衫，tī hia假伊足有氣質，he相片hip了，先用PS kā伊處理--過，PS了後，chiah koh PS，to̍h án-ne舞規個月，伊ê fans hoⁿh，總算是增加到87 ê！王后足歡喜，伊若是beh piàⁿ過白蔥á公主，kan-na差…180萬ê fans niâ。Sòa--lòe伊連去白蔥á公主ê網頁看，看tio̍h公主chăng傳1張相片，相片內面，伊嘴--ni̍h咬1支烘煙腸，正手koh比1 ê chiú-mi，若m̄是tò手beh the̍h手機á hip相，凡勢伊會tī hia挖鼻孔！To̍h hit張相片hoⁿh，ùi chăng到chit-má，已經hông chhi̍h kah 50萬ê讚--ah neh！王后氣kah beh死，氣~kah beh死，lín祖媽kám會輸hō͘你chit ê死gín-á？王后ê怨妒對白蔥á公主完全無影響，伊人猶原是規châng好好。一直到有1工，王后hō͘人鎖tī伊家己ê房間內，氣kah beh害--去，自án-ne心肝掠坦橫，決定beh kā公主創ho͘死。伊to̍h開始暗中安排1寡代誌，便nā有機會，to̍h tī國王耳孔邊講1寡閒á話。自án-ne，總算是等到hit 1日，國王kā白蔥á公主叫--過-去，講：「你hoⁿh，大人大種--ah，mài規工kan-na會曉tī hia póe手機á，舞啥物迷眾頁，你tio̍h ài ná學看án怎處理公事，替人民服務。」公主聽了有淡薄á受氣，我經營迷眾頁是閣án怎--ah，你家己m̄是mā規工tī hia teh phah電動！ Chit時王后跳出來講：「我聽講樹林á內底有人佔用國有地，tī hia起別莊，無你派咱chit ê寶貝á公主去調查看māi，hō͘伊hoⁿh，有1寡正經代誌通做。」公主無想beh做代誌，m̄-koh王后teh伊耳空邊，ka講細聲話：「乖，我叫人chhōa你去食好料--ê。」聽tio̍h食好料，公主隨應好，王后閣講：「你免煩惱，我派1 ê殺手…m̄是，是護衛hâm你去。」王后手ia̍t--1-ē，to̍h看tio̍h 1 ê面有1蜞ê查甫人行--入-來，公主看chit ê生份人，講：「Ĕ？Chit ê人我nah ē m̄-bat看--過？」「伊外包--ê-lah。」 To̍h án-ne，公主hâm chit ê生份人，chah 2粒便當，行出城門，ùi樹林á行--入-去。 Hó͘--ò͘！林á內ê樹á發kah有夠ōm，kā公主in 2人cha̍h-tiâu--leh，看無影，聽無聲，害我soah m̄知欲講啥，ah無咱今á日ê節目to̍h先講到chia，感謝ta̍k-ke收聽咱狡怪囡á古，白蔥á公主！ Chit ê故事，是由咱做工á人工作室製作，編劇：Chiá-siông，演出：Bí-leng，音樂／影片：Niau-tāu，字幕／校對：A-chin in ang。今á日ê故事聽了若感覺有趣味，請kā阮chhi̍h讚，注文，tàu相報，lín ê每一份鼓勵，攏會成做阮閣拚--lòe ê氣力！Ló͘-la̍t！再會！【Pe̍h-ōe-jī pán】 Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó, hoan-gêng siu-thiaⁿ Chò-kang-á-lâng phá-kheh-su̍h-to͘h, góa sī chú-chhî-jîn Bí-leng! Kóng chhù-bī ê Tâi-gí, chò chhù-bī ê tāi-chì, “Káu-koài Gín-á-kó͘” chit ê chiat-bo̍k sī iû lán Chò-kang-á-lâng Kang-chok-sek chè-chok, kin-á-ji̍t beh kóng--ê, sī lán “Pe̍h-chhang-á Kong-chú” tē 2 chi̍p, ông-hiō teh kā kong-chú siōng-khò. Eh! Lāu-su teh kóng-ōe, ta̍k-ke ài jīn-chin thiaⁿ heh! Thâu 1 kang kā kong-chú siōng-khò, che ông-hiō ké--chhut-lâi ê khì-chit, to̍h ián bē lo̍h--khì, i siūⁿ kóng: “Chit-má ê gín-á sī án-chóaⁿ haⁿh? Nah ē chiah pháiⁿ kà! Goán sè-hàn ê sî-chūn nah ū án-ne!” Tē 2 kang, lesson two, kà keng-chè. Ông-hiō siūⁿ tio̍h kóng: “Góa chò chà-phiàn kâng pián chîⁿ, chîⁿ ùi pa̍t-lâng ê khò͘-tē-á cháu ùi góa chia lâi, che to̍h sī 1 chióng keng-chè ê liû-thong--ā! Góa thàn tio̍h chîⁿ, sa khì o͘-pe̍h