Insatge han ils participants da la stailalva dad oz communabel, els èn novizs en la scena dal schlagher popular. Els han edì lur albums da debut e tar lur stil na manca la tipica armonica «die steirische» natiralmain betg. Christa Jäger Ehrenzeller da Vättis (SG) ha fatg ina visita ad RTR. Ella raquinta da sia vita e forsa era intginas anecdotas or da la vita privata. Co ses disc da debut tuna pudais vus tadlar en la stailalva dad oz. Brennholz – la band. Uschia sa numna in giuven quartet tirolais. La musica è vegnida messa en tgina als 4 giuvens chèn tranter 15 e 17 onns. Mathias e Johannes èn numnadamain ils figls da Michael Klingenschmied il musicist dal enconuschent trio «die Grubertaler», cumplettà vegn il quartet dal cusrin Benjamin ed il segund Matthias. Natiralmain vegn era la musica da Brennholz inspirada dals Grubertalers ed uschia cuntegn lur disc da debut polcas, valzers, boarischen, balladas sco era hits dal schlagher.
Leonard, Francine Jordi, Vincent Gross ils Furbaz e Beatrice Egli, quai mo intgins dals stars da schlagher en Svizra. La paletta è gronda ed uschia è la Stailalva d'oz deditgada cumplainamain ad interpretas ed interprets svizzers. Redacziun: Christa Soliva
Savais anc as regurdar dal hit «Verdammt, ich lieb dich» da Matthias Reim, vendì sur 1 milliun giadas, ch'è daventà in grond hit? U forsa dal titel «Verlieben, verloben, vergessen, verzeihn» da Wolfgang Petry? Sche betg, lura forsa il hit «Die Gefühle haben Schweigepflicht» d'Andrea Berg, «Ein kleines Lied» dal chantadur e moderatur Leonard? «La stailalva» d'oz va bun 20 onns enavos. Igl è sco d'ir en in auter mund. Dentant, tgi avess cartì, plirs dals hits da lezzas uras aud'ins anc oz – els èn daventads vairs semperverds.
Gizzai las ureglias, sin undas rumantschas resunan oz tuns novs or da la sparta dal schlagher e dal schlagher popular. Die Amigos, il duo da success da la Germania cun lur album «Stimmen der Nacht». Ils dus frars Bernd e Karl-Heinz Ulrich fan musica dapi passa 50 onns ed uschia san els tge che lur fans taidlan gugent. Il nov disc cuntegna 17 chanzuns; musica che fa buna luna ed era balladas. Tut en tut in mix variant. «Friedensadler» è il titel dal nov disc dals Kastelruther Spatzen dal Tirol dal Sid. In album cun chanzuns d'amur, da la patria ed era chanzuns en il segn da pasch. Ed era Santiano, la band che ama aventuras, libertad e natira ha edì in nov album: «Doggerland – SOS ins Nirgendwo» in nov portatun cun chanzuns deditgadas a quests temas. E per finir tadlain anc intginas singles novas; die Draufgänger, Vanessa Mai, Ben Zucker, voXXclub, Kerstin Schmidt, Marc Pircher e Daniela Alfinito.
Hits e semperverds da pop e da schlagher, oz en furma da cover Zruck zu dir - Du entschuldige, I kenn Di – Despacito – Marmor, Stein und Eisen bricht – Heimweh – I bin a bayrisches Cowgirl – Whats Up – Silberfäden euv. Quai èn hits e semperverds che mintgin enconuscha. En la Stailalva dad oz tadlain nus dentant betg las versiuns originalas, da Nickerbocker & Biene, Peter Cornelius, Luis Fonsi, Drafi Deutscher, Plüsch, Nicki, 4 Non Blondes u Vico Torriani mabain versiuns da cover interpretà da furmaziuns dal schlagher popular. D'udir èn tranter auter ils Zellberg Buam, die Draugänger, die Grubertaler, voXXclub, Blechbixn, die jungen Rodltaler u er ils Original Zillertaler.
Oz, ils 30 da settember pudess Udo Jürgens alias Jürgen Udo Bockelmann far festa per il 90avel anniversari. Ils 21 da december avant 10 onns è il grond star da schlagher da l'Austria cun domicil en Svizra morts e quai en la vegliadetgna dad 80 onns Il proxim temp datti bain inqual event en memoria dal chantadur, pianist e cumponist. El ha scrit enturn 1'000 chanzuns e vendì passa 105 milliuns portatuns. Era la stailalva è deditgada cumplainamain ad Udo Jürgens. Nus udin ils classichers sco «Ich war noch niemals in New York», «Aber bitte mit Sahne» u «Griechischer Wein» ma er ina chanzun dal 1985 ch'è anc mai vegnida publitgada. Uss è la chanzun «Als ich fortging» vegnida publitgada sco single nova e sco promo track da l'album Udo 90, cumparì ils 27-09-2024. Quella ed anc blers evergreens ed inqual istorgia da la vita dal entertainer che ha divertì passa 60 onns in vast public, oz exclusiv en la stailalva.
Enturn 30'000 visitaders spetgan cun brama sin il grond event ch'ha lieu la proxima fin d'emna a Cuira. Il venderdi stattan ils onns 80 en il center. Las duas bands legendaras dals quels onns – Spider Murphy Gang («Skandal im Sperrbezirk») e Münchener Freiheit («Ohne Dich (schlaf ich heut Nacht nicht ein)») – laschan reviver ils onns 80 e procuran franc per festa e regurdientschas a temps passads. La sonda spetga lura natiralmain il til cun ils «hossamobiles» e blera musica dals onns 60 e 70. Per tut quels che na pon betg ir en la Halla da la citad da Cuira venderdi saira u la sonda a la parada dain nus gia oz in schatg da quai che spetga ils fans da la SchlagerParade. Bun divertiment e gia oz hossa, hossa!