Die Paldauer, Calimeros e Nockis cun nova musica. Strusch da crair, ma questas trais bands tutgan tar ils oldies en la scena da musica dal schlagher.

La band austriaca die Paldauer, die Paldauer è vegnida fundada l’onn 1968 da Franz Griesbacher ed Erwin Pfundner. Els dus èn anc oz activs. Cun semperverds sco «Tanz mit mir Corinna» e «Düsseldorfer Girl» èn els vegnids enconuschents. Er il hit actual «So bist nur du» ha purtà grond success.
L’istorgia da success dals Calimeros ha cumenzà l'onn 1976. Roland Eberhart e Kurt Wyss han fundà ina saira da cumpagnia ord spir gaudi ina band. Ed oz, quatter decennis pli tard, van els anc adina da hit tar hit. Tranter ils gronds hits èn; «Tausend Liebesbriefe», «Du bist wie die Sterne so schön» ed il hit actual «Verliebtes Herz an Bord».
Il Nockalm Quintett da l’Austria è vegnì fundà l’onn 1982 sco band dal schlagher popular. 10 onns pli tard han Gottfried Würcher è ses cumpogns midà stil e cumenzà cun musica da schlagher. Num e stil han els midà mintgatant, ma lur musica cun semperverds sco «Schuld sind deine himmelblauen Augen» ed il hit actual “Seit 1870” restan e paran da funcziunar vinavant!
Redacziun: Christa Soliva