khai, bé góa kah-ì ê phôe-pau-á, che tio̍h sī chhī-tiûⁿ ê su-kiû, chhiúⁿ-siong to̍h ē chhut koh khah chē, koh khah hó khòaⁿ ê phôe-pau-á lâi bē--góa, che to̍h sī kiong-kip. Ū su-kiû, ū kiong-kip, chit ê phôe-pau-á ê chhī-tiûⁿ m̄-chiah hoat-tián ē khí--lâi.” Nā sī kóng tio̍h kah chîⁿ ū koan-hē ê tāi-chì, che ông-hiō to̍h chin-chiàⁿ ū i ê choan-gia̍p, m̄-koh i koh bē-tàng kā i koái-chîⁿ ê keng-giām the̍h chhut-lâi chhàu-phùi, i to̍h siūⁿ kóng ài iōng kán-tan ê hong-sek, lâi kà Pe̍h-chhang-á kong-chú. Ông-hiō chún-pī 1 ê 50 kho͘ ê tâng-sián, hâm 1 nâ phōng-kó, i kā tâng-sián khǹg tī Pe̍h-chhang-á kong-chú bīn thâu chêng, koh oa̍t thâu khì the̍h 1 lia̍p phōng-kó, tú beh kā phōng-kó khǹg tī toh téng ê sî, soah khòaⁿ tio̍h kong-chú kā tú-chiah hit ê 50 kho͘, tē ji̍p khì i ê lak-tē-á lāi-té, liân 1 siaⁿ to-siā to bô kóng. Ông-hiō hoah: “Eh! He sī kàu-châi neh, the̍h--chhut-lâi!” Siūⁿ bē kàu kong-chú soah tùi i hàiⁿ thâu, chhiò-chhiò-á ìn kóng: “Bú-hiō, lí ê khì-chit--leh? khì-chit, lâi, tòe góa kóng 1 piàn, khì-chit.” Ông-hiō sī khì kah phi̍h-phi̍h-chhoah, m̄-koh i sī choan-gia̍p ê pián-sian-á, i ngē ka jím--lo̍h-lâi, chhiú chhun ji̍p-khì lak-tē-á lāi-té, koh the̍h lēng-gōa 1 ê 10 kho͘ ê gîn-kak-á chhut--lâi, oa̍t thâu soah khòaⁿ tio̍h kong-chú chhiú chhun tn̂g tn̂g, chún-pī beh kā gîn-kak-á chiap--kòe-lâi, koh khah hàm--ê sī, tú-chiah khǹg toh-téng hit lia̍p phōng-kó, í-keng ho͘ sa khì khè kah chhun 1 pòaⁿ--ah! Ông-hiō khì kah kiōng-beh tn̄g-náu-kin, tōa-siaⁿ lé: “lí chit ê put-siū-kà ê iau-kúi sí-gín-á!” Siūⁿ bē kàu Pe̍h-chhang-á kong-chú ba̍k-chiu thí kah chiok tōa lúi, chhiú kí i ê phīⁿ-á kóng: “Lí…Lí kèng-jiân kā góa mē, lí kám m̄ chai-iáⁿ goán lāu-pē sī siáng? Ŏ͘-ò͘, góa to̍h chai, lí ê khì-chit sī ké--chhut-lâi-ê, Góa…Góa beh khì kā goán a-pah kóng!” Kóng soah, Pe̍h-chhang-á kong-chú to̍h ùi kàu-sek chông--chhut-khì, tùi ông-hiō sin-khu piⁿ cháu--kòe ê sî, koh sūn-chhiú kā hit nâ phōng-kó sa--khì, chit siaⁿ, ông-hiō ê chà-phiàn chu-kim hâm chong-pī lóng khì hông koái liáu liáu, kiong-kip, su-kiû, hâm chhī-tiûⁿ, kui ê chóng hāi--khì. I khì kah kiông beh thò͘-hoeh, m̄-koh i chin kín to̍h léng-chēng--lo̍h-lâi, siūⁿ kóng: “Góa to̍h iáu-bē ùi kok-ông