Konsert

Í Konsert í kvöld syngur David Bowie sem Ziggy Stardust. Platan The rise and fall of Ziggy Stardust and the Spiders from mars kom út í júní 1972 og henni var fylgt eftir með mikilli tónleikaferð sem hófst í Englandi í lok janúar 72 og endað í júlí árið eftir í Hammersmith Odeon í London. Og það var einmitt þar og þá sem Bowie sagði að þetta væri sérstakt kvöld - þetta væru ekki bara síðustu tónleikarnir á túrnum, heldur síðustu tónleikarnir sem hann kæmi fram á. Hann var búinn að fá nóg í bili og ekki síst af þessum karakter sem hann var runninn saman við - Ziggy Stardust. Ziggy var orðinn miklu stærri en hann sjálfur - David Bowie. Ziggy Stardust var gaurinn sem fólkið hreifst af og kom til að sjá. Þetta voru eitthvað um 150 tónleikar í það heila á þessu rúma ári - spilað um alla Evrópu, í Japan og tvisvar til Bandaríkjanna þar sem spilað var rúmlega 40 sinnum. En þessir tónleikar sem ég ætla að bjóða upp í kvöld voru árum saman eingöngu til á „ólöglegum“ plötum, sem Bootleg, og ef menn áttu eina Bootleg plötu með David Bowie, þá var það þessi - Santa Monica 1972. Tóneikarnir voru sendir út beint á útvarpsstöð í Santa Monica 20. október 1972 og upptökurnar fóru í kjölfarið á flakk, voru gefnar út á Bootleg plötum en svo var þetta gefið út opinberlega fyrst 1994 og svo aftur af EMI árið 2008.

Í þættinum Konsert í kvöld kl. 22.05 verður boðið upp á sjaldgæfa súpu úr safni Ríkisútvarpsins - upptökur með Bubba, sem verður sextugur á árinu, allt frá árinu 1979 þegar hann heimsótti Rás 1 í fyrsta sinn. Bubbi hefur verið tíður gestur í útvarpinu allar götur siðan 1979. Hann hefur bæði talað mikið og sungið og spilað og margar af þessum heimsóknum Bubba voru hljóðritaðar og hafa verið varðveittar í safni Ríkisútvarpsins og Þess vegna er hægt að gera þátt eins og Konsert kvöldins. Elstu upptökurnar eru frá 1979 þegar hann kom í útvarpshúsið við Skúlagötu og flutti óútgefin lög sín eins og Stál og hnífur, Ísbjarnarblús, Hrognin eru að koma og fleiri. Aftur kom hann 1980, svo 1982. Verkamaðurinn og tónlistaráhugamaurinn Bubbi sem heitir Ásbjörn segir frá sjálfum sér í þættinum ofl. 1988 á 5 ára afmæli Rásar 2 var efnt til hátíðartónleika með Bubba og Megasi í nýja útvarpshúsinu í Efstaleiti - við komum við þar. Við heyrum í Bubba á Þorláksmessu á Hótel Borg löngu síðar, á Gauknum með Stríð og Friði og í útgáfutónleikum í Borgarleikhúsinu enn síðar.

Í Konsert að þessu sinni heyurm við upptökur með Axel Flóvent, Kontinuum ofl. frá Eurosnic Festival sem fór fram í Groningen í Hollandi í janúar sl. Upptökurnar koma frá Hollenska ríkisútvarpinu.

Þann 17. Febrúar fyrir þremur árum voru haldnir Minningartónleikar um Bergþóru Árnadóttur í Hofi á Akureyri og þeir eru í Konsert kvöldsins. Bergþóra var einn af frumkvöðlum vísnatónlistar á Íslandi og sendi frá sér talsvert af músík meðan hún lifði, en hún lést árið 2007, 59 ára að aldri. Í hljómsveitinni á tónleikunum í Hofi voru Þórir Úlfarsson píanó, Jóhann Hjörleifsson trommur, Eiður Arnarsson á bassa, Jón Elvar Hafsteinsson gítar, og Gísli Helgason á flautu. Söngvarar á tónleikunum voru Ragnheiður Gröndal, Hálft í hvoru, Móeiður Guðmundsdóttir, Stefán Hilmarsson og Valný Lára Jónsdóttir barnabarn Bergþóru.