hia phiàn tio̍h chîⁿ, chit-má koh ke liáu 50 kho͘, bē ēng--chit, tāi-chì choa̍t-tùi bē-tàng tī chit-sî piak-khang!” Ông-hiō kûn kha láng--khí-lâi, kóaⁿ-kín cháu khì chhōe kok-ông, i chhiong kah chok chheⁿ-kông, cháu kah bē-hù ké siok-lú, it-ti̍t kàu cháu ji̍p khì kok-ông ê pān-kong-sek, khòaⁿ tio̍h kok-ông chin bô-êng, khû tī piⁿ--á teh phah tiān-tōng, ông-hiō chiah kóaⁿ-kín sin-khu khiā ho͘ ti̍t, kek kah chin tōa-pān chin iu-ngá. Kok-ông thiaⁿ tio̍h siaⁿ, thâu giâ--khí-lâi, mn̄g i kóng: “Honey, siáⁿ tāi-chì?” “Ĕ? Ah Pe̍h-chhang-á kong-chú--leh? I nah ē bô tī chia?” Tang-sî-á lán Pe̍h-chhang-á kong-chú, ùi kàu-sek chông--chhut-khì liáu-āu, to̍h bē kì tit beh chhòng-siáⁿ, i siūⁿ to bô siūⁿ, ti̍t-chiap ùi tû-pâng chông--khì, the̍h hit nâ phōng-kó, kah lâng ōaⁿ 2 ki ke-thúi, si̍t-hiān siōng goân-sú ê kau-e̍k, jîn-lūi ê keng-chè to̍h sī án-ne hoat-tián--khí-lâi-ê, jî-chhiáⁿ i ê ho̍k-bū koh chiok hó, “He nâ-á góa sa-bì-suh--ê, bián sè-jī.” Kóng soah, 1 ki ke-thúi the̍h tī chhiú-thâu, lēng-gōa 1 ki ti̍t-chiap that tī chhùi--ni̍h, oat--leh to̍h koh chhut-khì. Beh lî-khui ê sî, tû-pâng ê mn̂g koh sūn-sòa tùi gōa-kháu ka só--khí-lâi. Kóng tńg-lâi ông-hiō chit pêng, sui-bóng Pe̍h-chhang-á kong-chú bô lâi chia tâu i ké-pai, m̄-koh i kám-kak tio̍h seng kā kok-ông chù 1-ē-á ī-hông-siā. Ông-hiō kā kok-ông kóng: “Lán chit ê cha-bó͘-kiáⁿ hoⁿh, chin chiàⁿ sī sè-hàn pháiⁿ io-chhī, tōa-hàn pháiⁿ kà-sī--lah, i chiok ài kóng pe̍h-chha̍t, i nā-sī kā lí kóng siaⁿh, lí chhian-bān to̍h m̄-thang sìn.” Kok-ông ná phah tiān-tōng ná ìn kóng: “Taⁿ lí sī teh kóng siaⁿh? I sè-hàn sî a̍h m̄ sī lí io-chhī--ê.” Ông-hiō koh siūⁿ beh kóng-ōe, kok-ông soah sòa-lŏe kóng: “Sui-bóng i ū

【白蔥仔公主】EP02預告 Pe̍h-chhang-á Kong-chú

2024-06-2500:41

講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日先hâm ta̍k-ke相借問--1-ē，這拜四請準時收聽【白蔥á公主】EP02，真ló͘-la̍t。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】王后kā白蔥á公主上課，上kah血壓規ê chhèng懸，白蔥á公主kám會去hông罰khiā--leh？Chit禮拜四暗時8點，tī咱做工á人節目平台準時放送，歡迎ta̍k-ke鬥陣來收聽o͘h！【Pe̍h-ōe-jī pán】 Ông-hiō kā Pe̍h-chhang-á kong-chú siōng-khò, siōng kah hoeh-ap kui ê chhèng-koân, Pe̍h-chhang-á kong-chú kám ē khì hông hoa̍t-khiā--leh? Chit lé-pài 4 àm-sî 8 tiám, tī lán Chò-kang-á-lâng chiat-bo̍k pêⁿ-tâi chún-sî hòng-sàng, hoan-gêng ta̍k-ke tàu-tīn lâi siu-thiaⁿ o͘h! -- Hosting provided by SoundOn

【白蔥仔公主】EP01 Pe̍h-chhang-á Kong-chú

2024-06-2014:46

講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】各位線頂ê聽眾朋友，ta̍k-ê平安, ta̍k-ê好, 歡迎收聽做工á人phá-kheh-su̍h-to͘h，我是主持人Bí-leng！講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日beh講--ê，是咱【白蔥á公主】第1集。Tī節目開始進前，kā ta̍k-ke提醒，手機á ài ka關--起-來，m̄通影響tio̍h別人…(手機á關--起-來是beh按怎聽)，o͘h，m̄是teh看電影hoⁿh，好，手機á ka開較大聲--leh，有趣味--ê，樓頂招樓腳，ta̍k-ke做～夥～聽！古早古早，有1 ê美麗ê國家，雖罔m̄是kài好額，mā bē講足散赤，因為chit ê國家ê國王，有好好á teh做代誌，所以--à，百姓ê生活，過了算是bē-bái。國王kah王后in翁á某感情chiâⁿ好，m̄-koh in ê查某囝tăⁿ出世無偌久，王后to̍h破病過身--a。國王雖然真艱苦，m̄-koh看tio̍h chit ê tú出世ê公主，kah in阿母kāng款，皮膚白白白，目睭大大蕊，有夠古錐，伊to̍h真疼惜chit ê súi-tang-tang ê查某囝。公主自細漢to̍h足iau鬼，看到食--ê to̍h會伸手，物件捎--leh to̍h ùi嘴--eh that，所以--à，伊猶m̄-bat代誌，tú會曉行ê時，to̍h知影桌巾真歹pō͘，蠟燭無好食，he椅á腳無滋味。伊3歲ê時陣，人koh感覺伊足古錐，有啥物好食物á to̍h攏the̍h hō͘--伊，看伊食kah hiah有滋味，ta̍k-ke mā感覺歡喜。M̄-koh伊實在siuⁿ iau-sâi，到伊5歲ê時，ta̍k-ke nā看tio̍h伊，to̍h ài趕緊kā食ê物件藏--起-來，bē輸去tú tio̍h iau死鬼！Tī chit ê國家，咱人一般nā相借問，攏會問講：「你食飽--未？」M̄-koh，nā是tú tio̍h公主，to̍h無人會án-ne kā伊ăi-siat-chuh，因為ta̍k-ke攏知影，伊永遠食bē飽。Ka-chài伊攏食bē大kho͘，瘦pi-pa，皮膚koh白蔥蔥，所以--à，人攏開始稱呼伊是「白蔥á公主」。白蔥á公主真活潑，mā有人感覺伊足chiān，伊m̄-nā真興食，koh有2 ê歹習慣，第1 ê歹習慣to̍h是，伊足ài kâng鎖門，chit ê習慣是án怎來--ê？有1工hoⁿh，he廚房--ê驚伊偷食，kā門鎖--起-來，白蔥á公主tī外口撞門撞10分鐘，人to̍h走--ah，廚房ê總舖kah腳手想講伊放棄--ah，讚ŏ͘，想bē到料理做好，soah m̄知去hō͘ siáng鎖tī廚房內面，無法度出--去，國王1 ê人戇戇á坐tī餐廳，腹肚iau kah tân雷公，tī hia想講今á日暗頓nah會猶未chhoân好勢。Chit時hoⁿh，公主伊家己soah走去se̍h夜市á食雞排，koh配真珠奶茶。第2 ê歹習慣to̍h是，伊手足chiān，伊足ài烏白捎別人ê寶貝物á來sńg，m̄-nā án-ne，伊定定sńg-sńg--leh，物件koh烏白擲，he人ê寶貝物á neh！有1 kái，白蔥á公主走去街á lōa-lōa趖，管區--ê派2 ê警察teh ka保護，伊看tio̍h警察ê褲袋á khǹg 1副手銬，感覺好奇，to̍h ka借來sńg，警察看公主kā手銬the̍h懸懸，ná笑ná tī hia跳舞，看--起-來實在有夠古錐，想bē到伊1-ē戇神，白蔥á公主soah m̄知走tó去，因為án-ne，hit 2 ê警察去hō͘主管罵kah臭頭，koh較淒慘--ê是，hit工e晡，hit ê警察去掠賊偷，jiok 1000公尺了後，總算是掠tio̍h人，chit時chiah發見手銬hō͘白蔥á公主借去sńg，soah無hâiⁿ--伊，tú掠--tio̍h ê賊偷koh去ho͘走--去，實在有夠衰。Hit工beh暗ê時，有1 ê生理人，擔tú收好勢，趕緊beh轉去放尿，趕到厝，鎖匙the̍h--出-來，soah看tio̍h in tau大門ê鎖頂頭，ke鎖1副手銬，hit工，kui條街á ê人攏聽tio̍h有人tī hia大聲喝講：「我beh放尿，我beh放尿--lah！」日子過了chiâⁿ緊，白蔥á公主1工1工á大漢，面模á mā愈來愈水，愈來愈親像in阿母，猶m̄-koh kah in阿母無kāng--ê是，伊soah愈來愈chiān。雖罔伊規工tī hia變鬼變怪，造成別人ê困擾，m̄-koh水姑娘á生成to̍h較占贏，ta̍k kái若舞啥物代誌出--來，只要伊嘴舌thó͘--1-ē，目睭nih--1-ē，笑笑á講：「歹勢--lah！」看tio̍h伊he古錐ê笑面，to̍h無人ē kah伊計較。一直到伊14歲ê時陣，伊ê迷眾頁竟然有超過180萬ê fans，全世界mā kan-na外國ê 1 ê天團，hō做「炸彈少女團」--ê，比白蔥á公主ke 20萬ê fans niâ。雖然伊chiah-nī受歡迎，m̄-koh，國王soah有淡薄á煩惱：「Aih，chit ê白蔥á公主hoⁿh，siuⁿ活潑，公主m̄ to̍h ài較有氣質--leh！是講ā莫怪--lah！In老母早早to̍h過身，我上班閣足無閒，定定放伊1 ê四界拋拋走，chiah會變kah袂輸野馬--leh。Cha̍p…袂使，閣按呢落--去，我真正ē kā伊sēng歹--去。不如…我koh來chhōa--1-ê，有1 ê序大tòe tī伊身軀邊ka教，應該是ē較好--li。」國王kā手伸入去伊ê褲袋á，tī hia lā--leh lā--leh，kā伊ê Pa̍t-á牌手機á jîm--出-來，年初chiah新推出，上新上大支ê hit支。伊kā手機á chhi̍h--開，點入去婚姻紹介ê網站，申請1 ê口座，to̍h開始beh寫伊ê個人資料。Hit時，伊看tio̍h網頁邊--á顯示ê統計：「本網站配對，上得人意愛ê頭路：頭名，工程師，第2名，公務人員。」國王心內to̍h teh想講：「Hit ê工程師hoⁿh，高科技，he我m̄-bat，m̄-koh我mā算是1 ê公務人員--ā，應該有機會--lah！」想想--eh，伊to̍h tī個人資料ê職業欄，輸入「國王」chit ê職業，sòa--lòe伊koh tī手機á內面，chhōe tio̍h 1張伊18年前ê相片，傳--起-lih。資料攏chhoân好勢，送--出-去，想講舞chiah久，beh叫人kā伊chhoân chê bì-luh，chit時手機á「叮」1聲，發來配對成功ê通知，koh來「叮、叮叮叮、叮叮叮叮叮叮叮叮叮叮叮叮」，he聲音soah一直叫，叫bē恬，伊趕緊kā手機á the̍h起來看，óa，不得了，竟然有四、五百ê查某會員，對伊有興趣。伊kā hit kóa配對ê資料點開來看，頭1位，to̍h看tio̍h 1 ê穿烏色膨裙，妝畫了chiâⁿ水，看--起-來足khiàng腳ê查某人。Hit ê查某人ê自我紹介，tah真濟伊四界旅行、食高級料理ê相片，koh講伊bat chiâⁿ濟大頭家，真gâu投資，趁足濟錢，taⁿ已經30外歲--ah，想beh chhōe 1 ê認真對待--伊，會使鬥陣過1世人ê翁婿，落尾koh寫1條「真正有心，chiah kah我聯絡，nā是想beh sńg-sńg--eh準tú soah--ê，勞煩你去chhōe別人！」國王看tio̍h真kah意，chiah-nī-á khiàng腳ê查某人，一定ē-tàng做白蔥á公主ê好chhōa頭，想tio̍h che，伊to̍h趕緊chhōe「我有興趣」hit粒chhi̍h鈕ka chhi̍h--lòe，準備beh約chit ê穿烏色膨裙ê查某人出來見面。經過九九81點鐘，in to̍h結婚--a。 Chit ê新ê王后，人足有禮貌，氣質真好，ah m̄-koh，he攏是伊假--出-來-ê，其實伊少年ê時陣，teh替烏道做仙人跳，年歲較大了後，to̍h去做詐騙集團ê成員，後--來集團去hông chhiau-chhiau--去，伊走了緊，無去hông掠--tio̍h，m̄-koh soah去hông通緝，伊to̍h想beh換chê所在發展，chit時tú好看tio̍h國王想beh chhōa某ê網頁，hit張相片hoⁿh戇面á戇面，看--起-來to̍h ká-ná足好kòng ê盼á，伊隨to̍h ka點1 ê愛心，sòa--lòe to̍h是咱進前講--ê，in to̍h順利結婚--a。雖罔是tú結婚，m̄-koh國王無佔用王后siuⁿ濟時間，m̄是伊無擋頭，真正是國王ê工課chiâⁿ濟，真無閒。國王拜託chit ê tăⁿ chhōa入門ê王后，親身去教白蔥á公主，王后心內teh想：「Hăⁿ？Beh叫我去教公主？我kan-na bat tī詐騙集團，教菜鳥á án怎kâng騙neh。」翻頭koh想講：「Mā是會使--lah，我chiah-nī巧，烏白chòaⁿ mā應該準會過，to̍h算是我teh服務hō͘我騙ê客戶好--ah。」自án-ne kā工課ín--落-來。頭1回上課，lesson one，教禮儀。「若beh做1 ê淑女，不管是khiā--leh，坐--leh，甚至是teh khû便所ê時，攏ài展現出你ê氣質。」「Khû便所a̍h無人khoàiⁿ--à，kám bē-tàng放較輕鬆--leh？」「恬--去！淑女隨時攏ài百分之百ê完美，閣再講，你哪會知影khû便所to̍h無人會看，ah nā萬不二有人teh看--leh？」「He to̍h變態--a，he nā去hō͘我tú--tio̍h hoⁿh，to̍h叫人kā伊拖去phah phah--leh，chiah擲入去便所沖掉！」「恬--去！淑女bē使使用暴力，world peace！做1 ê淑女，隨時攏ài有氣質，ài面á笑笑m̄-chiah tio̍h！」「Ah你nā是秘結--leh？你kám笑ē出--來？」「恬--去！恬--去！恬--去！」各位聽眾，因為王后ê血壓siuⁿ懸，無法度閣sòa lŏe演，我看時間mā差不多--a，ah無咱今á日ê節目to̍h先到chia，感謝ta̍k-ke收聽咱狡怪囡á古，白蔥á公主。 Chit ê故事，是由咱做工á人工作室製作，編劇：Chiá-siông，演出：Bí-leng，音樂／影片：Niau-tāu，字幕／校對：A-chin in ang。今á日ê故事聽了若感覺有趣味，ài kā阮chhi̍h讚，注文，tàu宣傳o͘h！Ló͘-la̍t！再會！【Pe̍h-ōe-jī pán】 Kok-ūi sòaⁿ-téng ê thiaⁿ-chiòng pêng-iú, ta̍k-ê pêng-an, ta̍k-ê hó, hoan-gêng siu-thiaⁿ Chò-kang-á-lâng phá-kheh-su̍h-to͘h, góa sī chú-chhî-jîn Bí-leng! Kóng chhù-bī ê Tâi-gí, chò chhù-bī ê tāi-chì, “Káu-koài Gín-á-kó͘” sī Chò-kang-á-lâng Kang-chok-sek chè-chok ê choân-sin tan-goân, kin-á-ji̍t beh kóng--ê, sī lán “Pe̍h-chhang-á Kong-chú” tē 1 chi̍p. Tī chiat-bo̍k khai-sí chìn-chêng, kā ta̍k-ke thê-chhéⁿ, chhiú-ki-á ài ka koaiⁿ--khí-lâi, m̄-thang éng-hióng tio̍h pa̍t-lâng… “Chhiú-ki-á koaiⁿ--khí-lâi sī beh án-chóaⁿ thiaⁿ”, o͘h, m̄ sī teh khòaⁿ tiān-iáⁿ hoⁿh, hó, chhiú-ki-á ka khui khah tōa-siaⁿ--leh, ū chhù-bī--ê, lâu-téng chio lâu-kha, ta̍k-ke chò-hóe thiaⁿ! Kó͘-chá kó͘-chá, ū 1 ê bí-lē ê kok-ka, sui-bóng m̄ sī kài hó-gia̍h, mā bē kóng chiok sàn-chhiah, in-ūi chit ê kok-ka ê kok-ông, ū hó-hó-á teh chò tāi-chì, só͘-í--à, peh-sèⁿ ê seng-oa̍h, kòe liáu sǹg sī bē-bái. Kok-ông kah ông-hiō in ang-á-bó͘ kám-chêng chiâⁿ hó, m̄-koh in ê cha-bó͘-kiáⁿ tăⁿ chhut-sì bô jōa-kú, ông-hiō to̍h phòa-pēⁿ kòe-sin--a. Kok-ông sui-jiân chin kan-khó͘, m̄-koh khòaⁿ tio̍h chit ê tú chhut-sì ê kong-chú, kah in a-bú kāng-khoán, phôe-hu pe̍h-pe̍h-pe̍h, ba̍k-chiu tōa-tōa lúi, ū kàu kó͘-chui, i to̍h chin thiàⁿ-sioh chit ê súi-tang-tang ê cha-bó͘-kiáⁿ. Kong-chú chū sè-hàn to̍h chiok iau-kúi, khòaⁿ-tio̍h chia̍h--ê to̍h ē chhun-chhiú, mi̍h-kiāⁿ sa--leh to̍h ùi chhùi--eh that, só͘-í--à, i iáu m̄-bat tāi-chì, tú ē-hiáu kiâⁿ ê sî, to̍h chai-iáⁿ toh-kin chin pháiⁿ pō͘, la̍h-chek bô hó chia̍h, he í-á-kha bô chu-bī. I 3 hòe ê sî-chūn, lâng koh kám-kak i chiok kó͘-chui, ū siáⁿ-mih hó-chia̍h-mih-á to̍h lóng the̍h hō͘--i, khòaⁿ i chia̍h kah hiah ū chu-bī, ta̍k-ke mā kám-kak hoaⁿ-hí. M̄-koh i si̍t-chāi siuⁿ iau-sâi, kàu i 5 hòe ê sî, ta̍k-ke nā khòaⁿ-tio̍h i, to̍h ài kóaⁿ-kín kā chia̍h ê mi̍h-kiāⁿ chhàng--khí-lâi, bē-su khì tú tio̍h iau-sí-kúi! Tī chit ê kok-ka, lán lâng it-poaⁿ nā sio-chioh-mn̄g, lóng ē mn̄g kóng: “Lí chia̍h pá--bē?” M̄-koh, nā sī tú tio̍h kong-chú, to̍h bô lâng ē án-ne kā i ăi-siat-chuh, in-ūi ta̍k-ke lóng chai-iáⁿ, i éng-oán chia̍h bē pá. Ka-chài i lóng chia̍h bē tōa-kho͘, sán-pi-pa, phôe-hu koh pe̍h-chhang-chhang, só͘-í--à, lâng lóng khai-sí chheng-ho͘ i sī “Pe̍h-chhang-á Kong-chú”. Pe̍h-chhang-á kong-chú chin oa̍h-phoat, mā ū lâng kám-kak i chiok chiān, i m̄-nā chin hèng chia̍h, koh ū 2 ê pháiⁿ si̍p-koàn, tē 1 ê pháiⁿ si̍p-koàn to̍h sī, i chiok ài kâng só-mn̂g, chit ê si̍p-koàn sī án-chóaⁿ lâi--ê? Ū 1 kang hoⁿh, he tû-pâng--ê kiaⁿ i thau-chia̍h, kā mn̂g só--khí-lâi, Pe̍h-chhang-á kong-chú tī gōa-kháu lòng-mn̂g lóng 10 hun-cheng, lâng to̍h cháu--ah, tû-pâng ê chóng-phò͘ kah kha-chhiú siūⁿ-kóng i hòng-khì--ah, chán ŏ͘, siūⁿ bē-kàu liāu-lí chò hó, soah m̄ chai khì hō͘ siáng só tī tû-pâng lāi-bīn, bô-hoat-tō͘ chhut--khì, kok-ông 1 ê lâng gōng-gōng-á chē tī chhan-thiaⁿ, pak-tó͘ iau kah tân lûi-kong, tī hia siūⁿ-kóng kin-á-ji̍t àm-tǹg neh ē iáu-bē chhoân hó sè. Chit sî hoⁿh, kong-chú i ka-tī soah cháu-khì se̍h iā-chhī-á chia̍h ke-pâi, koh phòe chin-chu leng-tê. Tē 2 ê pháiⁿ si̍p-koàn to̍h sī, i chhiú chiok chiān, i chiok ài o͘-pe̍h sa pa̍t-lâng ê pó-pòe mih-á lâi sńg, m̄-nā án-ne, i tiāⁿ-tiāⁿ sńg-sńg--leh, mi̍h-kiāⁿ koh o͘-pe̍h tàn, he lâng ê pó-pòe mih-á neh! Ū 1 kái, Pe̍h-chhang-á kong-chú cháu khì ke-á lōa-lōa-sô, koán-khu--ê phài 2 ê kéng-chhat teh ka pó-hō͘, i khòaⁿ tio̍h kéng-chhat ê khò͘-tē-á khǹg 1 hù chhiú-khàu, kám-kak hòⁿ-kî, to̍h ka chioh lâi sńg, kéng-chhat khòaⁿ kong-chú kā chhiú-khàu the̍h koân-koân, ná chhiò ná tī hia thiàu-bú, khòaⁿ--khí-lâi si̍t-chāi ū-kàu kó͘-chui, siūⁿ bē-kàu i 1-ē gōng-sîn, Pe̍h-chhang-á kong-chú soah m̄-chai cháu tó khì, in-ūi án-ne, hit 2 ê kéng-chhat khì hō͘ chú-koán mē kah chhàu-thâu, koh khah chhi-chhám--ê sī, hit kang e-po͘, hit ê kéng-chhat khì lia̍h chha̍t-thau, jiok 1000 kong-chhioh liáu-āu, chóng-sǹg sī lia̍h tio̍h lâng, chit sî chiah hoat-kiàn chhiú-khàu hō͘ Pe̍h-chhang-á kong-chú chioh khì sńg, soah bô hâiⁿ--i, tú lia̍h--tio̍h ê chha̍t-thau koh khì ho͘ cháu--khì, si̍t-chāi ū-kàu soe. Hit kang beh àm ê sî, ū 1 ê seng-lí-lâng, tàⁿ tú siu hó-sè, kóaⁿ-kín beh tńg-khì pàng-jiō, kóaⁿ kàu chhù, só-sî the̍h--chhut-lâi, soah khòaⁿ tio̍h in tau tōa-mn̂g ê só téng-thâu, ke só 1 hù chhiú-khàu, hit kang, kui-tiâu ke-á ê lâng lóng thiaⁿ tio̍h ū lâng tī hia tōa-siaⁿ hoah kóng: “Góa beh pàng-jiō, góa beh pàng-jiō--lah!” Ji̍t-chí kòe liáu chiâⁿ kín, Pe̍h-chhang-á kong-chú 1 kang 1 kang-á tōa-hàn, bīn-bô͘-á mā jú lâi jú súi, jú lâi jú chhin-chhiūⁿ in a-bú, iáu m̄-koh kah in a-bú bô kāng--ê sī, i soah jú lâi jú chiān, sui-bóng i kui-kang tī hia pìⁿ-kúi-pìⁿ-koài, chō-sêng pa̍t-lâng ê khùn-jiáu, m̄-koh súi ko͘-niû-á siⁿ-sêng to̍h khah chiàm iâⁿ, ta̍k kái nā bú siáⁿ-mih tāi-chì chhut--lâi, chí-iàu i chhùi-chi̍h thó͘--1-ē, ba̍k-chiu nih--1-ē, chhiò-chhiò-á kóng: “Ph

【白蔥仔公主】EP01預告 Pe̍h-chhang-á Kong-chú

2024-06-1801:11

講趣味ê台語，做趣味ê代誌，【狡怪囡仔古】是做工á人工作室製作ê全新單元，今á日先hâm ta̍k-ke相借問--1-ē，這拜四請準時收聽【白蔥á公主】EP01，真ló͘-la̍t。 [Podcast] SoundOn https://bit.ly/ChKaL_SO Spotify https://spoti.fi/48jD2tI KKBOX Podcast https://bit.ly/ChKaL_KK Apple Podcast https://apple.co/3HZyfD3 YouTube Podcast https://bit.ly/ChKaL_YT [社交平台 Siā-kau Pêⁿ-tâi] YouTube https://bit.ly/ChKaL_YT Facebook https://bit.ly/ChKaL_FB Instagram https://www.instagram.com/chokangalang/ X (Twitter) https://twitter.com/chokangalang 方格子 https://vocus.cc/salon/cho-kang-a-lang 以下內容是漢羅kah pe̍h-ōe-jī原稿，有需要歡迎ta̍k-ke來參考。【漢羅版】白蔥á公主，白蔥á公主，白蔥á公主來--lo͘h，白蔥á公主是全世界siōng紅ê網chhèng，你若是iáu m̄-bat聽--過，按呢你to̍h tòe bē tio̍h時代--lo͘h！咱做工á人工作室下重本製作，siōng趣味ê囡á古，白蔥á公主，chit禮拜四暗時8點，tī咱做工á人節目平台正式放送，歡迎ta̍k-ke鬥陣來收聽！【Pe̍h-ōe-jī pán】 Pe̍h-chhang-á kong-chú, Pe̍h-chhang-á kong-chú, Pe̍h-chhang-á kong-chú lâi--lo͘h, Pe̍h-chhang-á kong-chú sī choân sè-kài siōng âng ê bāng-chhèng, lí nā sī iáu m̄-bat thiaⁿ--kòe, án-ne lí to̍h tòe bē tio̍h sî-tāi--lo͘h! Lán Chò-kang-á-lâng Kang-chok-sek hē tāng-pún chè-chok, siōng chhù-bī ê gín-á-kó͘, Pe̍h-chhang-á kong-chú, chit lé-pài 4 àm-sî 8 tiám, tī lán Chò-kang-á-lâng chiat-bo̍k pêⁿ-tâi chèng-sek hòng-sàng, hoan-gêng ta̍k-ke tàu-tīn lâi siu-thiaⁿ! -- Hosting provided by SoundOn

#box-pro-ellipsis-17267850905676{-webkit-line-clamp:2;}做工á人台語工作室 Chò Kang á Lâng Tâi-gí Kang-chok-sek

做工á人台語工作室 Chò Kang á Lâng Tâi-gí Kang-chok-sek